Zikhomba zi Matoku—Banu Baklistu Bayonzuka mu Kiphevi

1. Mbi zikhomba zi babakala bafueti vanga muingi babaka ndandu?

NTINU Davidi wukubika Salomo bo kankamba: ‘Kindama ayi ba dibakala.’ (1 Minti. 2:​1-3) Baklistu boso bubu, bafueti landakana dilongi adiodio. Bawu balenda baka ndandu, mu kulonguka kutumukina minsiku mi Yave ayi kusadila minsua mi Kibibila milenda kuba tuadisa mu luzingu luawu. (Luka 2:52) Kibila mbi didi diambu dinkinza zikhomba zi matoku kukonzuka mu kiphevi?

2-3. Kibila mbi didi diambu dinkinza zikhomba zi matoku kukonzuka mu kiphevi?

² Didi diambu dinkiza Baklistu kudukisa biyeku biawu va dikanda ayi mu kimvuka. Zikhomba zi matoku, bikanu kuba divuda mu kuyindula matedi biyeku muala tambula kuntuala. Benu mulenda sikika makani mu kukota mu kisalu ki thangu ka thangu, kuba minsadisi mi bakulutu ba kimvuka ayi kuntuala kuba nkulutu wu kimvuka. Mvandi, ḿba wulenda tomba kukuela ayi kubuta bana. (Efe. 6:4; 1 Timo. 3:1) Muingi wununga kudukisa makani amomo ayi kubaka ndandu, vantombulu ngie wuyonzuka mu kiphevi.b

³ Mbi bilenda kusadisa kukonzuka mu kiphevi? Vadi mua mambu mankinza mantombulu ngie wuvanga. Buabu mbi wulenda vanga muingi wuba wukubama bubu ayi kutambula kioso kua kiyeku mu bilumbu binkuiza kuntuala muingi kudukisa?

MAMBU MANTOMBULU MUINGI KUKONZUKA MU KIPHEVI

4. Kuidi wulenda bakila bifuani bimboti bio wulenda landakana? (Tala mvandi foto.)

⁴ Sola bifuani bimboti muingi kulandakana. Mu Kibibila muidi bifuani biwombu bimboti matoku balenda landakana. Bisadi abiobio bikuikama mu thangu yikhulu, baba zolanga Nzambi ayi batambula biyeku biwombu muingi kukeba dikabu diandi. Ngie mvaku wulenda bakula bifuani bimboti bi Baklistu bayonzuka mu kiphevi, va khati dikanda diaku ayi mu kimvuka. (Ebe. 13:7) Ayi Yesu Klistu widi kifuani kimboti kuidi ngiewu. (1 Pete. 2:21) Ngie wulenda longuka mu nduenga bifuani abiobio, mu kulandakana zikhadulu ziawu. (Ebe. 12:​1, 2) Diawu baka makani mu phila wulenda landikinina bifuani beni.

5. Buidi wulenda kunina khadulu yi kuyindula ayi kibila mbi didi diambu dinkinza? (Minkunga 119:9)

⁵ ‘Ba nduenga . . . Ayi kieba mayindu maku.’ (Zinga. 3:21) Mutu widi nduenga, wunyindulanga buboti ava kubaka makani. Diawu vanga mangolo muingi kukuna khadulu ayoyo. Kibila mbi? Kibila nza ayiyi, yiwedi matoku bantuadusuluanga mu ndueng’awu voti bambikanga mabanza mawu, matuadisa mambu bamvanga. (Zinga. 7:7; 29:11) Mvandi mambu bammonisanga mu televisão voti mu internet malenda kuvukumuna. Vayi buidi wulenda bakila mayindu mamboti? Mu kulonguka minsua mi Kibibila ayi kuyindula matedi ndandu milenda kutuadisa. Minsua amiomio, milenda kusadisa kubaka makani mankuangidika Yave. (Tanga Minkunga 119:9.) Ngie kukuna khadulu ayoyo yinkinza, yala kusadisa kukonzuka mu kiphevi. (Zinga. 2:​11, 12; Ebe. 5:14) Tala buidi kuyindula buboti kulenda kusadisila mu mambu muadi: (1) phila wulenda kebila zikhomba zi bakietu ayi (2) kubaka makani matedi phila wuntadilanga kimutu kiaku.

6. Buidi kuba mayindu mamboti, kulenda sadisila khomba yi di bakala kumonisa lukinzu kuidi zikhomba zi bakietu?

⁶ Khadulu yi kuyindula buboti, yala kusadisa kumonisa lukinzu kuidi bakietu. Disi ko diambu dimbi khomba yi dibakala kumonisa khadulu ayoyo muingi kuba kikundi kifikama na zikhomba zi bakietu. Vayi khomba yi dibakala widi mayindu mamboti, kalendi langa ko khomba yinkietu, boti kasi ko mayindu ma kunkuela mu kuvanga mambu dedi: Kumfila zimensagi ove kuvanga diambu dimmonisa ti wu kunzolanga. (1 Timo. 5:​1, 2) Ayi boti bawu beka bumasi, khomba dibakala kafueti vanga mangolo muingi kukinzika kimutu kiawu, mu kubika kubanga va bawu veka.—1 Koli. 6:18.

7. Buidi kuba mayindu mamboti, mala sadisila khomba yi ditoku?

⁷ Khomba yi dibakala wunyindudilanga mu phila Yave kanyindudilanga, wunsolanga buboti bikhutu kamvuata ayi phila kamvukilanga minlenzi. Khumbu ziwombu batu bakhambu kinzikanga Yave, bammonisanga ziphila zi kukhambu vuata buboti ayi bannatanga luzingu lu kitsuza. Mayindu mawu makhambu fuana, maba vanganga kuvuata bikhutu bifietakana bi bavanganga kumonikina buka bakietu. Bo khomba yinkonzuka mu kiphevi kansola bikhutu bi kuvuata, nandi wuntuadusuluanga mu minsua mi Kibibila ayi mu bifuani bimboti bi zikhomba mu kimvuka. Nandi kalenda ku yikuvusa: ‘Phila yimvuatilanga yimbikanga kilungi kiama kidiodila ayi yimmonisanga ti yimvuanga nkinza bankaka? Phila yimvuatilanga yimmonisanga kuidi bankaka ti yidi kisadi kikuikama ki Nzambi?’ (1 Koli. 10:​31-33; Titu 2:6) Khomba yi ditoku widi mayindu mamboti, bala kunkinzika kubika to kuidi zikhomba, vayi mvandi kuidi Tat’andi yi diyilu.

8. Buidi khomba yi ditoku kalenda longukila kuba mutu wu lufiatu?

⁸ Ba mutu wu lufiatu. Khomba yi ditoku widi mutu wu lufiatu, wunkiebanga buboti biyeku biandi bioso. (Luka 16:10) Tala kifuani kivedila ki Yesu. Nandi kasa lenza ko biyeku biandi. Vayi nandi wudukisa biyeku Yave kamvana kheti diba diambu diphasi kuvanga mawu. Luzolo kaba mu batu—bulutidi kuidi minlandikini—miandi, lumvanga kuvana luzingu luandi mu kibila kiawu. (Yoa. 13:1) Mu kulandakana kifuani ki Yesu, vanga mangolo ma kudukisa kioso kua kiyeku ba kuvana. Ayi boti ngie wisinzaba ko bu kuvangila kiawu, wukikulula ayi tomba lusalusu lu zikhomba ziyonzuka mu kiphevi. Bika kukuangalala to kukolama kuvanga mambu maluelu. (Loma 12:11) Vayi, dukisa kuvanga kiyeku kiaku “mu kibila ki Yave kubika kuandi mu kibila ki batu.” (Kolo. 3:23) Bukiedika, ngie wisi ko wuvedila, vayi zaba ndilu’aku ayi vitika zioso kua zinzimbala wumvanga.—Zinga. 11:2.

LONGUKA MAMBU MANKINZA

9. Kibila mbi khomba yi ditoku kafueti longukila mua mambu?

⁹ Muingi wuba wuyonzuka mu kiphevi, vantombulu ngie kusikika makani ma kiphevi. Mawu, mala kusadisa kukikinina biyeku mu kimvuka, kubaka kisalu kilenda kuzingisa voti kuzingisa dikanda diaku ayi kuzinga buboti na bankaka. Mona mua mambu mankinza wulenda longuka.

10-11. Buidi khomba yi ditoku kalenda bakila ndandu ayi kimvuka na kulonguka kutanga ayi kusonika buboti? (Minkunga 1:​1-3) (Tala mvandi foto.)

¹⁰ Longuka kutanga ayi kusonika buboti. Kibibila kintuba ti mayangi ayi ndandu kuidi mutu wumbotulanga thangu kadika kilumbu muingi kutanga Diambu di Nzambi ayi kuyindula mu diawu. (Tanga Minkunga 1:1-3.) Mu kutanganga Kibibila kadika kilumbu, kuala kusadisa kuzaba phila Yave kanyindudilanga ayi ku kusadisa kuyindula buboti. (Zinga. 1:​3, 4) Ayi batu bamvanganga mambu amomo, bawu kimvuka kintomba. Kibila mbi?

¹¹ Zikhomba zi babakala ayi zi bakietu, bantomba lusalusu lu zikhomba ziyonzuka mu kiphevi muingi kulonga ayi kuvana malongi mabongulu mu Kibibila. (Titu 1:9) Ngie kuzaba kutanga ayi kusonika buboti, kuala kusadisa kuvanga buboti malongi, kuvana mimvutu minkindisa bankaka ayi kukindisa kiminu kiawu. Ngie mvaku wala ba wukubama muingi kusonika mambu mankinza, bo wumvanga ndongukulu’aku yi Kibibila, bo wunlandakana molongi mu zikhutukunu zi kimvuka ayi zi mavula. Mambu amomo wunsonika, mala kusadisa kukindisa kiminu kiaku ayi kukindisa bankaka.

12. Mbi biala kusadisa kuba kifu ki kukolukanga buboti?

¹² Longuka kukoluka buboti na batu. Khomba yi dibakala kafueti longuka kukoluka buboti. Mutu wunkolukanga buboti, wunkuwanga, wumvisanga mabanza ayi manyindu ma bankaka. (Zinga. 20:5) Nandi kalenda visa mutu wunkoluka yandi mu phila kankolukila, mu phila kadidi ayi mu phila kanyikunina binama. Ngie wulendi nunga ko kuvanga mawu boti wuviokisanga ko thangu na batu. Boti ngie widi kifu ki kusadilanga telefoni muingi kufila batu zi mensage, mawu malenda dekula khadulu yi kukolukanga buboti na batu. Diawu tomba luaku lu kukolukanga yawu.—2 Yoa. 12.

13. Diambu mbi dinkaka ditoku kalenda longuka? (1 Timoti 5:8) (Tala mvandi foto.)

¹³ Longuka kuyikieba ngie veka. Khomba yiyonzuka mu kiphevi, kafueti nunga kuyikieba naveka ayi dikanda diandi. (Tanga 1 Timoti 5:8.) Mu zitsi zinkaka zikhomba zi matoku banlongukanga bisalu kuidi matata mawu voti kuidi mutu wunkaka va dikanda. Vayi mu zitsi zinkaka matoku balenda longuka kisalu voti mambu mankaka ku kikola. Boso kua bubela, didi diambu dinkinza kulonguka mua mambu malenda kusadisa kubaka kisalu. (Mava. 18:​2, 3; 20:34; Efe. 4:28) Dukisa kisalu wunlonguka ayi ba mutu wu lufiatu kuidi mutu wunlongukila kiawu. Ngie kuvanga mawu, wala lutu baka luaku lu kubaka kisalu ayi kutatamana mu kiawu. Zikhadulu ayi mua mambu wulenda longuka tuma tubila, nkinza wuwombu madi kuidi khomba yi dibakala, muingi mansadisa kudukisa biyeku kala tambula kuntuala. Mona mua mambu mu mawu.

KUBAMA MU BIYEKU BINKUIZA KUNTUALA

14. Buidi khomba yi ditoku kalenda kubimina muingi kukota mu kisalu ki thangu ka thangu?

¹⁴ Kisalu ki thangu ka thangu. Baklistu bawombu bayonzuka mu kiphevi, bakota mu kisalu ki thangu ka thangu bo baba matoku. Kisalu ki ntuami ntuala, kinsadisanga matoku kulonguka buidi bu kukolukila na batu baviakana. Kiawu mvandi kilenda kunsadisa kusadila zimbongo kambaka mu nduenga. (Fili. 4:11-13) Phila yimueka yimboti yi kutonina kisalu ki thangu ka thangu, yidi mu kuba nsadisi wu mintuami ntuala. Kisalu ki ntuami ntuala, kilenda zibula luaku lu kuvanga mambu mawombu mu kisalu ki thangu ka thangu, dedi kusala mu kisalu ki kutunga voti kusadila ku Beteli.

15-16. Mbi biala sadisa ditoku kuba nsadisi voti nkulutu wu kimvuka?

¹⁵ Nsadisi wu bakulutu ba kimvuka voti nkulutu wu kimvuka. Zikhomba zioso zi babakala bafueti vanga mangolo ma kukuna zikhadulu zintombulu muingi kusadila zikhomba mu kuba bakulutu ba kimvuka. Kibibila kintuba ti zikhomba bamvanga mangolo ma kudukisa makani amomo, “buna badi mu kutomba mambu mamboti.” (1 Timo. 3:1) Ava kuba nkulutu wu kimvuka, khomba kafueti kuna zikhadulu zintombulu muingi kuba nsadisi wu bakulutu ba kimvuka. Minsadisi mi bakulutu ba kimvuka, bansadisanga bakulutu ba kimvuka mu ziphila ziwombu. Minsadisi amiomio na bakulutu ba kimvuka, mu kukikulula bansadilanga zikhomba ziawu ayi bansamunanga yawu mu kifuza mu kisalu ki kusamuna. Zikhomba zi matoku kheti badukisidiabu ko 18 di mimvu, balenda ba minsadisi mi bakulutu ba kimvuka. Ayi nsadisi wu bakulutu ba kimvuka wundukisa zikhadulu zintombulu, kalenda ba nkulutu wu kimvuka mu 20 di mimvu.

¹⁶ Buidi wulenda kubimina muingi kutambula biyeku kuntuala? Kibibila kintubila to zikhadulu ngie fueti kuna. Ziawu zibongulu mu Kibibila, mu luzolo widi mu Yave, mu dikanda diaku ayi mu kimvuka. (1 Timo. 3:​1-13; Titu 1:​6-9; 1 Pete. 5:2, 3) Vanga mangolo ma kuvisa kadika khadulu ayi sambila muingi Yave kakusadisa kudukisa zikhadulu beni.c

17. Buidi ditoku kalenda kubimina muingi kuba nnuni ayi mfumu dikanda? (Tala mvandi foto.)

¹⁷ Nnuni ayi mfumu dikanda. Yesu wutuba ti Baklistu bankaka bayonzuka mu kiphevi, bala tatamana mu khambu kuela. (Matai 19:12) Buabu, boti ngie wunsola kukuela, buna ngie wunkuiza buela kiyeku kinkaka kikuba nnuni ayi mfumu dikanda. (1 Koli. 11:3) Yave wuntomba muingi nnuni kazola nkazi’andi ayi kukieba zitsatu ziandi zi kinsuni ayi zi kiphevi. (Efe. 5:28, 29) Zikhadulu ayi biyeku binkaka tuma tubila mu dilongi adidi, dedi kuyindula buboti, kumonisa lukinzu kuidi bakietu ayi kuba mutu wu lufiatu, kuala kusadisa kuba nnuni wumboti. Mu phila ayoyo, ngie wala ba wukubama muingi kudukisa biyeku biaku dedi, kuba nnuni ayi mfumu dikanda.

18. Buidi khomba yi ditoku kalenda kubimina muingi kuba tata?

¹⁸ Tata. Ḿba bo ngie wunkuela, bumviokila thangu wulenda ba tata. Mbi wulenda longuka mu kifuani ki Yave matedi kuba tata yimboti? Mona malongi wulenda longuka. (Efe. 6:4) Yave wuzabikisa kuidi batu ti wunzolanga Muan’andi Yesu ayi widi lunungu luandi. (Matai 3:17) Ngie kuba tata, monisa mu mavanga ayi kambanga bana baku ti wuba zolanga. Tondanga ayi nyunganga bana baku mu mambu mamboti bamvanga. Matata banlandakananga kifuani ki Yave, bansadisanga bana bawu kuba babakala ayi bakietu bayonzuka mu kiphevi. Diawu ngie widi ditoku, wulenda kubama bubu mu kiyeku akiokio mu kukiebanga buboti bankaka va dikanda diaku, mu kimvuka ayi mu kulonguka kuba monisa luzolo ayi kuba vua nkinza. (Yoa. 15:9) Kuvanga mawu, kuala kusadisa kukubama, boti wala sola kuba nnuni voti tata. Bo thangu beni ka yifueniabu ko, ngie wala ba mutu wu luvalu kuidi Yave, kuidi dikanda diaku ayi mu kimvuka.

MBI BUBU FUETI VANGA?

19-20. Mbi biala sadisa zikhomba zimatoku kuba Baklistu bayonzuka mu kiphevi? (Tala foto yidi va thonono levista.)

¹⁹ Zikhomba zi matoku, benu mulendi ba ko Baklistu bayonzuka mu kiphevi mu kinzimbukulu. Ngie fueti sola bifuani bimboti bi kulandakana, kukuna khadulu yi kuyindula buboti, kuba mutu wu lufiatu, kulonguka mua mambu ma kuvanga mu luzingu ayi kukubama mu biyeku wala tambula kuntuala.

²⁰ Khumbu zinkaka ngie wulenda ba mu boma bo wunyindula biyeku wala ba kuntuala. Vayi ngie wulenda nunga. Tebuka moyo ti Yave, widi phuila yi kukusadisa. (Yesa. 41:10, 13) Zaba mvandi ti zikhomba mu kimvuka, bala kusadisa. Ngie kununga kudukisa makani maku ma kiphevi ma kuba khomba wuyonzuka mu kiphevi, ngie wala baka ndandu ayi mayangi mu luzingu! Befu tu muzolanga beni, bika Yave katatamana ku musakumuna, bo mumvanga mangolo ma kuba batu bayonzuka mu kiphevi.—Zinga. 22:4.