DILONGI 11
MKUNGA 129 Tufueti Kuikamanu
Ngie Wulenda Tatamana Kusadila Yave
“Ngie widi mu kukindama mu kibila ki dizina diama.”—NZAI. 2:3.
MAMBU TUANLONGUKA
Befu tulenda tatamana kusadila Yave kheti bo tumviokila mu mambu ma kiunda.
1. Lusakumunu mbi tuntambulanga mu kuba mu khati kimvuka ki Yave?
BEFU tuidi lusakumunu luwombo mu kuba mu khati kimvuka ki Yave mu bilumbu abibi bitsuka. Kheti mambu mu nza madi mu kuluta buelama vayi Yave wutuvana dikanda di kiphevi muidi zikhomba zi babakala ayi zi bakietu badi luzolo. (Minku. 133:1) Nandi wutusadisanga muingi tuba kithuadi kingolo mu dikanda beni. (Efe. 5:33–6:1) Mvandi wutuvananga nduenga ayi luzabu luntombulu muingi tubaka ndembama yi ntima.
2. Mbi tufueti vanga ayi kibila mbi?
2 Vantombulu kuvanga mangolo muingi kutatamana kusadila Yave mu lukuikumunu. Kibila mbi? Kibila khumbu zinkaka zikhomba zitu balenda kutunyongisa ntima ayi tulenda ba mu kiunda mu zinzimbala zitu, bulutidi boti tumvanga zioziawu zinzimbala. Diawu vantombulu kuvanga mangolo muingi kutatamana kusadila Yave kheti (1) bo zikhomba zitu ba kutu lueka ntima, (2) bo mutu wukuelana yitu ka tubika mu kiunda, ayi (3) bo zinzimbala zitu zi tuvanga kuba mu kiunda. Mu dilongi adidi, tunkuiza tubila mambu amomo ayi tunkuiza mona mvandi mbi tulenda longuka mu binongo bi bisadi bi Yave bantubila mu Kibibila.
TATAMANA KUKINDAMA KHETI BO ZIKHOMBA ZITU BA KULUEKA NTIMA
3. Bikaku mbi bisadi bi Yave balenda viokila?
3 Kikaku. Zikhomba zinkaka bammonisanga zikhadulu zilenda ku tufuemisa. Bankaka balenda kutuvangila diambu dilenda kutu nyongisa voti kutu bika mu kiunda ayi zikhomba bantuama ntuala mvandi balenda vanga zinzimbala. Mambu amomo, malenda vanga bankaka kuba divuda boti akiki kiawu kimvuka ki Yave ayi malenda kutu tula nkaku kutatamana kusadila Yave ‘va kimueka’ na zikhomba ayi kubika kubue kuendanga mu zikhutukunu. (Sefa. 3:9) Didi diambu dimboti kuvanga mawu? Tuemmona mbi tulenda longuka mu kinongu ki Kibibila ki mutu mueka wuviokila mu ntindu mambu amomo.
4. Mambu mbi maphasi mvuala Polo kaviokila?
4 Kifuani ki Kibibila. Mvuala Polo wuzaba ti zikhomba ziandi zi kiphevi mvandi baba batu ba masumu. Dedi, khumbu mueka bamvangila mambu makhambulu masonga bo katona kuba kithuadi na zikhomba mu kimvuka. (Mava. 9:26) Ayi bawombo bantubila bubi muingi kubivisa kimutu kiandi. (2 Koli. 10:10) Polo mvandi wumona zikhomba ziaba tuamanga ntuala kubaka makani malenda buisa bankaka mu kiphevi. (Ngala. 2:11, 12) Ayi Malaku, wumueka mu bakundi bafikama ba Polo, wunyongisa beni. (Mava. 15:37, 38) Ḿba Polo khanu wubika mambu amomo mamvanga kabika kubue banga kithuadi na zikhomba aziozio. Kheti bobo nandi wutatamana kuba mayindu mafuana mu zikhomba ziandi ayi wutatamana mu kisalu ki Yave. Mbi bisadisa mvuala Polo kutatamana?
5. Mbi bisadisa mvuaka Polo kubika zimbakana zikhomba ziandi zi luzolo? (Kolosai 3:13, 14) (Tala mvandi fikula.)
5 Mvuala Polo waba zolanga zikhomba ziandi. Luzolo kaba kuidi zikhomba ziandi, lunsadisa katsikika thalu’andi mu zikhadulu ziawu zimboti kubika mu zinzimbala ziawu. Luzolo lunsadisa kuvanga momawu kasonikina kuidi basi Kolosai. (Tanga Kolosai 3:13, 14.) Mona buidi mvuala Polo kalemvukila Malaku. Kheti Malaku wunyekula mu viagi yitheti kavanga mu kisalu ki misioni, vayi Polo kasa tatamana ko kuba mu kiunda. Bosi, mu nkanda kasonikina kuidi basi Kolosai, nandi wutubila buboti matedi Malaku waba salanga yandi. Nandi wutuba ti Malaku wuba “tho yi mbombolo ayi yi khindusulu.” (Kolo. 4:10, 11) Bo kaba mu buloko ku Loma, mvuala Polo wudinda muingi Malaku kansadisa. (2 Timo. 4:11) Bukiedika, mvuala Polo kasa zimbakana ko zikhomba ziandi. Mbi tulenda longuka mu kifuani ki mvuala Polo?
Vaba diambu mvuala Polo, Balinabasi ayi Malaku basa bela ko nguizani. Vayi mvuala Polo kasa sikika ko thalu mu mawu ayi wusala mu mayangi na Malaku (Tala lutangu 5)
6-7. Buidi tulenda monisina luzolo tuidi mu zikhomba zitu kheti mu kuba batu basumuka? (1 Yoane 4:7)
6 Dilongi. Yave wuntomba tutatamana kumonisa luzolo kuidi zikhomba zitu. (Tanga 1 Yoane 4:7.) Boti khomba betuvangila diambu di tulueka ntima, tulenda ba lufiatu ti nandi wuntomba kulandakana minsua mi Kibibila ayi bakana ko mu luzolo luandi kabe vangila mawu. (Zinga. 12:18) Nzambi wunzolanga bisadi biandi bikuikama kheti khumbu zinkaka bamvanganga zinzimbala. Nandi ka tubandanga ko mbusa ayi katulundilanga ko nganzi. (Minku. 103:9) Bukiedika, didi diambu dimboti befu mvitu kulandakana kifuani ki Tat’itu nkua nlemvu.—Efe. 4:32–5:1.
7 Mvandi tebuka moyo ti bo nza yidi mu kue fikamanga kutsuka, tufueti tatamana kuba bafikama kuidi zikhomba zitu zi luzolo. Ayi tulenda ba lufiatu ti zikhuamusu zilenda luta buelama. Ayi khumbu zinkaka balenda kututula mu buloko mu kibila ki kiminu kitu. Mambu amomo ma kumonika, befu tunkuiza tomba beni lusalusu lu zikhomba zitu. (Zinga. 17:17) Tala mambu mamonikina Josep,a nkulutu wu kimvuka wunkalanga ku Espanha. Nandi ayi zikhomba ziandi baba tula va kimueka mu buloko, mu kibila ki kukhambu kota mu mambu ma pulitika. Nandi wutuba: “Mu buloko, befu tuba va kimueka na bankaka, diawu dibela diambu diluelu kuba mu nganzi mu kibila ki zinzimbala ziawu. Diawu vaba tombulu beni kuyilemvukilanga befu na befu mu ntima woso. Mawu matusadisa kuba kithuadi ayi tuyikieba. Tuaba banga va khati batu bakhambu ba bisadi bi Yave. Bo yiluala mu koku, yabasa bue nunganga ko kuvanga mambu minu veka. Vayi, khomb’ama waba sukulanga bikhutu biama ayi wukhieba mu ziphila zinkaka. Minu yaba tomba beni bambonisa ntindu luzolo alolo.” Bukiedika, mambu amomo mammonisa ti vantombulu kudedikisa mambu tulenda bakana befu na befu.
TATAMANA KUKINDAMA KHETI BO MUTU WUKUELANA YAKU KAKU NYONGISA
8. Bikaku mbi bakuela balenda viokila?
8 Kikaku. Batu boso bakuela bamviokilanga mu ziphasi. Kibibila kintuba ti “batu boso bakuela bala viokila mu ziphasi.” (1 Koli. 7:28) Kibila mbi? Kibila bakuela badi batu buadi basumuka, ayi kadika mutu mu bawu ḿba widi disuasana, mu mambu kanzolanga ayi kakhambu zolanga. Mvandi bawu bayonzukila mu makanda maviakana ayi khumbu zinkaka, balenda monisa zikhadulu zio baba khambu monisanga ava bakuela. Mambu moso amomo, malenda tuadisa ziphasi. Khumbu zinkaka balenda tsikika thalu mu zinzimbala zi mutu wunkaka, kubika kuandi phila balenda dedikisala mambu beni. Ayi ḿba mawu malenda kuba vanga bavasana voti bavambana. Vayi bukiedika ti kuvanga mawu, kunkuiza luta batuadisa mayangi?b Tuemmona kifuani kimueka mu Kibibila ki mutu wuviokila mu ziphasi va dikuela.
9. Bikaku mbi Abigaili kaviokila?
9 Kifuani ki Kibibila. Abigaili wuba wukuela na Nabali, no Kibibila kintubila ti wuba mutu wu makhesi ayi mavanga mambi. (1 Samu. 25:3) Ḿba diba diambu diphasi kuidi Abigaili kuzinga na dibakala adiodio. Buabu, bukiedika ti Abigaili wuba luaku lu kumanisa dikuela adiodio? Nandi wuba luaku alolo bo Davidi kayenda muingi kuvonda nnuni’andi, mu kibila ki mambu mambi kaba vangila. (1 Samu. 25:9-13) Abigaili wuba luaku lu kutina muingi Davidi kadukisa makani kaba. Vayi kheti bobo, nandi wuvanga dioso diambu ayi wutula nkaku muingi Davidi kabika kuvonda Nabali. (1 Samu. 25:23-27) Kibila mbi Abigaili kavangila mambu amomo?
10. Mbi bivanga Abigaili katatamana kukindama kheti mu ziphasi kaba va dikuela?
10 Abigaili waba zolanga Yave ayi waba kinzikanga minsua miandi matedi dikuela. Bukiedika nandi wuzaba buboti mambu Nzambi kakamba kuidi Adami ayi Eva mu thangu kavanga dikuela ditheti. (Ngene. 2:24) Abigaili wuzaba ti Yave wuntadilanga dikuela banga kiuma kinlongo. Nandi waba tomba kukuangidika Nzambi ayi wuvanga mamoso kanunga muingi kuvukisa dikanda diandi kubunda mvandi nnuni’andi. Nandi mvandi wuba wukubama muingi kudinda nlemvu mu mambu kakhambu vanga. Bukiedika, Yave waba zolanga beni zikhadulu nkietu awowo kamonisa. Mambu mbi bakazi ayi banuni balenda longuka mu kifuani ki Abigaili?
11. (a) Mbi Yave kantomba bakuela bavanga? (Efeso 5:33) (b) Mbi ngie belonguka mu mangolo yaya Carolina kavanga muingi kuvukisa dikuela diandi? (Tala mvandi foto.)
11 Dilongi. Yave wuntomba, bakuela batadila dikuela diawu mu phila yifuana, kheti mutu wukuelana yawu widi zikhadulu zimbi. Nzambi wunkuangalalanga beni mu kumona mangolo bakuela bamvanga muingi kudedikisa mambu ayi kuyimonisa luzolo bawu na bawu. (Tanga Efeso 5:33.) Tala kifuani ki yaya Carolina. Bo vavioka mimvu misambanu tona bakuela, yaya Carolina wutona kulonguka Kibibila na Zimbangi zi Yave ayi wuyiza botama. Nandi wutuba: “Nnuni’ama kasa kuangalala ko mu makani yibaka. Nandi wutona kumona Yave nsoki. Nandi waba kumvuezanga ayi waba tubanga ti wunkuiza mbika.” Kheti bobo, yaya Carolina wutatamana mu dikuela diandi. Mu 50 di mimvu nandi wuvanga mangolo mawombu muingi kukinzika ayi kukieba dikuela diandi. “Buviokila thangu, minu yilonguka zikhadulu dedi kukolukila mu lukinzu na nnuni’ama ayi kudedikisa mambu. Mu kuzaba ti Yave wuntadilanga dikuela kiuma kinlongo, diawu yivangila mamoso muingi kukieba dikuela beni. Minu yisa vonga ko, kibila yinzolanga beni Yave.”c Va kumonika mambu maphasi va dikuela diaku, ngie wulenda ba lufiatu ti Yave wala kusadisa muingi wukindama.
Mbi wulenda longuka mu nduenga Abigaili kaba yi kukieba dikanda diandi? (Tala lutangu 11)
TATAMANA KUKINDAMA KHETI BO ZINZIMBALA ZIAKU ZIKUBIKA MU KIUNDA
12.Mayindu mbi malenda kutukuizila bo tumvola disumu dingolo?
12 Kikaku. Thangu Zinkaka, bo tumvanga disumu dingolo tumbanga mayindu makuvonga. Kibibila kintuba ti masumu mitu malenda kutuvanga kuba ‘mayindu makofakana ayi ma kiunda.’ (Minku. 51:17) Khomba mueka bantedilanga Robert wuvanga mangolo mu mimvu miwombu, muingi kanunga kuba nsadisi wu bakulutu ba kimvuka. Kheti bobo nandi wuvola disumu dingolo ayi wumona ti disumu beni dinyongisa Yave. Nandi wutuba: “Kilunzi kiama kiaba kuthatisanga beni mu mambu yivanga. Ayi Khumbu zinkaka, yaba banga beni wuvonga buka mutu wumbela. Minu yivanga nsambu kuidi Yave ayi yaba yimuena ti Nzambi kasinkuiza yuwa ko nsambu’ama. Minu yinyongisa beni Yave.” Befu kuvanga disumu ḿba tulenda ba mayindu ma kuvonga. Kibila ntim’itu wulenda kutuvanga kuyindula ti Yave kasi bue tuvua ko nkinza. (Minku. 38:4) Boti ngie mana yimuena mu phila ayoyo, mona kifuani ki Kibibila ki mutu wumueka wutatamana kusadila Yave kheti mu disumu dingolo kavanga.
13. Disumu mbi dingolo Petelo kavola ayi buidi kabela?
13 Kifuani ki Kibibila. Va builu butsuka ava bavonda Yesu, mvuala Petelo wuvanga zinzimbala ziwombu zimvanga kuba mayindu makuvonga. Theti, nandi wumonisa lungundayi bo katuba ti wala tatamana wukuikama kheti bapostolo bankaka bala kunkuekula. (Malaku 14:27-29) Bosi, bo nkangu wu batu bayenda kuekanga Yesu, Petelo wunyekula. (Malaku 14:32, 37-41) Ayi bo baba ku lumbu lu Ngetesemani, Petelo kasa nunga ko kutatamana kuba wukotuka. (Malaku 14:50) Bosi Petelo wumanga Yesu khumbu zitatu, mu phila ayoyo nandi kasa dukisa ko mambu katuba. (Malaku 14:66-71) Buidi Petelo kabela bo kavola disumu dingolo? Nandi wuyiza ba beni mu kiunda ayi wutona kudila. (Malaku 14:72) Bukiedika, Petelo wuba beni mu kiunda bo bavonda nkundi’andi Yesu ayi mu thangu ayoyo nandi waba kuyimuena ti kasi ko luvalu.
14. Mbi bisadisa mvuala Petelo kutatamana kusadila Yave? (Tala fikula yidi levista.)
14 Mambu mawombu mavanga mvuala Petelo katatamana kusadila Yave. Theti nandi kabasa tatukanga ko zikhomba, waba banga yawu kithuadi ayi mawu mankindisa beni. (Luka 24:33) Ayi bo Yesu kavulubuka, nandi wumonikina kuidi Petelo muingi kamvana khindusulu. (Luka 24:34; 1 Koli. 15:5) Yesu mvandi kasa fundisa ko Petelo mu zinzimbala kavanga ayi wumvana biyeku binkinza mu kimvuka. (Yoa. 21:15-17) Petelo wuzaba ti wuvola disumu dingolo vayi nandi kasa vonga ko. Kibila mbi? Kibila nandi wuba lufiatu ti Mfumu’andi Yesu wunlemvukila. Ayi mvandi, zikhomba ziandi zinkaka zi kiphevi batatamana kunsadisa. Mbi tulenda longuka mu kifuani ki mvuala Petelo?
Yoane 21:15-17 yimmonisa ti, Yesu kasa vongila ko Petelo ayi wu kunkindisa katatamana (Tala lutangu 14)
15. Lufiatu mbi Yave kantomba befu tuba? (Minkunga 86:5; Loma 8:38, 39) (Tala mvandi foto.)
15 Dilongi. Yave wuntomba tuba lufiatu ti wutuzolanga ayi wutulemvukilanga. (Tanga Minkunga 86:5; Loma 8:38, 39.) Didi diambu dimboti kuba mu kiunda ayi kuyivana fotu bo tumvola disumu. Vayi tufueti ba keba keba muingi tubika kuyindula ti basiala bue tuzola ko voti balendi kutulemvukila ko. Vayi tufueti tomba lusalusu muthinu. Yaya Robert tube tubila va thonono wutuba: “Bo yaba viokila mu zithotolo minu yivola disumu dingolo kibila yifiatila mu mangolo mama.” Nandi wuyiza visa ti vaba tombulu kayoluka na bakulutu. Nandi wubue tuba: “Bo yivanga mawu minu yimona ti Yave Nzambi wukunzolanga ayi yitambula lusalusu mu nzila bakulutu. Bawu batsadisa ayi yimona ti Yave kasa kukhuekula ko.” Mvitu tulenda ba lufiatu ti Yave wutuzolanga ayi wutulemvukilanga bo tunyongina masumu mitu. Diawu tuntomba lusalusu luandi ayi kuvanga mangolo ma kubika kubue vanga nzimbala beni. (1 Yoa. 1:8, 9) Lufiatu alolo lunkuiza tusadisa kubika kuvonga bo tumvola masumu.
Buidi ngie wubela voti wala bela bo bakulutu ba kimvuka bakuvana lusalusu? (Tala lutangu 15)
16. Kibila mbi wufueti bakila makani ma kutatamana kusadila Yave?
16 Yave wumvuanga beni nkinza mangolo tumvanga mungi kunsadila mu bilumbu abibi bitsuka tuidi mu kuzingila. Mu lusalusu lu Yave, befu tulenda kindama kheti mu mambu ma kiunda tumviokila. Befu tulenda zola zikhomba zitu zibabakala ayi zibakietu ayi kuba lemvukila kheti bo batuvangila mambu mambi. Befu tulenda monisa ti tunzolanga Nzambi ayi tunkinzikanga dikuela, mu kuvanga mamoso tulenda nunga muingi kudedikisa dikuela ditu. Ayi befu kuvola disumu, tulenda tomba lusalusu lu Yave ayi kukikinina luzolo luandi, nlemvu’andi ayi kutatamana kunsadila mu ntima woso. Ayi tulenda ba lufiatu ti tuala tambula lusakumunu luwombu, befu kukhambu “vonga kuvanga mambu mamboti.”—Ngala. 6:9.
BUIDI WULENDA TATIMININA KUSADILA YAVE BO . . .
khomba kakulueka ntima?
mutu wukuelana yaku kakunyongisa ntima?
zinzimbala zitu zi tuvanga kuba mu kiunda?
NKUNGA 139 Wu Kiyindula mu Nza Yimona
a Bavingisa mazina mankaka.
b Diambu di Nzambi dimmonisa ti disi ko diambu dimboti nnuni ayi nkazi kuvasana. Vayi vadi mua bibila bilenda vanga Baklistu kuvasana. Mona nota 4 yintuba “Kuvasana va Dikuela” mu buku Baka Mayangi ma Mvu ka Mvu!
c Muingi wumona bifuani binkaka, mona mu jw.org video yintuba Bika Kuvunuka mu Kulandakana Ndembama yi Luvunu!—Darrel ayi Deborah Freisinger.