DILONGI 27
Kibila Mbi Tufueti Vuminanga Yave?
“Batu bamvuminanga Yave, bawu badi yandi kikundi kifikama.”—MINKU. 25:14.
NKUNGA 8 Yave Kisuamunu Kitu
MAMBU TUANLONGUKAa
1-2. Dedi bummonisina Minkunga 25:14, mbi tufueti vanga boti tuntomba kuba kikundi kifikama na Yave?
MU MBUENU’AKU, zikhadulu mbi wuntombanga mu bakundi baku? Ḿba ngie wulenda tuba ti bakundi bamboti bafueti monisa luzolo ayi bayisadisanga bawu na bawu. Vayi ḿba wulendi yindula ko ti, boma yidi khadulu yimboti nkundi kafueti ba. Vayi dedi bummonisina matangu mabongulu ntu diambu wu dilongi adidi, baboso bantomba kuba kikundi kifikama na Yave, bafueti “kumvumina.”—Tanga Minkunga 25:14.
2 Kheti tuidi mu kusadila Yave mu mimvu miwombo voti ndamba, befu boso tufueti tatamana kuvumina Yave. Mbi binsundula kuvumina Nzambi? Buidi tulenda longukila kuvumina Yave? Mbi kifuani ki Obadia, nkulutu zinganga Nzambi Yoyada ayi ntinu Yoasi kilenda ku tulonga matedi kuvumina Nzambi?
MBI BINSUNDULA KUVUMINA NZAMBI?
3. Tubila mua mambu malenda ku tutula boma ayi buidi mawu malenda ku tusadisila?
3 Tulenda mona boma bu kuviokila mu mambu makhambu fuana. Buisi ko bubi kumona ntindu boma abobo, kibila mawu malenda ku tusadisa kuvanga mambu mu phila yifuana. Dedi, befu kuba boma, tuisinkuiza diatila ko va ndeku mbuinga. Mvandi, boma bu kuvangana phasi, bunkuiza tusadisa kubika vanga mambu mankuiza tutula va kingela. Ayi boma bu kuvava kikundi kio tuidi na mutu tunzolanga, bunkuiza tusadisa kubika tuba voti kuvanga mambu makhambu fuana.
4. Buidi Satana kantomba tutadila Yave?
4 Satana wuntomba muingi batu baba boma bukhambu fuana bu Yave. Satana nandi wutuadisa mayindu Elifasi kaba, bo katuba ti Yave wu tulundilanga nganzi ayi bo kamfuema, kalendi ku tulemvukila ko. (Yobi 4:18, 19) Satana wuntomba tuba boma bu Yave ayi tubika kunsadila. Muingi mambu amomo mabika ku tumonikina, vantombulu kuvumina Nzambi voti kuba boma bufuana.
5. Mbi mutu wumvuminanga Nzambi kalendi vanga ko?
5 Mutu wumvuminanga Nzambi wukunzolanga ayi kalendi vanga ko mambu malenda bivisa kikundi kiawu. Ayi Yesu wuba ntindu “boma abobo.” (Ebe. 5:7) Yesu kasa ba ko boma bukhambu fuana bu Yave. (Yesa. 11:2, 3) Vayi nandi wuba boma bu kunhongisa. (Yoa. 14:21, 31) Kibila nandi waba kunzolanga ayi waba tomba kuntumukina. Dedi Yesu, tunkinzikanga Yave kibila nandi nkua luzolo, nkua nduenga, nkua busonga ayi widi nkua ngolo zioso. Befu tuzebi ti Yave wu tuzolanga ayi tuzebi ti nandi wumbanga mu kiunda befu khambu tumukina zithuadusulu ziandi. Diawu, mambu tumvanga malenda tuadisa kiunda voti mayangi kuidi Yave.—Minku. 78:41; Zinga. 27:11.
LONGUKA BU KUVUMINA NZAMBI
6. Phila mbi yinkaka tulenda longukila kuvumina Nzambi? (Minkunga 34:11)
6 Tubutukanga ko na khadulu yi kuvumina Nzambi, diawu vantombulu kukuna yawu. (Tanga Minkunga 34:11.) Phila yimueka tulenda vangila mawu yidi mu kufiongunina bivangu. Bo tummona nduenga, mangolo ayi luzolo lu Yave mu “biuma kavanga” buawu tunluta kunkinzikila. (Loma 1:20) Khomba mueka yinkietu bantedilanga Adrienne wutuba: “Yinkuitukanga beni kumona nduenga yi Yave mu nzila bivangu. Ayi mawu ma kuphanganga kumona ti Yave wu tuzebi buboti.” Bo kanyindula mu phila ayoyo nandi wukikuvusanga: “Kibila mbi yifueti vangila mambu malenda tulula kikundi kiama na Yave, tho yi luzingu luama?” Mu kutadila mambu amomo, buidi wummuena kubotulanga thangu muingi kutalanga bivangu? Ngie kuvanga mawu wunkuiza luta kinzika ayi kuzola Yave.—Minku. 111:2, 3.
7. Buidi nsambu wulenda ku tusadisila kuba boma bufuana bu Nzambi?
7 Phila yinkaka tulenda longukila kuvumina Nzambi, yidi mu kusambilanga kadika kilumbu. Bo tunluta vanga minsambu, buawu tunkuiza luta tadila Yave banga mutu wukiedika. Kadika thangu tu kundindanga muingi ku tusadisa kununga ziphasi, mawu mankuiza tusadisa kutebuka moyo mangolo mandi. Bo tumvutula matondo mu nkhailu wu kutuvana muan’andi, mawu ma tutebulanga moyo luzolo Yave kadi mu befu. Ayi bo tunlomba muingi Yave ka tusadisa bo tumviokila mu mambu maphasi, mawu ma tutebulanga moyo ti Yave widi beni nduenga. Minsambu amiomio tumvangilanga mu ntima woso, mimbuelanga lukinzu ayi lufiatu luitu mu Yave. Ayi miawu, minkindisanga makani mitu ma kubika vanga dioso diambu dilenda bivisa kikundi kitu na Yave.
8. Mbi tufueti vanga muingi tutatamana kuvumina Nzambi?
8 Tulenda tatamana kuvumina Nzambi, mu kubaka makani ma kulonguka mu bifuani bimboti ayi bimbi bidi mu Kibibila. Ndoku tutubila bifuani di bisadi biodi bikuikama bi Yave, dedi Obadia waba kiebanga nzo yi ntinu Akabi ayi nkulutu zinganga Nzambi Yoyada. Bosi tunkuiza mona mbi tulenda longuka mu kifuani ki Yoasi ntinu Yuda. Nandi va thonono wusadila Yave mu lukuikumunu vayi wuyiza levula minsiku mi Yave.
BA KIBAKALA DEDI OBADIA
9. Buidi kuvumina Nzambi kusadisila Obadia? (1 Mintinu 18:3, 12)
9 Kibibila kintona kutubila matedi Obadiab mu kusadila bikuma: “Obadia waba vuminanga Yave.” (Tanga 1 Mintinu 18:3, 12.) Buidi kuvumina Nzambi kunsadisila? Mawu mansadisa kuba mutu waba tubanga kiedika ayi wu lufiatu. Diawu ntinu kambiekila muingi kukiebanga nzo’andi. (Dedikisa na Nehemia 7:2.) Kuba boma bufuana bu Nzambi kusadisila Obadia kuba kibakala—ayi yawu yiba khadulu kaba tomba beni. Kibila wuzingila mu thangu Akabi, ntinu “wuluta vanga mambu mambi va mesu ma Yave kena mintinu mioso bayala ava nandi.” (1 Minti. 16:30) Mvandi, nkazi’andi Isabeli waba buongiminanga Bali, waba lendanga Yave ayi waba tomba muingi kumi di mimvila mi basi Isaeli babika kubue buongimina Yave. Nkazi’andi mvandi wuvonda mimbikudi miwombu mi Nzambi. (1 Minti. 18:4) Bukiedika, tuisi ko divuda ti Obadia waba sadilanga Yave mu thangu ziphasi.
10. Buidi Obadia kamonisina kibakala?
10 Buidi Obadia kamonisina kibakala? Bo Isabeli katona kuvonda mimbikudi mi Yave, Obadia wusueka 100 di mimbikudi. Nandi “wuba kutikisa mu mangumba ma 50 ayi waba kuba vananga mapha ayi nlagu.” (1 Minti. 18:13, 14) Boti Isabeli wubakula mambu Obadia kavanga, khanu wumvonda. Ayi tuidi lufiatu ti Obadia kabasa tomba ko kufua. Vayi luzolo Obadia kaba mu Yave ayi mu dikabu di Nzambi, luluta ba lungolo kena boma kaba. Diawu katudila luzingu luandi va kingela.
Kheti bakandimina kisalu kitu vayi khomba mueka widi mu kumonisa kibakala mu kukabula bilongulu kuidi zikhomba (Tala lutangu 11)c
11. Buidi bisadi biwombo bi Yave bammonisina kibakala dedi Obadia? (Tala mvandi foto.)
11 Bubu, bisadi biwombo bi Yave, banzingilanga mu zitsi bakandimina kisalu kitu. Dedi Obadia, kheti zikhomba aziozio bankinzikanga zimfumu zi luyalu, vayi bawu babikanga ko kusadila Yave bo ba kuba kandimina. (Matai 22:21) Bawu bammonisanga ti bamvuminanga Nzambi mu kuntumukina theti kubika kuandi batu. (Mava. 5:29) Bawu bantombanga ziphila zinkaka zi kukutakana ayi zi kusamunina. (Matai 10:16, 28) Mvandi, bamvanganga mamoso muingi zikhomba zioso batatamana kubaka bidia bi kiphevi. Tala kifuani ki yaya Henri wuzingila ku África bo bakandimina kisalu kitu mu mua mimvu. Mu thangu beni, yaya Henri wukivana muingi kukabula bilongulu kuidi zikhomba. Nandi wutuba: “Minu yimmonanga beni boma. Diawu yidi lufiatu ti yinungina mu kibila ki lukinzu yidi mu Yave ayi mu kibakala kaphana.” Buidi wummueka, mvaku wulenda monisa kibakala dedi yaya Henri? Ngete. Ngie kuvumina Nzambi.
BA WUKUIKAMA DEDI NKULUTU WU ZINGANGA NZAMBI YOYADA
12. Buidi nkulutu zinganga Nzambi Yoyada ayi nkazi’andi bamonisina lukuikumunu mu Yave?
12 Nkulutu zinganga Nzambi Yoyada waba vuminanga Yave, ayi mawu mansadisa kuba wukuikama muingi kutuadisa mbuongimini yi kiedika. Ayi nandi wumonisa mawu bo muana Isabeli Atalia mu khambu nsua, wutona kuyala ku Yuda. Batu baba bibila biwombo muingi kuba boma bu Atalia. Kibila nandi wuba mavanga mambi ayi waba tomba kuvonda batekulu bandi boso baba nsua wu kuyala. (2 Lusa. 22:10, 11) Ayi wumueka mu batekulu beni wuba Yoasi. Nandi wuvuka mu kibila ki nkazi Yoyada baba tedilanga Yoseba. Nandi ayi nnuni’andi basueka muana beni ayi bankieba. Mu phila ayoyo, Yoyada ayi Yoseba basadisa muingi nkunu wu Davidi wuba nsua wu kuyala wutatamana. Yoyada wuba wukuikama mu Yave ayi kasa ba ko boma bu Atalia.—Zinga. 29:25.
13. Bo Yoasi kaba sambuandi di mimvu, buidi Yoyada kabue monisa lukuikumunu?
13 Bo Yoasi kaba sambuandi di mimvu, Yoyada wubue monisa lukuikumunu luandi kuidi Yave. Nandi wuyindula phila yi kuvanga Yoasi wuba nsua wu kuyala katona kuyala. Vayi boti babakula makani beni khanu bamvonda. Mu lusakumunu lu Nzambi nandi wununga. Yoyada wutambula lusalusu lu basi Levita ayi zimfumu. Mu phila ayoyo, Yoasi wuyiza ba ntinu ayi bavonda Atalia. (2 Lusa. 23:1-5, 11, 12, 15; 24:1) Bosi, Yoyada wuvanga “luwawanu na Yave, na ntinu ayi dikabu muingi batatamana kuba dikabu di Yave.” (2 Minti. 11:17) Yoyada mvandi wutula “minkengididi muingi kukieba mielu mi nzo yi Yave, muingi ni mutu wukhambulu ba wudiodila kabika kukota.”—2 Lusa. 23:19.
14. Mu phila mbi Yoyada banzitisila mu kuzitisa Nzambi?
14 Yave wutuba: “Baboso ba kutsitisanga mvandi yela kuba zitisa.” Ayi Yave wusakumuna Yoyada. (1 Samu. 2:30) Dedi, nandi wutula mu Kibibila kifuani ki nkulutu zinganga Nzambi Yoyada muingi tubakila ndandu. (Loma 15:4) Ayi bo Yoyada kafua, Yave wumvana nzitusu mu kumvana luaku lu “kunzikila va kibuangu baba zikilanga mintinu. Kibila nandi wuvanga mamboti ku Isaeli mu kukinzika Nzambi yikiedika ayi nzo’andi.”—2 Lusa. 24:15, 16.
Dedi nkulutu zinganga Nzambi Yoyada, tufueti vumina Nzambi muingi tununga kusadisa zikhomba zitu mu lukuikumunu (Tala lutangu 15)d
15. Mbi tulenda longuka mu kinongo kitedi Yoyada? (Tala mvandi foto.)
15 Kinongo ki Yoyada kilenda tusadisa kuvumina Nzambi. Bakulutu ba kimvuka balenda landakana kifuani kiandi mu kutatamana bakotuka mu kiphevi ayi kukieba buboti mamemi ma Nzambi. (Mava. 20:28) Zikhomba zima nuna, balenda longuka ti ba kuvumina Yave ayi kutatamana bakuikama, nandi kalenda kuba sadila muingi kudukisa luzolo luandi. Ayi Yave kalendi kuba zimbakana ko. Matoko balenda longuka mu phila Yave kakiebila Yoasi ayi kulandudila kifuani ki Yave mu bakulutu badi bakuikama, mu kuba kinzika ayi kuba vua nkinza. Bulutidi bo bavanga mawombo mu kisalu ki Yave. (Zinga. 16:31) Mvandi, kifuani ki zimfumu ayi basi Levi babuela mioko Yoyada ki tulonga matedi nkinza wu kubuela mioko mu lukuikumunu “baboso bantuama ntuala mu kuba tumukina.”—Ebe. 13:17.
BIKA KUBA DEDI NTINU YOASI
16. Mbi bimmonisa ti ntinu Yoasi wuba mavanga mambi?
16 Ntinu Yoasi wubaka beni ndandu mu kuba va kimueka na Yoyada. Nkulutu zinganga Nzambi Yoyada wusadisa ntinu Yoasi kuba mutu wumboti. (2 Minti. 12:2). Diawu, Yoasi kaba tomba kukuangidika Yave kheti wuba ditoko. Vayi bo Yoyada kafua, Yoasi wutona kukuwa malongi mambi ma makundi bandi. Mambu mbi mayiza monika? Nandi ayi baboso baba ku tsi luyalu luandi “batona kubuongimina zinzambi zi luvunu.” (2 Lusa. 24:4, 17, 18) Kheti Yave wuba beni mu kiunda mu kibila ki mambu amomo, vayi nandi “wutatamana kuba fila mimbikudi muingi kuba sadisa. . . , vayi bawu bamanga kukuwa.” Ntinu kasa kuwa ko Zakalia wuba muana Yoyada, wuba mvandi mbikudi ayi musi dikanda diandi. Kiadi ayi kiunda, kibila ntinu Yoasi wuvonda Zakalia. Ayi mawu mamonisa ti nandi kasa vutula ko matondo mu mambu moso dikanda di Yoyada bamvangila.—2 Lusa. 22:11; 24:19-22.
17. Buidi mambu mayiza balukila mu luzingu lu Yoasi?
17 Yoasi kasa tatamana ko kuvumina Yave ayi mawu mantuadisa ziphasi. Yave wutuba: “Yala lenza baboso ba kundenzanga.” (1 Samu. 2:30) Mu mvita, kheti Yoasi wuba “dingumba dinneni” di masodi, vayi dingumba dilueli di basi Asilia bannunga ayi “bavanga phasi Yoasi.” Bo bavutuka ku nzo, bisadi bi Yoasi bamvonda kibila wuvonda Zakalia. Mu kibila ki mavanga mandi mambi, “basa nzikila ko va kibuangu baba zikilanga mintinu.”—2 Lusa. 24:23-25; tala “muana wu Balakia” mu Kibibila ki kulongukila mu Matai 23:35.
18. Dedi bummonisina Yelemia 17:7, 8, mbi tulenda vanga muingi tubika landakana kifuani ki Yoasi?
18 Mbi tulenda longuka mu kifuani ki Yoasi? Tulenda dedikisa Yoasi na nti wuluelu wukhambu ba zinganzi zikinda, wabe tombulu lusalusu lu nti wunkaka muingi kukonzuka. Bo mutu waba kumvananga malongi kafua, Yoasi wutona kukuwa malongi mambi, diawu kasa tatamana ko wukuikama mu Yave. Kifuani akiokio kitulonga ti tulendi tumukina ko to Yave kibila basi dikanda ditu voti zikhomba mu kimvuka bamvananga kifuani matedi mawu. Kibila muingi tutatamana bafikama kuidi Yave, tufueti kindisa luzolo luitu ayi lukinzu luitu mu Yave mu kuvanganga ndogukulu’itu, kutatamana kuvanga mambu tuidi mu kulonguka ayi kuvanganga nsambu.—Tanga Yelemia 17:7, 8; Kolo. 2:6, 7.
19. Mbi Yave Nzambi ka tudinda?
19 Yave kalendi ku tudinda ko tuvanga mambu mo tulendi nunga ko. Nandi wuntomba tuvanga mambu madi mu Mpovi 12:13, yintuba: “Vumina Nzambi yikiedika ayi tumukina zithumu ziandi. Kibila mawu batu boso bafueti vanga.” Dedi Obadia ayi Yoyada, befu kuvumina Nzambi, tuala ba bakuikama mu moso kuandi mambu malenda ku tumonikina ayi vasi ko kiuma kilenda tulula kikundi kitu na Yave.
NKUNGA 3 Mangolo Mitu, Kivuvu Kitu ayi Lufiatu Luitu
a Mu Kibibila, kikuma “kuvumina” kidi zitsundu ziwombo. Kiawu kilenda sundula boma, lukinzu voti boma bu kunhongisa Nzambi. Mu dilongi adidi tunkuiza mona ti befu kuvumina Nzambi, tunkuiza monisa kibakala ayi lukuikumunu mu kisalu ki Yave.
b Obadia tuidi mu kutubila, kasi ko mbikudi Obadia wuzinga mu mimvu kuntuala. No wusonika buku yinnata dizina diandi.
c MAMBU MADI MU ZIFOTO: Khomba mueka widi mu kukabula bilongulu kheti bakandimina kisalu kitu.
d MAMBU MADI MU ZIFOTO: Khomba mueka yinkietu widi ditoko widi mu kulonguka kuidi khomba manuna buidi bu kuvanina kimbangi mu telefoni. Khomba mueka manuna widi mu kumonisa kibakala mu kuvana kimbangi ki baboso. Khomba mueka widi wupisuka widi mu kuvana khubumunu kuidi zikhomba zinkaka matedi buidi bu kukiebila nzo yi Kintinu.