Ngonda Yikumi

Ngie wummonanga phasi khumbu zinkaka kutumukina? Ntinu Davidi mvandi wuviokila mu mawu, diawu kasambidila kuidi Nzambi: ‘Phana phevi yimboti muingi yikutumukina.’ (Minku. 51:12) Davidi waba zolanga Yave. Vayi, khumbu zinkaka diba diambu diphasi kutumukina ayi mawu befu mvitu tummonanga bubu. Kibila mbi tulenda tubila mawu? Kitheti, mu kuba batu ba masumu. Kimmuadi, Satana wuntatamana kutuvukumuna muingi tubika kutumukina, dedi bo nandi kavangila. (2 Ko. 11:3) Kintatu, tuidi mu kuzingila mu nza yidi batu badi kifu ki kubangusa, ‘phevi yidi mu kutuadisa bana bakhambu tumukinanga.’ (Efe. 2:2) Tufueti tatamana kuvanga mangolo, kubika kuandi to muingi kutina masuma, vayi muingi kununga ziphukumunu zi Nkadi’ampemba ayi zi nza ayiyi, zilenda kutu vanga kubika kutumukina. Tufueti vanga mangolo muingi tutumukina Yave ayi batu kavana kitesu ki kimfumu. w23.10 6 ¶1

Mbi tulenda longuka mu mangitukulu Yesu kavanga ma kukitula nlangu vinu? Tulenda longuka dilongi ditedi kukikulula. Yesu kasa kinhemisa ko mu mangitukulu kavanga, kibila nandi kabasa kukinhemisanga ko mu mambu kaba vanganga. Mu kukikulula, khumbu zioso nandi wuvana nzitusu kuidi Tat’andi. (Yoa. 5:​19, 30; 8:28) Befu kulandakana kifuani ki Yesu mu kukikulula, tualasa kinhemisa ko mu mambu tulenda nunga kuvanga. Tubika kukinhemisa, vayi tufueti vua nkinza luaku tuidi lu kusadila Nzambi ayi tuvana nzitusu yosu kuidi nandi. (Yele. 9:​23, 24) Tuzebi ti vasi ko ni diambu tulenda nunga kuvanga mu khambu lusalusu lu Yave. (1 Ko. 1:26) Bo tukikulula, tuisinkuiza tomba ko kutambula nzitusu mu mambu mamboti tumvangila bankaka. Tuala ba mu mayangi kuzaba ti Yave wummonanga ayi wumvuanga nkinza mambu tumvanga. (Dedikisa mawu na Matai 6:​2-4; Ebe. 13:16) Bukiedika, tunkuangidikanga Yave bo tunlandakana kifuani Yesu kamonisa ki kukikulula.—1 Pet. 5:6. w23.04 4 ¶9; 5 ¶11-12

Mu nzila phevi yinlongo mvuala Polo wutuadusu muingi kukindisa Baklisto, kuvua bankaka nkinza. Buidi tulenda sadila dilongi adiodio bo tuidi mu lukutukunu? Mu kutebukanga moyo ti bankaka mvandi bantomba kuvana mimvutu. Yindula mu kifuani akiki. Bukiedika ti bo muidi mu masolo ayi bakundi baku, ngie to wuntubanga mu kukhambu kuba vana luaku lu kutuba? Ndamba! Kibila ngie wuntomba bawu mvawu bayoluka. Bobuawu mvandi mu zikhutukunu, tuntomba kuvana luaku kuidi batu bawombu muingi mvawu bayoluka. Kibila, phila yimueka tulenda kindisila zikhomba zitu, yidi mu kuba vana luaku muingi bawu mvawu bayoluka. (1 Ko. 10:24) Tutatamana kuvana mimvutu mikhufi muingi kuvana bankaka luaku lu kuvana mimvutu. Diawu kheti bo wumvana mimvutu mikhufi bika kutuba mambu moso mamfunu madi mu lutangu. Kibila, ngie kutubila mambu moso mamfunu madi mu lutangu, bankaka basinkuiza baka ko ma kutuba. w23.04 22-23 ¶11-13

Tufueti tatamananga kutebuka monyo nkinza wu kusadisa bankaka, bulutidi bo tumvanga kisalu ki kusamuna. Tufueti ba mayindu mafuana mu kisalu ki kusamuna. Kibila tuidi luaku lu kuzaba batu bawombu badi binganga, zikhadulu ayi mimvila voti bikhulu biviakana. Ayi befu tulenda landakana kifuani ki mvuala Polo wuba mayindu mafuana. Yesu, wumvana kiyeku ki kuba “mvuala wu mimvila minkaka.” (Lom. 11:13) Mu kiyeku katambula, mvuala Polo wusamuna kuidi basi Yuda, basi Ngeleku, batu ba luzabu, batu bakhambulu beni mbakulu ayi mintinu. Muingi kunhikuna mintima mi batu baba bikhulu biviakana, mvuala Polo wuyiza ba “Biuma bioso kuidi batu ba ziphila zioso.” (1 Ko. 9:​19-22) Mvuala Polo wubotula thangu muingi kuyindula mu batu kaba samuna ayi mambu baba kikininanga mu binganga biawu. Kuvanga mawu kunsadisa kuba mayindu mafuana ayi kusamuna mu phila yiba nhikunanga mintima miawu. Mvitu tulenda baka ndandu mu kisalu ki kusamuna, befu kubotula thangu muingi kuyindula mu zitsatu zi batu tunsamuna. w23.07 23 ¶11-12

Kulembama yidi khadulu yimangolo, bakana ko kulebakana. Kibila vantombuluanga mangolo, muingi kutatamana kuba wuvumbama bo wumviokila mu zithotolo. Kulembama yidi khadulu yidi mu khati ‘mbutu wu phevi yinlongo.’ (Nga. 5:​22, 23) Kikuma ki Kingeleko ‘kulembama,’ ba kisadila muingi kutubila mvalu bambuilanga ku nsitu muingi ku tuila. Yindulabu mvalu wunsitu, wunkuiza kolamanga, vayi wawu wuntatamananga kuba mangolo. Buabu, buidi batu balenda kunina khadulu yinlembami ayi mu yoyawu thangu kutatamana kuba mangolo? Tulendi mavangila ko mu mangolo mitu vayi kudinda phevi yinlongo yi Nzambi mu nsambu, yilenda ku tusadisa kukuna khadulu ayoyo yimboti. Bivisa bimmonisa ti tulenda kuna khadulu beni ayi Zimbangi ziwombu zi Yave, bavana mimvutu mu phila yifuana, bo baviokila mu zikuamusu ayi bavana kimbangi kimboti.—2 Ti. 2:​24, 25. w23.09 15 ¶3

Mu thuadusulu yi phevi yinlongo, mvuala Yoane mu kimona mesu wumona 24 di bakulutu ku diyilu kubuongimina Yave. Bawu baba buongimina Nzambi mu kutuba ti “nandi wufueni mu kutambula nkembu, nzitusu ayi lulendu.” (Nzai. 4:​10, 11) Zimbasi zikuikama zidi ku diyilu, mvandi badi bibila biwombo muingi kuzitisa ayi kukembisa Yave. Bawu badi na Yave ku diyilu ayi banzebi buboti. Bawu bammonanga zikhadulu zi Yave mu mambu nandi kamvanganga. Bo bammonanga phila Yave kamvangilanga mambu, bawu ba kunzitisanga beni. (Yobi 38:​4-7) Befu mvitu, tufueti zitisanga Yave mu minsambu mitu. Tulenda vangila mawu, mu kunkamba luzolo tuidi mu nandi ayi kibila tukunzitisilanga. Bo wuntanga ayi wunlonguka Kibibila, meka kubakula zikhadulu zi Yave zi kuvanganga kukuituka. (Yobi 37:23; Loma 11:33) Bosi kamba Yave mabanza maku matedi zikhadulu aziozio. Mvandi tulenda zitisa Yave, kibila nandi wu tusadisanga ayi wunsadisanga zikhomba zitu mu nza yimvimba.—1 Samu. 2:​1, 2. w23.05 3-4 ¶6-7

Mu mvu 1919, kinganga ki kiedika kisa bue ba ko kithuadi na Babiloni Yinneni. Mu mvu awowo, “nnanga wukuikama” wutona kusala muingi kutomba batu baba mintima mikubama muingi kudiatila mu “nzila yi busonga.” (Mat. 24:​45-47; Yesa. 35:8) Tumvutulanga beni matondo mu kisalu kikuikama ki “kukubika nzila” bavanga muingi kusadisa batu kudiatila mu nzila ayoyo ayi kubuela nzailu’awu mu zikhanu zi Nzambi. (Zinga. 4:18) Batu bandiatilanga mu nzila ayoyo, balenda natina luzingu luawu mu phila Yave Nzambi kantombila. Kibila Yave kakuikanga ko dikabu diandi kubalula zikhadulu ziawu mu kinzimbukulu. Vayi nandi wunsadisanga dikabu diandi, muingi muinda wukienzula malembe malembe. Bukiedika, befu boso tuala ba mu mayangi bo tuala nunga kuzitisa Yave mu mambu tumvanga. Dedi yoso kuandi nzila, vantombuluanga kuludika ayi kudiodisa muingi yitatamana kuba yidiodila. Tona mu mvu 1919, batu bakuikama bantatamananga kukubika “Nzila yi Busonga” muingi kusadisa batu bawombo kubasika ku Babiloni Yinneni. w23.05 17 ¶15; 19 ¶16

Zikhomba badi mu Dingumba Dintuadisi, bankubikanga minsadisi miawu badi mu mangumba mankaka. Minsadisi amiomio, badi bakuikama mu biyeku bantambulanga. Bawu badi bakubama muingi kutatamana kukieba mamemi ma Klistu. Kheti mu thangu Baklistu boso basolu bala ba ku diyilu kutsuka ziphasi zingolo, mbuongimini yi kiedika yala tatamana. Tumvutulanga matondo ti mu thuadusulu yi Yesu Klistu, bisadi bi Nzambi va ntoto balasa kuekulu ko. Bukiedika, mu thangu ayoyo Ngongi ayi Mangongi voti lumbundunu lu zitsi bala ku tunuanisa. (Yehe. 38:​18-20) Vayi mawu mala monika mu mua thangu yikhufi ayi malasa tula ko nkaku dikabu di Yave kumbuongimina. Nandi wala kuba vukisa. Mu kimona meso, mvuala Yoane wumona ‘nkangu wunneni’ wu batu badi mu dingumba di mamemi mankaka. Yoane bankamba ti nkangu awowo wunneni, ‘banunga mu ziphasi zingolo.’ (Nzai. 7:​9, 14) Bukiedika, Yave wala bakieba! w24.02 5-6 ¶13-14

Mbi tulenda vanga muingi kutambula phevi yinlongo? Tulenda dinda yawu mu nsambu, kulonguka Diambu di Nzambi ayi kuba kithuadi na kimvuka kiandi kintuadusuanga mu phevi yinlongo. Kuvanga mawu kunkuiza tusadisa kukuna mbutu “wu phevi yinlongo.” (Nga. 5:​22, 23) Kibila Nzambi wumvananga to phevi’andi yinlongo, kuidi batu bantatamananga kuba manyindu ayi zikhadulu zimboti. Nandi kalendi tatamana ko ku tuvana phevi’andi befu kuba manyindu makhambu fuana ayi kuvanga mambu mambi. (1 Te. 4:​7, 8) Mvandi muingi tutatamana kutambula phevi yinlongo, vantombulu “kukhambu lenza zimbikudulu.” (1 Te. 5:20) “Zimbikudulu” zidi zitsangu zibikulu mu phevi yinlongo yi Nzambi. Ziawu zintubila mvandi matedi kilumbu ki Yave ayi bilumbu tuidi mu kuzingila. Befu tuyindulanga ko ti mawu madi ndosi ayi ti Alimangedoni yalasa monika ko. Vayi tuzebi ti thangu yiluelu yinkhambu muingi yawu yituka ayi tumonisanga zikhadulu zimboti mu “kuvanga mamboti” kadika kilumbu.—2 Pet. 3:​11, 12. w23.06 12 ¶13-14

Mu kuba Baklistu, mbi tulenda vanga boti vammonika mu telefon’itu voti mu televisor zifilme zimmonisa batu bambundana nhitu? Mu thinu, tufueti bika kutala biuma beni. Kuzaba ti luidi luaku lunneni kuba kinkundi kifikama na Yave, kulenda ku tusadisa kubaka makani amomo. Kheti zifoto zimmonisa batu bakhambu vuata buboti, zilenda ku tuvanga kuba mayindu ma kuvanga kitsuza. Kibila mbi tufueti bikila kutala ziawu? Kibila, tuinsintomba ko kuvanga mambu mankuiza tunata kuvanga kitsuza. (Mat. 5:​28, 29) Nkulutu mueka wu kimvuka wunkalanga ku Tailândia bantedilanga David wutuba: “Minu yikikuvusanga: Kheti foto yimmona, yisimmonisa ko batu bambundana nhitu, vayi bukiedika ti Yave wunkuiza yangalala mi kutatamana kutala yawu?’ Kuyindula mu phila ayoyo, ku kutsadisanga kubaka makani ma nduenga.” Kuzaba ti mambu tumvanga malenda bika Yave mu kiunda, mankuiza tusadisa kubaka makani ma nduenga. Kuvumina Nzambi yidi ‘thonono’ yi ‘nduenga.’ w23.06 23 ¶12-13

“Bivinga” bantubila avovo, ḿba binsundula zinzo zi Kintinu. Mu thangu ziphasi zingolo, tuala baka lukiebu lu Yave befu kutatamana kuba kithuadi na zikhomba. Diawu, vantombulu kuvanga mangolo mawombu muingi kuzola zikhomba zitu. Kibila mawu mala tombulu tuvanga muingi tuvuka. “Batu boso bala tovuka mu thangu ziphasi zingolo, bulutidi dikabu di Yave.” (Sefa. 1:​14, 15) Vayi befu kutona kukubama bubu, tuala ba bavumbama ayi tuala nunga kusadisa bankaka. Mvandi tuala nunga kukindama mu zioso kua ziphasi ziala tukuizila. Bo zikhomba zitu bala viokila mu ziphasi, tuala ba bakubama muingi kuba sadisa, kumonisa kiadi ayi kuba vana biuma bintombulu. Ayi befu kuvanga mangolo ma kuzola zikhomba zitu tona bubu, tuala nunga kumonisa luzolo alolo mu bilumbu binkuiza. Ayi Yave wala ku tusakumuna mu kutuvana luzingu lu mvu ka mvu mu nza yo bivuka ayi ziphasi bialasa bue ba ko.—Yesa. 65:17. w23.07 7 ¶16-17

Khumbu ziwombo, Diambu di Nzambi dimfuanikisanga babakala bakuikama dedi, batu ba mangolo. Vayi kheti babakala baba mangolo, khumbu zinkaka baba kuyimuenanga ti basi ko mangolo. Dedi, ntinu Davidi khumbu zinkaka waba kukimuenanga ti ‘mangolo mandi maba buka mongo,’ vayi khumbu zinkaka nandi ‘wuba mu boma.’ (Minku. 30:7) Kheti Samisoni wuba beni mangolo mu phevi yinlongo yi Nzambi, vayi wuzaba ti mu khambu ku lusadusu lu Nzambi, khanu nandi wuba ‘wulebakana dedi babakala bankaka.’ (Nkongu. 14:​5, 6; 16:17) Babakala abobo bakuikama, baba mangolo kibila Yave nandi wuba vana mawu. Mvuala Polo wuzaba ti nandi mvandi waba tomba mangolo ma Yave. (2 Ko. 12:​9, 10) Nandi wuviokila mu mambu ma kimbefu . (Nga. 4:​13, 14) Khumbu zinkaka, wunuana nzingu muingi kuvanga mambu masonga. (Lom. 7:​18, 19) Ayi khumbu zinkaka waba kuazukanga ayi kuba mu boma mu mambu malenda monika. (2 Ko. 1:​8, 9) Vayi mvuala Polo wutuba ti bo kaba banga wulebakana buna buawu kaba bakilanga mangolo. Kibila Yave waba kumvananga mangolo kaba tomba muingi kukindama mu mambu kaba viokila. w23.10 12 ¶1-2

Bo khumbu zinkaka tunnuana nzingu wu kuyimuena ti tuisi ko luvalu, tufueti tebukanga moyo ti naveka Yave wu tutumisa kuidi nandi. (Yoa. 6:44) Nandi wumona mambu mambote mu befu, mo befu veka tunkhambu mona ayi nandi zebi mintima mitu. (2 Lusa. 6:30) Diawu tufueti ba lufiatu bo nandi kantuba ti tuidi luvalu. (1 Yoa. 3:​19, 20) Ava kuzaba kiedika, bawombu mu befu tuvanga mambu mo tukidi nyonginanga nati bubu. (1 Pet. 4:3) Baklistu bankaka bakuikama, baviokila mu mambu amomo. Bukiedika ti ntim’aku wu kufundisanga? Boti buawu, ngie wulenda baka mbombolo mu kuzaba bisadi bikuikama bi Yave baviokila mu mawu. Dedi, mvuala Polo waba kuyitadilanga buka ti kasi ko luvalu bo kaba yindulanga mu zinzimbala ziandi. (Lom. 7:24) Bukiedika, mvuala Polo wunyongina masumu mandi ayi wubotama. Khumbu mueka nandi wutuba ti “widi wutsuka mu bapostolo boso” ayi nandi “lutidi” masumu.—1 Ko. 15:9; 1 Ti. 1:15. w24.03 27 ¶5-6

Dilongi tulenda longuka mu makani mambi Ntinu Yoasi kabaka didi, vantombulu kusola bakundi bamboti bankuiza tusadisa—ayi bantomba kukuangidika Yave. Tuisintomba ko to bakundi badi yitu phunga yimueka. Tebuka moyo ti Yoasi wuba beni ditoku na nkundi’andi Yoada. Mu matedi kutomba bakundi wukiyuvusa: ‘Bawu bankuiza tsadisa kukindisa kiminu kiama mu Yave? Bawu bankuiza khindisa kuzingila mu zithuadusulu zi Yave? Bawu banlonganga matedi Yave ayi kiedika kiandi? Bawu bammonisanga lukinzu mu zithuadusulu zi Nzambi? Bawu banzolanga to kukhamba mambu yintomba kukuwa voti bammonisanga kibakala mu kutsemba bo minu yimvekuka?’ (Zinga. 27:​5, 6, 17) Diawu, boti bakundi baku bazolanga ko Yave, buna bika kutatamana kuba yawu bukundi. Vayi boti widi bakundi banzolanga Yave, buna tatamana yawu—bawu bala ba kifuani kimboti kuidi ngiewu!—Zinga. 13:20. w23.09 9-10 ¶6-7

Kikuma Alfa yidi thonono yi alfabetu yi Kingeloko ayi Ômega yidi tsukulu. Mu kutuba ‘Alfa ayi Ômega Yave wumonisa ti bo kantona kuvanga diambu, nandi wundukisanga diawu. Bo Yave kavanga Adami ayi Eva, nandi wuba kamba: Butanu bana ayi wesanu ntoto ayi yadilanu wawu.’ (Ngene. 1:28) Mu thangu ayoyo Yave wutuba ‘Alfa’ nandi wumonisa lukanu luandi. Vala ba thangu yo nkunu wuvedila wu Adami ayi Eva bantumukinanga, bala wesa ntoto ayi kubalula wawu paladizu. Bo mambu amomo mala salama, Yave wala tuba ‘Ômega.’ Bo Yave kamanisa kuvanga ‘diyilu ayi ntoto ayi biuma bioso bidi muawu,’ nandi wutuba diambu dimmonisa ti lukanu luandi luala salama. Nandi wukanikisa kudukisa lukanu luandi mu batu. Mawu mala salimina ku tsukulu kilumbu ki sambuadi.—Ngene. 2:​1-3. w23.11 5 ¶13-14

Yave wukanikisa kuidi basi Yuda ti, wala botula bikaku bioso biala batula nkaku bo bala vutuka. Kheti disaba ko diambu diluelu kubotuka ku Babiloni nate ku Isaeli. Basi Yuda bakuikama bazaba ti luba luaku lunneni kuvutuka ku Isaeli, kibila lusakumunu lunneni luaba kuba vingila. Ku Babiloni kuisa ba ko kibuangu baba buongiminanga Yave, kuvana minkhailu ayi zimfumu zi zinganga Nzambi muingi kutuama ntuala. Ku divula beni kuluta ba batu baba buongiminanga zinzambi zi luvunu kena bo baba landakananga zithuadusulu zi Yave. Diawu basi Yuda bakuikama, babela phuila yi kuvutuka ku ntoto’awu muingi bavutula mbuongimini yikiedika. w23.05 14-15 ¶3-4

Vantombulu lusadusu lu phevi yinlongo muingi tutatamana kudiatila banga “bana ba kiezila.” Kibila mbi? Kibila didi diambu diphasi beni kuba badiodila mu nza ayiyi yiwedi matingu. (1 Te. 4:​3-5, 7, 8) Phevi yinlongo yilenda kutusadisa kunuana na mayindu ma nza ayiyi kubunda mvandi bikhulu ayi mayindu makhambulu kithuadi na mayindu ma Nzambi. Phevi yinlongo mvandi yilenda kutusadisa kukuna mbutu wukiezila wunsundula “mambu moso mamboti ayi makiedika.” (Efe. 5:9) Phila tulenda bakila phevi yinlongo yidi mu kudinda yawu. Yesu wutuba ti Yave ‘wala vana phevi yinlongo kuidi baboso bakundinda yawu.’ (Luk. 11:13) Bo tunkembisa Yave mu zikhutukunu, yidi phila tuntambudilanga phevi yinlongo. (Efe. 5:​19, 20) Phevi yinlongo yilenda kutusadisa kuzingila mu phila yinkuangidika Nzambi. w24.03 23-24 ¶13-15

Ngie wuntomba kuluta ba mvibudulu? Boti buawu, nata mawu mu misambu. Mvibudulu yidi mu khati mbutu wu phevi yinlongo. (Nga. 5:​22, 23) Tulenda sambila muingi Yave ka tuvana phevi yinlongo ayi ka tusadisa kukuna zikhadulu zi mbutu wu phevi yinlongo. Befu kuviokila mu mambu manthota mvibudulu’itu, “tulenda dinda muingi phevi yinlongo yitusadisa” kumonisa mvibudulu. (Luk. 11:13) Mvandi tulenda dinda muingi Yave ka tusadisa kuba momawu mayindu nandi kadi. Befu kutatamana kusambila muingi kukuna khadulu ayoyo, buawu tunkuiza nungina kumonisa yawu mu luzingu luitu. Mvandi kuyindula mu bifuani bi Kibibila, kulenda tusadisa. Muawu muidi bifuani bi batu bawombu bamonisa mvibudulu. Befu kuyindula mu bifuani abiobio, tulenda longuka ziphila zi kumonisina mvibudulu. w23.08 22 ¶10-11

Yesu wukindisa Muala Petelo ti Yave wala kunsadisa. Bo Yesu kavulubuka, nandi wuvanga mangitukutulu muingi Petelo ayi bapostolo bankaka babaka zifu ziwombu. (Yoa. 21:​4-6) Mangitukulu amomo, mavana lufiatu kuidi Petelo ti Yave wunkuiza dukisa zitsatu ziawu zi kinsuni. Ḿba Petelo wutebuka moyo mambu Yesu katuba ti Yave wundukisanga zitsatu zi batu “bantulanga Kintinu ki Nzambi va theti mu luzingu luawu.” (Mat. 6:33) Mu lusalusu alolo, Petelo wutula kisalu ki kusamuna va theti mu luzingu luandi, kubika kuandi kisalu ki kuvuba zifu. Nandi wuvana kimbangi kinneni mu kilumbu ki Pentekote mvu 33 T.K., mu kusadisa bivevi bi batu kukikinina zitsangu zimboti. (Mav. 2:​14, 37-41) Buviokila thangu, nandi wusadisa basi Samalia ayi bo bakhambu ba basi Yuda kuba Baklistu. (Mav. 8:​14-17; 10:​44-48) Bukiedika, Yave wusadila Petelo muingi kusadisa batu ba mimvila mioso kukota mu kimvuka ki Baklistu. w23.09 20 ¶1; 23 ¶11

Bo vavioka mimvu miodi, basi Babiloni batulula Yelusalemi. Nebukadenesali, ntinu Babiloni wulota kitumba kinneni. Nandi wutuba ti wunkuiza vonda babakala boso badi nduenga, kubunda mvandi Danieli ba kukhambu kunkamba tsundu yi ndosi’andi. (Dani. 2:​3-5) Vabe tombulu Danieli kuvanga dioso diambu mu thinu, kibila khanu batu bawombu bafua. Nandi “wuyoluka na ntinu ayi wundinda mua thangu muingi kanunga kunkamba tsundu yi ndosi’andi.” (Dani. 2:16) Vabe tombulu kibakala ayi kiminu muingi kuvanga mawu. Kibila ava mambu amomo mamonika, vasi ko bivisa bimmonisa ti nandi wubangula ndosi yi mutu. Nandi wudinda bakundi bandi ‘basambila muingi Nzambi yi kiadi kansadisa kubakula tsundu yi ndosi beni.’ (Dani. 2:18) Yave wutambudila minsambu miawu. Ayi mu lusalusu lu Nzambi, Danieli wununga kukamba tsundu yi ndosi yi Nebukadenesali. Mu kibila akiokio, basa bue vonda ko Danieli ayi bakundi bandi. w23.08 3 ¶4

Mona ndandu yinkuizilanga mu kumonisa mvibudulu. Befu kumonisa mvibudulu, tunkuiza ba mayangi ayi bavumbama. Diawu tulenda tuba ti mvibudulu wulenda tusadisa kuba buvinya bumboti ayi mayindu mamboti. Befu kumonisanga mvibudulu kuidi bankaka, tunkuiza baka bakundi bamboti, kithuadi mu kimvuka ayi bo mutu ka tusoka, tuisinkuiza fika fuema ko ayi mawu mankuiza sadisa kubika buela mambu. (Minku. 37:​8, nota.; Zinga. 14:29) Ayi bulutidi, tunlandakananga kifuani ki Tat’itu yi diyilu ayi kunluta kumfikama. Bukiedika, mvibudulu yidi khadulu yimboti beni yintuadisanga ndandu kuidi befu boso. Kheti disi ko diambu diluelu kukuna khadulu ayoyo, vayi mu lusalusu lu Yave tulenda tatamana kukuna yawu. Ayi bo tuidi mu kuvingila nza yimona, tulenda ba lufiatu ti “mesu ma Yave mankengidilanga baboso ba kumvuminanga, kuidi bo bamvingilanga mu luzolo luandi lukuikama.” (Minku. 33:18) Diawu, bika befu boso tubaka makani ma kutatamana kuvuata mvibudulu. w23.08 22 ¶7; 25 ¶16-17

Tiagu wusudikisa kifuani kintubila dibakala dimueka wumonisa mamboti kuidi kisina vayi kasamonisa ko mamboti kuidi kiphumbulu. Buabu, bukiedika ti mambu amomo mamonisa ti nandi widi kiminu? (Tia. 2:​1-5, 9) Tiagu wutubila mvandi matedi mutu wummona khomba wukambulu kikuvuata voti kikudia vayi kasi kumvana ko lusalusu. Diawu kheti mutu awowo wuntuba ti widi kiminu vayi mavanga mandi mammonisa ti kasi ko kiminu. (Tia. 2:​14-16) Tiagu wutubila kifuani ki Lahabi nkieto wu kindumba wumonisa kiminu mu mavanga. (Tia. 2:​25, 26) Nandi wuyuwa matedi Yave ayi phila kaba sadisila basi Isaeli. (Yosua 2:​9-11) Nandi wumonisa kiminu mu mavanga, mu kusueka minlenga mambu miodi mibasi Isaeli muingi babika kuba vonda. Diawu kheti nkieto awowo wuba mutu wu masumu ayi kasa ba ko musi Isaeli, bayiza ntedila mutu wusonga dedi bo Abalahami bantedila. Kifuani kiandi kimmonisa nkinza wu kumonisa kiminu mu mavanga. w23.12 5-6 ¶12-13

Tulendi kuangalala ko to mu kuzaba mambu matheti ma Kibibila. Mu lusalusu lu phevi yinlongo yi Nzambi, tuidi bakubama muingi kulonguka ‘mambu maphinda ma Nzambi.’ (1 Ko. 2:​9, 10) Buidi wummuena kutona thuadusulu yi ndongukulu yi ngie veka muingi kufikama Yave? Dedi, ngie wulenda longuka buidi nandi kamonisina luzolo kuidi bisadi biandi mu thangu yikhulu ayi buidi mawu mamvanina bivisa ti nandi mvandi wukuzolanga. Mvandi wulenda longuka thuadusulu yi mbuongimini Yave kavana kuidi basi Isaeli ayi kumona buidi yawu yindedikinina na thuadusulu yi Baklistu bubu. Voti wulenda longuka zimbikudulu zisalama mu Yesu bo kaba va ntoto ayi mu kisalu kiandi ki kusamuna. Ngie wulenda baka mayangi mu kulonguka mambu amomo, mu kusadila Índice Das Publicações Da Torre De Vigia voti Guia De Pesquisa Para Testemunhas De Jeová. Kulonguka mambu maphinda ma Kibibila malenda kindisa kiminu kiaku ayi kukusadisa ‘kubaka nzailu yi Nzambi.—Zinga. 2:​4, 5 w23.10 18-19 ¶3-5

Kikuma mvuala Petelo kasadila muingu kutubila “lungolo”, kinsundula “luyalubuka.” Tsielu yimmuadi yi lutangu, nandi wutubila matedi ndandu luzolo lungolo luntuadisanga. Lumfukanga masumu ma zikhomba zitu. Tala kifuani akiki: Yindul’abu boti widi meza yi kudila yidi mavudu mawombu. Mbi ngie wunkuiza vanga muingi kufuka mavudu beni? Ḿba wunkuiza yala nledi muingi kufuka mavudu moso, kubika kuadi to divudu dimueka. Bobuawu mvandi, befu kuba luzolo lungolo kuidi zikhomba zitu, tulenda “fuka” voti kulemvukila kubika to khumbu yimueka voti khumbu wadi, vayi kulemvukila zinzimbala zioso. Luzolo tummonisa kuidi bankaka, lufueti ba lungolo muingi tununga kulemvukila zinzimbala ziawu, kheti dilenda ba diambu diphasi kuvanga mawu. (Kolo. 3:13.) Bo tunlemvukila bankaka, tunkuiza monisa ti luzolo luitu, luidi lungolo ayi tunkuiza yangidika Yave. w23.11 11-12 ¶13-15

Bo Ntinu Yosia kayiza ba nkulutu, wutona kuludika tempelo. Bo baba vanga kisalu, babakula ‘buku yi minsiku Yave kavana kuidi Mose.’ Bo ntinu kayuwa mambu baba tanga mu buku beni, mu thinu nandi wusadila mambu maba masonama muna. (2 Lusa. 34:​14, 19-21) Ngie wuntanganga Kibibila kadika kilumbu? Boti wudi mu kuvanga mawu buidi bunkuendila matangu beni? Ngie wunsonikanga matangu ma Kibibila malenda kusadisa? Bo Yosia kaba 39 di mimvu, nandi wuvanga nzimbala yituadisa lufua luandi. Nandi wufiatila mu naveka kubika kuandi mu zithuadusulu zi Yave. (2 Lusa. 35:​20-25) Mbi tulenda longuka mu mawu? Bosu kua bubela phunga tukeli voti thangu kua tuma longukila Kibibila, tufueti tatamana kutomba thuadusulu yi Yave. Mawu mansundula kutatamana kusambila, kulonguka Diambu diandi ayi kutomba malongi ma zikhomba bayonzuka mu kiphevi. Mu phila ayoyi, tualasa vanga ko beni zinzimbala ayi tuala baka mayangi.—Tia. 1:25. w23.09 12 ¶15-16

Kibibila kintubila beni bifuani bi bakietu baba luzolo mu Yave ayi bansadila. Dedi, “bawu bafueti ba bifu bi mboti” ayi “bafueti ba bakuikama mu mambu moso.” (1 Ti. 3:11) Mvandi, zikhomba zi bakietu balenda mona mu bimvuka biawu, bifuani bi bakietu bayonzuka mu kiphevi bio bawu balenda landakana. Zikhoma zibikhupa, buidi lummuena kulandakana mua bifuani bi bakietu bayonzuka mu kiphevi? Mona zikhadulu ziawu zimboti. Ayi mona buidi mulenda monisina zikhadulu beni. Kukikulula yidi khadulu yinkinza kuidi Baklistu bayonzuka mu kiphevi. Boti nkietu wukikululanga, nandi wala ba kikundi kifikama na Yave ayi kuidi bankaka. Dedi nkietu wunzolanga Yave, mu kukikulula nandi wunsolanga kubuela mioku minsua mi Tat’andi yi diyilu katsikika. (1 Ko. 11:3) Minsua beni minsaduluanga mu kimvuka ayi va dikanda. w23.12 18-19 ¶3-5

Yave wuntomba muingi nnuni kazola nkazi’andi ayi kukieba zitsatu ziandi zi kinsuni ayi zi kiphevi. Kukuna zikhadulu dedi, kuyindula buboti, kumonisa lukinzu kuidi bakietu ayi kuba mutu wu lufiatu, kuala kusadisa kuba nnuni wumboti. Ḿba bo ngie wala kuela, bumviokila thangu wulenda ba tata. Mbi wulenda longuka mu kifuani ki Yave matedi kuba tata yimboti? (Efe. 6:4) Yave wuzabikisa kuidi batu ti wunzolanga Muan’andi Yesu ayi widi lunungu luandi. (Mat. 3:17) Ngie kuba tata, monisa mu mavanga ayi kambanga bana baku ti wuba zolanga. Tondanga ayi nyunganga bana baku mu mambu mamboti bamvanga. Matata banlandakananga kifuani ki Yave, bansadisanga bana bawu kuba babakala ayi bakietu bayonzuka mu kiphevi. Diawu ngie widi ditoku, wulenda kubama bubu mu kiyeku akiokio mu kukiebanga buboti bankaka va dikanda diaku, mu kimvuka ayi mu kulonguka kuba monisa luzolo ayi kuba vua nkinza.—Yoa. 15:9. w23.12 28-29 ¶17-18

Mu kuba bisadi bikuikama bi Yave, befu tumviokilanga mu ziphasi ayi bimbevu bimmonikinanga kuidi batu boso. Befu mvitu tulenda kindama mu zithotolo, mu zikhuamusu zinkuizilanga kuidi batu banlendanga dikabu di Nzambi. Kheti Yave katulanga ko nkaku muingi tubika viokila mu mawu, nandi wukanikisa kutusadisa. (Yesa. 41:10) Mu lusalusu luandi, tulenda tatamana kuba mayangi, kubaka makani mamboti ayi kutatamana kuba bakuikama mu nandi kheti mu mambu maphasi tumviokila. Yave wutuvana Kibibila kintuba matedi ‘ndembama yi Nzambi.’ (Fil. 4:​6, 7) Ndembama ayoyo yinsundula, luvovomu lu tuvanganga kuba kinkundi kifikama na Yave. Ndembama ayoyo “yilutidi diela dioso” ayi yilutidi kena phila tulenda yindudila. Ngie mana ba wuvumbama bo wumana kuvanga nsambu kuidi Yave? Luvovomu alolo, yawu ‘ndembama yi Nzambi.’ w24.01 20 ¶2; 21 ¶4

Baboso banzolanga Yave, banzitisanga dizina diandi mu ntima woso. Ntinu Davidi wuvisa ti kuzitisa dizina di Yave, yike kuandi phila mueka kuzitisa naveka Yave. Bo tunkuwa dizina di Yave, mawu matuvanga kuyindula zikhadulu ziandi ayi biuma bioso bimboti kavanga. Davidi waba tomba kuzitisa dizina dinlongo di Tat’andi ayi kuvangila ‘mawu mu ntima woso.’ Basi Levi mvandi, baba tuamanga ntuala muingi kuzitisa Yave. Mu kukikulula, bawu bavisa ti balendi zitisa ko dizina di Yave mu phila yisonga. (Nehemia 9:5) Bukiedika, nzitusu awowo wuyangidika ntima wu Yave. w24.02 9 ¶6

Yave kasinkuiza yindula ko ti wisi ko luvalu ngie kukhambu nunga kudukisa makani malutidi mu kitesu kiaku. (2 Ko. 8:12) Longuka mu zinzimbala ziaku. Tebukanga moyo makani wumana dukisa. Kibibila kintuba ti ‘Nzambi widi wusonga kalendi zimbakana ko kisalu kinu.’ (Ebe. 6:10) Diawu ngie mvaku wulendi zimbakana ko kisalu wuvanga. Yindulanga mu makani wumana dukisa, kuba kuandi mu kununga kuba kikundi kimboti na Yave, mu kulonga bankaka matedi nandi ayi kuba sadisa kubotama. Dedi bo ngie manungina kukonzuka mu kiphevi ayi kudukisa makani maku, mvaku wulenda tatamana kukonzuka ayi kudukisa makani wuntsikika bubu. Mu lusalusu lu Yave wulenda nunga kudukisa makani maku. Bo wumvanga mangolo ma kudukisa makani maku ma kiphevi, bika kuzimbakana kutsikika mayindu mu lusalusu lu Yave ayi mu phila kakusakumunina. (2 Ko. 4:7) Ayi ngie kukhambu vonga, wunkuiza tambula lusakumunu luwombo.—Nga. 6:9. w23.05 31 ¶16-18

Mu nzila Kibibila, Yave wunzolanga kumonisa lunungu luandi kuidi batu bo nandi kanzolanga. Masonoko mantubila khumbu wadi Yave kakamba kuidi Yesu ti wu kunzolanga ayi widi lunungu luandi. (Mat. 3:17; 17:5) Ngie wuntomba kukuwa Yave ka kukamba ti ke lunungu luandi? Yave kayolukanga ko yitu mu kimutu, vayi wunkolukanga yitu mu nzila Kibibila. Befu tulenda kuwa Yave ku tukamba ti tuidi lunungu luandi bo tuntanga mambu Yesu katuba mu zibuku zintubila matedi nandi. Yesu wulandakana kimutu ki Tat’andi mu phila yivedila. Diawu bo tuntanga mambu Yesu kakamba kuidi minlandikini miandi kheti baba batu ba masumu, tulenda mona buka ti Yave kemu kutu kamba mambu beni. (Yoa. 15:​9, 15) Bo tumviokila mu ziphasi, masinsundula ko ti tusiedi ko lunungu lu Nzambi. Ayi ziphasi zi tuvana luaku muingi kumonisa luzolo lungolo ayi lufiatu tuidi mu Yave.—Tia. 1:12. w24.03 28 ¶10-11