“Nzambi Kasi ko Luvasanu”

1-3. Kimona meso mbi Petelo kamona, ayi kibila mbi tufueti visila tsundu yi kimona meso beni?

MU MVU 36 T.K. Kuaba teba beni muinya bo Petelo kaba sambila kuyilu kimbanga ki nzo yiba mu ndeku ḿbu ku divula di Jope. Vavioka mua mimvu tona kavitila ku nzo beni. Mawu mammonisa ti nandi kasa ba ko luvasanu. Kibila mutu vuidi nzo beni, baba kuntedilanga Simoni, waba vanganga bisalu bi minkanda mi bibulu, ayi kasi ko woso kuandi mutu musi Yuda kalenda vitila ku nzo yi mutu widi ntindu kisalu akiokio.a Vayi, Petelo wuba kuna muingi kulonguka dilongi dinkinza matedi kukhambu ku luvasanu lu Yave.

² Petelo wumona kimona mesu bo kaba sambila. Mambu kamona, khanu mavanga noso kua musi Yuda kuba mu boma. Nandi wumona diyilu kuzibuka ayi wumona kiuma kiba buka dikendi dinneni voti (dilensola) muba bibulu bakandimina kudia mu nsiku wu Mose. Bosi, vayuwakana mbembu yinkamba: “Petelo, telema vonda ayi dia!”. Vayi Petelo wumvutudila: “Yidianga ko ni kiuma kimueka ki mvindu.” Ayi mbembu beni, yibue kunkamba mu khumbu yintatu: “Bika kutedila biuma Nzambi kadiodisa, biuma bi mvindu.” (Mav. 10:14-16) Kimona meso akiokio kivanga Petelo kuba divuda mu mua thangu.

³ Mbi binsundula kimona meso akiokio Petelo kamona? Nkinza beni kuzaba tsundu yi kimona meso beni, kibila kiawu ki tulonga diambu dimfunu matedi phila Yave kantadilanga batu. Mu kuba baklistu bakiedika, tulendi vana ko kimbangi kioso matedi Kintinu ki Nzambi, boti tuisi ko momawu mayindu Yave kadi matedi batu. Muingi tuvisa tsundu yi kimona meso Petelo kamona, tuemfiongunina mambu mamonika.

“Waba tatamananga kulomba kuidi Nzambi” (Mav. 10:1-8)

4, 5. Koloneliu wuba nani, ayi mbi bimonika bo kaba sambila?

⁴ Petelo kasa yindula ko ti ava kilumbu akiokio, ku Sezaleia divula diba ku Norte nduka 50 di zikilometro di kinanu, kuba dibakala dimueka baba tedilanga Koloneliu wumona mvandi kimona meso. Koloneliu wuba mfumu wu nkangu wu masodi ayi waba “kinzikanga Nzambi”.b Mvandi wuba mfumu wumboti wu dikanda, kibila waba “buongiminanga Nzambi va kimueka na dikanda diandi.” Koloneliu kasa ba ko musi Yuda. Vayi waba sadisanga basi Yuda baba viokilanga mu zitsatu. Dibakala adiodio di mamboti “diaba tatamananga kulomba kuidi Nzambi.”—Mav. 10:2.

⁵ Nduka kilokula 15 bo Koloneliu kaba sambila, nandi wumona mbasi yimueka mu kimona meso yinkamba: “Nzambi bekuwa minsambu miaku ayi betebukila moyo lusalusu wumvananga kuidi biphumbulu.” (Mav. 10:4) Mu kutumukina mambu mbasi kankamba, nandi wutuma bisadi biandi biodi muingi kuelanda mvuala Petelo. Kheti kasi ko muisi Yuda, Koloneliu wunkuiza baka luaku lu kutambula tsangu yi luvukusu.

6, 7. (a) Tubila kifuani kimmonisa ti Nzambi wuntambudilanga minsambu mi batu badi mintima mikubama, muingi kuzaba kiedika matedi nandi. (b) Mbi mawu ma tusadisa kuvisa?

⁶ Bukiedika ti bubu, Nzambi wunkuwanga minsambu mi batu badi mintima mikubama muingi kuzaba kiedika matedi nandi? Tala kifuani akiki: Nkietu wumueka wunkalanga ku Albânia wukikinina kutambula levista yi Kibanga ki Nsungi kiaba tubila matedi kukonzula bana.c Nandi wukamba kuidi mbangi yi Yave wukokuta muelu’andi: “Wunkuiza kikinina minu kukamba ti yifina lomba kuidi Nzambi muingi katsadisa kukonzula bana bama? Nandi be kufila! Mambu bekoluka mawu yifina tomba kukuwa!” Nkietu beni ayi bana bandi batona kulonguka Kibibila ayi buviokila thangu nnuni’andi mvandi wutona kulonguka.

⁷ Bukiedika ti yawu to khumbu mambu amomo mamonika? Ndamba! Mambu amomo mammonikanga mu nza yimvimba—ayi tulendi tuba ko ti mawu mammonikinanga mu khambu kibila. Mbi mawu mansundula? Ditheti, Yave wuntambudilanga minsambu mi batu badi mintima mikubama muingi kunzaba. (1 Minti. 8:41-43; Minku. 65:2) Dimmuadi, zimbasi bambanga yitu mu kisalu ki kusamuna.—Nzai. 14:6, 7.

“Petelo wuba . . . divuda” (Mav. 10:9-23a)

8, 9. Mbi phevi yinlongo yikamba Petelo ayi buidi nandi kabela?

⁸ Ku kibanga kaba, “Petelo wuba . . . divuda” mu matedi tsundu yi kimona meso bo kamona masodi ma Koloneliu kutuka ku nzo kaba. (Mav. 10:17) Bo kamanga khumbu zitatu kudia bidia bakandimina mu nsiku wu Mose, bukiedika ti Petelo wuba wukubama muingi kukuenda na babakala abobo ayi kukota ku nzo yi mutu wukhambu ba musi Yuda? Phevi yinlongo yizabikisa luzolo lu Nzambi mu mambu amomo, ayi bakamba Petelo: “Yuwa! Babakala batatu badi mu kutomba. Diawu telama kuluka ayi yenda yawu, bika kuba divuda kibila minu veka yibebafila.” (Mav. 10:19, 20) Kimona meso akiokio ki bibulu bi mvindu Petelo kamona, kinsadisa muingi katumukinanga zithuadusulu zi phevi yinlongo.

⁹ Bo kazaba ti Yave nandi wutuadisa Koloneliu muingi benlanda, Petelo wutumisa babakala beni bakhambu ba basi Yuda bakota, ayi “wuba vana vama bafueti lala.” (Mav. 10:23a) Mvuala awowo wumvuminanga Nzambi, wutona kubalula phil’andi yi kuvangila mambu mu kutadila phila buididi luzolo lu Nzambi.

10. Buidi Yave kantuadisilanga dikabu diandi ayi biuvu mbi tufueti kuyikuvusa?

¹⁰ Bubu mvandi Yave wuntatamananga kutuadisa dikabu diandi. (Zinga. 4:18) Mu nzila phevi’andi yinlongo nandi wuntuadisanga “kisadi kikuikama” (Mat. 24:45) Khumbu zinkaka, tulenda tambula thuadusulu yimona matedi Diambu di Nzambi, voti balenda balula mua zithuadusulu matedi kimvuka. Diawu tufueti kuyikuvusa: ‘Buidi yimbelanga bo yintambula zithuadusulu zimona? Yintumukinanga zithuadusulu zinkuizilanga mu nzila phevi yinlongo yi Nzambi matedi mambu amomo?’

Petelo “Wudinda Muingi Baba Botika” (Mav. 10:23b-48)

11, 12. Mbi Petelo kavanga bo katuka ku Sezaleia, ayi mbi kalonguka?

¹¹ Mu kilumbu kilanda, Petelo waba kuenda ku Sezaleia na babakala batatu Koloneliu kafila ayi “zikhomba zisambanu” basi Yuda baba kalanga ku Jope. (Mav. 11:12) Bo kaba vingila Petelo, Koloneliu wukutikisa “dikanda diandi ayi bakundi bandi bafikama”—ḿba basa ba ko mu nkuna wu basi Yuda. (Mav. 10:24) Bo kavitila, Petelo wutuba diambu dio kaba yindulanga ti disa ba ko difuana. Nandi wukota ku nzo yi mutu wukhambu ba musi Yuda ayi wutuba: “Benu muzebi buboti ti musi Yuda kasi ko nsua wu kuba nkangulu voti kuba kikundi na mutu wu mvila wunkaka. Vayi Nzambi bembonisa ti yilendi tedila ko ni mutu, banga mutu wusumuka voti wumvindu.” (Mav. 10:28) Nati thangu ayoyo, Petelo wuvisa ti kimona meso beni kiabasa sundula ko to ntindu bidia mutu kafueti dia. Nandi kasa ba ko nsua wu ‘kutedila wunkaka mutu wusumuka [kheti no wukhambu ba musi Yuda].’

¹² Dingumba dimueka di batu baba mintima mikubama baba vingila Petelo. Koloneliu wutuba: “Befu boso tuidi va ntuala Nzambi muingi kukuwa mambu moso Yave kabe kutuma muingi ku tukamba.” (Mav. 10:33) Buidi wunkuiza bela, boti vadi mutu wuntomba kuzaba kiedika matedi Yave be kukamba mambu amomo? Petelo wutona kukoluka mu kutuba: “Buabu yima visa buboti ti, Nzambi kasi ko luvasanu, vayi mu zitsi zioso, nandi wunkikininanga woso mutu wu kuntumukinanga ayi wumvanganga mambu masulama.” (Mav. 10:34, 35) Petelo wulonguka ti Nzambi kafundisanga ko batu mu kutadila nkanda nyitu, tsi kabutukila voti mambu kazebi kuvanga. Petelo wuvana kimbangi matedi kisalu ki kusamuna, lufua ayi luvulubukusu lu Yesu.

13, 14. (a) Bo Koloneliu ayi batu bankaka bakhambu ba basi Yuda batambula phevi yinlongo mu mvu 36 T.K., mbi mawu mammonisa? (b) Kibila mbi tulendi fundisila ko batu mu kutadila kizizi voti nkanda nyitu?

¹³ Mu kinzimbukila, va monika diambu dimueka di kukuitukila. ‘Bo Petelo kaba tuba,’ phevi yinlongo yikulumuka “kuidi batu beni.” (Mav. 10:44, 45) Ayoyo yawu to khumbu bantubila mu Kibibila ti phevi yinlongo yikulumuka kuidi batu ava kubotama. Mu kuzaba ti yawu yiba mbonosono ti babaka lunungu va mesu ma Nzambi, Petelo “wudinda muingi babotika [batu beni bakhambu ba basi Yuda].” (Mav. 10:48) Bo batu abobo bakhambu ba basi Yuda batambula phevi yinlongo mu mvu 36 T.K., mammonisa ti tona mu thangu ayoyo, bakana ko to dikabu di basi Yuda vayi makabu moso badi lunungu va mesu ma Nzambi. (Dani. 9:24-27) Mu kuba Petelo waba tuadisa mu thangu ayoyo, nandi wusadila ‘tsabi yi Kintinu’ mu khumbu yintatu ayi yitsuka. (Mat. 16:19) Tsabi ayoyo yisadisa babakala bakhambu ba basi Yuda muingi baba baklistu basolu mu phevi yinlongo.

¹⁴ Mu kuba minsamuni mi zitsangu zi Kintinu, befu tuzebi ti “Nzambi kasi ko luvasanu.” (Lom. 2:11) Nandi wuntomba muingi “batu boso bavuka.” (1 Tim. 2:4) Diawu, tulendi fundisa ko batu mu kutadila kizizi voti nkanda nyitu. Kiyeku kitu kidi ki kuvana kimbangi kioso matedi Kintinu ki Nzambi ayi mawu mansudula kukoluka na mintindu mioso mi batu, kubika tadila mimvila, tsi, kizizi voti kinganga.

“Basa bue Kumfindisa ko Ziphaka ayi Bazitisa Nzambi” (Mav. 11:1-18)

15, 16. Kibila mbi baklistu bankaka baba basi Yuda batonina kutubila bubi Petelo, ayi buidi nandi ka kikakidila?

¹⁵ Petelo wuvutuka ku Yelusalemi ayi ḿba wuba mu phuila yi kuzabikisa mambu mamonika. Vayi tsangu ti, basi nza “mvawu bakikinina diambu di Nzambi,” ḿba yitembakana ku Yelusalemi ava nandi kutuka kuna. Bo vavioka mua thangu bo Petelo katuka, “zikhomba baba buelanga mioko diyindu di kuzengisa nyitu yi kibakala, batona kuntubila bubi.” Bawu baba tuba ti Petelo wukota ku “nzo yi batu bakhambu zengusu nyitu yi kibakala ayi kudia yawu va kimueka.” (Mav. 11:1-3) Bawu basa fuema ko, kibila batu ba nza bakituka minlandikina mi Yesu. Vayi baklistu abobo baba basi Yuda, baba tomba muingi minlandikini mimona kutumukina Nsiku wu Mose—kubunda mvandi kuzengusu nyitu yi kibakala—muingi Yave kavitika mbuongimini’awu. Tulenda tuba mu bukiedika ti baklistu abobo, baba mona phasi kukikinina ti basiedi ko mu lukuiku lu kutumukina Nsiku wu Mose.

¹⁶ Buidi Petelo ka kikakidila? Dedi bummonisina Mavanga 11:4-16, nandi wutubila bibila binna binnata kuvanga mawu: (1) kimona meso kamona (Lutangu 4-10); (2) lutumu katambula mu nzila phevi yinlongo (Lutangu 11, 12); (3) mbasi yimonikina Koloneliu (Lutangu 13, 14); ayi (4) phevi yinlongo yikulumuka kuidi bapakanu. (Lutangu 15, 16) Petelo wumanisina mu kuvana kiuvu kimanisa ziphaka: “Buabu, boti Nzambi wuba veni wowawu nkhailu kavana kuidi befu, tunkikininanga mu Mfumu Yesu Klistu, buna minu yidi nani muingi kutula nkaku luzolo lu Nzambi?”—Mav. 11:17.

17, 18. (a) Buidi kimbangi Petelo kavana kibaludila mayindu ma baklistu baba basi Yuda? (b) Kibila mbi dilenda bela diambu diphasi kuba kithuadi mu kimvuka ayi mbi tulenda kuyikuvusa?

¹⁷ Kimbangi Petelo kavana kuidi baklistu baba basi Yuda, kiba thota. Bukiedika ti bawu bankuiza kikinina baklistu abobo bakhambu ba basi Yuda babotama buka zikhomba ziawu? Kibibila kintuba: “Bo bayuwa mambu amomo, basa bue kumfindisa ko ziphaka ayi bazitisa Nzambi mu kutuba: ‘Bukiedika, Nzambi wuveni mvandi bapakanu luaku lu kunyongina masumu muingi babaka luzingu.’ ” (Mav. 11:18) Mayindu amomo masadisa kimvuka muingi kiba kithuadi.

¹⁸ Dilenda ba diambu diphasi bubu kuba kithuadi, kibila baklistu bakiedika badi batu ba “makanda moso, mimvila mioso, makabu moso ayi zimbembu zioso.” (Nzai. 7:9) Diawu, mu bimvuka biwombo tummonanga batu ba mimvila mioso, ndionzukulu ayi bikhulu biviakana. Tulenda kuyikuvusa: ‘Bukiedika ti yisi ko luvasanu mu batu? Bukiedika ti minu yidi wukubama muingi yibika vukumuka mu mambu ma nza ayiyi mantuadisanga luvasanu mu batu,—dedi matedi tsi voti mvila mutu kabutukila, kunangika kikhulu kiama ayi kithatu—bintuadisa phila yintadilanga zikhomba ziama zi kiphevi?’ Tebukila moyo mambu mamonikina Petelo voti (Sefa) mua mimvu kuntuala bo bawombo bakhambu ba basi Yuda bayiza zaba kiedika. Va thonono Petelo kasa batadila ko mu phila yimboti. Nandi wutona ku batatuka ayi kutula luvasanu” na zikhomba aziozio bakhambu ba basi Yuda, diawu Polo kansembila. (Ngal. 2:11-14) Tufueti tatamana kuvanga mangolo muingi kununga kifu akiokio ki kuba kithatu.

“Nkangu Wunneni wu Batu Bayiza Kikinina mu Mfumu” (Mav. 11:19-26a)

19. Kuidi banani mvandi baklistu baba basi Yuda batona kusamuna, ayi mambu mbi mayiza monika?

¹⁹ Bukiedika ti minlandikini mi Yesu batona kusamuna kuidi batu bakhambu ba basi Yuda? Tala mambu mamonika buviokila thangu ku Antiokia yi Silia.d Divula adiodio, diba batu bawombo baba basi Yuda ayi bakhambu ba basi Yuda, ayi bawu basa ba ko kithatu. Diawu divula beni dibela dimboti muingi kusamuna kuidi batu bakhambu ba basi Yuda. Kuawu mua dingumba di minlandikini mi basi Yuda batonina kusamuna zitsangu zimboti kuidi bo “baba kolukanga Kingeleku.” (Mav. 11:20) Zitsangu aziozio zisa samunu ko to kuidi basi Yuda baba kolukanga Kingeleku vayi mvandi kuidi batu bakhambu ba basi Yuda. Yave wusakumuna kisalu akiokio ayi nkangu wunneni wu batu bayiza kikinina mu mfumu.”—Mav. 11:21.

20, 21. Buidi Balinabasi kakikuludila, ayi buidi tulenda landikinina kifuani kiandi?

²⁰ Muingi kukieba zitsatu aziozio zi kiphevi, kimvuka ku Yelusalemi bafila Balinabasi ku Antiokia. Tulenda tuba ti tsatu ku kibuangu akiokio yiba yiwombo, diawu vaba luta tombulu bisadi binkaka muingi kusamunina ku kibuangu akiokio. Muingi kubuela mioko mu kisalu beni, Saulu wuyiza ba wumueka mu bawu kibila kiyeku kiandi kiba ki kuba mvuala kuidi baphakanu (Mav. 9:15; Lom. 1:5) Bukiedika ti Balinabasi wuyiza tadila Saulu banga mbeni? Ndamba. Balinabasi wukikulula mu kutuama ntuala mu kukuenda ku Tarsu kuba Saulu ayi kunnata ku Antiokia. Baba buadi baviokisa mvu mueka muingi kukindisa minlandikini miba ku divula beni—Mav. 11:22-26a.

²¹ Buidi tulenda kukikulula bo tumvanga kisalu ki kusamuna? Kukikulula kunsundula kuzaba ndilu’itu. Befu boso tuzebi kuvanga dioso diambu ayi tuidi disuasana mu phila yi kuvangila mambu. Dedi, bankaka balenda mona buka ti didi diambu diluelu kukaba bilongulu, vayi dilenda ba diambu diphasi kuvutukila mutu voti kutona ndongukulu yi Kibibila. Boti wuntomba kubuela pisuka mu kisalu ki kusamuna, kibila mbi wukhambu dindila lusalusu? Kuvanga mawu, mankuiza kusadisa kuluta kukivana ayi kubaka mayangi mu kisalu ki kusamuna.—1 Ko. 9:26.

“Babaka Makani ma Kufila Lusadusu” (Mav. 11:26b-30)

22, 23. Buidi zikhomba ku Antiokia bamonisina luzolo kuidi zikhomba, ayi buidi dikabu di Nzambi bubu mvawu bamvangilanga mawu?

²² Ku Antiokia, kuawu “minlandikini mi Yesu mu thuadusulu yi Nzambi, batedulu mu khumbu yitheti baklistu” (Mav. 11:26b) Dizina adiodio batambula kuidi Nzambi dimmonisa ti banlandakananga nzingulu yi Klistu. Bo batu bakhambu ba basi Yuda bayiza ba baklistu, bukiedika ti bawu bayiza ba kithuadi na basi Yuda baba baklistu? Mona mambu mamonika bo nzala yiwombo yiyiza mu mvu 46 T.K.e Mu thangu yikhulu nzala yaba luta tuadisanga beni ziphasi kuidi biphumbulu bakhambu ba zimbongo ayi bidia bilundu. Ḿba baklistu bawombo baba kalanga ku Yuda baba biphumbulu. Diawu bo nzala yitona, baba tomba beni lusalusu. Zikhomba ku Antiokia mu kuzaba mambu mabe monika, —kubunda zikhomba bakhambu ba basi Yuda babaka makani ma—kufila lusalusu kuidi zikhomba ku Yuda. (Mav. 11:29) Alolo luba luzolo lukiedika zikhomba bamonisa!

²³ Vasi ko disuasana na dikabu di Yave bubu. Bo tunzabanga ti zikhomba zitu—badi kutsi yinkaka voti ku kibuangu tuidi—bantomba lusalusu, tuntombanga ziphila muingi kuba sadisa mu ntima woso. Ayi dingumba di Filiali bankubikanga mangumba mankaka bantadilanga matedi lusalusu muingi kusadisa zikhomba bamviokila mu mambu maphasi dedi bivuka, ndikununu yi ntoto ayi mambu mankaka maphasi. Mangolo moso amomo tumvanganga muingi kusadisa zikhomba zitu, mammonisa ti tuidi vakhati dikanda di kiphevi.—Yoa. 13:34, 35; 1 Yoa. 3:17.

24. Buidi tulenda monisina ti tumvuanga nkinza tsundu yi kimona mesu Petelo kamona?

²⁴ Banga baklistu bakiedika, tumvuanga nkinza tsundu yi kimona meso Petelo kamona bo kaba ku kibanga ki nzo yimueka ku Jope kuvioka 1.900 di mimvu. Befu tumbuongiminanga Nzambi yikhambu luvasanu. Ayi nandi wuntomba muingi tuvana kimbangi kioso matedi Kintinu ki Nzambi, mawu mansundula ti tufueti samuna zitsangu zi Kintinu kuidi mintindu mioso mi batu. Diawu, tufueti ba bakubama muingi kuvana luaku kuidi batu badi mintima mikubama muingi kukuwa ayi kuvitika zitsangu zimboti.—Lom. 10:11-13.