Buidi Tulenda Vanina Lusalusu bo Kivuka Kimmonika?

Mu bilumbu abibi bitsuka, kuidi mu kumonika beni bivuka. Vantombuluanga kukubama ayi kuvangila mambu mu phila yifuana muingi kuvana lusalusu kuidi batu bammonikina kivuka. Diawu Nnanga Wukuikama kabiekila Dingumba Dimvananga Lusalusu Kuidi Batu Bammonikina Kivuka.

Bo dingumba adiodio dimbakula ti vabe monika kivuka, mu nzaki bawu bantelanga bakulutu ba kimvuka badi va kizunga vabe monikina kivuka, muingi bazaba lusalusu mbi zikhomba bantomba. Boti vantombulu lusalusu luwombo, bakulutu ba kimvuka balenda tela ku filiali bosi dingumba di filiali bala fila zikhomba muingi ku tuama ntuala mu kisalu ki kuvana lusalusu. Zikhomba ziozio balenda dinda batu ba kivana muingi kusadisa voti kusumba biuma bintombulu muingi kusadisa zikhomba bamonikina kivuka.

Nkinza beni kuvangila mambu mu phila ayoyo. Kibila mawu mansadisanga kubika tuadisa divunza, bungisa mangolo, zimbongo voti biuma bintombulu. Mawu malenda monika boti zikhomba bamvangila mambu mu phil’awu.

Zikhomba bafila kuidi Dingumba di Filiali balenda tuba thalu yi zimbongo ayi batu bakua bantombulu muingi kuvana lusalusu. Bawu mvandi bala zabikisa kuidi zimfumu zi luyalu matedi kisalu kitu ki kuvana lusalusu. Diawu, bika kubaka makani maku veka ma kukuenda ku kibuangu kube monika kivuka, kukongula zimbongo voti biuma binkaka muingi kuvana lusalusu boti basa kudinda ko wuvanga mawu.

Vayi kheti bobo, befu tulenda sadisa. (Ebeleo 13:16) Befu tunzolanga beni zikhomba zitu! Vayi mbi tulenda vanga muingi kusadisa? Phila yilutidi nkinza tulenda vangila mawu yidi kunatanga mu minsambu zikhomba bamonikini kivuka voti badi mu kisalu ki kuvana lusalusu. Mvandi tulenda tula minkhailu mu kasu yi kubuedila mioko kisalu kimvangamanga mu nza yimvimba. Dingumba Dintuadisi divana nsua kuidi dingumba di filiali kubaka makani matedi buidi bankuiza sadila zimbongo aziozio. Boti tuntomba kukuenda kuna muingi kue sadisa, tulenda monisa ti tuidi bakubama muingi kusadisa mu kuwesa nkanda, wu kukivana (DC-50).

TALANU VIDEO KHUKA MVULA YITUADISA ZIPHAZI KU BRAZIL, AYI VANANU MVUTU WU KIUVU KINLANDA:

Mambu mbi be kuitukila mu kumona mangolo zikhomba bavanga bo khuka mvula yituadisa ziphasi ku Brazil mu mvu 2020?