DILONGI 52
Sadisa Bankaka Kukindama mu Ziphasi
“Kawubika kuvanga mamboti kuidi mutu wufueti vangila mawu boti widi luaku lu kunsadisa.”—ZINGA. 3:27.
NKUNGA 103 Bakulutu ba Kimvuka—Nkhailu wu Yave
MAMBU TUANLONGUKAa
1. Buidi Yave kalenda tambudila minsambu mi bisadi biandi?
NGIE zebi ti khumbu zinkaka Yave kalenda kusadila muingi wuba mvutu wu nsambu wu kisadi kiandi? Ngie wulenda sadisa kheti widi nkulutu wu kimvuka, nsadisi wu bakulutu, ntuami ntuala, nsamuni, ditoko, voti widi kiboba. Bo wumueka mu bisadi bi Yave kakundinda lusalusu mu nzila nsambu, nandi kalenda sadila bakulutu ba kimvuka voti woso kuandi khomba wukuikama muingi kaba “tho yi khindusulu” kuidi nandi. (Kolo. 4:11) Luidi luaku lunneni kusadila Yave ayi kusadisa zikhomba mu phila ayoyi! Befu tulenda nunga kuvanga mawu bo vammonika mambu ma kivuka, kivunga ayi zikhuamusu.
SADISA BANKAKA KUKINDAMA MU THANGU KIMVUNGA
2. Kibila mbi dilenda bela diambu diphasi kusadisa bankaka mu thangu kivunga?
2 Bimvunga bilenda ku tutula nkaku muingi kusadisa bankaka. Dedi, boti tuntomba kue tala bakundi bitu voti kutumisa bankaka ku nzo’itu muingi tudia va kimueka, tulendi ma vanga ko. Ayi kheti tuntomba kusadisa bankaka, vayi dinluta banga diambu diphasi boti musi dikanda ditu widi mu kutovuka. Bo tuntomba kusadisa zikhomba zitu, Yave wunkuangalalanga beni bo kammona phila tukivanina muingi kuba sadisa. (Zinga. 3:27; 19:17) Buabu mbi tulenda vanga?
3. Mbi tulenda longuka mu kifuani ki bakulutu ba kimvuka ki yaya Desi? (Yelemia 23:4)
3 Mbi bakulutu ba kimvuka bafueti vanga. Boti ngie widi nkulutu wu kimvuka, tomba kuzaba buboti mamemi maku. (Tanga Yelemia 23:4.) Yaya Desi, tutubidi mu dilongi dibedi wutuba, “Bakulutu ba kimvuka badi mu dingumba diama di kubasikila mu kisalu ki kusamuna, baba kuthumisanga ayi zikhomba zinkaka muingi tusamuna ayi tuviokisa thangu va kimueka.”b Mangolo moso amomo bakulutu ba kimvuka baba vanganga, ma basadisa kusadisa yaya Desi bo kafuilu basi dikanda diandi mu kivunga ki COVID-19.
4. Kibila mbi bakulutu ba kimvuka, banungina kusadisa yaya Desi ayi mbi befu tulenda longuka?
4 Yaya Desi wutuba: “Bakulutu ba kimvuka baba bakundi bama, diawu yisa mona ko phasi kuba zabikisa mabanza mami ayi kuba kamba buidi yaba muena.” Mbi bakulutu ba kimvuka balenda longuka? Kengidilanu baboso badi kutsi lukiebu luinu ava ziphasi zimonika. Mufueti ba bakundi bawu. Boti vadi kivunga ki kutula nkaku muingi kue bila zikhomba, buna tomba ziphila zinkaka muingi kuba sadisa. Yaya Desi wubue tuba: “Khumbu zinkaka bakulutu ba kimvuka baba kuthelanga ayi baba kumfilanga mensagem mu kiokiawu kilumbu.” “Kheti yizaba buboti matangu bawu basadila, vayi mawu manhikuna mabanza mami.”
5. Buidi bakulutu ba kimvuka balenda zabila zitsatu zi zikhomba ayi buidi balenda bavanina lusalusu?
5 Phila yimueka wulenda zabila mambu zikhomba ziaku badi mu kuviokila, yidi mu kubika kuba vana biuvu bilenda bavanga kumona zitsoni. (Zinga. 20:5) Wukiyuvusa: Bukiedika ti bawu badi bidia, bilongo ayi biuma binkaka bintombulu? Bankuiza babotula mu kisalu? Bankuiza tomba lusalusu luitu voti lu zimfumu zi luyalu? Yaya Desi wutambula lusalusu kuidi zikhomba zi kimvuka. Vayi luzolo ayi khindusulu yi Kibibila bakulutu ba kimvuka bamvana, yawu yiluta kunsadisa. Nandi wutuba: “Bakulutu ba kimvuka basambila yama, kheti yinsintebuka ko moyo mambu bawu batuba mu nsambu, vayi mawu manhikuna ntim’ami. Mawu maba buka Yave waba kukhamba, ‘Ngie wisi ko ngie veka.’”—Yesa. 41:10, 13.
Khomba wuntuadisa kiyeku widi mu mayangi mu kukuwa mimvutu mikhindusulu mi zikhomba mu lukutukunu kubunda mvandi khomba widi mu kubela wumvana mimvutu mu zoom (Tala lutangu 6)
6. Buidi befu boso mu kimvuka tulenda sadisila bankaka?(Tala foto.)
6 Mbi bankaka bafueti vanga. Kheti bakulutu ba kimvuka bawu badi kiyeku ki kukindisa bankaka, vayi Yave wu tutumisa befu boso muingi tukindisa bankaka. (Ngala. 6:10) Kheti tulenda tuba bikuma biluelu muingi kukindisa, vayi bia kutubulu mu luzolo, bilenda sadisa mutu widi mu kubela. Dedi muana kilezi kalenda vanga fikula yilenda kindisa khomba. Ditoko kalenda sadisa khomba wuntomba lusalusu muingi kue sumba biuma. Bankaka balenda sadisa kue lambila bidia kuidi khomba widi mu kubela. Bukiedika bo mbela yintembakana, baboso mu kimvuka bantombanga khindusulu kubunda mvandi bakulutu ba kimvuka. Mvandi bo lukutukunu lummana tulendi fika kuenda ko muingi kusolula na zikhomba kuba kuandi va kimueka voti mu zoom. Zikhomba zinkaka bavutula matondo kuidi bakulutu ba kimvuka, mu kuba sonikina minkanda mu phila ba kivanina mu thangu yi kivunga. Bukiedika didi diambu dimboti “kutatamana kumbombasana ayi kukindasana befu na befu”!—1 Tesa. 5:11.
SADISA BANKAKA BO BAMVIOKILA MU KIVUKA
7. Mambu mbi maphasi mammonikanga bo kivuka kimmonika?
7 Kivuka kilenda balula luzingu lu mutu mu kinzimbukulu. Batu bamviokila mu mawu balenda zimbisa biuma biawu, zinzo ayi batu banzolanga. Mambu amomo maphasi mvandi mammonikinanga kuidi zikhomba zitu. Mbi tulenda vanga muingi kusadisa?
8. Mbi bakulutu ba kimvuka ayi zimfumu zi makanda bafueti vanga ava kivuka kumonika?
8 Mbi bakulutu ba kimvuka bafueti vanga. Bakulutu, sadisanu zikhomba zinu baba bakubama ava kivuka kumonika. Tombanu kuzaba boti baboso mu kimvuka bazebi mambu mbi bafueti vanga muingi baba mu nsika ayi boti bawu badi thalu’inu yi telefone. Yaya Margaret, tutubidi mu dilongi dibedi wutuba: “Bakulutu ba kimvuka ba tulubula mu zitsatu zi kimvuka mambu maphasi malenda monika va kizunga kitu, dedi kizunga kulula mbazu. Bawu batuba ti, zimfumu zi luyalu ba ku tukamba muingi tuenda va kibuangu kinkaka kinsika, buna tufueti tina mu thinu.” Ndubu ayoyo ba tuvanina yawu mu thangu yifuana. Kibila bo vavioka to sabala tanu, kizunga kitu kinama mbazu. Diawu, zimfumu zi makanda bo bamvanga mbuongimini’awu bafueti tubila mbi kadika mutu kafueti vanga. Ngie ayi bana baku benu kuba bakubama, luisinkuiza mona ko phasi kuba bavumbama bo kimvuka kiala monika.
9. Buidi bakulutu ba kimvuka balenda sadila va kimueka ava ayi bo kivuka kimmonika?
9 Boti ngie widi ntuadisi wu dingumba di kisalu ki kusamuna, bika kutelimina theti kivuka kimonika bosi wubaka zithalu zi telefone zi baboso badi mu dingumba diaku. Vayi vanga mawu ava kivuka kimonika. Ngie kuvanga mawu, kivuka kia kumonika, wunkuiza nunga kutela baboso badi mu dingumba diaku muingi kuba sadisa. Sonika zithalu zioso zi telefone ayi mu kadika thangu fionguninanga boti ziawu zidi mu kusala. Mu phila ayoyo, ngie wala nunga kutela zikhomba zioso bantomba lusalusu. Ayi kivunga kia kumonika, mu nsualu vana thalu beni kuidi ntuadisi wu bakulutu ba kimvuka ayi nandi wala vana yawu kuidi nkengididi wu bimvuka. Dedi bo kizunga ki yaya Margaret kilula mbazu, nkengididi wu bimvuka wutatamana kusala mu 36 di bilokula muingi kutuadisa bakulutu ba kimvuka baba vanga mamoso muingi bakieba kuvioka 450 di zinzo zi zikhomba zituluka mu kibila ki kivuka. (2 Koli. 11:27) Mu phila ayoyo, bawu banunga kusadisa zikhomba zioso baba tomba vama va kukala.
10. Kibila mbi didi diambu dinkinza bakulutu ba kimvuka kukieba mamemi? (Yoane 21:15)
10 Bakulutu boso ba kimvuka badi kiyeku ki kusadisa zikhomba bamviokilanga mu ziphasi. (1 Pete. 5:2) Bo kivuka kimmonika, bawu bantombanga theti kuzaba boti zikhomba zioso badi mu nsika, badi ki kudia, bi kuvuata ayi biumba binkaka bintombulu. Kibila kheti vamvioka zingonda ziwombu, zikhomba bavuka bankuiza tatamana kutomba lusalusu lu kiphevi ayi lu kinsuni. (Tanga Yoane 21:15.) “Vantombuluanga thangu muingi luzingu lubue vutaka dedi bo lubela.” Mawu yaya Harold, wunsadilanga mu Dingumba di Filiali katuba bo kamona zikhomba ziwombo bamonikina bivuka. “Va mesu ma batu zikhomba aziozio balenda monikina buka ti badi buboti vayi balenda tatamana mu kiunda mu kuyindula batu banzolanga bafua, biuma biawu ayi buidi banungina kuvuka. Vayi kuyindudila abobo yisi ko mbonosono yi kukhambu kiminu.”
11. Mambu mbi makanda bafueti tatamana kuvanga?
11 Bakulutu ba kimvuka bantebukanga moyo dilongi dintuba: “Kudila na batu bandila.” (Loma 12:15) Zikhomba bamonikina bivuka bafueti ba lufiatu ti Yave ayi zikhomba ba kuba zolanga. Ayi bakulutu ba kimvuka bankuiza tomba kusadisa makanda amomo kubue vutuka kuvanga mambu ma kiphevi dedi: Nsambu ndongukulu’awu, kulandakananga zikhutukunu ayi kuba kifuza mu kisalu ki kusamuna. Bakulutu ba kimvuka mvandi, balenda kindisa matata muingi basadisa bana bawu basikika thalu mu mambu kivuka kikhambu tulula. Matata, tebulanu moyo bana binu ti, Yave wala tatamana kuba nkundi’awu ayi wala tatamana kuba sadisa. Ayi luba sadisa kuba lufiatu ti bawu bakhidi mu khati kikhomba kitu mu nza yimvimba ayi zikhomba beni badi bakubama muingi kuba sadisa.—1 Pete. 2:17.
Bukiedika ti ngie wulenda kukivana muingi kusadisa bo kivuka kimmonika va kizunga kiaku? (Tala lutangu 12)e
12. Mbi bankaka balenda vanga muingi kusadisa bo kivuka kimmonika? (Tala foto.)
12 Mbi bankaka bafueti vanga. Boti kivuka ki mamonika va kizunga kinu, yuvula kuidi bakulutu ba kimvuka, buidi wulenda sadisila. Ḿba ngie wulenda yamba ku nzo’aku zikhomba bamonikina kivuka voti zikhomba bankuiza buela mioko kisalu ki kutunga. Ngie wulenda vana bidia ayi biuma binkaka bintombulu. Kheti kivuka ki bemonikina ku kinanu, ngie wulenda sadisa. Buidi? Mu kunata mu minsambu batu boso bamviokila mu mawu. Mvandi wulenda sadisa mu kuvana minkhailu. (2 Koli. 1:8-11) Boti ngie widi luaku muingi kukuenda kuma kumonikina kivuka, yuvula bakulutu ba kimvuka mbi wulenda vanga muingi kusadisa. (2 Koli. 8:2-5) Ba ku kutumisa, ngie wala tambula khubumunu yifuana muingi wusadila mu thangu yifuana.
SADISA ZIKHOMBA KUKINDAMA MU ZIKHUAMUSU
13. Mambu mbi zikhomba zitu bamviokilanga mu zi tsi bakandimina kisalu kitu?
13 Zikhuamusu zilenda luta buela ziphasi mu zi tsi bakandimina kisalu kitu. Zikhomba bankalanga mu zi tsi aziozio, bamviokilanga mu mambu mawombo maphasi dedi, kukhambu ku zimbongo, bimbevu ayi kufuilu batu banzolanga. Ayi mu kibila ki zikhuamusu, bakulutu ba kimvuka balenda mona nkaku muingi kue tala zikhomba ayi kukoluka yawu mu kiphuanza muingi kuba kindisa. Mawu mamonikina yaya Andrei, tutubidi mu dilongi dibedi. Khomba mueka yinkietu widi mu dingumba diawu di kubasikila mu kisalu ki kusamuna wuvanga acidente ayi waba viokila mu mambu ma kukhambu ku zimbongo. Vaba tombulu kumpasula khumbu ziwombo ayi kabasa nunganga ko kuvanga kisalu. Kheti mu nkaku wu kivunga ki COVID 19 zikhomba bavanga mamoso banunga muingi kunsadisa ayi Yave wumona mawu.
14. Buidi bakulutu ba kimvuka balenda vanina kifuani mu kufiatila Yave?
14 Mbi bakulutu ba kimvuka bafueti vanga. Yaya Andrei wusambila ayi wuvanga mo kanunga. Buidi Yave katambudila minsambu miandi? Yave wusadila zikhomba baluta ba kiphuanza muingi kubuela mioko. Zikhomba zinkaka bakivana muingi kunata mu dikalu khomba wuvanga acidente ku nzo mbuku. Bankaka bavana zimbongo muingi kusadisa. Yave wuba sadisa bavanga mamoso banunga. Ayi wusakumuna kithuadi ayi mangolo moso bavanga. (Ebe. 13:16) Bakulutu ba kimvuka, benu kumona ti bama kandimina kisalu kitu, vananu biyeku binkaka kuidi zikhomba. (Yele. 36:5, 6) Bulutidi, fiatilanu mu Yave. Nandi kalenda kusadisa muingi kusadisa zikhomba mu mambu bamviokila.
15. Buidi tulenda tuadisila kithuadi bo tumviokila mu zikhuamusu?
15 Mbi bankaka bafueti vanga. Bo bankandimina kisalu kitu, befu tunkutakananga mu mua mangumba maluelu. Ayi dilutidi nkinza, tufueti tuadisa kithuadi va khat’itu. Nuana ayi Satana, kubika kuandi na zikhomba zitu. Bika kulundanga nganzi mu mambu wulenda lemvukila, vayi boti wisinnunga ko kulemvukila, bika kuviokisa beni thangu muingi ku madedikisa. (Zinga. 19:11; Efe. 4:26) Ba wukubama muingi kusadisa bankaka. (Tito 3:14) Lusalusu zikhomba badi mu dingumba di yaya Andrei bavana kuidi khomba wuvanga acidente, luluta tuadisa kithuadi. Ayi baluta ba bafikama buka basi dikanda—Minku. 133:1.
16. Dedi bummonisina Kolosai 4:3, 18, buidi tulenda sadisila zikhomba bamviokilanga mu zikhuamusu?
16 Zikhomba ziwombo bansadilanga Yave kheti mu zikhuamusu zi zimfumu zi luyalu. Bawombu mu bawu badi mu buloku mu kibila ki kiminu kiawu. Befu tulenda kuba nata mu nsambu, makanda mawu ayi zikhomba bantulanga kiphuaza kiawu va kingela muingi kuba sadisa babaka bidia bi kiphevi, bi kinsuni ayi kuba buela mioku mu zinzo zi lufundusu.c (Tanga Kolosai 4:3, 18.) Bika kulenza mangolo ma nsambu!—2 Tesa. 3:1, 2 1 Timo. 2:1, 2.
Buidi wulenda kubikila dikanda diaku ava kivuka kumonika? (Tala lutangu 17)
17. Buidi wulenda kubimina bubu mu zikhuamusu?
17 Ngie ayi dikanda diaku lulenda kubama ava zikhuamusu zimonika. (Mava. 14:22) Bika kuyindula ti mambu moso zikhomba badi mu zi tsi bakandimina kisalu kitu, mawu mvandi mala kumonikina. Vayi kindisa kikundi kiaku na Yave ayi kindisa bana baku mvawu bavanga mawu. Boti vadi mambu ma kukuazula, zibula ntim’aku kuidi Yave. (Minku. 62:7, 8) Va kimueka na dikanda, tubilanu bibila bi kumuvanga kufiatila mu Yave.d Ngie kukubama ayi kufiatila mu Yave ava kivuka kimonika, wala nunga kusadisa bana baku kuba kibakala ayi ndembama.
18. Mbi tuidi mu kutelimina mu bilumbu binkuiza?
18 Ndembama yi Nzambi yi tuvanganga kuba mu nsika. (Fili. 4:6, 7) Mu kibila ki ndembama beni, Yave wumvumbikanga mabanza ayi ntim’itu kheti mu mambu matedi bivunga, bivuka ayi zikhuamusu zilenda kutumonikina. Yave wunsadilanga bakulutu ba kimvuka muingi ku tutuadisa ayi wu tuvananga luaku muingi kusadisa bankaka. Ndembama tuidi bubu, yi tukubikanga muingi tukindama mu ziphasi tumviokila kubunda mvandi “ziphasi zingolo tuala viokila.” (Matai 24:21) Mu thangu ziphasi zingolo, vala tombulu tutatamana kutuadisa ndembama ayi kusadisa bankaka kuvanga mawu. Ayi bo mambu amomo mala vioka, tualasa bue viokila ko mu mambu ma tuvanga kukuazuka. Befu tuala tambula mambu moso Yave ka tukanikisa—luzingu lusonga ayi ndembama yi mvu ka mvu.—Yesa. 26:3, 4.
NKUNGA 109 Tuzolasananga mu Ntima Woso
a Yave khumbu ziwombo wunsadilanga bisadi biandi muingi kusadisa baboso bamviokila mu ziphasi. Nandi kalenda kusadila muingi wuba tho yi khindusulu kuidi zikhomba ziaku. Tuemmona buidi tulenda sadisila bankaka bantomba lusalusu.
b Bavingisa mazina bankaka.
c Dingumba di filiali voti baboso badi ku kikulutu balendi nunga ko kusonikina minkanda kuidi kadika khomba widi mu buloku.
d Tala dilongi di Kibanga ki Nsungi di ngonda yisambuadi mvu 2019 dintuba “Kubama Bubu mu Zithotolo Zinkuiza”.
e MAMBU MADI MU ZIFOTO: Bakuela badi mu kuvana bidia kuidi dikanda badi ku kibuangu batinina kivuka.