KIKHUKU KI 3

Bwidi bu Kudedikisila Mambu

“Luzolasananga beno na beno mu bukiedika, kibila luzolo lueti fuka masumu mawombo.” —1 Petelo 4:8, NM

Mambu mawombo maǹkwizanga, bo ǹnuni ayi ǹkazi baǹtona luzingu va kimweka. Mawu mammonikinanga kibila beno babwadi lwisi ko mayindu mamweka, mabanza ayi mpila yimweka yitadila mambu ma luzingu. Mambu maǹkaka maǹtwadisanga bisombulu va dikanda, ku nganda maḿfuminanga.

Kutina mambu dilenda ba banga diyindu dimboti, angi Kibibila kitukamba tubika kutina mawu angi tuma dedikisa. (Matai 5:23, 24) Mpila yimboti yi kudedikisila mawu yidi mu kusadila miǹswa mi Kibibila.

1 DEDIKISANU MAWU

MBI KIBIBILA KIǸTUBA: ‘Byabyoso bidi ntangu . . . ntangu yi dingalala ayi ntangu yi koluka.’ (Mpovi 3:1, 7, NW) Ti dyambu mwidi, botulanu ntangu mwingi muyolukila diawu. ‘Tubanga kyedika’ ayi vanga ǹnuni ove ǹkazi’aku kazaba diyindu dyaku mu dyambu beni di kutatisa. (Efeso 4:25) Nketi mambu beni mfiti makutula, zaba kukiyala mu nkambu nwana. Mvutu wumboti ayi wumalembi wulenda zimisa mambu maǹkaka ayi manga nwana.—Zingana 15:4; 26:20.

Nketi mu dyambu wunkambu kikinina, vumbika mbembu’aku, monisa luzolo ayi lukinzu mu ǹnuni ove mu ǹkazi’aku. (Kolosai 4:6) Meka kudedikisa mambu bo mamonikini mu ntinu ayi bika kanga nganzi.—Efeso 4:26.

MBI WULENDA VANGA:

Nsikikanu ntangu yimboti mwingi mudedekisila mambu
Bo ǹnuni voti ǹkazi’aku kaǹkoluka, lingama ayi bika kunzenga mbembo, angi, vingila ntangu’aku bo yiḿfwana mwingi wuyoluka

2 YUWA AYI VISA MBOTI

MBI KIBIBILA KIǸTUBA: ‘Luzolasana beno na beno. Lukinzasana: Luluta kinzikanga baǹkaka.’ (Loma 12:10, NW) Kuwilukila ǹkinza beni kwidi. Tomba kuvisa diyindu di ǹnuni ove ǹkazi’aku mu kuyitula va bwangu kyandi ayi mukuyikulula. (1 Petelo 3:8; Yakobi 1:19) Bika kulasakana ove kuvuna banga muntu wuǹkuwa. Ntangu ziǹkaka, wulenda bika ma wumvanga mwingi wulandakana mboti maǹtuba ǹnuni voti ǹkazi’aku, ove yuvula ti mulenda kolukila mawu ntangu yiǹkaka. Bo ti ǹnuni ayi ǹkazi baǹkizasananga, mwa mpasi baba kimbeni ayi ‘kukangasana nganzi.’—Mpovi 7:9.

MBI WULENDA VANGA:

Yuwa ǹnuni ove ǹkazi’aku bo kaǹkoluka nketi dyambu beni wisi dizola ko
Tomba kuvisa ma kaǹtuba ayi landakana mboti bo kaǹkolukila ayi mpila kannyikunina binama bi nyitu

3 SADILA MAWU

MBI KIBIBILA KIǸTUBA: ‘Bisalu byabyo bingolo bidi ndandu, kansi kukoluka mpamba, kuǹtualanga bumpumbulu.’ (Zingana 14:23, NW) Bika to kukikinina diyindu mube nsikika, angi, tomba bu kuzingila diawu. Bukyedika ti ‘kisalu kingolo’ kiǹtombilanga mangolo angi ndandu yiwombo tulenda baka mu kiawu. (Zingana 10:4) Beno kusadila mu kintwadi ayi mu mayindu mamweka, lwala ‘tambula ǹsendo wumboti mu salu kinu.’—Mpovi 4:9.

MBI WULENDA VANGA:

Tombanu kuzaba ayi nsikikikanu mbi kadika muntu kalenda vanga mwingi kudedikisa mambu ma dikwela dinu
Ntangu ka ntangu fyonguninanu ti ǹtwala luǹkwenda ove mbusa lumvutuka