Gápanu xpuéltunu
Stale binni maʼ nanna ximodo iquiiñeʼ xpueltu purtiʼ zinándacaʼ ca conseju zeeda lu Biblia.
GUDIXHE CHAAHUIʼ XI GÚNILUʼ
CONSEJU ZEEDA LU BIBLIA: «Binni runi dxiiñaʼ la? zareendú ca ni quixhe ique guni. Peru guiráʼ ca ni racaluguʼ zácacaʼ pobre» (Proverbios 21:5).
XI RINÍʼ NI. Para ganda guixiéʼ ca gastu stinu, nabé risaca quíxhenu pabiáʼ chigúninu gastu ne gúninu stipa chinándanu ni. Naquiiñeʼ guietenaláʼdxinu, qué zanda diʼ sinu guiráʼ ni chuuláʼdxinu. Nga runi, ante sinu xiixa guiníʼ ique chaahuinu pagala chigúninu gastu.
XI ZANDA GÚNINU
Cadi tídinu de biaʼ gudíxhenu gúninu gastu. Zanda gúninu ti lista ne gucaʼnu ca cosa ni caquiiñeʼ sinu ne quixhe chaahuinu pagala iquiiñenu lúcani, casi pagala iquiiñenu para sinu guendaró, sinu xhábanu o xcaadxi cosa. Pa caquiiñenu jma de biaʼ gudixhe íquenu gúninu gastu la? zanda guicaanu bueltu ni maʼ guleechunu para sti cosa. Quíxhenu ti ejemplu, pa guizáʼ bíninu gastu lu gasolina la? zanda guicaanu bueltu ni niquiiñenu para sti cosa ni huaxiéʼ caquiiñenu, casi chidóʼxhinu xiixa lugar.
Gúninu stipa cadi guzáʼbinu bueltu.Pa cadi caquiiñeʼ peʼ la? gúninu stipa cadi guzáʼbinu bueltu. Jma galán guni ahorrarnu de ante pa caníʼ íquenu sinu xiixa. Pa riquiiñenu tarjeta de créditu la? gúninu stipa quíxenu ni cada beeu ne zacá cadi quíxenu interés. Ne pa maʼ nuzáʼbinu la? gúninu stipa cueechunu ti ndaa bueltu para ganda quíxenu ra nuzáʼbinu.
Ti estudiu ni guca bizeeteʼ jma runi gastu binni ora riguixe né tarjeta de créditu. Nga runi, gápanu cuidadu ora iquiiñenu ni.
GÁPANU CUALIDAD GALÁN
CONSEJU ZEEDA LU BIBLIA: «Ti binni nachaabaʼ qué zucaa surcu tiempu nanda, ne ora guiasa cosecha zanabaʼ gudiicabe laa xiixa, peru qué zadxela gastiʼ» (Proverbios 20:4).
XI RINÍʼ NI. Ti binni nachaabaʼ riaana lu gubidxa. Nga runi gácanu binni runi dxiiñaʼ ne guindisaʼ chaahuinu bueltu stinu para iquiiñenu despué.
XI ZANDA GÚNINU
Gácanu binni runi dxiiñaʼ. Zusisaca patrón stinu laanu pa nácanu binni runi dxiiñaʼ ne responsable ne zacaneni laanu para cadi gunítinu dxiiñaʼ stinu.
Gácanu honradu. Pa cuánanu ra dxiiñaʼ, zaládxicabe laanu ne zaca nagana para laanu guidxélanu sti dxiiñaʼ.
Cadi gachelunu gápanu stale bueltu. Pa guicá íquenu gápanu stale bueltu zanda guni huarani laanu ne zanda guxhéleni laanu de binni. Cadi guiaandaʼ laanu: nuu xcaadxi cosa jma risaca qué gapa binni bueltu.
XCAADXI CONSEJU ZEEDA LU BIBLIA
Biindaʼ Biblia lu sitiu jw.org. Nuu ni lu stale idioma.
CADI GUNÍTINU TIEMPU NE BUELTU STINU LUGUIÁʼ VICIU
«Ti binnigüeʼ ne ti binni nalá zácacaʼ binni pobre ne tuuxa nisi daʼ bacaandaʼ lu zacu lari yuxhe» (PROVERBIOS 23:21).
CADI TAN CHUʼNU XIZAA PUR BUELTU
«Nga runi cayabe laatu cadi cuʼ xa ique tu ximodo ibani tu, xi go to o xi gue tu, nin cuʼ xa ique tu xi cuaqui tu» (MATEO 6:25).
CADI GÁPANU ENVIDIA
«Ti hombre envidioso cuyubi lele gaca ricu ne qué ganna pa zaca pobre» (PROVERBIOS 28:22).