Febrero

Gudxi Jiobá discípulo Santiago gucaa: «Lauyubi iziidi tu uzuhuaa chaahui tu sin ixhacalaʼdxi tu, intiica gueeda. Zacá zaniisi tu lu stiidxa Dios. Ziene chaahui tu ni na, ne zuni tu ni» (Sant. 1:4). Racá ridúʼyanu guníʼ Santiago naquiiñeʼ guni huantarnu ti guiniisinu lu «stiidxa Dios». Ximodo nga yaʼ. Ora cadídinu lu ti guendanagana la? zándaca gudiʼnu cuenta caquiiñeʼ gápanu jma paciencia, gannaxhiinu binni jma o gusisácanu ca cosa galán nápanu. Pa guni huantarnu la? zusihuínninu ca cualidad riʼ ne zabáninu modo riuulaʼdxiʼ Cristu. Nga runi qué racaláʼdxinu guchéʼnenu ca ley stiʼ Dios para si guiluxe ti guendanagana. Yanna, xi gúninu pa cayaca nagana gusaana de guiníʼ íquenu xiixa cosa dxabaʼ yaʼ. Naquiiñeʼ guinábanu Jiobá gacané laanu cueenu ni de ndaaniʼ íquenu. O xi gúninu pa nuu ti binnilídxinu ni nabé rucaalú laanu purtiʼ testigu stiʼ Jiobá laanu yaʼ. Cadi guireʼnu gana, naquiiñeʼ gucáʼ íquenu gúninu ni ná Jiobá. Guietenaláʼdxinu naquiiñeʼ guni huantarnu ti guiechené Jiobá laanu (Rom. 5:3-5; Sant. 1:12). w16.04 2:15, 16

Jiobá qué riníʼ ique jma risaca ti binni o ti grupu de binni que stobi. Para laabe la? ngueca nga laanu. Dxandíʼ, gadxé gadxé cada tobi de laanu. Ne zanda guidxagayaanu ni. Cadi canabaʼ diʼ Jiobá laanu gudxiʼdéchenu cultura stinu. Peru laaca qué racaláʼdxibe guiníʼ íquenu jma risácanu que stobi (Rom. 10:12). Cadi naquiiñeʼ guni sentirnu jma risaca xquídxinu ne guiníʼ íquenu gástiruʼ sti guidxi jma galán que laani. Pa runi sentirnu zacá, zaca nagana para laanu gácanu neutral. Ngapeʼ nga ni guca tiempu bibani ca primé cristianu. Caadxi de cani riníʼ diidxaʼ hebreu, cadi jneza modo biʼniʼ tratarcaʼ ca viuda ni riníʼ diidxaʼ griegu (Hech. 6:1). Ximodo zanda gánnanu pa maʼ bizulú cusisácanu xquídxinu yaʼ. Guiníʼ íquenu: «Xi runeʼ ora gudii ti hermanu de sti guidxi xiixa conseju naa. Ñee qué ricaaʼ conseju stibe purtiʼ riníʼ iqueʼ jma galán modo rúnidu ca cosa ca xquidxeʼ la?». Pa zacá riníʼ íquenu la? guietenaláʼdxinu conseju zeeda lu textu cadúʼndanu yannadxí. w16.04 4:12, 13

Bisiidiʼ Jesús binni de Reinu stiʼ Dios. Ne ngaca nga ni racaláʼdxibe gusiidiʼ ca discípulo stibe. Yanna, gunáʼ nga religión ni cusiidiʼ guiráʼ binni de Reinu stiʼ Dios yaʼ (Mat. 28:19). Ca testigu stiʼ Jiobá. Guidúʼyanu xi gudxi ti hombre ni guca misioneru ne sacerdote ti testigu stiʼ Jiobá. Guníʼ sacerdote riʼ maʼ guyuu ndaaniʼ stale guidxi roʼ ne gunabadiidxabe ca Testigu xi rusiidicaʼ binni. Sacerdote que guníʼ: «Aque nahuati guiráʼ ca Testigu xa, purtiʼ ngueca si ni ricábicaʼ: “Rusíʼdidu binni ca diidxaʼ nacubi ne galán stiʼ Reinu”». Qué rusihuinni diʼ ni guníʼ sacerdote riʼ nahuati ca Testigu, sínuque nuucabe tobi si purtiʼ dxandíʼ xpinni Cristu laacabe (1 Cor. 1:10). Laaca de Reinu stiʼ Dios nga ni rusiidiʼ revista Torre stiʼ ni rapa, ni caníʼ de Reinu stiʼ Jiobá. Riree ni lu 254 idioma, ne cada númeru stiʼ revista riʼ raca imprimir biaʼ 59 millón. Laasi ni nga publicación ni jma ruundaʼ binni lu guidubi Guidxilayú. w16.05 2:6

Guxuíʼlunu racaláʼdxinu gácanu precursor. Para nga la? zándaca maʼ bichaʼnu modo nabáninu ti gápanu jma tiempu para guni predicarnu. Peru dede yanna caníʼ íquenu pa ziúʼrunu nayecheʼ né huaxiéʼ bueltu o né caadxi cosa si. Dxandíʼ, qué riníʼ diʼ Biblia naquiiñeʼ gácanu precursor para gúninu ni ná Dios; zanda gúninu ni riuuláʼdxibe pa gácanu ti publicador si. Peru Jesús bisiidiʼ rudii Jiobá stale ndaayaʼ cani runi sacrificiu pur Reinu (Luc. 18:29, 30). Ne laaca cayabi Biblia laanu riuulaʼdxiʼ Jiobá gúninu biaʼ gándatiʼ para gusisácanu laa. Laaca riníʼ Biblia racalaʼdxiʼ Jiobá gúninu biaʼ gándatiʼ pur gúninu ni ná ne chuʼnu nayecheʼ lu serviciu stinu (Sal. 119:108). Pa guni estudiarnu ca textu riʼ ne guni orarnu Jiobá la? zacané cani laanu gánnanu xi riníʼ íquebe de ni racaláʼdxinu gúninu. Pa guni meditarnu lu ca relatu riʼ la? zacaanu decisión jneza ne zaguu Jiobá ndaayaʼ laanu. w16.05 3:13

Cadi jneza diʼ guiníʼ ique ca hermanu ni maʼ huaniisi cadi caquiiñecaʼ información ni riree para ca joven. Guiranu naquiiñeʼ guni defendernu fe stinu, guni controlarnu ca emoción stinu, gucáʼnanu presión de grupu, cadi guidxaaganu binni qué runi ni jneza ne gánnanu ximodo jma jneza gaca divertirnu. Ca publicación ni riree para ca joven, maʼ bisiene cani ca tema riʼ, ne laaca maʼ guníʼ cani de xcaadxi tema. Pa guiníʼ ique ca hermanu ni maʼ huaniisi cadi caquiiñeʼ gúʼndacaʼ información ni riree para ca joven la? zusihuínnicaʼ rudxiibacaʼ laca laacaʼ. Dxandíʼ gucuá ca tema riʼ para ca joven, peru laaca lu Biblia nga biree ni rusiidiʼ cani. Nga runi, zanda gacané cani guiráʼ ca xpinni Cristu. Racané ca publicación riʼ ca joven para gudxiilucaʼ intiica guendanagana ne para gaca xhamígucaʼ Jiobá. Peru laaca zanda guʼyaʼ cani maʼ huaniisi ximodo zacané cani laacaʼ (Ecl. 12:13). w16.05 5:15, 16

«Jiobá Dios stinu laasibe nga Jiobá». Nabé riguu ca diidxaʼ riʼ gana laanu. Nabé gucané ca diidxaʼ riʼ ca israelita para biʼniʼ huantarcaʼ guiráʼ guendanagana gúpacaʼ dxi biuucaʼ lu layú ni guníʼ Dios gudii laacaʼ ne ora gucuaacaʼ ni. Laaca zudii ca diidxaʼ riʼ stipa laanu para tiidinu lu gran tribulación ne cadi chuʼdindenenu ca hermanu ne chuʼnu tobi si ndaaniʼ Paraísu. Ñee riénenu «Jiobá Dios stinu laasibe nga Jiobá» la? Pa zacá ni, cadi gusaana de guni adorarnu laasibe. Cadi gusaana de gannaxhiinu laabe ne gúninu ni nabe de guidubi ladxidoʼno, xquendabiaaninu ne guiráʼ stipa stinu. Gúninu stipa pur chuʼnu tobi si né ca hermanu ne cadi chuʼdindenenu laacaʼ. Pa gúninu cani bizéʼtenu riʼ, zaníʼ Jesús nácanu casi dendxuʼ ne zábibe laanu ca diidxaʼ riʼ: «Ma guluu Bixhoze ndaaya laatu, yanna latáʼ laicaa ra ma nexhe chaahui para laatu dede ante cha guidxilayú» (Mat. 25:34). w16.06 3:2, 20

Ora orgulloso laanu la? riníʼ íquenu jneza nuunu, neca cadi jneza ni cayúninu. Pa guizaacanu nga maʼ qué zácanu casi beñe ni naguudxi ndaaniʼ náʼ Jiobá. Pa bininá ti hermanu laanu o biaaxhanu ti privilegiu ndaaniʼ congregación, ñee gúcanu orgulloso la? o bidiʼnu cuenta jma risaca chuʼnu tobi si né ca hermanu stinu ne cadi gusaananu Jiobá (Sal. 119:165, Col. 3:13). Pa qué gusaana de gúninu cosa malu dede gucáʼchinu ni cayúninu la? zaca nagana para laanu guicaanu ca conseju ni zeeda de Dios. Ne jmaruʼ si nagueenda zúninu cosa malu (Ecl. 8:11). Ti hermanu ni nabé biʼyaʼ pornografía ná qué nudii cuenta bizulú guníʼ mal de ca ancianu. Pur viciu feu riʼ maʼ qué ñaca xhamígube Jiobá. Peru ora gunna xcaadxi binni ni cayúnibe que, bidiibe lugar gacané ca ancianu laabe. Dxandíʼ gulené guiranu donda ne rucheʼnu. Peru pa guininu mal de xcaadxi hermanu o cueenu pretextu la? zaguidxi ladxidoʼno. Ni naquiiñeʼ gúninu nga guinábanu Dios guni perdonar stóndanu ne gacané laanu. w16.06 2:5, 6

Nanna Jesús riuu ca discípulo stiʼ xizaa pur gápacaʼ ni gocaʼ ne ni gácucaʼ. Racaláʼdxibe gacanebe laacaʼ guiénecaʼ xiñee cadi naquiiñeʼ chuʼcaʼ xizaa pur gápacaʼ ca cosa que. Dxandíʼ caquiiñeʼ cani, peru nanna Jesús zándaca guiaandaʼ ca discípulo xii nga ni jma risaca lu xquendanabánicaʼ, pa chúʼpecaʼ xizaa pur ca cosa ni caquiiñecaʼ. Ne cumu nabé rizaaláʼdxibe laacaʼ la? gudixhenabe laacaʼ xtapa biaje xi guendanagana zápacaʼ pa qué gusaana de chuʼcaʼ xizaa (Mat. 6:27, 28, 31, 34). Nanna Jesús xi caquiiñeʼ binni guiráʼ dxi. Peru cadi ngasi, laaca nánnabe jma nagana modo zabani ca discípulo stibe lu ca últimu dxi riʼ (2 Tim. 3:1). Ca dxi riʼ, raca nagana para stale binni guidxela dxiiñaʼ, ne jma caru ziyaca guiráʼ cosa cada dxi. Ndaaniʼ stale guidxi, nabé pobre binni ne huaxiéʼ guendaró napa o nuu tiru qué lica gapa gastiʼ. Peru laaca nanna Jesús jma risaca xquendanabani binni que ni gó, ne xcuerpu que lari gacuʼ. w16.07 1:8, 9

Cumu qué zanda guzúʼbanu stiidxaʼ Jiobá lu guiráʼ ni gúninu la? cadi caquiiñeʼ gusihuínnibe nacháʼhuibe né laanu, purtiʼ runi merecernu gátinu. Rey Salomón guníʼ: «Nin ti hombre qué randa runi puru si ni jneza sin guchee ndaaniʼ guidxilayú» (Ecl. 7:20). Gudiʼdiʼ si tiempu, guníʼ apóstol Pablo: «Guiráʼ xixé binni maʼ bichee ne qué zanda gusihuínnicaʼ ca guenda sicarú stiʼ Dios» ne «ni riaxa pecadu nga enda guti» (Rom. 3:23; 6:23a, TNM). Nabé nadxii Jiobá guiráʼ binni. Nga runi biseendabe tobi lucha Xiiñibe para gatiʼ pur laanu. Zacá nga bisihuínnibe nadxiibe laanu (Juan 3:16). Sicaríʼ guníʼ Pablo de Jesús: «Bidii be lugar bininá enda guti laabe purti nga ni ucalaʼdxi Dios [o, «pur guendanachaʼhuiʼ stiʼ Dios»], gati be jlugar irá xixé binni guidxilayú. Nga runi yanna ma nandxóʼ be ne nabé ma bisisaca Dios laabe» (Heb. 2:9, TNM). Nga runi, regalu ni cudii Dios laanu nga «enda nabani ni qué zaluxe, pur Cristu Jesús Señor stinu» (Rom. 6:23b). w16.07 3:3, 4

Normal nga guichaganáʼ binni. Peru, ximodo bizulú guendaxheelaʼ. Gánnanu ndiʼ zacané ni laanu guidúʼyanu guendaxheelaʼ ne ca ndaayaʼ redané ni modo ruuyaʼ Dios cani. Bizáʼ si Dios Adán, gunabaʼ laabe quíxhebe lá guiráʼ maniʼ. Biiyaʼ Adán napa guiráʼ ca maniʼ que pareja stiʼ, peru laa qué gapa pareja stiʼ (Gén. 2:20-24). Ngue runi, bisisiaasiʼ Dios Adán ne guxha ti xcustiabe ne bizáʼ ti gunaa ni beeda gaca xheelabe. Zacá nga bizulú guendaxheelaʼ. Racá ridúʼyanu zeeda gaca guendaxheelaʼ ti regalu stiʼ Jiobá. Stale iza despué, guníʼ Jesús ca diidxaʼ guníʼ Jiobá ndaaniʼ jardín de Edén que: «Pur nga runi zusaana hombre bixhoze ne jñaa, ne zadxaaga xheela ne zaca ca tobi si» (Mat. 19:4, 5). Cumu biquiiñeʼ Dios ti biní xcustiá Adán para bizáʼ Eva la? nga runi zándaca biene pareja riʼ racalaʼdxiʼ Jiobá chuʼcaʼ juntu. Qué lica ñacalaʼdxiʼ Jiobá ñaca divorciar binni de xheelaʼ, ninca ñapa binni chupa chonna xheelaʼ. w16.08 1:1, 2

Cadi guiráʼ diʼ ora nga guniʼné Jesús stale binni. Stale biaje bisiidibe binni ora nuu stubi. Ne galán modo biʼniʼ sentir binni ora guníʼnebe laacaʼ. Casi dxi guníʼnebe ti gunaa ni zindee nisa ra bizé ndaaniʼ guidxi Sicar, nabé guyuulaʼdxiʼ gunaa que modo guníʼnebe laa (Juan 4:5-30). Sti dxi guníʼnebe Mateo Leví, ti hombre ni runi cobrar impuestu. Guca hombre riʼ discípulo stiʼ Jesús. Despué biʼniʼ invitarbe Jesús ne xcaadxi binni chitocaʼ ra lídxibe. Raqué guniʼné Jesús stale binni (Mat. 9:9; Luc. 5:27-39). Ti biaje guníʼ ti hombre láʼ Natanael caadxi cosa ni cadi galán de ca binni de Nazaret, xquidxi Jesús. Peru guca Jesús nachaʼhuiʼ ora guniʼné laabe. Ne pur ngue bichaa Natanael modo riníʼ ique de Jesús ne guyuulaʼdxiʼ guiziidiʼ jma de laabe (Juan 1:46-51). Xi rusiidiʼ ejemplu stiʼ Jesús riʼ laanu yaʼ. Pa galán modo guinínenu binni la? zándaca jma ziuuláʼdxicaʼ gucaadiágacaʼ laanu. Gusíʼdinu cani nacubi gácacaʼ nachaʼhuiʼ. Zacá jma ziuuláʼdxicaʼ guni predicarcaʼ. w16.08 4:7-9

Nuu binni rusaana xheelaʼ o raca divorciar ora guʼyaʼ qué ganda guni chaahuicaʼ ca guendanagana naroʼbaʼ sticaʼ. Zándaca guiníʼ ique caadxi binni ni maʼ bichaganáʼ maʼ qué zanda gaca chaahuiʼ guendanagana sticaʼ ne pur nga naquiiñeʼ gusaanacaʼ xheelacaʼ o gaca divorciarcaʼ. Neca ruluíʼ zaca chaahuiʼ ca guendanagana ca ora gusaana binni xheelaʼ, stale biaje jmaruʼ si riroobaʼ ca problema stícabe. Jesús bisihuinni cadi guendariguite nga gusaana binni xheelaʼ. Guníʼsibe ni bizeeteʼ Dios de guendaxheelaʼ, guniʼbe: «Ni ma bichaaga Dios la? ma cadi indaa binni guidxilayú» (Mat. 19:3-6; Gén. 2:24). Nga rusihuinni qué zanda diʼ guxheleʼ ti hombre o ti gunaa «ni ma bichaaga Dios». Racalaʼdxiʼ Jiobá chuʼ ca guendaxheelaʼ juntu biaʼ dxi guibánicaʼ (1 Cor. 7:39). Guiranu naquiiñeʼ gánnanu zabidxi Jiobá cuenta laanu pur cani rúninu. Gánnanu nga zacané ni laanu guni chaahuinu guendanagana gápanu nagueendaca, ante gaca ni jma naxoo. w16.08 2:10, 11

Guiráʼ ora naquiiñeʼ gatananu. Xiñee yaʼ. Purtiʼ órapeʼ cadi cabézanu zándaca gucaalú ca enemigu stinu laanu o zándaca ora maʼ qué gápanu stipa. Ora riníʼ Biblia quixhedxinu ni nadxabaʼ la? caníʼ ni zanda guni ganarnu pa gudxíʼlunu ca cosa malu. Peru, pa qué gatananu ne gusaana de gudxíʼlunu la? zanda guni ganar Binidxabaʼ laanu, guidxilayú stiʼ ne ca cosa malu ni ruquiinde laanu gúninu. Nga runi, cadi guiabayunu. Cadi guireʼnu gana, o cadi gudiʼnu lugar guiaba nanu (1 Ped. 5:9). Pa racaláʼdxinu guni ganarnu, cadi guiaandaʼ laanu xi pur cudxíʼlunu. Rúninu ni purtiʼ racaláʼdxinu chuulaʼdxiʼ Jiobá ni rúninu ne cuʼ ndaayaʼ laanu. Hebreos 11:6 ná: «Para idxiña cabe [Dios] la? napa cabe xidé guni cre cabe nuu be ne rulabi be [o riguíxebe] cani uyubi laabe». Racá ridúʼyanu naquiiñeʼ gúninu stale stipa pa racaláʼdxinu uguu Jiobá ndaayaʼ laanu (Hech. 15:17). w16.09 2:4, 5

Racané Biblia laanu para guicaanu decisión ni gusisaca Dios lu guiráʼ ni gúninu. Peru lari ni riuuláʼdxinu nga rácunu. Zándaca gadxé tipu lari ni riuuláʼdxinu ne ni rizinu de cani riuulaʼdxiʼ ne rizíʼ xcaadxi binni. Peru lari stinu naquiiñeʼ gaca ni nayá ne galán, ne gusihuinni ni nuu xpiaaninu, gaca ni biáʼsipeʼ para lugar ra nuunu ne ni ruuyaʼ binni galán neza ra nabézanu. Cadi guiráʼ ora zadxélanu láripeʼ ni caquiiñenu. Stale tienda rutoo puru si ni caree de moda. Nga runi, zándaca iquiiñenu jma tiempu para guyubi chaahuinu ne para guidxélanu xiixa falda, blusa ne vestidu ni gusihuinni nuu xpiaaninu, o para guidxélanu traje ne pantalón ni cadi uquiichipeʼ laanu. Peru zabeendunu ni galán pa gúninu zacá. Xiñee yaʼ. Primé la? purtiʼ zuuyaʼ ca hermanu laanu ne ziéchecaʼ gúʼyacaʼ cayúninu stipa pur guzuchaahuinu galán. Ne guiropa, zusisácanu Bixhózenu ni nuu guibáʼ. Intiica sacrificiu gúninu pur guzuchaahuinu galán zuchátipa ni ladxidoʼno purtiʼ zusisácanu Jiobá. w16.09 3:15, 16

Nabé riuulaʼdxiʼ ca baʼduhiiniʼ guxuíʼlucaʼ, o guni imaginarcaʼ. Nga runi, pa nápaluʼ xiiñiluʼ la? biquiiñeʼ ejemplu ora maʼ cusiidiluʼ laacabe, zacá zacaneluʼ laacabe guiníʼ íquecabe, guiénecabe ne guiziidicabe. Zanda iquiiñeluʼ caadxi ejemplu para gusiidiluʼ ca xiiñiluʼ jneza nga guiráʼ ni rusiidiʼ Biblia. Zanda gúʼndaneluʼ laacabe textu ni cadúʼndanu yannadxí. Peru cadi guiníʼsiouʼ Jiobá nga gudxi Job xi guiníʼ. Gucané laacabe guiníʼ íquecabe. Zanda gaʼbuʼ laacabe, dxiqué guyuu binni ni qué runi cré pa zaʼbiʼ Guidxilayú riʼ lu bi. Ni nánnacabe nga nuu ni nuaʼ guiráʼ cosa. Dxiqué guirutiʼ tu nuluíʼ pa zaʼbiʼ Guidxilayú riʼ lu bi, purtiʼ gastiʼ telescopio nin nave espacial. Xii ndiʼ chigusiiduʼ laacabe yaʼ. Neca maʼ raca gayuaa iza de gucuá Biblia, jneza guiráʼ ni cá luni purtiʼ Jiobá nga guníʼ cani cá luni (Neh. 9:6). w16.09 5:9, 12

Pa nápanu fe Jiobá ne Jesús, qué ziuʼnu conforme gánnanu xi maʼ bíʼnicabe ne xi chigúnicabe pur laanu. Zeeda gaca fe riʼ casi ti stipa ni zucaa laanu chuuláʼdxinu gúninu ni ná Dios ne guibáninu modo riuuláʼdxibe. Jesús nga binni ni zaquiiñeʼ Jiobá para gulá laanu, ne fe ni nápanu Jesús zucaa ni laanu guni predicarnu ca noticia nacubi ne galán stiʼ Dios. Pa racaláʼdxinu guibáninu sin gátinu ndaaniʼ guidxilayú cubi stiʼ Dios la? naquiiñeʼ gápanu fe ne guyúbinu modo gaca ni jma naguidxi. Fe ca zeeda gaca ni casi ti yagahuiiniʼ. Para chuʼ ti yagahuiiniʼ galán ne guiniisi ni jma la? caquiiñeʼ ni cuidadu ne guizee ni gatigá. Pa qué gúninu ni, zaguunduʼ ni ne zabidxi ni. Zacaca nga rizaaca né fe stinu. Pa qué chuʼnu cuidadu ni la? zaguundu ni ne zabidxi ni, cásica raca né ti yagahuiiniʼ ni qué rizee (Luc. 22:32; 2 Tes. 1:3; Tito 2:2; Heb. 3:12). Peru pa chuʼnu cuidadu fe stinu la? qué zati ni, zaroobaʼ ni ne zacané ni laanu guzuhuaʼnu dxiichiʼ. w16.10 4:4, 5

Dxi yenécabe Daniel ne ca xhamigu de esclavu guidxi Babilonia, gucalaʼdxiʼ ca babilonio que nucaacaʼ laacabe ninándacabe cultura ne religión sticaʼ. Ximodo yaʼ. Bisiidiʼ ca binni que laacabe stiidxacaʼ ne gudíxhecaʼ lácabe cásica lá ca binni de Babilonia (Dan. 1:3-7). Lá o nombre cubi bidiicabe Daniel que zeeda gaca ni casi lá dios jma risaca stiʼ ca babilonio, Bel. Zándaca gucalaʼdxiʼ rey stiʼ Babilonia ñuni cré Daniel jma nadipaʼ dios stiʼ que Jiobá, Dios stiʼ Daniel (Dan. 4:8). Ndaaniʼ guidxi Babilonia, bidiicabe Daniel ca guendaró ni ró rey. Peru laabe gudixhe íquebe gúnibe ni ná ley stiʼ Dios (Dan. 1:8). Qué nixeleʼ Daniel de Jiobá neca guyuu xquidxi binni. Ximodo bíʼnibe ni yaʼ. Biindabe ca libru risaca guyuu lu diidxaʼ hebreu (Dan. 9:2). Biaʼ 70 iza despué de yendabe Babilonia, runibiaʼrúcabe laabe ne lá hebreu ni nápabe que, Daniel (Dan. 5:13). w16.10 2:7, 8

Maʼ bisaana Jesús ti «mozo ni nuu xpiaani» para gudii guendaró espiritual (Mat. 24:45-47). Dede 1919 caquiiñeʼ Jesús mozo riʼ para gacané xquidxi Dios guiene Biblia ne para gúnicaʼ ni ná ni. Ora rinándanu ca conseju stiʼ Biblia la? riuu congregación stinu nayá, riuu ni tobi si ne qué riuudinde ni. Galán guni cada tobi de laanu pa guinabadiidxanu laca laa: «Ñee qué zusaanaʼ Jesús ne qué zusaanaʼ de chinandaʼ ca instrucción stiʼ mozo ni nuu xpiaaniʼ la?». Biblia ná laaca nuu organizadu dxiiñaʼ ni runi ca xpinni Jiobá ni nuu guibáʼ. Casi Ezequiel, laa biiyaʼ ti visión ra zuba Jiobá lu ti carru ni caniibi nagueenda ne riniibi ni guiráʼ ladu gapa Jiobá gana (Ezeq. 1:4-28). Maʼ cadi candaa zunitilú Cristu, Xiiñibe, ne ca ángel guidxilayú malu riʼ. Zacá, guiracaʼ zuni respetarcaʼ Jiobá, labe, o nombre stibe, ne derechu ni nápabe para guni mandarbe. w16.11 3:9, 10

Cásica biʼniʼ ca primé discípulo stiʼ Jesús, laaca ridagulisaanu para guizíʼdinu ne para ugúʼsaanu gana laanu (1 Cor. 14:31). Ca hermanu ni maʼ xadxí cayúnicaʼ ni ná Jiobá laaca caquiiñeʼ uguucabe gana laacaʼ. Guiníʼ íquenu ni bizaaca Josué. Gulí Jiobá laabe para sanírube nezalú ca israelita dxi mayaca chúʼcabe lu layú bidii stiidxaʼ Dios gudii laacabe. Neca maʼ xadxí de cayuni Josué ni ná Jiobá, gudxi Jiobá Moisés: «Biʼniʼ mandar Josué ne guluu gana laa ne bidii stipa laa, purtiʼ laa nga zazaniruʼ lu guidxi riʼ ne laa nga ni zacané laacabe chúʼcabe lu layú ni chiguuyaluʼ» (Deut. 3:27, 28). Biquiiñeʼ Josué uguucabe gana laa purtiʼ stale biaje zadinde guidxi Israel ne ziuu biaje zuníticabe (Jos. 7:1-9). Ca dxi riʼ, laaca caquiiñeʼ ca ancianu ne ca superintendente de circuito uguʼnu gana laacaʼ, purtiʼ rúnicabe stale stipa pur gápacabe xquidxi Dios (1 Tes. 5:12, 13). w16.11 1:12, 13

Ca Binni Ruundaʼ Biblia que biénecaʼ cadi naquiiñeʼ si gábicaʼ binnilídxicaʼ, ca xhamígucaʼ ne ca binni rinecaʼ yuʼduʼ maʼ qué zúnicaʼ ni runi religión falsa. Racaláʼdxicabe gábicabe guiráʼ binni naca Babilonia guidxi roʼ casi ti gunaa dxabaʼ. Ngue runi, lu diciembre iza 1917 ne ra bizulú iza 1918, chupa chonna mil de ca Binni Ruundaʼ Biblia ni nuu tiempu que, né stale gana gudiizicaʼ chii millón tratadu ra beeda ti tema ni láʼ «Ziaba Babilonia». Lu tratadu riʼ bisihuínnicabe guiráʼ ni cadi jneza runi ca religión falsa ne bíʼnicabe ni sin nidxíbicabe. Nabé bichiichi ngue ca xaíque stiʼ ca religión que. Peru qué nucueeza ngue ca Binni Ruundaʼ Biblia. Maʼ gudixhe íquecaʼ cadi gusaana de guni predicarcaʼ ne para laacaʼ jma galán guzuubacaʼ «stiidxa Dios que stiidxa binni» (Hech. 5:29). Guiráʼ ndiʼ rusihuinni cadi lu Primera Guerra Mundial diʼ que nga guyuu ca xpinni Cristu que de esclavu Babilonia. Dxandipeʼ la? ni cayaca ca dxi que nga careecabe de lu náʼ religión falsa ne cayacanécabe xcaadxi guni zaqueca. w16.11 5:2, 4

Zándaca chuʼ tu guiníʼ ique caníʼ Pablo de ca binni ni nanna xii nga ni dxandíʼ ne de cani qué ganna xii nga ni dxandíʼ, de cani dxandíʼ xpinni Cristu ne de cani cadi dxandíʼ xpinni Cristu. Peru carta riʼ bicaa Pablo ni ra nuu ca xpinni Cristu de Roma, cani gulí Dios para gaca xpinni (Rom. 1:7). Racá ridúʼyanu caniʼbe de ca xpinni Cristu ni «nabani casi na ique» ne de ca xpinni Cristu ni «nabani casi na Espíritu» tiempu que. Apóstol Pablo guníʼ bicaa xcuerpu laa guni «ni cadi jneza» purtiʼ yenanda ni ná ique (Rom. 7:5). Ni bizéʼtenu riʼ racané laanu guiénenu tuu nga ca binni cuzeeteʼ Pablo ora guníʼ: «Cani nabani casi na ique la? ruyubi guni ni riulaʼdxi si». Raríʼ caniʼbe de ca binni ni rudii lugar guni controlar ca deseu malu stiʼ xcuerpu laa ne maʼ cuyubi ximodo guni ni ná ni. Ca binni riʼ la? rúnicaʼ puru si ni riuuláʼdxicaʼ, ne qué rizaaláʼdxicaʼ pa jneza ni o pa coʼ. w16.12 2:5, 7

Nuu tiru ruchiiñaʼ xiixa ni bíninu dxiqué laanu. Laaca zacá biʼniʼ sentir rey David ora guníʼ ique ca pecadu biʼniʼ. Ora bizeetebe de ca pecadu stibe, guniʼbe nabé naná biʼniʼ sentirbe ne casi ora nuxhaataʼ ñeecabe laabe (Sal. 38:3, 4, 8, 18). Despué biʼniʼ David ti cosa nabé galán, ne laanu laaca zanda gúninu ni bíʼnibe. Gúpabe confianza ziáʼ Jiobá laabe ne zuni perdonar laabe. Guizáʼ biecheʼ David ora gunna maʼ biʼniʼ perdonar Jiobá laa (Sal. 32:2, 3, 5). Nuu biaje, zándaca chuʼnu xizaa pur ca cosa ni cayácanu yanna. Dxi bicaa David Salmo 55, cadxibi purtiʼ nuu si de guuticabe laa (Sal. 55:2-5). Peru qué nudiibe lugar nusirá ansiedad que confianza ni nápabe Jiobá. Gunabaʼ David Jiobá gacané laa. Peru laaca nánnabe naquiiñeʼ gúnibe xiixa (2 Sam. 15:30-34). Xi sti cosa rizíʼdinu de David yaʼ. Lugar de guni controlar ansiedad laanu la? jma galán gúninu xiixa ni ganda gacané laanu guni chaahuinu guendanagana nápanu ne gápanu confianza zacané Jiobá laanu. w16.12 3:14, 15

Dxi guluu jneza Natán, ti profeta stiʼ Jiobá, David la? laa bicaadiaga. Laaca gudxi David Jiobá ca pecadu stiʼ. Zaqué bisihuínnibe racaláʼdxibe chuulaʼdxiʼ Jiobá ni rúnibe sti biaje (Sal. 51:1-17). Qué nudiibe lugar ñuniná xhaataʼ ca pecadu stibe laabe, sínuque biziidibe de laacani. Ne qué ñuuruʼ dxi ñúnibe ca cosa malu que sti biaje. Gupa si iza, dxi gútibe nácabe ti hombre ni napa fe, ne zacá nga rietenalaʼdxiʼ Jiobá laabe dede yanna (Heb. 11:32-34). Xi rizíʼdinu de ejemplu stiʼ David yaʼ. Pa gúninu xiixa cosa malu la? naquiiñeʼ gaca arrepentirnu de guidubi ladxidoʼno, gábinu Jiobá xi bíninu ne guinábanu laa guni perdonar laanu (1 Juan 1:9). Laaca naquiiñeʼ guinínenu ca ancianu, purtiʼ zacanecaʼ laanu gaca xhamígunu Jiobá sti biaje (Sant. 5:14-16). Gudiʼnu lugar gacané Jiobá laanu. Zacá zusihuínninu nápanu confianza ni maʼ bidii stiidxabe laanu: zuni perdonarbe laanu. Pa huacheʼnu la? guizíʼdinu de laacani ne gápanu confianza Jiobá ra gúninu xhiiñaʼ (Heb. 12:12, 13). w17.01 1:13, 14

Ximodo nga runi binni xiixa ni «gudxiibaʼ laca laa» yaʼ. Nga nga guni binni xiixa neca qué gapa derechu guni ni, ne zándaca rúnicabe ni purtiʼ orgulloso laacabe o purtiʼ qué gápacabe paciencia. Zándaca huayuu ora gúninu zacá purtiʼ binni ruchee laanu. Peru, pa qué gusaana binni de guni ni la? zuchiichicaʼ Jiobá, casi biʼniʼ rey Saúl. Salmo 119:21 ná ridindené Jiobá cani runi xiixa ni gudxiibaʼ laca laa. Xiñee rúnibe ni yaʼ. Nabé naxoo nga gaca binni orgulloso. Xiñee yaʼ. Primé la? rusihuínninu qué gápanu respetu Jiobá, Dios stinu ne ni runi mandar laanu. Guiropa, purtiʼ zápanu guendanagana né binni pa gúninu xiixa ni qué gápanu derechu gúninu (Prov. 13:10). Ne guionna, purtiʼ zándaca zatuí lunu ora gudii xcaadxi binni cuenta bíninu xiixa pur orgulloso laanu (Luc. 14:8, 9). Nga runi, napa Jiobá razón ora rabi laanu gápanu modestia. w17.01 3:4, 5

Pur ni biʼniʼ Adán que maʼ qué zanda gusihuinni ca cualidad stiʼ Jiobá cásipeʼ laacani. Binitilú Adán modo sicarú naguixhe Jiobá nibánicaʼ ne zaqueca ca xiiñicaʼ. Bisaanané Adán laacabe donda, guendaruchee ne guendaguti (Rom. 5:12). Pur ni biʼniʼ Adán que maʼ qué ñanda nibani ca xiiñibe sin ñáticaʼ. Maʼ qué ñanda ñapa Adán ne Eva xiiñicaʼ sin donda, nin ca xiiñicabe. Dede dxi bicaa Binidxabaʼ Adán ne Eva gucaalucaʼ Dios, qué huayanadxí Binidxabaʼ de gucaa guiráʼ binni guni zaqueca (Juan 8:44). Neca bisaana Adán ne Eva Jiobá, dede yanna nadxii Jiobá guiráʼ binni. Racaláʼdxiruʼ Dios gaca xhamigu binni ne qué racaláʼdxibe gatiʼ nin tobi de laacaʼ (2 Ped. 3:9). Nga runi nagueendaca bíʼnibe ni caquiiñeʼ para ganda gaca xhamigu binni laabe sti biaje (Juan 3:16). w17.02 1:12-14

Sti cosa ni zanda gúninu para gácanu modestu nga guidúʼyanu ca cosa galán runi xcaadxi binni, casi runi Jiobá. Xiñee yaʼ. Purtiʼ lugar de guyúbinu guyadxí binni laanu o gábinu xcaadxi binni xi naquiiñeʼ guni, zanábanu conseju laacaʼ ne zucaʼdiáganu ni gábicaʼ laanu. Ne ora guidúʼyanu ca cosa galán runi ca hermanu zacané ni laanu para chuʼnu nayecheʼ ora guicaacabe ti asignación especial. Ne laaca zudiʼnu xquíxepeʼ Jiobá purtiʼ rudii lugar guninenu xcaadxi hermanu xhiiñabe juntu (1 Ped. 5:9). Ca principiu stiʼ Biblia rusiidiʼ cani laanu xi runi sentir Jiobá ne xi riníʼ ique. Ora guidúʼyanu ca cosa riʼ casi ruuyaʼ Jiobá cani, zacaanu decisión ni gusiecheʼ laabe. Pa guni estudiarnu, guni orarnu ne gúninu ni cazíʼdinu la? zaquiiñenu conciencia stinu jma jneza ne zaníʼ íquenu xcaadxi binni primeru ante gúninu xiixa (1 Tim. 1:5). Pa gúninu ca cosa riʼ la? zacané Jiobá laanu gácanu cristianu runi ni jneza ne zácanu modestu (1 Ped. 5:10). w17.01 4:17, 18

Naquiiñeʼ guni respetarnu ne gusisácanu guiráʼ ca hermanu ne hermana. Peru jma naquiiñeʼ gusisácanu ca ancianu, ca superintendente de circuito, cani nuu lu Comité stiʼ ca Sucursal ne cani nuu lu Grupu ni Zaniruʼ. Biblia ná nácacabe casi ti regalu para ca congregación (Efes. 4:8). Nga runi jneza guni respetarnu laacabe gastiʼ naca padé laacabe, pabiáʼ scuela nápacabe, pa ricu o pa pobre laacabe. Bisaana ca xpinni Cristu de primé siglu que ti ejemplu galán para laanu. Laacabe bisisácacabe ca hermanu ni guzániruʼ ndaaniʼ ca congregación guyuu dxiqué, ne ngaca nga ni rúninu. Yanna, ora maʼ nuunenu ca hermanu riʼ juntu, qué runi tratarnu laacabe casi ángel o casi tuuxa jma risaca qué laanu. Ni rúninu nga runi respetarnu laacabe ne rusisácanu laacabe pur dxiiñaʼ nadipaʼ rúnicabe ne purtiʼ humilde laacabe (2 Cor. 1:24; Apoc. 19:10). w17.03 1:13

Gadxepeʼ guca xpiaʼ Jesús de Herodes Agripa I, rey de Judea. Ti dxi cayaca ti reunión especial, gucu Herodes lari risaca para guidxagayaa binni laa. Ora biʼyaʼ binni laabe ne binadiágacaʼ caniʼbe, bizulú guniʼcaʼ: «Dios nga ni caníʼ ca, cadi binni». Nabé guyuulaʼdxiʼ Herodes gusisácacabe laa. Peru «nin caʼru iluxe iníʼ be, bini huará ti ángel laabe purti qué nusisaca be Dios. Biguidxi be bicutiʼ dede ra guti be» (Hech. 12:21-23). Rihuínnica cadi Jiobá gulí laabe para gácabe xaíque. Gadxepeʼ modo guca Jesús, purtiʼ laa bisihuinni gulí Dios laa ne guiráʼ ora bisisaca Jiobá casi Xaíque ni jma nandxóʼ. Qué racalaʼdxiʼ Jiobá gaca Jesús Xaíque stiʼ xquidxi chupa chonna iza si. Biasa si Jesús de lade gueʼtuʼ, gudxi ca discípulo stiʼ: «Irá xixé ni nuu ibáʼ ne ni nuu guidxilayú ma nexhe ladxi nayaʼ» (Mat. 28:18). Ne laaca guniʼbe: «Laganna qué zaxeleʼ de laatu guiráʼ dxi dede ora guiluxe modo nabani binni guidxilayú» (Mat. 28:19, 20, TNM). w17.02 3:20, 21