Basa Zimbakana ko Batu Bafua Matu

Yave kantomba muingi batu boso kheti boso kua badidi, babaka luaku lu balonguka matedi nandi ayi Kintinu kiandi. (1 Timoteo 2:3, 4) Mu kibila akiokio, Zimbangi zi Yave bansekulanga Kibibila ayi bamvananga lusalusu muingi batu boso balonguka Kibibila kubunda mvandi bafua matu. Bukiedika kimvuka ki Yave kimbasisanga bilongulu biwombo muingi kusadisa batu bafua matu,a biawu bidi kuvioka 100 di zimbembu! Buidi tunkubikilanga ayi tunkabudilanga bilongulu beni? Mambu mbi tunungisi kubalula?

Buidi Bamvangilanga Zivideo zi Zimbembu zi Batu Bafua Matu?

Bilongulu bidi mu zimbembu zi batu bafua matu binsekuluanga kuidi mangumba ma minsekudi mu nza yimvimba. Batu badi mu kadika dingumba bamfionguninanga mu nduenga kilongulu bankuiza sekula. Bosi bawu bambakanga makani matedi phila mbi yilutidi balenda sekudila mu membu yi batu bafua matu. Bosi bangravanga kilongulu beni mu video. Bubu, 60 di mangumba bansekulanga kadika thangu bilongulu bi kuvanina ndongukulu yi Kibibila mu mbembu yi batu bafua matu ayi 40 di mangumba mankaka bansekulanga bilongulu beni khumbu zinkaka to.

Kumbusa, vaba tombulu beni zimbongu muingi kusueka zivedeo zi batu bafua matu. Kibika zicamera zi kuvangila zivideo ayi bisadulu binkaka biluta ba beni bukalu kena bubu. Mvandi tuaba gravanga zivideo beni mu bibuangu tutunga voti khumbu zinkaka vaba tombulu kuludika bibuangu beni muingi tununga kuvanga mawu. Vaba tombulu kuvioka 30.000b di zidolar muingi kununga kukubika biabioso biaba tombulu muingi kununga kusueka zivideo mu mbembu yi batu bafua matu.

Muingi kuluta sadila buboti minkhailu, kimvuka ki Yave kintombanga ziphila zi kulengisa kisalu ki kusekula. Diawu tunsumbilanga bisadulu bansadilanga beni mu thangu ayiyi kibila tulenda sadila ziawu mu ziphila ziviakana ayi bikhambulu beni thalu. Ayi kusiala bue tombulu ko kutunga kibuangu muingi kusueka zivideo. Kibila dingumba di minsekudi balenda sadila dibaya voti kibaka kidi ndimba verde kiba kumbus’awu sumbu bansueka zivideo. Bo vantombulu batu bawombo muingi kusueka video, zikhomba balenda vangila mawu ku kibuangu bansadilanga ku beteli voti ku nzo’awu. Vasiala bue tombulu ko kuvanga mawu ku estúdio.

Mvandi tumvanganga zi programa zi computador zinsadisanga zikhomba mu kisalu kiawu. Mambu amomo mansadisanga kudekula thangu babe sadilanga muingi kusekula bilongulu bi batu bafua matu. Zikhomba zitu banzolanga mambu amomo. Khomba mueka bantedilanga Alexander wutuba: “Bubu banluta basisanga zivideo zi batu bafua matu kena mu mimvu mima vioka. Yidi beni mayangi mu mambu amomo. Yintalanga zivideo beni kadika kilumbu.”

Bubu, vantombuluanga to 5.000 di zidolar muingi kukubika bisadulu bintombulu muingi kuvanga kisalu ki kusekula zi vedo beni. Mu kibila akiokio, tunnunganga kuvanga zivideo mu zimbembu ziwombo zi batu bafua matu.

Buidi bankabudilanga zivideo mu zimbembu zi batu bafua matu?

Bo dingumba di minsekudi bammana kusueka video yi kilongulu yi batu bafua matu vantombuluanga kukabula video beni kuidi batu bafua matu. Mu mimvu mima vioka, tuaba basisanga zi kasete ayi zi DVD, vayi ziawu ziba beni bukalu, ziaba kalanga beni nkulu ayi vaba tombuluanga batu bawombo muingi kuvanga kisalu. Bosi babe filanga yawu kuidi zikhomba babe basisanga ziawu mu zi kasete voti zi DVD ziwombo. Bosi, babe filanga zi kasete ayi zi DVD beni mu bimvuka. Dedi, mu mvu 2013, tusadila 2.000.000 di zidolar muingi kusueka zi DVD mu mbembu yi batu bafua matu.

Zikhomba bafua matu banzolanga beni kutambula ziawu. Vayi disa ba ko diambu diluelu kusadila ziawu kibila babe tambulanga zi kasete ayi DVD ziwombo. Ayi khumbu zinkaka vabe tombuluanga zi DVD ziwombo muingi kusueka to buku yimueka yi Kibibila. Khomba mueka wunkalanga ku Brazil batendilanga Gilnei wutuba: “Boti tuaba tomba kutanga buku yimueka yi Kibibila, vaba tombulu theti kubakula kasete yidi buku beni bosi kuzibula buku beni. Diba diambu diphasi beni.” Khomba mueka bantedilanga Rafayane, waba sadilanga zi DVD mu mbembu yi batu bafua matu wutuba: “Diba diambu diphasi kuvanga ndongukulu yi Kibibila yi ngie veka. Tuaba vanganga thangu yiwombo muingi kutomba matangu ma Kibibila voti zi referências.” Ayi bo zikhomba babe kuendanga mu kisalu ki kusamuna, khumbu ziwombo bawu babe natanga zi DVD voti zi kasete muingi kumonisa kuidi nlonguki. Ayi zikhomba zinkaka babe natanga zi DVD ziawu muingi bamona ziawu. Buviokila thangu, batona kusadila zi DVD balenda nata voso vama ayi zikhomba ziwombo batona kusadila ziawu mu kisalu ki kusamuna. Bobby, wunkalanga ku Estados Unidos wutuba: “Boti matanga lutangu lu Kibibila ayi wuntomba kubue tanga lunkaka buna vaba tombulu kulalula DVD yinkaka. Vabe tombulu beni thangu muingi kuvanga mawu. Mawu mvandi matutula nkaku muingi tuba tsuakulu y kusadila Kibibila.”

Mu mvu 2013, Kimvuka ki Yave kiyundula JW Library mu mbembu yi batu bafua matu, muingi kusadisa zikhomba kukulula voti kutala zivideo mu mbembu ayoyo mu zitelefoni voti mu zitablet ziawu. Va thonono, yawu yiba to mu mbembu yi batu bafua matu ku America. Vayi mu mvu 2017, baludika yawu muingi yiba zimbembu zioso zi batu bafua matu. Zikhomba mu nza yimvimba bayangalala beni mu mawu. Juscelino, wunkalanga ku Brazil, wutuba: “Yiyituka beni! Yimona buidi dingumba dintuadisi banzodilanga batu bafua matu ayi bawu bantomba tuyonzuka mu kiphevi dedi bisadi bioso bi Yave. Yiyangalala beni, ayi mawu matsadisa kuluta ba phuila yi kulonguka Kibibila.”

Bubu, tunnunganga kusueka zi video mu mbembu yi batu bafua matu ayi kufila ziawu mu khond’itu mayo voti mu JW Library yi batu bafua matu. Mu kibila akiokio, mu mua bilumbu to tunnunganga kusekula, kusueka ayi kubasisa ziawu kuidi zikhomba. Khumbu zinkaka, bambasisanga bilongulu mu mbembu yi batu bafua matu mu yoyawu thangu na bilongulu binkaka zikhomba bansadilanga.

Monanu mambu zikhomba zitu bafua matu batuba. Khomba mueka bantedilanga Klízia wutuba: “Dingumba mbi di batu dimvuanga nkinza batu bafua matu muingi dibasisa bidia bi kiphevi mu bobo? Vasi ko kiuma kilenda dedakana na mo kimvuka ki Yave ki tuvangilanga.” Vladimir wutuba: “Zivideo zi kumbonisanga ti Yave wumvuanga nkinza batu boso, kuba kuandi bafua matu voti ndamba.”

Mu zivideo zitu mu mbembu yi batu bafua matu bantubanga abubu: “Kilonguku akiki, kisumbusuanga ko. Kidi kinthuadi mu kisalu ki ndongukulu yi Kibibila mu nza yimvimba, kinsadusuluanga mu mikhailu mi luzolo lu ntim’aku.” Tuntonda beni minkhailu mumvananga, ayi bawombo bamvaninanga miawu mu kukota mu khond’itu mayo donate.jw.org. Minkhailu amiomio, mitusadisanga kusekula Kibibila ayi bilongulu binkaka ayi bilongulu bi kulongukila kiawu kubunda mvandi mu mbembu yi batu bafua matu.