11 Ndaa

Gucaananu relijión ni cadi dxandíʼ

Satanás ne ca demonio stiʼ la? qué nádicaʼ gúninu ni na Dios. Ruyúbicabe ximodo guxhálecabe binni de Dios. Ximodo yaʼ. Relijión ni cadi dxandíʼ nga tobi de cani riquiiñecabe (2 Corintios 11:13-15). Ti relijión cadi dxandíʼ ni pa cadi cusiidini ni dxandíʼ ni na Biblia. Relijión ni cadi dxandíʼ la? zeeda gaca casi bueltu ni cadi dxandíʼ zanda guluíʼ dxandíʼ ni ne cadi guisaca ni gastiʼ, ne zutiidiʼ ni laanu lu stale guendanagana.

Jiobá, Dios de ni dxandíʼ qué riuláʼdxidibe guendarusiguii stiʼ ca relijión ca. Dxi Jesús guyuu lu Guidxilayú la? ca xaíque stiʼ ca relijión de dxiqué gucaláʼdxicaʼ ñuuticaʼ laabe. Guníʼ íquecabe de que modo runi adorárcabe que nga jneza. Sicaríʼ guníʼcabe: «Dios nga Bixhoze du». Jneza bicábicabe na Jesús la? Coʼ. Laabe bicábibe laacaʼ: «Binidxabaʼ nga bixhoze tu» (Juan 8:41, 44). Ca dxi riʼ la? stale binni na cayuni adorar Dios, peru ni dxandíʼ nga la? cayúnicabe ni na Satanás ne ca demonio stiʼ (1 Corintios 10:20).

Cásica ti yaga nayuudxuʼ rudii cuananaxhi ni qué zaquiiñeʼ, zacá nga relijión ni cadi dxandíʼ ca laaca rudii binni runi ni malu. Lu Guidxilayú riʼ nuu stale guendanagana pur guiráʼ guendamalu ni runi binni. Nuu guendarapa xnadxii, guendaridinde, guendaribaʼnaʼ, guendaruquichináʼ, guendaruuti ne guendarilaxoo. Stale de ca binni runi ca ndiʼ la? nápacaʼ relijión sticaʼ, peru relijión riʼ qué rucaa diʼ ni laacabe gúnicabe ni nachaʼhuiʼ. Qué zanda diʼ gácacabe xhamigu Dios pa qué gusaanacabe de gúnicabe ni malu (Mateo 7:17, 18).

Relijión ni cadi dxandíʼ rusiidiʼ binni guiniʼné bidóʼ. Dios cayabi laanu cadi naquiiñeʼ guinínenu ca bidóʼ ca, ne jnezapeʼ nga modo nabe. Ñulaʼdxuʼ ñuu tuuxa qué lica niniʼné lii peru ne foto stiluʼ niniʼné la? Ñanda ñácabe xhamíguluʼ la? Coʼ xa, qué ñanda diʼ. Jiobá racaláʼdxibe guiniʼné binni laabe cadi né bidóʼ ni cadi nabani (Éxodo 20:4, 5).

Relijión ni cadi dxandíʼ rusiidiʼ de que zanda guuti binni lu guendaridinde stiʼ ca guidxi ca. Jesús guníʼ de que ca xhamigu Dios zanaxhiisaacaʼ. Qué ruutinu binni ni nadxiinu (Juan 13:35). Laaca cadi jneza nga guutinu binni malu. Ora ca xhenemigu Jesús guyecaʼ para guinaazecaʼ laabe qué ninádibe nidinde cani zinanda laabe para gulacaʼ laabe (Mateo 26:51, 52).

Relijión ni cadi dxandíʼ rusiidiʼ de que binni malu zacaná ndaaniʼ infiernu. Peru, Biblia rusiidiʼ de que donda ca nga riné laanu lu guendaguti (Romanos 6:23). Jiobá nga ti Dios de guendarannaxhii. Ñe zuniná ti Dios de guendarannaxhii binni para siempre la? Coʼ njaʼ. Ndaaniʼ paraisu ca ziuu ti relijión si, relijión ni Jiobá riulaʼdxiʼ (Apocalipsis 15:4). Ca xcaadxi relijión ni rusiidiʼ de ca guendarusiguii ni zeeda de Satanás la? para dxi ca maʼ binitilucaʼ.