Wulenda ba mu Ndembama mu Thangu Ziphasi

1. Mbi bio “ndembama yi Nzambi” ayi ndandu mbi tulenda baka mu yawu? (Filipi 4:6, 7)

VADI ntindu ndembama batu bawombo mu nza bakhambu zaba, “ndembama yi Nzambi” yintuadisanga luvovomu mu kuba kikundi kifikama na Tat’itu yi diyilu. Bo tuidi ndembama yi Nzambi tumbanga mu nsika. (Tanga Filipi 4:6, 7.) Tumbanga kikundi kifikama na “Nzambi yi ndembama” ayi batu tunzolanga. (1 Tesa. 5:23) Bo tunzaba, tumfiatila ayi tuntumukina Tat’itu, ndembama yi Nzambi yilenda vumbika mabanza mitu bo tumviokila mu ziphasi.

2. Kibila mbi tufueti bela lufiatu ti tulenda baka ndembama yi Nzambi?

² Bukiedika ti tulenda baka ndembama yi Nzambi bo tumviokila mu ziphasi, bivunga, bivuka, bo vammonika divunza kuidi batu bambuelanga mioko mangumba ma pulitika ayi zikhuamusu? Dioso kua diambu di phila ayoyo, dilenda kututula boma. Yesu wutebula moyo minlandikini miandi: “Bikanu kukuazuka ayi bikanu kumona boma.” (Yoa. 14:27) Mayangi beni kuzaba ti zikhomba zitu banlandakananga dilongi adiodi. Mu lusalusu lu Yave, bawu bannunganga kubaka ndembama kheti bamviokila mu mambu mawombo maphasi.

BAKA NDEMBAMA BO WUMVIOKILA MU KIVUNGA

3. Buidi bimbevu voti kivunga bilenda botudila ndembam’itu?

³ Bimbevu voti kivunga, bilenda balula luzingu luitu mu kinzimbukila. Tala mambu kivunga ki COVID-19 kituadisa kuidi batu bawombo. Batu balonguka bafiongunina ti mu kibila ki COVID-19 batu bawombo batona kumona phasi kulala ayi bawombo bamonikina mambu ma bavanga beni kukuazuka, dedi kuba mu kiunda kingolo, kunua beni malavu, kuvola zitsunga zingolo, buphunha kunzo ayi kuba mayindu ma kuyivonda. Boti mawu widi mu kuviokila va kizunga kiaku, buidi wulenda kukiyadila muingi wubika kukuazuka beni ayi kubaka ndembama yi Nzambi?

4. Kibila mbi kuzaba mbikudulu yi Yesu matedi bilumbu bitsuka yi tuvaninanga ndembama?

⁴ Yesu wubikula ti mu bilumbu bitsuka, kuala ba mintindu miwombo mi bimbevu mu “bibuangu biviakana.” (Luka 21:11) Buidi kuzaba mambu amomo malenda ku tutuadisila ndembama? Befu tuyitukanga ko bo bivunga bimmonika. Ayi tunkininanga ti mambu moso amomo, madi bivisa bi mambu Yesu kabikula. Tuidi bibila biwombo muingi kulandakana dilongi Yesu kavana mu bilumbu bitsuka matedi “kubika ba beni boma.”—Matai 24:6.

5. (a) Dedi bummonisina Filipi 4:8, 9, mambu mbi tulenda dinda mu nsambu bo tumviokila mu kivunga? (b) Buidi kukuwa matangu ma Kibibila masueku mu fonu malenda ku kusadisila?

⁵ Bo kivunga kimmonika tulenda tona kukuazuka ayi kuba boma. Mawu mamonikina kuidi yaya Desi.b Bo titi’andi, khomb’andi ayi dotolu’andi bafua mu COVID-19, nandi wuba boma bu kutambakana mbela beni ayi kutambikisa yawu kuidi mam’andi wuba kiboba. Kivunga akiokio mvandi kitula kisalu kiandi va kingela ayi wutona kukikuvusa boti wunkuiza nunga kusumba bidia bifuana ayi kufutila nzo. Mambu amomo, mamvanga kukuazuka beni ayi kukhambu bakanga tolu. Vayi yaya Desi wuyiza bue baka ndembama. Buidi? Nandi wusambila kuidi Yave muingi kaba wuvumbama ayi kansadisa kuba mayindu mamboti. (Tanga Filipi 4:8, 9.) Nandi waba kuwilanga Yave, mu matangu ma Kibibila masueku mu fonu. Nandi wutuba: “Kukuwa mawu kuvumbika mabanza mami ayi mathebula moyo ti Yave wu kuphuanga nkinza.”—Minku. 94:19.

6. Buidi ndongukulu’aku ayi zikhutukunu zilenda kusadisila?

⁶ Disi ko diambu diluelu kutatamana kuvanga mambu tuaba vanganga bo tumviokila mu kivunga. Vayi kawubika mawu ma kutula nkaku muingi kuvanganga ndongukulu’aku yi Kibibila ayi kulandakananga zikhutukunu. Binongu bi luzingu bi zikhomba bidi mu bilongulu bitu ayi mu zivideo, bi tutebula moyo buidi zikhomba zitu badi mu kutatiminina bakuikama kheti bamviokila mu zio ziawu ziphasi tuidi mu kuviokila. (1 Pete. 5:9) Ayi kulandakana zikhutukunu kuala ku tuvanga kuyindula mambu makhindusulu madi mu Kibibila. Mvandi zi tuvana luaku lu kukindisa bankaka ayi kutambula khindusulu. (Loma 1:11, 12) Bo wunyindula phila Yave kansadisilanga bisadi biandi bo bamviokila mu ziphasi, dedi kuyindula ti buka badi bawu veka voti bimbevu, kiminu kiaku kiala kinda ayi wala ba lufiatu ti Yave mvandi wala kusadisa.

7. Mbi ngie wulenda longuka mu kifuani ki mvuala Yoane?

⁷ Vanga mangolo muingi kukolukanga na zikhomba ziaku. Vadi bimbevu bilenda ku tuvanga kutatuka batu, kubunda mvandi zikhomba zitu zi kiphevi. Bo mambu amomo mammonika, ngie wulenda kukimmuena dedi bo mvuala Yoane kamuena. Nandi waba tomba kumonana na nkundi’andi Ngayo vayi mu thangu beni Yoane wuvisa ti balendi monana ko. (3 Yoa. 13, 14) Diawu kavangila mamoso kanunga muingi kunsonikina nkanda. Ayi boti wisinnunga ko kue tala zikhomba, wulenda solula yawu mu telefone, videoconferência voti kuba fila mensagem. Ngie kutatamana kuba wufikama na zikhomba, wunkuiza mona nsika ayi kuba mu ndembama. Boti widi mu kukuazuka, tomba lusalusu kuidi bakulutu ba kimvuka ayi vitika khindusulu ba kuvana.—Yesa. 32:1, 2.

BAKA MAYANGI BO WUMVIOKILA MU KIVUKA

8. Buidi kivuka kilenda tubotudila ndembama?

⁸ Boti wumana viokila mu khuka minlangu, mu zindikununu zi ntoto voti mana via nzo, mawu ma kuvanga kukuazuka beni. Ayi boti mana fuilu mutu wunzolanga, biuma biaku bituluka, ḿba ngie wuba mu kiunda, wuzimbisa kivuvu voti wuba mu fiti. Kuyindudila abobo, masinsundula ko ti ngie wisi ko kiminu voti wunzolanga beni biuma bi kinsuni. Kibila bo tumviokila mu ziphasi, thangu zinkaka tulenda yindudila mu phila yikhambu fuana. (Yobi 1:11) Vayi kheti mu mambu moso amomo maphasi, ngie wulenda baka ndembama. Buidi?

9. Buidi Yesu ka tukubikila mu matedi bivuka?

⁹ Tebuka moyo mambu Yesu kabikula. Batu bawombo banyindulanga ti balasa viokila ko “mu bivuka”. Vayi befu tuzebi ti mambu amomo, mala luta buelama mu bilumbu abibi bitsuka. Ayi tufueti telimina kuviokila mu mawu. Yesu wulubula minlandikini miandi ti mu bilumbu bitsuka, vala monika zindikununu zi ntoto ayi “bivuka binkaka” ava tsukulu nza yiza. (Luka 21:11) Nandi mvandi wubue tuba ‘mambu mambi mala saba’ ayi tummonanga mawu mu kibila ki buphunha ayi mimvita. (Matai 24:12) Yesu kasa tuba ko ti mambu amomo, mala monikina to kuidi batu bakhambu sadilanga Yave. Vayi bisadi biwombu bi Yave bamviokilanga mu mambu amomo. (Yesa. 57:1; 2 Koli. 11:25) Yave kavanganga ko mangitukulu muingi kutukieba mu mambu moso, vayi wu tuvananga mangolo muingi tutatamana bavumbama ayi kuba mu ndembama.

10. Kibila mbi kuyikubimina bubu yidi mbonosono yi kiminu kitu? (Zingana 22:3)

¹⁰ Tuala luta ba bavumbama bo mambu maphasi mammonika, befu kuyikubimina ava mawu mamonika. Vayi bukiedika ti khubumunu ayoyo yimmonisa ti tuisi ko kiminu mu Yave? Ndamba. Khubumunu ayoyo, yimmonisa ti tuidi lufiatu mu lukiebu lu Yave. Buidi? Diambu di Nzambi di tulubula muingi tubanga bakubama ava bivuka bimonika. (Tanga Zingana 22:3.) Ayi mu nzila bilongulu bitu, zikhutukunu ayi zindubu zinkuizilanga mu kimvuka ki Yave, zi tulubulanga tuba bakubama ava mambu mamonika.c Ngie wumfiatilanga Yave? Boti buawu, tunkuiza landakana zindubu ava—diambu kumonika.

11. Mbi wulenda longuka mu kifuani ki yaya Margaret?

¹¹ Mona kifuani ki yaya Margaret. Zimfumu zi luyalu bamvana nsua muingi kabotuka ku nzo’andi mu kibila ki mbazu yinama va kizunga kiawu. Mu kibila ki batu baba tina mu khumbu yimueka, zinzila ziyiza ba kikhafi mu kibila ki makalu. Ayi mu kibila ki muisi, yaya Margaret kasa nunga ko kubasika mu dikalu. Vayi nandi wununga kuvuka kibila wuba wukubama. Ayi mu biuma biba mu dikalu, muba mapa yimmonisa nzila yinkaka kafueti viokila. Mu kibila ki khubumunu ayoyo, yaya Margaret wununga kuvuka.

12. Kibila mbi tufueti landikininanga zithuadusulu?

¹² Muingi tuyikieba ayi kukieba bankaka, zimfumu zi luyalu balenda ku tudinda muingi tuenda ku kibuangu ki nsika voti kulandakana zithuadusulu zinkaka. Batu bankaka balandakananga ko zithuadusulu aziozio, kibila bammanganga kubika biuma biawu. Vayi mbi befu Baklisto tufueti vanga? Kibibila kintuba: “Mu kibila ki Mfumu, mutumukina baboso banyala kuba kuandi minyadi voti batu bawu bantumanga.” (1 Pete. 2:13, 14) Kimvuka ki Yave mvandi ki tuvananga zithuadusulu muingi tuba mu nsika. Ayi khumbu ziwombo ba tutebulanga moyo muingi tuvana thalu’itu yi telefone muingi ba tubakula bo mambu mala monika. Ngie makubama? Mvandi tulenda tambula thuadusulu matedi vama mbi tufueti tinina vo tunkuiza tambudila lusalusu voti buidi ayi thangu mbi tufueti sadisila bankaka. Befu kumanga tumukina, tulenda tula luzingu luitu ayi lu bakulutu ba kimvuka va kingela. Tebuka moyo ti bawu, ba tukiebanga. (Ebe. 13:17) Yaya Margaret tube tubila wutuba: “kulandakana zithuadusulu zinkuizilanga mu nzila kimvuka ayi bakulutu, ziawu zivukisa luzingu luama.”

13. Mbi binsadisanga zikhomba baviokila mu ziphasi kuba mu mayangi ayi mu ndembama?

¹³ Zikhomba ziwombo babika zinzo ziawu mu kibila ki bivuka voti mimvita banunga kukolama bo mambu mabaluka mu luzingu ayi baluta kukivana mu kisalu ki Yave. Dedi Baklisto mu sukulu yitheti, baviokila mu zikhuamusu. Vayi kheti bobo, batatamana “kusamuna zitsangu zimboti.” (Mava. 8:4) Kusamuna kuba sadisa kusikika thalu’awu mu kisalu ki Kintinu, kubika kuandi mu ziphasi baba viokila. Mu kibila akiokio, bawu batatamana mu mayangi ayi mu ndembama.

BAKA NDEMBAMA BO WUMVIOKILA MU ZIKHUAMUSU

14. Buidi zikhuamusu zilenda manisina ndembam’itu?

¹⁴ Bo tumviokila mu zikhuamusu, ndembam’itu yilenda mana. Tunluta banga mu mayangi bo tunsamuna, tunkutakana ayi bo tumvanga mambu ma lumbu ka lumbu mu khambu ba boma boti bankuiza tunata mu buloku. Ayi boti tuisi ko kiphuanza, tulenda tona kukuazuka ayi kuyindula mu mambu malenda monika. Disi ko diambu dimbi kuyindudila abobo, vayi tufueti ba keba keba. Yesu wulubula ti zikhuamusu, zilenda ku tuvanga kusumuka. (Yoa. 16:1, 2) Diawu buidi tulenda tatiminina kuba mu ndembama bo tumviokila mu zikhuamusu?

15. Kibila mbi tulendi bela ko boma bu zikhuamusu? (Yoane 15:20; 16:33)

¹⁵ Diambu di Nzambi dintuba: “Baboso batidi kunata luzingu lukuikama mu Nzambi, mu kithuadi na Yesu Klisto, mvawu bela thoto.” (2 Timo. 3:12) Khomba mueka bantedilanga Andrei wumona phasi kukikinina ti bakandimina kisalu ki kusamuna ku tsi’awu. Nandi wutuba: ‘Akuku kuidi beni Zimbangi zi Yave, buidi ntinu kankuiza nungina ku tutula befu boso mu buloku?’ Mayindu amomo, masa tuadisa ko ndembama kuidi yaya Andrei, vayi maba kunkuazulanga beni. Zikhomba zinkaka, babika mamoso mu mioku mi Yave ayi bazaba ti yoso kua thangu balenda kota mu buloku. Kuyindudila abobo, kuba sadisa kubika kukuazuka beni dedi bo yaya Andrei kaba kuazukila. Buviokila thangu, yaya Andrei wubalula mayindu, wuyiza ba mu ndembama ayi mu mayangi kheti mu mambu amomo. Mawu mvandi malenda ku tumonikina. Yesu wutuba ti tuala viokila mu zikhuamusu vayi nandi wuba lufiatu ti tulenda tatamana bakuikama.—Tanga Yoane 15:20; 16:33.

16. Zithuadusulu mbi tufueti landakana bo bankandimina kisalu kitu?

¹⁶ Bo bankandimina kisalu kitu, tulenda tambula zithuadusulu zinkuizila ku filiali ayi mu nzila bakulutu ba kimvuka. Zithuadusulu aziozio, zi tukiebanga, zi tuvananga lufiatu ti tunkuiza tatamana kutambula bidia bi kiphevi ayi kuvanga kisalu ki kusamuna. Vanga mangolo muingi wulandakana zithuadusulu beni, kheti wisimvisa ko kibila mbi bama vanina ziawu. (Yako. 3:17) Mvandi bika kuzabikisa mambu matedi zikhomba zitu ayi mambu kimvuka kidi mu kuvanga kuidi batu bakhambulu nsua wu kuzaba.—Mpovi 3:7.

17. Dedi bapostolo mu sekulu yitheti, mbi tufueti ba bakubama muingi kuvanga?

¹⁷ Satana wunkuamisanga dikabu di Nzambi mu kibila ki kiyeku badi ‘ki kuvana kimbangi matedi Yesu’. (Nzai. 12:17) Ka wubika Satana ayi nza kanyadila yi kutula boma. Kusamuna ayi kulonga kheti mu zikhuamusu, ku tuvananga mayangi ayi ndembama. Mu sekulu yitheti, bo zimfumu zi luyalu zi basi Yuda bakandimina bapostolo babika kusamuna, bawu basola kutumukina Nzambi. Bawu batatamana kulonga ayi kuvanga kisalu kiawu mu mayangi. (Mava. 5:27-29, 41, 42) Bukiedika, bo bankandimina kisalu kitu, tufueti ba keba keba bo tunsamuna. (Matai 10:16) Vayi befu kuvanga mamoso tunnunga, tunkuiza baka ndembama yinkuizilanga mu kukuangidika Yave ayi kusamuna zitsangu zimvukisanga batu.

“NZAMBI YI NDEMBAMA WALA BA YAKU”

18. Kibila mbi tufueti tebukila moyo tho yi ndembama tuntomba?

¹⁸ Ba lufiatu ti mu thangu ziphasi, tulenda baka ndembama. Mu thangu ayoyi, tufueti tebuka moyo ti tuntomba ndembama yi Nzambi yo nandi to kalenda ku tuvana. Fiatila mu Yave ngie kuviokila mu kivunga, kivuka ayi mu zikhuamusu. Bika kutatuka kimvuka. Yindula mu mambu mamboti Yave ka tukanikisa. Ngie kuvanga mawu “Nzambi yi ndembama wala ba yaku.” (Fili. 4:9) Mu dilongi dinlanda, tunkuiza tubila buidi tulenda sadisila zikhomba zitu badi mu kuviokila mu zikhuamusu kubaka ndembama yi Nzambi.