12 Ndaa

Xi rácanu ora rátinu

Guendaguti ca maʼ gadxépeni que guendanabani. Zeeda gácani casi ora ti binni guizáʼ nisiaasiʼ (Juan 11:11-14). Ca gueʼtuʼ ca qué randa runadiágacaʼ nin gúʼyacaʼ nin guiníʼ íquecaʼ gastiʼ (Eclesiastés 9:5, 10). Relijión ni cadi dxandíʼ na de que ca gueʼtuʼ ca riécabe ra nuu ca espíritu stiʼ ca binnilídxicabe de dxiqué ni maʼ guti, para guibaninécabe laacaʼ. Peru cadi nga diʼ nga ni rusiidiʼ Biblia.

Ca binni ni maʼ guti ca qué zanda diʼ gacanécabe laanu nin guninácabe laanu. Stale binni maʼ biaa guni saa ne cuaʼqui dxinña lu bidóʼ purtiʼ nácabe zacá nga riulaʼdxiʼ ca gueʼtuʼ ca. Peru, Dios qué riulaʼdxiʼ diʼ cani maʼ biaa ca binni ca guni purtiʼ zeeda ni lu tobi de ca guendarusiguii stiʼ Satanás. Cani maʼ guti ca laaca qué zanda diʼ chuláʼdxicabe ni purtiʼ cadi nabanidíʼcabe. Cadi naquiiñeʼ diʼ guidxíbinu nin guni adorarnu ca gueʼtuʼ ca. Dios si nga naquiiñeʼ guni adorarnu (Mateo 4:10).

Ca gueʼtuʼ ca zabigueta guibánicaʼ. Mayaca, Jiobá zucuaanibe ca gueʼtuʼ ca para guibánicaʼ ndaaniʼ ti paraisu lu Guidxilayú riʼ (Juan 5:28, 29; Hechos 24:15). Dios zanda gucuaaniʼ ca binni ni maʼ guti ca cásica laanu zanda gucuaaninu tuuxa nisiaasiʼ (Marcos 5:22, 23, 41, 42).

Satanás la? huacaabe stale binni guni cré guendarusiguii de que laanu qué rátinu. Satanás ne ca demonio stiʼ rucaacabe binni guiníʼ ique de que ca espíritu stiʼ ca gueʼtuʼ ca nabánicaʼ, runi huaracaʼ binni ne rutiidicabe binni lu stale guendanagana. Satanás riguite binni, nuu tiru ne bacaandaʼ o pacaa ne bisión. Nga runi, Jiobá zunitilú cani racalaʼdxiʼ guiniʼné ca gueʼtuʼ ca (Deuteronomio 18:10-12).