Kolineyi Wutambula Pheve Yinlongo

Ku Sezali kwaba kalanga dibakala di nkinza baba tanguninanga Kolineyi. Nandi wuba mfumu wu nkangu masodi wu basi Loma. Kheti kasa ba ko mwisi Yuda, nandi wuba kifu ki kusadisanga batu boso. Kolineyi wuba beni lufyatu mu Yave ayi waba kunsambilanga. Kilumbu kinkaka, mbasi yimonikina Kolineyi ayi wunkamba: ‘Nzambi ma kuwa minsambu myaku. Diawu fidisa mutu kenda kalanda Petelo widi ku divula di Yope. Muna thangu beni, nandi wufila batu batatu ku divula di Yope diba kuvyoka 30 di kilometro.

Petelo ku divula di Yope, mvandi wumona kimona meso. Nandi wumona bibulu byo basi Yuda baba manga dyanga ayi wuyuwa mbembo yiba kunkamba kadya biawu. Vayi Petelo wumanga ayi wuvutudila: ‘Minu mu luzingu lwami loso ndi dyanga ko bibulu bimvindu ayi bisumuka.’ Mbembo beni yiza tuba. ‘Bika kutedila bibulu Nzambi kama vedisa, banga bibulu bisumuka voti bidi mvindu.’ Wubwe kamba dyaka Petelo: ‘Yenda wudengana va mwelo wu nzo’aku batu batatu badi vana.’ Petelo wumona babakala beni baba tatu ayi wuba yuvula kibila bayizila. Bawu bamvutudila: ‘Kolineyi, mfumu masodi ku Loma, nandi wutu tumizi twiza akuku. Nandi tubidi mwingi wenda ku nzo’andi ku Sezali.’ Bawu baleka ku nzo yi Petelo yiba ku Yope. Va meni bawu bayenda ti ku Sezali, Petelo wuyenda na zikhomba zinkaka basi Yope.

Thangu Petelo katuka, Kolineyi wufukama va ntwanl’andi. Vayi Petelo wunkamba: ‘Telama! Minu yidi mutu buka ngyewu. Yizebi ti Bayuda balendi kota ko mu zinzo zi batu bakambulu basi Yuda, vayi Nzambi ma kuthuma mwingi yiza ku nzo’aku. Buabu khamba kibila mbi ma kuthumisina.’

Kolineyi wisa kamba Petelo: ‘Bilumbu bi 4 bima vyoka kumbusa bo yiba sambila, mbasi yi Yave yimbonikini ayi wukhamba yitumisa. Diawu lemvuka wutulonga mambu ma Yave.’ Petelo wiza tuba: ‘Bubu yima visa ti Nzambi wuntyanga batu boso. Ayi wunkikininanga batu boso batidi kumbwongimina.’ Bosi Petelo wisa tona kubalonga matedi Yesu Klisto. Pheve yinlongo yikulumukina Kolineyi ayi baboso baba yandi vana, ayi babotama.