DILONGI 38
NKUNGA 120 Landakana Mamboti ma Yesu
Monisa Lukinzu Kuidi Bankaka
‘Kubaka lunungu kulutidi kena palata ayi wola’—ZINGA. 22:1.
MAMBU TUANLONGUKA
Tuemmona kibila mbi tufueti monisa lukinzu, ayi buidi tulenda vangila mawu kheti didi diambu diphasi.
1. Kibila mbi batu banzolanga ba bakinzika? (Zingana 22:1)
NGIE wunzolanga bo bankaka ba ku kinzikanga? Tuidi lufiatu ti ngete. Befu boso tunzolanga bo ba tukinzikanga ayi tumbakanga ndandu bo mawu mammonikanga. Diawu Kibibila kintuba: ‘Kubaka lunungu kulutidi kena palata ayi wola.’—Tanga Zingana 22:1.
2-3. Kuidi banani tufueti monisanga lukinzu?
2 Disi ko diambu diluelu ku kinzikanga bankaka, kibila batu boso bamvanganga zinzimbala. Tuidi mu kuzingila mu bilumbu bitsuka, diawu disi ko diambu diluelu ku kinzika bankaka. Vayi tufueti monisa disuasana. Kibila mbi? Kibila Yave kantomba tu kinzikanga “batu boso.”—1 Pet. 2:17.
3 Tulenda baka ndandu mu ku kinzikanga bankaka dedi (1) basi dikanda ditu, (2) zikhomba zi kiphevi, ayi (3) batu bankaka. Mvandi tunkuiza mona buidi tulenda monisina lukinzu bo tumviokila mu mambu maphasi.
MBI BINSUNDULA KU KINZIKA BANKAKA?
4. Mbi binsundula ku kinzika bankaka?
4 Mbi biobio lukinzu? Tummonisanga lukinzu mu phila tuntadilanga bankaka. Bo tunkinzikanga bankaka, tummonisanga ti bawu luvalu badi, ḿba mu kibila ki zikhadulu ziawu zimboti, mavanga mawu ayi biuma bamvanganga mu luzingu luawu. Befu kumonisa lukinzu kuidi bankaka, mawu mammonisa ti bawu luvalu badi. Diawu, tufueti vanga mawu mu ntim’itu woso.—Mat. 15:8.
5. Mbi bilenda tusadisa ku kinzika bankaka?
5 Yave wuntomba tu kinzikanga “zimfumu zi luyalu” ayi mvandi batu bankaka. (Lom. 13:1, 7) Vayi, bawombo balenda tuba: “Minu yidi beni mayangi kibila yinkinzikanga batu. Ayi, bankaka balenda tuba: Yimmonisanga lukinzu kuidi bankaka boti bawu mvawu ba ku khinzikanga.” Mu kuba bisadi bi Yave, tuzebi ti tunkinzikanga bankaka kibila tunzolanga Yave ayi tuntomba kunkuangidika.—Yosua 4:14; 1 Pet. 3:15.
6. Bukiedika ti tulenda kinzika batu bakhambu tumonisanga lukinzu? Sudikisa. (Tala mvandi foto levista.)
6 Bankaka bayikuvusanga: ‘Bukiedika ti yilenda monisa lukinzu kuidi bo bakhambu ku khinzikanga?’ Ngete. Tuemmona mua bifuani. Ntinu Sauli wufuisa tsoni muan’andi Yonatani vantuala bankaka. (1 Samu. 20:30-34) Vayi kheti bobo, Yonatani wutatamana, ku kinzika tat’andi ayi wumbuela mioko mu kunuana mvita nati Sauli kayiza fua. (Esodu 20:12; 2 Samu. 1:23) Mfumu yi zinganga Nzambi Eli, kasa monisa ko lukinzu kuidi Ana mu kutuba ti nandi wuba wukolu. (1 Samu. 1:12-14) Vayi kheti bobo, Ana wutatamana kumonisa lukinzu kuidi Eli mu kuba mfumu yi zinganga Nzambi yi basi Isaeli. (1 Samu. 1:15-18; 2:22-24) Ayi mvandi, babakala basi Atena bafuisa tsoni mvuala Polo mu kuntedila “kivungisi.” (Mav. 17:18) Vayi kheti bobo, mvuala Polo wutatamana kukoluka yawu mu lukinzu. (Mav. 17:22) Luzolo luitu mu Yave ayi boma bu kuvangila mambu manyongisa ntim’andi, malenda tuvanga ku kinzikanga bankaka. Ndoku tumona banani befu tulenda kinzika ayi kibila mbi.
Kheti tat’andi wumfuisa tsoni vantuala batu bankaka, Yonatani wutatamana kukinzika tat’andi mu kuba ntinu (Tala lutangu 6)
MONISA LUKINZU KUIDI BASI DIKANDA
7. Mbi bilenda ku tutula nkaku kumonisa lukinzu kuidi basi dikanda ditu?
7 Kikaku. Tumviokisanga beni thangu na basi dikanda ditu. Diawu, tummonanga beni zikhadulu ziawu zimboti ayi zimbi. Bankaka bamviokilanga mu mambu matedi kimbevu kingolo voti mayindu makhambu fuana. Voti, bankaka balenda tuba mambu malenda tunyongisa, ayi mawu malenda tulula ndembama ayi kutuadisa ziphasi kuidi basi dikanda. Diawu batu bawombo basi ko kithuadi. Dedi bo kimbevu kingolo kilenda tuadisa ziphasi mu binama bioso bi nyitu, bobuawu mvandi ku khambu ku lukinzu kulenda tuadisa kithatu kuidi basi dikanda.
8. Kibila mbi tufueti monisa lukinzu kuidi basi dikanda ditu? (1 Timoti 5:4, 8)
8 Kibila mbi tufueti monisa lukinzu? (Tanga 1 Timoti 5:4, 8.) Mu nkanda wutheti kasonikina kuidi Timoti, mvuala Polo wutuba buidi tufueti kebilanga zitsatu zi basi dikanda ditu. Nandi wusudikisa ti tufueti monisanga lukinzu kuidi basi dikanda ditu, kibila mawu “mankuangidikanga Nzambi.” Yave nandi wuvanga makanda moso. (Efe. 3:14, 15) Diawu, bo tunkinzikanga basi dikanda ditu, tuidi mu ku kinzika Yave no wuvanga makanda moso. Tala (nota de estudo mu 1 Timoti 5:4.) Bukiedika, tuidi bibila biwombo muingi kumonisa lukinzu kuidi basi dikanda ditu.
9. Buidi nnuni ayi nkazi balenda kuyimonisina lukinzu? (Tala mvandi zifoto.)
9 Phila yi kumonisina lukinzu. Nnuni wunkinzikanga nkazi’andi, wummonisanga mawu va ntuala bankaka, ayi bo badi va baveka. (Zinga. 31:28; 1 Pet. 3:7) Nandi kabulanga ko nkazi’andi voti kunfuisa tsoni. Yaya Ariel,a wunkalanga ku Argentina wutuba: “Mu kibila ki kimbevu ki nkazi’ama, khumbu zinkaka nandi wuntubanga mambu ma kunduekanga ntima. Bo mawu mammonikanga, yintebukanga moyo ti mambu kankoluka masi ko mawu nandi kanyindula. Mu thangu ayoyo, yinyindulanga mu mambu madi mu 1 Kolintu 13:5. Mawu ma kutsadisanga kukoluka na nkazi’ama mu phila yivumbama ayi mu lukinzu.” (Zinga. 19:11) Nkazi wunkizikanga nnuni’andi mu kuntubila buboti va ntuala batu bankaka. (Efe. 5:33) Nandi zebi ti phila yimbi yi kukolukila, yilenda dekula luzolo badi va dikuela. (Zinga. 14:1) Khomba mueka wunkalanga ku Itália, no nnuni widi kiunda kingolo, wutuba: “Khumbu ziwombo, yimmona ti mambu mankuazulanga nnuni’ami masi ko tsundu. Kumbusa, mambu yaba tubanga mabasa monisanga ko lukinzu kuidi nnuni’ami, vayi bo yindiatanga na batu bammonisanga lukinzu kuidi bankaka, mvandi ma kutsadisanga kumonisa lukinzu kuidi nnuni’ami.”
Bo tunkinzikanga basi dikanda ditu, tunkinzika Yave no wuvanga makanda moso (Tala lutangu 9)
10. Buidi matoko balenda monisa ti bankinzikanga matata mawu?
10 Matoko, landakananu zithuadusulu tat’inu batsikika. (Efe. 6:1-3) Tubilanu buboti matata minu kuidi bankaka. (Esodu 21:17) Matata minu bankuiza tomba lusalusu luinu bo bala nuna. Diawu vanganu mamoso muingi kuba keba. Tala kifuani ki María, no widi tata wukhambu ba Mbangi yi Yave. Bo tat’andi kabua mu kimbevu, yaya María wumona beni phasi kukieba tat’andi, nandi wutuba: “Yisambila kuidi Yave muingi kasadisa tat’ami ayi mvandi muingi katsadisa kutatamana kummonisa lukinzu. Minu yizaba ti, boti Yave ka tudinda muingi tu kinzika matata mitu, buna mvandi wunkuiza tusadisa kuvanga mawu. Buviokila thangu, yiyiza visa ti vasa tombulu ko tat’ami kubalula zikhadulu ziandi muingi yimmonisa lukinzu.” Bo tunkinzikanga basi dikanda ditu kheti mu zinzimbala ziawu, tummonisanga ti tunkinzikanga Yave Nzambi.
MONISA LUKINZU KUIDI ZIKHOMBA ZI KIPHEVI
11. Kibila mbi dilenda bela diambu diphasi ku kinzika zikhomba zi kiphevi?
11 Kikaku. Zikhomba zi kiphevi banzingilanga mu minsua mi Kibibila, vayi khumbu zinkaka bawu balenda vangila mambu malenda ku tufuemisa. Khomba mueka na ku tuvangila mambu malenda tunyongisa, ḿba dilenda ba diambu diphasi kutatamana kummonisa lukinzu. (Kolo. 3:13) Mbi binkuiza tusadisa kununga mambu amomo?
12. Kibila mbi didi diambu dinkinza kumonisa lukinzu kuidi zikomba zi kiphevi? (2 Petelo 2:9-12)
12 Kibila mbi tufueti monisa lukinzu? (Tanga 2 Petelo 2:9-12.) Mu nkanda wumuadi kasonikina baklistu, mvuala Petelo wutuba ti bankaka mu kimvuka kitheti ki baklistu baba tubila bubi bakulutu ba kimvuka. Buidi zimbasi zi kuikama ku diyilu bamuena mambu maba monika? Mu “lukinzu badi mu Yave,” bawu basa tubila ko ni diambu dimbi kuidi batu abobo. Yindula mambu amama, zimbasi badi bavedila vayi kheti bobo, basa tubila ko mu nganzi matedi batu baba tubila bubi bakulutu ba kimvuka. Vayi babika mambu moso mu mioko mi Yave. (Lom. 14:10-12; dedikisa na Yuda 9.) Tulenda longuka mambu mawombo mu kifuani ki zimbasi. Boti tulendi tubila ko bubi batu ba tukuamisanga, bulutidi tufueti monisa lukinzu kuidi zikhomba zitu zi kiphevi. Befu tufueti tuama ntuala muingi “tu bazitisa.” (Lom. 12:10) Kuvanga mawu mankuiza monisa ti tunkuangidikanga Yave.
13-14. Buidi tulenda monisa lukinzu kuidi zikhomba mu kimvuka? Vana kifuani. (Tala mvandi zifoto.)
13 Phila yi kumonisina lukinzu. Bakulutu ba kimvuka, vanganu mangolo muingi mu longa zikhomba mu luzolo. (Film. 8, 9) Va kutombulu kuvana malongi kuidi khomba, vanganu mawu mu lukinzu kubika mu nganzi. Zikhomba zi bakietu, benu mulenda sadisa zikhomba mu kimvuka bayimonisanga lukinzu, benu kukhambu kota mu mambu mangana, voti kuseka buezi. (Titu 2:3-5) Befu boso tulenda monisa lukinzu kuidi bakulutu ba kimvuka mu kulandakana zithuadusulu ziawu ayi ku batonda mu mangolo bamvanganga muingi kutuadisa zikhutukunu, kubasika mu kisalu ki kusamuna ayi kusadisa zikhomba bantona kuvekuka.—Nga. 6:1; 1 Ti. 5:17.
14 Khomba mueka wunkietu bantedilanga Rocío, wumona phasi ku kinzika nkulutu mueka waba kumvana malongi. Nandi wutuba:“Yimuena ti nandi wuphana malongi mu nganzi, diawu ku nzo’ama yintubila bubi. Kheti yabasa tomba ko kuvanga mawu, vayi yimona ti nandi kasaba ko mayindu mamboti bo kaphana malongi, diawu yibayisa mambu kakhamba.” Mbi bisadisa yaya Rocío? Nandi wubue tuba: “Yitanga 1 Tesalonika 5:12, 13. Bo yivisa ti yabasa monisanga ko lukinzu mu khomba ayoyo, kilunzi kiama kitona kuthatisa. Diawu, yisambila kuidi Yave ayi yifiongunina mu bilongulu bitu mambu mankuiza tsadisa kubalula phil’ama yi kuyindudila. Mu phila ayoyo, yivisa ti bakana ko khomba beni wuba mambu vayi minu. Bubu yimana visa ti, minu kuyikulula, yisinkuiza mona ko phasi ku kinzika bankaka. Vakhidi mawombo yifueti ludika mu luzingu luama, vayi bo yimvanga mangolo ma ku kinzika bankaka, yimbanga mu ndembama na Yave.”
Befu boso tulenda monisa lukinzu kuidi bakhulutu ba kimvuka, mu kulandakana zithuadusulu ziawu ayi ku batonda mu kisalu bamvanganga (Tala lutangu 13-14)
MONISA LUKINZU KUIDI BO BAKHAMBU SADILA YAVE
15. Kibila mbi vantombulu kuvanga mangolo muingi ku kinzika batu bakhambu sadilanga Yave?
15 Kikaku. Khumbu ziwombo mu kisalu ki kusamuna, tundengananga batu bakhambu vua nkinza malongi ma Kibibila. (Efe. 4:18) Bawombo mu bawu, bambayisanga mambu ma Nzambi mu kibila ki mambu balonguka tona mu bumuana buawu. Khumbu ziwombo tummonanga phasi kuba masolo mamboti na batu badi zikhadulu zimbi, dedi zikolega zi kisalu voti zi kikola bankhambu vuanga nkinza mambu tumvanganga. Bumviokila thangu, lukinzu tuidi mu batu abobo lulenda dekuka ayi tulenda tona kuba tala mu phila yikhambu fuana.
16. Kibila mbi didi diambu dinkinza kumonisa lukinzu kuidi batu bakhambu sadilanga Yave? (1 Petelo 2:12; 3:15)
16 Kibila mbi tufueti monisa lukinzu? Tebukanga moyo ti Yave wummonanga phila tuntadilanga batu bakhambu kunsadilanga. Mvuala Petelo wulubula zikhomba bamonisa zikhadulu zimboti, kibila mawu mankuiza sadisa bankaka “kuvana nzitusu kuidi Nzambi.” Mu kibila akiokio, nandi wu tukindisa muingi tuba bavumbama ayi tumonisa lukinzu bo tunkakidila mambu tunkinkininanga. (Tanga 1 Petelo 2:12; 3:15.) Diawu, bo tunkoluka na batu bankalanga yitu va nsengi matedi mambu tunkikininanga, tufueti vangilanga mawu mu phila yivumbama ayi mu lukinzu. Kibila Yave wummonanga ayi wunkuwanga mambu moso tuntuba, ayi phila tuntubilanga mawu. Akiokio, kidi kibila kinneni tufueti kinzika batu bakhambu sadilanga Yave.
17. Buidi tulenda monisina lukinzu kuidi batu bakhambu sadilanga Yave?
17 Phila yi kumonisina lukinzu. Mu kisalu ki kusamuna, tuisintomba ko kuvanga bankaka kuyimuena ti basi ko luvalu voti kukinyemisa mu mambu tuzebi matedi Kibibila. Vayi, tuntomba kuba monisa ti bawu badi luvalu va mesu ma Yave ayi ti ba tulutidi. (Hanga. 2:7; Fil. 2:3) Mutu na ku tusakinina mu kibila ki mambu tunkikininanga, tufueti vanga mangolo ma kukiyala mu khambu vutudila mambi mu mambi. (1 Pet. 2:23) Dedi, ngie kutuba diambu dinkuiza nyongina kuntuala, muna thangu dinda nlemvu. Buidi wulenda monisina lukinzu kuidi mutu wunsalanga yaku? Ba mutu wunzolanga kusala ayi monisa zikhadulu zimboti. (Titu 2:9, 10) Ngie kuba mutu wunzolanga kusala, ayi wuntubanga kiedika mu mambu moso, kheti wunkuiza kuangidika batu voti ndamba, ba lufiatu ti mawu mankuiza kuangidika Nzambi.—Kolo. 3:22, 23.
18. Ndandu mbi tumbakanga bo tunkinzikanga bankaka?
18 Tuidi bibila biwombo binkinza muingi tumonisa ti tunkinzikanga bankaka. Tuma mona ti bo tunkinzikanga basi dikanda, tunzitisanga Yave mfumu yi dikanda yilutidi. Bobuawu mvandi, bo tummonisanga lukinzu kuidi zikhomba zitu zi kiphevi, tunkinzikanga tat’itu Yave. Ayi bo tummonisanga lukinzu kuidi bo bakhambu sadilanga Yave, tuba vananga luaku muingi bazitisa Yave Nzamb’itu. Kheti batu basinkuiza tu monisa ko lukinzu, vayi tumbakanga ndandu yiwombo mu kukinzikanga bankaka. Kibila mbi? Kibila Yave wunkuiza tusakumuna mu mawu. Nandi wukanikisa: ‘Yala zitisa batu ba ku khinzikanga.’—1 Samu. 2:30.
NKUNGA 129 Tufueti Kuikamanu
a Bavingisa mazina mankaka.