Febrero

Dxi guca huará rey Ezequías ne guizáʼ malu guyuube, gunábabe Jehová gusianda laabe ne laa bisianda laabe (2 Rey. 20:​1-6). Peru ora gunabaʼ apóstol Pablo Jehová gaxhaʼ ti guichi ni daabi lu beela ladi, qué ñaxha Jehová ni (2 Cor. 12:​7-9). Gucalaʼdxiʼ rey Herodes ñuuti apóstol Santiago ne Pedro. Santiago biiticabe laa ne Pedro bilá pur ti milagru ni biʼniʼ Jehová (Hech. 12:​1-11). Zándaca guiníʼ iquenu, ¿xiñee tobi si de laacabe bilá Jehová pue? Neca qué ruzeeteʼ Biblia gastiʼ de laani, peru nanna dxíchinu naca Jehová ti Dios «ni qué runi cosa malu» (Deut. 32:4). Zándaca guicabi Jehová ca oración stinu de ti modo ni cadi cabézanu. Peru modo tiica si guicabi Jehová laanu, qué ridxiichinenu laabe purtiʼ nánnanu jneza modo ricábibe laanu ne rúnibe ni né guendarannaxhii (Job 33:13). w23.11 21 párr. 6

Bicaa Santiago ti binni nuu xpiaaniʼ nuu «listu para guzuubaʼ diidxaʼ». ¿Xi riníʼ ndiʼ yaʼ? Naquiiñeʼ guzúʼbanu stiidxaʼ ca ni maʼ bidii Jehová xiixa autoridad ne guiale de ndaaniʼ ladxidoʼno gúninu ni. Peru qué ribeza Jehová guzúʼbanu stiidxaʼ tuuxa ni guinabaʼ laanu cadi chinándanu ca ley stibe (Hech. 4:​18-20). Zándaca guiníʼ íquenu jma fácil guzúʼbanu stiidxaʼ Jehová que stiidxaʼ binni, purtiʼ ca instrucción ni rudii Jehová laanu qué ruchee ca ni (Sal. 19:7). Ne qué rizaaca nga né ca binni ni napa autoridad. Neca zacá, maʼ bidii Bixhózenu ni nuu guibáʼ autoridad ca ni napa xiiñiʼ, ca autoridad stiʼ guidxilayú ne ca ancianu (Prov. 6:20; 1 Tes. 5:12; 1 Ped. 2:​13, 14). Ne ora guzúʼbanu stiidxacabe la? cuzúʼbanu stiidxaʼ Jehová. w23.10 6 párr. 2, 3

Ti cosa ni zacané laanu iguidxi fe stinu nga guiníʼ íquenu pabiáʼ poder napa Jehová. Nápabe stale poder para guni cumplirbe guiráʼ ni maʼ guniʼbe. Laabe zanda gúnibe ca ni purtiʼ laabe nga ni jma napa poder (Job 42:2; Mar. 10:27; Efes. 3:20). Neca maʼ huaniisi Abrahán ne Sara gudxi Jehová laacaʼ zápacaʼ ti xiiñicaʼ (Gén. 17:​15-17). Laaca gúdxibe Abrahán zudiibe ca ni zá de laa layú stiʼ Canaán. Zándaca guníʼ ique ca ni zá de Abrahán, ca israelita, maʼ qué zaca cumplir ni guníʼ Jehová purtiʼ maʼ xadxí de nuucaʼ de esclavu Egipto. Peru guca cumplir ni. Gúdxibe ti binnidxaapaʼ láʼ María, zacaxiiñiʼ ne zapa ti hombrehuiiniʼ ni zábicabe laa Xiiñiʼ Dios. Zaqué zaca cumplir ti promesa ni biʼniʼ Jehová raca stale iza ndaaniʼ jardín de Edén (Gén. 3:15). Ora riníʼ íquenu lu ca promesa ni maʼ biʼniʼ Jehová ne ximodo biʼniʼ cumplirbe ca ni ridúʼyanu pabiáʼ nápabe poder. Racané ni laanu gápanu fe dxandíʼ zúnibe Guidxilayú riʼ ti paraísu (Jos. 23:14; Is. 55:​10, 11). w23.04 28 párr. 10-12

Bicabi Jehová ca oración stiʼ David ne bilá laabe (1 Sam. 19:​10, 18-20; 2 Sam. 5:​17-25). Laanu laaca zanda chuʼnu seguru zacabi Jehová laanu (Sal. 145:18). Zándaca cadi modo cabézanu guicabi Jehová oración stinu. Chonna biaje gunaba Pablo Dios cuee ti guichi lu beela ladi. ¿Ñee bicabi Jehová ca oración stibe la? Bicabi pue, peru cadi modo cabeza Pablo ni. Qué nibee Jehová guendanagana que, peru bidii laabe stipa ni caquiiñebe para cadi gusaana de gúnibe ni ná (2 Cor. 12:​7-10). Ziuu biaje cadi modo cabézanu nga zacabi Jehová ca oración stinu. Peru zanda chuʼnu seguru nanna Jehová xii nga ni jma galán para cada tobi de laanu dede zanda «gúnibe jma que biaʼ rinábanu o jma que biaʼ riníʼ íquenu» (Efes. 3:20). Nga runi, zanda guicábibe ca oración stinu ora peʼ cadi cabézanu ni o modo peʼ cadi caníʼ íquenu ni. w23.05 8, 9 párr. 4-6

Gatigá galán guiníʼ íquenu lu ca promesa ni zeeda lu Biblia ra ná zabani ca binni ni maʼ guti. ¿Xiñee yaʼ? Purtiʼ zándaca gueeda gátinu o gueeda gati ti binni ni nadxiinu (Ecl. 9:11; Sant. 4:​13, 14). Zacané esperanza riʼ laanu gudxíʼlunu intiica guendanagana gápanu (1 Tes. 4:13). Biblia cayabi laanu runibiáʼ Bixhózenu ni nuu guibáʼ laanu ne guizáʼ nadxiibe laanu (Luc. 12:7). Guníʼ ique pabiáʼ runibiáʼ Jehová laanu. Ne guizáʼ nadxiibe laanu purtiʼ neca gátinu zusibánibe laanu sti biaje. ¿Xiñee zanda guni crenu zabani ca binni ni maʼ guti yaʼ? Purtiʼ nuunu seguru ni cayuni promesa ca racalaʼdxiʼ gusibani ca ni maʼ guti ne napa poder para guni ni. w23.04 8, 9 párr. 2-4

Biʼniʼ José ne María dxiiñaʼ juntu para chuʼcaʼ gaxha de Jehová. Gúnnacabe nabé risaca nga guni adorárcabe Jehová né familia stícabe (Luc. 2:​22-24; 4:16). ¡Aque de galán ejemplu riʼ para ca guendaxheelaʼ ca! Pa nápatu xiiñitu zándaca gueeda gaca nagana para laatu chetu ca reunión ca ne gápatu adoración en familia. Dede zándaca gaca nagana para laatu guni estudiartu ne guni orartu juntu casi guendaxheelaʼ. Peru cadi guiaandaʼ laatu pa guni adorartu Jehová juntu ziuutu jma gaxha de laa ne jma zannaxhiisaatu. Nga runi, laquixhe ique guni adorartu Jehová primé lu xquendanabánitu. Pa nápatu guendanagana lu guendaxheelaʼ stitu, zándaca gaca nagana para laatu gápatu adoración en familia. Pa nga nga ni cazaacatu, ¿xiñee qué quixhe íquetu guzulú gúʼndatu xiixa nachucu ne ni chuuláʼdxitu yaʼ? Pa gúnitu ni la? zacané ni laatu gannaxhiitu jma ne chuuláʼdxitu guni adorartu Jehová juntu. w23.05 22 párr. 7, 8

Yanna, guidxibi Abdías gucheené Dios, ¿ximodo gucané ni laa? Gucané ni laabe gácabe ti binni honradu ne tobi ni zanda gápacabe confianza laa. Bidii rey que laabe gápabe lidxi (bichaaga ni né Nehemías 7:2). Ne laaca gucané ni laabe gápabe valor, ti cualidad ni caquiiñebe. ¿Xiñee yaʼ? Purtiʼ bibánibe tiempu biʼniʼ mandar rey Acab (1 Rey. 16:30). Ne Jezabel nga xheelaʼ Acab, ti gunaa ni runi adorar Baal ne nabé nanalaʼdxiʼ Jehová dede guyuu nunduuxeʼ guiráʼ tu runi adorar Jehová, lu reinu ni nuu ladu guiaʼ stiʼ guidxi Israel. Ne biiti gunaa riʼ stale profeta stiʼ Dios ni dxandíʼ (1 Rey. 18:4). Dxi guzananda Jezabel ca profeta stiʼ Dios para guuti laacabe, gucuaa Abdías ti gayuaa de ca profeta que ne bicaachibe laacaʼ ndaaniʼ ti cueva. Bíʼnibe chupa grupu ne bidiibe laacaʼ pan ne nisa (1 Rey. 18:​13, 14). Pa ñanna Jezabel ni bíʼnibe que, ñuuti laabe. Cumu naca Abdías casi laanu la? bidxibi gatiʼ. Peru, pur guizáʼ nadxiibe Jehová ne ca xpinni, gunabe chuʼ xquendanabánibe ra naxoo. w23.06 16 párr. 9, 10

Ca dxi stinu riʼ, riquiiñeʼ Jehová Stiidxaʼ ne Xiiñiʼ, xaíque stiʼ congregación, para gabi xquidxi xi guni, cásica bíʼnibe ni dxiqué. ¿Ñee nápanu prueba caquiiñeruʼ Jehová binni para gabi laanu xi caquiiñeʼ gúninu la? Nápanu pue. Guiníʼ íquenu ni bizaaca ra ziluxe siglu diecinueve. Biene Charles Russell ne ca xhamigu zaca iza 1914 ti iza nabé risaca para Reinu stiʼ Dios (Dan. 4:​25, 26). ¿Xiñee guníʼ íquecabe zacá yaʼ? Purtiʼ biʼniʼ estudiárcabe ca profecía ni zeeda lu Biblia. Ne nánnanu guluu Jehová ndaayaʼ dxiiñaʼ ni bíʼnicabe. Bihuinni maʼ bizulú cayuni mandar Reinu stiʼ Dios pur ni bizaaca lu iza 1914: bizulú Primera Guerra Mundial, guyuu epidemia, guca xu roʼ ne guyuu hambre (Luc. 21:​10, 11). Bihuinni dxíchica biquiiñeʼ Jehová ca hombre chaʼhuiʼ riʼ para gacané xquidxi. w24.02 22 párr. 11

Nanna dxiichinu nadxii Jehová laanu ne racaláʼdxibe ni galán para laanu (Rom. 8:​35-39). Ne pa gúninu ni ná ca principiu ni zeeda lu Biblia la? zabeendunu ni galán (Is. 48:​17, 18). Yanna, pa guidxaagalunu ti guendanagana ni cadi cabézanu, ¿xi zanda gúninu yaʼ? Zándaca guni ti familia stinu xiixa ni guniná laanu, o zándaca gápanu xiixa guendahuará ne pur laani maʼ huaxiéʼ gúninu lu xhiiñaʼ Jehová. Laaca zanda guniná ti desastre natural ra nabézanu. Ne zándaca sanándacabe laanu pur ni runi crenu. Ora tídinu lu ca guendanagana riʼ zándaca guiníʼ íquenu: «¿Xiñee cadideʼ lu guendanagana riʼ pue? ¿Ñee bineʼ xiixa cosa malu la? ¿Ñee maʼ qué gapa ndaayaʼ stiʼ Jehová la?». Cadi guireeluʼ gana pa huayuni sentirluʼ zacá purtiʼ laaca zacá huayuni sentir stale xpinni Jehová (Sal. 22:​1, 2; Hab. 1:​2, 3). w23.04 14 párr. 1, 2

Nagueendacaʼ rucáʼnanu xiixa tentación, o xiixa cosa ni cadi jneza guiníʼ íquenu ni zanda guxheleʼ laanu de Jehová. Ribeza Jehová guzúʼbanu stiidxaʼ de guidubi ladxidoʼno (Rom. 6:17). Laabe nánnabe xii nga ni galán para laanu ne qué zanda guchaʼnu ca norma ne ca ley stibe (Is. 48:​17, 18; 1 Cor. 6:​9, 10). Ruyubi Binidxabaʼ modo guniná laanu ne modo guniná xquendabiaaninu para gusaba laanu ne guxheleʼ laanu de Jehová. Ni racaláʼdxibe nga guxuuxebe laanu ne maʼ cadi gaca xhamígunu Jehová (1 Ped. 5:8). Ca xpinni Cristu de primé siglu que, biʼniʼ amenazárcabe, gudíñecabe dede biiticabe laacaʼ purtiʼ zuhuaacaʼ dxiichiʼ lu ni runi crecaʼ (Hech. 5:​27, 28, 40; 7:​54-60). Ca dxi riʼ, laaca rizanándacabe ca xpinni Cristu. Ne zacá rihuinni ni, nabé maʼ bininácabe ca hermanu ne hermana stinu ni nuu ndaaniʼ guidxi Rusia ne xcaadxi guidxi. Peru laaca riquiiñebe xcaadxi cosa para guninabe ca hermanu stinu. Ne cadi nga si, laaca riquiiñebe caadxi «trampa» ni maʼ gudixhe chaahuibe (Efes. 6:11). w23.07 15, 16 párr. 6-9

Ra jma guni estudiarluʼ ni ná Stiidxaʼ Dios jma zannaxhiiluʼ Jehová. Ne zucaa guendarannaxhii ca lii gúniluʼ stipa gúniluʼ ni caziidiluʼ. Ne ra chinándaluʼ ca principiu ni zeeda lu Stiidxabe, jma galán ca decisión zacaaluʼ. Zuchaaluʼ modo riníʼ íqueluʼ ne zúniluʼ stipa gúniluʼ ca cosa ni rinabaʼ Dios lii para gusiécheluʼ laa. Cásica ti xcuidi rinanda ni runi bixhoze, lii laaca zuzulú zinándaluʼ ejemplu stiʼ Bixhózeluʼ ni nuu guibáʼ (Efes. 5:​1, 2). Zanda guiníʼ íquenu: «¿Ñee jma nadxieeʼ Jehová yanna qué dxi guyuaanisaʼ la? Pur modo riníʼ iqueʼ ne pur ni runeʼ, ¿ñee rusihuinneʼ zinandaʼ ejemplu stiʼ Jehová ra gannaxhieeʼ ca hermanu la?». Pa maʼ bizulú bianda guendarannaxhii stiluʼ, cadi guireeluʼ gana. Purtiʼ nga nga ni bizaaca ca xpinni Cristu de primé siglu. Ne Jesús qué nucaanáʼ laacabe ne laaca qué zucaanáʼ laanu (Apoc. 2:​4, 7). Nánnabe zanda guibiguetaʼ gannaxhiinu Dios casi dxi bizulú gunnaxhiinu laa. w23.07 8 párr. 2, 3

Stale biaje guníʼ ne biʼniʼ apóstol Pedro caadxi cosa ni cadi jneza. Primé la? né stale confianza guniʼbe qué zaxélebe de Jesús neca xcaadxi apóstol que guni ni (Mar. 14:​27-29). Ne despué, gucuá bacaandaʼ laabe chupa chonna biaje (Mar. 14:​32, 37-41). Despué, ora gunaazecabe Jesús, bisaanabe laa (Mar. 14:50). Ne últimu la? chonna biaje guníʼ Pedro qué runibiáʼ laabe, dede biʼniʼ jurar ni (Mar. 14:​66-71). ¿Xi biʼniʼ Pedro ora bidii cuenta biʼniʼ ti pecadu grave yaʼ? Guizáʼ biuubaʼ ladxidoʼbe pur ni bíʼnibe que dede biinabe (Mar. 14:72). Lugar de ñabi Jesús Pedro cadi jneza ni biʼniʼ la? laga bidiibe laa xcaadxi dxiiñaʼ jma risaca (Juan 21:​15-17). Qué niree Pedro gana neca nanna biʼniʼ ti pecadu grave. ¿Xiñee yaʼ? Purtiʼ nánnabe nadxiiruʼ Jesús laabe ne zacaneruʼ ca hermanu stibe laabe. ¿Xi rusiidiʼ ndiʼ laanu yaʼ? Racalaʼdxiʼ Jehová gánnanu nadxii laanu ne racalaʼdxiʼ guni perdonar laanu (Romanos 8:​38, 39). w24.03 18, 19 párr. 13-15

Zándaca ca ni runi cometer pecadu sexual guituílucaʼ pur ni bíʼnicaʼ, guiníʼ íquecaʼ qué risácacaʼ, gueeda gaca xiiñicaʼ o guninacaʼ familia sticaʼ. Ni jma jneza guni tobi nga, gucaanáʼ invitación stiʼ «gunaa nahuati» que. Stale de ca ni runi practicar pecadu sexual qué ratisicaʼ neza lu Dios, sínuque laaca raca contagiarcaʼ de xiixa guendahuará ni ruuti laacaʼ (Prov. 7:23). Ra ziguiluxe Proverbios capítulo 9 versículo 18 ná: «Ca invitadu stibe nuucaʼ ndaaniʼ Baʼ». Yanna, ¿xiñee stale tu ricaa invitación stiʼ gunaa riʼ pa guendananá nga redané ni? (Prov. 9:​13-18). Guiráʼ ladu nga maʼ nuu pornografía. Ne nuu tuu ná gastiʼ naca guʼyaʼ ni. Peru, ¿ñee zacá ni la? Coʼ. Pornografía ca runiná ni, reeda gaca ni ti viciu, ne runi ni guni sentirluʼ qué risácaluʼ. Ca imagen yuudxuʼ ca nagana para guixiá ca ni ndaaniʼ xquendabiaaninu. Ne qué rucueeza pornografía ca deseu malu stiʼ tuuxa sínuque rucaa ni laa guiaba lu pecadu sexual (Col. 3:5; Sant. 1:​14, 15). Ne ca ni ruuyaʼ pornografía riábacaʼ lu ná pecadu sexual. w23.06 23 párr. 10, 11

Neca gacalaʼdxiʼ xcaadxi guidxi gaca potencia mundial xlugar ni la? qué zanda diʼ. ¿Ximodo nánnanu ni yaʼ? Purtiʼ profecía que cusiene zunidé «guié» que, ni zeeda gaca Reinu stiʼ Dios, batañee estatua que (Dan. 2:​34, 35, 44, 45). ¿Ñee runi creluʼ dxandíʼ ni guníʼ Daniel de batañee estatua que la? Pa dxandíʼ runi creluʼ ni zusihuínniluʼ ni pur modo nabániluʼ. Qué zuyúbiluʼ gápaluʼ stale bueltu o stale cosa risaca purtiʼ nánnaluʼ maʼ cadi candaa zanitilú guidxilayú malu riʼ (Luc. 12:​16-21; 1 Juan 2:​15-17). Ra gánnaluʼ xi riníʼ profecía riʼ zacané ni lii guiéneluʼ pabiáʼ risaca guni predicarluʼ ne gúniluʼ discípulo (Mat. 6:33; 28:​18-20). Yanna, ra maʼ bidúʼyanu profecía riʼ galán guiníʼ íqueluʼ ndiʼ: «¿Ñee rusihuinni ca decisión ni ricaaʼ runeʼ cré maʼ cadi candaa zunítiluʼ Reinu stiʼ Dios guiráʼ ca gobiernu ni nuu lu guidxilayú riʼ la?». w23.08 11 párr. 13, 14

Pa gácaluʼ ti binni ni nanna nuu cosa ni qué zanda guni la? zacaneni lii guiéneluʼ zándaca pur biaʼ iza nápaluʼ, ti guendahuará o pur guchaa xiixa lu xquendanabániluʼ zanda gucueeza ca ni lii de gúniluʼ ca cosa ni maʼ biaaluʼ gúniluʼ. Galán chinándaluʼ ejemplu stiʼ Barzilái ne cadi guicaaluʼ xiixa dxiiñaʼ pa qué zanda gúniluʼ ni pur xiixa guendahuará (2 Sam. 19:​35, 36). O galán chinándaluʼ ejemplu stiʼ Moisés, bidii lugar gacanécabe lii ne bidii dxiiñaʼ xcaadxi ora caquiiñeʼ ni (Éx. 18:​21, 22). Pa nánnaluʼ nuu cosa ni qué zanda gúniluʼ, qué zaníʼ íqueluʼ zanda gúniluʼ ni, purtiʼ zanda gusirani stipa stiluʼ. Laaca cadi naquiiñeʼ guiníʼ íquenu nápanu donda pur ca decisión cadi jneza guicaa xcaadxi. Qué zanda guicaanu decisión pur xcaadxi ne cadi lu nanu nuu cueenu guendanagana ni guedané decisión ni cadi jneza gucuaa tuuxa. Guzéʼtenu ti ejemplu, nabé racaná ca ni napa xiiñiʼ ora tobi de ca xiiñiʼ guicaa decisión de maʼ cadi guni ni ná Jehová. Peru ca padre ni riníʼ íquecaʼ laacaʼ nápacaʼ donda pur ca decisión ni gucuaa xiiñicaʼ, reeda gácani ti carga nabé nanaa para laacaʼ ne qué ribeza Jehová guácabe ni (Rom. 14:12). w23.08 29 párr. 11, 12

Cumu guca Sansón binni ruchee cásica laanu la? laaca guyuu biaje gucuaabe decisión ni cadi jneza ne bicheebe. Gúpabe guendanagana pur ti decisión cadi jneza ni gucuaabe. Dxi maʼ zinebe iza de nácabe juez, «guyuuláʼdxibe ti gunaa láʼ Dalila ni nabeza ndaaniʼ valle stiʼ Sorec». Ante gunibiaʼbe Dalila, gucaláʼdxibe nichaganabe ti gunaa filistea ne Biblia ná «Jehová ngue cayúnini para gunitilú ca filisteu». Despué guyé Sansón ndaaniʼ ti guidxi stiʼ ca filisteu ni láʼ Gaza ne raqué biaanabe ra lidxi ti prostituta. Gucané Jehová Sansón para gaxhaʼ ca puertaʼ ni nuu entrada stiʼ guidxi que, zaqueca ca poste ne ca barra stini (Juec. 14:​1-4; 16:​1-3). Peru maʼ gadxe si nga guichaganabe Dalila. ¿Xiñee yaʼ? Purtiʼ zándaca naca gunaa riʼ israelita, ngue runi qué zacané ndiʼ laabe para gunitilube ca filisteu. Racalaʼdxiʼ ca filisteu guni traicionar Dalila Sansón. Ne gunabe gúnibe ni purtiʼ gúdxicabe laabe zudiicabe laabe stale moneda de plata. w23.09 5 párr. 12, 13

Pa guiénenu xiñee cayaca ti cosa, zanda gacané ni laanu gácanu binni nadóʼ. Ti binni ni riene nanna gucueeza laca laa ora gucaalú tuuxa laa pur ni runi cré. Guzéʼtenu ti ejemplu. Guiráʼ ni racalaʼdxiʼ binni ganna zeeda gácani casi nisa ni daʼ dede ra jma gueteʼ. Nga runi, ora guinabadiidxaʼ tuuxa laanu xiixa, stale biaje qué gánnanu xi pur canabadiidxabe ni. Galán guietenaláʼdxinu ni jma jneza nga gánnanu xiñee racaláʼdxibe gánnabe de laani (Prov. 16:23). Guzéʼtenu ejemplu stiʼ Gedeón. Ti dxi gunabadiidxaʼ ca hombre de tribu stiʼ Efraín laabe né xiana xiñee qué ninebe laacaʼ para nucaalucaʼ ca enemigu stiʼ guidxi Israel. ¿Xiñee né xiana guníʼcabe yaʼ? ¿Ñee nabé orgulloso laacabe la? Qué gánnanu pa zacá ni, peru ni nánnanu nga guca Gedeón ti binni ni riene, biʼniʼ respetarbe modo cayuni sentircaʼ ne bicábibe né diidxaʼ nadóʼ. ¿Xi bizaaca pur ngue yaʼ? «Cumu zaqué bicábibe laacaʼ la? guca calmarcaʼ» (Juec. 8:​1-3). w23.09 16 párr. 8, 9

Nabé naroʼbaʼ guendarannaxhii ni nuu entre Jehová ne Xiiñiʼ. Nabé biuubaʼ ladxidoʼbe ora bíʼyabe modo gudíñecabe Xiiñibe, modo bíʼnicabe despreciu laa ne modo bininácabe laa. Ca ni maʼ guti ti xiiñiʼ nánnacaʼ pabiáʼ naroʼbaʼ yuubaʼ redané ni. Neca nanna dxíchinu ziasa ca binni ni maʼ guti, peru qué ribee diʼ nga yuubaʼ ni runi sentirnu ora gatiʼ tuuxa ni nadxiinu. Racané ejemplu riʼ laanu gánnanu ximodo biʼniʼ sentir Jehová lu iza 33 dxi bíʼyabe modo cayacaná Xiiñibe ni nadxiibe dede ra guti (Mat. 3:17). Ante ganda dxi guietenaláʼdxinu guendaguti stiʼ Cristu, galán gúniluʼ stipa gúʼndaluʼ jma de rescate lu estudiu personal stiluʼ o lu adoración en familia. Ne cadi guiaandaʼ lii gúʼyaluʼ adoración matutina para dxi chigaca Conmemoración. Pa cuʼnu listu ladxidoʼno para dxi ca zanda gacanenu xcaadxi para cueenducaʼ ni galán (Esd. 7:10). w24.01 11 párr. 10-12

Tobi de ca cosa ni naquiiñeʼ gúninu para guicaanu stipa stiʼ Jehová nga guni orarnu. Ricábibe ca oración stinu ne zacá rihuinni «jma nadipaʼ poder ni cudii Dios» laanu (2 Cor. 4:7). Laaca galán guidúʼndanu Stiidxabe ne guiníʼ íquenu ni cadúʼndanu (Sal. 86:11). «Napa poder» ni rábibe laanu lu Biblia (Heb. 4:12). Nga runi, pa guni orarluʼ Jehová ne gúʼndaluʼ Stiidxaʼ, zacaaluʼ stipa ni caquiiñeluʼ para guni huantarluʼ, ne qué zusaana de gúniluʼ xhiiñabe né stale gana ne laaca zanda guni cumplirluʼ xiixa dxiiñaʼ ni rábiluʼ nagana. Guidúʼyanu ximodo bidii Jehová stipa profeta Jonás. Bidii Jehová Jonás ti dxiiñaʼ. Peru, cumu cadxíbibe gúnibe ni la? bixooñelube ne gucuaabe ti barcu ni yené laabe gadxé lugar. ¿Xi bizaaca yaʼ? laabe ne guiráʼ ca ni nuu ndaaniʼ barcu que bilá ñáticabe lu ti tormenta naroʼbaʼ. Ora bilaa ca marineru que laabe lu nisadóʼ, gúbica ti benda naroʼbaʼ laabe. ¿Xi biʼniʼ Jonás ora nuu ndaaniʼ benda naroʼbaʼ que para gapa stipa yaʼ? Dede ra nuube que biʼniʼ orarbe Jehová (Jon. 2:​1, 2, 7). w23.10 13 párr. 4-6

Bicaa apóstol Pedro ca carta riʼ para ca xpinni Cristu de primé siglu. Ne gucalaʼdxiʼ Jehová guicá ca ni lu Biblia para gacané ca ni laanu (Rom. 15:4). Stale binni qué riná guni cré ca ni ruzeeteʼ Biblia chiguizaaca despué. Cumu maʼ zinenu stale iza de cayuni predicarnu zedandá fin stiʼ guidxilayú riʼ la? zándaca zuni burla ca binni ni rucaalú laanu ne guiniʼcaʼ qué ziuu dxi guedandá fin ca (2 Ped. 3:​3, 4). Ne pa tuuxa ni runi predicarnu, ti compañeru de dxiiñaʼ o ti familia stinu gabi laanu zacá la? zándaca chaahuiʼ chaahuiʼ zará fe stinu. Yanna, ¿xi zacané laanu yaʼ? Guidúʼyanu ni bisiene Pedro. Zándaca ziuu tu zaníʼ ique candaa Jehová para gunduuxeʼ guidxilayú malu riʼ. Peru guníʼ Pedro ti cosa ni rucaa laanu guiníʼ íquenu. Bisietenaláʼdxibe laanu maʼ gadxé modo ruuyaʼ Jehová tiempu de modo ruuyaʼ biʼniʼ ni (2 Ped. 3:​8, 9). Para Jehová, ti mil iza zeeda gácani casi ti dxi. Nápabe paciencia ne qué racaláʼdxibe guinítiluʼ nin tobi. Peru zedandá dxi stibe. . . , ne zeeda fin stiʼ guidxilayú malu riʼ. w23.09 26, 27 párr. 2-5

¿Xiñee bicaa apóstol Pablo ra nuu ca xpinni Cristu hebreu ni nabeza ndaaniʼ guidxi Judea yaʼ? Zándaca pur chupa razón nabé risaca. Primé, para cuʼbe gana laacaʼ. Stale de laacaʼ biniisicaʼ ndaaniʼ religión stiʼ ca judíu ne zándaca biʼniʼ burla ca líder stiʼ ca religión que laacaʼ pur gúcacaʼ xpinni Cristu. ¿Xiñee yaʼ? Purtiʼ ca xpinni Cristu que qué gápacaʼ ti templu sicarú para guni adorarcaʼ Dios, ne qué gápacaʼ ti altar para gudiicaʼ sacrificiu ne laaca qué gápacaʼ sacerdote cásica napa ca judíu. Zándaca nibee nga gana ca xpinni Cristu ne nusirá ni fe sticaʼ (Heb. 3:​12, 14). Zándaca dede guyuu de laacaʼ guníʼ íquecaʼ nibiguetaʼ ñúnicaʼ ni runi ca religión stiʼ ca judíu. Guiropa, bisiene Pablo ca xpinni Cristu hebreu cadi cayúnicaʼ stipa pur guiénecaʼ ca cosa nacubi o ca ni jma nagana ni zeeda lu Stiidxaʼ Dios casi ñaca cadi cayocaʼ gueta (Heb. 5:​11-14). Ruluíʼ si guyuu de laacabe zinandarúcabe Ley stiʼ Moisés. w23.10 24, 25 párr. 3, 4

Nuu gunaa maʼ gudixheʼ ique cadi guichaganáʼ (Mat. 19:​10-12). Pa caʼruʼ guichaganaluʼ la? gunna dxichi cadi pur nga riníʼ ique Jehová né Jesús qué risácaluʼ. Lu guidubi guidxilayú nabé nga risaca ca hermana ni caʼruʼ guichaganáʼ ni nuu ndaaniʼ ca congregación. Cumu nadxiicabe ca hermanu ne dxandíʼ peʼ rizaaláʼdxicabe xcaadxi la? nga runi, stale tu ruuyaʼ laacabe casi bizáʼnacaʼ, béndacaʼ ne jñaacaʼ (Mar. 10:​29, 30; 1 Tim. 5:2). Nuu tu laa cayuni xhiiñaʼ Jehová de tiempu completu. Jma stale hermana nga runi predicar lu guidubi guidxilayú (Sal. 68:11). ¿Ñee zanda quixheʼ íqueluʼ gúniluʼ xhiiñaʼ Jehová de tiempu completu la? Zanda gácaluʼ precursora, gúniluʼ dxiiñaʼ lu construcción o cheluʼ Betel. ¿Xi zanda gacané lii ugaandaluʼ meta stiluʼ yaʼ? Biʼniʼ orar Jehová, guniné ca ni maʼ cayuni dxiiñaʼ de tiempu completu ne biyubi gánnaluʼ gunáʼ nga ca requisitu para ganda gúniluʼ ni. De racá bicaa xi caquiiñeʼ gúniluʼ para ugaandaluʼ meta ca. Pa gúniluʼ dxiiñaʼ de tiempu completu, zápaluʼ stale oportunidad para gúniluʼ jma lu xhiiñaʼ Jehová. w23.12 22 párr. 16, 17

Nánnanu maʼ gaxha nuu gran tribulación, nga runi yanna nga jma caquiiñeʼ chinándanu mandatu ni bidii Jesús de guni predicarnu ca noticia galán. Peru pa huaxiéʼ bueltu nápanu o rucaalú ca autoridad ca laanu pur runi predicarnu, zándaca gaca nagana para laanu guni cumplirnu né dxiiñaʼ riʼ. ¿Xi zacané laanu gúninu xhiiñaʼ Reinu primé lu xquendanabáninu yaʼ? Gápanu confianza cayacané «Jehová, Dios stiʼ ca ejércitu» laanu. Zacanebe laanu pa jma quixhe íquenu gúninu xhiiñaʼ Reinu que gúninu ni rábinu. Nga runi, gastiʼ ni zanda guchibi laanu (Ageo 2:4). Racalaʼdxiʼ Jehová quixhe íquenu gacanenu binni gaca discípulo, ti dxiiñaʼ ni rulá binni. Guluu Ageo gana ca judíu gúnicaʼ dxiiñaʼ ra cabí templu que sti biaje. Casi ñaca ñábibe laacaʼ quíxhecaʼ sti biaje base stini ne gusiaandacaʼ ca iza ni qué ñúnicaʼ gastiʼ. Casi ñaca niniʼbe ni maʼ guca la? maʼ guca. Biʼniʼ Jehová promesa pa guzuubacabe diidxaʼ zaguu ndaayaʼ laacabe (Ageo 2:​18, 19). Laanu laaca zanda ganna dxíchinu zaguu Jehová ndaayaʼ laanu pa gúninu dxiiñaʼ ni maʼ bisaananebe laanu primé lu xquendanabáninu. w23.11 16 párr. 8; 17 párr. 11

Lu carta ni bicaa apóstol Pablo ra nuu ca xpinni Cristu de Roma, guniʼbe guiranu nga nácanu binni ruchee. ¿Ximodo zanda guiechené Dios laanu ne guʼyaʼ laanu casi ti binni nachaʼhuiʼ yaʼ? Biquiiñeʼ Pablo ejemplu stiʼ Abrahán para gacané guiráʼ ca xpinni Cristu ni nayá ladxidóʼ gánnacaʼ respuesta stiʼ pregunta ca. Biiyaʼ Jehová Abrahán casi ti binni nachaʼhuiʼ dxi nabeza Canaán. Ne biiyabe laa zacá neca qué ninanda casi peʼ modo ná Ley stiʼ Moisés (Rom. 4:13). ¿Ximodo nánnanu ni yaʼ? Purtiʼ gucuaa guidxi Israel Ley que jma de tapa gayuaa iza despué. Yanna, ¿xiñee biiyaʼ Jehová Abrahán casi ti binni nachaʼhuiʼ yaʼ? Guca Jehová nachaʼhuiʼ ne biiyaʼ laabe casi ti binni ni runi ni jneza pur fe stibe (Rom. 4:​2-4). w23.12 3 párr. 4, 5

Laaca gueelaʼ gudxi Natán David ca diidxaʼ riʼ nga, gueelaʼ gudxi Jehová Natán cadi David diʼ nga ni chigucuí templu que (1 Crón. 17:​3, 4, 11, 12). ¿Xi biʼniʼ David ora binadiaga ni yaʼ? Bizulube bitópabe bueltu ne guiráʼ ni caquiiñeʼ para gucuí Salomón templu que (1 Crón. 29:​1-5). Despué de gunna David cadi laa chigucuí templu que, biʼniné Jehová laabe ti pactu: gudxi laabe tobi de ca xiiñibe, ni zá de laabe, qué zusaana de gaca rey (2 Sam. 7:16). Zuuyaʼ David zacá cumplir ca diidxaʼ riʼ lu ti mil iza guni mandar Cristu. ¡Pabiáʼ ziecheʼ David guʼyaʼ naca tobi de ca ni zaa de laa Rey! Rusiidiʼ relatu riʼ laanu neca qué zanda gúninu biaʼ ñuuláʼdxinu lu xhiiñaʼ Jehová, zanda gudiibe laanu stale ndaayaʼ ni cadi cabézanu. w23.04 16 párr. 8-10

Nuu caadxi libru stiʼ Biblia ni jma zanda cu gana laanu ora cadídinu lu xiixa guendanagana, casi: Job, Salmos ne Proverbios, ne ca diidxaʼ ni guníʼ Jesús lu Mateo capítulo 6. Pa guni orarluʼ Jehová ne gúʼndaluʼ Stiidxabe la? zuuyaluʼ ximodo zaguixhedxibe ladxidoʼloʼ. Cadi gusaana de gápanu confianza Jehová neca tídinu lu ca guendanagana ni jma guniná laanu, siempre zacané Jehová laanu. Qué ziuu dxi gusaanabe laanu stúbinu (Sal. 23:4). Cadi guiaandaʼ laanu, maʼ guníʼ Jehová zapa laanu, zacanebe laanu guzuhuaʼnu dxiichiʼ, zanaazebe nanu ne zaguixhedxibe ladxidoʼno. Gudxi Isaías Jehová ca diidxaʼ riʼ: «Zápaluʼ ca ni napa confianza lii de guidubi ladxidóʼ. Qué ziuu dxi gusaana de gudiiluʼ paz laacaʼ, purtiʼ nápacaʼ confianza lii» (Is. 26:3). Nga runi, gupa confianza Jehová ne biʼniʼ aprovechar guiráʼ ni rúnibe para gacanebe lii. Ne pa gúniluʼ zacá, zápaluʼ stipa para guni huantarluʼ dede ca guendanagana ni jma guniná lii. w24.01 25 párr. 16, 17

Cayaca cumplir profecía ni zeeda lu textu stiʼ yannadxí ca dxi stinu riʼ ne laaca cayaca cumplir ca diidxaʼ riʼ: «Jehová peʼ zusiidiʼ guiráʼ ca xiiñiluʼ, ne zápacabe stale paz. Zuzuhuaaluʼ dxiichiʼ lu ni jneza. [ . . . ] Gastiʼ qué zuchibi ne qué zuniditi lii, purtiʼ qué zadxiña ni lii» (Isa. 54:​13, 14). Nin Binidxabaʼ, «dios stiʼ guidxilayú riʼ» que zanda gucueeza dxiiñaʼ ni cayuni xquidxi Jehová, gusiidicaʼ binni de Stiidxaʼ Dios (2 Cor. 4:4). Maʼ cayaca adorar Jehová modo racalaʼdxiʼ gúninu ni. ¡Guirutiʼ zanda guchaa ni! Qué zaquiiñeʼ intiica guiibaʼ gúnicabe para gucaalúcabe laanu. w24.02 4 párr. 10

Para laanu ca xpinni Cristu nabé risaca voto ni bíninu para bidiʼnu laanu Jehová. Ne rihuinni zacá ni pur ca decisión ni ricaanu ne pur modo runi tendernu familia stinu. Rúninu guiráʼ ni nuu lu nanu para gudiʼnu ni caquiiñeʼ familia stinu, peru nánnanu ni jma risaca para laanu nga gúninu ni ná Jehová primé lu xquendanabáninu (Mat. 10:​35, 36; 1 Tim. 5:8). Nuu biaje zándaca ziuudindené familia stinu laanu, peru qué zusaana de gúninu ni riuulaʼdxiʼ Jehová. Laabe nga gudixhe chuʼ ca familia ca ne racaláʼdxibe guibánicaʼ nayecheʼ (Efes. 3:​14, 15). Pa dxandíʼ peʼ racaláʼdxinu guibáninu nayecheʼ la? caquiiñeʼ gúninu ca cosa ca modo racalaʼdxiʼ Jehová gaca ca ni. Ruuyabe ne rusisácabe guiráʼ sacrificiu ni rúninu para gúninu ni nabe ne laaca ruuyabe stipa ni rúninu para gápanu familia stinu né stale guendarannaxhii ne respetu (Rom. 12:10). w24.02 18 párr. 11, 13