Octubre

¿Ñee raca nagana para lii guzuubaluʼ diidxaʼ la? Guyuu biaje laaca guca nagana para David guzuubaʼ diidxaʼ. Nga runi, gunábabe Dios: «Gucané naa gapaʼ deseu para guzuubaʼ stiidxaluʼ» (Sal. 51:12). Neca nadxii David Jehová, peru guyuu biaje guca nagana para laabe guzuubabe stiidxaʼ, laanu laaca rizaacanu zacá. ¿Xiñee yaʼ? Primé, cumu gulenenu donda la? raca nagana para laanu guzúʼbanu diidxaʼ. Guiropa, purtiʼ rucaa Binidxabaʼ laanu gudxiʼdéchenu Jehová cásica biʼniʼ ni (2 Cor. 11:3). Ne guionna, purtiʼ nabáninu lade binni ni qué riná guzuubaʼ diidxaʼ ni napa «espíritu ni rucaa binni guni cosa malu» (Efes. 2:2). Nga runi, para ganda guzúʼbanu stiidxaʼ Jehová ne stiidxaʼ ca ni maʼ bidiibe autoridad la? caquiiñeʼ gudxíʼlunu guendaruchee ni gulenenu, Binidxabaʼ ne guidxilayú riʼ. w23.10 6 párr. 1

¿Xi rusiidiʼ milagru ni biʼniʼ Jesús riʼ laanu yaʼ? Rusiidiʼ ni laanu gácanu humilde. Qué niníʼ diʼ Jesús laa biʼniʼ nisa que vinu. Qué ñuu dxi ñuni presumir Jesús pur ca cosa ni biʼniʼ. Sínuque gúcabe humilde ne siempre biyúbibe guisaca Bixhózebe (Juan 5:​19, 30; 8:28). Pa gácanu humilde casi Jesús la? qué zuni presumirnu xi guiráʼ huayúninu. Cadi guni presumirnu laanu cayúninu ni, sínuque siempre gusisácanu Dios (Jer. 9:​23, 24). Nga runi, gusisácanu Jehová purtiʼ laa nga racané laanu gúninu intiica cosa (1 Cor. 1:​26-31). Ti binni humilde qué ruyubi gusisácacabe laa pur ca cosa ni runi pur xcaadxi. Purtiʼ nánnabe ruuyaʼ ne rusisaca Jehová ni cayúnibe (bichaaga ni né Mateo 6:​2-4; Heb. 13:16). Pa gácanu humilde casi Jesús la? guizáʼ zusiéchenu Jehová (1 Ped. 5:6). w23.04 4 párr. 9; 5 párr. 11, 12

Guluu apóstol Pablo gana ca xpinni Cristu guizaaláʼdxicaʼ xcaadxi. ¿Ximodo zanda chinándanu conseju riʼ lu ca reunión ca yaʼ? Ra cadi guiaandaʼ laanu laaca racalaʼdxiʼ xcaadxi guni comentar. Para guiénenu ni, guzéʼtenu ti ejemplu. Ora maʼ caníʼneluʼ ca xhamíguluʼ diidxaʼ, cadi dxandíʼ laaca racaláʼdxiluʼ guiníʼcabe la? ngaca nga rizaaca lu ca reunión ca, racaláʼdxinu guiráʼ hermanu guni comentar. Ti modo cuʼnu gana ca hermanu stinu nga gudiʼnu lugar guni comentarcaʼ ne gusihuínnicaʼ fe sticaʼ (1 Cor. 10:24). Nga runi, para ganda guni comentar jma hermanu la? galán gaca ca comentariu stinu nachucu. Ne ora gudiiluʼ ti comentariu, cadi gusiéneluʼ stale puntu luni. Ne para ganda guni comentar xcaadxi hermanu la? cadi guiniʼluʼ ni cá lu guidubi párrafo ca. w23.04 22, 23 párr. 11-13

Galán guietenaláʼdxinu pabiáʼ risaca gacanenu xcaadxi ne jmaruʼ si ora guni predicarnu. Ora guni predicarnu caquiiñeʼ gúninu stipa guiénenu binni. Rinínenu binni ni napa gadxé gadxé creencia, de gadxé gadxé guidxi ne ni maʼ gadxé modo biniisicaʼ. Gunna apóstol Pablo modo chuʼ binni ne zanda guizíʼdinu de laabe. Guníʼ Jesús naca Pablo «apóstol ni rié ra nuu binni de xcaadxi guidxi» (Rom. 11:13). Ne para guni Pablo dxiiñaʼ que biʼniʼ predicarbe ca judíu, ca griegu, ca binni nuu xpiaaniʼ, ca campesinu, ca ni napa xiixa puestu risaca ne ca rey. Para chindabe ndaaniʼ ladxidóʼ ca binni riʼ, Pablo guníʼ: «Runeʼ intiica si ti ganda gulaʼyaʼ stale binni» (1 Cor. 9:​19-22). Biiyabe de padé binni ne xi runi cré ti zacá ganda gusiidibe laacaʼ. ¿Xi rizíʼdinu de ndiʼ yaʼ? Zanda cueendunu ni galán lu predicación pa gácanu naguudxi ne guiénenu binni ne guiníʼ íquenu xi peʼ nga caquiiñeʼ cada tobi de ca binni de territorio stinu. w23.07 23 párr. 11, 12

Ti binni nadóʼ la? cadi débil laa, sínuque nadipaʼ. ¿Xiñee yaʼ? Purtiʼ para gácaluʼ nachaʼhuiʼ o nadóʼ ora gucaalúcabe lii naquiiñeʼ gúniluʼ stipa para gucueezaluʼ laca lii. Ti binni nadóʼ napa «cualidad stiʼ espíritu» santu (Gál. 5:​22, 23). Diidxaʼ griegu ni raca traducir «nadóʼ» stale biaje biquiiñecabe ni para guiníʼcabe de ti caballu guiʼxiʼ ni maʼ bisidóʼcabe. Guendaridxagayaa ndiʼ, ¿njaʼ? Bisaana de gácame naduxhuʼ ne neca maʼ nadoʼme peru nadiparume. Yanna, ¿laanu yaʼ? ¿Ximodo gácanu nadóʼ ne cadi gusaana de gácanu nadipaʼ? Stúbinu la? qué zanda diʼ. Caquiiñeʼ guinábanu espíritu santu stiʼ Dios. Ne zanda gácanu nadóʼ purtiʼ stale binni maʼ biziidicaʼ gácacaʼ zacá. Stale de ca Testigu rusihuínnicaʼ cualidad riʼ ora chuʼ tu gucaalú laacaʼ, ne ndiʼ huayacané ni xcaadxi guidxagayaacaʼ modo naca ca Testigu (2 Tim. 2:​24, 25). w23.09 15 párr. 3

Biiyaʼ apóstol Juan cayuni adorar 24 ancianu Jehová guibáʼ lu ti visión. Cusisácacabe Dios ne caníʼcabe: «Lii nga runi merecerluʼ guicaaluʼ gloria, honra ne poder» (Apoc. 4:​10, 11). Laaca napa ca ángel ca stale razón para gusisácacaʼ Jehová. Purtiʼ nuunécabe laa guibáʼ ne runibiáʼ chaahuicabe laa. Ne pur ca cosa ni runi Jehová ruuyacabe ca cualidad ni napa ne riale de laacabe gusisácacabe laa (Job 38:​4-7). Laanu laaca naquiiñeʼ gusisácanu Jehová ora guinínenu laa. Ne rúninu ni ora rábinu laabe ca cosa ni jma riuuláʼdxinu de laabe ne xiñee nadxiinu laabe. Nga runi, ora guidúʼndanu ne guni estudiarnu Biblia gúninu stipa guidúʼyanu ca cualidad ni jma riuuláʼdxinu de laabe (Job 37:23; Rom. 11:33). De racá galán gábinu laabe xi runi sentirnu ora guiníʼ íquenu de ca cualidad stibe. Laaca zanda gusisácanu Jehová ora racané laanu ne ora racanebe ca hermanu stinu (1 Sam. 2:​1, 2). w23.05 3, 4 párr. 6, 7

Lu iza 1919, biree xquidxi Dios de lu náʼ Babilonia guidxi ro’, ca religión ni qué rusiidiʼ ni dxandíʼ. Ne lu iza que nga gulí Jesús mozo ni nuu xpiaaniʼ ne ni runi jneza, ne bizulú biʼniʼ dxiiñaʼ para ganda chuʼ ca binni ni nayá ladxidóʼ lu «Neza ni Nayá» que (Mat. 24:​45-47; Is. 35:8). Pur dxiiñaʼ ni guca ante que, ca ni guyuu lu neza que jma gunda biziidicaʼ de Jehová ne de ca ni naguixhe ique guni (Prov. 4:18). Ne laaca bichaacabe xquendanabánicabe para gúnicabe ni ná Jehová. Zaqué bichaacabe modo biénecabe caadxi cosa. Ra maʼ zidiʼdiʼ iza, gucané Jehová xquidxi guiene caadxi cosa. Guizáʼ ziéchenu ora guedandá dxi chuulaʼdxiʼ Jehová guiráʼ xixé ni gúninu. Para chuʼ ti neza nayá caquiiñeʼ ni mantenimientu. ¿Cadi dxandíʼ la? Nga runi dede lu iza 1919 cayaca dxiiñaʼ lu «Neza ni Nayá» que para ganda guiree jma binni de Babilonia guidxi roʼ. w23.05 17 párr. 15; 19 párr. 16

Ca hermanu ni nuu lu Grupu ni Zániru laapecaʼ cayuni capacitarcaʼ xcaadxi hermanu para gacané laacaʼ lu ca comité ni runi tendercaʼ. Napa ca hermanu ni racané laacabe stale responsabilidad ne cayúnicaʼ ti dxiiñaʼ galán. Rihuinni dxíchica maʼ nuu ca hermanu riʼ listu para gacanecaʼ ca dendxuhuiiniʼ stiʼ Cristu. Ora maʼ nuu guiráʼ ca ungidu guibáʼ ne mayaca guiluxe gran tribulación, qué zusaana de guni adorar xquidxi Dios laa lu Guidxilayú riʼ. Cumu Jesús nga líder stiʼ xquidxi Dios la? qué zadxíbicabe ne qué zabisácabe. Dxandíʼ, neca tiempu ca zuyubi ti grupu de guidxi roʼ gunítiluʼ xquidxi Dios, ne Biblia ribee laani «Gog de Magog» (Ezeq. 38:​18-20). Peru cadi xadxí diʼ zucaalúcabe xquidxi Dios, qué zanda gucueezacabe laacaʼ de guni adorarcaʼ laabe. Nanna dxíchinu zulá Jehová xquidxi. Lu ti visión biiyaʼ apóstol Juan «stale binni» ni nuu lu grupu de xcaadxi dendxuʼ stiʼ Cristu, ne guyuu tu gudxi laabe «stale binni» riʼ nga «ca ni gudiʼdiʼ lu stale yuubaʼ» o lu «gran tribulación». Nga rusihuinni ziuu tu zapa laacabe (Apoc. 7:​9, 14; nota). w24.02 5, 6 párr. 13, 14

Yanna ¿xi zanda gúninu para gudii Jehová laanu espíritu santu stiʼ ya? Naquiiñeʼ guinábanu ni laabe, guidúʼndanu Stiidxabe ne cadi guixélenu de organización stibe. Pa gúninu ca cosa riʼ, zápanu ca «cualidad stiʼ espíritu» (Gál. 5:​22, 23). Para gudii Jehová laanu espíritu stiʼ, naquiiñeʼ gúninu ne guiníʼ íquenu puru si ni jneza. Pa guiníʼ íquenu ni cadi jneza ne gúninu ca ni la? zaxha Dios laanu espíritu stiʼ (1 Tes. 4:​7, 8). ¿Xi sti cosa naquiiñeʼ gánnanu yaʼ? Apóstol Pablo guníʼ: «Cadi guni despreciartu ca profecía» (1 Tes. 5:20). Lu versículo riʼ, diidxaʼ «profecía» riníʼ ni de ca mensaje ni bidii Dios ra biquiiñeʼ espíritu stiʼ. Lade ca ni riete de dxi stiʼ Jehová ne pabiáʼ maʼ gaxha nuu ni. Laanu qué riníʼ íquenu cayaadxaʼ stale para gueeda dxi stiʼ Jehová o qué zadúʼyanu dxi gueeda Armagedón, sínuque riníʼ íquenu maʼ cadi candaa para gueeda dxi stiʼ Jehová. Nga runi, rúninu stipa gaca conducta stinu nayá ne rúninu cosa ni rusihuinni runi adorarnu Dios (2 Ped. 3:​11, 12). w23.06 12 párr. 13, 14

¿Xi caquiiñeʼ guni ti xpinni Cristu pa málasi guihuinni ti imagen de diidxaʼ guidxa lu teléfono o tableta stiʼ yaʼ? Caquiiñeʼ gusaana de gúʼyabe ni oraqueca. Ne ni zacané laanu gúninu ni nga, guietenaláʼdxinu ni jma risaca para laanu nga gaca xhamígunu Jehová. Laaca cadi galán guidúʼyanu ca imagen ni zanda gucaa laanu guiníʼ íquenu cosa ni cadi jneza neca ruluíʼ cadi pornografía ni. ¿Xiñee yaʼ? Purtiʼ qué racaláʼdxinu tidiʼ ndaaniʼ íquenu guni cometernu pecadu sexual (Mat. 5:​28, 29). Ti ancianu de guidxi Tailandia láʼ David, guníʼ: «Gatigá riníʼ iqueʼ: “¿Ñee ziuulaʼdxiʼ Jehová guuyaʼ ca imagen riʼ neca ruluíʼ cadi de diidxaʼ guidxa ca ni la?”. Guiníʼ iqueʼ zacá huayacané ni naa guicaaʼ decisión jneza». Pa guizíʼdinu guidxíbinu Jehová, jma qué zaca nagana para laanu guicaanu decisión ni riuuláʼdxibe. w23.06 23 párr. 12, 13

Ca diidxaʼ «ca cuartu stitu» zándaca caníʼ ni de ca congregación ca. Pa qué gusaana de guninenu ca hermanu stinu xhiiñaʼ Jehová ca dxi nagana ca la? zápabe laanu casi maʼ biʼniʼ prometerbe ni. Nga runi cadi caquiiñeʼ si guni huantarnu ca hermanu stinu, sínuque gúninu stipa gusihuínninu dxandíʼ nadxiinu laacabe. Ne risaca gúninu ni para guilanu. Zaca «dxi roʼ stiʼ Jehová» ca dxi jma nagana para binni guidxilayú (Sof. 1:​14, 15). Laaca zápanu guendanagana laanu ca xpinni Jehová. Peru pa chuʼnu listu dede ca yanna la? zanda gatadxí ladxidoʼno ne zanda gacanenu xcaadxi. Guni huantarnu, zacané ni laanu gudxíʼlunu intiica guendanagana gueeda. Pa guianu xcaadxi, zucaa ni laanu gúninu guiráʼ ni nuu lu nanu, gacanenu ca hermanu stinu ora peʼ caquiiñeʼ ca ni ne gudiʼnu laacaʼ ni caquiiñecaʼ. Ne guendarannaxhii ni maʼ nápanu ca hermanu stinu, zacané ni laanu chuʼnu tobi si. Ne zaguu Jehová ndaayaʼ laanu ra gudii laanu guendanabani ni qué zaluxe ndaaniʼ ti guidxilayú ra maʼ qué ziuu desastre ne maʼ guirutiʼ zietenalaʼdxiʼ ca yuubaʼ gudiʼdiʼ (Is. 65:17). w23.07 7 párr. 16, 17

Lu Biblia riete de ca xpinni Jehová de dxiqué casi binni ni napa stale stipa. Peru guyuu ora dede ca ni jma nadipaʼ biʼniʼ sentircaʼ cayaadxaʼ stipa laacaʼ. Guzéʼtenu chupa ejemplu, casi rey David, neca guca nadxibalú ne «nadipaʼ casi ti dani», peru guyuu ora biʼniʼ sentirbe qué gápabe stipa ne bidxíbibe (Sal. 30:7). Ne Sansón la? guizáʼ gupa stipa ora rudii Jehová laa espíritu stiʼ, peru nánnabe sin stipa ca zácabe «débil cásica xcaadxi hombre» (Juec. 14:​5, 6; 16:17). Yanna, ¿tu bidii stipa ca hombre nachaʼhuiʼ riʼ yaʼ? Jehová. Nanna apóstol Pablo caquiiñeʼ stipa ni rudii Jehová (2 Cor. 12:​9, 10). Laaca guca huarabe (Gál. 4:​13, 14). Ne laaca bíʼnibe stipa pur gúnibe ni jneza (Rom. 7:​18, 19). Ne guyuu biaje guyuube xizaa ne bidxíbibe gátibe (2 Cor. 1:​8, 9). Neca zacá, guniʼbe: «Ora qué gapaʼ stipa, óraque nga jma napaʼ poder». ¿Ximodo gunda guca nga yaʼ? Purtiʼ bidii Jehová laabe stipa ni caquiiñebe, ne zaqué nga biʼniʼ laabe ti binni nadipaʼ. w23.10 12 párr. 1, 2

Pa chuʼ ora guni sentirnu qué risácanu la? guietenaláʼdxinu Jehová nga bichiña laanu ndaaniʼ xquidxi (Juan 6:44). Ruuyabe ca cualidad galán ni nápanu, neca laanu qué ridúʼyanu ca ni, ne nánnabe ximodo peʼ laanu (2 Crón. 6:30). Nga runi, ora riniʼbe risácanu la? zanda guni crenu laabe (1 Juan 3:​19, 20). Zándaca dede yanna runi sentir caadxi de laanu nápanu donda pur ca cosa ni bíninu ante guizíʼdinu ni dxandíʼ (1 Ped. 4:3). Nuu xcaadxi maʼ xadxí de cayúnicaʼ ni ná Jehová peru cayúnicaʼ stipa gudxiilucaʼ ca debilidad ni nápacaʼ. ¿Lii yaʼ? ¿Huayuni sentirluʼ qué zuni perdonar Jehová lii la? Pa zacá ni la? zatadxí ladxidoʼloʼ ora gánnaluʼ laaca biʼniʼ sentir caadxi xpinni Jehová zacá. Casi apóstol Pablo, guizáʼ biuubaʼ ladxidóʼ ora guníʼ ique guiráʼ ra bichee (Rom. 7:24). Neca guca arrepentirbe de ca pecadu stibe ne guyuunísabe, biʼniʼ sentirbe laabe «nga ni jma nahuiiniʼ lade ca apóstol» ne «ni jma pecador» (1 Cor. 15:9; 1 Tim. 1:15). w24.03 27 párr. 5, 6

Pur ca decisión ni cadi jneza gucuaa rey Jehoás, zanda guizíʼdinu ti cosa risaca: naquiiñeʼ cuinu tu gaca xhamígunu, binni ni zanda gacané laanu, ca ni nadxii ne racaláʼdxicaʼ gusiéchecaʼ ladxidóʼ Jehová. Ne laaca zanda gápanu xhamígunu ni jma huaniisi o jma nahuiiniʼ que laanu. Bietenalaʼdxiʼ jma nahuiiniʼ Jehoás que Jehoiadá. Yanna, guníʼ ique ca xhamíguluʼ ne gunabadiidxaʼ ndiʼ lii: «¿Ñee racanécabe naa para gapa jma fe Jehová la? ¿Ñee riguucabe gana naa para guibaneʼ modo ná Jehová la? ¿Ñee riuuláʼdxicabe guiníʼcabe de Jehová ne de ni ruundacabe de lu Biblia? ¿Ñee runi respetárcabe ca ley stiʼ Jehová la? ¿Ñee rábicabe naa ora runeʼ xiixa cosa ni cadi jneza la? o qué rábicabe naa gastiʼ?» (Prov. 27:​5, 6, 17). Ni dxandíʼ la? cadi caquiiñeluʼ amigu ni cadi nadxii Jehová. Peru pa ca xhamíguluʼ nadxii Jehová la? cadi guixéleluʼ de laacaʼ purtiʼ qué zusaana de gacanecaʼ lii (Prov. 13:20). w23.09 9, 10 párr. 6, 7

Ruzulú alfabeto griegu né letra Alfa, ne riluxené ni letra omega. Cumu Jehová nga «Alfa ne Omega» la? rusihuínnini ora ruzulube xiixa la? runduuxebe ni. Despué de bizáʼ Jehová Adán ne Eva, gúdxibe laacaʼ: «Lagapa xiiñitu ne lagaca stale, laguchá guidxilayú riʼ ne laguni dxiiñaʼ luni”» (Gén. 1:28). Ra guníʼ Jehová ni naguixhe ique guni, raqué nga casi ñaca niniʼbe «Alfa». Ziuu dxi zaca ca ni zá de Adán ne Eva perfectu ne zuzuubacaʼ diidxaʼ, zuchacaʼ guidxilayú riʼ de xiiñicaʼ ne zúnicaʼ ni ti paraísu. Ne ora gaca nga casi ñaca niníʼ Jehová «Omega». Ne despué de bizáʼ Jehová «guibáʼ ne Guidxilayú ne guiráʼ ni nuu ndaaniʼ ca ni», guníʼ Jehová xiixa para gusihuinni dxandíʼ peʼ zuni ni maʼ gudixhe ique. Guleechú Jehová dxi gadxe para guni cumplir ni maʼ gudixhe ique para binni ne para Guidxilayú. Ne ra guiluxe dxi gadxe ca, ra ca nga gaca cumplir guiráʼ ni maʼ gudixhe ique Jehová (Gén. 2:​1-3). w23.11 5 párr. 13, 14

Tapa beeu zandaa para chindácabe Jerusalén ne nagana chindácabe pur neza que. Peru Jehová gudxi laacabe zuni neza que galán. Qué ñaca nagana para ca judíu ni nadxii Jehová nicaacaʼ decisión de nibiguétacaʼ Jerusalén. Gastiʼ ti templu ra guni adorárcabe Jehová Babilonia. Nga runi para laacabe ti ndaayaʼ nga guibiguétacabe, purtiʼ raqué maʼ zanda gúnicabe ni ná Ley stiʼ Moisés ne gudiicabe sacrificiu Jehová. Ne laaca ti ndaayaʼ ni para laacabe purtiʼ huaxiéʼ si tu runi adorar Jehová ndaaniʼ guidxi Babilonia. Ngue runi guizáʼ maʼ racalaʼdxiʼ ca judíu ni nadxii Jehová guibiguétacaʼ xquídxicaʼ ne gúʼyacaʼ gaca adorar Jehová jneza. w23.05 14, 15 párr. 3, 4

Caquíʼñenu gacané espíritu santu stiʼ Dios laanu para guibáninu «casi nabani ca xiiñiʼ biaaniʼ». ¿Xiñee yaʼ? Purtiʼ nagana nga chuʼnu nayá ndaaniʼ guidxilayú biidiʼ riʼ (1 Tes. 4:​3-5, 7, 8). Zanda gacané espíritu santu laanu cadi guicá modo riníʼ ique binni guidxilayú laanu, purtiʼ nánnanu cadi jneza ruuyaʼ Jehová modo riníʼ íquecabe. Ne laaca zanda gacané ni laanu «gácanu nachaʼhuiʼ, gúninu ni jneza ne guininu ni dxandíʼ» (Efes. 5:9). Jesús guníʼ zudii Jehová «espíritu santu ca ni guinabaʼ ni laa» (Luc. 11:13). Ne para ganda gudiibe ni laanu naquiiñeʼ guinábanu ni laabe lu oración. Laaca rudii Jehová laanu espíritu stiʼ ora rusisácanu laa lu ca reunión stinu (Efes. 5:​19, 20). Zanda gacané espíritu santu laanu guibáninu modo riuulaʼdxiʼ Dios. w24.03 23, 24 párr. 13-15

¿Caquiiñeʼ gápaluʼ jma paciencia la? Gunabaʼ Jehová gacané lii. Zeeda gaca paciencia ca tobi de ca cualidad stiʼ espíritu santu (Gál. 5:​22, 23). Nga runi, zanda guinábanu Jehová gudii laanu espíritu santu ne gacanebe laanu gápanu ca cualidad ni rudii ni. Pa cadídinu lu xiixa guendanagana ne raca nagana para laanu gápanu paciencia la? cadi gusaana de guinábanu Jehová espíritu santu stiʼ (Luc. 11:13). Ne laaca zanda guinábanu laabe gacanebe laanu gúʼyanu ca cosa ca casi ruuyabe ca ni. Ne despué de guni orarnu la? gúninu guiráʼ ni nuu lu nanu para gápanu paciencia guiráʼ dxi. Pa cadi gusaana de guinábanu gacané Jehová laanu ne gúninu stipa pur guluinu cualidad riʼ la? chaahuiʼ chaahuiʼ zápanu jma paciencia. Laaca galán gúninu guiníʼ íquenu lu ca ejemplu zeeda lu Biblia. Riete lu Biblia ejemplu stiʼ binni ni gupa paciencia. Pa guiníʼ íquenu lu ca ejemplu riʼ la? zanda guizíʼdinu gusihuínninu cualidad riʼ. w23.08 22 párr. 10, 11

Gudxi Jesús apóstol Pedro qué zusaana Jehová de gapa laabe. Dxi maʼ biasa Jesús de lade guetu que, biʼniʼ ti milagru para ganda guinaazeʼ Pedro ne xcaadxi apóstol que stale benda (Juan 21:​4-6). Nanna dxíchinu ra biʼyaʼ Pedro milagru riʼ biene zanda gudii Jehová laa guiráʼ ni caquiiñeʼ. Zándaca óraque bietenalaʼdxiʼ Pedro gudxi Jesús laa zapa Jehová ca ni qué gusaana de guyubi Reinu stiʼ Dios (Mat. 6:33). Yanna, cumu maʼ nánnabe ngue la? gudixhe íquebe gúnibe xhiiñaʼ Dios primé lu xquendanabánibe ne cadi negocio benda que. Ngue runi lu Pentecostés stiʼ iza 33 que, né stale valor guniʼbe nezalú stale binni ne gucanebe laacaʼ gácacaʼ xpinni Cristu (Hech. 2:​14, 37-41). Ne despué gucanebe stale samaritanu ne binni de xcaadxi guidxi para gácacaʼ discípulo stiʼ Cristu (Hech. 8:​14-17; 10:​44-48). Raca ridúʼyanu nabé biquiiñeʼ Jehová Pedro para ganda gacané stale binni de guiráʼ clase chuʼ ndaaniʼ congregación stiʼ Dios. w23.09 20 párr. 1; 23 párr. 11

Biaʼ chupa iza despué de binitilú ca babilonio Jerusalén, ti gueelaʼ guníʼ xcaandaʼ rey Nabucodonosor ti bacaandaʼ guizáʼ feu ne ni bichibi laa, biiyabe ti estatua naroʼbaʼ. Ngue runi biseendacaabe ca binni nuu xpiaaniʼ de guidxi Babilonia, ládecaʼ zeeda Daniel, para guiniʼcaʼ xi guníʼ xcaandabe ne xi riníʼ bacaandaʼ que. Ne pa qué gúnicabe ni zuutibe laacaʼ (Dan. 2:​3-5). Ngue runi Daniel nagueendaca biʼniʼ xiixa, «gunábabe rey que gudii tiempu laabe para ganda gábibe laa xi riníʼ bacaandaʼ que» (Dan. 2:16). Ni bíʼnibe riʼ bisihuinni ni nápabe fe ne valor. ¿Xiñee yaʼ? Purtiʼ lu Biblia qué ruzeeteʼ pa rusiene Daniel bacaandaʼ. Guniʼné Daniel chonna de ca xhamigu, ne gunábabe laacaʼ guni orarcaʼ ne guinábacaʼ «guiá Dios ni nuu guibáʼ laacaʼ ne guluíʼ laacabe ni ná bacaandaʼ que» (Dan. 2:18). Bicabi Jehová ca oración stícabe ne gucanebe Daniel para ganna xi riníʼ bacaandaʼ stiʼ Nabucodonosor que. ¡Maʼ qué ñati Daniel ne ca xhamigu! w23.08 3 párr. 4

Guiníʼ íquenu ni ricaanu ora nápanu paciencia. Racané paciencia ca laanu chuʼnu nayecheʼ ne gatadxí ladxidoʼno. Nga runi, zanda guininu racané ni laanu chuʼnu nazaaca ne cadi chuʼ xiixa ni guniná xquendabiaaninu. Ne laaca racané ni chuʼnu galán né xcaadxi ne chuʼ congregación tobi si. Pa qué guidxiichinu nagueendaca ora tuuxa guchiichi laanu zucueeza ni guiroobaʼ guendanagana que (Sal. 37:​8, nota; Prov. 14:29). Peru ndaayaʼ ni jma naroʼbaʼ ni rápanu nga rinándanu ejemplu stiʼ Bixhózenu ni nuu guibáʼ ne riuunu jma gaxha de laabe. Casi maʼ bidúʼyanu naca paciencia ca ti cualidad nabé sicarú. Ne nuu biaje raca nagana gusihuínninu ni, zacané Jehová laanu ganda gápanu cualidad riʼ. Laga cabézanu né stale paciencia guedandá guidxilayú cubi ca, zanda ganna dxíchinu «Cayuuyaʼ Jehová ca ni ridxibi laa, ca ni cabeza cadi gusaana de gannaxhiibe laacaʼ» (Sal. 33:18). Nga runi, guiranu quixhe íquenu gápanu paciencia. w23.08 22 párr. 7; 25 párr. 16, 17

Bisiene Santiago zanda guiníʼ ti binni napa fe, peru pur ni runi qué rusihuinni ni (Sant. 2:​1-5, 9). Laaca guniʼbe de tuuxa ni guʼyaʼ ti biʼchiʼ o ti bizanaʼ caquiiñeʼ lari o ni gó peru qué rúnibe gastiʼ para gacanebe laa. Neca guiniʼbe nápabe fe peru pa cadi cusihuínnibe ni pur ni cayúnibe la? cadi dxandíʼ diʼ fe stibe (Sant. 2:​14-16). Bizeeteʼ Santiago ejemplu stiʼ Rahab para guiníʼ de tuuxa ni rusihuinni napa fe pur ca ni runi (Sant. 2:​25, 26). Maca binadiaga gunaa riʼ de Jehová ne nánnabe laa nga cayacané ca israelita (Jos. 2:​9-11). ¿Xi bíʼnibe para gusihuínnibe nápabe fe Jehová yaʼ? Bicaachibe chupa israelita ni canagundaachiʼ guidxi que para cadi guuticabe laacaʼ. Pur ni bíʼnibe riʼ, biiyaʼ Jehová laabe cásica Abrahán neca nácabe ti gunaa ni ruchee ne cadi nácabe israelita. Rusiidiʼ ejemplu stibe laanu nabéʼ risaca nga gusihuínninu nápanu fe pur ca ni rúninu. w23.12 5, 6 párr. 12, 13

Laanu, ca xpinni Cristu, qué racaláʼdxinu gánnanu ti luguiáʼ si ni zeeda lu Biblia. Racaláʼdxinu guizíʼdinu «dede ca cosa stiʼ Dios ni jma nagana» ne zacané espíritu santu laanu gúninu ni (1 Cor. 2:​9, 10). ¿Xiñee qué quixhe íqueluʼ gúʼndaluʼ xiixa para guidxíñaluʼ jma gaxha de Jehová lu estudiu personal stiluʼ yaʼ? Nuu stale ni zanda gúʼndaluʼ. Zanda guni investigarluʼ ximodo gunnaxhii Jehová ca xpinni de dxiqué ne ximodo rusihuínnibe laaca nadxiibe lii. Laaca zanda guni estudiarluʼ modo gudixhe chaahuiʼ Jehová guni adorárcabe laa ndaaniʼ guidxi Israel ne bichaaga ni modo runi ca xpinni Cristu yanna. O dede zanda guni estudiar chaahuiluʼ ca profecía ni guca cumplir dxi bibani Jesús lu Guidxilayú riʼ ne dxi biʼniʼ predicar. Nanna dxíchidu guizáʼ ziuuláʼdxiluʼ guni estudiarluʼ ca tema casi laacani ra iquiiñeluʼ Índice de las publicaciones Watch Tower ne Ca tema ni huabee ca testigu stiʼ Jiobá. Pa gúniluʼ ni la? zuquidxi ni fe stiluʼ ne zunibiáʼ chaahuiluʼ Dios. (Prov. 2:​4, 5) w23.10 18, 19 párr. 3-5

Diidxaʼ griegu ni biquiiñeʼ apóstol Pedro para «gannaxhiisaatu» riniʼni «gannaxhiitu stale» o «ni rigaa». Lu guiropa ndaa stiʼ versículo riʼ caniʼni xi rizaaca ora rannaxhiinu stale: ruchii ni ca pecadu stiʼ ca hermanu stinu. Guendarannaxhii ca zeeda gácani casi ti lari ni zanda gusigaaluʼ dede guchiini cadi tobi o chupa pecadu si, sínuque stale pecadu. Lu nota stiʼ versículo riʼ zeeda diidxaʼ ruchii, ni riníʼ «guni perdonarnu». Cásica zanda guchii ti ndaa lari ti mancha la? zacaca zanda guchii guendarannaxhii ca ra cuchee ca hermanu stinu. Pa laanu gannaxhiinu ca hermanu stinu stale la? nga zucaa laanu guni perdonarnu ni gúnicaʼ laanu neca gácani nagana para laanu (Col. 3:13). Ora runi perdonarnu xcaadxi, rusihuínninu guizáʼ nadxiinu ne racaláʼdxinu gusiéchenu Jehová. w23.11 11, 12 párr. 13-15

Dxi napa Josías 26 iza, bizulú biʼniʼ chaahuiʼ templu que. Laga cayúnicabe dxiiñaʼ que bidxélacabe «libru stiʼ Ley stiʼ Jehová, ni bidii Moisés guidxi que». Ne ora binadiaga rey que ni ná libru que, nagueendaca bichaa para guni ni ná Ley stiʼ Jehová (2 Crón. 34:​14, 19-21). ¿Ñee ñuuláʼdxiluʼ ñuundaluʼ Biblia la? ¿Ñee cayúniluʼ stipa para gúniluʼ ni la? Pa cayúniluʼ stipa para gúniluʼ ni, ¿ñee cayuuláʼdxiluʼ ni la? ¿Ñee cayúniluʼ xiixa para cadi gusiaandaluʼ ca versículo ni zanda gacané lii la? Dxi napa Josías 39 iza la? gucuaabe ti decisión ni cadi jneza ne pur ngue guutibe. Qué ninábabe ñacané Jehová laabe, sínuque bíʼnibe ni para laabe biaʼsi (2 Crón. 35:​20-25). ¿Xi rusiidiʼ ndiʼ laanu yaʼ? Biaʼ tiica iza nápanu o biaʼ tiica tiempu nápanu de cayúʼndanu Biblia, naquiiñeʼ guyúbinu Jehová. Ne para guyúbinu Jehová la? naquiiñeʼ guyúbinu gacanebe laanu, guidúʼndanu Stiidxabe ne gucaadiáganu conseju ni gudii ca hermanu laanu. Pa gúninu ndiʼ, zándaca gacané ni laanu para cadi guicaanu decisión ni cadi jneza ne zabáninu nayecheʼ (Sant. 1:25). w23.09 12 párr. 15, 16

Lu Biblia zeeda ejemplu stiʼ stale gunaa ni gunnaxhii Jehová ne bíʼnicaʼ ni nabe. Gúcacabe gunaa ni gupa xpiaʼ lu guiráʼ ni biʼniʼ ne gúcacabe fiel lu guiráʼ cosa (1 Tim. 3:11). Ndaaniʼ congregación laaca nuu stale hermana ni maʼ biniisi ndaaniʼ xquidxi Dios ne zanda guiziidiluʼ stale cosa de laacaʼ. Pa nácaluʼ ti hermana joven la? guníʼ ique de ca hermana ni naca ti ejemplu galán para lii ne gudixhe ique gácaluʼ casi laacabe. Para nga la? biiyaʼ ca cualidad galán ni nápacabe ne guníʼ ique ximodo zanda gápaluʼ ca ni. Humildad ca nga ti cualidad ni naquiiñeʼ gapa ti gunaa ni maʼ biniisi ndaaniʼ xquidxi Dios. Ti gunaa humilde raca xhamiga Jehová ne laaca raca xhamiga xcaadxi binni. Cumu humilde laabe ne nadxiibe Bixhózebe ni nuu guibáʼ la? rinándabe principiu de autoridad ni maʼ gudixhe Dios de tuu nga naquiiñeʼ guni dirigir congregación ne tu gaca xaíque ndaaniʼ familia (1 Cor. 11:3). w23.12 18, 19 párr. 3-5

Ribeza Jehová gannaxhii hombre xheelaʼ, gudii ni caquiiñebe, guiene laabe ne gacané laabe chuʼbe gaxha de Jehová (Efes. 5:​28, 29). Guiníʼ íqueluʼ jneza, guni respetarluʼ ca gunaa ne gácaluʼ ti binni de confianza, zacané ca ni lii chuʼluʼ listu para gápaluʼ xheelaluʼ. Pa guichaganaluʼ la? zándaca zápaluʼ xiiñiluʼ. Zanda guiziidiluʼ de ejemplu stiʼ Jehová para gácaluʼ ti buen padre (Efes. 6:4). Gastiʼ qué nucueeza Jehová ne gúdxibe Jesús, xiiñibe, nadxiibe laa ne riéchebe pur ni runi (Mar. 1:11). Pa gueeda gápaluʼ xiiñiluʼ galán gápaluʼ costumbre de gábiluʼ laacabe nadxiiluʼ laacabe ne guni felicitarluʼ laacabe ora gúnicabe ca cosa ca jneza. Ca binni ni rinanda ejemplu stiʼ Jehová racanecaʼ ca xiiñicaʼ gácacaʼ xpinni Cristu ni maʼ biniisi ndaaniʼ xquidxi Dios. ¿Ximodo zanda chuʼluʼ listu dede ca yanna ti ganda gusiniisiluʼ ca xiiñiluʼ jneza yaʼ? Ra gácaluʼ nachaʼhuiʼ né familia stiluʼ ne ca hermanu de congregación ne guiziidiluʼ guiniʼluʼ nadxiiluʼ laacaʼ ne rusisácaluʼ laacaʼ (Juan 15:9). w23.12 28, 29 párr. 17, 18

Laanu, ca xpinni Jehová, laaca ridxaagalunu guendanagana ne raca huaranu cásica guiráʼ binni. Ne cadi ngasi, laaca naquiiñeʼ guni huantarnu ora gucaalú o sanándacaʼ ca ni nanalaʼdxiʼ xquidxi Dios laanu. Dxandíʼ, qué rucueeza diʼ Jehová guizaacanu cosa malu, peru maʼ guniʼbe zacanebe laanu (Is. 41:10). Pa nuu Jehová gaxha de laanu zanda chuʼnu nayecheʼ, zanda guicaanu decisión jneza ne qué zaxélenu de laabe ora cadídinu lu guendanagana. Biblia cayabi laanu «zudii Dios laatu paz stiʼ» ne Jehová nga cayuni promesa ca (Filip. 4:​6, 7). Paz riʼ nga ora nexhedxí ladxidoʼno ne xquendabiaaninu purtiʼ naca Jehová xhamígunu. Nabé sicarú paz riʼ «dede guirutiʼ zanda guiene [o guiníʼ ique] ximodo ni». ¿Ñee huayúniluʼ ti oración de guidubi ladxidoʼloʼ ne despué dede bidxagayaaluʼ ora bidiiluʼ cuenta ximodo gutadxí ladxidoʼloʼ la? Pue nga nga «paz stiʼ» Dios. w24.01 20 párr. 2; 21 párr. 4

Ca ni dxandíʼ nadxii Dios la? rusisácacaʼ labe de guidubi ladxidoʼcaʼ. Biene rey David ra gusisaca lá Jehová laaca cusisaca Jehová. Ora guininu de lá Jehová, casi xa ñaca nininu modo nácabe, ca cualidad stibe ne ca cosa galán ni maʼ bíʼnibe. Biyubi David modo gusisaca lá Bixhoze ne cadi gaca biidiʼ ni. Guniʼbe guidubi nácabe zúnibe ni, de guidubi ladxidoʼbe. Laaca biyubi ca levita modo gusisácacaʼ Jehová. Bidiicabe cuenta caquiiñeʼ gúnicabe xiixa para gusisácacabe lá Jehová ne cadi guiniʼsícabe ni (Neh. 9:5). ¡Guníʼ ique pabiáʼ nayecheʼ biʼniʼ sentir Jehová ora binadiaga cayuundacabe né stale gana ne de guidubi ladxidóʼcabe para laa! w24.02 9 párr. 6

Jehová qué zaníʼ ique maʼ bicheeluʼ purtiʼ si qué ñanda nugaandaluʼ meta stiluʼ (2 Cor. 8:12). Biiyaʼ xi zanda guiziidiluʼ de ca cosa ni rucueeza lii. Cadi guianda lii ca ni maʼ bigaandaluʼ. Biblia ná: «Jneza runi Dios ne qué zusiaandaʼ guiráʼ ni maʼ bíʼnitu» (Heb. 6:10). Nga runi, lii laaca cadi gusiaandaluʼ ca ni. Guníʼ ique ca ni maʼ gunda bíʼniluʼ, maʼ nácaluʼ xhamigu Jehová, rusiidiluʼ binni de laabe, runi predicarluʼ o maʼ guyuu nizaluʼ. Rusihuinni guiráʼ ca meta ni maʼ bigaandaluʼ ca zándaruʼ guiniisiluʼ ndaaniʼ xquidxi Jehová ne zanda ugaandaluʼ ca meta ni naguixhe íqueluʼ gúniluʼ. Zacané Jehová lii ganda ugaandaluʼ ca meta stiluʼ. Zanda chuʼluʼ nayecheʼ laga cayúniluʼ stipa ugaandaluʼ ca meta stiluʼ pa guyadxiluʼ ximodo cayacané ne caguu Jehová ndaayaʼ lii (2 Cor. 4:7). Pa cadi guireeluʼ gana la? zacaaluʼ jma ndaayaʼ de ni cabézaluʼ (Gál. 6:9). w23.05 31 párr. 16-18

Riuulaʼdxiʼ Jehová gusihuinni nadxii ca xpinni ne riechené laacabe. Lu Biblia riete chupa biaje gudxi Jehová Jesús laa nga Xiiñibe ni nadxiibe ne ni rusiecheʼ laabe (Mat. 3:17; 17:5). ¿Ñuuláʼdxiluʼ niníʼ Jehová rusiécheluʼ laa la? Dxandíʼ, qué riníʼnebe laanu dede guibáʼ, peru riquiiñebe Stiidxabe para gúnibe ni. Ora ridúʼndanu ca diidxaʼ sicarú ni gudxi Jesús ca discípulo stiʼ, runi sentirnu casi ora Jehová nga cayabi laanu ca diidxaʼ ca. Yenanda Jesús ejemplu stiʼ Bixhoze. Nga runi, ora ridúʼndanu gudxi Jesús ca discípulo stiʼ pabiáʼ nadxiibe laacaʼ neca binni ruchee laacaʼ la? zanda guiníʼ íquenu cayabi Jehová laanu ca diidxaʼ ca (Juan 15:​9, 15). Ora tídinu lu xiixa prueba, cadi guiníʼ íquenu maʼ cadi cayechené Dios laanu, sínuque guidúʼyanu prueba ca casi ti oportunidad para gusihuínninu pabiáʼ nadxiinu ne nápanu confianza laabe (Santiago 1:12). w24.03 28 párr. 10, 11