DILONGI 9
NKUNGA 75 “Minu Kawu, Thuma!”
Ngie Widi Wukubama Muingi Kukivana ayi Kubotama?
‘Buidi yilenda futila Yave mu mamboti moso ka kuphangilanga?’—MINKU. 116:12.
MAMBU TUANLONGUKA
Dilongi adidi, dinkuiza kusadisa kukuna kikundi kifikama na Yave boti wuntomba kukivana ayi kubotama.
1-2. Mbi mutu kafueti vanga ava kubotama?
MU MIMVU mitanu mima vioka kumbusa, kuvioka bivevi na bivevi bi batu bakiveni muingi kubotama ayi kuba Zimbangi zi Yave. Bawombu dedi Timoti mu sekulu yitheti, balonguka kiedika tona “mu bumuana.” (2 Tim. 3:14, 15) Bankaka balonguka kiedika matedi Yave mu bukulutu. Mua thangu kumbusa, nkietu mueka wulonguka Kibibila ayi wuyiza ba Mbangi yi Yave bo kaba 97 di mimvu!
2 Boti ngie widi nlonguki wu Kibibila voti matata ba kuyonzula badi Zimangi zi Yave, ngie wunyindulanga kubotama? Amomo madi makani mamboti. Ayi ava kubotama, vala tombulu ngie kukivana theti kuidi Yave. Dilongi adidi, dinkuiza sudikisa mbi bintombulu muingi kukivana. Ayi mvandi dinkuiza kusadisa kumona kibila mbi bankaka bammuenanga phasi kubotama, kheti badi bakubama muingi kuvanga mawu.
MBI BINSUNDULA KUKIVANA?
3. Vana bifuani bi batu mu dikabu di Yave basolu muingi kuvanga kisalu kinlongo.
3 Mu Kibibila, kukivana kunsundula kutatuka muingi kuvanga kisalu kimboti. Dikabu dioso di Isaeli dikivana kuidi Yave, vayi bankaka mu bawu baba sola muingi kuvanga kisalu kinlongo. Dedi Aloni waba vuatanga thata, yiba kidimbu kinlongo ki kukivana kivangulu mu wola. Kidimbu beni ki wola, kiaba monisa ti nandi wuba wusolu muingi kuvanga kisalu kinlongo dedi, kuba mfumu wu zinganga nzambi. (Levi. 8:9) Zinazileu mvandi baba sola muingi bavanga kisalu kinlongo. Kikuma “Nazileu,” kiyizila mu Kiebeleo Nazili, kinsundula kuba “Wutatuka” voti “Kukivana”. Vaba tombulu Zinazileu kuzingila mu minsua batsikika mu Nsiku wu Mose.—Zinta. 6:2-8.
4. (a) Mu phila mbi baboso bakivana kuidi Yave, badidi basolo muingi kuvanga kisalu kinlongo? (b) Mbi binsundula kikuma “kuyimanga”? (Tala mvandi fikula.)
4 Ngie kukivana kuidi Yave, buna ngie wunsola kuba nlandikini Yesu Klistu ayi kuvanga luzolo lu Nzambi. Adiodio, diawu diambu dilutidi nkinza mu luzingu luaku. Mbi mawu mansundula? Yesu wutuba: “Woso kuandi mutu wuntomba kuba nlandikini’ama, kafueti kuyimanga.” (Matai 16:24) Kikuma mu Kingeleko basekula “kuyimanga,” balenda kisekudila mvandi dedi ‘kubika kubue zingila mu phil’aku.’ Mu kuba kisadi kikuikama ki Yave, vala tombulu ngie kubika kuvanga ni diambu dinyongisa Yave. (2 Koli. 5:14, 15) Mawu mansundula kubika kutuba “zikhadulu zi kinsuni,” dedi mambu ma kitsuza. (Ngala. 5:19-21; 1 Koli. 6:18) Ngie wala tumukina minsiku beni? Ngete, boti widi luzolo mu Yave ayi kuba lufiatu ti minsua miandi minkuiza kutuadisa ndandu. (Minku. 119:97; Yesa. 48:17, 18) Khomba mueka bantedilanga Nicolau wutuba: “Ngie kutadila minsua mi Yave buka luphangu, miawu milenda ku kukieba muingi wubika kuvanga dioso diambu wutidi. Voti, miawu milenda ba buka luphangu luntula nkaku muingi zikhosi babika ku kuvanga bubi.”
Kuidi ngiewu, minsiku mi Yave midi buka luphangu luntulanga mutu widi mu buloko nkaku muingi kuvanga mambu kantomba voti buka luphangu bansuekilanga zikhosi, muingi ziawu zibika vanga batu phasi? (Tala lutangu 4)
5. (a) Buidi wulenda kukivanina kuidi Yave? (b) Disuasana mbi didi kukivana ayi kubotama? (Tala mvandi foto)
5 Buidi wulenda kukivanina kuidi Yave? Mu kunkanikisa mu nzila nsambu ti wunkuiza sadilanga to Nandi ayi kutula luzolo luandi va theti mu luzingu luaku. Bukiedika, ngie widi mu kukanikisa Yave ti wala tatamana kunzola “mu ntim’aku woso, mu muel’aku woso, mu mayindu maku moso ayi mu mangolo maku moso.” (Malaku 12:30) Kukivana kumvangiminanga va ngie veka ayi Yave. Vayi kubotama, kumvangiminanga vantuala batu bawombu muingi kumonisa ti ngie bekivana kuidi Yave. Kukivana kuaku luidi luwawanu lunlongo ayi Yave wuntomba ngie wuvanga mamoso wu kunkanikisa.—Mpovi 5:4, 5.
Kukivana kuidi Yave kunsundula, kukanikisa kubuongimina to nandi ayi kutula luzolo luandi vatheti mu luzingu luaku (Tala lutangu 5)
KIBILA MBI WUFUETI KUKIVANINA KUIDI YAVE?
6. Mbi bimvanganga mutu kukivana kuidi Yave?
6 Kibila kinkinza wufueti kukivanina kuidi Yave kidi luzolo luaku kuidi nandi. Luzolo beni lunkuizilanga mu nzayilu yikiedika ayi phisulu yi kiphevi. Mambu wulonguka matedi Yave, mavanga luzolo luaku mu nandi kukonzuka. (Kolo. 1:9) Ndongukulu’aku yi Kibibila yi kuvana lufiatu ti (1) Yave widi mutu wukiedika, (2) Kibibila kidi Diambu di Nzambi, ayi (3) nandi wunsadilanga kimvuka kiandi muingi kudukisa luzolo luandi.
7. Mbi tufueti vanga ava kukivana kuidi Nzambi?
7 Baboso bakivananga kuidi Yave, bazebi malongi mankinza madi mu Diambu di Nzambi ayi banzingilanga mu kithuadi na minsua miandi. Bawu banzabikisanga kiminu kiawu kuidi bankaka. (Matai 28:19, 20) Luzolo luaku mu Yave luyonzuka ayi phuil’aku yi kumvana mbuongimini yikiedika. Buidi wummuenanga? Ngie kuba ntindu luzolo alolo, ngie walasa tadila ko kukivana ayi kubotama phila yi kukuangidika nlongusi’aku wu Kibibila, matata maku voti kuvangila mawu kibila bakundi baku bavanga mawu.
8. Buidi kutonda kunkindisilanga makani wubaka makukivana kuidi Yave? (Minkunga 116:12-14)
8 Bo wunyindula mambu moso Yave kakuvangilanga, wisinkuiza mona ko phasi kukivana kuidi nandi. (Tanga Minkunga 116:12-14.) Kibibila kintedila Yave ‘mvani wu nkhailu woso wumboti ayi wuvedila.’ (Tia. 1:17) Nkhailu wulutidi Yave katu vana widi khudulu yi Muan’andi Yesu. Yindul’abu! Khudulu yivana luaku muingi ngiewu wuba kikundi kifikama na Yave. Ayi nandi wuku vana kivuvu ki kuzinga mvu ka mvu. (1 Yoa. 4:9, 10, 19) Kukivana kuidi Yave, yidi phila yi kumonisina ti wumvuanga nkinza mu phila luzolo Yave Nzambi katu monisina ayi lusakumunu loso katu vananga. (Deute. 16:17; 2 Koli. 5:15) Mambu amomo matedi kutonda mu khudulu banluta tubila mawu mu dilongi 46, kinduika 4, mu buku Baka Mayangi ma Mvu ka Mvu! ayi mvandi, muidi video yi minutu mitatu yintuba Nkhayilu Mbi Tulenda Vana Yave?
NGIE WIDI WUKUBAMA MUINGI KUKIVANA AYI KUBOTAMA?
9. Kibila mbi mutu kalendi yimuena ko mu lukuiku muingi kukivana?
9 Ḿba vantombulu ngie kubalula mua mambu mu luzingu muingi kuzingila mu minsua mi Yave. Voti vantombulu mua thangu muingi wukindisa kiminu kiaku. Mu kibila akiokio ngie wulenda kuyimuena buka ti wisi ko wukubama muingi kukivana ayi kubotama. (Kolo. 2:6, 7) Tuzebi ti minlongisi mioso miyonzukilanga ko mu phila yimueka, ayi bakana ko matoko moso badi bakubama muingi kukivana ayi kubotama mu phunga yimueka. Bika kuyidedikisa na batu bankaka, vayi fiongunina ndionzukulu’aku yi kiphevi mu kutadila mambu wulenda nunga kuvanga.—Ngala. 6:4, 5.
10. Mbi wulenda vanga ngie kumona ti wisi ko wufuana ayi wukubama muingi kubotama? (Tala mvandi quadro “Batu Bayonzukila mu Kiedika.”)
10 Kheti ngie wuyimuena ti wisi ko wukubama muingi kukivana kuidi Yave, vayi tatamana kuba makani amomo. Sambila kuidi Yave muingi kasakumuna mangolo moso wumvanga muingi kubalula mambu mantombulu. (Fili. 2:13; 3:16) Ba lufiatu ti Yave wala kuwa ayi wala tambudila nsambu’aku.—1 Yoane 5:14.
MBI BANKAKA BAMMUENANGA PHASI KUKIVANA AYI KUBOTAMA
11. Buidi Yave kala tusadisila kutatamana bakuikama kuidi nandi?
11 Vadi batu bankaka badi bakubama muingi kukivana ayi kubotama. Vayi kheti bobo, bammonanga boma. Bawu bakuyikuvusanga, abu minu kuvola disumu dingolo ayi kuvaikusu mu kimvuka? Boti buawu wumbelanga, ba lufiatu ti Yave wala kuvana mamoso wuntomba muingi “wudiatila mu phila yifuana va meso mandi ayi muingi kunkuangidika mu mambu moso.” (Kolo. 1:10) Nandi mvandi wala kuvana mangolo muingi wuvanga mambu masulama va meso mandi. Nandi mana monisa mawu, ti kalenda vanga mawu mu phila kasadisila bankaka. (1 Cor. 10:13) Diawu basi ko baboso bamvaikusuanga mu kimvuka. Yave wunkubikanga dikabu diandi muingi batatamana bakuikama.
12. Mbi tufueti vanga muingi tubika bua mu disumu dingolo?
12 Batu boso badi basumuka ayi banthontuanga kuvanga mambu mambi. (Tia. 1:14) Ngie widi nsua wukusola mambu mbi wunkuiza vanga bo wumviokila mu zithototolo. Bukiedika ti ngie veka, wulenda nunga kusola buidi luzingu luaku lunkuiza bela? Batu bankaka bammanganga kukikinina ti tuisi ko nsua wukukiyala befu veka, vayi ngie kuviokila mu zithotolo, ngie wulenda longuka kuvanga mawu. Kheti mayindu makhambu fuana malenda kukuizila, ngie wisi ko lukuiku lu kuvanga mambu mambi. Vayi muingi wununga, sambilanga kadika kilumbu. Ba kifu ki kulandakananga zikhutukunu zioso. Longa mambu wunkikininanga kuidi bankaka. Ngie kuvanga mambu moso amomo, wala ba mangolo muingi wutatamana kuzingila mu luwawanu lukukivana kuidi Yave. Ayi bika kuzimbakana ti Yave wala kusadisa kuvanga mawu.—Ngala. 5:16.
13. Kifuani mbi kimboti Yozefi ka tubikila?
13 Ngie wulenda nunga kudukisa luwawanu lu kukivana kuidi Yave ngie kukubama ava kuviokila mu zithotolo. Kibibila kintubila batu bawombu bavanga mawu, kheti bawu mvawu baba batu bamasumu. Nkietu Potifali waba kambanga khumbu ziwombu Yozefi muingi ba bundana nyitu. Vayi Yozefi kasa bako divuda mu matedi mambu mabatombulu muingi nandi kavanga. Nandi ‘waba manganga’ ayi waba kunkambanga: ‘Buidi yilenda vangila diambu diphila ayoyo ayi kusumuka va mesu ma Nzambi?’ (Ngene. 39:8-10) Bukiedika, Yozefi wuzaba mbi kafueti vanga ava kamonikina thotolo. Mawu mansadisa muingi nandi kakindama mu thangu kaviokila mu zithotolo.
14. Mbi binkuiza kusadisa kubika bua mu disumu?
14 Buidi ngie wulenda landikinina kifuani ki Yozefi? Tona bubu tomba kuzaba mbi wunkuiza vanga ngie kumonikina zithotolo. Longuka kutina mambu Yave Nzambi kanlendanga ayi kubika kuyindula mu mawu. (Minku. 97:10; 119:165) Mu phila ayoyo, ngie walasa vola ko disumu bo wala viokila mu zithototolo. Kibila ngie wala ba wukubama mu mambu fueti vanga.
15. Buidi mutu kalenda monisina ti nandi wuntombanga Yave mu bukiedika? (Ebeleo 11:6)
15 Ḿba ngie mana zaba kiedika ayi wuntomba kusadila Yave mu ntim’aku woso, vayi wummona nkadu boma kukivana ayi kubotama. Ngie wulenda landakana kifuani ki Ntinu Davidi. Ngie wulenda lomba kuidi Nzambi: ‘Mfiongunina ah Nzambi ayi zaba ntim’ami. Thota ayi zaba mayindu mami. Thala keni nzila mbi minu yidi ayi ndiatisa mu nzila yi mvu ka mvu.’ (Minku. 139:23, 24) Yave wunsakumunanga baboso “bakuntombanga mu bukiedika.” Mangolo ngie wumvanga muingi kukivana ayi kubotama mammonisa ti ngie widi phila mutu awowo.—Tanga Ebeleo 11:6.
TATAMANA KUFIKAMA YAVE
16-17. Buidi Yave kantumisinanga batu bayonzukila mu kiedika? (Yoane 6:44)
16 Yesu wutuba ti Yave nandi wuntumisanga minlandikini miandi. (Tanga Yoane 6:44.) Ndoko tumona nkinza wu mambu Yesu katuba ayi buidi mawu masalimina mu ngiewu. Yave wummonanga diambu dimboti kuidi kadika mutu nandi kantumisanga. Nandi wuba tadilanga, “dikabu dinlongo.” (Deute. 7:6; nota.) Ayi mawu mamonika mu ngiewu.
17 Ḿba ngie widi ditoku ayi matata maku, badi Zimbangi zi Yave. Ngie wulenda yindula ti Yave kasa kutumisa ko kuidi nandi. Vayi Kibibila kintuba: “Fikamanu kuidi Nzambi ayi nandi wala kulu fikama.” (Tia. 4:8; 1 Lusa. 28:9) Ngie kutuama ntuala mu kufikama Yave, nandi mvandi wala kufikama. Yave katutadilanga ko to banga dikabu, vayi wumfikamanga kadika mutu mu befu, kubunda mvandi baboso bayonzukila mu kiedika. Mu thangu batu abobo bantuamanga ntuala muingi kufikama Yave, nandi wuku batambudilanga dedi buntubila Tiagu 4:8.—Dedikisa mawu na 2 Tesalonika 2:13.
18. Mbi tunkuiza tubila mu dilongi dinlanda? (Minkunga 40:8)
18 Ngie kukivana kuidi Yave ayi kubotama ngie widi mu kulandakana ntungulu wu Yesu. Nandi wukivana kuidi Tat’andi muingi kavanga luzolo luandi. (Tanga Minkunga 40:8; Ebe. 10:7) Mu dilongi dinlanda befu tunkuiza tubila mbi binkuiza kusadisa kutatama wukuikama mu Yave bo wumbotama.
WUVUTU MBI WULENDA VANA?
Mbi binsundula kukivana kuidi Yave?
Kibila mbi tulenda tubila ti kukivana yidi phila yi kuvutudila matondo?
Mbi bikuiza kusadisa kubika vola disumu dingolu?
NKUNGA 38 Yave Wala Kuvana Mangolo