Capítulo 2
Bisisaca Jiobá, tobi lucha Dios ni dxandíʼ
1. Tuu nga tobi lucha Dios ni dxandíʼ.
BIBLIA na «nuu stale ni napa cabe de dios [...,] peru para laanu la? tobi lucha si Dios nuu» (1 Corintios 8:5, 6). «Tobi lucha si Dios» ca nga Jiobá, ni bizáʼ guiráʼ xixé ni nuu (Deuteronomio 6:4; Apocalipsis 4:11). Sicaríʼ guníʼ Jesús de laabe: «Dios stinne ne Dios stitu» (Juan 20:17). Ne Moisés maca guníʼ zacá: «Jiobá nga Dios ni dxandíʼ; gástiruʼ stobi casi laabe» (Deuteronomio 4:35). Jiobá nga ni jma dxiʼbaʼ que intiica ni runi adorar binni, casi ti bidóʼ o ti binni ni runi laa dios o xhenemígube Binidxabaʼ, ni naca dios stiʼ guidxilayú riʼ (2 Corintios 4:3, 4, NM). Peru Jiobá maʼ gadxé laa que laacabe purtiʼ Jesús guníʼ laabe nga «tobi lucha Dios ni dxandíʼ» (Juan 17:3).
2. Ora maʼ cazíʼdinu de Dios, xi zucaani laanu gúninu.
2 Ora riziidiʼ binni de ca guenda stiʼ Dios ne de ni maʼ huayúnibe ne de ni chigúnibe para laanu la? rucaa ndiʼ laacabe guidxíñacabe laabe. Ora jma gannaxhiiluʼ Jiobá, zuniibini ladxidoʼloʼ para gusisácaluʼ laabe. Ximodo yaʼ. Tobi de cani zanda gúniluʼ nga guiníʼneluʼ binni de laabe. Romanos 10:10 na: «Ra iníʼ cabe ni nezalú binni la? zalá cabe». Stobi nga guininu ne gúninu cani riuuláʼdxibe. Efesios 5:1 na: «Ma xiiñi Dios laatu ne nadxii laatu. Yanna laucaalaʼdxi gaca tu casi laa». Para ganda gúninu ni na ca diidxaʼ ca dede biaʼ gándatiʼ la? caquiiñeʼ ganna chaahuinu ximodo nga Jiobá.
3. Gunáʼ nga ca guenda ni jma rihuinni stiʼ Dios.
3 Lu guidubi naca Biblia ridxélanu stale diidxaʼ ni cayabi laanu gunáʼ nga ca guenda ni jma rihuinni stiʼ Dios. Guidapaʼ guenda ni jma rihuinni stibe nga: guendabiaaniʼ, guendaruni jneza, poder ne guendarannaxhii. «Laabe nápabe guendabiaaniʼ.» (Job 12:13.) «Guiráʼ neza stibe jneza cani.» (Deuteronomio 32:4.) «Nápabe stale poder» (Isaías 40:26.) «Dios nga guendarannaxhii.» (1 Juan 4:8, NM.) Yanna, de guidapaʼ guenda riʼ, gunáʼ nga ni jma rihuinni, ne ni jma racané lii gunibiaʼluʼ ximodo nga Dios.
«Dios nga guendarannaxhii»
4. Xi guenda ndiʼ bicaa Jiobá guzáʼ guidubi naca guibáʼ ne Guidxilayú ne guiráʼ ni nabani.
4 Guníʼ ique xi bicaa Jiobá guzáʼ guidubi naca guibáʼ, Guidxilayú, ca ángel ne binni. Ñee bizaʼbe cani purtiʼ si nápabe guendabiaaniʼ o purtiʼ si nápabe poder la? Coʼ. Neca biquiiñebe ca guenda riʼ la? cadi laadícani nga biniibi ladxidoʼbe para bizaʼbe ca nga. Ne cadi caquiiñeʼ diʼ guzaʼbe guiráʼ ni nabani para guihuinni rúnibe ni jneza. Ni bicaa Jiobá guzáʼ ca ángel ne binni para guibánicaʼ nayecheʼ nga purtiʼ nadxiibe laacaʼ, ne ngaca bicaa laabe quixhe íquebe gudiibe ca binni ni guzuubaʼ stiidxabe ti guendanabani ni qué zaluxe ndaaniʼ ti paraísu (Génesis 1:28; 2:15). Laaca pur nadxiibe binni nga gudixhe íquebe cueebe donda ni bisaanané Adán guiracaʼ.
5. Casi na Biblia, xi guenda nga naca Jiobá, ne xiñee.
5 Guendarannaxhii ca nga ni jma rihuinni lade guiráʼ ca guenda ni napa Dios ni bizáʼ laanu. Laapebe nga guendarannaxhii. Jiobá runi ni jneza, napa guendabiaaniʼ ne napa poder, ne nécaxa risácacani la? cadi na diʼ Biblia nácabe tobi de laacani, sínuque nani laapebe nga nácabe guendarannaxhii. Jneza modo rusihuinni Jiobá nadxii binni ne rúnibe ni modo na ca ley stibe. Nga runi, guirútiruʼ nadxii casi nadxiibe purtiʼ nabé rizaaláʼdxibe laanu ne rihuínnini lu cani rúnibe.
6. Xiñee zanda gácanu casi Dios neca jma dxíʼbabe laanu.
6 Guenda sicarú napa Dios riʼ nga rucaa laanu gácanu casi laabe. Zándaca guiníʼ íquenu qué zanda chuʼ dxi gácanu casi laabe purtiʼ binni ruchee laanu. Peru laabe nánnabe xi zanda gúninu ne nánnabe binni ruchee laanu, zacá laaca rusihuinni Jiobá nadxii laanu (Salmo 51:5). Nga runi Salmo 130:3, 4 na: «Pa ra cuchee si binni nga nundaachiluʼ la? Jiobá, tuu nga nuzuhuaa nezaluluʼ yaʼ. Purtiʼ lii dxandíʼ rutiidiláʼdxiluʼ donda». Dxandíʼ, Jiobá nga «ti Dios ni rilaselaʼdxiʼ ne nachaʼhuiʼ, rindaa para guidxiichi ne napa stálepeʼ guendarannaxhii ni qué rusaana» (Éxodo 34:6). «Lii, Jiobá, nacháʼhuiluʼ ne nuuluʼ listu para gutiidiláʼdxiluʼ donda.» (Salmo 86:5.) ¡Nabé riguixhedxí nga ladxidoʼno! ¡Guizáʼ riéchenu gúninu ni na Dios ne guidúʼyanu pabiáʼ nadxiibe ne rilaseláʼdxibe laanu!
7. Ximodo rihuinni nadxii Jiobá laanu lu guiráʼ cani bizáʼ.
7 Lu guiráʼ cani bizáʼ Jiobá laaca rihuinni nadxiibe laanu. Guiníʼ íquenu ca cosa galán ni maʼ bidiibe laanu ti chuʼnu nayecheʼ, casi ca dani sicarú, ca guiʼxhiʼ roʼ, ca laguna ne nisadóʼ ca. Laaca cudiibe laanu stale ni guidoʼno nanixe ne ni gudii stipa laanu, guiráʼ clase guieʼ sicarú ni rindáʼ naxhi ne guiráʼ clase maniʼ. Bizaʼbe ni gusiecheʼ binni guidxilayú, neca cadi naquiiñeʼ ñúnibe ni. Dxandíʼ, cumu nabáninu ndaaniʼ ti guidxilayú qué iquiiñeʼ ne rizaacanu stale cosa pur donda stinu la? qué zanda diʼ gápanu o guidúʼyanu guiráʼ xixé ni bizaʼbe (Romanos 8:22). Peru guiníʼ íquenu xi zuni Jiobá para laanu ora maʼ nuunu ndaaniʼ Paraísu stibe. Ni bicaa salmo riʼ na: «Cuxháleluʼ naluʼ ne cudiiluʼ guiráʼ ni racalaʼdxiʼ cani nabani» (Salmo 145:16).
8. Paraa ndiʼ jma bihuinni nadxii Jiobá laanu.
8 Paraa ndiʼ jma bihuinni nadxii Jiobá binni guidxilayú yaʼ. Biblia na: «Nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Ñee purtiʼ nachaʼhuiʼ binni nga bíʼnibe ni la? Romanos 5:8 cacabi laanu: «Dios huaxa rusihuinni pabiáʼ nadxii laanu purti neca cuchéʼ né nu laa chiqué, biseenda Cristu guti pur laanu». Dios biseendaʼ Xiiñiʼ lu Guidxilayú riʼ ti gudii guendanabani sin donda stiʼ para guxhá stóndanu ne guilanu de guendaguti (Mateo 20:28). Zacá la? zanda gapa guiráʼ binni ni nadxii Dios ti guendanabani ni qué ziuu dxi guiluxe. Nabé riéchenu nga gánnanu nadxii Dios guiráʼ binni ni racalaʼdxiʼ guni ni nabe, purtiʼ Biblia na: «Risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hechos 10:34, 35).
9. Jiobá bidii Xiiñiʼ para gulá laanu, nga runi xi naquiiñeʼ gucaa ndiʼ laanu gúninu yaʼ.
9 Jiobá bidii Xiiñiʼ para gulá laanu ne pur nga zanda guibáninu sin qué chuʼ dxi gátinu. Nga runi, xi naquiiñeʼ gucaa ndiʼ laanu gúninu yaʼ. Naquiiñeʼ gucaani laanu jma gannaxhiinu Jiobá, Dios ni dxandíʼ, ne laaca naquiiñeʼ chuláʼdxinu gucaadiáganu Jesús, ni biseendabe. «Cristu guti pur irá nu ti biaʼ dxi ibani nu ma cadi ibani nu para laanu sínuque para laabe.» (2 Corintios 5:15.) Cumu Cristu gunnaxhiibe ne biabe binni cásica Jiobá la? nga runi galán gúninu cásipeʼ bíʼnibe. Ne bisihuínnibe zacá laabe ora gúdxibe ca binni nachaʼhuiʼ que sicaríʼ: «Latáʼ ra nuaa irá ni ma bidxaga de cuyubi modo guía ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni, cadi nanaa ni casi ni nua tu ca. Laudii lugar usiide laatu purti qué zaca nia laatu naduxhuʼ ne qué zadinde nia laatu» (Mateo 11:28-30).
Gusihuínninu nadxiinu binni
10. Ximodo zanda gusihuínninu nadxiinu ca bíʼchinu ne bizáʼnanu ni zinanda Cristu.
10 Ximodo zanda gusihuínninu nadxiinu ca bíʼchinu ne ca bizáʼnanu ni zinanda Cristu cásica nadxii Jiobá ne Jesús laanu yaʼ. Guidúʼyanu ximodo zanda gúninu ni: «Pa nadxii lu stobi la? qué zadxiichi né gá lu laa, ne ziá lu laa. Pa nadxii lu stobi la? qué zuyubu tidu lú, ne qué zuchá lu enda naróʼ stiuʼ lú, ne qué zuʼnu lii nandxóʼ, ne qué zaníuʼ xiixa diidxa para guniná lu laa, qué zuyubu para lii siouʼ. Cadi neca gasti si guni lii maca cadxiichi neu laa, ne qué ziuu neu laa xiana. Pa nadxii lu stobi la? qué zieche lu ora uchee, sínuque ora guni jneza. Ne pa nadxii lu laabe la? zuni huantar lu laabe ne zuni cre lu laabe. Intiica gueeda, nuu neu laabe tobi si ne qué zaree lu gana [...,] [ne] qué ziuu dxi initilú enda ranaxhii» (1 Corintios 13:4-8; 1 Juan 3:14-18; 4:7-12).
11. Turuʼ naquiiñeʼ gannaxhiinu, ne ximodo zanda gúninu ni.
11 Turuʼ naquiiñeʼ gannaxhiinu, ne ximodo zanda gúninu ni. Ndiʼ nga ni biʼniʼ mandar Jesús gaca: «Laché irá xixé guidxi, lachiusiidi irá xixé binni sa nanda naa, ne lacuu nisa laaca [...]. Lausiidi laaca guni ca irá ni ma gudxe laatu» (Mateo 28:19, 20). Ndiʼ rusihuinni naquiiñeʼ gábinu cani cadi naca xpinni Cristu maʼ cadi candaa chiguni Dios guidxilayú riʼ ti paraísu. Jesús na cadi ca xpínnisibe nga gannaxhiinu, nabe: «Pa ganaxhii tu cani nadxii si laatu la? ñee na tu zacaa tu xiixa de Dios pur nga la? Cadi xa laca nga ca runi cani ruquixe impuestu, ne napa tu laca de malu. Ne pa gulabi tu cani ridxaaga si laatu la? xi caguu tu lú ni yaʼ. Cadi xa laca nga ca runi cani qué runibiáʼ Dios» (Mateo 5:46, 47; 24:14; Gálatas 6:10).
Rizanu lu lá Jiobá ora gúninu ni nabe
12. Xiñee Dios si nga naquiiñeʼ guiree lá Jiobá.
12 Sti modo naquiiñeʼ gusisácanu Dios ni dxandíʼ ca nga gánnanu Jiobá nga labe, guininu ni ne gusíʼdinu xcaadxi binni nga nga labe. Sicaríʼ guníʼ ni bicaa salmo riʼ ni racalaʼdxiʼ: «Ti ganna binni, lii, ni laluʼ Jiobá ca, lii si nga Ni Nuu Jma Luguiáʼ lu guidubi naca guidxilayú» (Salmo 83:18). Ni riníʼ lá Jiobá nga «Laabe nga ni Runi ni Gueeda Gaca». Laabe nga Dios ni Jma Nandxóʼ ni riguixhe xi guni ne runi cani. Laasibe nga nápabe derechu guiree labe zacá, purtiʼ binni guidxilayú nin qué ganna pa zanda guni ni racalaʼdxiʼ (Santiago 4:13, 14). Jiobá si nga zanda guiníʼ zaca guiráʼ ni guiree ruaa (Isaías 55:11). Stale binni ridxagayaa ora deruʼ primé guʼyaʼ cá lá Dios lu Biblia ne ora ránnacabe xi riníʼ labe (Éxodo 6:3). Peru pa gusaanacabe de sácabe lu lá Jiobá, o gusaana de gúnicabe ni nabe la? maʼ qué zaguu ndaayabe laacaʼ (Miqueas 4:5).
13. Xi riníʼ gánnanu tu láʼ Jiobá ne sanu lu labe.
13 Sicaríʼ na Salmo 9:10 de lá Dios: «Cani nanna tu laluʼ zuni crecaʼ lii». Cadi purtiʼ si gánnanu Jiobá nga lá Dios zanda guininu maʼ runibiaʼnu laabe, purtiʼ cadi nga si nga ni zacané laanu guni crenu laabe. Gánnanu tu labe nga gánnanu ximodo laabe ne gudiʼnu xquíxepeʼ laabe pur modo nácabe, gápanu respetu derechu ni nápabe de guni mandarbe, chinándanu ca mandamientu stibe ne guni crenu laabe de guidubi ladxidoʼno (Proverbios 3:5, 6). Ne rizanu lu lá Jiobá ora gudiʼnu laanu laabe ne gusihuínninu runi adorarnu laabe ra guibáninu casi nabe (Lucas 10:27). Ñee cayúniluʼ ni la?
14. Neca nánnaluʼ xi canabaʼ Jiobá lii guʼnuʼ, xiruʼ naquiiñeʼ gúniluʼ ti qué chuʼ dxi gusaanuʼ laabe.
14 Neca nánnaluʼ xi canabaʼ Jiobá lii guʼnuʼ, xiruʼ naquiiñeʼ gúniluʼ ti qué chuʼ dxi gusaanuʼ laabe yaʼ. Sicaríʼ gudxi apóstol Pablu Timoteu, ti hombre ni biʼniʼ xhiiñaʼ Jiobá stale iza: «Bicaa ique sa lu gaxha de Dios» (1 Timoteo 4:7). Rizanu gaxha de Jiobá nga ora nadxiinu laabe, rusisácanu laabe, rúninu ni nabe ne riuláʼdxinu modo laabe. Nga runi racaláʼdxinu gusisaca guiráʼ binni labe. Para cadi chuʼ dxi gusaananu de sanu lu lá Jiobá, tobi lucha Dios ni dxandíʼ ca la? naquiiñeʼ gusisácanu laabe (Salmo 37:4; 2 Pedro 3:11).
15. Ximodo zanda guni adorarnu Dios si.
15 Para gúninu ni na Jiobá modo riuulaʼdxiʼ la? naquiiñeʼ guni adorarnu laasibe, purtiʼ laabe nga «ti Dios ni rinabaʼ guni adorárcabe laa si» (Éxodo 20:5). Qué zanda diʼ gannaxhiinu laabe ne gannaxhiinu guidxilayú malu riʼ purtiʼ Binidxabaʼ nga dios stini (Santiago 4:4; 1 Juan 2:15-17). Jiobá nanna dxichi tu binni racaláʼdxinu gácanu (Jeremías 17:10). Pa dxandíʼ riuuláʼdxinu gúninu ni jneza la? laabe zuuyabe ni ne zacanebe laanu guni huantarnu intiica guendanagana guidxaagalunu guiráʼ dxi. Zudiibe laanu espíritu santu stibe ti ganda gudxíʼlunu ca cosa malu ni nuu lu guidxilayú riʼ (2 Corintios 4:7). Laaca zacanebe laanu cadi gusaananu de guni crenu zabáninu ndaaniʼ ti paraísu lu Guidxilayú riʼ sin qué chuʼ dxi gátinu. ¡Guizáʼ sicarú nga ni cabézanu ca! Naquiiñeʼ gudiʼnu xquíxepeʼ Jiobá, Dios ni dxandíʼ ca, ne gúninu ni nabe ne stale gana purtiʼ laabe nga chigudiibe laanu guendanabani ni qué zaluxe.
16. Xi naquiiñeʼ gucaa ladxidoʼloʼ lii guʼnuʼ cásica cayuni millón de binni.
16 Millón de binni ni nabeza lu guidubi naca Guidxilayú maʼ cayúnicaʼ ni bicaa ti hombre lu Stiidxaʼ Dios. Nabe: «Lagusisacané naa Jiobá, ne guiranu gusisácanu labe» (Salmo 34:3). Jiobá cayabi lii chuʼluʼ lade guiráʼ xixé binni de guiráʼ guidxi ni cusisácacaʼ laabe.
Ni guietenaláʼdxinu
• Ximodo nga Jiobá, ne xi ziuuláʼdxinu gúninu ora gunibiaʼnu ximodo laabe.
• Ximodo zanda guluinu nadxiinu sti binni.
• Ximodo rusihuínninu maʼ nánnanu tu lá Dios ne maʼ canazanu lu labe.
[Ca dibuju/foto ni zeeda lu yaza 14]
Jiobá nadxii binni, nga runi zuxhálebe nabe ne zudiibe laacaʼ guiráʼ ni gacaláʼdxicaʼ