Babakala Badi Biyeku Landakananu Kifwani Ki Timoteo

MVU wubedi, bivevi bi zikhomba mu nza yimvimba batambudi biyeku bi kuba bakulutu ba kimvuka ayi minsadisi mi bakulutu. Boti ngye widi wumweka mu bawu, tuzebi ti widi beni mayangi kuzaba ti wulenda sadila Yave ayi zikhomba zyaku mu phila ayiyi.

Disi ko dyambu dimbi boti ngyewu widi mu kukwazuka mu mawu. Yaya Jason widi ditoko ayi weka nkulutu wu kimvuka, wutuba: “Bo yiyiza ba nkulutu wu kimvuka, va thononu yiba nkadu dibamu mu biyeku bimona yitambula.” Va thononu, Mose ayi Yelemia bakimona mvawu buka basa ba ko bafwana bo batambula biyeku bimona kwidi Yave. (Esodu 4:10; Yelemia 1:6) Boti buawu ngye mvaku wummwena, mbi wulenda vanga mwingi wukindisa lufyatu lwaku ayi wutatamana kukonzuka mu kiphevi? Ngye wulenda landakana kifwani ki Timoteo.—Mavanga 16:1-3.

LANDAKANA KIFWANI KI TIMOTEO

Ḿba Timoteo wuba 20 ma mimvu mu thangu katona kwendanga ayi mvwala Polo mwingi kutala bimvuka. Khumbu yitheti bantumisa, ḿba Timoteo kasa kuyimona ko ti wuba wufwana mwingi kulonga ayi kukindisa bankaka bila nandi wuba beni ditoko. (1 Timoteo 4:11, 12; 2 Timoteo 1:1, 2, 7) Vayi nandi wutatamana kuyonzuka mu kiphevi, ayi bo vavyoka kumi di mimvu, mvwala Polo wukamba basi Filipi: ‘Yidi dyana mu Mfumu Yesu ti yela kulu fidisa Timoteo mu nswalu.’ Kibila mbi Polo kaba tombila kufila Timoteo? Nandi wusudikisa: ‘Bila kwisi ko ni mutu wunkaka akuku, widi wukubama mwingi kukivana buka nandi.’—Filipi 2:19, 20.

Kibila mbi Timoteo kadidi kifwani kimboti mwingi bakulutu balandakana? Tala bibila binsambanu.

1. Nandi wuba vwanga batu nkinza mu bukyedika. Polo wukamba zikhomba ku Filipi ti Timoteo wela kuba ‘kyeba buboti.’ (Filipi 2:20) Timoteo wuba tomba kusadisa zikhomba mwingi batatamana bafikama kwidi Yave ayi wuba wukubama mu kuvana thangu’andi mwingi kuba sadisa.

Yaya William widi mu kusala buka nkulutu wu kimvuka mu 20 ma mimvu, wumvananga malongi kwidi bakulutu bamona ba kimvuka ayi wuku bakambanga: “Zola zikhomba, ayi sikika mayindu maku mu zitsatu ziawu bika to mu mambu mankaka ma kimvuka.” Bika kuba dedi mutu wumvanganga taxi. Bila nandi wunluta vwanga nkinza kuvitila mu thangu mu bibwangu batu bamvingilanga makalu mwingi kakandika batu bankaka, vayi katadilanga ko zitsatu zi batu kannata.

2. Nandi wutula kisalu ki Yave vatheti mu luzingu lwandi. Polo wutuba ti Timoteo diswasana kaba ayi bo baba “tombanga mamboti ma bawu veka vayi bika mamboti ma Yesu Klisto.” (Filipi 2:21) Mvwala Polo wumona ti zikhomba ku kaba kalanga, baba luta sikikanga mayindu mu luzingu luawu. Khumbu zinkaka baba tulanga mamboti mawu va ntwala kisalu kiawu kwidi Yave. Vayi Timoteo kasa vanga ko mawu. Vasa vyoka ko thangu yiwombo, nandi wubaka lwaku lu kukivana mu kisalu ki Nzambi, nandi wuba dedi Yesaya wutuba: ‘Minu kawu! Thuma!’—Yesaya 6:8.

Mbi wulenda vanga mwingi wununga kukyeba zitsatu zyaku ngye veka ayi zi kimvuka? Theti, landakana dilongi mvwala Polo kavana: ‘Luvanganga mambu malutidi nkinza.’ (Filipi 1:10) Tula kisalu ki Yave va theti. Dimwadi, bika vanga mambu malenda kukwiba beni thangu ayi kumanisa mangolo maku. Polo wukamba Timoteo: “Tina zinzinunu zi [butoko] vayi tomba busonga, [kiminu], luzolo, ndembama.”—2 Timoteo 2:22.

3. Nandi wukivana beni mu kisalu ki Yave. Polo wutuba matedi Timoteo: ‘Nandi wusala yami mwingi kusamuna tsangu zimboti dedi mwana ayi tat’andi.’ (Filipi 2:22) Timoteo kasa ba ko bolu. Nandi ayi Polo bavanga kisalu kinkinza beni ayi mawu makindisa kinkundi kiawu.

Bubu mvandi, vadi bisalu biwombo mwingi kuvanga mu kimvuka ki Yave. Bisalu beni bintwadisanga mayangi makyedika ayi bilenda kusadisa wuluta fikama zikhomba zyaku zyoso. Diawu kadika thangu, “[wukivana] mu sadila Mfumu mu zithangu zyoso.”—1 Kolinto 15:58.

4. Nandi wusadila mambu kalonguka. Polo wusonika: ‘Vayi ngyewu wulandakana buboti malongi mami, khadulu’ama, zikhanu zyama, kiminu kyama, lembama kwama, luzolo lwama, mvibudulu’ama.’ (2 Timoteo 3:10) Timoteo wusadila mamoso kalonguka, diawu kabwela tambudila biyeku binkaka.—1 Kolinto 4:17.

Vadi nkulutu wu kimvuka ngye wulenda landakana kifwani kyandi? Yaya Tom widi mu kusala buka nkulutu wu kimvuka mu mimvu miwombo, wuntebuka moyo ti nkulutu mweka wu kimvuka wumvwa nkinza ayi wunkubika buboti. Nandi wutuba: “Yiba kundindanga malongi ayi yaba sadilanga mawu. Mawu matsadisa yiba lufyatu.”

5. Nandi wutatamana kukikubika naveka. Polo wukamba Timoteo: ‘Wukikubika mwingi wubaka makani ma kukinzika Nzambi.’ (1 Timoteo 4:7) Kheti mutu wunta bola widi mutu wunkaka wu kunkubikanga, nandi mvandi kafweti yikubika naveka. Polo wukamba Timoteo: ‘Nate yala vutuka, tatamana kutanganga mosonoko vantwala baboso, mu lubulanga batu, ayi mu longanga. . . . Yindulanga mambu amomo; tsikika mayindu mu mawu mwingi ndyonzukulu’aku yi kiphevi yimonika kwidi batu boso.’—1 Timoteo 4:13-15.

Ngye mvaku fweni tatamana kupisuka mu fisu byaku. Ba nlonguki wumboti wu Kibibila, ayi landakana zithwadusulu zimona zi kimvuka ki Yave. Bika kukifyatila ngye veka. Dilenda ba dyambu dimbi kuyindula ti bo weka mimvu miwombo mu kusadila Yave, wulenda nunga kubaka makani mankinza mu khambu fyongunina theti Kibibila. Dedi Timoteo, “wukikeba ngye veka ayi malongi maku.”—1 Timoteo 4:16.

6. Nandi wufyatila mu pheve yi Yave. Bo katubila matedi kisalu ki kusamuna ki Timoteo, mvwala Polo wuntebula moyo: “Lundanga bumboti, mu lusalusu lu Pheve Yinlongo mu [befu], mambu mamboti momo [bakufyatila].” (2 Timoteo 1:14) Timoteo wufyatila mu pheve yi Nzambi.

Yaya Donald widi mu kusala mimvu miwombo buka nkulutu wu kimvuka, wutuba: “Babakala badi biyeku bafweti zola kikundi kiawu ayi Nzambi. Batu bamvanganga mawu, bambwela ‘kindisanga kikundi kiawu.’ Ba kudinda pheve yi Nzambi mu nzila lusambulu ayi kukuna mbutu wu pheve beni, bela ba lusakumunu kwidi zikhomba ziawu.”—Minkunga 84:7; 1 Petelo 4:11.

KINZIKA KIYEKU KYAKU

Kutu kindisanga beni kumona minsadisi mimona mi bakulutu ayi bakulutu ba kimvuka dedi ngyewu bantatamana konzuka mu kisalu kiawu kwidi Yave. Jason tutubidi va thononu dilongi adidi, wutuba: “Tona yitona kusala buka nkulutu wu kimvuka, yilonguka mambu mawombo ayi lufyatu lwami mu Yave luntatamana konzuka. Bubu, yinzola beni kiyeku kyami ayi yintadilanga kiawu buka lwaku lulutidi Yave kaphana.”

Ngye wunkwiza tatamana konzuka mu kipheve? Ngye landakana kifwani ki Timoteo, wala ba lusakumunu kwidi zikhomba zyaku zyoso.