Kuvana Lusalusu mu Nza Yiwedi Mimvita

Mu bilumbu abibi bitsuka, tuzebi ti tuala ‘kuwa matedi mimvita ayi zitsangu zitedi mimvita.’ (Matai 24:6) Kheti bobo, bo zikhomba bamviokila mu mambu maphasi, bawu bantambulanga lusalusu bantomba. Kipholo kintatu ki dingumba dintuadisi mvu 2022 kitubila mambu mankinza matedi lusalusu badi mu kuvana kuidi batu bantovuka mu kibila ki mvita wummonika ku tsi yi Ucrânia.Buidi zikhomba zitu badi mu kutambudila lusalusu kheti mu mvita wummonika va nsengi? Ndandu mbi zikhomba ku Ucrânia badi mu kubaka mu lusalusu alolo?

Lusalusu Mbi Luntombulu? Ayi Buidi Badi mu Kuvanina Luawu?

Mu kilumbu 24, mvu 2022, bo mvita wutona ku Ucrânia, Dingumba di Mintuadisi, batsikika thalu yi zimbongo bankuiza sadila muingi kusadisa zikhomba ku Ucrânia. Dingumba di filiali ku Ucrânia, mu nsualu basumba biuma ayi basadila 27 di Mangumba Mamvananga Lusalusu Bo Kivuka Kimmonika, muingi kukaba biawu.

Muingi kubuela mioko makani amomo, ku Kikulutu ki Zimbangi zi Yave, batona kuvanga kisalu ki kutomba kuzaba lusalusu mbi lunkaka lunkuiza tombulu. Dingumba di Mintuadisi ayi dio dintadilanga matedi kubasisa ayi kukabula bilongulu, badinda kuidi dingumba dintadilanga matedi kusumba ku kikulutu, muingi basala mu kithuadi na zikhomba zi Ucrânia ayi Polônia, muingi batubila zitsatu beni ayi kuzaba mbi diaka balenda vanga muingi kuvana lusalusu. Zikhomba bantadilanga matedi kusumba ayi kukabula biuma, ayi dinkakudilanga kisalu kitu mu zitsi beni, ayi khomba mueka widi mu dingumba di filiali ku Ucrânia, baba kutakananga kadika kilumbu na zikhomba badi mu dingumba dintadilanga matedi kusumba ku kikulutu kitu.

Yaya Jay Swinney widi mu dingumba dintadilanga matedi kusumba ku kikulutu kitu wutuba: ‘Theti, vabe tombulu befu kuzaba zitsatu zi zikhomba.’ ‘Tuaba tomba kusumba bidia ayi bisadulu bi kukidiodisila, bio zikhomba zitu bakhuku kusadila. Vayi vasa tombulu ko to kubakula mbi biaba tombulu. Vaba tombulu kuzaba mvandi, buidi tunkuiza natina biuma beni mu khambu vangana phasi ayi mu nzaki.’

Mu kilumbu 9 Ngonda Yintatu, mvu 2022, tuyiza bakula biabioso biaba tombulu. Tukubika zicaxa muba bidia dedi, bidia binkuizilanga mu zifoya, loso, madezu, kubunda mvandi nzabaku, ayi papel higiênico. Mu thangu beni tuyindula ti, muingi mutu kabaka bi kudia mu sabala zitatu, vaba tombulu kasadila 65 di zidolar bansadilanga ku Estados Unidos. Mu kuzaba ti zikhomba zitu ziwombo baba tomba lusalusu, diawu Dingumba di Mintuadisi, babakila makani ma kutsikika thalu yi zimbongo bankuiza sadila muingi kudukisa zitsatu zi zikhomba. Vayi buidi zikhomba banungina kunatina biuma beni, kheti kuba mvita?

Mu kilumbu 13 Ngonda Yintatu, zikhomba wadi, bananguka ku filiali yi Polônia ayi bayenda kue bika biuma beni ku kibuangu kimueka bansuekilanga biuma ku divula di Lviv, tsi yi Ucrânia. Ava kilumbu ki kukuenda kituka, zikhomba zi filiali yi Polônia ayi Ucrânia, basadisa theti zikhomba mu kuba kubika. Dingumba di filiali basadisa zikhomba kubaka minkanda miaba tombulu, basadisa kutula bidimbu mu dikalu muingi kumonisa ti lusalusu bawu baba kevana ayi bayoluka na zikhomba ku Ucrânia muingi kuzaba nzila mbi bafueti viokila muingi zikhomba bafika tambula lusalusu beni. Mu khubumunu ayoyo ayi lusakumunu lu Yave, banunga kutambika biuma beni kuidi mangumba mamvananga lusalusu, mu kilumbu kimueka to, muingi bawu bakaba biawu kuidi zikhomba bankalanga ku Lviv. Mu phila ayoyo, zikhomba beni ziwadi bavutuka mu nsika ku Polônia.

Kheti viaje ayoyo yitheti yivangama buboti, vayi zikhomba basa nunga ko kunata biwombo, kibila binkaka bise siala. Ayi bio bisiala, biawu bilutidi kena bio banunga kunata! Buidi banungina kunata bio bisiala mu khumbu yimueka?

‘Dikabu Diaku Bala Kukivana mu Ntima Woso’

Bo batu bawombo mu nza batanga mu jw.org matedi buidi mambu maphasi batu baba monikina ku Ucrânia, bawu batomba kusadisa. Batu bawombo bankalanga kinanu bavana minkhailu miawu mu kuvana zimbongo muingi kubuela mioko kisalu Zimbangi zi Yave bamvanganga mu nza yimvimba, mu kuzaba ti bankuiza sadila zimbongo beni mu phila yimboti. Ayi bo bankalanga mu zitsi zifikama na Ucrânia, basadila thangu’awu, mangolo mawu ayi biuma badi muingi kusadisa. Tala mua bifuani.

Ku Polônia, zikhomba ziwombo batuala zicaxa mu ba biuma muingi kuvana lusalusu ayi bana balezi bafikula biuma mu minkanda muingi kukindisa zikhomba. Khomba mueka bantedilanga Bartosz Kościelniak, widi mu Dingumba Dintadilanga Matedi Kusumba ku filiali yi Polônia wutuba: “Khumbu ziwombo yimana tangila Minkunga 110:3, vantuba ti ‘dikabu di Yave bala kukivana mu ntima woso, ‘Vayi kumona zikhomba kukivana, mu nsualu ayi kuba bakubama muingi kusala, kutsadisa kuluta visa tsundu yi matangu amomo.’

Khomba mueka vuidi impresa, wuvana makalu ayi mazuti muingi ku buela mioko wutuba: ‘Kuidi minu, yidi phila yi kumonisina luzolo luama kuidi zikhomba ziama ayi kuidi Yave. Yike mu mayangi mu kuvana lusalusu.’ Nandi wuvana kuvioka 7,.700 di zilitro zi mazuti ayi zikhomba badiatisa makalu beni mu 48.000 di zi kilometro!

Mu kibila ki luzolo ayi kisalu zikhomba bavanga, nate mu kilumbu 28 Ngonda Yintatu, bo vavioka to 15 di bilumbu tona bayenda kefila lusalusu lutheti, tununga kunata ku Ucrânia, 100 di zitonelada zi bidia, bilongo ayi biuma binkaka binkinza! Ayi mu kibila ki koko kuyalubuka ku zikhomba ayi ku batu bankaka, vasa bue tombulu ko kubue sadila thalu yoso yi zimbongo tukubika muingi kusadila. Nate bubu, Zimbangi zi Yave bama nunga kukaba ku Ucrânia kuvioka 190 di zitonelada zi biuma muingi kusadisa zikhomba zitu. Ndandu mbi zikhomba bantambulanga lusalusu bambakanga?

“Bawu Mvawu Badi Luzolo!”

Bo lusalusu beni lutuka ku Lviv, Mangumba Mamvananga Lusalusu ku Ucrânia, bakaba biawu mu bibuangu biwombo kheti mu mavula madi 1.300 di zi kilometro mu kinanu. Kheti vabe tombulu thangu yiwombo muingi kuvanga kisalu beni, vayi kiawu kivangimina mu phila yisulama.a

Yaya Markus Reinhardt, widi mu Dingumba di Filiali ku Ucrânia wutubidi: Kheti mu mambu amomo maphasi, zikhomba zitu bamueni lusalusu lu Yave mu phila yi kukuitukila ayi bamueni ndandu tulenda baka mu kulandakana zithuadusulu zi kimvuka ki Yave, kheti ava tumonikina mambu maphasi. Dedi, ba tukindisanga muingi kadika mutu kasueka biuma binkinza dedi bidia ayi nlangu kalenda sadila mu mua zisabala. Kheti mu thuadusulu ayoyo, nkulutu wumueka wu kimvuka bantedilanga Anton ku Kyiv wutuba: ‘Kimvuka ki Yave ki tukubikanga mu mambu maphasi tulenda viokila, ayi befu tuntondanga beni mu mawu. Kusueka mua bidia ayi nlangu, kuvukisidi luzingu luitu.’ Tundonda beni kuidi zikhomba bo balandakana thuadusulu ayoyo, kibila mawu masadila zikhomba ku filiali kubaka thangu muingi kukubama ayi kuba vana lusalusu luaba tombulu’.

Buidi zikhomba bamuena mu thangu lusalusu lutuka? Mykola ayi Zinaida, bankalanga Kharkiv, batuba: ‘Mambu luvengi ma tunhikuni beni mintima. Matondo beni mu bidia ayi bilongo tutambudi. Bukiedika tumueni koko ku Yave mu mambu amomo.’ Valentyna wunkalanga kokuwau, wutuba: ‘Tona mvita wutona, diba diambu diphasi kununga kusumba bidia. Khumbu zinkaka tuabasa bakanga ko biuma tuaba tombanga. Vayi Yave wuzaba ayi wuvisa mambu tuaba viokila. Nandi wusadila zikhomba muingi bakaba bidia nati mu zinzo zitu, ayi biuma baba tutuadilanga, biawu tuaba tombanga! Kheti mu thangu ayoyo yi ziphasi, bo vammonika ti tuisi ko bu kuvukila, tumona lusalusu lu Yave ayi lu kimvuka kiandi . . . . Mayangi beni kutambula lusalusu luandi muna thangu tuntomba luawu.’

Yevhen, Iryna, ayi Mykyta, batina ku divula di Mariupol, batuba: ‘Tumvutula beni matondo mu lukiebu luinu ayi phila lubuedila mioko dikanda ditu. Lulenda ba lufiatu ti lusalusu beni luyizila mu thangu yifuana. Bo befu tumona zicaxa befu tuyindula ti biuma to biba muna, vayi ziawu mvandi zi tumonisa luzolo luinu kuidi befu!’

Tuisi ko divuda ti phevi yi Yave yawu yituadisidi kisalu akiokio ki kuvana lusalusu kuidi zikhomba kheti mu thangu ayoyo yi mvita. Minkhailu wumvananga muingi kubuela mioko kisalu kimvangama mu nza yimvimba, kubunda mvandi zio wumvaninanga mu donate.jw.org, mvandi zinsadisanga beni. Matondo beni mu kifu kiaku ki kukaba!

Kuvana Lusalusu mu Nsualu ayi mu Nsika

1. 

   Kilumbu 24, Ngonda Yimmuadi, mvu 2022: Dingumba di Mintuadisi batsikika thalu yi zimbongo zintombulu muingi kusadisa zikhomba ku Ucrânia. Mawu masadisa dingumba di filiali muingi batona kufila lusalusu

2. 

   Kilumbu 24, Ngonda Yimmuadi nati Kilumbu 8, Ngonda Yintatu, mvu 2022: Dingumba dintadilanga matedi kusumba ku filiali yi Ucrânia, basumba mua biuma ayi batona kuvana lusalusu kuidi zikhomba mu kusadila Mangumba Mamvananga Lusalsu bo Kivuka Kimmonika. Dingumba di filiali mvandi bakubama muingi kutambula ayi kukaba biuma bifumina ku Polônia

3. 

   Kilumbu 9, Ngonda Yintatu, mvu 2022: Dingumba di Mintuadisi bakikinina muingi bavana lusalusu luwombo kuidi zikhomba ku Ucrânia

4. 

   Kilumbu 10–12, Ngonda Yintantu, mvu 2022: Batona kukubama muingi zikhomba banunga kunata lusalusu, lumfumina ku Polônia muingi kunata ku Lviv, tsi yi Ucrânia

5. 

   Kilumbu 13, Ngonda Yintatu, mvu 2022: Bafila mu Khumbu yitheti lusalusu lufumina ku Polônia muingi kunata ku Lviv, tsi yi Ucrânia

6. 

   Kilumbu 14–16, Ngonda Yintantu, mvu 2022: zikhomba bambuelanga mioko kisalu ki kutunga bakutakana ku kibuangu ki zikhutukunu zinneni ku Poznan, tsi yi Polônia, muingi kukhupika bidia ayi biuma binkaka bafila kuidi zikhomba

7. 

   Kilumbu 17, Ngonda Yintatu, mvu 2022: Bo vavioka to bilumbu binna tona bafila lusalusu lutheti, zikhomba batona viaje yinkaka muingi kunata 13 di zitonelada zi buima ku Ucrânia

8. 

   Kilumbu 21–27, Ngonda Yintantu, mvu 2022: Zikhomba ku Polônia bavanga momawu mambu. Bakhupika biuma bi kufila ku Ucrânia ayi bo bituka kuna bakabula mu bibuangu biba beni zitsatu mu kilumbu kimueka to

9. 

   Kilumbu 28, Ngonda Yintatu, mvu 2022: bo vavioka to 20 di bilumbu tona zikhomba batambula nsua wu kutona kuvana lusalusu, bafila 100 di zitonela zi bidia, bilongo ayi biuma binkaka binkinza ku Ucrânia

Nati bubu, Zimbangi zi Yave bama nunga kukaba ku Ucrânia kuvioka 190 di zitonelada zi biuma muingi kusadisa zikhomba zitu.