LECCIÓN 58
Cadi gusaanaluʼ Jehová
Ca ni dxandíʼ naca xpinni Cristu maʼ gudixhe íquedu cadi gucueeza guirutiʼ nin gastiʼ laadu de guni adorardu Jehová. Ne nánnadu nga peʼ nga ni runi sentirluʼ, ne guizáʼ rusisaca Jehová lii purtiʼ naguixhe íqueluʼ cadi gusaanaluʼ laa (biindaʼ 1 Crónicas 28:9). ¿Xii nga ca cosa ni zándaca gucaa lii guixéleluʼ de Dios yaʼ? ¿Xi zanda gúniluʼ para gudxiiluluʼ ca ni yaʼ?
1. ¿Ximodo zanda gucaa xcaadxi binni laanu guixélenu de Jehová?
Ziuu tu zacalaʼdxiʼ gusaana de gúninu ni ná Jehová. ¿Tu zándaca gucaa laanu gúninu ni yaʼ? Nuu caadxi binni ni guca xpinni Jehová dxiqué peru yanna rizacaʼ riniʼcaʼ cosa ni cadi dxandíʼ de xquidxi Dios para cueecaʼ gana laanu. Runibiaʼnu ca binni riʼ casi apóstata. Laaca nuu stale líder stiʼ ca religión ca riniʼcaʼ cosa ni cadi dxandíʼ de ca Testigu para guxhélecaʼ guiráʼ ni cadi zuhuaa dxiichiʼ de xquidxi Jehová. Ne nabé malu nga guinínenu ca binni ni rucaalú xquidxi Dios, guidúʼndanu ca libru sticaʼ, chuʼnu lu ca página de internet ni nápacaʼ o guidúʼyanu ca videu sticaʼ. Sicaríʼ guníʼ Jesús ora bizeeteʼ de ca binni ni racalaʼdxiʼ gucaacaʼ laanu gusaananu Jehová: «Zaa nuucabe. Nácacabe guía ciegu. Nga runi, pa guni guiar ti ciegu sti ciegu la? ziaba guirópacaʼ ndaaniʼ ti barranca» (Mateo 15:14).
2. ¿Ximodo rusihuínninu qué racaláʼdxinu guixélenu de Jehová pur ca decisión ni guicaanu?
Cumu nadxiinu Jehová la? qué racaláʼdxinu gácanu parte de ca religión ni qué rusiidiʼ ni dxandíʼ. Nga runi, cadi naquiiñeʼ gusihuinni dxiiñaʼ ni rúninu o xiixa organización ni nuunu lade cayuni apoyarnu ca religión ni qué rusiidiʼ ni dxandíʼ. Ndiʼ nga ca diidxaʼ ni cayabi Jehová xquidxi: «Laguiree de ndaaniʼ guidxi ca» o laguiree de Babilonia guidxi roʼ (Apocalipsis 18:2, 4).
GUIZÍʼDIRUNU JMA
Guidúʼyanu xi zanda gúniluʼ para cadi guxheleʼ gastiʼ lii de Jehová. Ne zadúʼyanu xiñee zusihuínninu qué racaláʼdxinu gusaananu Jehová pa guixélenu de Babilonia guidxi roʼ.
3. Gupa cuidadu né ca binni ni qué rusiidiʼ ni dxandíʼ
¿Xi gúninu pa gunadiáganu caníʼcabe mal de organización stiʼ Jehová yaʼ? Laguundaʼ Proverbios 14:15 ne laiquiiñeʼ pregunta riʼ para güitu diidxaʼ:
¿Xiñee naquiiñeʼ gácanu binni nuu xpiaaniʼ ne cadi guni crenu guiráʼ ni runadiáganu?
Laguundaʼ 2 Juan 9-11 ne laiquiiñeʼ ca pregunta riʼ para güitu diidxaʼ:
¿Ximodo naquiiñeʼ guni tratarnu ca apóstata?
Neca qué rinínenu ca apóstata, ¿ximodo zanda gucaacabe laanu guchaʼnu modo riníʼ íquenu?
¿Ximodo rábiluʼ zuni sentir Jehová pa gucaʼdiáganu guiráʼ cosa ni cadi dxandíʼ riníʼcabe de laabe ne de organización stibe?
4. Gusihuínninu nuunu pur Jehová ora guni ti hermanu ti pecadu
Pa málasi gánnanu biʼniʼ tuuxa de ndaaniʼ congregación ti pecadu grave, ¿xi caquiiñeʼ gúninu? Guidúʼyanu xi zanda guizíʼdinu de Ley ni bidii Jehová guidxi Israel. Laguundaʼ Levítico 5:1.
Nayaʼniʼ modo cusiene versículo riʼ laanu caquiiñeʼ gábinu ca ancianu ni bizaacaʼ pa málasi gueeda gánnanu biʼniʼ tuuxa binni ti pecadu grave. Peru ante gúninu ndiʼ la? ni jma jneza gúninu nga gábinu binni ca naquiiñeʼ guiniʼné ca ancianu ne gabi laacabe xi guiráʼ bizaaca. Pa qué gúnibe ni la? ti modo zanda gusihuínninu nuunu pur Jehová nga gábinu ca ancianu ni bizaaca. Ne pa gúninu ndiʼ, ¿xiñee cusihuínninu nadxiinu ne qué racaláʼdxinu gusaananu...
... Jehová?
... binni ni maʼ bichee ca?
... congregación?
Pa nánnaluʼ biʼniʼ ti hermanu ti cosa ni cadi jneza, ¡gucané laabe!
5. Guixélenu de Babilonia guidxi roʼ
Laguundaʼ Lucas 4:8 ne Apocalipsis 18:4, 5, ne laiquiiñeʼ ca pregunta riʼ para güitu diidxaʼ:
¿Ñee caruʼ laʼyaʼ lade xiixa religión ni qué rusiidiʼ ni dxandíʼ la?
¿Ñee nuaaʼ lade xiixa organización ni runi apoyar sti religión la?
¿Ñee cusihuinni dxiiñaʼ ni runeʼ cayuneʼ apoyar religión ni qué rusiidiʼ ni dxandíʼ la?
¿Ñee caquiiñeʼ gúneruaʼ xiixa para gusaanaʼ de guneʼ apoyar xiixa religión ni qué rusiidiʼ ni dxandíʼ la?
Despué de bicábiluʼ ca pregunta riʼ, ¿ñee rábiluʼ nuu xiixa ni caquiiñeʼ gúniluʼ la?
Intiica si decisión guicaaluʼ, biiyaʼ gacané ni lii chuʼ conciencia stiluʼ nayá ne gusihuínniluʼ qué racaláʼdxiluʼ gusaanaluʼ Jehová.
¿Xi ñúniluʼ pa ninábacabe lii ñuni apoyarluʼ xiixa religión ni racané binni?
NUU TU NÁ: «Caquiiñeʼ gannaʼ xi riníʼ ca apóstata de ca testigu stiʼ Jehová para ganda guneʼ defender xquidxi Jehová».
¿Ñee jneza nga guiníʼ íquenu zacá la? ¿Xiñee riníʼ íqueluʼ zacá yaʼ?
XI BIZÍʼDINU
Para cadi gusaananu Jehová la? cadi naquiiñeʼ guidxaaganu ca binni ni racalaʼdxiʼ quiteʼ laanu.
Xi biziidiluʼ
¿Xiñee cadi naquiiñeʼ gucaadiáganu ni riníʼ ca apóstata?
¿Xi naquiiñeʼ gúninu pa gánnanu biʼniʼ ti hermanu ti pecadu grave?
¿Xi caquiiñeʼ gúninu para guireʼnu de ndaaniʼ religión ni qué rusiidiʼ ni dxandíʼ?
BIIYAʼ XIRUʼ ZANDA GUIZIIDILUʼ
Biiyaʼ xi zanda gúniluʼ ora guiníʼcabe xiixa ni cadi dxandíʼ de ca testigu stiʼ Jehová.
«¿Ñee naquiiñeʼ guni crenu guiráʼ ni gábicabe laanu la?» (Torre stiʼ ni rapa, agosto de 2018)
¿Ximodo zanda gánnanu pa runi apoyar ti organización o xiixa ni runi binni Babilonia guidxi roʼ?
¿Xi huayuni ca enemigu stiʼ Jehová para cueecaʼ gana laanu?
Biiyaʼ ximodo bisaana ti sacerdote religión ni qué rusiidiʼ ni dxandíʼ lu historia ni láʼ «Dede dxi nahuiineʼ cuyubeʼ Dios».
«Gucané Biblia laacabe para bichaacabe» (Tema ni zeeda lu Torre stiʼ ni rapa)