KIKHUKU KI 2

Ba Wukwikama mu Ǹnuni ove mu Ǹkazi’aku

“Diawu mutu kabika vambisa kibundisa Nzambi.” —Malako 10:9, NM

Lukwikamu, nkadulu yimboti Yave kaǹtomba mu bisadi byandi. (Mika 6:8) Nkadulu ayoyi ǹkinza beni yidi va dikwela, kibila ya kunkambu, lufyatu lulendi ba ko. Lufyatu lumvanganga luzolo lubwelama mu ǹnuni voti mu ǹkazi.

Bubu lukwikamu va dikwela lulembu mani. Mwingi wukyeba dikwela dyaku, ngye wufweti ba wukubama mu kulandakana miǹswa myodi.

1 TULA DIKWELA DYAKU VA NTETI

MBI KIBIBILA KIǸTUBA: ‘Monisa diswasana mu mambu ma lutidi ǹkinza.’ (Filipi 1:10, NW) Dikwela dyaku nkayilu wulutidi ǹkinza mu luzingu lwaku. Diawu, fweti kuditudila va nteti mu mambu maǹkaka.

Yave wuǹtomba ngye wukivana kwidi ǹnuni ove ǹkazi’aku mwingi muvyokisanga ntangu va kimweka. (Mpovi 9:9) Nzambi wuǹtomba ngye wubika kutatuka ǹnuni ove ǹkazi’aku, vayi beno babwadi zabanu bwidi bukwangidikila wuǹkaka. (1 Kolinto 10:24) Monisa ǹnuni ove ǹkazi’aku ti ngye wukumvwilanga ǹkinza.

Dibakala wumvana kafi yimbazu kwidi ǹkazi’andi; dibakala wuǹkwiza denga ǹkazi’andi wunlamba ku nzo

MBI WULENDA VANGA:

Vyokisanganu ntangu va kimweka beno babwadi ayi bo muǹsolula, wilukila maǹtuba wuǹkaka
Bika yindula mu “ngye veka” angi mu “beno babwadi”

2 KYEBA ǸTIM’AKU

MBI KIBIBILA KIǸTUBA: “Woso wuntala nketo mu kuzinina, buna vengi yandi kitsuza mu ntim’andi.” (Matai 5:28, NM) Wosokwa muntu wukwela widi kifu ki kuyindulanga mambu ma bunsuza, bukyedika ti kasyedi ko wukwikama mu ǹnuni voti mu ǹkazi’andi.

Yave wuǹtuba ti ngyewu fweti lunda ǹtim’aku. (Zingana 4:23; Yelemia 17:9) Diawu ngye wufweti kengidila meso maku. (Matai 5:29, 30) Tala ǹtungulu wu mfumu dikanda Yobi, nandi wuvanga ‘luwawunu na meso mandi’ mu manga kuzinina nkyeto wuǹkaka. (Yobi 31:1) Ba wukwikama mu manga tala bimona meso bi bantu baḿbundana nyitu ove badi mpeni (pornografia) ayi manga kuzinina muntu wunkambulu ǹnuni voti ǹkazi’aku.

Dibakala widi foto yi ǹkazi’andi va mesa ku kisalu kyandi

MBI WULENDA VANGA:

Vanga babonso bazaba ti ngyewu widi wukwikama mu ǹnuni ove mu ǹkazi’aku
Zaba mboti mabanza ma ǹnuni voti ma ǹkazi’aku mu matedi bakundi baku. Bo ti nandi ǹkundi ka nkambu mona mayindu mamboti ayi wukukandimini, muna zenga kikundi beni mu ntinu ayi mu nzaki