1 Tesalonicenses

4 Bey túunoʼ, sukuʼuneʼex, jeʼex t-aʼalilteʼex unaj a kuxtaleʼex utiaʼal ka lúubkeʼex utsil tiʼ Dioseʼ (jeʼex táan a kuxtaleʼexoʼ), k-sen aʼalikteʼex yéetel k-kʼáatikteʼex tu yoʼolal Yuumtsil Jesús mantatsʼ ka seguernak a beetkeʼex beyoʼ. 2 Tumen teʼexeʼ a wojleʼex le baʼaxoʼob t-aʼalajteʼex tu kʼaabaʼ Yuumtsil Jesusoʼ.

3 Tumen Dioseʼ u kʼáat ka kiliʼichchajkeʼex yéetel ka a náachkuntabaʼex tiʼ le núupkʼebanoʼ.* 4 Cada juntúul tiʼ teʼexeʼ unaj u kanik u controlart u wíinklil ich kiliʼichil bey xan ich tsiikil, 5 yéetel maʼ unaj u píitmáan u tsʼíiboltik u núupchital jeʼex u beetik le j-táanxel luʼumiloʼob maʼ u kʼaj óoloʼob Diosoʼ. 6 Tiʼ baʼax yaan yil yéetel lelaʼ, mix máak unaj u beetik kʼaas tiʼ u sukuʼun mix u bin tu contra le derecho yaan tiʼ u sukuʼunoʼ, tumen Jéeobaeʼ ku castigartik le máaxoʼob beetik le baʼaloʼobaʼ, jeʼel bix tsʼoʼok k-aʼalikteʼex yéetel tsʼoʼok k-chúukaʼan jaajkúuntikteʼexoʼ. 7 Tumen Dioseʼ maʼ tu tʼanoʼoneʼex utiaʼal ka yanaktoʼon junpʼéel éekʼ kuxtaliʼ, baʼaxeʼ utiaʼal ka kiliʼichchajkoʼoneʼex. 8 Le oʼolaleʼ, le máax maʼ tu tsʼoʼokbesik le kaʼansajaʼ maʼ tiʼ wíinik ku beetik u j-maʼ uʼuyajtʼaaniliʼ, baʼaxeʼ tiʼ Dios, le máax tsʼáaikteʼex kiliʼich muukʼoʼ.

9 Baʼaleʼ tiʼ baʼax yaan yil yéetel le yaabilaj yaan ichil sukuʼuntsiloʼoboʼ, maʼ kʼaʼabéet k-tsʼíibtikteʼex mix baʼaliʼ, tumen teʼexeʼ Dios kaʼanskeʼex utiaʼal ka a paklan yaabiltabaʼex. 10 U jaajileʼ, teʼexeʼ táan a yaabiltikeʼex tuláakal le sukuʼunoʼob yanoʼob tiʼ tuláakal u luʼumil Macedoniaoʼ. Baʼaleʼ, sukuʼuneʼex, k-sen aʼalikteʼex ka maas yaʼabchajak a yaabilajeʼex. 11 Ilawil a kuxtaleʼex ich jeetsʼelil, a chʼíikileʼex tiʼ baʼaxoʼob ka beetkeʼex bey xan a meyajeʼex yéetel a kʼabeʼex jeʼex t-aʼalajteʼexoʼ; 12 beyoʼ le máaxoʼob minaʼanoʼob ichil le múuchʼuliloʼ yaan u yilkoʼob táan a kuxtaleʼex jeʼex unajeʼ yéetel maʼ tu bineltikteʼex mix baʼal.

13 Tsʼoʼoleʼ, sukuʼuneʼex, maʼ k-kʼáat ka pʼáatak maʼ a wojéeltikeʼex le baʼaxoʼob yaan yil yéetel le máaxoʼob kimenoʼoboʼ,* utiaʼal maʼ u sen yaatal a wóoleʼex jeʼex u yúuchul yéetel le máaxoʼob minaʼan esperanza tiʼoboʼ. 14 Toʼoneʼ k-creertik kíim Jesús yéetel kaʼa kuxkíintaʼabi, le oʼolal k-creertik xaneʼ le máaxoʼob tsʼoʼok u kíimloʼob ikil u tsaypachtikoʼob Jesusoʼ yaan xan u kaʼa kuxkíintaʼaloʼob tumen Dios utiaʼal ka yanakoʼob yéetel Jesús. 15 Tumen tu kʼaabaʼ Jéeoba k-aʼalikteʼex lelaʼ: toʼon máaxoʼon kuxaʼanoʼon tak tu kʼiinil way yaan* Yuumtsileʼ, junpuliʼ maʼ táan k-máan táanil tiʼ le máaxoʼob tsʼoʼok u kíimloʼoboʼ, 16 tumen Yuumtsileʼ yaan u yéemel desde teʼ kaʼan táan u tʼaan yéetel autoridad jeʼex u tʼaan juntúul arcangeleʼ, yéetel táan u yuʼubaʼal u juum u trompeta Dios; teʼ súutuk túun jeʼeloʼ, le u disipuloʼob Cristo kimenoʼoboʼ letiʼob kun yáax líikʼloʼob. 17 Ku tsʼoʼokoleʼ, toʼon máaxoʼon púutsʼoʼon tiʼ le kíimiloʼ yaan k-téek bisaʼal junmúuchʼ tu yéeteloʼob ichil le múuyaloʼob utiaʼal ka k-ilba yéetel Yuumtsil teʼ iikʼoʼ; bey túunoʼ mantatsʼ ken k-antal tu yiknal Yuumtsil. 18 Le oʼolaleʼ, seguernak a paklan líiʼsik a wóoleʼex yéetel le tʼaanoʼobaʼ.