Mayo

Lu ca últimu iza riʼ stale binni huaree de xquidxi ne nuucaʼ de refugiadu ndaaniʼ sti guidxi. ¿Xiñee que guizíʼdinu ugapadiúxinu laacabe lu stiidxacabe? Despué zanda guluinu laacabe videu ne publicación lu stiidxacabe ni nuu lu sitiu jw.org. Para ganda guni predicarnu jma jneza la? rudii Jiobá laanu ni caquiiñenu, tobi de laani nga reunión ni láʼ Xhiiñaʼ Dios ne modo nabáninu. Ca sugerencia ni ricaanu lu ca reunión riʼ racané cani laanu cadi guidxíbinu ora gúninu revisita ne ora gudiʼnu estudiu. Nga runi, jneza runi ca hermanu ora rusiidicaʼ xiiñicaʼ guni comentar ti guzaaniʼ xiiñicabe casi biaaniʼ. Nuu biaje, comentariu ni gudii ti xcuidihuiiniʼ de guidubi ladxidóʼ rucaa ni ti binni ni maʼ huaniisi gudii cuenta dxandíʼ ni rizíʼdinu (1 Cor. 14:25). w18.06 22, 23 párr. 7-9

Cadi guiaandaʼ laanu dxiqué zitu guyuʼnu de Dios (Efes. 2:12). Peru gulidxi Jiobá laanu ra nuu purtiʼ nadxii laanu (Os. 11:4; Juan 6:44). Ne bidxaagalú Jesús laanu né stale guendanayecheʼ. Bixhélebe ti puertaʼ para ganda chuʼnu lade familia stiʼ Dios. Biblia ná: «Lachuu nayecheʼ ora guidxaagalutu stobi, cásica bidxaagalú Cristu laatu né guendanayecheʼ, ti guisaca Dios». Pa bidxaagalú Jesús laanu sicaríʼ neca nácanu binni ruchee la? zacaca naquiiñeʼ guidxaagalunu xcaadxi binni. Tiempu riʼ, ra mayaca guinitilú guidxilayú malu riʼ, jmaruʼ si nanaláʼdxisaa binni, cadi nuucaʼ tobi si ne rúnicaʼ menu sti binni (Gál. 5:19-21; 2 Tim. 3:13). Peru laanu, ca xpinni Dios, ruyúbinu gusiidiʼ Jiobá laanu purtiʼ biaʼca risaca guiráʼ binni nezalube ne purtiʼ riuuláʼdxibe chuʼ xquídxibe tobi si (Sant. 3:17, 18). Riéchenu nápanu xhamígunu de xcaadxi guidxi, runi respetarnu laacaʼ ne cultura sticaʼ dede rizíʼdinu idioma sticaʼ. Pa gúninu casi bizéʼtenu riʼ, zápanu guendariuudxi «cásipeʼ ti guiiguʼ» ne guendaruni ni jneza «casi ola nisadóʼ» (Is. 48:17, 18). w18.06 12 párr. 18,19

Ca soldadu ni qué chiné zapatu stiʼ la? cadi nuu listu para tinde. Ca zapatu o guelaguidi ni biquiiñecabe dxiqué gúpacani chonna capa de guidi, nga runi guizáʼ naguidxi gúcacani. Galán modo guyáʼ cani ngue runi qué runiná ni ñeecabe. Biquiiñeʼ ca soldadu romanu zapatu riʼ para checaʼ lu guerra, peru laanu, ca xpinni Cristu riquiiñenu ti zapatu simbólicu para guni predicarnu ca noticia galán ni riguixhedxí ladxidóʼ binni (Is. 52:7; Rom. 10:15). Peru neca zacá, riquiiñeʼ gácanu nadxibalú para guni predicarnu. Ti joven, ni napa gande iza láʼ Bo ná: «Dxiqué ridxibeʼ guneʼ predicar ca xcompañeruaʼ de ra scuela. Purtiʼ rituiluaʼ. Qué gannaʼ xiñee bineʼ sentir zaqué. Yanna guizáʼ maʼ riuuladxeʼ guneʼ predicar ca hombrehuiiniʼ ni biaʼca naa». Stale joven maʼ bidii cuenta ora raca prepararcaʼ dede ante qué ridxíbicaʼ guni predicarcaʼ. w18.05 29 párr. 9-11

Gudxi Jesús ca apóstol stiʼ ca diidxaʼ riʼ: «Zaguixhe dxie ladxidóʼ to casi nexhe dxí ladxiduáʼ» (Juan 14:27). Nánnanu riuulaʼdxiʼ Jiobá ne Jesús ora runi huantarnu lu predicación ne nga riguixhedxí ladxidoʼno (Sal. 149:4; Rom. 5:3, 4; Col. 3:15). Gudxi si Jesús ca apóstol stiʼ chuʼcaʼ nayecheʼ la? bisiénebe laacaʼ pabiáʼ risaca gusihuínnicaʼ guendarannaxhii ne cadi cuézacaʼ guicaacaʼ xiixa (Juan 15:11-13). Despué gúdxibe laacaʼ: «Xhamigua laatu». Ti regalu guizáʼ galán ni gupa ca apóstol que nga gaca xhamígucaʼ Jesús. ¿Xi caquiiñeʼ gúnicabe para cadi gusaana de gaca xhamígucabe laabe yaʼ? Cadi naquiiñeʼ gusaanacabe de guni predicárcabe (Juan 15:14-16). Chupa iza ante, gudxi Jesús laacabe guiníʼcabe: «Ma zeda dxiña dxi guni mandar Dios» (Mat. 10:7). Ngue runi, últimu gueelaʼ guyuu Jesús lu Guidxilayú riʼ, guluube gana ca apóstol stibe guni huantarcaʼ ne cadi gusaana de gúnicaʼ dxiiñaʼ ni bisaananebe laacaʼ (Mat. 24:13; Mar. 3:14). w18.05 20, 21 párr. 15, 16

Zándaca xcaadxi joven de biaʼ iza stiluʼ nisi ricá íquecaʼ gaca divertircaʼ ne zándaca gucaacaʼ lii gúniluʼ ni rúnicaʼ. Peru cadi guiaandaʼ lii zedandá dxi zusihuínniluʼ pa maʼ nuuluʼ listu para guni cumplirluʼ ca meta ni maʼ gudixhe íqueluʼ. Cadi gudiiluʼ lugar gucaa xcaadxi lii guchaaluʼ ni maʼ gudixheʼ íqueluʼ gúniluʼ. Nuu caadxi cosa ni zanda gúniluʼ pa gucaa xcaadxi joven lii guʼnuʼ xiixa. Guzéʼtenu ti ejemplu, ora gúʼyaluʼ nuu xiixa ni zándaca gucaa lii gúniluʼ xiixa ni cadi jneza la? bixeleʼ de laacani (Prov. 22:3). Ne guníʼ ique xi zabeenduluʼ pa gúniluʼ cosa ni cadi jneza. Bidii lugar gacané xcaadxi binni lii. Pa humilde lii la? zacaaluʼ ca conseju ni gudii jñaaluʼ ne bixhózeluʼ lii o ni gudii xcaadxi xpinni Cristu ni napa experiencia lii (1 Ped. 5:5, 6). Pa humilde lii, zacaaluʼ ca conseju galán ni gudiicabe lii. w18.04 28, 29 párr. 14-16

Lu ca diidxaʼ ni gudxi Jesús caadxi congregación de Asia Menor, bisihuinni rusisaca dxiiñaʼ cayuni ca xpinni. Guzéʼtenu ti ejemplu, sicaríʼ bizulube ora guníʼnebe ca hermanu de congregación de Tiatira: «Nanna xi irá runi tu, pabiáʼ nadxii tu naa, pabiáʼ runi cre tu, pabiáʼ runi tu xhiiñaʼ, ne pabiáʼ qué rixhacalaʼdxi tu. Jma runi tu xhiiña yanna que chiqué» (Apoc. 2:19). Cadi guníʼsibe stale dxiiñaʼ cayúnicaʼ, sínuque biʼniʼ felicitarbe laacaʼ pur ca cualidad ni rucaa laacaʼ gúnicaʼ dxiiñaʼ galán. Ni dxandíʼ la? gupa xidé guluu jnézabe caadxi hermanu de congregación que, neca zaqué, ora bizulube ne ora bilúxebe guluube gana laacaʼ (Apoc. 2:27, 28). Jesús nga xaíque stiʼ guiráʼ congregación ne nápabe stale autoridad luguiáʼ cani. Nga runi, cadi caquiiñeʼ gudiibe xquíxepeʼ laanu pur ni rúninu pur laabe. Neca zacá, bisihuínnibe rusisácabe dxiiñaʼ rúnicaʼ. Zanda guininu nácabe ti ejemplu galán para ca ancianu. w19.02 16 párr. 10

Lu primé siglu que, biquiiñeʼ Jiobá grupu ni zániru para cuʼ gana guirá ca xpinni Cristu ne cani zániru ndaaniʼ ca congregación que. Biseendacaʼ Pedro ne Juan, chupa de cani ni nuu lu grupu ni zániru que, para guinábacaʼ Jiobá gudii espíritu santu cani nacubi guca xpinni Cristu (Hech. 8:5, 14-17). Nanaa dxiichinu guizáʼ guluu ngue gana Felipe ne cani nacubi guca xpinni Cristu que. Yanna riʼ, Grupu ni Zániru lu dxiiñaʼ stiʼ ca testigu stiʼ Jiobá laaca riguucaʼ gana ca betelita, ne xcaadxi xpinni Cristu ni cayuni servir de tiempu completu ne de guiráʼ ca xpinni Cristu ni nuu lu guidubi Guidxilayú. Cásica lu primé siglu que, laanu laaca riéchenu purtiʼ riguucabe gana laanu. Ne lu iza 2015, gulee Grupu ni Zániru folletu ni láʼ Cabeza Jiobá guibiguétaluʼ para uguucaʼ gana guiráʼ binni ni maʼ bixeleʼ de Jiobá ti guibiguétacaʼ ra nuube. w18.04 19 párr. 18-20

Stale binni riníʼ ique jma galán zié ni laa pa gapa jma libertad. Peru ora gastiʼ ti límite la? zeeda gaca ni ti peligru casi ti gudxíu ni guizáʼ naduxhuʼ. Peru ¿ximodo nibani binni ndaaniʼ Guidxilayú riʼ pa qué ñuu límite lu guiráʼ cosa yaʼ? Ti enciclopedia ná nagana ca ley ni riguixhe cada gobiernu, purtiʼ rapa cani binni peru laaca rucueeza ni laacaʼ para gúnicaʼ caadxi cosa. Nga runi, cadi casi ziuunu zanda guiénenu ni. Guiníʼ íquenu panda ley maʼ gudixhe binni guidxilayú ne guiráʼ mil de abogadu ne juez ni nuu para gusiene ximodo chinanda binni ni ná cani. Peru zanda gacané Jesús laanu gácanu libre, nga runi caquiiñeʼ gúninu chupa cosa. Primé la? guni crenu ni bisiidibe. Ne guiropa, gácanu discípulo stibe. Pa gúninu ndiʼ la? dxandipeʼ zácanu libre. ¿Ximodo yaʼ? Ne laaca guniʼruʼ Jesús ca diidxaʼ riʼ: «Irá cani ruchee né Dios la? cá ca yaga lu ná enda ruchee». Ne guniʼbe: «Pa guni Xiiñiʼ Dios laatu libre la? dxandipeʼ zácatu libre» (Juan 8:34, 36, TNM). w18.04 6, 7 párr. 13, 14

Guiranu runi sentirnu galán ora nuunu tobi si né ca binni ni rizaalaʼdxiʼ laanu ne ni runi sentir ni runi sentirnu. Runi ca binni riʼ stipa pur chuʼcaʼ lugar stinu ne guiénecaʼ ni riníʼ íquenu ne ni runi sentirnu, dede nuu biaje rúnicabe ni ante guinábanu ni laacabe. Rusisácanu ca binni ni runi «sentir ni cayuni sentir stobi». Guiranu racaláʼdxinu gúninu ni. Peru naquiiñeʼ gánnanu nagana para gusihuínninu ni. ¿Xiñee yaʼ? Ti razón nga purtiʼ imperfectu laanu ne naquiiñeʼ gúninu stipa purtiʼ dede ora gálenu puru para laanu nga riníʼ íquenu (Rom. 3:23). Zándaca nuu de laanu raca nagana gusihuinni ni pur modo biniisi o pur xiixa ni bizaaca dxiqué. Ne últimu la? zándaca guicá actitud napa binni laanu, purtiʼ yanna riʼ maʼ qué rizaaláʼdxicaʼ ni cayuni sentir xcaadxi, sínuque ruyúbisicaʼ puru para laacaʼ (2 Tim. 3:1, 2). Zanda guni sentirnu ni cayuni sentir xcaadxi pa chinándanu ejemplu stiʼ Jiobá ne Jesús. w19.03 14 párr. 1-3

Últimu de chii mandamientu que ná cadi guni codiciarnu, o cadi guni desearnu xiixa ni napa sti binni (Deut. 5:21; Rom. 7:7). Bisiidiʼ Jiobá ca xpinni ti lección nabé risaca ora bidiibe laacaʼ ley ni ná naquiiñeʼ gápacaʼ ladxidoʼcaʼ, laani nga xquendabiaanicaʼ ne ni runi sentircaʼ. Nánnabe runi binni cosa malu pur ni riníʼ ique ne pur ni runi sentir. Ngapeʼ nga ni bizaaca rey David. Cadi malu diʼ laabe, peru ti biaje biʼniʼ desearbe ti gunaa ni maʼ bichaganáʼ, ne bicaa deseu malu ca laabe gucheebe (Sant. 1:14, 15). Biʼniʼ cometerbe adulterio, gucaláʼdxibe nusiguiibe xheelaʼ gunaa que ne dede biʼniʼ mandarbe gatiʼ hombre que lu guerra (2 Sam. 11:2-4; 12:7-11). Cadi modo si nácanu pur fuera ruuyaʼ Jiobá, sínuque laaca ruuyabe modo nácanu pur dentru, ni nuu ndaaniʼ ladxidoʼno (1 Sam. 16:7). Qué zanda gucáʼchinu cani riníʼ íquenu, cani runi sentirnu nin cani rúninu. Ruyubi Jiobá ca cualidad galán ni nuu ndaaniʼ ladxidoʼno ne racanebe laanu guni desarollarnu cani guiráʼ dxi. Peru laaca racaláʼdxibe gudiʼnu cuenta ora guzulú guiníʼ íquenu xiixa ni cadi jneza ne gucueezanu laanu ante gucaa cani laanu gúninu xiixa cosa malu (2 Crón. 16:9; Mat. 5:27-30, TNM). w19.02 22 párr. 9; 22 párr. 11

Biblia ná «jma nadóʼ guca Moisés lade guiráʼ ca hombre ni guyuu lu guidxilayú» (Núm. 12:3). ¿Ñee riníʼ nga gúcabe ti hombre débil, indecisu ne nisi ridxibi la? Zacá nga riníʼ binni naca ti binni ni nadóʼ. Peru cadi zacá diʼ guca Moisés. Laa guca ti xpinni Dios nadipaʼ, decididu ne gupa valor. Ne cumu gucané Jiobá laabe la? bidxiilube rey jma nadipaʼ stiʼ Egipto, gúcabe xaíque stiʼ biaʼ chonna millón de binni dxi gudíʼdicabe lu desiertu ne gucanebe guidxi Israel para guni ganar ca enemigu stiʼ. Laanu qué gápanu ca guendanagana gupa Moisés, peru laaca raca nagana para laanu gácanu nadóʼ, purtiʼ nabáninu lade binni ni cadi xpinni Dios ne ridxaagalunu guendanagana guiráʼ dxi. Neca zacá, nápanu ti razón nabé risaca para gúninu stipa pur gácanu nadóʼ. Cayuni prometer Jiobá zacaa ca binni nadóʼ guidxilayú (Sal. 37:11). Guinabadiidxanu laca laanu: «¿Ñee zanda guiniéʼ nacaʼ ti binni nadóʼ la? ¿Ñee riníʼ binni zacá naa la?». w19.02 8 párr. 1, 2

Dxi bizáʼ Jiobá binni bidiibe laanu conciencia. Adán ne Eva gúpacaʼ conciencia. ¿Ximodo nánnanu ni yaʼ? Purtiʼ dxi bicheenécabe Dios, bicaachilúcabe. Nga rusihuinni bichiiñaʼ conciencia stícabe laacabe. Conciencia nga xiixa ni rabi laanu xii nga ni jneza ne ni cadi jneza ne racané ni laanu lu xquendanabáninu. Zanda guchaaganu ni né ti brújula. Pa galán brújula ni caquiiñeʼ ti capitán ni ziné ti barcu la? zacané ni laabe chindabe ra racaláʼdxibe. Peru pa cadi jneza cayuni brújula riʼ dxiiñaʼ la? zándaca chiné bi o corriente stiʼ nisadóʼ barcu stibe gadxé ladu. Zacaca nga laanu, pa gusiidiʼ chaahuinu conciencia stinu la? zacané ni laanu gúninu ni jneza, peru pa qué gusiidiʼ chaahuinu ni la? zándaca ziuʼnu lu peligru. Pa qué gusiidiʼ chaahuinu conciencia stinu la? qué zabi ni laanu pa malu xiixa cosa ni chigúninu o pa cadi naquiiñeʼ gúninu ni (1 Tim. 4:1, 2). Dede zándaca guiníʼ íquenu jneza xiixa cosa malu. w18.06 16 párr. 1-3

Laaca naquiiñeʼ gudiʼnu cuenta ora racalaʼdxiʼ binni gucaa laanu guiníʼ íquenu modo riníʼ íquecaʼ ne gucáʼnanu cani. Guzéʼtenu ti ejemplu, zándaca gunadiáganu ti noticia ni cuzeeteʼ xiixa cosa galán de ti grupu políticu, o guidúʼyanu ti reportaje ni cuzeeteʼ xi guleendú tuuxa ne zándaca gucaa ni laanu guiníʼ íquenu zacá ne guyúbinu ugaandanu stale cosa lu xquendanabáninu. Lu caadxi película o libru riete ni jma risaca nga guyubi tobi para laa o jma gusisaca familia stiʼ. Peru ni bizéʼtenu riʼ maʼ gadxé ni né ni rusiidiʼ Biblia, purtiʼ para ganda guibáninu nayecheʼ la? jma caquiiñeʼ gannaxhiinu Jiobá (Mat. 22:36-39). Peru cadi caninu malu nga gaca divertirnu. Peru galán guinabadiidxanu: «¿Ñee rudieeʼ cuenta ora racalaʼdxiʼ binni guidxilayú gucaa naa guníʼ iqueʼ modo riníʼ íquecaʼ la? ¿Ñee riguixheʼ límite lu ni ruuyaʼ o ni ruundaʼ ca xiiñeʼ la? Naa yaʼ, ¿ñee riguixheʼ límite lu cani ruundaʼ la? ¿Ñee rusiideʼ ca xiñee ximodo riníʼ ique Jiobá para cadi guicá modo riníʼ ique binni guidxilayú laacabe la?». w18.11 22 párr. 18, 19

Rusihuinni Jiobá nuuné laanu purtiʼ rizaalaʼdxiʼ ne rudii cariñu stiʼ laanu. Guidúʼyanu ximodo rusihuínnibe pabiáʼ nadxiibe laanu ora guniʼbe ca diidxaʼ riʼ: «Guizáʼ sicaruluʼ para naa, risácaluʼ ne nadxieeʼ lii» (Is. 43:4). Gastiʼ qué zanda gucueeza Jiobá de gannaxhii ca xpinni. Ne qué ziuu dxi guixélebe de laanu (Is. 54:10). Cadi cayuni prometer Jiobá laanu zabee guiráʼ ca guendanagana ni runiná laanu, peru laaca cadi cayábibe laanu zudiibe lugar guniná ca guendanagana ni zeeda gaca casi «guiiguʼ» ni ruluahua o casi «bele» ni ruzaaquiʼ laanu. Cayábibe laanu ziuube gaxha para gacanebe laanu gudxíʼlunu cani. Ne zacanebe laanu cadi chúʼpenu xizaa para cadi gusaananu laabe neca gátinu (Is. 41:13; 43:2). Pa gápanu confianza ca promesa stiʼ Jiobá la? ziuube gaxha de laanu, ne zápanu valor para guni huantarnu ca guendanagana stinu. w19.01 3 párr. 4-6

Pa joven lii la? zándaca ca maestru stiluʼ o xcaadxi binni huayuni animar lii guni estudiarluʼ ti carrera para gápaluʼ ti dxiiñaʼ galán ne zacá guni ganarluʼ stale bueltu. Peru Jiobá cayabi lii cheluʼ lu ti neza gadxé de ca ni bizéʼtenu riʼ. Racaláʼdxibe gácaluʼ ti buen estudiante ne gúniluʼ dxiiñaʼ para guibániluʼ ora maʼ guca graduarluʼ (Col. 3:23). Peru ora chiguicaaluʼ ti decisión ni risaca para lii la? cayabibe lii chinándaluʼ ni ná ca principiu stibe. Purtiʼ zacanécani lii gudiiluʼ cuenta xi racalaʼdxiʼ Jiobá gúniluʼ yanna ra mayaca guiluxe guidxilayú riʼ (Mat. 24:14). Nanna Jiobá xi chiguizaaca guidxilayú riʼ ne pabiáʼ tiempu riaadxaʼ para guinitilú ni (Is. 46:10; Mat. 24:3, 36). Bietenalaʼdxiʼ, runibiáʼ chaahuibe laanu, ne nánnabe xi riuuláʼdxinu ne xi rusiecheʼ laanu, peru laaca nánnabe xi cosa riguu laanu triste. Nga runi, neca ruluíʼ biaʼsi ca conseju ni gudiicabe laanu la? cadi jneza cani pa cadi zeeda cani lu Biblia. w18.12 19 párr. 1, 2

Guníʼ David zacaa ca binni nadóʼ guidxilayú ne «zabánicaʼ nayecheʼ purtiʼ ziuu stale guendariuudxi». Laaca gucané Dios laabe para gucaabe zudii Dios Guidxilayú cani runi jneza «ne qué ziuu dxi gusaana de guibánicaʼ lu ni» (Sal. 37:11, 29; 2 Sam. 23:2). ¿Ximodo gucané ca promesa riʼ ca xpinni Dios ni racalaʼdxiʼ guni ni nabe yaʼ? Gucané ni laacabe guni crécabe zaca Guidxilayú riʼ ti paraísu cásica guca jardín de Edén que, purtiʼ puru si binni ni runi ni jneza zabani ndaaniʼ ni. Ra gudiʼdiʼ tiempu casi guiráʼ ca israelita ni guníʼ runi adorar Dios bidxiidéchecaʼ laabe. Ngue runi bidii Jiobá lugar gunitilú ca babilonio guidxi sticaʼ ne chinecaʼ laacabe de esclavu (2 Crón. 36:15-21; Jer. 4:22-27). Peru ca profeta que guniʼcaʼ ra tidiʼ setenta iza zabiguetaʼ ca israelita que xquídxicaʼ. Ne guca cumplir ca profecía riʼ, peru laaca zaca cumplir cani tiempu stinu, zaca Guidxilayú riʼ ti paraísu. w18.12 4 párr. 9, 10

Stale de ca conseju ni rudii binni cadi nuu cani de acuerdu né modo riníʼ ique Jiobá. Peru ¿ñee jma zacané ca conseju riʼ laanu que cani zeeda lu Biblia la? Jesús guníʼ: «Ca cosa jneza runi ti binni rusihuinni cani nuu xpiaaniʼ» (Mat. 11:19, TNM). Neca maʼ nuu stale avance lu tecnología, qué ganda diʼ cuee binni guidxilayú stale problema para guibani binni nayecheʼ casi guerra, racismo ne guiráʼ binni malu. Ne nabé runi permitírcabe inmoralidad sexual. ¿Ñee huayacané cani bizéʼtenu riʼ ca familia guibánicaʼ nayecheʼ, maʼ cadi gapa binni problema ne maʼ cadi gaca huará ca la? Coʼ njaʼ, stale binni rudii cuenta laga jmaruʼ si cadale ca guendanagana ca. Peru ca xpinni Cristu ni riníʼ ique casi riníʼ ique Dios la? nabaninecaʼ familia sticaʼ nayecheʼ, qué ricá xiixa guendahuará malu laacaʼ pur práctica de inmoralidad sexual ne nabánicaʼ nayecheʼ né ca hermanu sticaʼ ni nuu lu guidubi Guidxilayú (Is. 2:4; Hech. 10:34, 35; 1 Cor. 6:9-11). ¿Cadi dxandíʼ rihuinni dxichi jma jneza modo riníʼ ique Dios que binni guidxilayú la? w18.11 20 párr. 8-10

Neca rúninu stipa pur cadi chuʼdindenenu ca familia stinu ne guni tratarnu laacabe galán. Caquiiñeʼ chuʼnu cuidadu para cadi gúninu xiixa ni riuuláʼdxicabe ne zacá guchéʼnenu Jiobá. Nga runi, gaca xhamígunu ca binni ni nadxii Jiobá. Cani cayuni ni rusiidiʼ Stiidxaʼ Dios caquiiñeʼ gácacaʼ santu (Is. 35:8; 1 Ped. 1:14-16). Dxi bizíʼdinu ca norma ni jneza zeeda lu Biblia bichaʼnu modo laanu. Ne nuu tu laa bichaa stale cosa lu xquendanabani. Pur nga cadi lica naquiiñeʼ guibiguetaʼ gúninu ca cosa malu ni bíninu dxiqué. Peru ¿xi caquiiñeʼ gúninu para cadi guiníʼ íquenu lu ca cosa riʼ yaʼ? Caquiiñeʼ guiníʼ íquenu lu ni maʼ biʼniʼ Jiobá para gácanu binni santu, laabe bidiibe xquendanabani Xiiñibe, Jesucristu pur laanu (1 Ped. 1:18, 19). Nga runi, para ganda gácanu binni nayá nezalú Jiobá la? cadi naquiiñeʼ guiaandaʼ laanu pabiáʼ risaca ni bíʼnibe pur laanu dxi bidiibe xquendanabani Xiiñibe pur laanu. w18.11 11 párr. 10, 11

Stale hermanu ni cayuni servir de tiempu completu maʼ guniʼcaʼ ora rúnicaʼ jma lu xhiiñaʼ Dios racané ni laacaʼ cadi guni sentircaʼ triste pur bichaa xiixa lu xquendanabánicaʼ. Casi bidúʼyanu lu ca ejemplu riʼ, pa gúninu guiráʼ ni nuu lu nanu ne gápanu confianza Jiobá la? qué zunítinu paz ni nuu ndaaniʼ ladxidoʼno neca guchaa modo nabáninu. Ne zándaca gudiʼnu cuenta pa gúninu ni ná Jiobá neca cadxaagalunu guendanagana la? zacané ni laanu. Pa málasi guchaa xquendanabáninu pur ti asignación nacubi, ti guendahuará o napa xidé gápanu ti familia stinu la? cadi guiaandaʼ laanu rizaalaʼdxiʼ Jiobá laanu ne zacanebe laanu órapeʼ jma caquiiñeʼ gúnibe ni (Heb. 4:16; 1 Ped. 5:6, 7). Laga cabézanu gacanebe laanu la? gúninu ni nuu lu nanu para gudxíʼlunu ni. Nga runi guidxíñanu ra nuu Bixhózenu ni nuu guibáʼ lu oración ne gudiʼnu lugar gápabe laanu. Pa gúninu ni la? zacané ni laanu cadi gunítinu paz ni nuu ndaaniʼ ladxidoʼno neca guchaa xquendanabáninu. w18.10 30 párr. 17; 31 párr. 19, 22

Lu Biblia zeeda stale ejemplu ni rusihuinni riene Jiobá ca xpinni pur modo biʼniʼ tratarbe laacaʼ. Ti ejemplu nga ni zeeda lu 1 Samuel 3:1-18 dxi gucanebe joven Samuel para chitidxi sumo sacerdote Elí zusabanabe laa. Ley stiʼ Jiobá que ná naquiiñeʼ guni respetar ca xcuidihuiiniʼ ca binni ni maʼ huaniisi, jmaruʼ si ti binni risaca o ti binni ni naca xaíque guidxi (Éx. 22:28; Lev. 19:32). Nga runi qué zanda diʼ guiníʼ íquenu cásipeʼ birá gueelaʼ yetidxi Samuel Elí chigusabanáʼ Dios laa. Relatu ca ná «bidxíbibe ñábibe Elí ni gudxi Dios laabe lu ti visión». Peru gucané Dios Elí para gudii cuenta laa ngue caniʼné Samuel. Ngue runi gudxi Elí laabe cadi gucaachibe gastiʼ. Biʼniʼ Samuel ni gunábabe laa que ne guníʼ guiráʼ ni gudxi Jiobá laa. Qué nidxagayaa Elí guiráʼ ni gudxi Samuel laa purtiʼ maruʼ gudxi ti hombre stiʼ Dios laabe xi chiguizaacabe (1 Sam. 2:27-36). Relatu riʼ rusiidiʼ ni laanu guizáʼ nuu xpiaaniʼ Jiobá ne riénebe laanu. w18.09 23 párr. 2; 24 párr. 4, 5

Tiempu nabáninu riʼ, para stale binni maʼ normal nga gusiguii tuuxa. Lu ti revista ni nabé ruundaʼ binni, biree ti tema ni láʼ: «¿Xiñee rusiguiinu?», bizeeteʼ ni «maʼ normal ruuyaʼ binni gusiguii tuuxa». Nga runi, casi guiráʼ binni rusiguii, ne rúnicabe ni para gucaachicabe xiixa ni cadi jneza ni bíʼnicabe o para guicaacabe xiixa puestu risaca ne guni ganárcabe stale bueltu. Tema riʼ laaca bizeeteʼ ni nabé nagueenda nga gusiguii binni cani qué runibiáʼ, ca compañeru de dxiiñaʼ, ca xhamigu ne familia stiʼ. ¿Xi guiráʼ guendanagana rapa ca binni ni nabé rusiguii? Sicaríʼ gudxi David Jiobá lu ti oración: «Lii nadxiiluʼ binni ni riníʼ ni dxandíʼ de guidubi ladxidóʼ» (Sal. 51:6). Gunna dxichi David ni jma risaca nga gápanu ni dxandíʼ ndaaniʼ ladxidoʼno. Biaʼ tiempu guibáninu, laanu ca xpinni Dios, caquiiñeʼ guininu puru si ni dxandíʼ (Zac. 8:16). w18.10 7 párr. 4; 8 párr. 9, 10; 10 párr. 19

Dxi biree ca israelita de Egipto, lu iza 1513 ante de ca dxi stinu la? zándaca nácacaʼ jma de chonna millón. Ládecabe zeeda binni de gadxé gadxé iza, dede xcuidihuiiniʼ hasta binni ni maʼ napa bisnietu ne zándaca laaca zeeda binni ni huará o ni napa xiixa discapacidad ládecabe. Cumu ti guidxi naroʼbaʼ laacabe la? caquiiñecabe ti líder ni guiene ne ni gapa paciencia laacabe. Ngue runi Jiobá ngue guca líder stícabe peru biquiiñebe Moisés. Pur ngue la? qué ñuni sentir ca israelita que nuucaʼ stúbicaʼ dxi bireecaʼ de ndaaniʼ guidxi Egipto (Sal. 78:52). ¿Xi biʼniʼ Jiobá para cadi guni sentir ca israelita que nuucaʼ stúbicaʼ yaʼ? Primé la? guleebe laacaʼ de Egipto casi «riree ti grupu de soldadu» (Éx. 13:18). Ora biʼyaʼ ca israelita que modo gulee Dios laacaʼ la? gúpacabe confianza qué zazaacacabe gastiʼ purtiʼ Jiobá peʼ cayapa laacabe. Laaca biquiiñeʼ Jiobá ti zá ridxíʼ ne ti columna de guí huaxhinni para gapa laacabe (Sal. 78:14). Casi ora ñabi Jiobá laacabe: «Cadi guidxíbitu. Raríʼ nuaaʼ para gapa laatu ne para gabeʼ laatu pa ladu chetu». w18.09 26 párr. 11, 12

Tiempu gucuá Biblia, stale xpinni Dios de dxiqué guizáʼ guyuucaʼ xizaa dede gunábacaʼ gáticaʼ. Casi Job la? tantu cayacanabe dede guniʼbe maʼ bireebe gana modo nabánibe ne pur ngue gunábabe gátibe (Job 7:16). Yanna guzéʼtenu de Jonás, bidii Jiobá laabe ti dxiiñaʼ, peru cumu qué niree ni modo cabézabe la? guizáʼ guyuube triste dede guniʼbe: «Yanna, Jiobá, rinabaʼ lii guutiluʼ naa, purtiʼ jma galán gateʼ que guibaneʼ» (Jon. 4:3). Profeta Elías laaca guizáʼ biʼniʼ sentir mal dede gunábabe Dios gudii lugar gátibe. Elías guníʼ: «¡Maʼ biáʼcatiʼ! Biiti naa yanna Jiobá. Qué risacadiáʼ jma que ca bixhozegolaʼ» (1 Rey. 19:4). Peru para Jiobá la? risácacabe ne pa ñanda qué ñáticabe. Qué ñuni juzgar Jiobá laacabe pur ni cayuni sentírcabe, sínuque guluu gana laacabe né guendarannaxhii ne gucané laacabe para maʼ cadi guni sentírcabe zaqué ne cadi gusaana de gúnicabe ni ná. w18.09 13 párr. 4

Ca binni ni runiné Dios dxiiñaʼ runibiáʼcabe laacaʼ casi binni hospitalariu. Lu ca Escrituras Griegas Cristianas, diidxaʼ «hospitalidad» riníʼ ni «gaca tuuxa nachaʼhuiʼ né ti binni ni qué runibiáʼ» (Heb. 13:2). Ndaaniʼ Biblia zeeda stale relatu ni rusiidiʼ laanu gácanu hospitalariu (Gén. 18:1-5). Naquiiñeʼ gápanu costumbre de chuʼnu listu para gacanenu xcaadxi, pa nácacaʼ hermanu stinu o pa coʼ (Gál. 6:10). Zanda guninenu Dios dxiiñaʼ ra gácanu hospitalariu né ca siervu de tiempu completu ni riganna congregación stinu (3 Juan 5, 8). Ora riganna ca hermanu riʼ congregación stinu, rápanu oportunidad de ugúʼsaanu gana laanu pur fe stinu (Rom. 1:11, 12). Riguu Stiidxaʼ Dios gana ca hombre guninecaʼ Jiobá dxiiñaʼ, ra gácacaʼ siervu ministerial ne ancianu (1 Tim. 3:1, 8, 9; 1 Ped. 5:2, 3). Ca hermanu ni runiné Jiobá dxiiñaʼ riuuláʼdxicaʼ gacanecaʼ ca hermanu en sentidu espiritual ne lu xcaadxi cosa (Hech. 6:1-4). Ne ca hermanu ni racané lu ca dxiiñaʼ riʼ ndaaniʼ congregación zábicaʼ lii guizáʼ galán nga gacaneluʼ xcaadxi. w18.08 24, párr. 6, 7; 25 párr. 10

Neca gupa Timoteo jma autoridad que ca hermanu ni maʼ huaniisi la? naquiiñeʼ guni respetarbe laacaʼ ne guiabe laacaʼ. ¿Xi zazaaca pa guni cometer ti hermanu ni maʼ huaniisi ti pecadu o gucaabe xcaadxi guni xiixa neca nánnabe qué riuulaʼdxiʼ Dios ni yaʼ? Qué zuni juzgar Jiobá laabe pur ni guʼyaʼ si, peru zaca juzgarbe neca maʼ huaniisibe. Principiu ni zeeda lu Isaías 65:20 ná, ti binni ni cayuni cometer ti pecadu la? neca gapa ti gayuaa iza ziabanáʼ. Ne lu ti visión ni gucuaa Ezequiel zeeda sti principiu casi ni bizéʼtenu riʼ (Ezeq. 9:5-7). Nga runi cadi gusaana de guni respetarnu Jiobá, «Binnigola ni maʼ xadxí nabani» (Dan. 7:9, 10, 13, 14). Pa runi respetarnu Jiobá la? qué zadxíbinu gudiʼnu conseju tuuxa pa cadi cayuni ni jneza biaʼ tiica iza napa (Gál. 6:1). w18.08 11 párr. 13, 14

Laanu ca xpinni Cristu, naquiiñeʼ guiduʼyaʼ chaahuinu pa dxandíʼ guiráʼ ni gábicabe laanu ti ganda guicaanu decisión jneza (Prov. 3:21-23; 8:4, 5). Pa qué gúninu ni la? jma nagueenda zucaa Binidxabaʼ ne guidxilayú stiʼ laanu guchaʼnu modo riníʼ íquenu (Efes. 5:6; Col. 2:8). Peru para gánnanu pa dxandíʼ xiixa ni gábicabe laanu la? caquiiñeʼ gánnanu xipeʼ nga guca. Tiempu riʼ, guiráʼ ladu rudiicabe laanu información. Casi lu Internet, lu televisión ne lu xcaadxi mediu de comunicación la? rábicabe binni xi guiráʼ zanda guni. Stale binni ruseendaʼ correu electrónico, mensaje de texto o xiixa noticia ra nuu ca xhamigu. Peru laaca nuu binni ruseendaʼ xiixa información ni cadi dxandíʼ para si guniná o quiteʼ binni. Nga runi, naquiiñeʼ gápanu cuidadu ne guiduʼyaʼ chaahuinu xi ridúʼndanu ne xi rucaʼdiáganu. w18.08 3 párr. 1, 3

Dxi mayaca gale Xiiñiʼ Jiobá lu Guidxilayú riʼ la? gulibe ti binnidxaapaʼ humilde ni láʼ María para gapa Xiiñibe. Nabeza María Nazaret, ti guidxihuiiniʼ qué risaca ni nuu zitu de Jerusalén ne de templu stini (Luc. 1:26-33). Bisihuinni María naca ti gunaa espiritual ora byuiʼné Elisabet diidxaʼ (Luc. 1:46-55). Cumu biiyaʼ Jiobá pabiáʼ ruzuubaʼ María diidxaʼ ne runi ni jneza la? bisisaca Jiobá laabe de ti modo cadi cabézabe ni. Dxi gule Jesús, qué ñabi diʼ Jiobá ca funcionariu ne ca gobernante ni risaca stiʼ Jerusalén ne Belén maʼ gule Xiiñiʼ. Ni bíʼnibe nga biseendabe caadxi ángel para gábicaʼ caadxi pastor humilde ni cayapa dendxuʼ fuera de guidxi Belén maʼ gule Xiiñibe (Luc. 2:8-14). Ngue runi yeguuya ca pastor que Jesús dxi gule (Luc. 2:15-17). Nuunu seguru guizáʼ guyuulaʼdxiʼ José ne María ora bíʼyacaʼ modo bisisaca ca pastor que Jesús. w18.07 9, 10 párr. 11, 12

¿Xiñee bidxiichiné Jiobá Salomón yaʼ? Biblia ná: «Purtiʼ bicaa ladxidoʼbe laabe guixélebe de Jiobá, [...] ni guniʼné laabe chupa biaje. Maca gudxi Jiobá laabe cadi guni adorarbe xcaadxi dios, peru qué ñúnibe ni gudxi laabe». Ne pur nga maʼ qué ñacané Dios laabe ne maʼ qué ñuu gaxha de laabe. Guca reinu stiʼ Israel chupa ndaa, ngue runi ca ni beeda gaca rey despué maʼ qué ñuni mandarcaʼ guidubi guidxi Israel ne pur nga gúpacaʼ guendanagana stale iza (1 Rey. 11:9-13). Cásica bizaaca Salomón, tobi de ca cosa ni zanda gucaa laanu guixélenu de Jiobá nga ora gaca xhamígunu binni ni qué riene o qué runi respetar ca norma stiʼ Jiobá. Zándaca chupa chonna de laacaʼ riecaʼ reunión, peru cadi jneza ni rúnicaʼ. Zándaca gácacabe familia stinu ni qué runi ná Dios, ca vecinu o ca binni runinenu dxiiñaʼ o ni rinenu scuela. Nga runi, pa qué runi respetar ca binni ni ridxaaganu o ca xhamígunu ca norma stiʼ Dios la? zándaca gunítinu amistad ni nápanu né Jiobá. w18.07 19 párr. 9, 10

Riquiiñeʼ Binidxabaʼ película, ne ca programa ni ridiʼdiʼ lu televisión para guicá modo riníʼ íquebe laanu. Nánnabe qué runi entretener si ca historia ca laanu, sínuque ruchaabe modo riníʼ íquenu, ni runi sentirnu ne ni rúninu. Peru Jesús biquiiñeʼ ca método riʼ para bisiidiʼ binni. Ti ejemplu de laacani nga parábola stiʼ samaritanu nachaʼhuiʼ que ne stiʼ hijo pródigo (Mat. 13:34; Luc. 10:29-37; 15:11-32). Ca binni ni riníʼ ique casi Binidxabaʼ riquiiñecaʼ ca historia riʼ para guni biidicaʼ ladxidoʼno. Nga runi, naquiiñeʼ gápanu stale cuidadu. Peru laaca nuu película ne programa de televisión para guni entretener ne para gusiidiʼ laanu sin guni biidiʼ xquendabiaaninu. Nga runi, naquiiñeʼ gácanu equilibradu. Ora cuinu xi guidúʼyanu, guinabadiidxanu laca laanu: «¿Ñee cucaa programa o película riʼ naa guiníʼ iqueʼ jneza nga gapaʼ deseu malu la?» (Gál. 5:19-21; Efes. 2:1-3). Pa gudiʼnu cuenta rucaa cani binni guiníʼ ique casi riníʼ ique Binidxabaʼ la? guixélenu de laacani casi ora ñápanu laanu para cadi guicá ti guendahuará malu laanu. w19.01 15, 16 párr. 6, 7

Cásica bilá ca cascu que ique ca soldadu romanu que la? zacaca zulá esperanza stinu laanu, ne zápani xquendabiaaninu o cani riníʼ íquenu (1 Tes. 5:8; Prov. 3:21). Zuyubi Binidxabaʼ ximodo cueenu cascu espiritual stinu íquenu. ¿Ximodo yaʼ? Guníʼ ique xi gucaláʼdxibe nucaabe Jesús ñuni. Nánnabe cabeza Jesús guni mandar lu guidxilayú riʼ despué. Peru primeru caquiiñeʼ gacaná ne gatiʼ ne despué cueza dede ora maʼ gudii Jiobá laa derechu para guni mandar. Nga runi, gucalaʼdxiʼ Binidxabaʼ nudii laabe derechu riʼ jma nagueenda ne gudxi laabe pa guzuxíbibe xañee ti biaje si la? oraqueca zudii laabe derechu para guni mandarbe (Luc. 4:5-7). Zacaca nga rizaacanu tiempu riʼ, nanna Binidxabaʼ maʼ biʼniʼ prometer Jiobá gudii laanu stale cosa material lu guidxilayú cubi ca. Peru laga cabézanu gaca cumplir promesa riʼ la? zápanu guendanagana. Nga runi, ruyubi Binidxabaʼ ximodo gucaa laanu chuuláʼdxinu guibáninu galán de ca yanna. Racaláʼdxibe gusisácanu jma ca cosa material ca ne gusaananu Reinu stiʼ Dios para despué (Mat. 6:31-33). w18.05 30, 31 párr. 15-17

Laabe racaláʼdxibe chuʼluʼ nayecheʼ. Gudixhe ique ugaandaluʼ meta espiritual ne biiyaʼ xi nabe lu guiráʼ ni gúniluʼ. Pa gúniluʼ ca ndiʼ nagueendaca la? zuluíʼ Jiobá lii pa ladu cheluʼ, zapa lii ne zaguu ndaayaʼ lii. Guníʼ ique lu guiráʼ ca conseju galán rudii Biblia lii ne biʼniʼ ni ná ca diidxaʼ riʼ: «Bietenalaʼdxiʼ, yanna, de [Dios] ni jma nandxóʼ ni bizáʼ lii, ca dxi nahuiiniluʼ» (Ecl. 12:1). Runi felicitarnu ca joven ni runi ni ná Jiobá, purtiʼ maʼ gudixhe íquecaʼ gúnicaʼ ni ná Jiobá neca guidxaagalucaʼ intiica guendanagana. Rúnicaʼ stipa pur ugaandacaʼ meta espiritual, pur guni predicarcaʼ jma ne purtiʼ qué rudiicaʼ lugar cubayú guidxilayú riʼ laacaʼ. Joven, zanda chuʼluʼ seguru cadi pur gana si stipa ni cayúniluʼ ne gunna cadi stúbiluʼ nuuluʼ, purtiʼ nadxii ca hermanu lii ne qué zusaanacaʼ lii. Pa guicaaluʼ en cuenta Jiobá lu guiráʼ ni quixhe íqueluʼ gúniluʼ la? guizáʼ galán zabániluʼ. w18.04 29 párr. 17, 19