DILONGI 18
NKUNGA 65 Tatamana Kuenda Ntuala!
Zikhomba zi Matoko—Landakananu Kifuani ki Malaku ayi Timoti
“Bo wunkuiza, tuala Malaku kibila nkinza wuwombo kadi mu kisalu yimvanga.”—2 TI. 4:11.
MAMBU TUANLONGUKA
Tuemmona buidi kifuani ki Malaku ayi ki Timoti, kilenda sadisila zikhomba zi matoko kukuna zikhadulu zintombolu muingi kubuela ku kivana mu kusadila bankaka.
1-2. Khanu mambu mbi matula nkaku Malaku ayi Timoti kusadila bankaka?
ZIKHOMBA zi matoko benu muntomba kubuela ku kivana mu kisalu ki Yave, ayi kusadisa bimvuka binu? Tuidi lufiatu ti mawu muntomba kuvanga. Tunkuangalanga beni kumona matoko mawombo ku kivana muingi kusadila bankaka! (Minku. 110:3) Vayi ngie wulenda dengana bikaku biwombo. Ngie wummonanga boma kusamuna batu wukhambu zaba? Mana manga kiyeku mu kuyindula ti wisi ko wufuana? Boti buawu wisi ko to ngie veka.
2 Malaku ayi Timoti mvawu baviokila mu mawu. Vayi bawu basa bika ko boma mu mambu bakhambu zaba, voti kukhambu pisuka mu mambu mankaka kuba tula nkaku kusadila bankaka. Ḿba Malaku waba zinganga na mam’andi ayi baba luzingu lumboti bo bantumisa kuidi mvuala Polo ayi Balinabasi mu kiyeku kiandi kitheti ki misioni. (Mav. 12:12, 13, 25) Malaku wubika luzingu lumboti kaba muingi kubuela mioko kisalu ki kusamuna. Theti, nandi wuyenda ku Antiokia. Bosi vakimueka na mvuala Polo ayi Balinabasi bayenda mu bibuangu binkaka biba beni kinanu. (Mav. 13:1-5) Mvandi, ḿba Timoti waba kalanga na matata mandi bo Polo kantumisa mu kisalu ki misioni. Mu kuba ditoko ayi kukhambu zaba mambu mawombo khanu Timoti kasa kikinina ko kiyeku akiokio. (Dedikisa na 1 Kolintu 16:10, 11; ayi 1 Timoti 4:12.) Vayi bo kakikinina thumusunu ayoyo yi mvuala Polo Timoti wutambula lusakumunu luwombo.—Mav. 16:3-5.
3. (a) Mbi bimmonisa ti Polo waba zolanga Malaku ayi Timoti? (2 Timoti 4:6, 9, 11) (Tala mvandi fikula.) (b) Biuvu mbi tuinkuiza baka mimvutu mu dilongi adidi?
3 Mu butoko buawu Malaku ayi Timoti bakeba biyeku biwombo biphasi mu bimvuka. Mvuala Polo waba zolanga beni Malaku ayi Timoti, diawu bo kaba belama kufua kadindila muingi biza ntala. (Tanga 2 Timoti 4:6, 9, 11.) Kibila mbi Polo kaba zodilanga ayi kaba fiatilanga Malaku ayi Timoti? Buidi zikhomba zi matoko balenda landikinina kifuani kiawu? Ndandu mbi zikhomba balenda baka mu malongi ma mvuala Polo?
Polo waba zolanga kusala va kimueka na Malaku ayi Timoti kheti baba matoko. (Tala lutangu 3)b
SADILA BANKAKA DEDI MALAKU
4-5. Buidi Malaku kamonisina ti wuba wukubama muingi kusadila bankaka?
4 Buku yimueka yintuba ti kusadila bankaka kunsundula kuba wukubama muingi kusadisa bankaka kheti didi diambu diphasi kuvanga mawu. Ḿba malaku wuba beni mu kiunda bo Polo kasa ntumisa ko mu viage yimmuadi mu kisalu ki misioni. (Mav. 15:37, 38) Vayi mambu amomo masa ntula ko nkaku kusadila bankaka.
5 Malaku wuvitika kusala va kimueka na khomb’andi Balinabasi. Malaku mvandi wuba mu khati dingumba di batu basadisa mvuala Polo mu thangu kaba mu buloku ku Loma. (Film. 23, 24) Mvuala Polo wuzola beni lusalusu Malaku kamvana. Diawu katubila ti Malaku wuba “tho yi mbombolo ayi yikhindusulu kuidi nandi.”—Kolo. 4:10, 11.
6. Ndandu mbi Malaku kabaka mu kusala va kimueka na baklistu bayonzuka mu kiphevi? (Tala mvandi nota.)
6 Malaku wubaka ndandu mu kusala va kimueka na baklistu bayonzuka mu kipheve. Bo kaviokisa mua mimvu na mvuala Polo ku Loma, nandi wuyiza sala va kimueka na mvuala Petelo ku Babiloni. Bawu bayiza ba kikundi kifikama ayi baviokisa thangu yiwombo va kimueka, diawu mvuala Petelo katedila “Malaku muan’ama.” (1 Pet. 5:13) Ḿba mambu Malaku kasonika matedi luzingu ayi kisalu ki kusamuna Yesu kavanga, mvuala Petelo nandi wunzabikisa mawu.a
7. Buidi yaya Seung-Woo kalandikinina kifuani ki Malaku? (Tala mvandi foto.)
7 Malaku wutatamana kusala mu kifuza na zikhomba bayonzuka mu kiphevi. Buidi ngiewu wulenda landikinina kifuani kiandi? Boti bamana kubotula kiyeku mu kimvuka monisa mvibudulu ayi tomba ziphila zinkaka zi kusadila Yave ayi zikhomba ziaku. Tala kifuani ki khomba mueka bantedilanga Seung-Woo, widi nkulutu wu kimvuka. Bo kaba ditoko nandi waba kuyidedikisanga na matoko mankaka mu kimvuka. Bawombo mu matoko beni, bafika tambula biyeku vayi nandi ndamba. Diawu kabakila makani ma kuzabikisa mawu kuidi bakulutu ba kimvuka. Wumueka mu bakulutu wunkindisa muingi katatamana kusadila bankaka kheti bawombo basimmona ko mamboti moso kamvanga. Dilongi adiodio disadisa Seung-Woo kuyivana muingi kusadisa zikhomba bama nuna ayi bo baba tomba lusalusu muingi kulandakana zikhutukunu. Nandi wutuba: “Yiyiza visa mbi binsundula kusadila bankaka mu ntima woso, ayi yimmonanga mayangi mankuizilanga mu kuvanga mawu.”
Buidi zikhomba zi matoko balenda bakila ndandu mu kubanga va kimueka na zikhomba bayonzuka mu kipheve? (Tala lutangu 7)
ZOLA AYI VUA NKINZA BANKAKA DEDI TIMOTI
8. Kibila mbi mvuala Polo kasodila Timoti basala va kimueka? (Filipi 2:19-22)
8 Bo mvuala Polo kavutuka mu mavula kaviokila mu zikhuamusu, nandi waba tomba lusalusu lu zikhomba baba kibakala. Diawu kasodila wumueka mu baklistu baba tedilanga Sila muingi kasala yandi. (Mav. 15:22, 40) Bosi kuntuala Polo wuyiza tumisa Timoti muingi kusala yandi. Kibila mbi kasodila Timoti? Kibila nandi wuba wuzabakana mu zikhadulu zimboti. (Mav. 16:1, 2) Mvandi waba zolanga batu.—Tanga Filipi 2:19-22.
9. Buidi Timoti kamonisina ti waba vuanga nkinza bankaka?
9 Bo kaba sala va kimueka na mvuala Polo, Timoti wumonisa ti waba vuanga nkinza batu. Diawu mvuala Polo kabela lufiatu ti Timoti wuba wufuana muingi kukindisa minlandikini mimona miba ku Bereia. (Mav. 17:13, 14) Tuisi ko divuda ti Timoti, wubaka ndandu mu kifuani ki Sila bo kaba ku bereia. Vayi buviokila thangu Polo wufila Timoti naveka ku Tesalonika, muingi kukindisa zikhomba. (1 Te. 3:2, nota.) Bo vavioka 15 di mimvu mu kisalu akiokio, Timoti wumonisa ti waba vuanga nkinza bankaka mu kuyitulanga va kibuangu ki batu baba viokilanga mu ziphasi. (Lom. 12:15; 2 Ti. 1:4) Buidi zikhomba zi matoko balenda landikinina kifuani ki Timoti?
10. Mbi bisadisa yaya Woo Jae, kuvua nkinza bankaka?
10 Khomba mueka bantedilanga Woo Jae wuyiza visa mbi binsundula kuvua nkinza bankaka. Bo kaba ditoko, nandi waba monanga phasi kukoluka na zikhomba mu kimvuka. Mu zikhutukunu nandi waba vananga to mboti kuidi zikhomba vayi kabasa yolukanga ko yawu. Nkulutu mueka wu kimvuka wunkindisa katubanga mambu kanzolanga mu zikhomba ayi mvandi wunkindisa kayindulanga mambu batu bankaka bankuiza vua nkinza. Woo Jae wulandakana dilongi bamvana. Bubu nandi weka nkulutu wu kimvuka ayi wutuba: Bubu yinkolukanga beni na zikhomba ziwombo, yidi beni mu mayangi kuzaba ti yinluta vuanga nkinza mabanza ma batu bankaka ayi mawu ma kutsadisanga kusadisa zikhomba ziama.
11. Buidi zikhomba zi matoko balenda monisina ti bamvuanga nkinza bankaka? (Tala mvandi foto.)
11 Zikhomba zi matoko monisanu kuidi bankaka ti mu kuba vuanga nkinza. Mu zikhutukunu yolukanu na zikhomba badi phunga ziviakana ayi ba wukubama muingi kuba kuwa mu mvibudulu, mu phila ayoyo ngie wunkuiza zaba buidi bu kuba sadisila. Ḿba wunkuiza visa ti vadi zikhomba bantomba lusalusu luaku muingi banunga kusadila JW Library®. Ove wulenda basika yawu mu kisalu ki kusamuna. Ngie kutuama ntuala muingi kusadisa bankaka wunkuiza vana kifuani kimboti kuidi baboso.
Zikhomba zi matoko balenda sadila zikhomba mu kimvuka mu ziphila ziwombo. (Tala lutangu 11)
MALONGI MA MVUALA POLO MALENDA KUSADISA
12. Buidi zikhomba zi matoko balenda bakila ndandu mu malongi ma mvuala Polo?
12 Polo wuvana malongi mankinza kuidi Timoti muingi kabaka ndandu mu luzingu ayi mu kisalu ki kusamuna. (1 Ti. 1:18; 2 Ti. 4:5) Zikhomba zi matoko, benu mvinu mulenda baka ndandu mu malongi ma mvuala Polo. Buidi? Tanga minkanda nandi kafila kuidi Timoti, ayi sadila malongi beni mu luzingu luaku. Tuemmona mua bifuani.
13. Mbi tufueti vanga muingi tuba kikundi kifikama na Yave?
13 “Vanga mangolo muingi wukivana mu mambu ma [kipheve].” (1 Ti. 4:7b) Mbi binsundula kukivana mu mambu ma kipheve? Kunsundula kuba kikundi kingolo na Yave ayi kuba phuila yi kuvanga mambu ma kunkuangidika. Befu tusa butuka ko na phuila yi kusadila Nzambi. Vayi mambu mbi mankuiza tusadisa kuba phuila ayoyo? Dedi bo batu bandumanga zithinu bamvangilanga mangolo mawombo muingi kutatamana kutsikika thalu mu mfutu, befu mvitu tufueti tatamana kuvanga mangolo muingi kukuna zikhadulu zinkuiza tusadisa kufikama Yave.
14. Makani mbi tufueti baka bo tuntanga kibibila? Vana kifuani.
14 Bo wuntanga kibibila, makani maku mafueti ba, kufikama Yave. Dedi, yindula mbi wulenda longuka matedi Yave mu masolo Yesu kaba na dibakala diba busina. (Mala. 10:17-22) Dibakala beni wukikinina ti Yesu wuba Mesia, vayi kasa ba ko wukubama muingi kuba nlandikini wu Yesu. Kheti bobo, Yesu wumonisa luzolo kuidi dibakala beni kheti nandi kasa ba ko kiminu mu Nzambi. Tulenda longuka mambu mawombo mu phila Yesu kayolukila na dibakala beni. Nandi waba tomba kunsadisa kabaka makani manduenga. Mu phila ayoyo, Yesu wumonisa ti Yave waba zolanga dibakala beni. (Yoa. 14:9) Bo wuntanga kinongu akiokio, wukiyuvusa: Mambu mbi yifueti vanga muingi yifikama Nzambi ayi yisadila zikhomba mu ntima woso?’
15. Kibila mbi zikhomba zi matoko bafueti bela kifuani kimboti kuidi bankaka? Fuanikisa. (1 Timoti 4:12, 13)
15 “Ba kifuani kimboti kuidi batu bakuikama.” (Tanga 1 Timoti 4:12, 13.) Mvuala Polo wukindisa Timoti kubika kuandi to kapisuka mu kutanga ayi kulonga, vayi mvandi kakuna zikhadulu zimboti dedi kiminu, luzolo ayi kuba wudiodila mu kipheve. Kibila mbi? Kibila bawombo banlongukanga mu mavanga mitu kubika kuandi to mu mambu tuntuba. Dedi yindula boti ba kusola muingi wuvanga dilongi di baboso dintubila matedi kuba kifuza mu kisalu ki kusamuna. Ngie wunkuiza tubila mu lufiatu mambu amomo, boti ngie wukivananga mu kisalu ki kusamuna. Diawu kifuani kiaku kinkuiza sadisa baboso kukikinina mambu wuntuba.—1 Ti. 3:13.
16. (a) Mu phila mbi zitanu matoko balenda bela kifuani kimboti kuidi bankaka? (b) Buidi zikhomba zi matoko balenda bela kifuani kimboti mu thubulu?
16 Mu buku 1 Timoti 4:12, Mvuala Polo wutuba mambu matanu zikhomba zi matoko bafueti vanga muingi kuba kifuani kimboti. Buidi wummuena kulonguka mawu mu ndongukulu’aku yi kibibila? Dedi, yindulabu boti wuntomba kuvana kifuani kimboti mu matedi phila wunkolukilanga. Ngie fueti yindula mu mambu wunkuiza tuba ayi mafueti kindisa zikhomba. Boti wunkalanga na matata maku, wuba tondanga mu mambu bakuvlangilanga. Kutsuka lukutukunu, Nyunga zikhomba mu biyeku babe vanga. Mvandi ngie wulenda kindisa bankaka mu kuvana mimvutu mi khindusulu mu zikhutukunu. Mangolo moso amomo wumvanga muingi kuvana kifuani kimboti mu thubulu, mankuiza monisa ti ngie widi mu kukonzuka mu kipheve.—1 Timoti 4:15
17. Mbi binkuiza sadisa zikhomba zi matoko kudukisa makani ma kipheve? (2 Timoti 2:22)
17 “Tina ziphuila zi butoko, vayi wukivana mu mambu masonga.” (Tanga 2 Timoti 2:22.) Mvuala Polo wukindisa Timoti kanunga ziphuila zilenda kuntula nkaku kudukisa makani mandi ma kipheve ayi kukindisa kikundi kiandi na Yave. Ḿba ngie mavisa ti vadi mambu malenda ku kuvanga kubika baka thangu yiwombo yi kuvanga mambu ma kipheve. Dedi thangu wumviokisanga mu kuta bisavu, kusadila internet voti mambu mankaka. Sadila thangu’aku muingi kuvanga mambu ma kipheve, dedi kukivana muingi kusadisa kudiodisa kibuangu ki zikhutukunu voti kusamuna mu kusadila dikalu di bilongulu. Kuvanga mambu amomo kunkuiza kusadisa kubaka bakundi bamona bankuiza kusadisa kudukisa makani maku ma kipheve.
KUSADILA BANKAKA KUNTUADISANGA LUSAKUMUNU
18. Kibila mbi tulenda tubila ti Malaku ayi Timoti baba luzingu lu mayangi?
18 Malaku ayi Timoti bavanga mangolo muingi kusadila bankaka mu ntima woso. Ayi bawu babaka luzingu lu mayangi. (Mav. 20:35) Malaku wuvanga ziviage ziwombo muingi kusadila zikhomba zi kipheve. Mvandi wusonika mu phila Yesu kanatina luzingu luandi ayi phila kasamunina zitsangu zimboti. Timoti wusadisa mvuala Polo kusikimisa bimvuka biwombo ayi kukindisa zikhomba. Yave wuyangalala beni kumona phila Malaku ayi Timoti bakivanina mu ntima woso muingi kusadila bankaka.
19. Kibila mbi zikhomba zi matoko bafueti vuila nkinza malongi mvuala Polo kavana Timoti, ayi ndandu mbi balenda baka ba kuvanga mawu?
19 Tulenda mona luzolo Polo kaba kuidi Timoti mu minkanda kansonikina. Minkanda amiomio mimmonisa ti Yave wunzolanga beni matoko, ayi wuntomba muingi babaka luzingu lu mayangi. Diawu, sadila malongi ma mvuala Polo, ayi vanga mangolo muingi kusadila bankaka mu ntima woso. Ngie kuvanga mawu, wunkuiza baka luzingu lu mayangi bubu ayi luzingu lu mvu ka mvu mu bilumbu binkuiza.—1 Ti. 6:18, 19.
NKUNGA 80 ‘Bimba ayi Mona ti Yave Nkua Mamboti’
a Petelo wuzabikisa kuidi Malaku phila mutu mbi Yesu kaba, mabanza mandi ayi phila kaba tadilanga batu. Diawu bo Malaku kasonika buku’andi, nandi wutubila beni matedi mabanza ayi mavanga ma Yesu.—Mala. 3:5; 7:34; 8:12.
b MAMBU MADI MU FIKULA: Malaku wusadisa Polo ayi Balinabasi mu kisalu ki misioni. Timoti wuyenda kue tala bimvuka muingi kukindisa zikhomba.