Septiembre

Maʼ bidii Dios poder Jesús para cuee guiráʼ ca guendanagana ni cayuniná binni. Jesús si zanda cuee ca guendanagana ni napa binni. ¿Xiñee yaʼ? Purtiʼ nápabe poder para cueebe pecadu, guendahuará ne guendaguti (Mat. 9:​1-6; Rom. 5:​12, 18, 19). Bisihuinni ca milagru ni biʼniʼ Jesús zanda gusianda «guiráʼ guendahuará» ne guindisaʼ ca ni maʼ guti (Mat. 4:23; Juan 11:​43, 44). Laaca nápabe poder para gucueezabe bi yooxhoʼ ne cueebe espíritu malu (Mar. 4:​37-39; Luc. 8:2). Guizáʼ ratadxí ladxidoʼno gánnanu maʼ bidii Jehová poder Xiiñiʼ. Zanda chuʼnu seguru zedané Reinu stiʼ Dios stale ndaayaʼ. Ca milagru ni biʼniʼ Jesús racané ca ni laanu gánnanu xi guirá zúnibe casi Rey lu Reinu stiʼ Dios. w23.04 3 párr. 5-7

Pa nuuluʼ ndaaniʼ ti congregación naroʼbaʼ ne stale biaje qué rudiiluʼ nin ti comentariu, zándaca huaníʼ íqueluʼ jma galán maʼ cadi guidinsaʼ naluʼ. Peru cadi guireeluʼ gana. Biʼniʼ preparar chupa chonna comentariu para cada reunión. Ne zacá, pa qué gudiicabe lii comentariu lu ca primé párrafo ca la? zándaruʼ guni comentarluʼ lu xcaadxi párrafo ca. Ora maʼ cayuni estudiarluʼ revista Torre stiʼ ni rapa, guníʼ ique xi cusiidiʼ cada párrafo ca lii de tema stiʼ artículo ca. Zacá zápaluʼ xiixa para guni comentarluʼ. Sti cosa ni zanda gúniluʼ nga guni prepararluʼ ca párrafo ni cusiene xiixa tema nagana. Purtiʼ jma huaxiéʼ tu rindisanáʼ lu ca párrafo ca. Yanna, ¿xi zanda gúniluʼ pa caʼruʼ gudiiluʼ nin ti comentariu lu chupa chonna reunión yaʼ? Ante guzulú reunión guniʼné hermanu ni chigutiidiʼ Torre stiʼ ni rapa ca, ne gudxi laa xi párrafo racaláʼdxiluʼ guni comentarluʼ. w23.04 21, 22 párr. 9, 10

Siempre biyubi José gacané Jehová laa ne pur nga nácabe ti ejemplu galán para ca hombre ni maʼ bichaganáʼ. Chonna biaje gudxi Dios laabe xi caquiiñeʼ guninebe familia stibe. Ne nagueendaca biʼniʼ José ni neca nagana guca ni para laa (Mat. 1:20; 2:​13-15, 19-21). Pur bizuubaʼ José stiidxaʼ Jehová biiyabe ne gúpabe María, ne pur ngue guizáʼ gunnaxhii ne biʼniʼ respetar María laabe. Laatu ca ni maʼ bichaganáʼ zanda gácatu casi José ne guyúbitu chinándatu ni ná ca conseju zeeda lu Biblia ni zacané laatu gúʼyatu ne gápatu familia stitu. Ne ora gúnitu ni ná ca ni neca gaca ni nagana para laatu la? zusihuínnitu dxandíʼ nadxiitu xheelatu ne laaca zacané ni laatu chuʼtu tobi si. Ti hermana de guidxi Vanuatu ni maʼ ziné jma de 20 iza de bichaganáʼ guníʼ: «Jma runeʼ respetar xheelaʼ ora ruuyaʼ rinábabe Jehová gacané laabe ne rinándabe ca conseju stiʼ. Racané ni naa gannaʼ dxiicheʼ ne gapaʼ confianza jneza ca decisión ni ricaabe». w23.05 21 párr. 5

Naquiiñeʼ gaca ca judíu ni guibiguetaʼ que «ti guidxi ni nayá» para Dios (Deut. 7:6). ¿Ñee riníʼ nga ca ni guiree de ndaaniʼ guidxi Babilonia cayúnicaʼ ni jneza la? Coʼ. Caquiiñeʼ guchaacabe para chuulaʼdxiʼ Jehová ni cayúnicabe. Stale de ca judíu que gúlecaʼ Babilonia, pur ngue maʼ gucuá modo riníʼ ique ca binni de raqué laacabe ne ca cosa ni cadi jneza rúnicaʼ. Gudiʼdiʼ si iza de bibiguetaʼ primé grupu de ca judíu guidxi Israel, guizáʼ bidxagayaa gobernador Nehemías ra gunna qué riníʼ ca xiiñiʼ ca judíu que hebreu (Deut. 6:​6, 7; Neh. 13:​23, 24). Yanna, ¿ximodo guiénecabe Stiidxaʼ Dios ne guiziidicabe gannaxhiicabe ne guni adorárcabe Jehová yaʼ? (Esd. 10:​3, 44). Nga runi, naquiiñeʼ guchaa ca judíu, peru qué zaca ni nagana para laacabe pa cuézacabe ndaaniʼ guidxi Israel, purtiʼ chaahuiʼ chaahuiʼ maʼ cabiguetaʼ cayuni adorárcabe Jehová modo racalaʼdxiʼ (Neh. 8:​8, 9). w23.05 15 párr. 6, 7

Neca racaláʼdxinu ugaandanu xiixa meta ne rúninu stipa para gúninu ni, zándaca guidxaagalunu xiixa ni gucueeza laanu. Casi guizaaca xiixa cosa «ora cadi cabézanu» ne gaxhaʼ ni tiempu ni caquíʼñenu para ugaandanu meta stinu (Ecl. 9:11). O zándaca guidxaagalunu xiixa guendanagana ni cuee gana o gusaana laanu sin stipa (Prov. 24:10). Ne cumu nácanu binni ruchee la? nga laaca zanda gucueeza laanu de ugaandanu ca meta stinu (Rom. 7:23). O zándaca guni sentirnu maʼ bidxáganu (Mat. 26:43). Yanna, ¿xi zanda gacané laanu yaʼ? Bietenalaʼdxiʼ neca nuu xiixa ni gucueeza lii la? zándaruʼ ugaandaluʼ meta stiluʼ. Rusiidiʼ Biblia zadxaagalunu guendanagana, peru laaca rusiidiʼ ni laanu cadi naquiiñeʼ guireʼnu gana ne gúninu stipa para ugaandanu ca meta stinu. Pa gúninu stipa ugaandanu ca meta stinu neca nápanu guendanagana la? cusihuínninu racaláʼdxinu gúninu ni ná Jehová. ¿Ñee riníʼ íqueluʼ pabiáʼ riecheʼ Jehová ra guuyaʼ cayúniluʼ stipa ugaandaluʼ ca meta stiluʼ la? w23.05 30 párr. 14, 15

Joven, pa gácaluʼ precursor zaziidiluʼ gunineluʼ gadxé gadxé hermanu dxiiñaʼ ne iquiiñeluʼ xpueltuluʼ jneza (Filip. 4:​11-13). ¿Xiñee qué guzulú gúniluʼ de precursor auxiliar yaʼ? Zzanda gacané ni lii gúniluʼ xhiiñaʼ Jehová de tiempu completu, casi gácaluʼ siervu de construcción o gúniluʼ dxiiñaʼ Betel. Guiráʼ ca hermanu zanda gúnicaʼ stipa guni cumplircaʼ né ca requisitu para gácacaʼ ancianu ndaaniʼ congregación. Biblia ná ni racalaʼdxiʼ ugaanda ca meta riʼ «jneza ni cá ique guni» (1 Tim. 3:1). Primé caquiiñeʼ gácaluʼ siervu ministerial. Ne nabé racané ca siervu ministerial ca ancianu de stale modo, cásica ca ancianu zaqueca ca siervu ministerial rácacaʼ humilde ne racanecaʼ ca hermanu sticaʼ ne laaca runi predicarcaʼ né stale gana. w23.12 28 párr. 14-16

Biyubi rey Josías Jehová dxi naca ti jovenhuiiniʼ. Racaláʼdxibe gunibiáʼ chaahuibe Dios stibe ne gúnibe ni ná. Peru nagana para Josías gaca rey, ¿xiñee yaʼ? Purtiʼ ca dxi que stale binni runi adorarcaʼ xcaadxi dios. Ngue runi gúcabe nadxibalú para guni adorarbe Dios ni dxandíʼ. ¡Biaʼsi peʼ modo bíʼnibe ni! Purtiʼ nin 20 iza qué gápabe dxi bizulú guleebe de ndaaniʼ guidxi que guiráʼ ca cosa ni biquiiñeʼ para gaca adorar ca dios ni cadi dxandíʼ (2 Crón. 34:​1, 2). Neca nahuiiniluʼ zanda gácaluʼ casi Josías. ¿Ximodo yaʼ? Ra guyúbiluʼ Jehová ne guiziidiluʼ jma de ca cualidad sicarú stiʼ. Ndiʼ zucaa ni lii gudiiluʼ xquendanábaniluʼ Jehová. ¿Xi zabeenduluʼ pur laani yaʼ? Ti hermanu ni guyuunisa dxi napa 14 iza láʼ Luke, guníʼ: «Dede yannadxí zuneʼ ni ná Jehová primé lu xquendanabaneʼ ne zuneʼ stipa pur gusiecheʼ laa» (Mar. 12:30). Zacaaluʼ stale ndaayaʼ pa quixhe íqueluʼ gúniluʼ zacá. w23.09 11 párr. 12, 13

Guiníʼ íquenu ni bizaaca congregación de Tesalónica. Dxi bicaa apóstol Pablo ra nuucabe caʼruʼ lica gusaa congregación ca ti iza de guca formar. Zándaca huaxieʼruʼ nanna ca ancianu que ne rucheerucaʼ, peru neca zaqué naquiiñeʼ guni respetárcabe laacaʼ. Ra jma maʼ gaxha nuu gran tribulación jma zaquíʼñenu gacané ca ancianu de congregación laanu purtiʼ zándaca maʼ qué zacaanu instrucción stiʼ central mundial ne stiʼ sucursal para gánnanu xi gúninu. Pur nga dede ca yanna naquiiñeʼ gusihuínninu nadxiinu ca ancianu ne runi respetarnu laacaʼ. Nga runi intiica si guizaaca, cuʼnu xpiaaninu ne cadi guidúʼyanu ra cucheecabe, sínuque guietenaláʼdxinu caquiiñeʼ Jehová Jesús para guni guiar laacabe. Cásica rapa ti cascu ique ti soldadu, zacaca rapa esperanza stinu xquendabiaaninu. Nánnanu racané ni laanu cadi gusisácanu ca cosa risaca ni nuu lu Guidxilayú riʼ (Filip. 3:8). Laaca racané ni laanu gatadxí ladxidoʼno ne riguixhedxí ni xquendabiaaninu. w23.06 11, 12 párr. 11, 12

Guiráʼ tu gunadiaga stidxi «gunaa nahuati» que caquiiñeʼ guicaacaʼ ti decisión: zacaacaʼ invitación stibe la? o zucáʼnacaʼ ni. Nuu razón risaca para gucáʼnanu ca pecadu sexual ca. Casi ná libru stiʼ Proverbios, «gunaa nahuati» ca riníʼ: «Nanaxhi ca nisa ni guláʼnacabe» (Prov. 9:17). ¿Xii nga «nisa ni guláʼnacabe» ca yaʼ? Biblia ruchaaga ca relación sexual ndaaniʼ guendaxheelaʼ casi nisa ni rusigaandaʼ (Prov. 5:​15-18). Hombre ne gunaa ni maʼ bichaganáʼ ante ley zanda gápacaʼ relación sexual nayá. Peru «nisa ni guláʼnacabe» ca maʼ gadxé si ca ni. Zándaca zeeda gaca ca ni ca relación sexual ni rucheené ley stiʼ Dios. Ca binni ni runi cometer pecadu sexual runi ca ni nagaʼchiʼ, cásica runi ti gubaanaʼ ora chindanaʼ. «Nisa ni guláʼnacabe» ca nanaxhi ni para ca binni ni rucaachiʼ ca cosa yuudxuʼ ni rúnicaʼ. Peru caguítecaʼ laca laacaʼ ne qué zanda quítecaʼ Jehová purtiʼ laa ruuyaʼ guiráʼ ni. Pa gunítinu ndaayaʼ stiʼ Jehová qué zabáninu nayecheʼ (1 Cor. 6:​9, 10). w23.06 22 párr. 7-9

Yanna, ¿pa gudiiluʼ cuenta tobi si modo cayuni orarluʼ ne ngueca ca ngueca cayúniluʼ lu xhiiñaʼ Jehová o maʼ huaxiéʼ riuuláʼdxiluʼ guni predicarluʼ yaʼ? Cadi guiníʼ íqueluʼ maʼ qué gápaluʼ espíritu stiʼ Jehová. Cumu binni ruchee laanu la? normal nga guireʼnu gana. Ne pa gudiiluʼ cuenta maʼ huaxiéʼ nayecheʼ nuuluʼ, guníʼ ique ejemplu stiʼ apóstol Pablo. Neca bíʼnibe stipa pur chinándabe ejemplu stiʼ Jesús, gúnnabe ziuu biaje ziaadxaʼ laabe stipa para gúnibe ni jneza. Pablo gudixhe ique guni xhiiñaʼ Jehová modo tiica si cayuni sentir. Zaqueca nga laanu, cadi naquiiñeʼ chinándanu ni cayuni sentirnu ora guicaanu xiixa decisión. Ni jma galán nga gucaa íqueluʼ gúniluʼ ni jneza neca qué gápaluʼ deseu de gúniluʼ ni. Ne pa gúniluʼ zacá, ra tidiʼ tiempu zuni sentirluʼ jma galán (1 Cor. 9:16). w24.03 11, 12 párr. 12, 13

Ndaaniʼ stale congregación nuu hermanu ne hermana ni gadxé gadxé modo biniisicaʼ ne modo laacaʼ. Yanna, ¿xi zacané laanu gannaxhiinu ca hermanu stinu yaʼ? Ni zacané laanu nga guidúʼyanu ca cualidad galán nápacabe. Yanna, ¿ximodo guluinu dxandíʼ nadxiinu ca hermanu stinu yaʼ? Ra gúninu stipa guidúʼyanu laacabe casi ruuyaʼ Jehová laacabe. Lu gran tribulación, caquiiñeʼ gusihuínninu dxandíʼ nadxiinu ca hermanu stinu. ¿Ximodo zapa Jehová laanu ora guzulú gran tribulación yaʼ? Guiníʼ íquenu ca instrucción bidii Jehová xquidxi para ganda guilá ora gucaalú Babilonia laacaʼ. Laabe guniʼbe: «Binni xquidxeʼ caʼ, lachuu ndaaniʼ ca cuartu stitu ne laguseeguʼ puertaʼ stícani. Lagucaachilú ti ratu dede ora maʼ gudiʼdiʼ xiana ca» (Is. 26:20). Zándaca laanu laacaʼ caquiiñeʼ chinándanu ca instrucción riʼ lu gran tribulación. w23.07 6, 7 párr. 14-16

Gácanu binni riuu razón. Gunabadiidxaʼ laca lii: «¿Ñee riníʼ ique xcaadxi naca ti binni riuu razón, ni runi respetar ne qué riree né xtema la? ¿O runibiáʼcabe naa casi tuuxa naguidxi, estrictu ne tercu? ¿Rucaadiaʼgaʼ ni guiníʼ xcaadxi ne rudieeʼ lugar gaca ni nacaʼ la?». Ora gácanu binni riuu razón, jma zusihuínninu nácanu casi Jehová ne Jesús. Ora guchaa modo nabáninu, caquiiñeʼ gusihuínninu nácanu binni riuu razón ne gánnanu xi zanda guni xcaadxi ne guiénenu laacaʼ. Zándaca málasi gaca huaranu, guiaadxaʼ bueltu laanu o chuʼ xiixa guendanagana ra nabézanu. Zanda guchaa ca guendanagana ni cadi cabézanu riʼ xquendanabáninu (Ecl. 9:11). Dede né ora guinabaʼ xquidxi Jehová laanu guchaʼnu modo rúninu xhiiñaʼ o gúninu xhiiñaʼ Jehová sti lugar zándaca gácani nagana para laanu. Zanda gudxíʼlunu ora guchaa xquendanabáninu, ¿ximodo yaʼ? Pa chinándanu guidapaʼ cosa riʼ: Primé, gánnanu maʼ bichaa modo nabáninu. Guiropa, guiníʼ íquenu ni cabeza laanu ne cadi guiníʼ íquenu ni bizaaca. Guionna, guidúʼyanu ca cosa galán ni nápanu. Ne guidapa, gúninu xiixa pur xcaadxi. w23.07 21, 22 párr. 7, 8

Dxi nahuiiniʼ Daniel, yené ca binni de Babilonia laabe casi prisioneru zitu de guidxi Jerusalén. Peru neca nahuiinibe biiyadxícabe laabe. ¿Xiñee yaʼ? Guizáʼ guyuulaʼdxiʼ ca binni de Babilonia ni cayuuyacaʼ, biiyacaʼ «ni rihuinni si», ti hombrehuiiniʼ ni nazaaca ne guizáʼ sicarú ni zeeda de ti familia risaca (1 Sam. 16:7). Ngue runi bisiidicabe laabe para gúnibe dxiiñaʼ ndaaniʼ palaciu ne gueeda gácabe ti binni risaca (Dan. 1:​3, 4, 6). Nadxii Jehová Daniel pur clase binni gudixhe ique gaca. ¿Ximodo nánnanu ni yaʼ? Purtiʼ dxi nahuiiniʼ Daniel o napa biaʼ gande iza bizeeteʼ Jehová labe lade ca hombre ni qué nusaanacaʼ Jehová ne bíʼnicaʼ ni nabe pur stale iza casi Noé ne Job (Gén. 5:32; 6:​9, 10; Job 42:​16, 17; Ezeq. 14:14). Lu guidubi guendanabani sicarú ni gupa Daniel qué nusaana Jehová de ñannaxhii laa (Dan. 10:​11, 19). w23.08 2 párr. 1, 2

Ora racaláʼdxiluʼ siluʼ ti yoo, naquiiñeʼ gúʼyaluʼ ni para gunibiáʼ chaahuiluʼ ni. Zaqueca nga naquiiñeʼ gúninu ora guidúʼndanu ne guni estudiarnu Biblia. Pa nagueenda nagueenda guidúʼndanu ni la? zazíʼdinu ca cosa si ni cadi nagana o ca cosa ni bizíʼdinu primé ni zeeda lu Stiidxaʼ Dios (Heb. 5:12). Jma galán gúninu cásica né yoo que: guʼyaʼ chaahuinu xi napa ni dentru. Para guni estudiar chaahuinu Biblia la? galán guidúʼyanu ximodo naazenáʼ ca relatu stini. Cadi caquiiñeʼ si gánnanu xi runi crenu, sínuque xiñee runi crenu ni. Para ganda guiene chaahuinu Stiidxaʼ Dios, caquiiñeʼ guni estudiarnu ca cosa jma nagana ni zeeda luni. Apóstol Pablo guluu gana ca xpinni Cristu guni estudiarcaʼ Stiidxaʼ Dios, ngue runi guniʼbe «rinabaʼ Dios gusiene laatu [ . . . ] ni dxandíʼ. Zeeda gaca ni casi xiixa ni nalaga, ziuulaʼ, nasoo ne gueteʼ» ne zacá «guzuhuaatu dxiichiʼ» lu ni runi cretu (Efes. 3:​14-19). Laaca naquiiñeʼ gúninu zacá. w23.10 18 párr. 1-3

Ruzeeteʼ Biblia ejemplu stiʼ stale binni ni gupa paciencia. ¿Xiñee qué quixhe íqueluʼ gúʼndaluʼ ca relatu riʼ ora gápaluʼ estudiu personal stiluʼ yaʼ? Guzéʼtenu caadxi ejemplu, nahuiiniʼ David dxi gulícabe laa para gaca rey stiʼ guidxi Israel, peru gupa xidé gulézabe stale iza para gueeda gácabe rey. Simeón ne Ana qué nusaana de ñúnicaʼ ni ná Jehová laga cabézacaʼ guedandá Mesías que (Luc. 2:​25, 36-38). Ra guni estudiarluʼ ca relatu riʼ, galán guiníʼ íqueluʼ: «¿Xi gucané laacabe gápacabe paciencia? ¿Xi ndaayaʼ gúpacabe ra biluíʼcabe cualidad riʼ? ¿Ximodo zanda chinandaʼ ejemplu stícabe yaʼ?». Laaca zanda guiziidiluʼ stale cosa de ca binni ni qué nusihuinni paciencia (1 Sam. 13:​8-14). Ora gúniluʼ ni la? zanda guiníʼ íqueluʼ: «¿Xiñee qué ñápacabe paciencia? ¿Xi bizaacacabe pur qué ñápacabe paciencia yaʼ?». w23.08 25 párr. 15

Qué nucheené apóstol Pedro Dios. Qué nudiibe lugar ñuu xiixa cosa ni nucaa laabe guireebe gana. Ti dxi guníʼ Jesús ti cosa ni qué ñene stale de ca discípulo stiʼ, peru Pedro si nga bisihuinni qué ziuu dxi gusaana laabe (Juan 6:68). Stale de ca binni que qué nibézacaʼ nusiene Jesús xii ngue nuu guiníʼ, nagueendacaʼ bisaanacaʼ laabe. Peru Pedro la? qué ñuni diʼ nga. Laabe guniʼbe nezalú guiráʼ binni que, ca diidxaʼ si ni riníʼ Jesús nga rudii guendanabani ni qué zaluxe. Maca nanna Jesús zusaana Pedro ne xcaadxi apóstol que laa. Neca zaqué, gunna dxiichiʼ Jesús zedandá dxi zabiguetaʼ Pedro ra nuu ne qué zusaana laa (Luc. 22:​31, 32). Biene Jesús «neca racalaʼdxiʼ binni guni ni jneza, peru débil cuerpu stiʼ» (Mar. 14:38). Ngue runi ora guníʼ Pedro qué runibiáʼ laabe la? qué niníʼ íquebe maʼ qué gapa remediu. Biasa si Jesús de lade guetu, bihuínnibe nezalú apóstol Pedro ne ruluíʼ guiropasícabe ngue nuucabe raqué (Mar. 16:7; Luc. 24:34; 1 Cor. 15:5). Nanna dxíchinu guizáʼ guluu ngue gana apóstol que. w23.09 22 párr. 9, 10

Runi perdonar Dios ca pecadu stiʼ ca binni ni gapa fe laabe ne rusiaandabe ca ni (Sal. 32:​1, 2). Ruuyaʼ Jehová laacabe casi binni nachaʼhuiʼ ne ni maʼ qué gapa donda pur fe stiʼ. Neca biiyaʼ Dios Abrahán, David ne xcaadxi xpinni casi binni nachaʼhuiʼ la? nácarucaʼ binni ruchee. Peru pur fe stícabe biiyaʼ Dios laacabe casi binni ni qué gapa donda, jmaruʼ si pa guchaaganu laacabe né ca binni ni qué runi adorar Dios (Efes. 2:12). Lu carta ni bicaa apóstol Pablo ra nuu ca xpinni Cristu de Roma, bisiénebe caquiiñeʼ gápanu fe para gaca xhamígunu Jehová. Nga peʼ nga ni biʼniʼ Abrahán ne David, ne ngaca nga ni naquiiñeʼ gúninu. w23.12 3 párr. 6, 7

Guiranu ca xpinni Cristu nápanu privilegiu de gudiʼnu sacrificiu Jehová. ¿Ximodo zanda gúninu ni yaʼ? Ra iquíʼñenu tiempu, stipa ne ca ni nápanu para gacanenu gaca xhiiñaʼ Reinu. Pa gudiʼnu Jehová ni jma galán nápanu, zusihuínninu risaca para laanu privilegiu de guni adorarnu laa. Bizeeteʼ apóstol Pablo caadxi cosa ni cadi naquiiñeʼ guiaandaʼ laanu ora guni adorarnu Dios (Heb. 10:​22-25). Guniʼbe risaca nga guni adorarnu Jehová, gábinu xcaadxi de esperanza ni nápanu, gaca reunirnenu ca hermanu stinu ne cúʼsaanu gana, «jmaruʼ si yanna ra cadúʼyanu jma maʼ gaxha nuu dxi stiʼ Dios» (Heb. 10:​22-25). Lu ca últimu capítulo stiʼ Apocalipsis, ángel que guníʼ: «¡Biʼniʼ adorar Dios!». Ne guniʼbe ni chupa biaje para gusihuínnibe guizáʼ risaca ni (Apoc. 19:10; 22:9). Qué chu dxi guiaandaʼ laanu ca cosa nagana ni maʼ bizíʼdinu de templu espiritual naroʼbaʼ stiʼ Jehová ne laaca cadi guianda laanu privilegiu ni nápanu de guni adorarnu Jehová, Dios ni jma nandxóʼ. w23.10 29 párr. 17, 18

Guiranu racaláʼdxinu chinándanu mandatu riʼ: «Cadi gusaana de gannaxhiisaanu». Peru cadi naquiiñeʼ guiaandaʼ laanu ni guníʼ Jesús: «Stale binni zusaana de gannaxhii» (Mat. 24:12). Cadi caníʼ diʼ Jesús né ca diidxaʼ riʼ stale de ca discípulo stiʼ zusaanacaʼ de gannaxhiisaacaʼ. Neca zacá naquiiñeʼ gápanu cuidadu cadi guirá guendarannaxhii stinu, purtiʼ nga nga ni runi binni guidxilayú. Ra gánnanu ndiʼ zacábinu pregunta riʼ: ¿ñee nuu ti modo zanda gánnanu pa dxandíʼ nadxiinu ca hermanu stinu la? Ti modo zanda gánnanu pa dxandíʼ nadxiinu ca hermanu stinu nga ra guidúʼyanu xi rúninu ora ridxaagalunu xiixa guendanagana (2 Cor. 8:8). Ne apóstol Pedro bizeeteʼ tobi de laacani ra bicaa: «Ne ni jma naquiiñeʼ gúnitu nga gannaxhiisaatu, purtiʼ ti binni ni nadxii la? siempre nuu dispuestu guni perdonar» (1 Ped. 4:8). Nga runi, rihuinni pa dxandíʼ nadxiinu ca hermanu stinu ora gucheenecaʼ o guninacaʼ laanu xiixa. w23.11 10, 11 párr. 12, 13

Pa gusihuínninu nadxiinu caadxi si hermanu de congregación stinu la? cadi cusihuínninu guendarannaxhii ni guníʼ Jesús. Dxandíʼ, zándaca jma xhamígunu caadxi hermanu, cásica bizaaca Jesús né chupa chonna de ca discípulo stiʼ (Juan 13:23; 20:2). Peru rusietenalaʼdxiʼ apóstol Pedro laanu caquiiñeʼ gannaxhiinu ca hermanu cásica nadxiinu familia stinu (1 Ped. 2:17). Bidii Pedro conseju riʼ: «Lagannaxhiisaa de guidubi ladxidoʼto» (1 Ped. 1:22). Lu contextu riʼ, diidxaʼ «de guidubi ladxidoʼto» rusihuinni ni caquiiñeʼ gannaxhiinu neca gácani nagana para laanu. Guzéʼtenu ti ejemplu, cumu nácanu binni ruchee, ¿xi ñándaca ñúninu pa ti hermanu ñuni o niníʼ xiixa ni ñuniná laanu yaʼ? Zándaca niníʼ íquenu nuquíxenu ni laabe lugar de nuluinu nadxiinu laabe. Peru pa gúninu zacá la? qué ziuulaʼdxiʼ Jehová ni, ne nga peʼ nga ni bisiidiʼ Jesús Pedro (Juan 18:​10, 11). Bicaa Pedro ca diidxaʼ riʼ: «Cadi uquíxetu ni gúnicabe laatu, ne cadi cúʼditu ora cuʼdícabe laatu, sínuque lauguu ndaayaʼ laacabe» (1 Ped. 3:9). Pa nadxiiluʼ binni de guidubi ladxidoʼloʼ la? zácaluʼ nachaʼhui. w23.09 28, 29 párr. 9-11

¿Cadi dxandíʼ nabé ridxagayaanu pabiáʼ nagueenda riniisi ti xcuidi ne reeda gaca ti binni huaniisi la? Ruluíʼ qué rúnicabe gastiʼ para guiniisicabe. Peru cadi zacá diʼ rizaaca para guiniisi tuuxa ndaaniʼ xquidxi Dios (1 Cor. 13:11; Heb. 6:1). Para ganda guiniisinu ndaaniʼ xquidxi Dios, naquiiñeʼ gúninu stipa gaca xhamígunu Jehová. Laaca caquiiñeʼ gacané espíritu santu stibe laanu para gápanu cualidad galán, guizíʼdinu xiixa dxiiñaʼ ne chuʼnu listu para xiixa dxiiñaʼ ni zanda gápanu despué (Prov. 1:5). Bizáʼ Jehová hombre ne gunaa (Gén. 1:27) Casi nánnanu gadxé modo bizáʼ Dios hombre ne gunaa, peru laaca gadxé laacabe lu xcaadxi cosa. Guzéʼtenu ti ejemplu, cumu gadxé gadxé nga dxiiñaʼ bidiibe hombre ne gunaa la? nga runi, laaca caquiiñeʼ gápacabe gadxé gadxé cualidad para gúnicabe ni (Gén. 2:18). w23.12 18 párr. 1, 2

¿Ñee biyubi Jesús iquiiñeʼ binni lá Bixhoze la? Bíʼnibe ni. Zándaca guyuu caadxi xaíque stiʼ religión ni bibani dxiqué guníʼ íquecaʼ qué zanda iquiiñeʼ binni lá Dios purtiʼ nabé risaca ni. Peru qué nudii Jesús lugar nucueeza costumbre que laa de nusisaca lá Bixhoze, purtiʼ cadi cá diʼ costumbre ca lu Stiidxaʼ Dios. Guiníʼ íquenu dxi bisianda Jesús ti hombre ni guyuu demonio lu cuerpu stiʼ, bizaaca ndiʼ lu región stiʼ ca geraseno. Guizáʼ bidxibi ca binni que dede gunábacaʼ Jesús guiree de raqué (Mar. 5:​16, 17). Peru cumu ni racalaʼdxiʼ Jesús ngue gunibiáʼ binni lá Jehová la? ngue runi ante chebe gúdxibe hombre que gabi binni Jehová ngue bisianda laa ne cadi Jesús (Mar. 5:19). Ngueca nga ni racalaʼdxiʼ Jesús, Rey stinu, gúninu, gusíʼdinu guiráʼ xixé binni lá Jehová (Mat. 24:14; 28:20). Ora rúninu ni, rusiéchenu laabe. w24.02 10 párr. 10

Pabiáʼ galán nga nuunu ndaaniʼ organización stiʼ Jehová. Neca jma maʼ nagana nabáninu lu ca últimu dxi riʼ, rudiʼnu xquixe peʼ Jehová purtiʼ nápanu ti familia espiritual ni nuu tobi si (Sal. 133:1). Pur ni rusiidiʼ Dios laanu zanda guibaninenu familia stinu nayecheʼ (Efes. 5:​33–6:1). Laaca rusiidibe laanu xi naquiiñeʼ gúninu para gudxíʼlunu ni runi sentirnu ne chuʼnu nayecheʼ. Neca zacá, para cadi gusaana de gúninu xhiiñaʼ Jehová, caquiiñeʼ gúninu ti stipa naroʼbaʼ. ¿Xiñee yaʼ? Purtiʼ zanda guniná ni guiníʼ o ni guni xcaadxi laanu. Laaca zanda guireʼnu gana ora gueeda gucheʼnu, jmaruʼ si ora laaca ngueca ni gusaba laanu stale biaje. Cadi gusaana de gúninu ni ná Jehová: primé, ora guniná ti hermanu laanu, guiropa, ora guni xheelanu xiixa ni cadi cabézanu, ne guionna, ora guireʼnu gana pur bíninu xiixa ni cadi jneza. w24.03 14 párr. 1, 2

Gatigá zándaca gunadiágaluʼ historia stiʼ caadxi hermanu ni gudixhe ique guni jma lu xhiiñaʼ Jehová. Zándaca guyécabe Escuela para Evangelizadores del Reino o yendézacabe ti lugar ra caquiiñeʼ tu guni predicar. ¿Zanda gúniluʼ ni bíʼnicabe ca la? Pa zanda la? biʼniʼ ni. Ruyubi ca xpinni Jehová ximodo gúnicaʼ jma lu xhiiñabe (Hech. 16:9). Peru ¿pa qué ganda gúniluʼ ni yanna yaʼ? Cadi guiníʼ íqueluʼ qué risácaluʼ purtiʼ si qué ganda gúniluʼ ni. Ni jma risaca nga guni huantarluʼ (Mat. 10:22). Cadi guiaandaʼ lii, nabé riecheʼ Jehová purtiʼ cudiiluʼ laa ni jma galán de lii ne biaʼ zanda gudiiluʼ. Nga zacané lii cadi gusaana de chinándaluʼ Jesús despué de chuʼnísaluʼ (Sal. 26:1). w24.03 10 párr. 11

Bixhózenu ni nuu guibáʼ maʼ biʼniʼ prometer zuni perdonar laanu pa gaca arrepentirnu (Sal. 86:5). Nga runi, pa riuubaʼ ladxidoʼno pur ca pecadu ni bíninu la? chuʼnu seguru maʼ biʼniʼ perdonarbe laanu. Cadi guiaandaʼ laanu, qué runi obligarbe laanu gúninu xiixa, sínuque riénebe laanu ne qué rinábabe laanu gúninu ni qué zanda gúninu. Pa cudiʼnu laabe ni jma galán de laanu, neca naroʼbaʼ o nahuiiniʼ ni, chuʼnu seguru nabé rusisácabe ni. Laaca zanda guiníʼ íquenu ca binni ni riete lu Biblia ni biʼniʼ ni ná Jehová de guidubi ladxidóʼ. Casi apóstol Pablo, pur stale iza biʼniʼ viajar zitu ne biʼniʼ stale dxiiñaʼ para guca formar stale congregación. Peru bedandá tiempu bichaa modo nabánibe ne maʼ qué ñanda ñuni predicarbe modo rúnibe ni dxiqué. ¿Ñee pur nga maʼ qué ñechené Jehová laabe la? Coʼ xa. Biʼniʼ Pablo ni zanda guni ne qué nusaana Jehová de niguu ndaayaʼ laabe (Hech. 28:​30, 31). Zaqueca nga laanu, ziuu biaje zudiʼnu Jehová stale o huaxiéʼ, peru ni jma risaca para laabe nga xiñee rúninu ni. w24.03 27 párr. 7, 9

Guca Jesús ti ejemplu para ca discípulo stiʼ purtiʼ qué nusaana de ñuni orar. Neca nabé guyuu xhiiñabe ne zeʼ zeeda binni ra nuube siempre guleebe tiempu para guni orarbe (Mar. 6:​31, 45, 46). Riásabe siadóʼ guieʼruʼ para chuʼbe stúbibe ne guiníʼnebe Bixhózebe. Dede guyuu biaje biʼniʼ orarbe guidubi gueelaʼ para guicaabe ti decisión risaca (Luc. 6:​12, 13). Ne gueelaʼ ante gátibe que biʼniʼ orarbe stale biaje, purtiʼ nánnabe maʼ bedandá ora guidxagalube guendanagana ni jma nadipaʼ chitídibe lu Guidxilayú riʼ (Mat. 26:​39, 42, 44). Rusiidiʼ ejemplu stiʼ Jesús laanu neca nabé nuu xhiiñanu, caquiiñeʼ cueenu tiempu para guinínenu Jehová. ¿Ximodo yaʼ? Zanda guiásanu siadóʼ guieʼruʼ o cueenu tiempu huaxhinni para guni orarnu. Pa gúninu ni la? zusihuínninu cudiʼnu xquixe peʼ Jehová pur regalu ni maʼ bidii laanu. w23.05 3 párr. 4, 5

Ti diccionariu ni ruzeeteʼ de Biblia ná, diidxaʼ «ruchátipa» ni zeeda lu textu stiʼ yannadxí riʼ, zeeda gácani casi ti guiiguʼ ni zeeda luguianu. ¡Guizáʼ galán ejemplu riʼ para guininu pabiáʼ nadxii Jehová ca ungidu! Ne laacaʼ nánnacaʼ nadxii Dios laacaʼ (Jud. 1). Guirácabe runi sentírcabe para laacabe ca diidxaʼ ni bicaa apóstol Juan ra guníʼ: «¡Laguuyaʼ pabiáʼ nadxii Bixhózenu laanu, dede rábicabe laanu xiiñiʼ Dios!» (1 Juan 3:1). ¿Ñee ca ungidu si nga nadxii Jehová la? Coʼ, casi chiguidúʼyanu, maʼ bisihuínnibe nadxiibe guiráʼ ca xpínnibe. ¿Gunáʼ nga prueba jma risaca ni rusihuinni nadxii Jehová laanu yaʼ? Laani nga rescate. Ndiʼ rusihuinni guirútiruʼ nadxii laanu jma que laabe (Juan 3:16; Rom. 5:8). w24.01 28 párr. 9, 10

Lu versículo ca riete ni biʼniʼ David para maʼ cadi guidxibi ora guyuu xquendanabani ra naxoo: guníʼ íquebe xi zuni Jehová pur laabe despué. Nánnabe zulá Jehová laabe ora peʼ caquiiñeʼ gaca ni. Purtiʼ maca guníʼ Jehová maʼ laabe nga chigácabe rey stiʼ guidxi Israel (1 Sam. 16:​1, 13). Ne nanna David pa Jehová nga guníʼ ni la? seguru zuni ni. ¿Xi maʼ guníʼ Dios zuni pur laanu? Dxandíʼ, qué ñuni prometer diʼ Jehová zabáninu sin gápanu guendanagana yanna. Peru intiica si guizaaca lu sistema riʼ, maʼ biʼniʼ prometer Jehová laanu maʼ qué ziuu nin ti guendanagana ndaaniʼ guidxilayú cubi ca (Is. 25:​7-9). Nanna dxíchinu nápabe stale poder para gusibánibe ca ni maʼ guti, para gusiándabe laanu ne para gunitilube ca enemigu stinu (1 Juan 4:4). w24.01 6 párr. 12, 13

Galán guiníʼ íqueluʼ dxi bidiiluʼ lii Jehová ne dxi guyuunísaluʼ. Bíʼniluʼ ni purtiʼ racaláʼdxiluʼ chuʼluʼ gaxha de Jehová. Guníʼ ique xi gucané lii chuʼluʼ seguru ni caziidiluʼ que nga ni dxandíʼ. Bizulú binibiaʼluʼ Jehová, gunnaxhiiluʼ laabe ne beeda guni respetarluʼ laabe casi Bixhózeluʼ ni nuu guibáʼ. Biroobaʼ fe stiluʼ ne nga bicaa lii gaca arrepentirluʼ de ca cosa ni cadi jneza bíʼniluʼ. Bizulú bichaaluʼ ne bíʼniluʼ ca cosa ca casi racalaʼdxiʼ Dios. Ne guizáʼ gutadxí ladxidoʼloʼ ora bidiiluʼ cuenta pabiáʼ riá Dios laanu (Sal. 32:2). Bizulú guyeluʼ ca reunión, biʼniʼ predicarluʼ dede yendá ora bíʼniluʼ ti oración para bidiiluʼ xpídaluʼ Jehová ne guyuunísaluʼ, yanna maʼ nuuluʼ lu neza ni ziné lu guendanabani ni qué zaluxe ne maʼ gudixhe íqueluʼ cadi gusaanaluʼ de saluʼ lu neza ca (Mat. 7:​13, 14). Bizuhuaa dxiichiʼ ne cadi guiree cueʼluʼ, ne gudixhe ique cadi gusaana de gannaxhiiluʼ Jehová ne chinándaluʼ ca norma stibe. w23.07 17 párr. 14; 19 párr. 19

Ora guiníʼ íquenu gúdxinu Jehová zúninu ni racalaʼdxiʼ zacané ni laanu gápanu stipa para gudxíʼlunu intiica tentación. ¿Ñee siempre ruyúbinu guidxaaganu tuuxa ni maʼ bichaganáʼ dede rusihuínninu riuuláʼdxinu laa la? Coʼ, ¿njaʼ? Purtiʼ gudixhe íquenu cadi gúninu ni dxi guca dedicarnu Jehová. Cumu dede ti principiu qué nudiʼnu lugar nicaa xcu ca deseu malu ca ndaaniʼ ladxidoʼno la? qué zúninu stipa gáxhanu ca ni despué. Zaxélenu de neza stiʼ ca binni malu (Prov. 4:​14, 15). Gudixhe ique Jesús guni ni riuulaʼdxiʼ Bixhoze, laanu laaca nagueendaca zucaʼnanu intiica cosa ni nánnanu qué riuulaʼdxiʼ Dios (Mat. 4:10; Juan 8:29). Ni dxandíʼ nga, ora guidxaagalunu guendanagana o xiixa tentación, nápanu oportunidad gusihuínninu maʼ gudixhe íquenu qué zusaana de chinándanu ejemplu stiʼ Jesús. Ne nánnanu zacané Jehová laanu gúninu ni. w24.03 9, 10 párr. 8-10