Kisuekulu ki bilongulu va dikanda di koko kuaku

“Mimvu miwombo kumbusa tuabasa yindulanga ko kuba bilongulu mu khati telefoni.” Wuntebuka moyo bikuma abiobio? Biawu yaya Geoffrey Jackson kasadila mu ndubu #6 yi Nnanga Wukuikama mu mvu 2020. Nandi wubue tuba: “Khanu buidi mu thangu ayiyi yi COVID-19 tuidi mu kutambudila bilongulu boti tuisi ko kisuekulu ki bilongulu JW Library? Bukiedika, Yave mu mimvu miwombo mima vioka wu tukubika mu mambu amomo.”

Buidi Yave ka tukubikila? Mangolo mbi maba tombulu muingi kuvanga aplicativo JW Library ayi mbi bintombulu muingi kutatamana kuvanga yawu yiluta ba yimboti?

Mambu Matheti Mabe Tombulu

Mu Ngonda Yintanu mvu 2013, Dingumba Dintuadisi didinda Dingumba di MEPS Programming, didi ku Kikulutu muingi kukubika kisadulu voti aplicativo yo balenda tula Tsekudulu Yimona yi Kibibila. Yaya Paul Willies wunsadilanga mu dingumba beni wutuba: “Nati mu thangu beni tusa ba ko aplicativo yi phila ayoyo” yo zikhomba balenda kulula mu telefoni. “Befu tukubika dingumba ayi tubika theti bisalu binkaka tuaba vanga, mvandi tusala na mangumba mankaka muingi kukubika aplicativo beni. Tusambila beni kuidi Yave ayi mu lusalusu luandi bo vavioka to zingonda zitanu, bayundula mu lukutukunu lumvu aplicativo ayoyo yimona!”

Kikaku kinkaka tuaba tomba kununga kiba, kuvanga aplicativo beni muingi yikota bilongulu mu zimbembu ziwombo. Mu Ngonda Yitheti 2015, tulenda tuba ti nanga bilongulu bitu bioso mu mbembu yi kingeleso biba mu aplicativo. Bo vavioka to zingonda zi sambanu, baboso baba nunga kukulula bilongulu bitu mu kuvioka khama di zimbembu.

Tona mu thangu beni zikhomba babuela kubue ludika biuma biwombo mu aplicativo beni. Dedi babuela muawu kibuangu kidi zivideo, bilongulu, zi áudio ayi tsielu yimueka yidi thuaduzulu yi zikhutukunu. Mvandi batula muna Guia de Pesquisa muingi kubuela fiongunina lutangu lu Kibibila mutu kantanga.

Kuvanga Aplicativo Beni Yitatamana Kusala

Kuvioka 8 milhões di batu bankotanga mu JW Library mu kilumbu ayi kuvioka 15 milhões di batu bankotanga muawu kadika Ngonda! Mbi bintombulu muingi aplicativo beni yitatamana kusala buboti mu zitelefoni? Yaya Willies wutuba: “Tumvanganga mangolo muingi kubuela biuma mu aplicativo beni muingi kusadisa batu kubaka ndandu mu kusadila yawu. Mu kibila ki mambu mawombo bambalulanga mu internet, befu mvitu vantombuluanga kufiongunina aplicativo beni muingi yawu yitatamana kusala buboti. Mvandi tuntatamananga kuludika software yitu bo thalu yi bilongulu ayi zivideo mu JW Library yimbuelama.” Ayi muawu muidi 200.000 di bilongulu ayi muidi kuvioka 600.000 di zi áudio ayi zivideo!

Muingi kutatamana kuvana lusalusu luntombulu mu aplicativo beni, vasintombulu ko to hardware yi computador. Vayi mvandi tunsumbanga minsua mu software. Muingi kusumba nsua wumueka wu software tumfutanga 1.500 di zidolar. Ayi muingi ziprograma zi MEPS zitatamana kusala mu zi telefoni, zi tablet ayi zi computador zimona, tumfutanga kadika mvu 10.000 di zidolar.

Kukulula Bilongulu mu Aplicativo Kudekula Zimbongo

Kusadila aplicativo JW Library, kusadisidi kudekula thalu yi zimbongo tumfutanga muingi kubasisa ayi kukabula bilongulu. Dedi, tala kifuani mu mua buku Fiongunina Matangu Kadika Kilumbu. Mu mvu—2013, tubasisa 12 milhões yi mua zibuku beni. Vayi mu mvu 2020, tubasisidi to 5 milhões yi mua zibuku beni—kheti vabuelama mu mvu beni 700.000 di minsamuni mu nza yimvimba. Kibila mbi thalu ayoyo yidekukidi? Kibila zikhomba ziwombo badi mu kutangila matangu ma kilumbu mu kusadila JW Library.a

“Tsadulu Beni Yidi”

Aplicativo JW Library, mvandi yinsadisanga zikhomba mu ziphila ziwombo. Geneviève, wunkalanga ku Canadá, wutuba ti Aplicativo JW Library yikunsadisanga kuvanga ndongukulu yi naveka kadika sabala. Nandi wutuba: “Boti vantombuluanga kukhupika zibuku zio yifueti vangila ndongukulu’ama yi Kibibila, ḿba khanu yinunganga ko kuvanga mawu kadika sabala. Vayi mu kusadila aplicativo, minu yimmonanga ti biuma bioso yintomba bidi mu khati tablet. Ayi ndongukulu beni yinkindisanga kiminu kiama ayi yimbuelanga kukhindisa mu kiphevi.”

Aplicativo JW Library yidi mu ku tusadisa beni mu thangu ayiyi yi COVID-19. Charlyn, ku Estados Unidos, wutuba: “Mu kibila ki COVID-19 yisa tambula ko ni kilongulu kimueka mu minkanda. Vayi JW Library yintatamana ku tudikila mu kiphevi ayi yimvutudila Yave matondo mu kisadulu akiokio.”

Faye, wunkalanga ku Filipina, wutuba mayindu zikhomba ziwombo badi. Nandi wutuba: “Luzingu luama loso lu kiphevi luidi mu aplicativo JW Library. Kibila muawu muidi mambu yifueti tanga va meni, zi áudio yifueti kuwa bo yimvanga bisalu, mambu yifueti kubika mu zikhutukunu ayi mambu yifueti longuka mu ndongukulu’ama yi Kibibila. Muawu muidi mvandi zivideo zio yinlandakananga bo yikhambu vanga ni diambu. Ayi bo yidi mu bicha yilenda tanga bilongulu voti Kibibila mu aplicativo beni. Bukiedika kidi kisadulu kimboti.”

Aplicativo mvandi yidi beni tsadulu mu kisalu ki kusamuna. Dedi, bo khomba yimueka yinkalanga ku Camerões kaba samuna, nandi waba tomba kusadila matangu khomba yinkaka kasadila mu sabala yivioka. Vayi kabasa bue tebukila ko mawu moyo. Nandi wutuba: “Minu yitebukila moyo bikuma biba mu lutangu beni. Diawu yizibudila aplicativo JW Library, yiyenda mu Kibibila ayi yitomba bikuma beni. Muna thangu, minu yibakula lutangu yaba tomba. Mu kusadila aplicativo JW Library, yilenda bakula matangu mawombo ma Kibibila yizimbakananga khumbu zinkaka.”

Minkhayilu miakuwumvananga mu kusadila zithuadusulu zidi mu donate.jw.org zi tusadisanga kukubika ayi kuludika aplicativo JW Library muingi zikhomba zitu zioso mu nza yimvimba babaka ndandu. Matondo beni mu kuba koko kuyalubuka.

Bitesu Bakundudila Aplicativo JW Library

1. 

   Ngonda Kumi 2013—Bakundula aplicativo muba Tsekudulu Yimona yi Kibibila Tradução do Novo Mundo

2. 

   Ngonda Yitheti 2015—Bilongulu mu kingeleso ayi khama yi zimbembo zibuelama

3. 

   Ngonda Kumi Yimueka 2015—Babuela zindimba muingi kukubikila

4. 

   Ngonda Yintanu 2016—Babuela tsielu yidi thuadusulu yi zikhutukunu

5. 

   Ngonda Yintanu 2017—Babuela tsielu tulenda sonikina mayindu mitu

6. 

   Ngonda Kumi Yimuadi 2017—Babuela muawu Kibibila ki kulongukila

7. 

   Ngonda Yintatu 2019—Babuela muawu luaku lu kukuludila zi áudio ayi zivideo, mvandi babuela Guia de Pesquisa muingi kununga tomba matangu ma Kibibila

8. 

   Ngonda Yitheti 2021—babuela bisadulu binkaka muingi tubuela baka ndandu mu buku Baka Mayangi ma Mvu ka Mvu!