Xiñee raca nagana gúninu ni jneza

TUU ndiʼ biecheʼ ora biʼniʼ Saulo cosa malu.... Binidxabaʼ ni laaca láʼ Diablu. Peru cani naca xaíque lade religión stiʼ ca judíu que laaca biéchecaʼ. Ngue runi ora guca Saulo discípulo stiʼ Maestru Ni Jma Nanna Gusiidiʼ que, ne bizulú binibiáʼcabe laabe casi Pablu la? ca xaíque que gucananaláʼdxicaʼ laabe. Rieʼnuʼ xiñee raca nagana para ti discípulo stiʼ Jesús guni ni jneza la?...

Ti dxi, Ananías, xaíque stiʼ ca ni ruzaaquiʼ guʼxhuʼ que biʼniʼ mandarbe gudiicabe tobi lú Pablu, ne gucaláʼdxibe nuteguyoobe laa. Pablu gucaná stálepeʼ purtiʼ gúcabe discípulo stiʼ Jesús. Guyuu binni ni gudiñecaʼ ne gucaláʼdxicaʼ ñuuticaʼ laabe ra bichacaʼ guié laabe (Hechos 23:1, 2; 2 Corintios 11:24, 25).

Stale tu zucaa laanu gúninu xiixa ni qué riulaʼdxiʼ Dios. Nga runi, naquiiñeʼ guinabadiidxanu laca laanu: «Pabiáʼ ndiʼ nadxiinu ni jneza yaʼ. Nadxiinu ni stale dede zúninu ni neca stuudxi gacananalaʼdxiʼ laanu la?». Cadi dxandíʼ riquiiñeʼ gácanu nadxibalú para gúninu ni la?...

Zándaca guinabadiidxaluʼ laca lii: «Xiñee zacananalaʼdxiʼ stuudxi binni laanu pa gúninu ni jneza yaʼ. Cadi riquiiñeʼ ñéchecabe la?». Nga nga ni jma galán ñúnicabe. Dxiqué ca binni que jma nga guyuuláʼdxicabe chúʼcabe gaxha de Jesús purtiʼ galán cani biʼniʼ. Ti dxi la? guiráʼ binni ni nabeza ndaaniʼ ti guidxi bizuhuaacaʼ ra puertaʼ yoo ra nuube que. Guyécabe raqué purtiʼ Jesús cusianda binni huará (Marcos 1:33).

Peru nuu tiru qué ñulaʼdxiʼ diʼ ca binni que ni bisiidiʼ Jesús. Laabe bisiidibe stiidxaʼ Dios jnézapeʼ guiráʼ ora, ne pur ngue gucananalaʼdxiʼ binni laabe. Zaqué bíʼnicabe laabe ti biaje ndaaniʼ guidxi ra biniisibe, guidxi que láʼ Nazaret. Jesús guyé ra yuʼduʼ que, purtiʼ raqué rié ca judíu para guni adorarcaʼ Dios.

Raqué bidii Jesús ti libana guizáʼ galán ni zeeda ndaaniʼ Biblia. Ora bizulube la? guyuulaʼdxiʼ ca binni que. Guirácabe bidxagayaacabe pur ca diidxaʼ galán ni guniʼbe. Qué guiráʼ guni crécabe pa ngue nga hombrehuiiniʼ ni biniisi guídxica biniisicabe.

Óraque bizulú Jesús guniʼné laacabe ximodo huayaca Dios nachaʼhuiʼ ne ca binni ni cadi naca judíu. Ora binadiágacabe ngue la? cani nuu ra yuʼduʼ que bidxiichicaʼ. Ñee nannuʼ xiñee la?... Purtiʼ guníʼ íquecaʼ ne laasicaʼ ca nga nachaʼhuiʼ Dios, ne runi crecaʼ jma nuu xpiaanicaʼ que stuudxi. Ngue runi gucananaláʼdxicabe Jesús pur ni guníʼ que. Nannuʼ xi gucaláʼdxicabe ñúnicabe laabe la?...

Biblia cusiene: «Ne biasa caʼ, ulee ca laabe de ndaani guidxi que, yené ca laabe punta dani ra dxiʼba guidxi que para nibee yaande ca laabe. Peru udiʼdi be galahui de laacaʼ, ze be» (Lucas 4:16-30).

Pa ñúnicabe lii xiixa zacá, ñee nibiguétaluʼ ra nuu ca binni ca para niníʼneluʼ laacaʼ de Dios la?... Cadi dxandíʼ naquiiñeʼ gaca binni nadxibalú la?... Biaʼ ti iza de ni guca que, Jesús bibiguetaʼ Nazaret. Biblia na: «[Jesús] uyé xquidxi ne biuu ndaani yuʼduʼ, bisiidi ca binni xquidxi». Jesús qué nidxibi diʼ ca hombre ni cadi nadxiicaʼ Dios que ne qué nusaanadibe de niniʼbe stiidxaʼ Dios pur ngue (Mateo 13:54).

Ti dxi sábadu, nuu Jesús ra nuu ti hombre ni nabidxi ti chu naʼ. Dios maca bidii poder Jesús para gusianda laabe. Peru nuu tuudxi hombre raqué ni gucaláʼdxicaʼ niguucaʼ laabe ra nagana. Xi biʼniʼ Maestru Ni Jma Nanna Gusiidiʼ que yaʼ.... Primé la? gunabadiidxabe: Pa tobi de laatu ñapa ti dendxuʼ ne ñábame ndaaniʼ ti barranca dxi sábadu, ñee nibeetu laame la?

Nibeecabe laame pue, neca ñácani sábadu, dxi riziiláʼdxicabe. Ngue runi, Jesús guníʼ: Jma galán nga gacanenu ti hombre dxi sábadu, purtiʼ ti hombre jma risaca que ti dendxuʼ. Raqué bihuinni caquiiñeʼ gacanebe binni huará que ne gusiándabe laa.

Jesús gudxi laabe gusigaanabe ne oraqueca bianda nabe que. ¡Guizáʼ biecheʼ hombre que! Peru, stuudxi que yaʼ. Biéchecaʼ la?... Coʼ, sínuque jma gucananaláʼdxicabe Jesús. Bireecabe de raqué ne biyúbicabe ximodo guuticabe laabe (Mateo 12:9-14).

Zacaca ni ca dxi stinu riʼ. Neca intiica gúninu, qué liica zusiéchenu binni. Nga runi naquiiñeʼ guiníʼ íquenu tupeʼ nga racaláʼdxinu gusiéchenu. Pa Jiobá Dios ne Xiiñibe, Jesucristu la? naquiiñeʼ gúninu ni cusiidicabe laanu guiráʼ ora. Peru, tu zacananalaʼdxiʼ laanu pa gúninu ni yaʼ. Tu zuyubi ximodo gaca nagana para laanu gúninu ni jneza yaʼ....

Nga nga Binidxabaʼ. Turuʼ yaʼ.... Ca binni ni maʼ gudxítebe xquendabiaanicaʼ para gúnicaʼ ni malu. Jesús gúdxibe ca xaíque stiʼ religión ni guyuu ca dxi stibe: «Binidxaba nga bixhoze tu ne racalaʼdxi tu guni tu ni na be» (Juan 8:44).

Nuu stale binni runi ni riulaʼdxiʼ Binidxabaʼ. Jesús gudxi laacabe guidxilayú. Xii nga raʼbuʼ guidxilayú ni guníʼ Jesús riʼ yaʼ.... Ndaaniʼ Juan, capítulo 15, versículo 19, racá rúʼndanu ca diidxaʼ guníʼ Jesús: «Pa ñaca de [guidxilayú] laatu la? ñanaxhii cabe laatu, peru ma ulee laatu de lade cabe, nga runi nanalaʼdxi cabe laatu, purti cadi de [guidxilayú] laatu».

Nga runi, guidxilayú ni racananalaʼdxiʼ ca discípulo stiʼ Jesús la? nga nga guiráʼ binni ni cadi zinanda ni na Maestru Ni Jma Nanna Gusiidiʼ que. Xiñee nanalaʼdxiʼ ca binni guidxilayú riʼ ca discípulo stiʼ Jesús yaʼ.... Guníʼ ique caadxi: Tuu ndiʼ xaíque stiʼ guidxilayú riʼ yaʼ.... Biblia na: «Ne laca nanna nu naaze dxiichi binidxaba idubi guidxilayú». Racá ridúʼyanu Binidxabaʼ nga naaze ni (1 Juan 5:19).

Yanna maʼ bieʼnuʼ xiñee nga rudii dxiiñaʼ gúninu ni jneza la?... Binidxabaʼ ne ca binni guidxilayú stiʼ rúnicani nagana para laanu. Peru nuu sti razón. Rietenalaʼdxuʼ xi laani la?... Lu capítulo 23 que bizíʼdinu guiranu ralenenu donda. Cadi raʼbuʼ guizáʼ galán nga ora maʼ guiree donda gulenenu, guiree Binidxabaʼ ne ca binni ni cayuni ni nabe la?...

Biblia cayabi laanu: Guidxilayú riʼ zidiʼdiʼ si ni. Nga riníʼ zanitilú guiráʼ ni cadi naca discípulo stiʼ Maestru Ni Jma Nanna Gusiidiʼ que, ne qué zabánicabe xadxí. Peru nannuʼ tuu ndiʼ zacaa guendanabani ni qué zaluxe la?... Biblia na: «Peru qué ziuu dxi initilú ni guni ni na Dios» (1 Juan 2:17). Ca binni si ni guni ni jneza, «ni guni ni na Dios», laacaʼ nga zápacaʼ ti guendanabani ni qué zaluxe ndaaniʼ guidxilayú cubi Stibe. Nga runi, cadi dxandíʼ racaláʼdxinu gúninu ni jneza neca gácani nagana para laanu la?...