Agosto

Riete chupa cosa nabé risaca lu salmo ca: 1) stale guendanagana ridxaagalú binni nachaʼhuiʼ ne 2) racané Jehová laacabe gudxiilúcabe ni. ¿Ximodo racané Jehová laanu gudxíʼlunu ca ni yaʼ? Racanebe laanu guiénenu xiñee sicaríʼ nabáninu lu Guidxilayú riʼ. Neca nánnanu zabáninu nayecheʼ pa gúninu ni ná Jehová la? qué riníʼ diʼ nga qué zápanu guendanagana (Is. 66:14). Racalaʼdxiʼ Dios guiníʼ íquenu lu ca ndaayaʼ chiguicaanu despué (2 Cor. 4:​16-18). Peru laga cabézanu ca ni la? zacanebe laanu gudxíʼlunu ca guendanagana stinu (Lam. 3:​22-24). ¿Xi zanda guizíʼdinu de ejemplu sti caadxi xpinni Jehová ni bibani dxiqué ne de tiempu riʼ? Pa gápanu confianza Jehová zacanebe laanu gudxíʼlunu ca guendanagana ni cadi cabézanu, qué ziuu dxi gudiibe lugar guiábanu (Sal. 55:22). w23.04 14, 15 párr. 3, 4

Zanda guizíʼdinu stale de José ne María. Laacabe guyuucabe listu para guzuubacabe stiidxaʼ ca autoridad ca neca guyuu ora gúcani nagana para laacabe (Luc. 2:​1-6). Casi dxi maʼ napa María gaʼ beeu de nacaxiiñiʼ bihuinni pa zuzuubacabe diidxaʼ. Cumu ca dxi que biʼniʼ mandar César Augusto, emperador stiʼ guidxi Roma, gaca ti censu la? ngue runi gupa xidé guyé José ne María Belén. Peru para nga la? caquiiñeʼ guni viajárcabe 150 kilómetru lade dani. Nagana zaca viaje que jmaruʼ si para María. Zándaca guirópacabe nuucabe xizaa pa guizaaca María xiixa ne zaqueca baʼduhuiiniʼ que. ¿Ne pa neza zécabe ñale baʼduhuiiniʼ que yaʼ? ¡Nacaxiiñiʼ María ni chigaca Mesías que! ¿Ñee nuu razón para cadi ninándacabe Ley que la? Cadi guníʼ ique diʼ José ne María qué zinándacaʼ ni ná ley que purtiʼ si nuu ni naguu xizaa laacaʼ. Ne guluu Jehová ndaayaʼ laacabe pur bizuubacabe diidxaʼ: yendá María Belén, nazaaca gule xiiñibe ne dede gucanebe para gaca cumplir ti profecía ni cá lu Biblia (Miq. 5:2). w23.10 8 párr. 9; 9 párr. 11, 12

Stale tu laa ridxibi ora guiníʼ ique chiguni comentar lu ca reunión. ¿Xi zanda gúniluʼ pa rizaacaluʼ ndiʼ yaʼ? Ni zanda gacané lii nga gaca preparar chaahuiluʼ (Prov. 21:5). Ra jma guiene chaahuiluʼ información ca la? qué zadxíbiluʼ guni comentarluʼ. Sti cosa ni zanda gúniluʼ nga gudiiluʼ comentariu nachucu (Prov. 15:23; 17:27). Pa gaca ca comentariu stiluʼ nachucu jma huaxiéʼ zadxíbiluʼ ora guni comentarluʼ. Pa gúniluʼ ni bizéʼtenu riʼ la? zuuyaʼ xcaadxi guca prepararluʼ jneza ne biéneluʼ ni biindaluʼ. Yanna, pa maʼ bíʼniluʼ guiráʼ ni nuu lu naluʼ para guni comentarluʼ peru ridxíbirouʼ, ¿xiruʼ zanda gúniluʼ yaʼ? Cadi guiaandaʼ lii guizáʼ rusisaca Jehová stipa ni rúniluʼ (Luc. 21:​1-4). Qué ribezaʼ Jehová gudiiluʼ jma de ni biaʼ zanda gudiiluʼ (Filip. 4:5). Guníʼ ique xi zanda gúniluʼ ne gunabaʼ Jehová gacané lii cadi guidxíbiluʼ. ¿Xiñee qué quixhe íqueluʼ gudiiluʼ comentariu nachucu yaʼ? w23.04 21 párr. 6-8

Bichaaga apóstol Pablo laanu casi soldadu nexhená ne nacu armadura stiʼ. Ne ora nuu guerra la? nuuca ti soldadu listu para chitinde. Ngueca nga ni caquiiñeʼ gúninu. Zusihuínninu nuunu listu para ora gueeda dxi stiʼ Jehová pa gácunu coraza, laani nga fe ne guendarannaxhii, ne pa cuʼnu cascu íquenu ni zeeda gaca esperanza nápanu. Cásica rapa ti coraza ladxidóʼ ti soldadu, zaqueca rapa fe ne guendarannaxhii ladxidoʼno. Racané ca cualidad riʼ laanu cadi gusaana de gúninu ni ná Jehová ne chinándanu Jesús. Racané fe ca laanu chuʼnu seguru dxandíʼ riguu Jehová ndaayaʼ ca ni qué gusaana de guyubi laa (Heb. 11:6). Ne laaca rucaa fe ca laanu cadi guixélenu de Líder stinu, Jesús, neca cadxaagalunu guendanagana. Para iguidxi fe stinu ne gudxíʼlunu ca guendanagana ni cadxaagalunu, galán guidúʼyanu xi huayacané caadxi hermanu cadi guixélecaʼ de Jehová neca canazanándacabe laacaʼ o pa huaxiéʼ bueltu nápacaʼ. Ne para cadi guicá íquenu gápanu cosa risaca la? zanda chinándanu ejemplu stiʼ ca ni nabaniné huaxiéʼ cosa, ni ruyubi Reinu stiʼ Dios primé lu xquendanabani. w23.06 10 párr. 8, 9

Ganda gucueeza ti binni laca laa nga, ganda gucueeza ni runi ne ni runi sentir. Racané cualidad riʼ laanu para ugaandanu ca meta stinu, jmaruʼ si ora gaca ni nagana o qué gápanu gana gúninu ni. Guietenaláʼdxinu gucueeza tobi laca laa, zeeda gácani tobi de ca cualidad ni rudii espíritu. Nga runi pa guinábanu Jehová gudii laanu espíritu santu la? zacanebe laanu gápanu cualidad riʼ (Luc. 11:13; Gál. 5:​22, 23). Cadi guiníʼ íqueluʼ ora gápaluʼ jma tiempu nga gúniluʼ ni. Ndaaniʼ Guidxilayú riʼ stale cosa nga ni riguʼbaʼ tiempu stinu, pa guiníʼ íquenu cuézanu gápanu tiempu la? qué zanda ugaandanu meta ni naguixhe íquenu gúninu. Zándaca nuu tiru zareʼnu gana purtiʼ ridúʼyanu nagana para ugaandanu ca meta stinu. Pa nga nga ni cazaacaluʼ, ¿xiñee qué quixhe íqueluʼ gúniluʼ caadxi cosa ni zacané lii ugaandaluʼ ca meta stiluʼ chaahuiʼ chaahuiʼ yaʼ? Casi pa racaláʼdxiluʼ gusihuínniluʼ ti cualidad stiʼ Jehová, ¿xiñee qué quixhe íqueluʼ gusihuínniluʼ ni dede lu ca cosa nahuiiniʼ ni rúniluʼ yaʼ? Yanna, pa racaláʼdxiluʼ gúʼndaluʼ Biblia, ¿xiñee qué quixe íqueluʼ gúʼndaluʼ tindaa de laani chupa chonna si minutu yaʼ? w23.05 29 párr. 11-13

Lu ca últimu dxi riʼ, caquiiñeʼ Jehová organización stiʼ para gudii guendaró espiritual ni zacané laanu cadi gusaanaʼ de sanu lu «Neza ni Nayá» riʼ (Is. 35:8; 48:17; 60:17). Ora ti binni ricaa estudiu, ruzulú rizá lu «Neza ni Nayá» ca. Peru nuu tu laa rusaana de guni estudiar casi ñaca ti ndaa si nizabe lu neza ca. Peru nuu xcaadxi la? qué rusaanacaʼ de saca lu neza ca, purtiʼ racaláʼdxicaʼ chindacaʼ ra riluxe ni. Peru ¿paraa nga riluxe ni yaʼ? Para ca ni cabeza cheʼ guibáʼ «Neza ni Nayá» ca riluxe ni ndaaniʼ «paraísu stiʼ Dios» ni nuu guibáʼ (Apoc. 2:7). Ne para ca ni cabeza guibani lu Guidxilayú, riluxe neza ca ra guiluxe ti mil iza guni mandar Cristu ora maʼ naca guiráʼ binni perfectu. Pa zeluʼ lu neza riʼ, cadi gutixhiluluʼ, guzá dede chindaluʼ ra riluxe ni. w23.05 17 párr. 15; 19 párr. 16-18

Pa guiníʼ íqueluʼ guiráʼ ni maʼ biʼniʼ Jehová pur lii, zacané ni lii gudiiluʼ xquixe peʼ laabe ne zúniluʼ ni ra gudiiluʼ xquendanabániluʼ laabe (Sal. 116:​12-14). Biblia ná «guiráʼ regalu sicarú ne guiráʼ cosa nachaʼhuiʼ» zeeda ca ni de Jehová (Sant. 1:17). Regalu jma risaca ni maʼ bidiibe laanu nga: bidiibe lugar gatiʼ Jesús, Xiiñibe, pur laanu. Pur regalu guizáʼ sicarú riʼ, zanda gaca xhamíguluʼ Dios ne guibániluʼ para siempre (1 Juan 4:​9, 10). Ti modo zanda gudiiluʼ xquixe peʼ pur guendarannaxhii ne guiráʼ ni maʼ biʼniʼ Dios pur lii nga gudiiluʼ xquendanabániluʼ laabe (Deut. 16:17; 2 Cor. 5:15). w24.03 5 párr. 8

Ora ridúʼyanu ximodo nabani binni tiempu riʼ runi sentirnu cásica biʼniʼ sentir Lot, ti hombre ni bibani dxiqué ni biʼniʼ ni jneza. Laabe nabé biuubaʼ ladxidoʼbe pur guiráʼ guendaquéiquiiñeʼ biʼniʼ «ca binni malu que sin guituí lucaʼ» purtiʼ nánnabe nanalaʼdxiʼ Bixhózenu ni nuu guibáʼ gaca xpiaʼ binni zacá (2 Ped. 2:​7, 8). Ne cumu nadxii ne guizáʼ runi respetar Lot Jehová la? guca nanaláʼdxibe modo guca xpiaʼ binni ni nuu gaxha de laabe. Tiempu riʼ, laaca nabáninenu binni ni qué runi respetar ca ley stiʼ Dios. Peru pa nadxiinu Dios ne guizíʼdinu guni respetarnu laabe de guidubi ladxidoʼno la? zanda chuʼnu nayá nezalube. Zacané Jehová laanu gúninu ni pa chinándanu ca conseju ni zeeda lu libru stiʼ Proverbios. Guiráʼ ca xpinni Cristu —hombre, gunaa, joven ne ca ni maʼ huaniisi…— guizáʼ zacané ca conseju riʼ laanu. Ti binni ni ridxibi Jehová runi stipa cadi guidxaaga binni ni runi ni cadi jneza. w23.06 20 párr. 1, 2; 21 párr. 5

Zándaca maʼ bicaalú familia stiluʼ lii o bisaanaluʼ xiixa cosa risaca para gúniluʼ xhiiñaʼ Reinu primé lu xquendanábaniluʼ (Mat. 6:33). Pa nga nga ni bizaacaluʼ la? gunna dxichi nanna Jehová xi guiráʼ maʼ bíʼniluʼ pur laa (Heb. 6:10). Zándaca maʼ bidiiluʼ cuenta dxandíʼ ca diidxaʼ ni guníʼ Jesús riʼ: «Guiráʼ tu gusaana lidxi, biʼchiʼ, bizaʼnaʼ, jñaa, bixhoze, xiiñiʼ o layú pur naa ne pur ca noticia galán la? zacaa jma de 100 de ni bisaana tiempu riʼ —lidxi, biʼchiʼ, bizaʼnaʼ, jñaa, xiiñiʼ ne layú, neca gucaalúcabe laa— ne lu ca dxi ni zeeda ca zacaa guendanabani ni qué zaluxe» (Mar. 10:​29, 30). Dxandíʼ peʼ jma stale ndaayaʼ huacaaluʼ que ca sacrificiu ni huayúniluʼ (Sal. 37:4). w24.03 9 párr. 5

Ora biaadxaʼ guendaró ca hermanu de Judea, ca hermanu de Antioquía gucuaacaʼ «decisión para guseendacaʼ ti ayuda, cada tobi gudii biaʼ zanda gudii, para ca hermanu nabeza Judea» (Hech. 11:​27-30). Neca zitu nabeza ca hermanu ni cadiʼdiʼ ca guendanagana riʼ, peru guná ca hermanu de Antioquía chigacanecaʼ (1 Juan 3:​17, 18). Laanu laaca zanda guluinu rianu ca hermanu stinu ora gánnanu gucanácabe pur xiixa desastre. Guidúʼyanu ximodo zanda gacanenu laacabe. Zanda guinabadiidxanu ca ancianu pa zanda gacanenu, gúninu ca donación stinu ne guni orarnu pur ca hermanu. Zándaca caquiiñeʼ ca hermanu ne ca hermana stinu gacanécabe laacaʼ para ganda gápacaʼ ni caquiiñecaʼ. Racaláʼdxinu ora gueeda Jesucristu Rey stinu, para guni juzgar gúʼyabe rianu binni ne gábibe laanu: «Laguicaa Reinu» (Mat. 25:​34-40). w23.07 4 párr. 9, 10; 6 párr. 12

Dxi biʼniʼ predicar Jesús bisihuinni riuu razón cásica Jehová. Neca beedabe para guni predicarbe «ca dendxuʼ ni cananiti stiʼ guidxi Israel», ti biaje gucanebe ti gunaa ni cadi israelita laa. Gunabaʼ gunaa riʼ laabe gusiándabe xiiñidxaapaʼ purti’ «guizá’ feu modo cayuniná ti demonio» laa. Biá Jesús gunaa riʼ ne bisiándabe xiiñiʼ (Mat. 15:​21-28). Yanna guiníʼ íquenu ejemplu riʼ. Gudiʼdiʼ si ti tiempu de bizulú cayuni predicar Jesús, guni ca diidxaʼ riʼ: «Ni guiníʼ qué runibiáʼ naa […], laaca zanieeʼ qué runebiaʼyaʼ laa» (Mat. 10:33). Peru ¿ñee bicaanáʼ Jesús Pedro purtiʼ si chonna biaje guníʼ qué runibiáʼ laabe la? Coʼ. Nánnabe maʼ guca arrepentir Pedro ne naca ti hombre fiel. Despué de biasa Jesús de lade gueʼtuʼ biiyaʼ Pedro laabe, ne zándaca raca nga bisihuinni Jesús maʼ biʼniʼ perdonar ne nadxii laabe (Luc. 24:​33, 34). Maʼ bidúʼyanu Jehová ne Jesús riuucaʼ razón. Ne racalaʼdxiʼ Jehová laaca gácanu binni ni riuu razón. w23.07 21 párr. 6, 7

¿Xi zanda gábinu binni para ganna dxíchicaʼ dxandíʼ peʼ zuni cumplir Jehová promesa stiʼ yaʼ? Primé, Jehová peʼ cayuni promesa riʼ. Lu libru stiʼ Apocalipsis ná: «Óraque ná ni zuba lu trono que: “¡Biiyaʼ! Cayuneʼ guiráʼ cosa nacubi”». Racaláʼdxibe guni cumplirbe promesa stibe ne zanda gúnibe ni purtiʼ nuu xpiaanibe ne nápabe poder. Guiropa, dxandíʼ peʼ zúnibe ni, pur nga guniʼbe: «Bicaa ca diidxaʼ riʼ purtiʼ zanda gápanu confianza ni ne dxandíʼ ni». Ne guníʼrube: «¡Maʼ guca guiráʼ ni!». Guionna, ora ruzulú Jehová xiixa, runduuxeʼ ni. Ne nga peʼ nga rusihuinni ca diidxaʼ riʼ: «Naa nga Alfa ne Omega» (Apoc. 21:6). Zusihuinni Jehová rusiguii Binidxabaʼ ne qué riree guiráʼ ni runi jneza. Nga runi, ora gabi tuuxa lii: «Galán ni, ¿peru nanna pa dxandíʼ zaca ni yaʼ?». Zanda gúʼndaluʼ ne gusiéneluʼ laabe ni ná lu Apocalipsis 21:​5, 6. Biluíʼ laabe ximodo Jehová peʼ maʼ guníʼ dxandíʼ zuni ca promesa stiʼ; casi ñaca nucaabe firma stibe luni (Is. 65:16). w23.11 7 párr. 18, 19

Dxi biʼniʼ Jehová promesa riʼ, maʼ napa Abrahán 75 ne qué gapa nin ti xiiñiʼ. ¿Ñee biiyaʼ Abrahán guiráʼ ni gudxi Jehová laa que la? Cadi guiráʼ ni. Despué de gudíʼdibe guiiguʼ Éufrates, gupa xidé gulézabe 25 iza para gule xiiñibe, Isaac. Ne 60 iza despué gule guiropaʼ xhiágabe, Esaú ne Jacob (Heb. 6:15). Peru qué ñuuyaʼ Abrahán ñaca ca ni zá de laa ti guidxi naroʼbaʼ ne nicaacaʼ layú ni biʼniʼ prometer Jehová laabe. Neca zacá, guca Abrahán fiel ne guca xhamigu ni bizáʼ laa (Sant. 2:23). Guníʼ ique pabiáʼ ziecheʼ Abrahán ora guiasa de lade gueʼtuʼ. Zánnabe pur fe stibe ne pur gúpabe paciencia, guiráʼ guidxi ni nuu lu Guidxilayú gucuaacaʼ ndaayaʼ (Gén. 22:18). ¿Xi rizíʼdinu yaʼ? Zándaca qué zadúʼyanu guiráʼ ni maʼ guníʼ Jehová chiguni ca dxi stinu riʼ. Peru pa gápanu paciencia casi Abrahán la? zanna dxíchinu zaguu Jehová ndaayaʼ laanu yanna ne jmaruʼ si lu guidxilayú cubi ca (Mar. 10:​29, 30). w23.08 24 párr. 14

Dxi guca rey Uzías joven guca humilde ne biziidibe «guidxíbibe Dios ni dxandíʼ». Bibánibe 68 iza, ne guluu Jehová ndaayaʼ laabe casi lu guidubi naca xquendanabánibe (2 Crón. 26:​1-5). Biʼniʼ ganar Uzías ca guidxi ni bicaalú laa ne biiyabe guiaapaʼ guidxi Jerusalén (2 Crón. 26:​6-15). Guyuu Uzías nayecheʼ pur guiráʼ ni biʼniʼ purtiʼ gucané Jehová laa (Ecl. 3:​12, 13). Cumu maʼ biaa rey Uzías guni xcaadxi ni ná la? zándaca nga bicaa laabe guiníʼ íquebe zanda gúnibe ni gacaláʼdxibe. Ti dxi guyubeʼ ndaaniʼ templu stiʼ Jehová ne bizaaquibe guʼxhuʼ lu altar que, ti cosa ni cadi naquiiñeʼ guni ca rey (2 Crón. 26:​16-18). Guluu jneza sumo sacerdote Azarías laabe, peru Uzías guizáʼ bidxiichi. Triste guininu ni peru maʼ qué ñuni Uzías ni ná Jehová, ne laa biʼniʼ castigar laabe né lepra (2 Crón. 26:​19-21). Maʼ gadxé si ñaca xquendanabánibe pa qué nusaanabe de ñácabe humilde. w23.09 10 párr. 9, 10

Despué de bibí apóstol Pedro né espíritu santu, bidxiilurube ca cosa ni cadi jneza rúnibe. Lu iza 36 despué de ca dxi stiʼ Jesús, biiyaʼ Pedro gucuaa tobi de ca binni ni cadi judíu ni láʼ Cornelio que espíritu santu. Ngue nga tobi de ca cosa ni rusihuinni «biaʼca risaca guiráʼ binni nezalú Dios» ne laaca bisihuinni ngue maʼ zanda gaca ca binni ni cadi judíu xpinni Cristu ne chuʼcaʼ ndaaniʼ congregación (Hech. 10:​34, 44, 45). Ora biene Pedro ngue la? qué ñaca diʼ nagana para laa nidxaaga ca ni cadi judíu ne ñónebe laacaʼ neca peʼ qué huayúnibe ni dxiqué. Peru guyuu caadxi judíu ni beeda gaca xpinni Cristu ne guniʼcaʼ cadi naquiiñeʼ goné ca judíu binni de xcaadxi nación juntu. Dxi yendá caadxi binni ni riníʼ ique zaqué ndaaniʼ guidxi Antioquía, maʼ qué niná Pedro ñoné ca hermanu de xcaadxi guidxi que, zándaca bidxíbibe gueeda guidxiichiné ca judíu que laabe. Ora biʼyaʼ apóstol Pablo cadi jneza ni cayuni Pedro que la? gudindené laabe nezalú guiráʼ binni que (Gál. 2:​13, 14). Neca peʼ bichee Pedro raqué, peru qué niree gana. w23.09 22 párr. 8

Pa gúʼyaluʼ nuu ra naquiiñeʼ gúniluʼ dxiiñaʼ la? cadi guireeluʼ gana. Cadi gusiaandaluʼ «pabiáʼ nachaʼhuiʼ Señor», ne laa zacané lii gúniluʼ ca cosa ca jneza (1 Ped. 2:3). Ne apóstol Pedro guníʼ: «Dios […] gunduuxeʼ entrenamientu stitu. Zuni laatu fiel, zuni laatu nadipaʼ ne zuzuhuaa laatu lu ti base naguidxi». Ti biaje biʼniʼ sentir Pedro qué runi merecer guzuhuaa nezalú Xiiñiʼ Dios (Luc. 5:8). Peru cumu bisihuinni Jehová ne Jesús nadxiicaʼ ne gucanecaʼ laabe la? qué nusaanabe de ninándabe Cristu. Ngue runi gunda gucuaabe ndaayaʼ de chuʼbe «lu Reinu ni qué ziuu dxi guiluxe stiʼ Jesucristu Señor stinu ni bilá laanu» (2 Ped. 1:11). ¡Guizáʼ naroʼbaʼ ndaayaʼ riʼ, ¿njaʼ?! Yanna, cásica Pedro, pa qué guireeluʼ gana ne gudiiluʼ lugar gunduuxeʼ Jehová entrenamientu stiluʼ la? zacaaluʼ premiu ni cabeza lii, guendanabani ni qué zaluxe ne zalaluʼ purtiʼ nápaluʼ fe (1 Ped. 1:9). w23.09 31 párr. 16, 17

Ndaaniʼ tabernáculo ni guyuu dxiqué guyuu ti patiu: ti lugar zuxheleʼ ne nuuni leʼ ne raqué nga runi ca sacerdote dxiiñaʼ. Ne lu patiu que nuu ti altar de cobre ra ruzaaquicabe ca ofrenda que. Ne laaca nuu ti palangana de cobre ra riguiibiʼ ca sacerdote que ládicaʼ ante gúnicaʼ xhiiñaʼ Dios (Éx. 30:​17-20; 40:​6-8). Ca dxi riʼ, ca xpinni Cristu ungidu ni nabániruʼ lu Guidxilayú riʼ cayúnicaʼ xhiiñaʼ Jehová de guidubi ladxidoʼcaʼ lu patiu ni nuu dentru stiʼ templu espiritual stibe. Bisietenalaʼdxiʼ palangana naroʼbaʼ ni guyuu ndaaniʼ tabernáculo que ne ndaaniʼ templu que laacabe risaca nga guibánicabe nayá ne chúʼcabe galán nezalú Dios, ne ngaca nga naquiiñeʼ guni guiráʼ ca xpinni Cristu. Yanna, ¿paraa runi adorar stale binni o gran muchedumbre Dios yaʼ? Biiyaʼ apóstol Juan nuucabe «delante de trono» stiʼ Dios ne «cayúnicabe xhiiñaʼ ridxí ne huaxhinni». Ne nga peʼ nga ni cayuni gran muchedumbre ndaaniʼ Guidxilayú lu patiu ni nuu fuera de templu espiritual stiʼ Dios (Apoc. 7:​9, 13-15). ¡Guizáʼ galán nga guiranu nápanu ti lugar ra runi adorarnu Jehová ndaaniʼ templu espiritual stiʼ! w23.10 28 párr. 15, 16

Riquiiñeʼ Jehová ca ancianu para gudiicaʼ laanu stipa (Is. 32:​1, 2). Nga runi, guniʼné laacabe ora nuu ni naguu xizaa lii. Ne ora gacaláʼdxicabe gacanécabe lii la? bidii lugar gúnicabe ni. Riquiiñeʼ Jehová laacabe para gápaluʼ stipa. Esperanza ni zeeda lu Biblia de guibáninu sin qué chuʼ dxi gátinu guibáʼ o ndaaniʼ Guidxilayú riʼ ora maʼ nácani ti paraísu, laaca rudiini stipa laanu (Rom. 4:​3, 18, 19). Pur esperanza riʼ nápanu stipa para guni huantarnu ca guendanagana, guni predicarnu ca noticia galán ne gúninu ca dxiiñaʼ ni nápanu ndaaniʼ congregación (1 Tes. 1:3). Guidúʼyanu ximodo gucané esperanza riʼ apóstol Pablo para gunda gupa stipa. Guniʼbe bidxaagalube stale guendanagana, guzanándacabe laabe, bisábacabe laabe ne guyuu biaje qué nidxélabe xi ñúnibe. Dede guyuu ora bilá ñátibe (2 Cor. 4:​8-10). ¿Xi gucané Pablo gapa stipa para guni huantar? Gucuá íquebe esperanza nápabe (2 Cor. 4:​16-18). Nabé gucuá íquebe zabánibe guibáʼ sin qué chuʼ dxi gátibe. Guníʼ íquebe de laani ne pur nga gúpabe «stipa cada dxi». w23.10 15, 16 párr. 14-17

Ora guni orarnu, guníʼ íquenu pa ruuyaʼ Jehová yanna peʼ nga naquiiñeʼ guicabi laanu. Zándaca guiníʼ íquenu naquiiñeʼ guicabi Jehová ca oración stinu nagueenda. Peru ni dxandíʼ la? laabe maʼ nánnabe pora jma galán gacanebe laanu (Heb. 4:16). Pa qué guicabi Jehová laanu nagueenda la? zándaca guiníʼ íquenu ni nabe nga «Coʼ». Peru zándaca ni nabe nga «Guleza xcaadxi». Guzéʼtenu ejemplu stiʼ ti hermanu joven ni canabaʼ guianda. Peru nin ruluíʼ pa ziyanda. Pa ñuni Jehová ti milagru para nusianda laabe, ñándaca niníʼ Binidxabaʼ cayuni joven riʼ ni ná Jehová purtiʼ si bianda (Job 1:​9-11; 2:4). Peru nánnanu maʼ gudixhe Jehová dxi para cuee guiráʼ guendahuará nuu yanna (Is. 33:24; Apoc. 21:​3, 4). Nga runi, cadi cuézanu guni Jehová milagru tiempu riʼ. Yanna, ¿xi zanda guinabaʼ joven riʼ Jehová yaʼ? Zanda guinábabe Jehová gudii laabe stipa ne quixhedxí xquendabiaanibe para cadi guireebe gana ne cadi gusaana de gúnibe ni ná neca huarabe. w23.11 24 párr. 13

Neca bichee Sansón peru qué niree gana. Racaláʼdxibe gúnibe dxiiñaʼ ni bidii Jehová laabe, laani nga tindenebe ca filisteu (Juec. 16:​28-30). Ngue runi de guidubi ladxidóʼ Sansón gunabaʼ Jehová: «Bidii lugar guquixe ca filisteu ni bíʼnicaʼ». Bicaadiaga Dios oración stibe ne bidxiguetaʼ stipa stibe stiʼ biaje. Ne zaqué nga biiti Sansón stale filisteu jma que biaʼ huayuuti. Neca gupa xidé bidxiilú Sansón guiráʼ ni bizaaca pur ti cosa ni cadi jneza biʼniʼ la? qué nusaana de ñúnibe stipa pur gúnibe ni ná Jehová. Nga runi, laanu laaca cadi caquiiñeʼ guireʼnu gana pa bíninu xiixa ni cadi jneza ne pur laani gudiicabe laanu xiixa disciplina o gunítinu xiixa privilegiu. Peru cadi guiaandaʼ laanu, qué riníʼ ique Jehová maʼ qué zanda guchaʼnu (Sal. 103:​8, 9). Neca gucheʼnu, risácanu para laabe ne zanda iquiiñebe laanu cásica bíʼnibe né Sansón. w23.09 6 párr. 15, 16

Riecheʼ Jehová ora runi huantarnu, peru qué riníʼ diʼ nga riéchebe ora ridídinu lu guendanagana. ¿Cadi dxandíʼ riuuluʼ gana ora gánnaluʼ zanda gusiécheluʼ Jehová pa gácaluʼ fiel ne guni huantarluʼ la? (Sal. 5:12). Guiníʼ íquenu ni bizaaca Abrahán. Guyuulaʼdxiʼ Dios ni bíʼnibe purtiʼ biʼniʼ huantarbe ca guendanagana ni bidxaagalube. Guca xhamigu Jehová laabe ne biiyaʼ laabe casi ti binni nachaʼhuiʼ (Gén. 15:6; Rom. 4:​13, 22). Ne zacaca nga zuuyabe laanu. Ziuulaʼdxiʼ Dios ni gúninu pa gácanu fiel ne guni huantarnu, ne cadi pur ca ni gúninu lu xhiiñabe o pur ca privilegiu ni gápanu ndaaniʼ congregación. Ne laani nga ti cosa ni guiranu zanda gúninu, biaʼ tiica si iza nápanu, modo tiica si nabáninu o intiica si habilidad nápanu. Yanna, ¿ñee cadíʼdiluʼ lu xiixa guendanagana la? Pa zacá ni la? cadi guiaandaʼ lii ziuulaʼdxiʼ Dios ni gúniluʼ pa gácaluʼ fiel. Ra gánnanu cusiéchenu Jehová zacané ni laanu iguidxi esperanza ni nápanu. w23.12 11 párr. 13, 14

Nabé risaca gapa ca hombre ni naca xpinni Cristu habilidad riʼ. Ne para gápacabe ni naquiiñeʼ gánnacabe gucaadiágacabe ne guiénecabe ni riníʼ ique ne ni runi sentir xcaadxi binni (Prov. 20:5). Zanda guizíʼdinu guiénenu xi racalaʼdxiʼ tuuxa gabi laanu pur modo riniʼbe, pur ca gestu ne ca ademán ni rúnibe. Ne zanda guizíʼdinu ni ra güínenu xcaadxi binni diidxaʼ. Pa puru pur correu o pur mensaje ruiluʼ diidxaʼ la? jma nagana zaca para lii guiníʼneluʼ tuuxa ora gúʼyaluʼ laa. Nga runi, galán guyúbiluʼ guiníʼneluʼ xcaadxi binni ne cadi gúniluʼ ni pur teléfono si (2 Juan 12). Ti xpinni Cristu ni maʼ biniisi ndaaniʼ xquidxi Dios naquiiñeʼ guiziidiʼ guni dxiiñaʼ para gapa ni iquiiñeʼ ne ni iquiiñeʼ familia stiʼ (1 Tim. 5:8). Galán guiziidiluʼ gúniluʼ xiixa dxiiñaʼ ti gápaluʼ ni tidineluʼ dxi (Hech. 18:​2, 3; 20:34; Efes. 4:28). Biʼniʼ dxiiñaʼ nadipaʼ ne cadi gusaana ndáhuiluʼ xhiiñaluʼ. Zacá zaníʼcabe galán de lii, jma nagueenda zadxélaluʼ dxiiñaʼ ne qué zunítiluʼ ni. w23.12 27 párr. 12, 13

Ora riete lu Biblia «dxi stiʼ Jehová» caníʼ ni de ca dxi gunitilú Dios guiráʼ ca enemigu stiʼ ne gulá xquidxi. Ne maʼ bizaacaʼ nga dxiqué, dxi binduuxeʼ Jehová ca enemigu stiʼ (Is. 13:​1, 6; Ezeq. 13:5; Sof. 1:8). Mayaca gueeda «dxi stiʼ Jehová» zuzulú ni dxi gucaalú ca gobiernu Babilonia guidxi roʼ ne zaluxe ni lu guerra stiʼ Armagedón. Para ganda guilanu «dxi» ca, dede ca yanna naquiiñeʼ chuʼnu listu. Ne Jesús bisiidiʼ naquiiñeʼ «chuʼnu listu» para ca dxi ra «ziuu stale yuubaʼ» o gran tribulación, ca diidxaʼ chuʼnu listu rusihuinni ca ni cadi caquiiñeʼ gusaana de gúninu ni (Luc. 12:40; Mat. 24:21). Lu Primé Carta para ca Tesalonicenses, bichaaga Pablo caadxi cosa para gacanebe ca xpinni Cristu chuʼcaʼ listu ora guedandá dxi stiʼ Jehová. Neca nanna Pablo qué zazaaca ni ca dxi que (2 Tes. 2:​1-3). Peru gúdxibe laacaʼ nabé risaca chuʼcaʼ listu purtiʼ maʼ gaxhadóʼ nuu ni. Laaca galán chinándanu conseju ca. w23.06 8 párr. 1, 2

Lu iza 1978, ndaaniʼ guidxi Tokio (Japón) bicuícabe ti edificiu guizáʼ nasoo, nápani 60 pisu. Ora ridiʼdiʼ binni ne ruuyaʼ ni riníʼ ique pa zanda guni huantar ni ora gueeda ti xu naroʼbaʼ. Peru, ¿xi biʼniʼ ca binni ni bicuí ni para cadi guiaba ni yaʼ? Bíʼnicabe ni naguidxi ne zaqueca ganda guiniibi ni para ganda guni huantar ni ora guniibi Guidxilayú. Laanu ca xpinni Cristu zeeda gácanu casi edificiu nasoo riʼ. ¿Ximodo yaʼ? Ti biʼniʼ ni runi ni ná Jehová caquiiñeʼ gaca naguidxi ne naguudxi. Naguidxi para guzuhuaa dxiichiʼ lu ni runi cré ne cadi guiree cueʼ de ca norma ne ca ley stiʼ Jehová. Ti xpinni Cristu napa xidé «chuʼ listu para guzuuba diidxaʼ» ne cadi gucheené ca principiu ni zeeda lu Stiidxaʼ Dios. Ne laaca gaca naguudxi o riuu «razón» ora caquiiñeʼ ni ne ora zanda (Sant. 3:17). Pa gúninu stipa gácanu zacá, zacané ni laanu para cadi guiníʼ íquenu jma de biaʼ ni caquiiñeʼ guiníʼ íquenu ne laaca qué zaníʼ íquenu zanda gúninu intiica cosa. w23.07 14 párr. 1, 2

Bidxiilú Jesús Binidxabaʼ, laa gudixhe prueba nezalube para gucaa laabe gucheenebe Jehová (Mat. 4:​1-11). Gudixhe ique Binidxabaʼ guni intiica si para gucaa Jesús gucheené Dios ti cadi quixe rescate que. Laaca bidxaagalú Jesús xcaadxi prueba biaʼ tiempu biʼniʼ xhiiñaʼ Jehová lu Guidxilayú riʼ. ¿Casi xi laa yaʼ? Casi dxi guzananda ca enemigu stibe laabe ne guniʼcaʼ zuuticaʼ laabe (Luc. 4:​28, 29; 13:31). Gúpabe paciencia ca discípulo stibe purtiʼ nácacaʼ binni ruchee (Mar. 9:​33, 34). Lu juiciu ni bíʼnicabe para guuticabe laabe, guizáʼ bininácabe laabe ne biʼniʼ burlácabe laabe. Despué biiticabe laabe casi ti binni qué iquiiñeʼ ne guizáʼ gucanabe (Heb. 12:​1-3). Ne ora mayaca gátibe, maʼ qué ñapa diʼ Jehová laabe, ngue runi gupa xidé biʼniʼ huantarbe stúbibe dede ra gútibe (Mat. 27:46). Rihuinni dxíchica nabé naroʼbaʼ nga ni gudixe Jesús para bilá laanu. Ora riníʼ íquenu guiráʼ sacrificiu ni biʼniʼ Jesús pur laanu, rannaxhiinu laabe jma dede ridxá tipa ladxidoʼno. w24.01 10, 11 párr. 7-9

Gápanu paciencia racané ni laanu chuʼnu tobi si né xcaadxi. Pa nácanu binni ni napa paciencia zucaadiaga chaahuinu ora guiníʼ xcaadxi (Sant. 1:19). Laaca zuyúbinu chuʼ paz. Ne qué zúninu xiixa sin guiníʼ íquenu ne qué zaninu xiixa ni guniná xcaadxi. Ne pa chuʼ tuuxa guniná laanu qué zadxiichinenu laa ne qué zuyúbinu guquíxenu ni laabe. Ni zúninu nga zuni huantarsaanu ne zuni perdonarnu de guidubi ladxidoʼno ni guni stobi laanu (Col. 3:​12, 13). Gácanu binni ni napa paciencia racané ni laanu guicaanu decisión jneza. Lugar de guicaanu decisión nagueendaca o sin guiníʼ íquenu la? galán gúninu stipa guidúʼyanu xii nga ni jma jneza gúninu. Guzéʼtenu ti ejemplu, ora cuyúbinu dxiiñaʼ, zándaca guiníʼ íquenu guicaanu intiica dxiiñaʼ guidxélanu. Peru pa nápanu paciencia zaníʼ íquenu pa zabeeni tiempu chúʼnenu familia stinu tobi si ne pa qué zusaana de gúninu ni ná Jehová. Racané paciencia ca laanu cadi gápanu stale guendanagana. w23.08 22 párr. 8, 9

Pa guireeluʼ gana pur cudxiiluluʼ xiixa deseu ni cadi jneza, guníʼ ique promesa ni bíʼniluʼ Jehová ra bidiiluʼ laa xquendanabániluʼ, zudiini lii stipa para gudxiiluluʼ ca tentación ni guidxaagaluluʼ. ¿Xiñee yaʼ? Ora rudii tuuxa xquendanabani Jehová, rusaana de guni ca cosa ni riuulaʼdxiʼ. Ndiʼ riníʼ rusaana de gúnibe ca deseu stibe ne ca cosa ni qué riuulaʼdxiʼ Jehová (Mat. 16:24). Nga runi, ora tídinu xiixa prueba, qué zaníʼ ique xhaatanu xi gúninu. Para laanu la? ti cosa si nga zanda gúninu: cadi guchéʼnenu Jehová. Zuyúbinu gusiéchenu laabe. Dxi bidiʼnu xquendanabáninu Jehová, gudixhe íquenu gúninu puru si ni riuuláʼdxibe. Gácanu casi Job, neca gudíʼdibe lu guendanagana nabé feu, de guidubi ladxidoʼbe guniʼbe ca diidxaʼ riʼ: «¡Dede dxi gateʼ, qué zucheeniaʼ Dios!» (Job 27:5). w24.03 9 párr. 6, 7

Jehová nga «Dios ni rannaxhii» (2 Cor. 13:11). Rizaaláʼdxibe cada tobi de laanu. Ne nánnanu «qué rusaana de gannaxhiibe» laanu (Sal. 32:10). Ora qué rusaana de guiníʼ íquenu ximodo rusihuínnibe nadxiibe laanu, jma ridúʼyanu laabe casi ti binni ne runi sentirnu nuunu jma gaxha de laabe. Nga runi zanda guni orarnu laabe ne guxhélenu ladxidoʼno nezalube para gábinu laabe caquíʼñenu gannaxhiibe laanu. Zanda gábinu laabe guiráʼ ni riguu xizaa laanu ne chuʼnu seguru riénebe laanu ne racaláʼdxibe gacanebe laanu (Sal. 145:19). Zeeda gaca guendarannaxhii stiʼ Jehová casi ti guí ni ruchaa binni ora nananda. Racaláʼdxinu chuʼnu gaxha de Jehová. Nabé napa guendarannaxhii stibe stipa, peru guizáʼ galán modo rusihuínnibe ni. ¡Riéchenu stale purtiʼ guizáʼ nadxii Jehová laanu! Guiranu racaláʼdxinu guininu: «Nadxieeʼ Jehová» (Sal. 116:1). w24.01 31 párr. 19, 20

Qué ñabi si Jesús binni lá Dios nga Jehová. Maca nanna ca judíu que ni. Bisiénebe laacaʼ ximodo peʼ naca Jehová (Juan 1:​17, 18). Casi lu Escrituras Hebreas riete naca Jehová ti Dios ni riá ne riene binni (Éx. 34:​5-7). Bisihuinni Jesús zacá ni ora guníʼ de ejemplu stiʼ hijo pródigo. Ora ridúʼndanu de zíturuʼ maʼ biiyaʼ bixhózebe laabe, bixooñeʼ bidxaagalú laabe, gudiidxi ne biʼniʼ perdonar laabe de guidubi ladxidóʼ, riénenu pabiáʼ riá Jehová ne riene laanu (Luc. 15:​11-32). Rihuinni dxíchica gucané Jesús binni guiziidiʼ ximodo peʼ naca Jehová. w24.02 10 párr. 8, 9

Riguixhedxí Jehová ladxidóʼ tuuxa ni cayacaná. ¿Xi zacané laanu guianu ne quixhedxinu ladxidóʼ xcaadxi cásica runi Jehová ni yaʼ? Gápanu cualidad ni zacané laanu quixhedxinu ladxidóʼ tuuxa. Guidúʼyanu caadxi de laacani. ¿Xi zacané laanu para cadi gusaana de gannaxhiisaanu ne quixhedxisaanu ladxidoʼno guiráʼ dxi yaʼ? (1 Tes. 4:18). Guni sentirnu ni cayuni sentir stobi, gannaxhiisaanu casi nadxiinu familia stinu ne gácanu nachaʼhuiʼ (Col. 3:12; 1 Ped. 3:8). Ora rianu binni ne rápanu xcaadxi cualidad casi laani la? riale de laanu quixhedxinu ladxidoʼcaʼ ora cadíʼdicaʼ lu guendanagana. Bisiene Jesús ni sicaríʼ: «Ni nuu ndaaniʼ ladxidóʼ binni nga riníʼ. Ti binni nachaʼhuiʼ la? ribee ca cosa galán nuu ndaaniʼ ladxidóʼ» (Mat. 12:​34, 35). Rihuinni dxíchica ti modo nabé risaca gusihuínninu nadxiinu ca hermanu stinu nga ora riguixhedxinu ladxidoʼcaʼ. w23.11 10 párr. 10, 11

Caquiiñeʼ guinábanu gacanécabe laanu para ganda guiénenu ca profecía ni zeeda lu Biblia. Quíxhenu ti ejemplu, guníʼ ique nuuluʼ ndaaniʼ ti guidxi ni qué runibiaʼluʼ peru ziné ti xhamíguluʼ lii ni runibiáʼ lugar que, nánnabe paraa peʼ nuutu ne runibiaʼbe guiráʼ ca calle que. ¡Aque galán nga yené xhamíguluʼ lii! Zeeda gaca Jehová casi amigu ni bizéʼtenu lu ejemplu riʼ, nánnabe xi tiempu nabáninu ne xi chiguizaaca. Nga runi, para ganda guiénenu ca profecía ni zeeda lu Biblia caquiiñeʼ gácanu humilde ne guinábanu Jehová gacané laanu (Dan. 2:28; 2 Ped. 1:​19, 20). Ca padre ni nadxii xiiñiʼ racaláʼdxicaʼ guibani ca xiiñicaʼ galán ne ngaca nga ni racalaʼdxiʼ Jehová para ca xiiñiʼ (Jer. 29:11). Peru laabe zanda guiniʼbe xi guiráʼ chiguizaaca despué. Nga runi, gucaláʼdxibe guicaa lu Stiidxabe ca profecía para ganda gánnanu ca cosa risaca ni chiguizaaca (Is. 46:10). w23.08 8 párr. 3, 4