Diciembre

¿Ñee napa Jehová poder para guindisaʼ ca ni maʼ guti la? Nápabe pue, laabe nga Dios «ni jma napa poder» (Apoc. 1:8). Zanda gunitilube tutiica gucaalú laabe dede né guendaguti (1 Cor. 15:26). Nuu sti razón ni rucaa laanu guni crenu zanda gusibani Dios ca ni maʼ guti: gastiʼ qué riaandaʼ laabe. Nánnabe lá cada tobi de ca beleguí (Is. 40:26). Rietenalaʼdxiʼ Jehová ca ni maʼ guti (Job 14:13; Luc. 20:38). Zanda guietenaláʼdxibe dede ca cosa jma nahuiiniʼ de binni ni chindísabe ca, casi ca cosa jma nahuiiniʼ nuu lu rini stiʼ, modo bibani ne guiráʼ ni rietenalaʼdxiʼ. Maʼ bizíʼdinu zanda guni crenu zusibani Jehová ca ni maʼ guti, ¿xiñee yaʼ? Purtiʼ nápabe poder ne racaláʼdxibe gúnibe ni. Maca gundisaʼ Jehová chupa chonna binni dxiqué ne laani nga sti razón ni rucaa laanu guni crenu dxandíʼ zuni cumplirbe ni maʼ guniʼbe. Tiempu gucuá Biblia bidii Jehová poder caadxi hombre para gusibánicaʼ tuuxa ni maʼ guti, tobi de ca hombre que nga Jesús. w23.04 9, 10 párr. 7-9

Pa guicábinu binni né diidxaʼ nadóʼ, zándaca zaná binni ca gucaadiaga laanu. Pa gacalaʼdxiʼ tuuxa gucaalú o guni burla laanu la? ni jma galán nga cadi guyúbinu tíndenu (Prov. 26:4). Peru cadi guiráʼ diʼ binni naca zacá. Zándaca stale tu zaná gucaadiaga laanu. Casi bidúʼyanu, quixe íquenu gácanu binni nadóʼ nabé racané ni laanu. Gunabaʼ Jehová gudii stipa lii gácaluʼ nadóʼ ora guzeeteʼ tuuxa binni xiixa tema para si tíndecaʼ o guiniʼcaʼ mal de ni runi creluʼ. Pa gácaluʼ binni nadóʼ zacané ni lii cadi tíndeluʼ. Ne pa gúniluʼ stipa guicábiluʼ né diidxaʼ nadóʼ ne respetu la? zacané ni xcaadxi guchaa modo riníʼ ique de laanu o de ni rusiidiʼ Biblia. Nga runi, guyuu listu para guicábiluʼ ni guinabadiidxacabe lii «né diidxaʼ nadóʼ ne stale respetu» (1 Ped. 3:15). ¡Guca binni nadóʼ ne nadxibalú! w23.09 19 párr. 18, 19

Guidúʼyanu tapa cosa ni zacané laanu gápanu paciencia. Primé, ti binni ni napa paciencia rindaa para guidxiichi. Rúnibe stipa cadi guidxiichibe ne qué ruquíxebe ni guni xcaadxi laabe ora guizaaca xiixa ni qué riuuláʼdxibe (Éx. 34:6). Guiropa, ti binni ni napa paciencia nanna cueza sin guiree gana. Qué riree gana ne qué ridxiichi pa guindaa xiixa ni cabeza gaca (Mat. 18:​26, 27). Guionna, ti binni napa paciencia qué runi xiixa sin guiníʼ ique. Ti binni ni napa paciencia la? ora chiguni xiixa dxiiñaʼ risaca, qué raca lugu para guzulú o gunduuxeʼ ni. Sínuque ribee tiempu para cuaquiʼ chaahuiʼ ni chiguni ne despué runi ni biaʼ tiempu caquiiñeʼ ti ganda guiree dxiiñaʼ ca jneza. Guidapa, ti binni ni napa paciencia runi stipa guni huantar ca guendanagana sin quicheruaa. Ti binni ni napa paciencia zuni stipa guni huantar sin guiree gana ne zuni xhiiñaʼ Jehová né guendanayecheʼ (Col. 1:11). Ca xpinni Cristu caquiiñeʼ gúninu stipa gusihuínninu nápanu paciencia lu guidapaʼ cosa bidúʼyanu riʼ. w23.08 20, 21 párr. 3-6

Ti razón risaca para gápanu ladxidoʼno nga purtiʼ Jehová ruuyaʼ xi nuu ndaaniʼ ladxidoʼno. Ndiʼ riníʼ, ruuyabe ni qué randa ruuyaʼ binni, ruuyabe ni nácanu pur dentru. Zannaxhii Jehová laanu pa guuyaʼ rúninu stipa chinándanu ca conseju stiʼ. Zaca qué zudiʼnu lugar chuʼ ndaaniʼ ladxidoʼno ca guendarusiguii stiʼ Binidxabaʼ ne ca cosa ni cadi jneza runi binni lu guidxilayú riʼ (Juan 4:14; 1 Juan 5:​18, 19). Ne ora maʼ guidxíñanu Jehová la? jma zannaxhiinu ne zuni respetarnu laa. Qué zúninu xiixa ni guniná Bixhózenu ni nuu guibáʼ, dede zacananaláʼdxinu guiníʼ íquenu guchéʼnenu laabe. Ti hermana de guidxi Croacia láʼ Marta gupa ti tentación de guni xiixa inmoral. Laabe bicaabe: «Qué randa riníʼ iqueʼ chaahueʼ. Guca nagana para naa gucanaʼyaʼ ca deseu de guneʼ ni cadi jneza. Peru cumu ridxibeʼ gucheeniáʼ Jehová la? ngue gucané naa». ¿Ximodo yaʼ? Marta bizeeteʼ, pur bidxibi gucheené Jehová bicaa ni laa guiníʼ íque guiráʼ ca cosa malu ni zándaca guizaaca pa guicaa xiixa decisión ni cadi jneza. Laanu laaca zanda guiníʼ íquenu zacá ora tídinu lu xiixa tentación. w23.06 20, 21 párr. 3, 4

Nanna Jesús ni maʼ gudixhe ique Jehová nga gaca santificar lá, ni caninu nga guiá labe de guiráʼ cosa ni cadi dxandíʼ huaníʼcabe de laabe. Ngue runi bisiidiʼ Jesús ca ni zinanda laa guni orarcaʼ sicaríʼ: «Bixhózedu ni nuu guibáʼ, gaca santificar laluʼ» (Mat. 6:9). Nanna Jesús gástiruʼ sti cosa jma risaca que gaca santificar lá Dios. Ne lu guiráʼ xixé cosa ni guyáʼ, guirútiruʼ runi santificar lá Jehová biaʼ huayuni Jesús ni. Neca zacá, ora gunaazecabe laabe, ¿xi donda bigaanicabe íquebe? Nácabe caniʼbe contra Dios, ni nácabe nga cayuni biidibe lá Bixhózebe. Para laabe la? gástiruʼ sti pecadu jma feu que nga. Maca nuube triste ante guinaazecabe laabe, purtiʼ nánnabe nga nga donda chiugaanicabe íquebe ne zuuticabe laabe pur laani. Ne zándaca pur nga guizáʼ «cayuubaʼ ladxidoʼbe» óraque (Luc. 22:​41-44). w24.02 11 párr. 11

Lu carrera para guicaanu guendanabani caquiiñeʼ gannaxhiinu Jehová ne Jesús jma que familia stinu (Mat. 10:37). Peru qué riníʼ diʼ nga cadi guni cumplirnu responsabilidad ni nápanu ndaaniʼ familia stinu, casi ñaca nucueeza ni laanu para gúninu ni ná Jehová. Pa racaláʼdxinu gusiéchenu Dios ne Jesús caquiiñeʼ guni cumplirnu né dxiiñaʼ ni nápanu ndaaniʼ familia stinu (1 Tim. 5:​4, 8). Pa gúninu ni la? zabáninu nayecheʼ. Nanna Jehová ziuu ca familia ca galán pa gannaxhiisaa ne gusihuinni ca guendaxheelaʼ ca respetu, pa gannaxhii ne gusiidiʼ ca padre ca xiiñicaʼ ne pa guzuubaʼ ca baʼduʼ ca stiidxaʼ bixhózecaʼ ne jñaacaʼ (Efes. 5:33; 6:​1, 4). Intiica responsabilidad ni nápaluʼ ndaaniʼ familia, galán chinándaluʼ ca conseju ni zeeda lu Biblia. Cadi chinándaluʼ ni ná si íqueluʼ, modo riníʼ ique binni ra nabézaluʼ o ni ná ca ni ná nuu xpiaaniʼ lu guidxilayú riʼ. Biquiiñeʼ ca publicación ni nápanu. Lúcani zadxélaluʼ ni zacané lii para ganda chinándaluʼ ca principiu ni zeeda lu Biblia. w23.08 28 párr. 6, 7

Galán guiziidiʼ ca hermana gúnicaʼ dxiiñaʼ. Caadxi de ca cosa ni biziidiluʼ dxi nahuiiniluʼ zaquiiñeluʼ ca ni guidubi xquendanabániluʼ. Biziidiʼ gúʼndaluʼ ne gucaaluʼ jneza. Nuu lugar ruuyacabe cadi naquiiñeʼ peʼ guiziidiʼ gunaa guʼndaʼ ne gucaa. Peru ti xpinni Cristu nabé risaca guni ca ni (1 Tim. 4:13). Nga runi, cadi gudiiluʼ lugar chuʼ xiixa ni gucueeza lii gúʼndaluʼ ne gucaaluʼ jneza. ¿Xi zabeenduluʼ yaʼ? Zacané ni lii guidxélaluʼ ti dxiiñaʼ ne gápaluʼ ni guibanineluʼ. Ne laaca zacané ni lii gánnaluʼ guni estudiarluʼ ne gusiidiluʼ Stiidxaʼ Dios jma jneza. Peru ni jma risaca nga ra gúʼndaluʼ Biblia ne guiníʼ íqueluʼ ni cayuundaluʼ la? ziuuluʼ jma gaxha de Jehová ne zaca xhamíguluʼ la? (1 Tim. 4:15). w23.12 20 párr. 10, 11

Guinábanu Jehová gacané laanu gucáʼnanu ca tentación ca. Cumu nácanu binni ruchee la? caquiiñeʼ gucáʼnanu ca tentación ni rucaa laanu gúninu cosa malu. Ne runi Binidxabaʼ guiráʼ ni nuu lu náʼ para gaca ni jma nagana para laanu. ¿Ximodo rúnibe ni yaʼ? Riquiiñebe ca entretenimientu malu nuu yanna para guni biidiʼ ca ni xquendabiaaninu. Nga riguu cosa dxabaʼ ndaaniʼ íquenu ne maʼ qué riuʼnu nayá nezalú Jehová dede zándaca gucaa ni laanu guni cometernu xiixa pecadu (Mar. 7:​21-23; Sant. 1:​14, 15). Caquiiñeʼ gacané Jehová laanu purtiʼ qué zanda gudxíʼlunu ca tentación ca stúbisinu. Lu oración ni bisiidiʼ Jesús que guníʼ: «Cadi gudiiluʼ lugar guiábadu lu tentación, sínuque bilá laadu de lu náʼ Binidxabaʼ» (Mat. 6:13). Racalaʼdxiʼ Jehová gacané laanu peru caquiiñeʼ guinábanu ni laabe. w23.05 6, 7 párr. 15-17

Pa risaca para ti hombre ne ti gunaa ni maʼ bichaganáʼ gaca xhamígucaʼ Jehová la? zacané ni laacabe chinándacabe ca conseju stiʼ. Ne neca guidxagalúcabe intiica guendanagana qué zusaana de gannaxhiicabe. Nga runi, ca ni naca xhamigu Jehová rúnicaʼ stipa gusihuínnicaʼ ca cualidad ni nápabe, casi gácacaʼ nachaʼhuiʼ, gápacaʼ paciencia ne gutiidiláʼdxicaʼ (Efes. 4:32–5:1). Ora rusihuinni ca ni maʼ bichaganáʼ ca cualidad riʼ la? riroobaʼ guendarannaxhii ni nápacaʼ. Ti hermana láʼ Lena, ni maʼ ziné jma de 25 iza de bichaganáʼ guníʼ: «¡Nin cadi nagana nga gannaxhiiluʼ ne guni respetarluʼ ti binni ni runi stipa chuʼ gaxha de Jehová!». Guzéʼtenu ti ejemplu ni zeeda lu Biblia. Lade guiráʼ ca ni zá de David gulí Jehová José ne María para gácacaʼ bixhoze Mesías. ¿Xiñee laapecabe nga gulibe yaʼ? Purtiʼ xhamígube laacaʼ ne nánnabe zuyúbicaʼ laabe para gacanebe laacaʼ lu xquendaxheelacaʼ. w23.05 21 párr. 3, 4

Rinabaʼ Jehová guzúʼbanu stiidxaʼ ca ni cayuni dirigir laanu ndaaniʼ congregación (Heb. 13:17). Neca Jesús nga Líder stinu, ne perfectu laa la? peru ca binni ni maʼ gulibe para guni dirigir xhiiñabe lu Guidxilayú riʼ la? nácacaʼ binni ruchee. Nuu biaje zaca nagana para laanu chinándanu ca instrucción gudiicabe laanu, jmaruʼ si pa guinábacabe laanu gúninu xiixa ni qué racaláʼdxinu gúninu. Zacaca bizaaca apóstol Pedro. Ti dxi gudxi ti ángel laabe gobe ca maniʼ ni ruzeeteʼ Ley stiʼ Moisés nácacaʼ maniʼ nabiidiʼ. Qué niná diʼ Pedro ñuni ni, ne cadi ti biaje si, sínuque chonna biaje (Hech. 10:​9-16). ¿Xiñee guníʼ íquebe zacá yaʼ? Purtiʼ cadi cayénebe xi riníʼ instrucción que. Peru apóstol Pablo bisihuinni nuu listu para chinanda ca instrucción ni bidiicabe laa ora gunabaʼ ca ancianu de guidxi Jerusalén laa gusihuinni dxandíʼ zinanda ni ná Ley. Ne para nga la? naquiiñeʼ chinebe tapa hombre ra templu ne guiácabe casi ná Ley. Nanna Pablo maʼ cadi zinanda ca xpinni Cristu ni ná Ley ne qué ñuni xiixa cosa malu. Neca zacá, «sti dxi que yené Pablo ca hombre que ne bisiabe laacaʼ ne bisiabe laabe casi ná Ley» (Hech. 21:​23, 24, 26). Cumu bizuubabe diidxaʼ la? guyuu ca hermanu que tobi si (Rom. 14:​19, 21). w23.10 10 párr. 15, 16

Qué zadiʼdiʼ ndaaniʼ íqueluʼ caquiiñeʼ gácabe ti binni ni ridxibi para gácabe ti buen amigu, ¿njaʼ? Peru tu gacalaʼdxiʼ gaca xhamigu Jehová caquiiñeʼ guidxibi laabe. Nga runi, biaʼ tiica iza zinenu de cayúninu ni ná Jehová, guiranu caquiiñeʼ guidxíbinu laabe. Peru ¿xi riníʼ guidxíbinu o guni respetarnu Dios yaʼ? Ti binni ni ridxibi gucheené Dios o ni runi respetar laabe de guidubi ladxidóʼ la? nadxii laabe ne qué racalaʼdxiʼ guni xiixa ni guxheleʼ laa de laabe. Ne Jesús nga ti ejemplu galán de tuuxa ni bidxibi gucheené Dios, purtiʼ bizuubaʼ stiidxabe (Heb. 5:7). Ne qué ñuni Jesús ni purtiʼ si ridxibi guni Jehová laa xiixa (Is. 11:​2, 3). Sínuque bíʼnibe ni purtiʼ nadxiibe Bixhózebe de guidubi ladxidoʼbe ne biale de laabe gúnibe ni ná (Juan 14:​21, 31). Laanu laaca nápanu stale respetu Jehová ne rúninu ni ná purtiʼ naca ti Dios ni rannaxhii, nuu xpiaaniʼ, runi ni jneza ne napa stale poder. Ne laaca nánnanu nadxiibe laanu ne riuubaʼ ladxidoʼbe ora qué ruzúʼbanu stiidxabe. Pur ca cosa ni gúninu, zanda gusiéchenu ladxidóʼ Jehová o cuʼnu laa triste (Sal. 78:41; Prov. 27:11). w23.06 14 párr. 1, 2; 15 párr. 5

Ora beeda gaca Uzías ti rey ni napa poder, bisiaandabe Jehová ngue gucané laabe lu guiráʼ ni bíʼnibe. ¿Xi rusiidiʼ ndiʼ laanu yaʼ? Rusiidiʼ ni laanu cadi naquiiñeʼ gusiáʼndanu guiráʼ cosa galán ni rizaacanu lu xquendanabáninu ne ra cayúninu xhiiñaʼ Jehová zeeda ca ni de laabe. Ne cadi guni presumirnu pur ca ni maʼ bíninu, sínuque gusisácanu Jehová pur laacani (1 Cor. 4:7). Risaca gácanu humilde ne guiníʼ íquenu nácanu binni ruchee ne naquiiñeʼ uguu jnézacabe laanu. Ti hermanu ni napa jma de 60 iza bicaa: «Maʼ biziideʼ cadi gusisacaʼ laca naa. Ora uguu jneza tuuxa naa pur ca cosa ni cadi jneza guneʼ, runeʼ stipa pur guchaaʼ ne guneʼ ca cosa ca jma galán». Pa gácanu humilde ne guidxíbinu guchéʼnenu Jehová zabáninu galán (Prov. 22:4). w23.09 10 párr. 10, 11

Caquiiñeʼ guni huantar ca primé xpinni Cristu que. ¿Xiñee yaʼ? Purtiʼ laaca bidxaagalúcabe guendanagana pur fe stícabe. Stale de laacabe guzananda ca líder stiʼ religión stiʼ ca judíu ne ca autoridad stiʼ Roma laacabe ne cadi nga si, laaca bicaalú familia stícabe laacabe (Mat. 10:21). Ne laaca bidxaagalúcabe ca cosa ni cadi jneza bizulú bisiidiʼ ca apóstata ni rucaa cadi chuʼ congregación tobi si (Hech. 20:​29, 30). Ne gunda biʼniʼ huantar ca primé xpinni Cristu neca gudíʼdicaʼ lu guiráʼ ndiʼ (Apoc. 2:3). ¿Ximodo gunda bíʼnicabe ni yaʼ? Ra guníʼ íquecabe ca ejemplu de dxiqué, casi stiʼ Job (Sant. 5:​10, 11). Gunábacabe gudii Jehová stipa laacabe (Hech. 4:​29-31). Ne qué ñaandaʼ laacabe zaguixe Jehová ni gúnicabe pur guni huantárcabe (Hech. 5:41). Laanu laaca zanda guni huantarnu pa guiníʼ íquenu lu ca ejemplu ni zeeda lu Stiidxaʼ Dios ne lu ca publicación stinu. w23.07 3 párr. 5, 6

Qué ziuu dxi guiníʼ ique Jehová ne Jesús maʼ qué gápanu remediu. Tobi de ca cosa ni jma nadipaʼ bidxagalú apóstol Pedro lu xquendanabani nga dxi guniʼbe qué runibiaʼbe Cristu. ¿Ñee zabee ngue gana laabe la? ¿Ñee zácarube discípulo stiʼ Cristu la? Jesús peʼ gunabaʼ Jehová pur Pedro para cadi guirá fe stibe. Despué gúdxibe Pedro maʼ biʼniʼ orarbe pur laa ne nanna dxíchibe zanda gudii stipa ca hermanu stiʼ (Luc. 22:​31, 32). ¡Nánnanu nabé biecheʼ Pedro ora bietenalaʼdxiʼ ca diidxaʼ ni gudxi Jesús laa! Laanu laaca zándaca zacaanu decisión nadipaʼ lu guendanabani stinu. Ne ora guizaaca ndiʼ zándaca zaquiiñeʼ Jehová ca pastor ni nuu ndaaniʼ congregación para cuʼcaʼ gana laanu ti cadi guchéʼnenu Jehová (Efes. 4:​8, 11). Maʼ bidúʼyanu bidii Jehová guiráʼ ni caquiiñeʼ Pedro ne ngueca ni caquiiñeʼ xcaadxi apóstol que. Ne ngaca nga zúnibe pur laanu pa quíxhenu Reinu stibe primé lugar lu xquendanabáninu. w23.09 24, 25 párr. 14, 15

Ruuyaʼ Jehová ora gácanu nachaʼhuiʼ né xcaadxi, ruuyabe ni casi ti sacrificiu risaca, ne zeeda gácani casi ora nutíʼñenu laabe xiixa ne laabe racaláʼdxibe quíxebe ni laanu. Pa gúcaluʼ ancianu o siervu ministerial dxiqué, qué rusiaandaʼ Jehová ni bíʼniluʼ dxiqué né guendarannaxhii (1 Cor. 15:58). Ne laaca ruuyabe stipa ni rúniluʼ ra cadi cusaanaluʼ de gusihuínniluʼ guendarannaxhii. Racalaʼdxiʼ Jehová gannaxhiinu laa, ne gannaxhiinu binni. Para guiroobaʼ guendarannaxhii ni nápanu Jehová caquiiñeʼ guidúʼndanu Stiidxabe, guiníʼ íquenu luni ne guni orarnu laabe guiráʼ dxi. Ne para gusihuínninu nadxiinu ca hermanu, caquiiñeʼ guyúbinu modo gacanenu laacabe. Ra jma ziroobaʼ guendarannaxhii ni nápanu Jehová ne ca hermanu stinu, jma ziuʼnu gaxha de laabe ne de ca hermanu stinu. Ne qué zusaana de gaca xhamígunu Jehová ne ca hermanu stinu. w23.07 10 párr. 11; 11 párr. 13; 13 párr. 18

Cada xpinni Cristu naquiiñeʼ guicaa decisión modo gapa laa para chuʼ nazaaca. Ora cuinu xi tratamientu guicaanu naquiiñeʼ chinándanu mandatu ni zeeda lu Biblia ra ná guni rechazarnu rini ne gucaananu espiritismo ne xcaadxi práctica ni napa brujería (Hech. 15:20; Gál. 5:​19, 20). Aparte de ca ni maʼ bizéʼtenu riʼ la? maʼ cada tobi guicaa decisión xi tratamientu guicaa. Neca laanu maʼ nánnanu tu ra nuu chuʼnu ora gaca huaranu la? galán guni respetarnu decisión sti xcaadxi hermanu ora gúʼyacaʼ ximodo gápacaʼ laacaʼ para chuʼcaʼ nazaaca. Pur nga risaca guietenaláʼdxinu guidapaʼ cosa riʼ: primé, Reinu si stiʼ Dios nga zabee guiráʼ guendahuará (Is. 33:24); guiropa, cada xpinni Cristu naquiiñeʼ ganna dxichi xii nga ni jma galán para laa (Rom. 14:5); guionna, cadi guni juzgarnu xcaadxi ne cadi gúninu xiixa ni gucaa xcaadxi guchee (Rom. 14:13), ne guidapa, ca xpinni Cristu nadxiisaacaʼ ne ni jma risaca para laacabe nga chuʼ congregación tobi si que ni riníʼ íquecabe (Rom. 14:​15, 19, 20). w23.07 24 párr. 15

¿Ñee risaca para lii naca Jehová xhamíguluʼ la? ¡Risaca pue! Maʼ xadxí huayuni sentir stale binni ni (Sal. 104:​33, 34). Stale de laacaʼ huayúnicaʼ sacrificiu pur Jehová, casi ca nazareu ni guyuu ndaaniʼ guidxi Israel dxiqué. Zeeda diidxaʼ nazareu de ti diidxaʼ hebreu ni riníʼ ma guca dedicar. Cumu biʼniʼ ca israelita riʼ sacrificiu para gusisácacaʼ Jehová la? biaʼsi peʼ ca diidxaʼ riʼ para laacaʼ. Bidii Ley stiʼ Moisés que lugar guni ti hombre o ti gunaa ti voto Jehová para guni prometer zabani casi nazareu ti tiempu (Núm. 6:​1, 2). Ora tuuxa guni voto riʼ, naquiiñeʼ guni caadxi cosa ni qué runi xcaadxi israelita. ¿Xi rucaa tuuxa gaca nazareu yaʼ? Zándaca rúnibe ni purtiʼ guizáʼ nadxiibe Jehová ne dxandíʼ peʼ racaláʼdxibe gudiibe xquixe peʼ laa pur guiráʼ ca ndaayaʼ ni maʼ bidii laabe (Deut. 6:5; 16:17). w24.02 14 párr. 1, 2

Lu Biblia, lu diidxaʼ hebreu ni guca traducir «lealtad» o «amor leal» rusihuinni ni ti cariñu ne ti guendarannaxhii nadipaʼ ni rucaa tobi cadi guixeleʼ de tuuxa o xiixa. Stale biaje riquiiñeʼ diidxaʼ ca para gusihuinni ni guendarannaxhii ni napa Dios ca xpinni. Ne laaca riquiiñeʼ diidxaʼ ca ora riete de guendarannaxhii ni napa ca xpinni Dios (2 Sam. 9:​6, 7). Ribeza Jehová gusihuínninu nácanu leal laa. Ne ra zidiʼdiʼ dxi zanda gaca lealtad ca jma nadipaʼ. Ne nga peʼ nga ni bizaaca profeta Daniel. Stale biaje bisihuinni Daniel nadxii Jehová ne qué nusaanabe laa. Peru dxi napa Daniel jma de 90 iza, gudíʼdibe lu ti guendanagana naroʼbaʼ. Nanalaʼdxiʼ caadxi funcionariu Daniel ne qué runi respetarcaʼ Jehová. Ngue runi gudixhe íquecabe gúnicabe xiixa para gúticabe Daniel. Biyúbicabe modo guni firmar rey que ti ley ni guluu Daniel lu ti guendanagana, pa zaca leal Dios o rey que. Para gusihuinni Daniel zuni ni ná rey que la? ni naquiiñeʼ si guni nga gusaana de guni orar Jehová 30 dxi. Peru Daniel qué nusaana de ñuni ni ná Jehová (Dan. 6:​12-15, 20-22). w23.08 5 párr. 10-12

Racalaʼdxiʼ Jehová gusihuínninu nadxiinu ca hermanu ne ca hermana stinu. Pa guni tratar tuuxa hermanu laanu mal, cadi guiníʼ íquenu bíʼnibe ni para guninabe laanu, sínuque guiníʼ íquenu cayúnibe stipa gúnibe ni jneza (Prov. 12:18). Nadxii Jehová laanu neca nácanu binni ruchee. Qué rusaanabe laanu stúbinu ora rucheʼnu ne qué ridaabe xiana (Sal. 103:9). Nabé risaca nga chinándanu ejemplu stiʼ Bixhózenu ni nuu guibáʼ ne guni perdonarnu xcaadxi (Efes. 4:​32–5:1). Ne cadi guiaandaʼ laanu, cumu maʼ gaxha nuu fin stiʼ guidxilayú riʼ la? caquiiñeʼ chuʼnu tobi si né ca hermanu stinu. Nánnanu jma zazanándacabe laanu ne zándaca dede zaguucabe laanu cárcel. Óraca nga jma zaquíʼñenu gacané ca hermanu stinu laanu (Prov. 17:17). w24.03 15, 16 párr. 6, 7

Biblia laaca ruzeeteʼ de caadxi joven ni guyuu gaxha de Jehová ne guyuuláʼdxibe ni bíʼnicaʼ ne guyeni laacaʼ galán lu xquendanabánicaʼ, tobi de laacabe nga David. Dxi gúcabe joven, guca xhamígube Jehová ne gúcabe ti rey ni qué nusaana de ñuni ni nabe (1 Rey. 3:6; 9:​4, 5; 14:8). Ra gúʼndanu modo bibani David, ejemplu stibe zacané ni laanu gácanu fiel Jehová. Sti cosa ni zanda gúninu ora guni estudiarnu nga guidúʼndanu de Marcos ne Timoteo. Guirópacabe bíʼnicabe ni ná Jehová dxi gúcacabe joven ne gúcacabe fiel. Pur decisión ni gucuaacabe ca bisiéchecabe Jehová. ¿Ximodo racaláʼdxiluʼ gaca xquendanabániluʼ? Ni gúniluʼ dede yanna zusihuinni xi racaláʼdxiluʼ. Pa gápaluʼ confianza Jehová ne cadi gápaluʼ confianza laca lii, zacanebe lii guicaaluʼ decisión jneza. Lii zanda gápaluʼ ti guendanabani nabé sicarú ne nayecheʼ. Cadi guiaandaʼ lii zusisaca Jehová guiráʼ ni gúniluʼ pur laa. Zabeendunu stale ni galán pa gúninu ni ná Bixhózenu ni nuu guibáʼ ni nadxii laanu. ¡Gastiʼ sti cosa jma galán! w23.09 13 párr. 18, 19

Nanna apóstol Pablo binni ruchee ca hermanu stiʼ. Dxi bizulú guyebe congregación de Jerusalén, stale tu bidxibi ne qué ñapa confianza laabe (Hech. 9:26). Laaca guyuu tu guníʼ mal de laabe neza déchebe (2 Cor. 10:10). Despué biiyaʼ Pablo ti hermanu ni gucuaa ti decisión ni cadi jneza, ni zándaca nucaa xcaadxi xpinni Cristu nuchee (Gál. 2:​11, 12). Laaca qué ñuuláʼdxibe ni biʼniʼ Marcos, tobi de ca compañeru stibe (Hech. 15:​37, 38). Ñanda niníʼ ique Pablo napa stale razón para maʼ cadi guidxaaga ca hermanu ni bininá laa. Peru qué nudiibe lugar nuxheleʼ ngue laabe de Jehová, sínuque bíʼnibe xhiiñaʼ né stale gana ne qué nidxiichinebe ca hermanu que. ¿Xi gucané laabe gúnibe ni yaʼ? Cumu nabé nadxii Pablo ca hermanu que la? biiyabe ca cualidad galán ni nápacaʼ ne cadi ra cucheecaʼ. Laaca gucané guendarannaxhii ca laabe guni perdonarbe laacaʼ, ne nga peʼ nga ni bizeetebe lu textu stiʼ yannadxí riʼ. w24.03 15 párr. 4, 5

Lu Biblia zeeda stale ejemplu ni rusihuinni pabiáʼ risaca gácanu binni nadóʼ. Guidúʼyanu ejemplu sti Isaac dxi guleza Guerar, bizulú gupa ca filisteu ni nabeza raqué envidia laabe ne bichiicaʼ ca bizé ni gundaa ca siervu stiʼ bixhózebe. Qué nidíndebe pur ca bizé que, ¿xi bíʼnibe ya? Lugar de ngue guyebe zitu ne gundaabe xcaadxi bizé (Gén. 26:​12-18). Peru ca filisteu guniʼcaʼ laaca sticaʼ nisa ni nuu raqué. Neca bizaaca ndiʼ, qué nusaana Isaac de ñaca nadóʼ (Gén. 26:​19-25). ¿Xi gucané laabe gácabe nadóʼ neca bicaalúcabe laabe stale biaje yaʼ? Zándaca biziidibe de modo naca bixhózebe ne jñaabe. Guca Abrahán ti binni ni ruyubi chuʼ paz ne Sara guca ti binni «nachaʼhuiʼ ne nadóʼ» (1 Ped. 3:​4-6; Gén. 21:​22-34). w23.09 15 párr. 4

Ora bedandá tiempu bisihuinni Jehová pabiáʼ nadxii laanu ra biseendaʼ Xiiñiʼ lu Guidxilayú riʼ, bisiidiʼ Jesús binni de Reinu stiʼ Dios ne bidii xquendanabani para gulá laanu de lu náʼ pecadu ne guendaguti. Despué biásabe de lade guetu, para guibánibe guibáʼ ne guni mandarbe casi rey lu Reinu stiʼ Dios. Tema ni jma risaca zeeda lu Biblia nga: zusiá Jehová lá ne zúnibe ni ora maʼ guni mandar Jesús lu Reinu stiʼ Dios, ne zacá zaca ni maʼ gudixhe íquebe lu Guidxilayú riʼ. Guirutiʼ zanda gucueeza Jehová de guni ni maʼ gudixhe ique. Laapebe maʼ guniʼbe zuni cumplirbe ni (Is. 46:10; Heb. 6:​17, 18). Ra tidiʼ tiempu zaca Guidxilayú riʼ ti paraísu ne ca ni zá de Adán ne Eva, ca ni nachaʼhuiʼ, zácacaʼ perfectu ne zabánicaʼ sin qué chuʼ dxi gáticaʼ (Sal. 22:26). Ne cadi ngasi, nuuruʼ ni naguixhe ique Jehová guni. Zúnibe chuʼ guiráʼ xixé ni nuu lu Guidxilayú ne guibáʼ tobi si ne gánnacaʼ laasibe nga nápabe derechu de guni mandarbe (Efes. 1:​8-11). ¿Cadi dxandíʼ guizáʼ galán modo chiguni Jehová ni maʼ gudixhe ique la? w23.10 20 párr. 7, 8

Ora yendá ca judíu ni biree de Babilonia que Jerusalén gúpacabe guendanagana para gudiicabe ni caquiiñeʼ xfamíliacabe, pur ca guendanagana ni gupa ca ni cayuni mandar guidxi que ne zaqueca purtiʼ cucaalú ca xhenemígucabe laacabe. Pur guiráʼ ndiʼ guca nagana para stale de laacabe gucuícabe templu stiʼ Jehová sti biaje. Nga runi, biseendaʼ Jehová profeta Ageo ne Zacarías para cuʼ gana guidxi que, ne nabé galán dxiiñaʼ ni bíʼnicaʼ (Ageo 1:1; Zac. 1:1). Peru 50 iza despué biree ca judíu gana, para ca iza que nga biree Esdras, ti hombre ni nanna guni copiar ley stiʼ Dios, de Babilonia ne bibiguetaʼ Jerusalén para cuʼ gana guidxi que ne gacané laacabe quixhe íquecabe guni adorárcabe Jehová jneza (Esd. 7:​1, 6). Gucané ca profecía stiʼ Ageo ne Zacarías ca xpinni Dios de dxiqué gápacaʼ confianza zacané Jehová laacaʼ neca guyuu tu bicaalú laacaʼ, ne laaca zanda gacané ca ni laanu tiempu stinu riʼ gápanu confianza zacané Jehová laanu lu intiica si guendanagana (Prov. 22:19). w23.11 14, 15 párr. 2, 3

¿Ximodo zanda gusihuínninu nadxiinu ca hermanu ni zeeda gaca casi familia stinu yaʼ? Ti modo zanda gúninu ni nga, ra quixhedxinu ladxidóʼcabe, ne para cadi gusaana de gúninu ni, caquiiñeʼ guianu laacabe (1 Tes. 4:18). ¿Ximodo cadi gusaana de gannaxhiisaanu yaʼ? Ra gúninu guiráʼ ni nuu lu nanu para guni perdonarnu ra gucheené xcaadxi laanu. ¿Xiñee nabé risaca gannaxhiisaanu tiempu riʼ? Guidúʼyanu ni bizeeteʼ Pedro: «Maʼ zedadxiña dxi guiluxe guiráʼ cosa. Nga runi, […] ni jma naquiiñeʼ gúnitu nga gannaxhiisaatu» (1 Ped. 4:​7, 8). ¿Xi naquiiñeʼ cuézanu laga zeeda guidxiña fin stiʼ ca cosa riʼ? Sicaríʼ guníʼ zazaacaʼ ca discípulo stiʼ: «Zaca nanalaʼdxiʼ guiráʼ guidxi laatu pur nácatu xpinneʼ» (Mat. 24: 9). Para cadi gusaana de gúninu ni ná Jehová neca gaca nanaláʼdxicabe laanu la? naquiiñeʼ chuʼnu tobi si. Racalaʼdxiʼ Binidxabaʼ guxheleʼ laanu, peru pa nadxiisaanu qué zaca xcústube, purtiʼ guendarannaxhii ca nga ni racané laanu chuʼnu tobi si (Filip. 2:​1, 2). w23.11 13 párr. 18, 19

Nabé naroʼbaʼ poder napa guiráʼ ni dxandíʼ zeeda lu Biblia. Ora rusíʼdinu binni tuu nga Jehová ne ximodo laa, rizaaca stale cosa ni ridxagayaanu. Ra maʼ ziziidicabe cadi dxandíʼ guiráʼ ni ná Binidxabaʼ, rixeleʼ lúcabe ne ruzulú ruuyacabe Bixhózenu ni nuu guibáʼ cásica ridúʼyanu laa. Guizáʼ ridxagayaacabe ora guiníʼ íquecabe nápabe stale poder (Is. 40:26). Ne runi sentírcabe seguru purtiʼ nánnacabe jneza guiráʼ ni rúnibe (Deut. 32:4). Nabé ridxagayaacabe purtiʼ guizáʼ nuu xpiaanibe (Is. 55:9; Rom. 11:33). Ne ratadxí ladxidóʼcabe ra guiziidicabe laabe nga guendarannaxhii (1 Juan 4:8). Ora maʼ nuucabe gaxha de Jehová, riuucabe seguru zanda guibánicabe para siempre ne gueeda gácacabe xiiñibe. ¿Cadi dxandíʼ nabé riéchenu ora gacanenu binni guidxiña Bixhózenu ni nuu guibáʼ la? Ora rúninu ni nánnanu cayuninenu Dios dxiiñaʼ (1 Cor. 3:5). w24.02 12 párr. 15

Pa cayuundaluʼ Biblia o pa naca bixhózeluʼ ne jñaaluʼ testigu stiʼ Jehová ne cusiidicaʼ lii ni dxandíʼ, ¿ñee caníʼ íqueluʼ chuʼnísaluʼ la? ¡Galán pa zacá ni! Peru nuu ti cosa ni naquiiñeʼ gúniluʼ ante chuʼnísaluʼ: naquiiñeʼ gaca dedicarluʼ o gudiiluʼ xquendanabániluʼ Jehová. ¿Ximodo nga raca dedicar tuuxa Jehová yaʼ? Rúnibe ti oración ne runi prometerbe Jehová zuni adorarbe laasi ne ni jma zasaca para laabe nga gúnibe ni ná. Ni riníʼ ca diidxaʼ riʼ nga runi prometerbe Jehová qué zusaana de gannaxhiibe laa de guidubi ladxidoʼbe, guidubi xhiálmabe, guidubi xquendabiaanibe ne guiráʼ stipa stibe (Mar. 12:30). Ora raca dedicarluʼ Jehová rudiiluʼ xquendanabániluʼ laa ne rábiluʼ ni laabe lu ti oración. Ne ora riuunisaluʼ rusihuínniluʼ nezalú guiráʼ binni maʼ bidiiluʼ xquendanabániluʼ Dios. Guizáʼ risaca voto ni rúniluʼ ora rudiiluʼ xquendanabániluʼ Jehová. Nga runi rúniluʼ stipa para guni cumplirluʼ ni ne zaqueca ribeza Jehová gúniluʼ ni (Ecl. 5:4). w24.03 2 párr. 2; 3 párr. 5

Maca cá lu Biblia guiráʼ ca guendaxheelaʼ ca «zápacaʼ problema lu xquendanabánicaʼ» (1 Cor. 7:28). ¿Xiñee yaʼ? Purtiʼ binni ruchee guirópacabe. Laaca gadxé gadxé modo nácacabe ne gadxé gadxé ni riuuláʼdxicabe. Zándaca de gadxé guidxi laacabe ne gadxé modo biniisicabe. Zándaca gúʼyacabe xiixa de xheelacabe ni qué ñuuyacabe dxi nácacabe novio. Ne pur ca ni bizéʼtenu riʼ zándaca gápacabe guendanagana lu xquendaxheelacabe. Lugar de guiníʼ íquecabe guirópacabe nga bicheecabe ne ñúnicabe dxiiñaʼ tobi si para ñuni chaahuicabe ca guendanagana ca, zándaca ugaanisaacabe donda íquecabe o guiníʼ íquecabe ni jma galán nga gusabixheelacabe o gaca divorciárcabe. Peru ¿nga nga ni jma jneza la? Coʼ. Racalaʼdxiʼ Jehová gusisaca ca ni maʼ bichaganáʼ xquendaxheelacaʼ, neca nabé feu xpiaʼ xheelacaʼ. w24.03 16 párr. 8; 17 párr. 11

Despué de guyuunísaluʼ, ziyácaruʼ esperanza de guibániluʼ para siempre ndaaniʼ ti paraísu lu guidxilayú riʼ jma naguidxi, purtiʼ ziziidiluʼ jma de Jehová ne zidxíñaluʼ jma gaxha de laabe (Heb. 5:13–6:1). Zándaca bizaacaluʼ ni ná Romanos 5:​2-4, bidxaagaluluʼ guendanagana ne bidiiluʼ cuenta guyuulaʼdxiʼ Jehová ni bíʼniluʼ. Cumu nánnaluʼ cusiécheluʼ Jehová la? jmaruʼ si riuuluʼ seguru zuni cumplirbe ni maʼ biʼniʼ prometerbe. Jma maʼ naguidxi nuu esperanza stiluʼ yanna que dxiqué. Jma maʼ runi creluʼ ni, runi sentirluʼ para lii ni, jma maʼ riníʼ íqueluʼ ni. Ne rihuinni zacá ni pur modo nabániluʼ: modo runi tratarluʼ familia stiluʼ, ca decisión ni ricaaluʼ ne modo riquiiñeluʼ tiempu stiluʼ. Despué de bizeeteʼ apóstol Pablo rápanu esperanza ora riuulaʼdxiʼ Dios ni cayúninu, bizeetebe ti cosa nabé risaca: zanda chuʼnu seguru zaca cumplir esperanza ni nápanu (Rom. 15:13). w23.12 12, 13 párr. 16-19

Pa cadídinu lu ti guendanagana ni guizáʼ cayuniná laanu, zándaca gaca nagana para laanu guzuhuaʼnu dxiichiʼ ne zándaca zuchaʼnu modo riníʼ íquenu ne ni rúninu. Zándaca guni sentirluʼ nácaluʼ casi ti barcu ni nuu ndaaniʼ ti nisadóʼ ra nabé naroʼbaʼ cayasa ca ola ne cadxelasaa ca ni barcu ca deche ca deche. Yanna, ¿ximodo racané Jehová laanu ora maʼ qué ganda laanu pur guiráʼ ni cayuni sentirnu yaʼ? Ma guniʼbe zacanebe laanu guzuhuaʼnu dxiixhiʼ. Ora ridxaagalú ti barcu ti tormenta runiibi dxacha ni laa cheríʼ chericaʼ. Para cadi guiniibi ni la? stale barcu napa estabilizador cada laadu ni ribiaa xagueteʼ nisa. Zacá maʼ qué raca sentir peʼ pa caniibi ni reciu ne ca ni zeʼ luni riuucaʼ jma seguru. Stale de ca estabilizador ca jma galán rúnicani dxiiñaʼ ora caniibi barcu ca. Zaqueca nga laanu, pa racaláʼdxinu gacané Jehová laanu guzuhuaʼnu dxiichiʼ neca nápanu guendanagana ni nabé cayuniná laanu la? cadi naquiiñeʼ guixélenu de laabe. w24.01 22 párr. 7, 8

Ora maʼ cadxíbiluʼ, guníʼ ique: «¿Xi biʼniʼ Jehová dxiqué?». Zanda guiníʼ íqueluʼ ca cosa ni bizaʼbe. Casi ora ridúʼyanu ximodo rapa Jehová ca pájaru ne ca guieʼ, qué nuzáʼ Jehová ca ni casi laa ne qué zanda guni adorar ca ni laabe. Racané ndiʼ laanu chuʼnu seguru laaca zápabe laanu (Mat. 6:​25-32). Ne laaca zanda guiníʼ íqueluʼ ni maʼ biʼniʼ Jehová pur ca xpinni. Zanda gúʼndaluʼ ejemplu stiʼ ca xpínnibe ni riete lu Biblia o ni bizaaca ca xpínnibe de ca dxi stinu riʼ. Laaca galán guiníʼ íqueluʼ ximodo huayapa Jehová lii. ¿Rietenaláʼdxiluʼ ximodo gucanebe lii gunibiaʼluʼ ni dxandíʼ la? (Juan 6:44). ¿Ximodo huacábibe ca oración stiluʼ? (1 Juan 5:14). ¿Xi ribeenduluʼ guiráʼ dxi pur bidiibe Xiiñibe guti pur lii? (Efes. 1:7; Heb. 4:​14-16). w24.01 4 párr. 6; 7 párr. 17