Noviembre

Pa nápaluʼ xiiñiluʼ, gucané laacabe gudiicabe comentariu biaʼ laacabe. Nuu biaje lu ca reunión ca riete tema ni caníʼ de ca guendanagana ni rapa ca guendaxheelaʼ o ximodo zanda gaca ca xpinni Cristu nayá. Peru zándaca chuʼ tobi o chupa párrafo ra zanda guni comentar ca xcuidi. Laaca zanda gacanetu ca xiiñitu gánnacaʼ cadi guiráʼ biaje guidisanacaʼ zacaacaʼ comentariu. Zacá qué ziuucaʼ triste ora gudiicabe comentariu xcaadxi (1 Tim. 6:18). Guiranu zanda guni prepararnu ti comentariu para gusisácanu Jehová ne cuʼnu gana ca hermanu stinu (Prov. 25:11). Neca nuu biaje zanda guzéʼtenu xiixa experiencia ni bizaacanu, cadi naquiiñeʼ guininu puru si de laanu (Prov. 27:2; 2 Cor 10:18). Sínuque ni jma galán gúninu nga guininu de Jehová, de Stiidxabe ne de xquídxibe (Apoc. 4:11). w23.04 24, 25 párr. 17, 18

Para gatananu ne cuʼ xpiaaninu caquiiñeʼ gusihuínninu guendarannaxhii (Mat. 22:​37-39). Racané guendarannaxhii ni nápanu Dios laanu para guni predicarnu neca guidxaagalunu guendanagana (2 Tim. 1:​7, 8). Ne cumu laaca nadxiinu binni ni qué runi cré ni runi crenu la? rúninu stipa guni predicarnu laacabe dede nuu biaje rúninu ni pur teléfono o pur carta. Qué riníʼ íquenu maʼ qué zuchaacabe, sínuque ribézanu guedandá dxi guchaacabe ne gúnicabe ni jneza (Ezeq. 18:​27, 28). Laaca nadxiinu ca hermanu stinu ne rusihuínninu ni ra riguʼnu gana laacaʼ ne ra gacanésaanu (1 Tes. 5:11). Ora maʼ nuu ca soldadu lu guerra racanésaacaʼ. Zacaca nga laanu, laaca qué zuyúbinu guninanu ca hermanu stinu o guquíxenu ni gúnicaʼ laanu (1 Tes. 5:​13, 15). Laaca rusihuínninu nadxiinu ca hermanu stinu ora runi respetarnu ca ni zániru ndaaniʼ congregación (1 Tes. 5:12). w23.06 10 párr. 6; 11 párr. 10, 11

Ti modo zanda guquídxinu fe stinu nga guiníʼ íquenu lu sacrificiu ni biʼniʼ Jesús ne Jehová pur laanu. Ni bíʼnicabe riʼ racaneni laanu guni crenu dxandíʼ zuni cumplir Dios guiráʼ ni maʼ guníʼ. Ora guiníʼ ique chaahuinu xiñee bidii Jehová lugar gati Xiiñiʼ pur laanu ne guiráʼ ni bíʼnibe para gácani, racané ni laanu gápanu fe zedandá dxi zabáninu galán ndaaniʼ Guidxilayú riʼ sin qué chuʼ dxi gátinu. ¿Xiñee riguidxi fe stinu yaʼ? Guiníʼ íquenu xi guiráʼ biʼniʼ Jehová. Biseendabe Xiiñibe ni bizaʼbe primé, xhamígube, ni guyuunebe tobi si guibáʼ para gueeda gale lu Guidxilayú riʼ casi ti binni ni qué gapa donda. Dxi guyuu Jesús lu Guidxilayú riʼ bidxaagalú stale guendanagana, gupa xidé biʼniʼ sufrir ne guizáʼ naná modo guti. Stale nga ni gudixe Jehová pur laanu. Qué nudii Jehová lugar ñuni sufrir ne ñati Xiiñiʼ para si nibáninu galán chupa chonna si iza (Juan 3:16; 1 Ped. 1:​18, 19). Cumu stale nga ni gudixe Jehová pur laanu la? laapebe zuyúbibe modo guibáninu galán ndaaniʼ Guidxilayú cubi ca. w23.04 27 párr. 8, 9

¿Ñee racalaʼdxiʼ Jehová guindisaʼ ca ni maʼ guti la? Racalaʼdxiʼ pue. Pur espíritu santu stiʼ Jehová bicaa caadxi hombre lu Biblia ziasa ca binni ni maʼ guti (Is. 26:19; Apoc. 20:​11-13). Runi cumplir Jehová guiráʼ promesa ni runi (Jos. 23:14). Ne maʼ racaláʼdxibe guindísabe ca ni maʼ guti. Guiníʼ íquenu ni guníʼ Job. Laa gunna dxiichiʼ pa gueeda gati la? zandisaʼ Jehová laa sti biaje (Job 14:​14, 15). Ngaca racalaʼdxiʼ Jehová guni pur ca xpinni ni maʼ guti. ¡Guizáʼ maʼ racalaʼdxiʼ Jehová guindisaʼ laacabe! Chúʼcabe nazaaca ne guibánicabe nayecheʼ. Yanna, ¿xi runi sentir Jehová pur ca binni ni maʼ guti ni qué ñanda ñunibiáʼ laabe yaʼ? Laaca racalaʼdxiʼ Bixhózenu ni nadxii laanu gusibani laacabe sti biaje (Hech. 24:15). Racaláʼdxibe gueeda gácacaʼ xhamígube ne guibánicaʼ sin qué chuʼ dxi gáticaʼ lu Guidxilayú riʼ (Juan 3:16). w23.04 9 párr. 5, 6

¿Xi zanda gúniluʼ para gaca esperanza stiluʼ naguidxi? Pa nápaluʼ esperanza de guibániluʼ ndaaniʼ Guidxilayú riʼ sin qué chuʼ dxi gátiluʼ la? biindaʼ ni ná Biblia de Paraísu ne bixuiʼlú maʼ nuuluʼ racá (Is. 25:8; 32:​16-18). Guníʼ ique ximodo zabani binni ndaaniʼ guidxilayú cubi ca. ¿Ñee ruxuíʼluluʼ maʼ nuuluʼ racá la? Pa nápanu costumbre de guiníʼ íquenu ximodo zabani binni lu guidxilayú cubi ca, zuni sentirnu «ti ratu si nga ridídinu prueba ne cadi naroʼbaʼ peʼ ni» (2 Cor. 4:17). Esperanza ni cudii Jehová lii zudii ni lii stipa. Maʼ bidiibe laanu guiráʼ ni caquíʼñenu para gápanu stipa. Nga runi, ora gaca nagana para lii gúniluʼ ti dxiiñaʼ ni gucuaaluʼ ndaaniʼ xquidxi Dios, guni huantarluʼ xiixa guendanagana o gaca nagana para lii gúniluʼ ni ná Jehová né guendanayecheʼ, biʼniʼ orar de guidubi ladxidoʼloʼ ne biindaʼ Biblia para gacanebe lii. Ne laaca bidii lugar gacané ca hermanu lii ne cadi guiaandaʼ lii esperanza ni nápanu. Ne zacá, gudii Jehová «laatu poder ti gápatu stipa biaʼ caquiiñetu ne gápatu paciencia para ganda chuʼtu nayecheʼ ne guni huantartu guiráʼ cosa» (Col. 1:11). w23.10 17 párr. 19, 20

Ora guni orarnu zanda gudiʼnu xquixe peʼ Jehová pur stale cosa. Gudiʼnu xquixe peʼ Jehová pur guiráʼ regalu sicarú ni nápanu purtiʼ de laabe nga zeeda ca ni (Sant. 1:17). Zanda gudiʼnu xquixe peʼ Jehová pur Guidxilayú sicarú ni nápanu riʼ, ca cosa sicarú ni maʼ bizaʼbe, pur xquendanabáninu, familia stinu, ca xhamígunu ne esperanza ni maʼ bidiibe laanu. Ne laaca zanda gudiʼnu xquixe peʼ laabe purtiʼ maʼ bidiibe laanu privilegiu de gaca xhamígunu laabe. Zándaca zaca nagana guiníʼ íquenu ca razón ni nápanu para gudiʼnu xquixe peʼ Jehová. Purtiʼ nabáninu ndaaniʼ Guidxilayú ra nuu binni ni ruyubi puru si para laa ne maʼ qué ricá íquecaʼ gudiicaʼ xquixe peʼ pur ca cosa ni nápacaʼ. Ne pa qué gápanu cuidadu zándaca gueeda guiníʼ íquenu casi laacabe ne guinábanu Dios puru si ni caquíʼñenu. Yanna, ¿xi zanda gúninu yaʼ? Cadi gusaanaʼ de gúninu stipa gácanu binni ni rudii xquixe peʼ ne gudiʼnu xquixe peʼ Jehová pur guiráʼ cosa galán ni rudii laanu (Luc. 6:45). w23.05 4 párr. 8, 9

Nadxii Jehová, Bixhózenu, laanu ne qué riuulaʼdxiʼ guʼyaʼ laanu cayacananu (Is. 63:9). Peru qué rulabe laanu de guiráʼ guendanagana rápanu, ni ruchaaga Biblia casi guiiguʼ ne bele (Is. 43:2). Ni cayuni prometerbe laanu nga zacanebe laanu tídinu intiica guendanagana gápanu ne qué zudiibe lugar guniná ca ni laanu stale. Laaca rudii Jehová laanu espíritu stiʼ para gacané laanu guni huantarnu (Luc. 11:13; Filip. 4:13). Nga runi, nanna dxíchinu siempre zápanu ni caquíʼñenu para guni huantarnu ne cadi guixélenu de Jehová. Ribeza Jehová gápanu confianza laa (Heb. 11:6). Nuu biaje ruluíʼ guizáʼ naroʼbaʼ ca guendanagana stinu dede riníʼ íquenu qué zacané Jehová laanu. Peru Biblia cayabi laanu zanda gacané poder stiʼ Dios laanu quíbanu ti muru (Sal. 18:29). Nga runi, cadi guiníʼ íquenu qué zacané Jehová laanu, sínuque naquiiñeʼ guni orarnu de guidubi ladxidoʼno ne gápanu fe ne confianza zacábibe ca oración stinu (Sant. 1:​6, 7). w23.11 22 párr. 8, 9

¡Nabé galán ca diidxaʼ riʼ! Rusihuinni ca ni zanda gaca guendarannaxhii ni napa ca ni maʼ bichaganáʼ nadipaʼ ne qué chuʼ dxi guirá ni. Para cadi guirá guendarannaxhii ni napa ca guendaxheelaʼ ca la? caquiiñeʼ guni guirópacabe stipa. Guiníʼ íquenu bíninu ti guí ne para cadi guizuíʼ ni la? caquiiñeʼ cuʼnu yaga luni. Zaqueca rizaaca né ca ni maʼ bichaganáʼ: caquiiñeʼ guluiʼcaʼ nadxiisaacaʼ ti cadi guirá guendarannaxhii sticaʼ. ¿Xiñee yaʼ? Purtiʼ zanda guizuíʼ bele stiʼ guendarannaxhii stícabe pur ca guendanagana ni guidxaagalúcabe casi guiaadxaʼ laacabe bueltu, gaca huarácabe o gápacabe guendanagana ora maʼ cusiniisicabe xiiñicabe. Yanna, para cadi guizuíʼ «bele stiʼ Jah» la? caquiiñeʼ guni ca ni maʼ bichaganáʼ stipa para gaca xhamígucaʼ Jehová. w23.05 20, 21 párr. 1-3

Zándaca napa bixhózenu ne jñaanu valor peru qué riníʼ diʼ nga laaca zápanu valor cásica laacabe. ¿Xiñee yaʼ? Purtiʼ caquiiñeʼ gúninu stipa para gápanu ni. Gapa tuuxa valor o gaca nadxibalú zeeda gácani casi ti habilidad. Ne caquiiñeʼ guizíʼdinu gápanu ni. Para gápaluʼ ti habilidad caquiiñeʼ guuyadxiluʼ binni ni napa habilidad ca ne guiziidiluʼ gúniluʼ ni rúnibe. Nga runi, para gácanu ti binni ni napa valor naquiiñeʼ gúʼyadxinu ca binni ni naca zacá ne chinándanu ejemplu sticaʼ. Cásica Daniel, caquiiñeʼ guni estudiarnu Stiidxaʼ Dios, gaca xhamígunu Jehová, cadi gusaana de guni orarnu laabe ne gábinu laabe ni runi sentirnu ne gápanu confianza, qué zusaana Jehová de gacané laanu. Pa gúninu ca cosa ni bizéʼtenu riʼ, zácanu ti binni ni napa valor ora caquiiñeʼ gusihuínninu pa nápanu fe. Ca binni ni napa valor runi respetar xcaadxi laa ne laaca rucaani xcaadxi gacaláʼdxicaʼ gánnacaʼ jma de Jehová. Ndiʼ rusihuinni ribeendunu ni galán ora nácanu binni ni napa valor. w23.08 2 párr. 2; 4 párr. 8, 9

Diidxaʼ griegu ni biquiiñeʼ raríʼ para gaca traducir «laguyubi chaahuiʼ» riquiiñecabe ni para guʼyaʼ chaahuicabe pa dxandíʼ xiixa guiibaʼ risaca casi oro ne plata Ngaca nga naquiiñeʼ gúninu, guʼyaʼ chaahuinu pa dxandíʼ ni runadiáganu o ni ridúʼndanu. Jma risaca gúninu ni yanna purtiʼ mayaca gueeda gran tribulación. Lugar de guni crenu intiica cosa gábicabe laanu, rúninu stipa iquíʼñenu guendabiaaniʼ stinu para guchaaganu ni ridúʼndanu o ni runadiáganu né ni rusiidiʼ Biblia ne ni ná organización stiʼ Jehová. Zacá qué zaguite nin ti mensaje stiʼ ca demonio laanu (Prov. 14:15; 1 Tim. 4:1). Nánnanu zalá xquidxi Dios lu gran tribulación, peru qué ganna cada tobi nu xi zazaaca né xquendanabani guixíʼ (Sant. 4:14). Pa tídinu o gátinu ante de gran tribulación, zudii Jehová laanu guendanabani ni qué zaluxe pa qué guchéʼnenu laa. Laga guedandá dxi ca la? guinaaze dxíchinu esperanza ni nápanu ne chuʼnu listu para ora guedandá stiʼ Jehová. w23.06 13 párr. 15, 16

Qué gánnanu ximodo chigaca cumplir caadxi profecía ni zeeda lu Biblia (Dan. 12:​8, 9). Peru cadi purtiʼ si qué riénenu ximodo chigaca cumplir xiixa profecía riníʼ nga qué zaca cumplir ni. Nanna dxíchinu zabi Jehová laanu ni caquiiñeʼ gánnanu ora peʼ caquiiñeʼ si gánnanu ni cásica bíʼnibe ni dxiqué. Maʼ cadi candaa zaníʼ ca guidxi ca «¡Maʼ nuu paz ne seguridad!» (1 Tes. 5:3). Ora guizaaca ndiʼ zucaalú ne zunitilú ca gobiernu ca religión ni qué rusiidiʼ ni dxandíʼ (Apoc. 17:​16, 17). Despué zucaalúcabe xquidxi Dios (Ezeq. 38:​18, 19). Ne óraque nga maʼ guzulú Armagedón (Apoc. 16:​14, 16). Nanna dxíchinu maʼ cadi candaa zazaaca guiráʼ ndiʼ. Peru laga cabézanu guizaaca ndiʼ cadi gusaana de gusihuínninu rudiʼnu xquixe peʼ Bixhózenu ni nuu guibáʼ. Ne cadi gusaana de guidúʼyanu ximodo cayaca cumplir ca profecía ni zeeda lu Biblia ne gacanenu xcaadxi gúnicaʼ zacá. w23.08 13 párr. 19, 20

Ora guníʼ apóstol Pablo de fe, esperanza ne amor, biluxe guniʼbe sicaríʼ: «Ni jma risaca lade guionnaʼ ni nga amor» (1 Cor. 13:13). ¿Xiñee guníʼ Pablo jma risaca guendarannaxhii yaʼ? Purtiʼ huidxegá zaca cumplir ca promesa ni caníʼ de ti guidxilayú cubi ne maʼ cadi caquiiñeʼ gápanu fe lu esperanza ni nápanu yanna. Peru qué zusaana de gannaxhiinu Jehová ne binni. Zaroobaʼ guendarannaxhii ni nápanu laacabe para siempre. Ne ra guluinu nadxiisaanu nga zusihuínninu dxandíʼ xpinni Cristu laanu. Gudxi Jesús ca apóstol stiʼ ca diidxaʼ riʼ: «Sicaríʼ nga zanna binni nácatu discípulo stinneʼ: pa nadxiisaatu» (Juan 13:35). Ne laaca racané guendarannaxhii ca laanu chuʼnu tobi si. Ngue runi guníʼ Pablo «dxandíʼ racané ni binni chuʼ unidu» (Col. 3:14). Bicaa apóstol Juan ra nuu ca xpinni Cristu ca diidxaʼ riʼ: «Tutiica gannaxhii Dios, laaca naquiiñeʼ gannaxhii hermanu stiʼ» (1 Juan 4:21). Nga runi, ora rusihuínninu nadxiinu ca hermanu, laaca rusihuínninu nadxiinu Jehová. w23.11 8 párr. 1, 3

Biblia ná cuxooñeʼ ca xpinni Cristu lu ti carrera. Ca ni chindá ra riluxe ni zacaacaʼ guendanabani ni qué zaluxe (2 Tim. 4:​7, 8). Nga runi, gúninu stipa para cadi gusaana de guxóʼñenu purtiʼ maʼ gaxha nuu ra riluxe ni. Bizeeteʼ Apóstol Pablo xi zanda gacané laanu chindanu ra riluxe carrera de guendanabani riʼ. Laabe guniʼbe: «Gusaananu ca cosa nanaa ni nuanu […], ne guxóʼñenu sin guidxáganu lu carrera ni naguixhe Dios nezalunu». Cadi caníʼ diʼ Pablo cadi caquiiñeʼ guanu nin ti cosa sínuque gusaananu ca cosa ni cadi caquiiñeʼ guanu. Purtiʼ rusidxaga ne rucueeza ca ni laanu de guxóʼñenu nagueenda. Para cadi gusaana de guxóʼñenu caquiiñeʼ guidúʼyanu pa nuanu xiixa ni cadi caquíʼñenu. Ne pa zacá ni la? galán gundaanu ni. Peru nuu xcaadxi cosa ni naquiiñeʼ guanu ne cadi gundaanu. Purtiʼ pa gundaanu ca ni la? zanda gusaana de guxóʼñenu lu carrera ca (2 Tim. 2:5). w23.08 26 párr. 1, 2

Pa nácanu binni riuu razón qué zaca nagana para laanu guni respetarnu ni riníʼ ique xcaadxi. Guidúʼyanu caadxi ejemplu, nuu hermana la? riuuláʼdxicaʼ guidieecaʼ, peru xcaadxi la? coʼ. Ne nuu hermanu gastiʼ naca para laacaʼ guecaʼ caadxi nisadxuʼniʼ, peru xcaadxi la? qué rinacaʼ guecaʼ. Guiranu casi xpinni Cristu, ruyúbinu modo chuʼnu nazaaca, peru gadxé gadxé modo ruyúbinu gápanu laanu. Pa guiníʼ íquenu jma jneza modo riníʼ íquenu zucaʼnu xcaadxi guiníʼ íquecaʼ casi riníʼ íquenu ne nga zándaca gucaani guchee xcaadxi ne cadi chuʼ congregación tobi si (1 Cor. 8:9; 10:​23, 24). Lugar de gudii Jehová laanu ley de modo guzuchaahuinu, rudiibe laanu principiu ni racané laanu. Naquiiñeʼ gusisaca modo guzuchaahuinu Jehová ne gusihuínnini nácanu binni riuu razón ne binni nuu xpiaaniʼ (1 Tim. 2:​9, 10; 1 Ped. 3:3). Nga runi, qué ruyúbinu guʼyadxícabe modo nácunu lari. Laaca zanda gacané ca principiu ni zeeda lu Biblia ca ancianu para cadi laapecaʼ quíxhecaʼ xiixa regla de modo gacu ca hermanu ne ca hermana lari ne modo gata guicha íquecaʼ. w23.07 23, 24 párr. 13, 14

Rusiidiʼ Jehová laanu xi naquiiñeʼ gúninu para guibáninu nayecheʼ. Ca binni ni ricaa invitación stiʼ «gunaa nahuati» ca ruyúbicaʼ ca placer stiʼ inmoralidad sexual. Peru laanu nánnanu «ndaaniʼ Baʼ» nga guilúxecabe (Prov. 9:​13, 17, 18). Ca ni ricaa invitación stiʼ guendabiaaniʼ ni dxandíʼ ca riuucaʼ nayecheʼ (Prov. 9:1). Ne nga nga ni cayúninu, cazíʼdinu gannaxhiinu Jehová ne gaca nanaláʼdxinu ni nanaláʼdxibe (Sal. 97:10). Ne ridxá tipa ladxidoʼno ra guni invitarnu xcaadxi guicaacaʼ «guendabiaaniʼ ni dxandíʼ». Nácanu casi ca sierva ni riete lu capítulo 9 stiʼ Proverbios, ni cucaacaʼ ridxi «dede ca lugar jma nasoo stiʼ guidxi que». Cásica laacabe rininu: «¡Guiráʼ ca ni qué ganna gastiʼ, latáʼ raríʼ!». Ca ni ricaa invitación riʼ cadi yanna si zápacaʼ ndaayaʼ sínuque para siempre. Pa cadi gusaana de sanu lu neza stiʼ guendariene, zanda guicanu guendanabani ni qué zaluxe (Prov. 9:​3, 4, 6). w23.06 24 párr. 17, 18

¿Ximodo runi sentirluʼ ora guinabadiidxaʼ ti compañeru de dxiiñaʼ o de scuela lii de ca ni runi creluʼ? ¿Ñee ridxíbiluʼ la? Stale de laanu runi sentirnu zacá. Peru racané ca tipu pregunta riʼ laanu gánnanu xi riníʼ ique o xi runi sentir sti binni. Ne laaca racané ca ni laanu ganda guni predicarnu. Peru nuu biaje zándaca guinabadiidxacabe para si gucaalúcabe laanu, peru cadi naquiiñeʼ guidxagayaanu purtiʼ zándaca rúnibe ni pur ni gúdxicabe laabe de laanu (Hech. 28:22). Ne laaca purtiʼ nabáninu «lu ca últimu dxi», ne nuu stale binni «qué zanacaʼ chuʼcaʼ de acuerdu» ne nácacaʼ «naduxhuʼ» (2 Tim. 3:​1, 3). Zándaca caníʼ íqueluʼ ximodo gácaluʼ nachaʼhuiʼ ne nadóʼ ora tuuxa tinde pur xiixa ni runi creluʼ. Nuu ti cualidad ni zacané lii, laani nga: gácanu nadóʼ. Ti binni nadóʼ qué ridxiichi nagueenda, zanda gucueeza laca laa, qué rusihuinni cadxibi ora qué ganna xi guicabi o chuʼ tu gucaalú laa. w23.09 14 párr. 1, 2

Rudii organización stiʼ Jehová laanu conseju ni rapa laanu para cadi guicá íquenu gápanu puru si cosa risaca ne para cadi guiábanu lu xcaadxi cosa ni zándaca gucaa laanu guchéʼnenu ca ley stiʼ Dios. Rié ni laanu galán ora rinándanu ni gabi Jehová laanu (Is. 48:​17, 18; 1 Tim. 6:​9, 10). Zaquiiñeruʼ Jehová binni guidxilayú para gabi xquidxi xi naquiiñeʼ guni lu gran tribulación ne ora maʼ cayuni mandar Cristu lu guidxilayú riʼ pur ti mil iza. Ca dxi ca, ¿ñee zinándanu ni gabi Jehová laanu la? Pa dede ca yanna guzúʼbanu diidxaʼ la? qué zaca nagana para laanu gúninu ni despué. Nga runi, cadi gusaana de gúninu ni gabi Jehová laanu ne gucaʼdiáganu ca hombre ni maʼ gulibe para gapa laanu (Is. 32:​1, 2; Heb. 13:17). Nuu stale razón para gápanu confianza Jehová, Dios ni rabi laanu gunáʼ nga neza ra naquiiñeʼ sanu, ni racané laanu para cadi guiábanu lu ca peligru ni zanda guxheleʼ laanu de laa, ni cayacané laanu para chindanu lu guidxilayú cubi, ra zabáninu para siempre. w24.02 25 párr. 17, 18

Guizáʼ biecheʼ apóstol Pablo ora biʼniʼ predicar, peru laaca guyuu biaje gúcani nagana para laabe. Casi ora guni viajarbe zitu, purtiʼ tiempu que nagana para guni viajar tuuxa. Ne ora biʼniʼ viajarbe guyuu xquendanabánibe lu peligru ra gudíʼdibe guiiguʼ ne ra biree gubaanaʼ lube, ne laaca bininá ca xhenemígube laabe (2 Cor. 11:​23-27). Ne guyuu hermanu qué nusisaca stipa bíʼnibe para gacanebe laacaʼ (2 Cor. 10:10; Filip. 4:15). ¿Xi bicaa Pablo cadi gusaana de guni ni ná Dios yaʼ? Biziidiʼ Pablo ximodo naca Jehová ora bíʼndabe Stiidxaʼ. Ne pur guiráʼ ni bidxaagalube gucané ni laabe gánnabe dxandíʼ nadxii Dios laabe (Rom. 8:​38, 39; Efes. 2:​4, 5). Bisihuinni Pablo guizáʼ nadxii Jehová, ra bíʼnibe stale cosa «pur ca hermanu» (Heb. 6:10). w23.07 9 párr. 5, 6

Stale binni nanna riquiiñeʼ ca guidxi ca ti gobiernu, ne naquiiñeʼ chinándacaʼ chupa chonna de ca ley stiʼ «ca autoridad» ca. Peru, zándaca qué rinándacabe xiixa ley ni qué riuuláʼdxicabe o riníʼ íquecabe cadi jneza ca ni. Biblia ruzeeteʼ, runiná ca gobiernu stiʼ guidxilayú binni, nuucani lu náʼ Binidxabaʼ ne maʼ cadi candaa zanitilú ca ni (Sal. 110:​5, 6; Ecl. 8:9; Luc. 4:​5, 6). Peru laaca ruzeeteʼ ni: «Tutiica gucaalú autoridad la? cucaalú orden ni maʼ gudixhe Dios». Rudii Jehová lugar chuʼ ca gobiernu ca lu guidxilayú para gataʼ chaahuiʼ ca cosa ca ne ribeza Dios guni respetarnu ca autoridad ca. Nga runi, naquiiñeʼ gudiʼnu ni guinábacaʼ laanu, casi quíxhenu impuestu, guni respetarnu ne guzúʼbanu stiidxacaʼ (Rom. 13:​1-7). Zándaca guiníʼ íquenu qué zabeendunu xiixa pa chinándanu ti ley o guiníʼ íquenu cadi jneza ni o caru zareeni laanu pa chinándanu ni. Nga runi, naquiiñeʼ guzúʼbanu stiidxaʼ Jehová, ne laabe cayábibe laanu guzúʼbanu stiidxaʼ ca autoridad ca, peru gúninu ni ora qué rinábacabe laanu guchéʼnenu ca ley stibe (Hech. 5:29). w23.10 8 párr. 9, 10

Dxi gule Sansón nuu guidxi Israel lu náʼ ca filisteu (Juec. 13:1). Nabé malu guca ca filisteu, guizáʼ biquiichinacaʼ guidxi Israel, ngue runi nabé gucaná ca israelita. Pur ngue gulí Jehová Sansón para ganda gulabe guidxi «Israel de lu náʼ ca filisteu» (Juec. 13:5). Ngue runi caquiiñeʼ guyubi Sansón gacané Jehová laa. Guyé caadxi soldadu filisteu guidxi Lehí, ni zándaca nuu ndaaniʼ guidxi Judá, para guinaazecaʼ Sansón. Guizáʼ bidxibi ca hombre de Judá, ngue runi bidiicabe Sansón ca hombre que. Ca bíʼchibe israelita, bindiibicaʼ laabe né chupa doo naguidxi ne yenecaʼ laabe ra nuu ca filisteu que (Juec. 15:​9-13). Peru «bidii espíritu stiʼ Jehová laabe stipa», ne gunda bichuugube doo que. Ne despué, «bidxélabe ti quijada stiʼ ti burru ni deruʼ guti», gucuaabe ni ne biitinebe ni ti mil filisteu (Juec. 15:​14-16). w23.09 2 párr. 3, 4

Napa Jehová ti «propósitu ni qué ziuu dxi guiluxe» ne rudiʼnu xquixe peʼ laabe purtiʼ chaahuiʼ chaachiʼ cayabibe laanu xii ni lu Stiidxabe. Guiráʼ ni rúnibe riree ca ni jneza purtiʼ racané guiráʼ ni maʼ bizaʼbe gaca ni maʼ gudixhe íquebe (Prov. 16:4). Guiráʼ ni runi Jehová qué ziuu dxi guiluxe ca ni. Yanna, ¿xii nga maʼ gudixhe ique Jehová guni ne xi huayúnibe para guni cumplirbe ni? Gudxi Dios ca primé binni guyuu lu Guidxilayú riʼ xii nga propósitu stiʼ para laacabe. Ora guniʼbe «lagapa xiiñitu ne lagaca stale, laguchá guidxilayú riʼ ne laguni dxiiñaʼ luni, ne lagapa [ . . . ] guiráʼ maniʼ nuu lu guidxilayú» (Gén. 1:28). Ora Adán ne Eva qué ninacaʼ nuzuubacaʼ stiidxaʼ Dios, beeda chuʼ pecadu lu Guidxilayú riʼ. Peru nga qué nuchaa diʼ ni maʼ gudixhe ique Jehová guni. Ni bíʼnibe nga bichaabe modo naguixhe íquebe gúnibe ni. Nagueendaca gudixhe íquebe chuʼ ti reinu guibáʼ, ni guni cumplir ni maʼ gudixhe íquebe para binni ne Guidxilayú (Mat. 25:34). w23.10 20 párr. 6, 7

Laaca zanda gacané Jehová laanu para cadi guireʼnu gana. Nuu biaje zaca ni nagana para laanu, jmaruʼ si pa maʼ zinenu stale iza de racaláʼdxinu gusaananu ca cosa ni biaʼnu gúninu. Zándaca nuu tiru rucheʼnu ne riníʼ íquenu jma feu ni que guiráʼ ni biʼniʼ apóstol Pedro. Peru zanda gudii Jehová stipa laanu para cadi guireʼnu gana (Sal. 94:​18, 19). Guzéʼtenu ejemplu stiʼ ti hermanu, ante gunibiaʼbe ni dxandíʼ gúcabe muxeʼ stale iza. Neca maʼ bisaanabe conducta inmoral ni gúpabe, nuu tiru runi sentirbe xiixa deseu malu. ¿Xi gucané laabe para cadi guiábabe ne cadi guireebe gana yaʼ? Laabe guniʼbe «Jehová rudii stipa laanu». Ne bizeeterube: «Racané espíritu stiʼ Jehová naa […], para cadi gusaanaʼ de sayaʼ […] lu neza ni dxandíʼ». Ne últimu bizeetebe: «Cudii Jehová lugar guneʼ ni ná […], ne neca peʼ nacaʼ ti binni ruchee cudiirube stipa naa». w23.09 23 párr. 12

Pa nácaluʼ ti joven, bietenalaʼdxiʼ caquiiñeʼ gúniluʼ stipa para gácaluʼ ti xpinni Cristu ni maʼ biniisi ndaaniʼ xquidxi Dios. Naquiiñeʼ guyúbiluʼ ejemplu galán ni zanda chinándaluʼ, guiníʼ íqueluʼ jneza, gácaluʼ ti binni ni zanda gápacabe confianza laa, guiziidiluʼ xiixa dxiiñaʼ ni zanda gúniluʼ ne chuʼluʼ listu para ni guizaaca despué. Ora guiníʼ íqueluʼ guiráʼ cosa ni naquiiñeʼ gúniluʼ, zándaca guiníʼ íqueluʼ stale peʼ ca ni. Peru cadi guireeluʼ gana, ¡zanda gúniluʼ ni! Cadi guiaandaʼ lii nuu Jehová gacané lii (Is. 41:​10, 13). Ne nuu ca hermanu ne hermana de congregación para gacanecaʼ lii. Ora maʼ nácaluʼ ti hombre casi ribeza Jehová la? zabániluʼ nayecheʼ. Guizáʼ nadxiidu lii ne racaláʼdxidu cuʼ Jehová ndaayaʼ guiráʼ stipa ni cayúniluʼ para gácaluʼ ti xpinni Cristu ni maʼ biniisi ndaaniʼ xquidxi Dios. w23.12 29 párr. 19, 20

Guníʼ ique nuuluʼ ra nuu caadxi hermanu ne gudixhe íquetu guireetu ti foto. Cumu racaláʼdxiluʼ gápaluʼ ti foto galán la? guleeluʼ chonna foto. Peru lu tobi de laacani biiyaluʼ cadi galán biree ti hermanu. Nga runi zuxhialuʼ ni ne ziaananeluʼ xhupa foto que, purtiʼ raqué cuxídxitu. Stale de laanu nápanu recuerdu galán de ora riuʼnu nayecheʼ né ca hermanu stinu. Peru zándaca tobi de ca biaje ca biʼniʼ ti hermanu xiixa o guníʼ xiixa ni cadi galán. ¿Xi zunineluʼ recuerdu ca yaʼ? ¿Xiñee qué guxhialuʼ ni casi ñácani ti foto yaʼ? (Efes. 4:32). Cumu nápanu stale recuerdu galán stiʼ hermanu ca la? zanda gúninu ni. Casi ñaca ñápanu puru si «ca foto galán ra biréʼnenu laabe». w23.11 12, 13 párr. 16, 17

Ca diidxaʼ griegu ni biquiiñebe raríʼ rusihuinni ca ni naquiiñeʼ gacu ca hermana lari jneza ne guiníʼ íquecaʼ ximodo ruuyaʼ xcaadxi laacaʼ. ¡Guizáʼ riéchenu ora ridúʼyanu rusihuinni ca hermana ca maʼ biniisicaʼ ndaaniʼ xquidxi Dios pur modo rácucaʼ lari! Gunna xii nga jneza ne ni cadi jneza, laani nga ti cualidad ni naquiiñeʼ gapa ti gunaa ni maʼ biniisi ndaaniʼ xquidxi Dios. Laaca cualidad riʼ nga guiníʼ ique chaahuinu ante gúninu xiixa, laa ni nga ni racané laanu gánnanu xii nga ni jneza ne ni cadi jneza ne quixhe íquenu gúninu ni jneza. Guidúʼyanu ejemplu stiʼ Abigaíl. Gucuaa xheelabe ti decisión ni cadi jneza, ne bidiibe cuenta pur laani zapa familia stibe ne ca ni nabeza ra lídxibe guendanagana. Nagueendaca bíʼnibe xiixa, ne cumu guníʼ ique chaahuibe ante gúnibe ni la? bilá stale binni (1 Sam. 25:​14-23, 32-35). Gánnanu xii nga ni jneza ne ni cadi jneza racané ni laanu gudiʼnu cuenta pora nga naquiiñeʼ guininu ne pora coʼ, ne guizaaláʼdxinu xcaadxi peru sin gusituinu lucaʼ (1 Tes. 4:11). w23.12 20 párr. 8, 9

Bicaa apóstol Pablo ca diidxaʼ riʼ para ca hermanu ni nuu Roma. Biziidicabe de Jehová ne de Jesús, bisihuínnicabe nápacabe fe ne gúcacabe xpinni Cristu. Ngue runi Dios guníʼ nácacabe binni nachaʼhuiʼ pur fe stícabe ne gulí laacabe né espíritu santu (Rom. 5:1). Dede dxi que bizulú gúpacabe ti esperanza guizáʼ sicarú ne ni dxandíʼ zaca. Despué, bisiene apóstol Pablo ca xpinni Cristu ungidu ni nabeza Éfeso de esperanza ni bidii Dios laacaʼ. Ne guniʼbe zacaacaʼ «ti herencia» (Efes. 1:18). Ne ca xpinni Cristu de Colosas gúdxibe laacaʼ paraa nuu esperanza sticaʼ. Guniʼbe: «Nuu ti esperanza para laatu guibáʼ» (Col. 1:​4, 5). Nga runi, ca xpinni Cristu ungidu nápacaʼ esperanza ziásacaʼ de lade gueʼtuʼ ne zabánicaʼ sin qué chuʼ dxi gáticaʼ guibáʼ ra zuni mandárnecaʼ Cristu (1 Tes. 4:​13-17; Apoc. 20:6). w23.12 9 párr. 4, 5

Diidxaʼ ni biquiiñecabe para «zápani» zeeda ni de ti diidxaʼ ni biquiiñecabe para guníʼcabe de ca soldadu ni rapa ti guidxi para cadi gucaalúcabe ni. Qué ridxibi ca binni que gásicaʼ purtiʼ nánnacaʼ cayapa ca soldadu que ca puertaʼ stiʼ guidxi que. Ngaca nga ni runi paz stiʼ Dios, rápani ladxidoʼno ne xquendabiaaninu, runi sentirnu seguru ne rápanu paz (Sal. 4:8). Ne neca qué gaca chaahuiʼ guendanagana ca nagueendaca la? zanda gatadxí ladxidoʼno cásica bizaaca Ana (1 Sam. 1:​16-18). Nga zacané laanu guiníʼ ique chaahuinu ne guicanu decisión jneza. ¿Xi naquiiñeʼ gúninu yaʼ? Cásica zanda guinabaʼ ti binni ni nabeza ndaaniʼ ti guidxi gapa ti soldadu laacaʼ la? zaqueca zanda guinábanu Jehová gapa laanu. Guni orarnu laabe dede ora maʼ guni sentirnu maʼ nápanu paz stibe (Luc. 11:9; 1 Tes. 5:17). Pa cadíʼdiluʼ lu ti guendanagana ni cayuniná lii, cadi gusaana de guni orarluʼ. Zuuyaluʼ ximodo zudii Jehová lii paz stiʼ, zapa ladxidoʼloʼ ne xquendabiaaniluʼ (Rom. 12:12). w24.01 21 párr. 5, 6

Guná Jesús guni huantar guninácabe laa, cuʼdícabe ne guiníʼcabe cosa ni cadi dxandíʼ de laa para guni santificar lá Bixhoze. Nánnabe bizuubabe diidxaʼ ne qué gápabe xi pur guituí lube (Heb. 12:2). Laaca nánnabe Binidxabaʼ ngue cutiidiʼ laabe lu ca guendanagana que (Luc. 22:​2-4; 23:​33, 34). Biyubi Binidxabaʼ modo nuxheleʼ Jesús de Jehová, peru qué ñanda ñúnibe ni. Bisihuinni Jesús rusiguii Binidxabaʼ ne napa Jehová xpinni ni qué zaxeleʼ de laa neca tídicaʼ lu guendanagana naroʼbaʼ. ¿Ñee racaláʼdxiluʼ gusiécheluʼ Jesucristu, Rey stiluʼ la? Pa zacá ni, cadi gusaana de gusisácaluʼ lá Jehová ne gucané xcaadxi gánnacaʼ ximodo peʼ nácabe. Zacá zinándaluʼ ejemplu stiʼ Jesús (1 Ped. 2:21). Ne cásica laabe, zusiécheluʼ ladxidóʼ Jehová ne zusihuínniluʼ guizáʼ rusiguii Binidxabaʼ, enemigu stibe. w24.02 11, 12 párr. 11-13

Lu gaayuʼ iza ni maʼ gudiʼdiʼ riʼ, maʼ guyuunisa jma de ti millón de binni ne yanna maʼ nácacaʼ testigu stiʼ Jehová. Para laanu, ¿xi riníʼ gaca dedicarnu Jehová? Riniʼni gácanu discípulo stiʼ Jesús ne gúninu ni ná Jehová primé lu xquendanabáninu. ¿Ximodo nga yaʼ? Jesús peʼ guníʼ: «Pa nuu tu racalaʼdxiʼ gaca xpinneʼ la? cadi guibani para laa» (Mat. 16:24). Diidxaʼ griegu ni guca traducir «cadi guibani para laa» laaca zanda gaca traducir ni sicaríʼ «cadi guni ni riuulaʼdxiʼ». Ora gaca dedicarluʼ Jehová, napa xidé gucaa naluʼ guiráʼ ni qué riuuláʼdxibe (2 Cor. 5:​14, 15). Ne lade ca ni zeeda «ca deseu stiʼ xcuerpu binni», casi inmoralidad sexual (Gál. 5:​19-21; 1 Cor. 6:18). ¿Ñee nagana ni la? Coʼ, qué zaca diʼ ni nagana pa nadxiiluʼ Jehová ne pa nuuluʼ seguru jneza ca norma stibe ne zacané ca ni lii (Sal. 119:97; Is. 48: 17, 18). w24.03 2 párr. 1; 3 párr. 4

Rudii Jehová espíritu santu stiʼ ca ni rusiecheʼ laa (Mat. 12:18). Guníʼ ique pregunta riʼ: «¿Ñee rusihuinneʼ napaʼ ca cualidad ni rudii espíritu santu la?». ¿Ñee nápaluʼ jma paciencia yanna que ante gunibiaʼluʼ Jehová la? Mientra jma gúʼyaluʼ cusihuínniluʼ ca cualidad stiʼ espíritu santu, jma ziuuluʼ seguru cayechené Jehová lii. Zulá rescate ca ca binni ni rusiecheʼ Jehová (1 Tim. 2:​5, 6). Peru ¿pa raca nagana para laanu guni crenu riuulaʼdxiʼ Jehová ni rúninu neca nápanu fe lu rescate ne maʼ guyuʼnísanu yaʼ? Cadi guiaandaʼ laanu, nuu biaje riguite ladxidoʼno laanu, peru nánnanu siempre zanda gápanu confianza Jehová. Para laabe la? naca ca ni napa fe lu rescate binni nachaʼhuiʼ, ne cayuni prometerbe zaguube ndaayaʼ laacaʼ (Sal. 5:12; Rom. 3:26). w24.03 30 párr. 15; 31 párr. 17