Marzo

Gupa Jefté xcaadxi biʼchiʼ neza bixhoze si, o mediu hermanu. Peru guca nanalaʼdxiʼ ca bíʼchibe laabe ne bidxiichinecaʼ laabe. Ngue runi, guládxicaʼ laabe ne gúxhacaʼ laabe ca layú stibe (Juec. 11:1-3). Peru dxi gunábacabe Jefté gacané laacabe la? laa biʼniʼ ni (Juec. 11:4-11). Ni jma risaca para Jefté nga guni defender lá o nombre stiʼ Jiobá que intiica sti guendanagana. Cumu jma cá íquebe cadi gunítibe fe stibe la? guluu Dios ndaayaʼ laabe ne laaca guluu ndaayaʼ ca israelita (Heb. 11:32, 33). Ximodo zanda chinándanu ejemplu stiʼ Jefté yaʼ. Ziuu ora zándaca zucheené ti hermanu laanu o qué zuni tratar laanu jneza. Pa gaca nga la? qué chuʼ dxi gusaana de gúninu ni ná Jiobá, ne gusaana de chuunu ca reunión o gusaana de guidxaaganu ca hermanu stinu. Cásica biʼniʼ Jefté, gudiʼnu lugar gacané ca principiu stiʼ Jiobá laanu para guni chaahuinu intiica guendanagana ne gácanu ti ejemplu galán para xcaadxi (Rom. 12:20, 21; Col. 3:13). w16.04 1:7, 9, 10

Naquiiñeʼ guni huantarnu dede hora gueeda fin. Guzéʼtenu ejemplu stiʼ ti barcu ni maʼ cayaaziʼ. Pa racalaʼdxiʼ ca binni zeʼ ndaaniʼ ni guilacaʼ la? naquiiñeʼ xhúʼbacaʼ sin guidxágacaʼ dede guireecaʼ ra nabidxi. Zacaca nga laanu, pa racaláʼdxinu chuʼnu ndaaniʼ Paraísu la? naquiiñeʼ guni huantarnu dede ora gueeda fin ne qué chuʼ dxi guidxáganu. Napa xidé guininu casi guníʼ apóstol Pablo: «Qué riréʼ du gana» (2 Cor. 4:16). Cásica Pablo, runi crenu zacané Jiobá laanu guni huantarnu dede ora gueeda fin. Pablo bicaa: «Neca gueeda irá nga luguiá nu, qué zanda di usaba ni laanu, purti nadxii Cristu laanu. Nanna dxiʼche gasti zanda uxhele laanu de Dios ni nadxii laanu: nin enda guti, nin enda nabani, nin ángel, nin binidxabaʼ, nin ni riduʼya nu yanna riʼ, nin ni gueeda ruʼ, nin ni nuu ibáʼ, nin ni nuu xagueteʼ, nin gasti ru de irá ni bizáʼ Dios qué zanda uxhele laanu de Dios ni nadxii laanu, purti bisihuinni be pabiáʼ nadxii be laanu pur ni biʼni Jesucristu Señor stinu» (Rom. 8:37-39). w16.04 2:17, 18

Laaca zanda guinábanu Dios gudii laanu guendabiaaniʼ ti gácanu neutral ne gudii stipa laanu ti gúninu ni jneza. Zándaca gueeda guseguyoocabe laanu pur ruzúʼbanu stiidxaʼ Dios. Pa gaca nga guinábanu Jiobá gacané laanu gácanu nadxibalú ti ganda gusiénenu xiñee neutral laanu. Naquiiñeʼ chuʼnu seguru zacané Jiobá laanu guni huantarnu. Zanda guidúʼyanu ti ejemplu ni rusihuinni pabiáʼ naroʼbaʼ poder napa ti oración lu libru stiʼ Hechos 4:27-31. Maʼ bidii Jiobá laanu Biblia para gudii stipa laanu. Nuu versículo ni zanda gacané laanu gácanu neutral. Zanda guiníʼ íquenu lu cani ne gúninu stipa pur guizíʼdinu cani de memoria purtiʼ zándaca chuʼ dxi guiaadxaʼ ti Biblia laanu. Laaca zanda uquidxi Biblia esperanza stinu ti cadi guiaandaʼ laanu ca ndaayaʼ ni guedané Reinu stiʼ Dios. Caquiiñenu esperanza riʼ para guni huantarnu ora sanándacabe laanu (Rom. 8:25). Cuinu versículo ni caníʼ de guidxilayú cubi ne guxuíʼlunu ca ndaayaʼ ni zápanu raqué. w16.04 4:14, 15

Qué runi predicar diʼ ca xaíque stiʼ cristiandad de Reinu stiʼ Dios. Ora riníʼcabe de Reinu la? stale de laacabe riníʼ laani nga ti cosa ni runi sentir binni ndaaniʼ ladxidóʼ (Luc. 17:21). Qué rusiidicabe naca Reinu riʼ ti gobiernu ni nuu guibáʼ ne laaca qué rusiidicabe Jesús nga Rey stiʼ Reinu riʼ. Riníʼcabe de Jesús tiempu si raca Navidad ne Nabaana. Qué rusiidicabe zuni chaahuiʼ Reinu riʼ guiráʼ guendanagana napa binni ne maʼ cadi candaa para cuee ni guiráʼ cosa malu nuu lu Guidxilayú (Apoc. 19:11-21). Rihuinni qué gánnacabe xi chiguni Jesús casi Rey lu Reinu stiʼ Dios. Laaca qué riénecabe xiñee naquiiñeʼ gaca predicar. Cadi naquiiñeʼ diʼ gaca predicar para gaca ganar bueltu o para cuí edificiu de luju. Cadi naquiiñeʼ guʼyaʼ binni dxiiñaʼ riʼ casi ti negocio (2 Cor. 2:17). Cadi naquiiñeʼ guinabaʼ cani runi predicar quíxecabe laacaʼ pur ni rúnicaʼ (Hech. 20:33-35). w16.05 2:7, 8

Guxuíʼlunu nabé riuuláʼdxinu lari de ti estilu si. Peru nánnanu qué ziuulaʼdxiʼ caadxi hermanu de congregación stinu pa gácunu ni. Biblia cadi cuzeeteʼ diʼ xiixa de estilu ca. Yanna, ximodo zanda gánnanu xi riníʼ ique Jiobá de laani yaʼ. Biblia cudii conseju riʼ laanu: «Ne ca hermana la? cadi gacu ca lari ni cadi jneza gacu xpinni Cristu, nin uyubi ca chuʼlaʼdxi binni laaca pur modo guni ca ique caʼ o gaze ca oro o perla o gacu ca lari nabé risaca, sínuque uyubi ca chuʼlaʼdxi binni laaca purti nachaʼhui ca ne runi ca jneza casi naquiiñe guni ca xpinni Dios» (1 Tim. 2:9, 10). Naquiiñeʼ gánnanu gucuá conseju riʼ para guiráʼ xixenu, dede né para ca hermanu. Pa humilde laanu la? zaníʼ íquenu ximodo guʼyaʼ xcaadxi laanu né estilu ni racaláʼdxinu gácunu. Ne pa nadxiinu ca hermanu stinu la? zúninu stipa para cadi guchiichinu laacaʼ (1 Cor. 10:23; Filip. 3:17). w16.05 3:14

Dxi bicaalú Adán Dios ni bizáʼ laa, maʼ qué ñácabe xiiñiʼ Dios. Peru gudixhe ique stale de cani zá de laabe guni mandar Jiobá laacaʼ (Heb. 12:1). Cumu humilde laacabe la? bizuubacabe stiidxaʼ Dios ni bizáʼ laacabe. Zacá bidxiidéchecabe Binidxabaʼ ne bisihuínnicabe racaláʼdxicabe gaca Jiobá Bixhózecabe ne gacané laacabe guchaacabe (Juan 8:44). Cumu qué nusaanacabe Jiobá la? rusietenalaʼdxiʼ ni bíʼnicabe riʼ laanu ni zeeda lu textu cadúʼndanu yannadxí. Ca dxi riʼ, rúninu stipa pur gúninu cásica bíʼnicabe ne rácanu humilde ti guzúʼbanu stiidxaʼ Dios ni bizáʼ laanu. Para laanu nabé risaca guininu Jiobá nga Bixhózenu. Racaláʼdxinu gacanebe laanu guchaʼnu. Nga runi, naquiiñeʼ guinabadiidxanu: «Ñee zanda gacaʼ casi beñe ni iquiiñeʼ Dios para guzáʼ ti jarru sicarú la? Ñee ruuyaʼ xcaadxi hermanu casi jarru ni deruʼ caluxe cuzáʼ Jiobá la?». w16.06 1:2, 3

Ca dxi riʼ laaca maʼ gaxha nuunu de guidxilayú cubi stiʼ Dios ne cadídinu lu stale cosa ni cusihuinni pa dxandíʼ naguidxi fe stinu. Caquiiñepeʼ gánnanu pa naguidxi nuu fe stinu. Ximodo zanda gánnanu ni yaʼ. Guiníʼ íquenu ni guníʼ Jesús lu Mateo 6:33 ne guinabadiidxanu: «Rusihuinni ca decisión stinneʼ dxandíʼ runeʼ cré ca promesa stiʼ Jesús la? Maʼ qué ziaaʼ reunión ne maʼ qué zuni predicar para guneʼ ganar jma bueltu la? Xi guneʼ pa cabaʼnaʼ xhiiñaʼ tiempu ne stipa stinneʼ yaʼ. Ñee zudieeʼ lugar guchaa guidxilayú stiʼ Binidxabaʼ riʼ naa, dede gucaa ni naa gusaanaʼ de guneʼ ni ná Jiobá la?». Ñee ruzúʼbanu diidxaʼ ora ná Biblia cadi guidxaaganu binni ni qué runi ni jneza, ca expulsadu, ne ora ná Biblia cuinu xi gúninu para gaca divertirnu la? Pa qué guzúʼbanu diidxaʼ la? zándaca iguidxi ladxidoʼno. Pa cazaacanu nga la? naquiiñeʼ guidúʼyanu ximodo nuu fe stinu. Zanda gúninu nga pa qué gusiguiinu laca laanu, ne gatigá iquiiñenu Biblia para cueenu xiixa ni cadi jneza riníʼ íquenu. w16.06 2:8, 9

Ca xpinni Jiobá ni nuu lu Guidxilayú riʼ nácacaʼ ti grupu ni nuu organizadu, nadxiicaʼ Dios ne racaláʼdxicaʼ gúnicaʼ ni nabe. Laacabe nga ca testigu stiʼ Jiobá. Neca binni ruchee laacabe, riquiiñeʼ Jiobá espíritu santu stiʼ para guluíʼ laacabe xi gúnicabe ne para cuʼ ndaayaʼ laacabe. Lu iza 1914 que guizáʼ huaxiéʼ binni runi adorar Jiobá. Peru cumu caguube ndaayaʼ dxiiñaʼ cayuni ca xpínnibe la? maʼ biziidiʼ millón de binni ni dxandíʼ zeeda lu Biblia ne maʼ gúcacaʼ testigu stiʼ Jiobá. Maca guníʼ Jiobá ximodo guidale ca xpinni lu textu ni cadúʼndanu yannadxí, de raqué guníʼ: «Naa, Jiobá, naa chigutaleʼ ni ora maʼ guidxiña dxi». Rihuinni dxíchica cayaca ni ná profecía ca tiempu riʼ. Xquidxi Jiobá zeeda gaca casi ti guidxi nabé naroʼbaʼ purtiʼ napa ni jma de xhono millón binni. Jmápeca stale binni nuu ndaaniʼ xquídxinu que ca binni nuu ndaaniʼ stale guidxi roʼ ni nuu lu Guidxilayú. w16.06 4:1, 2

Nanna Jesús laaca zanda gapa Jiobá binni, cásica rapa Jiobá ca pájaru (1 Ped. 5:6, 7). Peru cásica laacame, laanu laaca naquiiñeʼ gúninu dxiiñaʼ. Naquiiñeʼ gudxíʼbanu ni guidoʼno o guni ganarnu bueltu para ganda sinu ni. Zaguu Jiobá ndaayaʼ stipa ni gúninu. Ne pa qué gápanu bueltu o guendaró la? zanda gudiibe laanu ni caquiiñepenu. Zándaca ziuu tu gudii laanu de ni napa. Jiobá laaca rudii ti lugar ra cueza ca pájaru. Bizaʼbe laacame para guzáʼcame lídxicame ne bíʼnibe ni caquiiñecame para gúnicame nidu stícame. Laaca zacané Jiobá laanu guidxélanu ti lugar ra guibaninenu familia stinu. Ora guníʼ Jesús ca diidxaʼ ni zeeda lu textu cadúʼndanu yannadxí la? zándaca guniʼbe cani purtiʼ maʼ cadi candaa diʼ para gudiibe xquendanabánibe pur guiráʼ binni (zanda gúʼyaluʼ xi ná Lucas 12:6, 7). Qué ñati diʼ Jesús pur ca manihuiiniʼ ripapa o pur sti clase maniʼ. Laabe gútibe pur laanu ti ganda guibáninu sin gátinu (Mat. 20:28). w16.07 1:11-13

Xiñee rucheʼnu ne rátinu. Biblia ná bizulú «bini mandar enda guti» pur bichee Adán. Xiiñiʼ Adán guiranu, nga runi naazeʼ dxiichiʼ pecadu ne guendaguti laanu (Rom. 5:12, 14, 17). Neca zacá, zanda quixhe íquenu cadi guni xhiiñaʼ pecadu luguianu. Ximodo yaʼ. Ra gápanu fe lu sacrificiu stiʼ Cristu. Zacá zudiʼnu lugar guni guendanachaʼhuiʼ stiʼ Dios dxiiñaʼ lu xquendanabáninu (Rom. 5:20, 21). Neca nácarunu binni ruchee, gastiʼ razón para gudiʼnu lugar guni xhiiñaʼ pecadu luguianu. Nga runi, ora rúninu xiixa ni cadi jneza la? rinábanu Jiobá guni perdonar laanu. Yanna, xi zabeendunu pa gudiʼnu lugar guni xhiiñaʼ guendanachaʼhuiʼ stiʼ Dios luguianu yaʼ. Pablo ná zusaananu «irá ni bini nu dxi caʼru gunibiáʼ nu [Dios], ne irá ni riulaʼdxi binni guidxilayú guni, ti ma cadi ibani nu ndaani guidxilayú ri modo na ique nu, sínuque modo riulaʼdxi be» (Tito 2:11, 12). w16.07 3:5, 6

Cumu qué nuzuubaʼ Adán ne Eva stiidxaʼ Jiobá la? maʼ qué ñuu xquendaxheelacaʼ galán. Bisiguii Binidxabaʼ, «beenda yooxho» que Eva ne gudxi laabe zánnabe xii nga cosa galán ne xii nga cosa malu pa gobe cuananaxhi cá lu «yaga stiʼ guendananna ni jneza ne ni cadi jneza». Qué ñuni respetar Eva xheelaʼ casi xaíque, purtiʼ qué niniʼné laabe ante ñó cuananaxhi que. Ne qué nuzuubaʼ Adán stiidxaʼ Dios ora gudó cuananaxhi bidii xheelaʼ laa (Apoc. 12:9; Gén. 2:9, 16, 17; 3:1-6). Ora gunabadiidxaʼ Jiobá Adán xiñee gudó cuananaxhi que la? bigaaniʼ donda xheelaʼ. Ne Eva bigaaniʼ donda beendaʼ que (Gén. 3:12, 13). ¡Qué lica risaca ca razón bidiicabe! Qué nuzuubaʼ Adán ne Eva diidxaʼ ne bicaalucaʼ Dios. Ngue runi guníʼ Jiobá záticabe. Xi rusiidiʼ ejemplu stiʼ Adán ne Eva laanu yaʼ. Pa racalaʼdxiʼ ca guendaxheelaʼ guibánicaʼ galán la? naquiiñeʼ gudxiilucaʼ intiica guendanagana gápacaʼ pur ca decisión sticaʼ. w16.08 1:1, 4, 5

Xiñee rapa caadxi guendaxheelaʼ guendanagana naroʼbaʼ yaʼ. Nuu tu riuu triste o dede ridxiichi purtiʼ maʼ gadxé modo guníʼ ique nibaniné xheelaʼ. Stale biaje rápacabe guendanagana purtiʼ maʼ gadxé modo biniisicabe o purtiʼ gadxé gadxé ca sentimientu stícabe. Nuu biaje rápacabe guendanagana pur familia stiʼ xheelacabe, pur bueltu o pur modo gusiniisicabe xiiñicabe. Peru galán ridúʼyanu rudii stale de ca xpinni Cristu ni maʼ bichaganáʼ lugar gusiene Dios laacaʼ, nga runi randa runi chaahuicaʼ guendanagana sticaʼ. Ora nadipaʼ guendanagana stiʼ cani maʼ bichaganáʼ, naquiiñeʼ guinábacaʼ gacané ca ancianu laacaʼ. Napa ca ancianu stale experiencia ne zanda gacanecaʼ laacabe chinándacabe ca conseju stiʼ Dios. Ne pa guinabaʼ cani maʼ bichaganáʼ gudii Jiobá espíritu santu laacaʼ la? zanda chinándacaʼ ca principiu zeeda lu Biblia ne gápacaʼ ca cualidad ni naquiiñeʼ gapa ca xpinni Cristu (Gál. 5:22, 23). w16.08 2:11-13

Nabé guyuu xhiiñaʼ Jesús. Peru ora racalaʼdxiʼ binni gucaadiaga laabe la? bisiidibe laacaʼ stale cosa. Ti dxi bidxiña ti grupu de binni laabe ruaa ti nisa. Gudxiʼbaʼ Jesús ndaaniʼ ti canuá ne laaca gudxiʼbaʼ Pedro, de raqué bisiidicabe binni. Biluxesícabe, laaca bisiidibe Pedro xiixa. Bíʼnibe ti milagru para guinaazeʼ Pedro stale benda. Óraque gúdxibe laa ca diidxaʼ zeeda lu textu cadúʼndanu yannadxí. Biblia ná bisaana Pedro ne xcaadxi hombre que «irá ni raqué» ne yenándacaʼ Jesús (Luc. 5:1-11). Ti hombre láʼ Nicodemo laaca nabé racalaʼdxiʼ gusiidiʼ Jesús laa jma. Peru laabe nga tobi de cani nuu lu tribunal stiʼ ca judíu. Ngue runi cadxíbibe guʼyaʼ binni laabe né Jesús. Yegánnabe Jesús ti huaxhinni. Galán modo bidxaagalú Jesús laabe ne bisiidiʼ laabe ni zeeda lu Stiidxaʼ Dios (Juan 3:1, 2). Gulee Jesús tiempu para gusiidiʼ binni ne gucané laacabe iguidxi fe stícabe. Laaca naquiiñeʼ guibiguétanu ra nuu binni ne cueenu tiempu para gacanenu laacaʼ guiénecaʼ Biblia. w16.08 4:10, 11

Laaca rihuinni modestu ne humilde laanu ora guidúʼyanu ximodo nuunu para gánnanu pa cayuni cumplirnu né ca norma stiʼ Jiobá. Naquiiñeʼ gánnanu naca Jiobá ti Dios nayá, ne ca ley stibe nga cani jma jneza para laanu. Pa racaláʼdxinu gácanu binni nuu xpiaaniʼ ne humilde la? zúninu ni ná ca ley stibe. Laaca rusihuínninu modestu laanu ora runi respetarnu sentimientu stiʼ xcaadxi binni ne modo riníʼ íquecaʼ. Nga runi, ora rinándanu ca norma stiʼ Jiobá ne qué rúninu xiixa ni guchiichi stobi la? rusihuínninu canazanenu Dios né modestia. Naquiiñeʼ gudii ca hermanu cuenta —dede né binni ni cadi xpinni Cristu— dxandíʼ xpinni Jiobá laanu pur modo rácunu lari. Ca ley stiʼ Jiobá nabé jneza cani, ne rinándanu cani purtiʼ riale de laanu gúninu ni. Naquiiñeʼ guni felicitarnu ca hermanu ne ca hermana ni racu lari jneza ne pur conducta galán sticaʼ, purtiʼ racanécabe binni chuulaʼdxiʼ guiziidiʼ jma de Biblia ne purtiʼ rusisácacabe Dios né guendanayecheʼ. w16.09 3:18-20

Xiñee gunda bidxiilú Jacob ti ángel yaʼ. Cadi purtiʼ si nadípabe, sínuque purtiʼ gucuá íquebe gúnibe stipa para guicaabe ndaayaʼ stiʼ Jiobá (Gén. 32:24-26). Ne gucuaabe ni. Guluu Jiobá ndaayaʼ laabe purtiʼ qué nireebe gana dede ora gucuaabe ni. Ngue runi gulee lá Dios laabe Israel, ni riníʼ «Ni rudxiilú Dios». Ne bidii Jiobá laabe ndaayaʼ stiʼ ne guyuulaʼdxiʼ cani bíʼnibe. Raquel nga xheelaʼ Jacob, ne nabé gunnaxhii Jacob gunaa riʼ. Laaca racalaʼdxiʼ Raquel guʼyaʼ ximodo guni cumplir Jiobá ni bidii stiidxaʼ xheelabe. Peru qué ganda gapa Raquel xiiñiʼ. Ne para ca gunaa ni bibani dxiqué nabé triste ngue ora qué gápacaʼ xiiñicaʼ. Xi biʼniʼ Raquel yaʼ. Qué ñuu dxi niníʼ íquebe qué zanda gápabe xiiñibe. Ne para gusihuínnibe cudxiilube que la? qué nusaana de ñuni orarbe Jiobá. Bicaadiaga Jiobá ca oración ni bíʼnibe de guidubi ladxidoʼbe, ne bedandá dxi gúpabe xiiñibe (Gén. 30:8, 20-24). w16.09 2:6, 7

Laaca risaca gusiidiluʼ ca xiiñiluʼ jma nayecheʼ zabánicaʼ pa chinándacaʼ ni ná Biblia (Sal. 1:1-3). Zanda gábiluʼ laacabe guxuíʼlucabe nindézacabe lu ti isla ne naquiiñeʼ cuícabe caadxi binni para cuezané laacabe raqué. De racá gunabadiidxaʼ laacabe: «Tu clase binni nibitu ti nibánitu galán ne ñuutu tobi si yaʼ». Óraca zanda gúʼndaneluʼ laacabe Gálatas 5:19-23 ti gúʼyacabe tu clase binni nga racalaʼdxiʼ Jiobá guibani ndaaniʼ guidxilayú cubi. Zacá zanda gusiidiluʼ xiiñiluʼ chupa cosa nabé risaca. Primé, cusiidiʼ Jiobá laanu guibáninu nayecheʼ ne chuʼnu tobi si né xcaadxi binni yanna. Ne guiropa, cusiidibe laanu ximodo guibáninu ndaaniʼ guidxilayú cubi ca (Is. 54:13; Juan 17:3). Laaca zanda gusiidiluʼ ca xiiñiluʼ ximodo huayacané Biblia xcaadxi hermanu. Biyubi historia stiʼ tuuxa ni biree lu tobi de ca publicación stinu, casi cani reeda lu revista Torre stiʼ ni rapa lu ndaa ni láʼ «Gucané Biblia laacabe para bichaacabe». w16.09 5:13, 14

Naquiiñeʼ cueenu tiempu para estudiu personal ne para gápanu adoración en familia (Efes. 5:15). Ora guidúʼndanu la? cadi guicá íquesinu gúʼndanu stale yaza stiʼ Biblia o stiʼ ca publicación, o guyúbisinu xi guicábinu lu ca reunión. Naquiiñeʼ guidúʼndanu Stiidxaʼ Dios ne chindá ni ndaaniʼ ladxidoʼno ne guquidxi ni fe stinu. Naquiiñeʼ gácanu equilibradu ora guni estudiarnu: guiníʼ íquenu de cani caquiiñenu cadi ni caquiiñeʼ si sti binni (Filip. 1:9, 10). Ora maʼ cadúʼndanu para chiguni predicarnu, para ca reunión, para gudiʼnu ti discursu o ti demostración, nuu biaje qué riníʼ íquenu ximodo zanda gacané cani laanu. Guzéʼtenu ejemplu stiʼ ti cocineru. Neca laabe nga naquiiñeʼ guni pruébabe guendaró gúnibe ante gudiibe ni gó binni, qué zanda guidxá ndaanibe né ni guni pruébasibe. Pa racaláʼdxibe chuʼbe nazaaca la? gatigá naquiiñeʼ gúnibe guendaró ni gudii stipa laabe. Zacaca nga laanu, pa racaláʼdxinu chuʼnu gaxha de Jiobá la? naquiiñeʼ guidúʼndanu Biblia guiráʼ dxi ne quixhe íquenu guidxélanu ni gacané laanu. w16.10 2:10, 11

Chupa modo nga rusiene Biblia xii nga fe (Heb. 11:1, TNM). Primé la? nani fe nga «chuʼnu seguru de ca cosa ni cabézanu». Ca cosa ni cabézanu nga cani maʼ bidii stiidxaʼ Dios chiguni. Nuunu seguru zabeebe guiráʼ cosa malu ne ziuu ti guidxilayú cubi. Ne guiropa, Biblia ná fe nga «ca cosa ni runi crenu dxandíʼ zaca neca qué rihuinni cani». Caadxi de cani dxandíʼ nuu peru qué ridúʼyanu nga Jiobá, Jesucristu, ca ángel ne Reinu ni nuu guibáʼ. Ximodo rusihuínninu dxandíʼ nápanu fe lu cani maʼ bidii stiidxaʼ Dios ne lu ca cosa ni qué ridúʼyanu yaʼ. Rusihuínninu ni pur modo nabáninu ne pur ni rininu ne pur cani rúninu. w16.10 4:6

Para Jiobá ne Jesús nabé risaca guiráʼ dxiiñaʼ ni rúninu pur Reinu, neca huaxiéʼ nga ni gúninu o ni gudiʼnu pur modo nuunu o pur modo nabáninu (Luc. 21:1-4: 2 Cor. 8:12). Guzéʼtenu ti ejemplu. Ca hermanu ni maʼ nagola la? rúnicaʼ stale stipa para checaʼ reunión, para guicábicaʼ luni ne para guni predicarcaʼ gatigá. Ñee riguʼnu gana laacabe ne runi felicitarnu laacabe pur ca stipa ni cayúnicabe la? Guyúbinu modo uguʼnu gana stobi ora tiisi. Pa guidúʼyanu guni tuuxa xiixa cosa galán, guni felicitarnu laabe pur ni bíʼnibe. Guiníʼ íquenu ni bizaaca Pablo ne Bernabé dxi nuucaʼ ndaaniʼ guidxi Antioquía de Pisidia. Ca xaíque yuʼduʼ ni nuu guidxi que guniʼcaʼ: «Bíchecaʼ, pa nápatu xiixa diidxaʼ ni uguu gana guidxi ca la? laguiníʼ ni» (Hech. 13:15, TNM). Bizuluca Pablo guluu gana cani nuu raqué né ti discursu sicarú (Hech. 13:13-16, 42-44). Pa zanda guininu xiixa ni uguu gana stobi la? gúninu ni. Pa gápanu costumbre de uguʼnu gana xcaadxi binni la? zándaca laaca zaguucabe gana laanu (Luc. 6:38). w16.11 1:3, 15, 16

Ti ndaayaʼ naroʼbaʼ nga chuʼnu ndaaniʼ organización stiʼ Jiobá ne gánnanu xii nga racaláʼdxibe gúninu. Dxandíʼ, cumu nánnanu xii nga ni riuuláʼdxibe la? napa xidé guzúʼbanu stiidxabe ne gúninu ni jneza. Stale binni riuulaʼdxiʼ guni cosa malu. Peru laanu naquiiñeʼ gacananaláʼdxinu ca cosa malu riʼ casi nanalaʼdxiʼ Jiobá cani (Sal. 97:10). Cadi naquiiñeʼ gácanu casi cani riníʼ ique «ni jneza nga cadi jneza ne ni cadi jneza nga jneza» (Is. 5:20). Racaláʼdxinu chuulaʼdxiʼ Jiobá modo laanu. Nga runi maʼ gudixhe íquenu gácanu nayá en sentidu físicu, moral ne espiritual (1 Cor. 6:9-11). Nánnanu para cueendunu ni galán nga rabi Jiobá laanu né Biblia xi gúninu. Ne laaca nadxiinu laabe ne qué racaláʼdxinu gusaananu laabe. Nga runi, rúninu ni ná ca ley stibe ndaaniʼ lídxinu, ndaaniʼ congregación, ra dxiiñaʼ, ra scuela o ra tiica nuunu. w16.11 3:13

Dxandíʼ racalaʼdxiʼ ca Binni Ruundaʼ Biblia gúnicaʼ ni ná Biblia. Peru dede iza 1914 hasta 1919 bihuinni caʼruʼ guiene chaahuicabe xipeʼ nga ná Biblia ora runi mandar laanu guzúʼbanu stiidxaʼ ca gobiernu. Ngue runi cadi guiráʼ ora gúcacabe neutral tiempu guca guerra que. Ti ejemplu de laani nga dxi gunabaʼ presidente stiʼ Estados Unidos guiráʼ binni guni orarcaʼ para chuʼ guendariuudxi 30 de mayo iza 1918. Revista Torre stiʼ ni rapa ni biree lu diidxaʼ inglés, laaca bicaa ni ca Binni Ruundaʼ Biblia gúnicaʼ zaqueca. Guyuu hermanu bidii bueltu para guerra que, ne guyuu xcaadxi dede gúcacaʼ soldadu ne guyecaʼ lu guerra. Nga rusihuinni caquiiñeruʼ guiene chaahuicabe caadxi cosa. Peru cadi pur nga guiníʼ íquenu guyuucabe de esclavu Babilonia. Ni dxandíʼ nga maʼ casi bixélecabe de guiráʼ ni runi religión falsa tiempu guca Primera Guerra Mundial que (Luc. 12:47, 48). w16.11 5:9

Zándaca guinabadiidxanu xiñee gudxi Pablo ca xpinni Cristu ni bibí cadi guibánicaʼ casi ná íquecaʼ. Ñee laaca zanda guiaba ca cristianu, cani ruuyaʼ Dios casi xhaminu lu trapa riʼ yanna la? Triste guininu ni, peru zándaca málasi guzulú ti xpinni Cristu guibani casi ná ique ne guni cosa malu. Guzéʼtenu ti ejemplu. Pablo guníʼ nuu caadxi hermanu de Roma nácacaʼ esclavu stiʼ cani riuuláʼdxicaʼ gúnicaʼ. Zándaca ni guniʼbe nga jma risaca para ca binni que gúnicaʼ ni ná ca deseu sexual sticaʼ, gocaʼ ne gúnicaʼ xcaadxi cosa ni riuuláʼdxicaʼ (Rom. 16:17, 18; Filip. 3:18, 19; Jud. 4, 8, 12). Dede guyuu ti xpinni Cristu ndaaniʼ guidxi Corinto ni gulezané madrastra stiʼ (1 Cor. 5:1). Nga runi riénenu xiñee biquiiñeʼ Dios apóstol Pablo para gudii conseju ca xpinni Cristu de primé siglu ti cadi guibánicaʼ casi ná íquecaʼ (Rom. 8:5, 6). Laaca caquiiñeʼ gucaʼdiáganu conseju que yanna riʼ. w16.12 2:5, 8, 9

Sti cosa ni zanda gacané laanu para cadi chuʼnu xizaa nga gábinu tuuxa ni nápanu confianza ca cosa ni naguu xizaa laanu ne ximodo cayuni sentirnu. Zándaca gacané xheelanu, ti xhamígunu o ti ancianu ni nuu ndaaniʼ congregación laanu guiénenu xipeʼ nga cazaacanu. Ne laaca rabi Biblia laanu qué riree diʼ xiixa cosa galán ora qué rinabaʼ tobi conseju sti binni (Prov. 15:22). Laaca riquiiñeʼ Jiobá ca reunión ni rápanu guiráʼ semana para gacané laanu gudxíʼlunu ansiedad o para cadi chúʼpenu xizaa. Lu ca reunión riʼ nga ridxaaganu ca hermanu stinu. Ca hermanu riʼ rizaaláʼdxicaʼ laanu ne racaláʼdxicaʼ uguucaʼ gana laanu (Heb. 10:24, 25). Pa ugúʼsaanu gana laanu ora maʼ nuunu ra Yoo stiʼ Reinu la? zápanu stipa ne zacané ni laanu gudxíʼlunu intiica guendanagana gápanu (Rom. 1:12). w16.12 3:17, 18

Ora gápanu ti guendahuará o sti clase guendanagana, ne qué zanda guchaʼnu modo nuunu la? naquiiñeʼ gusaananu ca cosa ca lu náʼ Jiobá ne guni crenu rizaaláʼdxibe laanu (1 Ped. 5:6, 7). Guyúbinu modo cueendunu ni galán lu ca reunión ni rápanu ne lu xcaadxi cosa ni rudii xquidxi Jiobá laanu (Heb. 10:24, 25). Xi zanda guni ca hermanu fiel ni napa xiiñiʼ ni maʼ bixeleʼ Jiobá yaʼ. Ejemplu stiʼ profeta Samuel zanda gacané laacabe. Cumu maʼ huaniisi ca xiiñiʼ Samuel la? qué ñanda diʼ nucaa hombre riʼ laacabe ñúnicabe ni ná Dios (1 Sam. 8:1-3). Ngue runi bisaanabe ni lu náʼ Jiobá. Peru bíʼnibe stipa pur cadi gusaanabe Bixhózebe ni nuu guibáʼ ne gusiéchebe ladxidóʼ (Prov. 27:11). Yanna riʼ, stale hermanu ni napa xiiñiʼ laaca zaqueca nabánicaʼ. Nápacabe confianza zaná Jiobá guibiguetaʼ ca binni ruchee ni gaca arrepentir ra nuu (Luc. 15:20). Laga cabézacabe gaca ni la? riguixhe íquecabe gácabe leal né Jiobá ne ribézacabe gacané ejemplu stícabe ca xiiñicabe para guibiguétacaʼ ndaaniʼ congregación. w17.01 1:15, 16

Ti binni humilde la? laaca rusihuinni napa modestia, nanna nuu cosa ni qué zanda guni ne ora guchee riníʼ dxandíʼ biʼniʼ ni. Laaca riná gucaadiaga ni gabi xcaadxi binni laa ne riziidiʼ de laacabe. Nabé rusisaca Jiobá ca binni humilde. Ti binni modestu la? ná Biblia runibiáʼ laca laa ne nanna nuu ni qué zanda guni o qué gapa permisu guni ni. Ne ngapeʼ nga ni racané laa guni respetar xcaadxi binni ne gaca nachaʼhuiʼ ora guni tratar laacabe. Pa qué gápanu cuidadu la? zándaca guzulú gácanu orgulloso sin gudiʼnu cuenta. Ximodo nga yaʼ. Zándaca guzulú guiníʼ íquenu jma risácanu que xcaadxi purtiʼ nápanu xiixa privilegiu ndaaniʼ congregación o purtiʼ napa ca xhamígunu ni (Rom. 12:16). O zándaca guzulú gúninu xiixa para si guyadxí binni laanu (1 Tim. 2:9, 10). Dede zándaca maʼ guzulú gábinu xcaadxi binni xi gúnicaʼ o xi cadi naquiiñeʼ gúnicaʼ (1 Cor. 4:6). w17.01 3:6-8

Tiempu riʼ, zeʼ dxi jma stale dxiiñaʼ nápanu para guni predicarnu ne organización stiʼ Dios caquiiñeʼ tecnología nuu yanna para guni predicarnu ra nuu guiráʼ binni. Peru ca hermanu ni maʼ huaniisi nuu biaje raca nagana para laacaʼ guchaacaʼ modo rúnicaʼ dxiiñaʼ (Luc. 5:39). Ne rirá stipa stiʼ binni ora maʼ ziniisi. Nga runi, galán gaca capacitar ca hermanu jma nahuiiniʼ para ganda gúnicaʼ dxiiñaʼ ndaaniʼ congregación (Sal. 71:18). Nagana raca para ca hermanu ni napa xiixa privilegiu gudiicaʼ dxiiñaʼ ca hermanu ni jma nahuiiniʼ. Zándaca guni sentírcabe triste ora guiníʼ íquecabe maʼ chigusaanacabe ti asignación riuuláʼdxicabe. Ne laaca zándaca guiuubaʼ ladxidóʼcabe ora guiníʼ íquecabe maʼ chiguni stobi dxiiñaʼ ni nabé risaca para laacabe. O zándaca guiníʼ íquecabe qué gápacabe tiempu para guni capacitárcabe stobi. Peru ca joven laaca naquiiñeʼ gápacaʼ paciencia ora qué guicaacaʼ dxiiñaʼ ra ridagulisaacaʼ. w17.01 5:3, 4

Beeda gaca Jesús ti hombre sin donda, cásica guca Adán (Juan 1:14). Peru qué ñaca diʼ Jesús casi Adán. Xiñee yaʼ. Purtiʼ biʼniʼ Jesús ni ná ca ley ni racalaʼdxiʼ Dios guni ti hombre sin donda. Neca gudiʼdiʼ Jesús lu ca prueba jma nagana, qué nusaana de ñuni ni ná ca ley stiʼ Dios. Ra bidii Jesús guendanabani sin donda stiʼ pur binni, gunda bilá laanu de guendaruchee ne guendaguti. Laabe gúcabe casi naquiiñeʼ ñaca Adán. Gúcabe ti hombre sin donda ni qué nusaana Dios ne bizuubabe stiidxaʼ (1 Tim. 2:6). Guiráʼ binni, hombre, gunaa ne xcuidi nápanu oportunidad de guibáninu sin gátinu pur sacrificiu stiʼ Jesús (Mat. 20:28). Casi maʼ bidúʼyanu, nabé riquiiñeʼ sacrificiu stiʼ Jesús para gaca ni gudixhe ique Dios (2 Cor. 1:19, 20). w17.02 1:15, 16

Bixuiʼlú nuuluʼ ndaaniʼ ti túnel guizáʼ ziuulaʼ ne nacahui. Laaca rinabadiidxaluʼ pa zuuyaluʼ biaaniʼ sti biaje ra guiluxe túnel que. Zacaca nga guendanabani stinu. Zándaca ziuu ora zadídinu ra nagana ne ziuʼnu xizaa. Dede Jesús laaca biʼniʼ sentir zacá. Ora bicaacabe laabe lu madero que para gátibe, bisituícabe lube ne bininácabe laabe stale. Ngue nga ca cosa ni jma triste gudíʼdibe lu Guidxilayú (Heb. 12:3). Jma bicaa ique Jesús ca cosa ni zabeendú pa guni huantar, tobi de laani nga zacané guiá lá Dios, o nombre stiʼ, ne zusihuinni Jiobá si nga napa derechu para guni mandar. Nánnabe zaluxe prueba cadíʼdibe, peru qué ziuu dxi guiluxe premiu nuu para laabe guibáʼ. Ora gápanu guendanagana la? chinándanu ejemplu stiʼ Jesús. Ximodo yaʼ. Ra guiníʼ íquenu guiráʼ ca cosa galán zabeendunu ne guietenaláʼdxinu zadxiña dxi zaluxe ca guendanagana stinu. w16.04 2:10

Tiempu riʼ stale binni qué ruchiiñaʼ xquendabiaaniʼ laa ora ruchee. Nga runi, qué riénecabe ximodo runiná ni laacabe, xi naquiiñeʼ gúnicabe para gusaana de gácacabe esclavu stiʼ pecadu ne pa caquiiñecabe sacrificiu stiʼ Jesús. Pa nayá ladxidóʼcabe la? riéchecabe ora riziidicabe biseendaʼ Dios Xiiñiʼ lu Guidxilayú riʼ para cuee laanu de lu náʼ pecadu ne guendaguti. Ne laaca riziidicabe biʼniʼ Jiobá ni purtiʼ nadxii laanu ne pur nachaʼhuiʼ né laanu (1 Juan 4:9, 10). Bisihuinni Dios nadxii laanu ora bidii Xiiñiʼ, Cristu, gatiʼ pur laanu, zacá bisihuinni Dios pabiáʼ nachaʼhuiʼ né laanu. Ratadxí ladxidoʼno ora gánnanu zanda guni perdonar Dios ca pecadu stinu ne zanda chuʼ conciencia stinu nayá, pa gápanu fe lu sacrificiu stiʼ Jesús (Heb. 9:14). ¡Guizáʼ galán ca ndaayaʼ riʼ, njaʼ! Cadi dxandíʼ racaláʼdxinu gusíʼdinu ni guiráʼ binni la? w16.07 4:6, 7

Maʼ bidii stiidxaʼ Jiobá laanu zanda guxhiá stóndanu pa gápanu fe lu sacrificiu stiʼ Jesús. Ndiʼ riníʼ zanda guni perdonarbe guiráʼ stóndanu (Hech. 3:19-21). Pur sacrificiu stiʼ Jesús randa ricaa Jiobá caadxi binni casi xiiñiʼ para guibánicaʼ guibáʼ. Laacabe nga ca xpinni Cristu ni bibí (Rom. 8:15-17). Sti cosa ni maʼ bidúʼyanu nga cayuni invitar Jiobá ca xpinni Cristu ni zeeda gaca «xcaadxi dendxu» gácacaʼ parte de familia stibe lu Guidxilayú. Ora maʼ perfectu laacabe, zadíʼdicabe últimu prueba. Pa qué gusaanacabe Jiobá la? laa zacaa laacabe ne laaca zácacabe xiiñiʼ (Rom. 8:20, 21; Apoc. 20:7-9). Qué zusaana Jiobá de gannaxhii ca xiiñiʼ. Ne pur sacrificiu stiʼ Jesús, qué zusaana de guicaanu ndaayaʼ. Maʼ bidii Jiobá laanu regalu riʼ ne guirutiʼ qué zaxha ni laanu. w17.02 2:15, 16

Dxi guca xhamigu Jiobá laanu la? nánnabe imperfectu laanu ne rucheʼnu. Neca zacá, biale de ladxidoʼbe gaca xhamígube laanu. Cumu nabé nadxii Jiobá laanu la? bidii laanu ti regalu nabé risaca: sacrificiu stiʼ Xiiñiʼ ni nadxii (Juan 3:16). Ora gucheʼnu la? zanda guinábanu Jiobá guni perdonar laanu. Pur regalu risaca riʼ zándaruʼ gaca xhamígunu Jiobá neca gucheʼnu, peru naquiiñeʼ gaca arrepentirnu ne guinábanu guni perdonarbe laanu. Ñee cadi dxandíʼ rudiʼnu xquíxepeʼ Jiobá purtiʼ xhamigu laanu neca binni imperfectu laanu la? (1 Tim. 1:15). w16.05 4:6, 7