KIKHUKU KI 5

Bwidi bu Kuzingila mu Malembi na Matata Maku

“Luvuata kiadi, mamboti, kukikulula, lembama ayi mvibudulu.”—Kolosai 3:12, NM

Dikwela dimvanganga dikanda dimona. Bukyedika ti ngye wulendi bika ko kuzola matata maku, angi bo makwela, muntu maluta ǹkinza mu luzingu lwaku ǹnuni voti ǹkazi’aku. Bawombo va dikanda dyaku, basi fika kikinina ko kyedika akyokyo ki dikwela. Vayi miǹswa mi Kibibila milenda kusadisa wuzaba zinga mboti na dikanda dyaku ayi muntu wukwela. Ngye wulenda ba malembi na matata maku ayi dikanda dimona di mavanga.

1 BA DYELA MWINGI WUZINGA MBOTI NA DIKANDA DYAKU VOTI DI WUKWEDILA

Bakwela bamvyokisa ntangu na matata mawu

MBI KIBIBILA KIǸTUBA: ‘Kinzika tat’aku ayi ngudi’aku.’ (Efeso 6:2, NW) Bosokwa bo wubela ǹtela voti mimvu, fweti monisa lukinzu ayi luzitusu kwidi matata maku. Ayi fweti zaba ti ǹnuni ove ǹkazi’aku mvandi kubuta baḿbuta, diawu kafweti kyebila matata mandi. ‘Luzolo lwisi ko kimpala’ diawu disi ko dimboti kuba ǹtima lema lema boti ǹnuni ove ǹkazi’aku tidi kumonisa luzolo mu matata mandi. —1 Kolinto 13:4; Ngalatia 5:26.

MBI WULENDA VANGA:

Bika zintubulu zimbi dedi: “Dikanda dyaku dintubidilanga kadika ntangu” ove “mam’aku kazolanga ko mamoso ma yimvanganga”
Bo ti mambu mambi wummona va wukwedila, talanga to muntu wukwela ǹnuni voti ǹkazi’aku

2 TULA NDILU MU MAǸKAKA

MBI KIBIBILA KIǸTUBA: ‘Dibakala wala bika tata ayi ngudi’andi wala tatamana mu ǹkazi’andi, ayi bawu bala ba ǹsuni wumweka.’ (Ngenesi 2:24, NW) Nkumbu ziǹkaka, matata maku balenda zimbakana ti ngye wukwela ayi kulandakana luzingu lu dikwela dinu.

Mwingi kumanga mambu va dikwela dinu, bo mu kwedidi mu fweti tula ndilu mambu matata minu balenda kota va dikwela dinu. Ayi monisanu luzolo mu kubakamba mawu. Mulenda kuba sudikisa mawu mu nkambu kulunangu angi mu busonga bwinu. (Zingana 15:1) ‘Kukikulula, kukilembika ayi kuvibidila,’ ziawu zinkadulu zyala kusadisa kukala mboti na matata maku ayi mu ‘zaba ba mvibudulu mu luzolo.’—Efeso 4:2.

Bakwela baǹsolula; Ǹnuni ayi ǹkazi’andi bamvana nkayilu kwidi matata

MBI WULENDA VANGA:

Ngye kunkambu tya dikanda di wukwedila bakotanga mu mambu minu ma dikwela, muna mufweti lenga ntangu yi mwidi luvovomu mwingi luyolukila mawu
Wizananu bwidi muǹkwiza dedikisila mambu beni