Abril

Laanu yaʼ, ¿ñee riníʼ íquenu casi riníʼ ique Dios la? o modo riníʼ ique binni? Nuunu seguru maʼ nabáninu modo ná ca norma stiʼ Jiobá. Peru ¿ximodo riníʼ íquenu yaʼ? ¿Ñee rúninu stipa pur guiníʼ íquenu casi riníʼ ique Dios la? Para ganda gúninu ni la? naquiiñeʼ gúninu stale stipa. Peru cadi naquiiñeʼ gúninu stipa para guiníʼ íquenu casi riníʼ ique binni guidxilayú, purtiʼ nuu espíritu riʼ guiráʼ ladu (Efes. 2:2). Ne nagueenda zanda guicá modo riníʼ ique binni laanu purtiʼ rucaa ni laanu guyúbinu puru para laasinu. Ya, nagana para guiníʼ ique ti binni casi riníʼ ique Jiobá, peru guizáʼ nagueenda para guiníʼ ique casi riníʼ ique binni guidxilayú. Pa gudiʼnu lugar guicá modo riníʼ ique binni laanu la? zuyúbinu puru para laasinu ne zaníʼ íquenu laasinu zanda cuinu xii nga ni jneza ne ni cadi jneza (Mar. 7:21, 22). Nga runi, nabé risaca nga guizíʼdinu guiníʼ íquenu casi riníʼ ique Jiobá ne cadi casi riníʼ ique binni. w18.11 18 párr. 1; 19 párr. 3, 4

Chonna biaje bisisaca Jiobá Jesús dede guibáʼ, ne nuunu seguru nabé guluuni gana Jesús. Despué de guyuunísabe ndaaniʼ guiiguʼ Jordán guníʼ Jiobá ca diidxaʼ ni zeeda lu textu cadúʼndanu yannadxí. Laaca binadiaga Juan ni Riguunisa ca diidxaʼ que. Ne biaʼ ti iza ante gatiʼ Jesús, binadiaga chonna de ca apóstol stibe ca diidxaʼ guníʼ Dios riʼ: «Ndi nga Xiiñe ni nadxiee ne ni rusieche naa. Laucaa diaga laabe» (Mat. 17:5). Ne caadxi dxi ante gatiʼ Jesús, guniʼné Jiobá laabe sti biaje de guibáʼ (Juan 12:28). Nanna Jesús zandísacabe falsu luguiáʼ ne nabé feu modo guuticabe laa. Neca zaqué, gunábabe gaca ni ná Dios ne cadi ni nabe (Mat. 26:39, 42). Biʼniʼ huantarbe bicaacabe laabe lu ti yaga ne qué nizaaláʼdxibe gátibe zaqué, purtiʼ qué nuyúbibe nusisaca binni laabe, sínuque biyúbibe gusisaca Bixhózebe laabe (Heb. 12:2, TNM). w18.07 10, 11 párr. 15, 16

Biʼniʼ si Jesús últimu Guendaroxhi stiʼ Señor bisihuinni guizáʼ napa valor. ¿Ximodo yaʼ? Guyuube dispuestu gúnibe ni ná Dios neca nánnabe zusituícabe lube ne zaníʼcabe caniʼbe mal de Dios ne zuuticabe laabe (Mat. 26:65, 66). Qué lica nucheené Jesús Dios ne bisisácabe lá, biʼniʼ defenderbe derechu napa Dios de guni mandar ne pur ni bíʼnibe ca zanda gapa ca binni ni gaca arrepentir guendanabani ni qué zaluxe. Ne laaca biʼniʼ prepararbe ca discípulo stibe para ca guendanagana ni chiguidxaagalucaʼ. Laaca bisihuinni Jesús valor ra jma bizaalaʼdxiʼ ni caquiiñeʼ ca apóstol fiel stiʼ que ca cosa ni naguu xizaa laa. Gunábasibe Judas guiree de ra nuucabe que, bíʼnibe ti eventu sencillu ni zusietenalaʼdxiʼ cani gaca discípulo ungidu xi guiráʼ zanda cueenducaʼ pur rini ni chiguxhiibe ne ra gácacaʼ parte de pactu nacubi (1 Cor. 10:16, 17). w19.01 22 párr. 7, 8

Bicabi Jiobá de guibáʼ, ne ná: «Ma bisisaca ni, ne zusisaca ruaʼ ni sti tiru». Guyuu Jesús xizaa purtiʼ gunna nabé risaca gácabe fiel Jiobá. Gúnnabe zuninácabe ne zuuticabe laabe (Mat. 26:38). Peru ni jma risaca para laabe nga gusisácabe lá Bixhózebe. Guníʼ binni caniʼbe mal de Dios ne pur nga guyuube xizaa guni biidiʼ guendaguti stibe lá Dios. Cásica Jesús, laanu laaca zándaca chuʼnu xizaa ora guni biidiʼ binni lá Jiobá. Zándaca gúnicabe laanu xiixa injusticia cásica bizaaca Jesús. O zándaca chuʼnu xizaa pur ca cosa ni cadi dxandíʼ ni riníʼ ca binni ni rucaalú laanu. Zándaca riníʼ íquenu pabiáʼ zuni biidiʼ ni guiníʼcabe ca lá Jiobá. Peru cadi naquiiñeʼ chúʼpenu xizaa pur ca cosa riʼ. Nga runi, ora guidxaagalunu tipu guendanagana riʼ zaguixhedxí ca diidxaʼ ni gudxi Jiobá Jesús ladxidoʼno (Sal. 94:22, 23; Is. 65:17). w19.03 11, 12 párr. 14-16

Qué guirá guidxagayaa ca discípulo stiʼ Jesús ni cayunadiágacaʼ. Runi crécabe zuni Jesús xiixa para guni mandar reinu stiʼ Israel sti biaje, peru gudxi Jesús laacabe napa xidé gacaná ne gatiʼ primeru. Sicaríʼ gudxi apóstol Pedro laabe: «Biá lii Señor, qué lica zazaacaluʼ nga». Para bicabi Jesús laabe: «¡Guyuu neza decheʼ Binidxabaʼ! Cucueezaluʼ naa de guneʼ ni naquiiñeʼ guneʼ, purtiʼ qué riníʼ íqueluʼ casi riníʼ ique Dios, sínuque casi riníʼ ique binni» (Mat. 16:22, 23; Hech. 1:6, TNM). Né ca diidxaʼ ni guníʼ Jesús riʼ, bisihuínnibe maʼ gadxé modo riníʼ ique Dios ne maʼ gadxé modo riníʼ ique binni guidxilayú ra cayuni mandar Binidxabaʼ (1 Juan 5:19). Né ni guníʼ Pedro bisihuinni ruyubi puru para laa si casi runi binni guidxilayú. Peru Jesús nanna maʼ gadxé modo riníʼ ique Jiobá. Nga runi modo bicabi Jesús bisihuinni qué riuulaʼdxiʼ modo riníʼ ique binni guidxilayú, purtiʼ laabe riníʼ íquebe casi riníʼ ique Bixhózebe. w18.11 18 párr. 1, 2

Xi ruuyaʼ Jiobá ora ridagulisaa millón de binni lu guidubi naca Guidxilayú para guietenaláʼdxicaʼ Guendaroxhi stiʼ Señor. Qué ruuyasibe ti grupu naroʼbaʼ de binni, sínuque ruuyabe cada tobi de cani rié. Ruuyabe cani rié guiráʼ iza. Nuu de laacaʼ riecaʼ neca nuu tu cucaalú laacaʼ. Xcaadxi qué rié ca reunión ni raca guiráʼ semana, peru ruuyacaʼ naquiiñeʼ checaʼ Conmemoración. Laaca ruuyaʼ Jiobá cani rié primé biaje, zándaca para si gánnacaʼ ximodo raca ni. Nanna dxíchinu guizáʼ riuulaʼdxiʼ Jiobá ora rié stale binni Conmemoración (Luc. 22:19). Peru ni jma risaca para laabe nga cadi panda binni rié, sínuque xiñee riécabe. ¿Riéchenu gabi Jiobá laanu xi gúninu ora riquiiñeʼ organización stiʼ la? (Is. 30:20; Juan 6:45). w19.01 26 párr. 1-3

Guná Jesús gati pur ca xpinni, ne bisihuínnibe jma rizaaláʼdxibe laacaʼ que nizaaláʼdxibe laca laabe. Bidagulisaanebe laacaʼ neca maʼ bidxágabe ne naná nuu ladxidoʼbe (Luc. 22:39-46). Jma biyúbibe xi zanda gudiibe xcaadxi, ne cadi xi zanda gudiicabe laabe (Mat. 20:28). Nuunu lade ca xpinni Cristu ni dxandíʼ nadxiicaʼ ne de guidubi ladxidoʼno ribeenu tiempu dede biaʼ gándatiʼ para guni invitarnu binni chuʼ ládenu. Peru ni jma racaláʼdxinu nga gacanenu «ca hermanu» (Gál. 6:10). Rusihuínninu nadxiinu laacabe ora riguʼnu gana laacabe chécabe reunión, ne jmaruʼ si para chécabe Conmemoración. Cásica Jiobá ne Jesús, laanu laaca guizáʼ riéchenu ora ribiguetaʼ tuuxa ni maʼ qué rié reunión ra nuu Jiobá (Mat. 18:14). w19.01 29 párr. 12, 14; 30 párr. 15

Gudixhe Jesús gaca conmemorar guendaguti stiʼ nezalú ca once apóstol fiel stiʼ. Para ganda gúnicabe ni, biquiiñebe pan sin levadura ne vinu ni biaana ni biquiiñeʼ lu Pascua que. Gúdxibe ca apóstol stibe pan ne vinu ca nga chupa símbolo sencillu ni zeeda gaca cuerpu perfectu ne rini stibe ni chigudiibe pur laanu. Yanna, ¿xiñee qué nidxagayaa ca apóstol que ora biʼniʼ mandar Jesús gúnicabe Guendaroxhi stiʼ Señor de ti modo sencillu yaʼ? Chupa chonna beeu ante, dxi yegánnabe ca xhamígube Lázaro, Marta ne María ne laga nuube ra lídxicaʼ bizulú bisiidibe laacaʼ. Neca nuu Marta ra yoo que, canayuni stale guendaró para gudii invitadu ni jma risaca stiʼ. Ne diidxaʼ nadóʼ gudxi Jesús laabe cadi caquiiñepeʼ gúnibe ti guendaró ni rudii dxiiñaʼ para gaca (Luc. 10:40-42). Ti tiempu despué, chupa chonna hora ante gátibe, bíʼnibe ni gúdxibe Marta que, bíʼnibe ti eventu sencillu. w19.01 20, 21 párr. 3, 4

Bisisaca Jiobá Jesús de ti modo cadi cabézabe. Bisibani laabe de lade gueʼtuʼ ne bidii «laabe ti puestu ni jma risaca». Laaca bidii Jiobá laabe xiixa ni qué huayuu dxi guicaa guirutiʼ: ti guendanabani espiritual sin qué chuʼ dxi gátibe o inmortal (Filip. 2:9; 1 Tim. 6:16, TNM). ¡Guizáʼ ridxagayaanu modo bisisaca Jiobá Jesús purtiʼ bizuubaʼ diidxaʼ ne qué nucheené laabe! ¿Xi zacané laanu cadi guyúbinu gunibiáʼ ne gusisaca binni laanu yaʼ? Ni zacané laanu nga guietenaláʼdxinu siempre runibiáʼ ne rusisaca Jiobá ca xpinni ni ruzuubaʼ diidxaʼ ne runi recompensarbe laacaʼ de ti modo cadi cabézacaʼ. Ne qué gánnanu ximodo guni recompensar Jiobá laanu lu futuro. Peru laga cayuni huantarnu ca guendanagana ni nápanu yanna riʼ, cadi guiaandaʼ laanu maʼ cadi candaa para guinitilú guidxilayú riʼ (1 Juan 2:17). Bixhózenu Jiobá nadxii laanu ne qué ziuu dxi gusiaandabe guiráʼ ni huayúninu pur laabe purtiʼ nadxiinu laabe (Heb. 6:10). w18.07 11 párr. 17, 18

Ultimu gueelaʼ gudoxhiné Jesús ca apóstol stiʼ guyuube xizaa pur laacaʼ. Ora cayuni orarbe né laacaʼ, guniʼbe racaláʼdxibe chuʼ guiráʼ ca discípulo stibe tobi si, cásica nuube tobi si né Bixhózebe. Ra chuʼ ca discípulo que tobi si zacané ni para guihuinni Jiobá nga biseendaʼ Jesús lu Guidxilayú riʼ. Ne ra gannaxhiisaacabe zahuinni laacabe nga cani dxandíʼ xpinni Jesús ne zacané ni laacabe para chúʼcabe tobi si (Juan 13:34, 35). Gueelaʼ queca bisiene Jesús ca apóstol stiʼ pabiáʼ risaca chuʼcaʼ tobi si, purtiʼ biiyabe cadi nuucaʼ tobi si. Guzéʼtenu ti ejemplu, biiyabe «laca ucuaa yu caʼ uná de laaca jma zasaca», ne cadi ngue primé biaje gúnicabe ni (Luc. 22:24-27; Mar. 9:33, 34). Ne sti biaje la? gunabaʼ Santiago ne Juan Jesús gudii lugar cuícabe cueʼ, ca lugar risaca ni nuu lu Reinu stiʼ (Mar. 10:35-40). w18.06 8 párr. 1, 2

Racalaʼdxiʼ Jiobá gannaxhii ca guendaxheelaʼ ca stale para cadi chuʼ dxi guixélecaʼ (Mat. 19:3-6). Tobi de ca cosa jma feu zanda guni tuuxa nga guni cometer adulterio. Pur nga runi qué ridxagayaanu xiñee biʼniʼ prohibir Jiobá ni lu gadxe mandamientu que (Deut. 5:18). Ora runi cometer tuuxa adulterio rucheené Dios ne runiná xheelaʼ (Gén. 39:7-9). Ne yuubaʼ ni rapa binni ora rucheené xheelaʼ laa zanda guindaani stale iza. Laaca rizaalaʼdxiʼ Jiobá chuʼ ca xcuidihuiiniʼ nazaaca. Cadi biʼniʼ mandársibe ca padre gudiicaʼ ni gó ne ni gacu ca xiiñicaʼ, sínuque laaca naquiiñeʼ gudiicabe ni caquiiñecaʼ en sentidu espiritual. Laaca naquiiñeʼ guni aprovechárcabe tiempu stícabe para gusiidicabe ca xiiñicabe gusisácacaʼ ca ley zeeda de Dios ne gannaxhiicaʼ Dios (Deut. 6:6-9; 7:13). Cadi naquiiñeʼ guʼyaʼ ca israelita que ca xiiñicaʼ casi ti cosa ni qué risaca o casi xiixa ni zanda guni maltratarcaʼ, sínuque naquiiñeʼ gúʼyacaʼ laacabe casi ti herencia o ti regalu stiʼ Jiobá, ne naquiiñeʼ gápacaʼ laacabe né guendarannaxhii (Sal. 127:3). w19.02 21 párr. 5, 7

Jma gucuá ique Job ca ndaayaʼ chigudii Dios laa. Gunna dxíchibe rizaalaʼdxiʼ Dios pa íntegro laabe o coʼ. Neca cadíʼdibe prueba que la? gúpabe confianza zaguu ndaayaʼ Jiobá laabe, ne gucané ni laabe cadi gusaana de gácabe íntegro. Cumu guyuulaʼdxiʼ Jiobá cani biʼniʼ Job la? bidii laabe ti recompensa guizáʼ galán neca imperfectu laabe (Job 42:12-17; Sant. 5:11). Ne maʼ cadi candaa zacaabe stale ndaayaʼ jma galán. Caʼruʼ diʼ guchaa Dios stinu (Mal. 3:6). Pa guietenaláʼdxinu rusisaca Jiobá gácanu íntegro la? zacané ni para cadi gusiáʼndanu esperanza ni maʼ bidii Dios laanu de guibáninu jma galán lu ca dxi ni zeeda ca (1 Tes. 5:8, 9). Nuu biaje zándaca runi sentirnu laasinu nuunu decididu cadi gusaana de gácanu íntegro. Peru cadi stúbinu nuunu. Lu guidubi guidxilayú, nuu millón de hermanu ni cayuni stipa pur gaca íntegro. Ne laaca zunibiaʼnu ca hombre ne ca gunaa ni guca íntegro dxiqué neca guyuu xquendanabánicaʼ ra naxoo (Heb. 11:36-38; 12:1). w19.02 7 párr. 15, 16

Ora maʼ zedadxiña Conmemoración, galán guinabadiidxanu laca laanu: «¿Ximodo zanda gannaxhieeʼ cásica gunnaxhii Jesús yaʼ? ¿Ñee jma rizaaladxeʼ ni caquiiñeʼ ca hermanu stinneʼ que cani caquiiñeʼ la? ¿Ñee ribezaʼ gúnicabe stale cosa o riníʼ iqueʼ nuu xi zanda ne nuu xi qué zanda gúnicabe la?». Chinándanu ejemplu stiʼ Jesús ne gusihuínninu riénenu ni runi sentírcabe. Xcaadxi si maʼ qué zietenaláʼdxinu guendaguti stiʼ Jesús. Dxi guibiguetaʼ Jesús lu gran tribulación zinebe ca ungidu ni nuu lu Guidxilayú riʼ guibáʼ. Ne dede dxi ca maʼ qué zácaruʼ Conmemoración (1 Cor. 11:26; Mat. 24:31). Zanda chuʼnu seguru ora maʼ qué gaca Conmemoración zietenaláʼdxinu né cariñu eventu sencillu riʼ ni rusihuinni pabiáʼ valor, humildad ne guendarannaxhii bisihuinni Jesús, xiixa ni qué huayuu dxi gusihuinni ti binni. w19.01 25 párr. 17-19

Gápanu ni nuu ndaaniʼ ladxidoʼno zeeda gaca ni casi ora ñápanu laanu para cadi gaca huaranu. Guzéʼtenu ti ejemplu, pa racaláʼdxinu chuʼnu nazaaca, caquiiñeʼ guidoʼno guendaró ni zacané laanu ne gúninu ejerciciu gatigá. Nga runi, pa racaláʼdxinu chuʼnu nazaaca en sentidu espiritual la? naquiiñeʼ guidúʼndanu Biblia ne ca publicación stinu, ne gusihuínninu nápanu fe Jiobá ra gúninu guiráʼ ni cazíʼdinu ne guinínenu xcaadxi binni de cani runi crenu (Rom. 10:8-10; Sant. 2:26). Neca pur fuera ruluíʼ nazaaca nuunu, peru zándaca huaranu pur dentru. Zacaca rizaaca ora rúninu xhiiñaʼ Dios, zanda gucaa ni laanu guiníʼ íquenu naguidxi fe stinu, peru pur dentru cacaa xcu deseu malu ndaaniʼ ladxidoʼno (1 Cor. 10:12; Sant. 1:14, 15). Cadi guiaandaʼ laanu racalaʼdxiʼ Binidxabaʼ guiníʼ íquenu casi laa. w19.01 15 párr. 4, 5

Guníʼ ique ndiʼ: «¿Ñee runeʼ casi biʼniʼ samaritanu que la? ¿Ñee riaʼyaʼ binni la? Ora ruuyaʼ cayacaná tuuxa, ¿ñee riaʼyaʼ laabe la? (Luc. 10:30-35). ¿Ñee zanda guneʼ xiixa para gacaniáʼ laabe la? ¿Ñee racaniáʼ ca hermanu ni maʼ huaniisi, ca hermana viuda ne ca joven ni cadi Testigu bixhoze ne jñaa la? ¿Ñee ruyubeʼ gacaniáʼ ca hermanu ni nuu deprimidu la?» (1 Tes. 5:14; Sant. 1:27). Ora rúninu xiixa pur xcaadxi la? rudiʼnu cuenta «jma nayeche ni rudii que ni rica». Laaca nánnanu ora guianu stobi rusiéchenu ladxidóʼ Jiobá (Hech. 20:35; Heb. 13:16). Ne rey David guníʼ xi ribeendú ti binni ni riáʼ: «Zapa Jiobá laabe ne qué zudii lugar gátibe. Ziuube nayecheʼ lu guidxilayú» (Sal. 41:1, 2). Pa guianu xcaadxi la? laaca ziáʼ Jiobá laanu ne qué ziuu dxi gusaana de chuʼnu nayecheʼ (Sant. 2:13). w18.09 19, 20 párr. 11, 12

Ti dxi bidiicabe ti noticia nabé feu ti hermana láʼ Yoshiko. Gudxi doctora stibe laabe maʼ chupa chonna beeu si zabánibe. ¿Xi biʼniʼ hermana riʼ yaʼ? Nagueendaca bietenaláʼdxibe tobi de ca textu ni jma riuuláʼdxibe, laani nga textu ni cadúʼndanu yannadxí riʼ. Ngue runi nuudxí ladxidoʼbe ora gúdxibe doctora que cadi cadxíbibe, purtiʼ naaze Jiobá nabe. Gudixhedxí textu riʼ ladxidoʼbe ne gucané ni laabe gápabe jma confianza Jiobá, ne laaca zanda gacané textu riʼ laanu ora guidxaagalunu guendanagana nabé nadipaʼ. Bidii Jiobá mensaje riʼ Isaías para quixhedxí ladxidóʼ ca judíu ni zié de esclavu ndaaniʼ guidxi Babilonia. Peru laaca guniʼbe guicá ni para gacané ni ca xpinni Cristu ni huabani dede dxiqué hasta nagasi (Is. 40:8; Rom. 15:4). Nabé nagana ca dxi nabáninu riʼ, nga runi jmaruʼ si caquiiñenu ca diidxaʼ ni zeeda lu libru stiʼ Isaías riʼ para uguu gana laanu (2 Tim. 3:1). w19.01 2 párr. 1, 2

Ti razón nga purtiʼ neca cadi nabézacabe tobi si la? xheelarúcabe ne zaparúcabe guendanagana. Ne apóstol Pablo bizeeteʼ sti razón para cadi gusabixheelaʼ tuuxa. Sicaríʼ bicaabe: «Pa qué runi cre ti hombre peru runi cre xheela la? ziuu ndaaya pur xheelaʼ. Ne zaqueca gunaa ni qué runi cre, laca ziuu ndaaya pur xheelaʼ. Pa qué ñaca ni zacá la? ca xiiñi tu ñaca casi xiiñi cani qué runi cre, peru pur tobi de laatu ni ma runi cre la? ziuu cabe ndaayaʼ» (1 Cor. 7:14). Stale xpinni Cristu maʼ gucuaa decisión cadi gusaana xheelaʼ ni cadi xpinni Cristu neca cadiʼdiʼ ra nagana. Ne stale de laacaʼ riéchecaʼ pur bíʼnicaʼ sacrificiu riʼ purtiʼ guca xheelacaʼ ti testigu stiʼ Jiobá (1 Cor. 7:16; 1 Ped. 3:1, 2). Tiempu riʼ, nuu stale guendaxheelaʼ ni naca ti ejemplu ndaaniʼ ca congregación ni nuu lu guidubi Guidxilayú. Zándaca ndaaniʼ congregación stinu nuu stale guendaxheelaʼ ni nabani nayecheʼ purtiʼ hombre ca naca leal ne nadxii xheelaʼ ne gunaa ca laaca nadxii xheelaʼ ne runi respetar laabe. Ca guendaxheelaʼ riʼ rusihuínnicani zanda guni respetarnu guendaxheelaʼ (Heb. 13:4). w18.12 14 párr. 18, 19

Diidxaʼ Edén ca raca significar ni «guendanayecheʼ». Biáʼsipeʼ lá riʼ para lugar que purtiʼ nuu stale guendaró raqué, galán ca paisaje que ne qué runiná ca maniʼ que binni (Gén. 1:29-31). Jardín, ti diidxaʼ hebreu ni, ne biquiiñeʼ diidxaʼ parádeisos para guca traducir ni lu diidxaʼ griegu. Ti enciclopedia ná ora runadiaga ti binni griegu diidxaʼ parádeisos la? nagueendaca ruxuíʼlucaʼ ti parque naroʼbaʼ ne galán ra gastiʼ guendaquéiquiiñeʼ, ra zuhuaa stale yaga galán ni rudii guiráʼ clase cuananaxhi, laaca nuu stale arroyo ra rigué ca antílope ne ca dendxuʼ nisa (Cyclopaedia, ni bicaa MʼClintock ne Strong; bichaaga ni né Génesis 2:15, 16). Guluu Dios Adán ne Eva ndaaniʼ ti jardín casi ni bizéʼtenu riʼ, peru despué guleebe laaca purtiʼ qué nuzuubacaʼ diidxaʼ. Nga runi laacabe ne ca xiiñicabe biníticabe Paraísu riʼ (Gén. 3:23, 24). Maʼ guirutiʼ tu nibani raqué, ne zándaca binitilú ni dxi beeda Diluviu que ndaaniʼ Guidxilayú riʼ. w18.12 3, 4 párr. 3-5

Rusiidiʼ binni ca xiiñiʼ gácacaʼ honradu, gúnicaʼ dxiiñaʼ ne guizaaláʼdxicaʼ xcaadxi binni. Pa chinanda ca xcuidi cani bisiidiʼ bixhózecaʼ ne jñaacaʼ laacaʼ la? zándaca zacaacaʼ decisión jneza ne zuni evitarcaʼ stale problema ni guniná ne ni cuʼ xizaa laacaʼ. Jiobá nga bixhózenu, ne cásica bixhoze binni la? racaláʼdxibe guibáninu galán (Is. 48:18). Nga runi maʼ bidiibe laanu caadxi principiu risaca ni racané laanu gánnanu ximodo gaca xpiaʼnu ne ximodo guni tratarnu xcaadxi binni. Runi invitarbe laanu guiníʼ íquenu casi riníʼ íquebe ne chinándanu ca principiu stibe. Peru ¿ñee riníʼ nga qué zanda guicaanu decisión laasinu la? Coʼ, purtiʼ jmaruʼ si rizíʼdinu guicaanu decisión jneza (Sal. 92:5; Prov. 2:1-5; Is. 55:9). Racané ni laanu guicaanu decisión ni zacané laanu guibáninu nayecheʼ ne zanda gúninu caadxi de ca cosa ni riuuláʼdxinu (Sal. 1:2, 3). Nga runi nuunu seguru zabeendunu ni galán pa guiníʼ íquenu casi riníʼ ique Jiobá. w18.11 19, 20 párr. 7, 8

Para sanu lu cani dxandíʼ rusiidiʼ Stiidxaʼ Dios la? cadi naquiiñeʼ gudiʼnu lugar gucaacabe laanu gúninu xiixa ni cadi jneza. Dxi binibiaʼnu ni dxandíʼ la? bichaa amistad ni nápanu né ca xhamígunu ne ca familia stinu ni cadi Testigu. Nuu tu laa biʼniʼ respetar ni runi crenu, peru xcaadxi qué lica ñuuláʼdxicaʼ ni. Zándaca guni invitar ca familia stinu, ca xhamígunu o ca compañeru de dxiiñaʼ stinu laanu chuunu ti saa. ¿Xi zacané laanu gucáʼnanu ca costumbre ne ca saa ni nanalaʼdxiʼ Jiobá yaʼ? Ni zacané laanu nga cadi gusiáʼndanu ximodo ruuyabe cani. Ne laaca caquiiñeʼ guni estudiarnu ca publicación stinu ra cá para biasastí ca saa ca. Nga runi, ora rietenaláʼdxinu xiñee qué runi participarnu lu ca saa ca la? riuʼnu seguru cayúninu ni riuulaʼdxiʼ Dios (Efes. 5:10). Pa gápanu confianza Jiobá ne Stiidxaʼ la? qué zadxíbinu xi guiníʼ binni (Prov. 29:25). w18.11 11 párr. 10, 12

Ora málasi guchaa xiixa lu xquendanabáninu, zándaca guidxíbinu o guiníʼ íquenu qué zaca chaahuiʼ ca guendanagana stinu ne pur nga chuʼnu xizaa pur futuro stinu. Ñanda niníʼ ique José zacá. Peru, lugar de nga la? bíʼnibe guiráʼ ni nuu lu nabe para cuʼ Jiobá ndaayaʼ laabe. Nga runi, neca nuube ndaaniʼ cárcel que bíʼnibe stipa pur gúnibe guiráʼ ni gunábacabe laabe, cásica bíʼnibe ni dxi bíʼnibe dxiiñaʼ para Potifar (Gén. 39:21-22). Cásica José, ziuu ora zadxaagalunu guendanagana ni zanda guni chaahuinu peru ziuu ora qué licapeʼ zanda guni chaahuinu cani. Peru pa gápanu paciencia ne gúninu stipa pur gúninu ni nuu lu nanu para guni chaahuinu ca guendanagana stinu la? zudiʼnu xiixa Jiobá para cuʼ ndaayaʼ laanu (Sal. 37:5). Dxandíʼ, zándaca nuu biaje qué zadxélanu xi gúninu, peru cásica guníʼ apóstol Pablo zanda gaca chaahuiʼ guendanagana stinu (2 Cor. 4:8). Ne zacá zaca ni, jmaruʼ si pa guicá íquenu gúninu jma lu xhiiñaʼ Jiobá. w18.10 29 párr. 11, 13

Guxuíʼlunu bidxaaganu ti binni ni runibiaʼnu ne runi respetarnu, peru binni ca cadi cayetenalaʼdxiʼ tu lanu ne ni jma feu nga cadi cayunibiaʼbe laanu. ¿Ximodo ñuni sentirnu yaʼ? Zándaca ñuʼnu triste, purtiʼ de guiráʼ binni riuulaʼdxiʼ gunibiáʼcabe laa. Peru qué racaláʼdxinu gunibiáʼsicabe laanu, sínuque gusisácacabe laanu ne ni rúninu (Núm. 11:16; Job 31:6). Guiranu nga riuuláʼdxinu gusisaca binni laanu, peru pa qué gápanu cuidadu la? zanda gucaa guidxilayú stiʼ Binidxabaʼ laanu chuuláʼdxinu gácanu famoso o ti binni risaca. Ora rúninu nga cadi cusisácanu Jiobá, Bixhózenu ni nuu guibáʼ, Dios ni caquiiñeʼ gusisácanu ne guni adorarnu (Apoc. 4:11). w18.07 7 párr. 1, 2

Qué ridxagayaanu guidúʼyanu iquiiñeʼ Binidxabaʼ ne ca demonio stiʼ binni napa puestu risaca para gusiguii (1 Tim. 4:1, 2). Ca xaíque yuʼduʼ nga cani jma napa donda. ¿Xiñee yaʼ? Purtiʼ ca binni ni runi cré ni riníʼcabe ne cani runi ni nanalaʼdxiʼ Dios runíticaʼ oportunidad de guibánicaʼ sin qué chuʼ dxi gáticaʼ (Os. 4:9). Gunna dxiichiʼ Jesús nabé rusiguii ca xaíque yuʼduʼ de dxiqué. Nga runi gúdxibe laacaʼ: «¡Lagapagá si laatu, escriba ne fariseu! ¡Aque hipócrita laatu! Purtiʼ ridíʼditu nisadóʼ ne rizatu zitu para gacanetu ti binni chuʼ lu grupu stitu, ne ora maʼ biuube la? pur laatu ziebe Gehena [o zanitilube] ne zápabe donda chupa biaje jma que laatu» (Mat. 23:15, TNM). Guníʼ Jesús cadi jneza ni rúnicabe ne gúpabe razón para gábibe laacaʼ: «Binidxaba nga bixhoze tu» purtiʼ «dede dxi bizulú guidxilayú huayuuti be binni» (Juan 8:44). w18.10 7 párr. 5, 6

¿Xiñee guníʼ Jesús ca diidxaʼ riʼ yaʼ? Laca laabe bicábibe: «Laguiecheʼ neca cazaaca tu irá nga, purti nabé sicarú ni chi gudii Dios laatu ibáʼ, ne nanna ca tu zacaca biʼni cabe ca profeta sti Dios chiqué» (Mat. 5:12). Dxi gudíñecabe ca apóstol ne gúdxicabe laacaʼ gusaanacaʼ de guni predicarcaʼ la? «biree ca [...] de ra nuu ca justicia que, ziyeche ca». Qué ñuulaʼdxiʼ ca apóstol que ni bíʼnicabe laacaʼ, peru biéchecaʼ «purti bidii Dios lugar usituí binni lú ca purti xpinni Jesús laacaʼ» (Hech. 5:41). Ca dxi nabáninu riʼ, ca xpinni Dios laaca runi huantarnu né stale guendanayecheʼ ca yuubaʼ ni ridxaagalunu purtiʼ nácanu xpinni Cristu (Sant. 1:2-4). Laanu laaca qué riuuláʼdxinu guninácabe laanu, peru pa gácanu leal ora guidxaagalunu guendanagana la? zacané Jiobá laanu guni huantarnu. Ora riuuladxiʼ Jiobá, «Dios ni nayecheʼ» ni rúninu la? ribáninu nayecheʼ neca canazanándacabe laanu pur runi adorarnu Dios ne neca gucaalú familia stinu laanu (1 Tim. 1:11, TNM). w18.09 21 párr. 18-20

Lu ca últimu dxi riʼ «puru si guendanagana ne yuubaʼ» nga nabáninenu, nga runi stale binni racaná ladxidóʼ ne nuu xizaa, stale tu laa dede maʼ qué racalaʼdxiʼ guibani (2 Tim. 3:1-5). Nga runi lu ti iza jma de 800,000 binni ruuti laca laa, zanda guininu rati ti binni cada 40 segundu. Triste guininu ni, peru stale hermanu huayuni sentir zacá ne pur nga huayuuticaʼ laca laacaʼ. Stale de ca hermanu stinu cayúnicaʼ stipa pur gudxiilucaʼ ca guendanagana sticaʼ, pur nga caquiiñecabe cariñu stinu ne tu quixhedxí ladxidóʼcabe. Caadxi de ca hermanu rizananda binni laacaʼ ne runi búrlacabe laacaʼ. Xcaadxi la? caquiiñeʼ guni huantarcaʼ pur riníʼ ca compañeru runinecaʼ dxiiñaʼ mal de laacaʼ. O zándaca nuu tu maʼ bidxaga pur runi dxiiñaʼ extra o purtiʼ runi estresar dxiiñaʼ sticaʼ laacaʼ. Ne nuu hermanu ridxaagalú guendanagana naroʼbaʼ ndaaniʼ familia stiʼ, purtiʼ zándaca nabé runi criticar xheelaʼ ni cadi Testigu laa. Pur guiráʼ ndiʼ ne xcaadxi guendanagana la? stale hermanu runi sentir maʼ bidxaaga en sentidu físicu ne emocional. w18.09 13 párr. 3, 5

Ca hermanu ni napa xiiñiʼ runinecaʼ Jiobá dxiiñaʼ ora riguucaʼ gana ca xiiñicaʼ para gápacaʼ meta espiritual. Ra tidiʼ iza, stale de ca xcuidihuiiniʼ ca rúnicaʼ xhiiñaʼ Dios de tiempu completu ne runi servircaʼ zitu de familia sticaʼ. Nuu de laacabe naca misioneru, xcaadxi naca precursor regular ni cayacané ra nuu necesidad ne xcaadxi la? cayuni servir Betel. Cumu nabézacabe zitu la? qué ruuyapeʼ familia stícabe laacabe casi ñuuláʼdxicaʼ. Neca cadi seguidu ruuyaʼ ca hermanu riʼ ca xiiñicaʼ, peru nuucaʼ dispuestu gúnicaʼ intiica sacrificiu ne cuʼcaʼ gana laacabe para cadi gusaanacabe asignación stícabe. ¿Xiñee rúnicabe ni yaʼ? Purtiʼ riéchecaʼ gúʼyacaʼ cayuni xiiñicaʼ ni ná Reinu primé lu xquendanabánicaʼ. Zándaca runi sentírcabe casi biʼniʼ sentir Ana dxi bidii Samuel para guni servir Dios, guniʼbe casi ñaca nutiiñebe xiiñibe Jiobá. Ca hermanu ni napa xiiñiʼ ni cayuni servir lu ti asignación, ruuyacaʼ ni casi ti privilegiu ni nabé risaca purtiʼ zacá nga ti modo cayuninécabe Dios dxiiñaʼ (1 Sam. 1:28). w18.08 24 párr. 4

Qué niníʼ diʼ Jesús qué zanda chuʼ ti ricu lu Reinu stiʼ Dios. Laaca guniʼbe: «Laguiecheʼ, laatu ca pobre, purtiʼ stitu Reinu stiʼ Dios» (Luc. 6:20, TNM). Peru, né ca diidxaʼ riʼ la? cadi caníʼdibe zucaadiaga guiráʼ ca binni pobre laabe ne pur nga guicaacaʼ ndaayaʼ ni rudii Dios ca xpinni. Ne nánnanu dxandíʼ ni purtiʼ guyuu stale binni pobre ni qué ñuu dxi ñaca discípulo stibe. ¿Xi rusiidiʼ ndiʼ laanu yaʼ? Rusiidiʼ ni laanu cadi purtiʼ si napa o qué gapa ti binni stale cosa material nga zanda gaca xhamigu Jiobá. Ndaaniʼ xquidxi Jiobá nuu stale hermanu ne hermana ni nadxii Dios ne runi ni nabe de guidubi ladxidóʼ. Ládecabe nuu binni ricu ne nuu binni pobre. Biblia cayabi ca binni ricu cadi quíxhecaʼ esperanza sticaʼ lu ca cosa risaca nápacaʼ purtiʼ zadxiña dxi zará cani, sínuque quíxhecaʼ esperanza sticaʼ lu náʼ Dios (1 Tim. 6:17-19). Peru laaca cayabi ni guiráʼ ca xpinni Dios, ca ricu ne ca pobre, cadi gannaxhiicaʼ bueltu purtiʼ zeeda gaca ni ti peligru (1 Tim. 6:9, 10). Pa guidúʼyanu ca hermanu casi ruuyaʼ Jiobá laacaʼ la? qué zuyúbinu guidxaaganu ca binni si ni napa bueltu ne qué zúninu menu ca pobre. w18.08 10, 11 párr. 11, 12

Guiranu racaláʼdxinu gusihuínninu rudiʼnu xquíxepeʼ Jiobá pur privilegiu ni nápanu de gácanu parte de xquidxi. Nánnanu decisión ni jma galán gucuaanu nga dxi bidiʼnu xquendanabáninu Jiobá. Rucáʼnanu guiráʼ cosa ni qué iquiiñeʼ. Rannaxhiinu ne runi respetarnu ca hermanu stinu, purtiʼ laaca xpinni Jiobá laacabe (Rom. 12:10). Biblia cayabi laanu: «Qué lica zusaana Jiobá xquidxi» (Sal. 94:14). Intiica si guizaacanu nánnanu dxandíʼ ni ná ca diidxaʼ riʼ. Gastiʼ qué zanda guxheleʼ laanu de guendarannaxhii stiʼ Dios, nin guendaguti (Rom. 8:38, 39). «Nga runi, pa nabáninu o pa gátinu la? stiʼ Jiobá laanu» (Rom. 14:8, TNM). Guiranu maʼ racaláʼdxinu guedandá dxi gusibani Jiobá de lade gueʼtuʼ guiráʼ ca xhamigu ni qué nusaana laa (Mat. 22:32). Dede yanna caguu Dios ndaayaʼ laanu. Casi ná Biblia, «nayecheʼ nuu guidxi ni napa Jiobá casi Dios stiʼ, guidxi ni maʼ gulibe para gaca herencia stibe» (Sal. 33:12). w18.07 26 párr. 18, 19

Zándaca nuu tu laa guiníʼ ique cumu cada tobi nga naquiiñeʼ cuí xi dxiiñaʼ guicaa o xi carrera guʼndaʼ la? zanda cuí guni ni racalaʼdxiʼ pa cadi cuchiiñaʼ conciencia stiʼ laa. Zándaca chuʼ tu guiníʼ ique ca diidxaʼ ni gudxi apóstol Pablo ca xpinni Cristu de Corinto: «Ñee purti uchenda ni stobi usaana de gune ni, neca qué uchenda ni naa la?» (1 Cor. 10:29). Dxandíʼ libre laanu cuinu pa ziuunu scuela o xi gúninu lu xquendanabáninu. Peru cadi naquiiñeʼ guiaandaʼ laanu cadi guiráʼ diʼ cosa zanda gúninu ne ca decisión ni guicaanu napa cani consecuencia. Nga runi, guníʼ Pablo ca diidxaʼ ni zeeda lu textu cadúʼndanu yannadxí. Ni guniʼbe riʼ racané ni laanu guiénenu ora chicaanu ti decisión la? cadi ni riuuláʼdxinu nga ni jma risaca. w18.04 10 párr. 10

Zándaca guiníʼ ique ti xpinni Cristu cayuni adorar Jiobá peru cadi cusaana de guni cosa malu (Jud. 11). Zándaca guizáʼ runi predicarbe ne qué riaadxabe nin ti reunión, peru riníʼ íquebe cosa inmoral, riníʼ íquebe gápabe stale bueltu o dede nanaláʼdxibe tuuxa hermanu (1 Juan 2:15-17; 3:15). Zanda gucaa ca cosa riʼ laabe gucheebe. Neca qué ganna xcaadxi xi riníʼ íquenu o xi rúninu, peru ruuyaʼ Jiobá guiráʼ xixé cosa ne nánnabe pa dxandíʼ nuunu pur laabe o coʼ (Jer. 17:9, 10). Neca zacá, qué riníʼ ique Jiobá maʼ qué zanda gúnini ni ná. Pa gúʼyabe caxélenu de laabe la? rábibe laanu guibiguétanu ra nuube. Racaláʼdxibe gucáʼnanu guiráʼ cosa malu, jmaruʼ si pa naca ni xiixa ni nabé riuuláʼdxinu gúninu (Is. 55:7). Pa chuʼnu gaxha de laabe la? zacanebe ne zudiibe stipa laanu en sentidu espiritual, emocional ne físicu para cadi guiábanu lu náʼ pecadu (Gén. 4:7). w18.07 18 párr. 5, 6