Lusalu mu Bivuka Bimonikini mu mvu 2021—Tusa Kuekula ko Zikhomba

Mu mvu kisalu 2021,a nza yaba viokila mu kivunga ki COVID-19. Dedi bunsudikisila dilongi “Lusalusu mu Nza Yimvimba mu Thangu Kivunga ki COVID-19,” tubasisa zimbongu ziwombob ayi tufonda kuvioka 950 di Mangumba muingi Kusadisa zikhomba baviokidi mu bivuka.

Bo kivunga kiaba tembakana, vamonika mvandi zindikununu zi ntoto ayi bivuka binkaka bituadisa ziphasi kuidi zikhomba mu nza yimvimba. Muingi kusadisa zikhomba baviokidi mu kuvioka 200 di mintindu mi bivuka abiobio, Dingumba Dintuadisi bakikinina kubasisa kuvioka 8 di biveve na biveve di zidolar muingi kuvana lusalusu mu thangu kivunga ki COVID-19. Mona buidi basadidi minkhayilu miaku muingi kusadisa batu baviokidi mu bivuka biodi bimonikini.

Mbazu voti Vulcão yi Mongo wu Nyiragongo

Mu kilumbu 22, Ngonda Yintanu , mvu 2021, Mongo wu Nyiragongo wutona kubasika mbazu, ayi ku tsi yi RDC, kutona kumonika vulcão. Mbazu beni yitona kutulula zinzo, bikola ayi biuma bantulanga nlangu. Bakana ko to mbazu yaba tula batu boma. Buviokila bilumbu, muisi wumbi wutembakana ku divula di Goma ayi vamonika zindikununu zi ntoto. Nduka batu boso ku divula baba botula. Bawombo batina ayi bankaka bayena ku Ruanda.

Mu mangumba amomo muba kuvioka 5,000 di Zimbangi zi Yave. Bawombo zinzo ziawu zituluka mu kibila ki mbazu ayi bankaka baba yiba biuma biawu bo batina. Mangumaba bansadisanga zikhomba bammonikina bivuka ma tsi yi Ruanda ayi yi RDC basala va kimueka muingi kusadisa zikhomba. Dingumba dimueka dinsadisanga zikhomba bammonikina bivuka ku filiali yi RDC (Kinshasa), dituba: “Kheti mu mambu maphasi maba mokina ku divula, ayi ava kubasisa batu ku divula, dingumba dinsadisanga zikhomba bammonikina bivuka ditona kukaba bidia, nlangu ayi bikhutu.” Ku divula dimueka kuba kuvioka 2.000 di zikhomba baba bakutakana, dingumba dinsadisanga zikhomba bammonikina bivuka batunga zingoto, bavana zimaskara ayi basudikisa buidi bu kutatukila kivunga ki COVID-19 ayi colera.

Bo vavioka zingonda zitatu tona kivuka beni kimonika, zikhomba zitu bakaba kuvioka sambanu di zitonelada zi loso, sambanu di zitonelada zi fuba yi manya, zitonelada zitatu zi mafuta ayi zitonelada zitatu zi nlangu. Muingi kusadila buboti zimbongo, dingumba di filiali babaka makani ma kusumba bidia biwombo kuna divula beni, kubika kuandi ku zitsi zinkaka.

Khomba mueka nzo’andi yibua mu kibila ki mbazu, wutuba: “Befu tuba beni mu kiunda.” Vayi kheti bobo bawu batambula lusalusu ayi mbombolo muingi batatamana bakindama. Nandi wubue tuba: “Mu lusalusu lu Yave tuidi bio tuntomba muingi kuzinga. Befu tumona buidi Yave ka tusadisila ayi ka tukiebila.”

Luzingu luphasi ku Venezuela

Batu ku Venezuela, badi mu kutovuka beni mu khambulu mbakulu yiwombo. Zikhomba zitu badi kuna badi mu kuviokila beni mu ziphasi, mu khambulu bidia ayi mbakulu. Kheti bobo, kimvuka ki Yave kisa bakuekula ko.

Mu mvu kisalu wubedi, tubasisidi kuvioka 1.5 di biveve na biveve di zidolar muingi kusumba ayi kukaba bidia ayi nzabaku kuidi zikhomba zitu zikhambulu mbakulu. Filiali yi Venezuela yituba: “Disi ko diambu diluelu kuvekisa 130 di zitonelada zi bidia ku tsi yoso mu zingonda zioso ayi kubinata kuidi zikhomba bakhambulu.” Muingi kukieba buboti bidia, zikhomba bamfilanga bio bikhambu fika bolanga. Filiali yibue tuba: “Tunluta sumbanga bidia bikhambu fika bolanga ayi tumvangilanga mawu bo thalu yi kusumbila yindekukanga. Bosi tumvekisanga biawu mu kusadila ziphila zikhambulu phasi.”

Leonel widi mu dingumba dinsadisanga zikhomba bammonikina bivuka ku Venezuela, wunzolanga beni kiyeku akiokio. Nandi wutuba: “Kusadisa zikhomba kidi kiyeku kimboti. Kiawu ki kumbombanga beni tona nkazi’ama kafua mu kivunga ki COVID-19. Minu yintombanga beni mambu ma kuvanga ayi yimbanga mu mayangi mu kusadisa bankaka. Yimmonanga buidi Yave kandukisilanga lukanu luandi mu kukhambu kuekula bisadi biandi.”

Khomba mueka wutambula lusalusu waba sadilanga mu dingumba dimvananga lusalusu. Nandi wutuba: “Buabu yidi thangu’ama yi kutambula lusalusu, befu tusa tambula ko to lusalusu lu kinsuni. Zikhomba batusadisa tutatamana kuba bavumbama, bawu batuvua nkinza, batubomba ayi batukindisa.”

Bivuka binkaka bimmonikinanga mu kinzibukulu. Kheti bobo, kimvuka ki Yave kifika vananga lusalusu mu nsualu. Matondo beni mu minkhayilu mumvananga mu nza yimvimba. Ziphila zinkaka zi kuvanina minkhayilu, zidi mu donate jw.org. Befu tunzolanga beni minkhayilu miaku.