Julio

Sicaríʼ nga bisihuinni Jesús naca casi Bixhoze (Juan 14:9). ¿Xi rizíʼdinu de ca milagru ni biʼniʼ Jesús? Guizáʼ nadxii Jesús ne Bixhoze laanu. Dxi guyuu Jesús lu Guidxilayú riʼ, biquiiñeʼ poder ni bidii Dios laa para gusianda binni ni cayacaná, zacá bisihuínnibe nadxiibe laacaʼ. Guzéʼtenu ti ejemplu. Ti biaje gunabaʼ chupa ciegu laabe gacanebe laacaʼ (Mat. 20:​30-34). Lu relatu ca ná «guizáʼ biá» Jesús ca hombre riʼ, ngue runi bisiándabe laacaʼ. Diidxaʼ griegu «guizáʼ biá» riníʼ ni guni sentir tuuxa dede ndaaniʼ ladxidóʼ laa peʼ nga cayacaná. Cumu biá Jesús binni la? gunnaxhiibe laacaʼ ne nga bicaa laabe gudiibe ni gó ca ni candaana ne gusiándabe ti hombre napa lepra (Mat. 15:32; Mar. 1:41). Nanna dxiichinu nadxii Jehová ne Jesús laanu ne riuubaʼ ladxidoʼcaʼ ora gúʼyacaʼ cayacananu (Luc. 1:78; 1 Ped. 5:7). ¡Guizáʼ maʼ racaláʼdxicabe cueecabe guiráʼ ca guendanagana ni napa binni! w23.04 3 párr. 4, 5

Caquiiñeʼ gucáʼnanu ca cosa ni cadi jneza ni riníʼ ique binni guidxilayú. Nga runi, gúninu stipa guni estudiarnu Biblia, chuunu guiráʼ ca reunión ca ne cadi gusaana de guni predicarnu. Jehová peʼ cayabi laanu qué zudii lugar gueeda xiixa prueba luguianu ni qué zanda guni huantarnu (1 Cor. 10:​12, 13). Ca dxi jma nagana riʼ, caquiiñeʼ guni orarnu Jehová para cadi guixélenu de laa. Racaláʼdxibe guxhélenu ladxidoʼno nezalube (Sal. 62:8). Bisisaca ne bidii xquixe peʼ laabe pur guiráʼ ni rúnibe, laaca gunabaʼ laabe gudiibe lii valor para guni predicarluʼ ne gacanebe lii gudxiiluluʼ ca guendanagana ni nápaluʼ ne gucaanaluʼ ca tentación ca. Cadi gudiiluʼ lugar chuʼ ni gucueeza lii para guni orarluʼ Jehová. w23.05 7 párr. 17, 18

¿Xiñee riuunu ca reunión ca? Primé, purtiʼ racaláʼdxinu gusisácanu Jehová (Sal. 26:12; 111:1). Guiropa, para ganda cúʼsaanu gana laanu ca tiempu nagana riʼ (1 Tes. 5:11). Ora rindisananu ne runi comentarnu lu ca reunión ca la? cayúninu guiropaʼ cosa riʼ. Peru ¿xiñee rácani nagana yaʼ? Purtiʼ zándaca ridxíbinu guindisananu, o purtiʼ zándaca qué rudiicabe laanu comentariu guiráʼ biaje racaláʼdxinu. Guníʼ apóstol Pablo naquiiñeʼ: «Cúʼsaanu gana laanu». Cadi guiaandaʼ laanu zanda cuʼnu gana ca hermanu stinu ora gudiʼnu ti comentariu nachucu. Pa gúninu ni la? zusihuínninu nápanu fe ne qué zadxíbinu guindisananu. Ne pa qué gudiicabe laanu comentariu biaʼ racaláʼdxinu la? cadi guireʼnu gana ne guiéchenu ora guni comentar ca hermanu stinu (1 Ped. 3:8). w23.04 20 párr. 1-3

Dxi maʼ napa jma de 70 iza de nuu ca judíu de esclavu ndaaniʼ guidxi Babilonia, guníʼ Ciro, rey de Persia, maʼ zanda guibiguétacabe xquídxicabe (Esd. 1:​2-4). Guietenaláʼdxinu, guidxi Babilonia qué rundaa ca esclavu stiʼ, nga rusihuinni Jehová peʼ nga biʼniʼ ni (Is. 14:​4, 17). Maʼ lu náʼ ca medo ne ca persa nuu guidxi Babilonia ne maʼ guníʼ rey que maʼ zanda guireecabe. Para stale de ca ni naca xaíque ndaaniʼ familia, guca nagana para laacaʼ guicacaʼ decisión pa zareecaʼ o ziaanacaʼ. Caadxi de laacaʼ maʼ huaniisicaʼ ne nagana zaca para laacaʼ guibiguétacaʼ Jerusalén. Ne cumu stale de laacaʼ gúlecaʼ Babilonia, qué runibiaʼcaʼ sti guidxi. Para laacabe la? guidxi Jerusalén naca ni ti guidxi ra bibani ca bixhozebiidacabe. Nuu de laacabe maʼ napa bueltu, negocio ne lidxi. Ngue runi guca nagana para laacabe chécabe Jerusalén purtiʼ para laacabe cadi xquídxicabe ni. w23.05 14 párr. 1, 2

Riguu Stiidxaʼ Dios gana laanu guni huantarnu, guianu binni ne gannaxhiinu. Lucas 21:19 ná: «Pa guni huantartu zulatu xpídatu». Colosenses 3:12 ná: «Lagusihuinni nadxiitu binni ne riatu laacaʼ». Ne 1 Tesalonicenses 4:​9, 10 ná: «Dios peʼ nga cusiidiʼ laatu gannaxhiisaatu. […] Hermanu caʼ, canábadu laatu gannaxhiitu jma que biaʼ nadxiitu yanna». Ca diidxaʼ riʼ gucuá ca ni para ca hermanu ni cayuni huantar, ni riaʼ binni ne napa guendarannaxhii. Peru caquiiñeʼ cadi gusaana de gusihuínnicabe ca cualidad riʼ. Laanu laaca caquiiñeʼ gúninu ni. ¿Xi zanda gacané lii yaʼ? Galán guiníʼ íqueluʼ ximodo bisihuinni ca primé xpinni Cristu ca cualidad ca ne ximodo zanda chinándaluʼ ejemplu stícabe, ni zacané lii chuʼluʼ listu ora gueeda gran tribulación. Nga runi, ora guzulú gran tribulación maʼ zanda guni huantarluʼ ne ziuuluʼ listu para cadi gusaana de gúniluʼ ni. w23.07 3 párr. 4, 8

Neza riʼ zacané ni laanu guni adorarnu Jehová tobi si ne modo racalaʼdxiʼ ndaaniʼ paraísu espiritual ne guicaanu ca ndaayaʼ ni guedané Reinu stibe. Nga runi, casi ca ungidu ne xcaadxi dendxuʼ caquiiñeʼ sanu lu «Neza ni Nayá» riʼ (Juan 10:16). Dede iza 1919 millón de binni, hombre, gunaa ne xcuidi maʼ nuucaʼ lu neza riʼ purtiʼ maʼ bireecaʼ de Babilonia guidxi roʼ, xaíque stiʼ guiráʼ religión ni qué rusiidiʼ ni dxandíʼ. Biiyaʼ Jehová cadi chuʼ xiixa ni guchiiñaʼ neza ni nayá ra chisá ca judíu que ora bireecaʼ de Babilonia (Is. 57:14). Ne laaca maʼ bisiá Jehová «Neza ni Nayá» ra zizá ca xpinni tiempu riʼ. ¿Ximodo yaʼ? Gayuaa iza ante de iza 1919, bizulú biquiiñeʼ Jehová caadxi hombre ni nayá ladxidóʼ ni nadxii Dios para gusiacaʼ neza ni nayá stibe (bichaaga ni né Isaías 40:3). Bizulú bíʼnicabe dxiiñaʼ para ganda gaca chaahuiʼ neza que. Ti zacá binni ni nayá ladxidóʼ guireecaʼ de Babilonia guidxi roʼ ne chuʼcaʼ ndaaniʼ paraísu espiritual, ne laani nga guni adorarcaʼ Jehová tobi si ne modo racalaʼdxiʼ. w23.05 15, 16 párr. 8, 9

Racalaʼdxiʼ Jehová chuʼnu nayecheʼ ora gúninu ni ná ne gúninu ni de guidubi ladxidoʼno (2 Cor. 9:7). Yanna, ¿xiñee caquiiñeʼ gúninu stipa ugaandanu xiixa meta pa qué gápanu gana gúninu ni yaʼ? Guidúʼyanu ejemplu stiʼ apóstol Pablo. Laa guníʼ: «Runeʼ castigar cuerpu stinneʼ ne runeʼ controlar ni casi rúnicabe né ti esclavu» (1 Cor. 9:​25-27). Gudixhe ique apóstol Pablo guni ni jneza dede ne ora huaxiéʼ racaláʼdxibe gúnibe ni. ¿Ñee guyuulaʼdxiʼ Jehová xhiiñabe la? Guyuulaʼdxiʼ pue. Ne guluu Jehová ndaayaʼ laabe pur dxiiñaʼ nadipaʼ ni bíʼnibe (2 Tim. 4:​7, 8). Riecheʼ Jehová ora guuyaʼ cayúninu stipa pur ugaandanu xiixa meta neca huaxiéʼ gana nápanu. ¿Xiñee yaʼ? Purtiʼ nánnabe rúninu ni purtiʼ nadxiinu laabe neca nuu biaje huaxiéʼ riuuláʼdxinu gúninu ni gudixhe íquenu ugaandanu ca. Zaguu Jehová ndaayaʼ laanu pur ca stipa gúninu pur ugaandanu ca meta stinu cásica bíʼnibe né apóstol Pablo (Sal. 126:5). Ra guidúʼyanu ca ndaayaʼ ni gudii Jehová laanu, zacané ca ni laanu chuuláʼdxinu ugaandanu ca meta ni nápanu. w23.05 29 párr. 9, 10

Bizeeteʼ apóstol Pablo zeeda gaca ca ni qué zalá ora gueeda dxi stiʼ Jehová casi ca ni nisiaasiʼ. Ora nisiaasiʼ ti binni qué lica ranna xi guiráʼ cazaaca, qué ranna pa cadiʼdiʼ tiempu ne qué ridxela xi guni pa málasi gucuaaniʼ xiixa laa. Ngueca nga rizaaca ne ca binni ni qué runi ni ná Jehová: Stale de laacaʼ nisiaasicaʼ (Rom. 11:8). Neca cayuuyacaʼ cazaaca stale cosa peru qué runi crecaʼ pa maʼ nabáninu lu «ca últimu dxi» ne maʼ gaxha nuu gran tribulación (2 Ped. 3:​3, 4). Peru laanu nánnanu nabé risaca chinándanu conseju de chuʼnu listu ne cadi gásinu jmaruʼ si ca dxi nagana riʼ (1 Tes. 5:6). Naquiiñeʼ chuʼnu tranquilu ne guzuhuaʼnu dxiichiʼ. ¿Xiñee yaʼ? Para cadi chuʼnu lu política ne cadi guiábanu lu guiráʼ ni runi binni. Ne cumu jma maʼ gaxha nuu dxi stiʼ Jehová la? jma nga zucaa binni laanu gúninu guiropaʼ cosa ni bizéʼtenu ca. Peru cadi naquiiñeʼ guiníʼ ique xhaatanu xi chigúninu purtiʼ zacané espíritu stiʼ Dios laanu chuʼnu tranquilu ne guiníʼ ique chaahuinu xi gúninu ne laaca zacané ni laanu guicaanu decisión jneza (Luc. 12:​11, 12). w23.06 10 párr. 6, 7

¿Xi riníʼ íqueluʼ ora gunadiágaluʼ de Sansón? Zándaca riníʼ íqueluʼ ti hombre guizáʼ nadipaʼ, ne zacá ni; peru laaca bicheebe, pur ni bíʼnibe ca gúpabe guendanagana. Neca bicheebe, biiyaʼ Jehová pabiáʼ fe bisihuínnibe lu xquendanabánibe ne guná guicá lu Biblia ejemplu stibe para ganda guizíʼdinu de laabe. Biquiiñeʼ Jehová Sansón para gacané Israel, xquidxi. Pur espíritu santu gudxi Jehová apóstol Pablo, gucá lá Sansón lu lista ra zeeda lá ca ni gupa fe (Heb. 11:​32-34). Neca gudiʼdiʼ Sansón lu guendanagana, peru qué nusaana de nuyubi ñacané Jehová laa. Zanda guizíʼdinu de ejemplu stibe ne ximodo zanda cuʼ ni gana laanu. w23.09 2 párr. 1, 2

Ni zacané laanu guni huantarnu nga guxhélenu ladxidoʼno nezalú Jehová (1 Tes. 5:17). Zándaca cadi cadxaagaluluʼ xiixa guendanagana nagasi, peru galán guyúbiluʼ gacané Jehová lii ora chuʼ xiixa ni guchiichi lii, ora qué guidxélaluʼ xi gúniluʼ o nuuluʼ xizaa. Pa ruyúbiluʼ gacané Jehová lii gudxiiluluʼ ca guendanagana ni redané cada dxi la? zacané ni lii gudxiiluluʼ ca guendanagana ni gueeda despué. Ne zanna dxiichiluʼ Jehová peʼ nanna pora ne ximodo gacané lii (Sal. 27:​1, 3). Pa guni huantarnu ca guendanagana gápanu yanna zacané ni laanu guni huantarnu ora gueeda gran tribulación (Rom. 5:3). ¿Xiñee caninu ndiʼ yaʼ? Stale hermanu ni maʼ huadxaagalú xiixa guendanagana runi sentircaʼ zanda gudxiilucaʼ intiica guendanagana ni gueeda despué. Ora ruuyacabe racané Jehová laacabe guni huantárcabe la? jma riroobaʼ fe stícabe. Ne fe ca racané laacabe gudxiilúcabe xcaadxi guendanagana (Sant. 1:​2-4). w23.07 3 párr. 7, 8

Naca Jehová ti Dios ni riuu razón purtiʼ naca humilde ne riá binni. Guzéʼtenu ti ejemplu, bisihuinni Jehová naca humilde dxi chigunitilú ca binni malu de guidxi Sodoma. Biquiiñebe caadxi ángel para gábicaʼ Lot guiree de ndaaniʼ guidxi que ne checaʼ lu ca dani que. Peru cadxibi Lot cheʼ raqué. Pur ngue gunábabe chinebe familia stibe Zóar, ti guidxihuiiniʼ ni laaca gudixhe ique Dios gunitilú. Ñándaca ninabaʼ Jehová Lot ñuni guiráʼ ni gúdxibe laa, peru Jehová biʼniʼ ni gunabaʼ Lot laa que neca nánnabe pur ngue zalá guidxi Zóar (Gén. 19:​18-22). Gayuaa iza despué, bisihuinni Jehová riá ca binni de guidxi Nínive ra biseendaʼ profeta Jonás para gabi laacabe zunitilú guidxi que pur guiráʼ cosa malu ni rúnicabe. Peru ora guca arrepentir ca binni de Nínive que biá Jehová laacabe ne bitiidilaʼdxiʼ stóndacabe, ne maʼ qué nunitilú guidxi que (Jon. 3:​1, 10; 4:​10, 11). w23.07 21 párr. 5

¿Xi bizíʼdinu de ni bizaaca Jehoás? Beeda gácabe casi ti yaga ni nuu xcu luguiáʼ si, ni caquiiñeʼ ti estaca para guzuhuaa dxiichiʼ, ne Jehoiadá nga guca estaca stibe. Peru ora guti Jehoiadá ne bidale ca binni ni bidxiideche Jehová la? bisaana Jehoás de guni ni ná Jehová, casi ñaca ñábabe purtiʼ bindubi ti bi yooxhoʼ. ¿Xi rusiidiʼ ndiʼ laanu yaʼ? Rusiidiʼ ni laanu cadi guidxíbinu guchéʼnenu Jehová purtiʼ si ca hermanu stinu ne familia stinu rúnicaʼ ni o racané ca laanu gúninu ni. Nga runi, para cadi gusaana de gúninu ni ná Jehová, caquiiñeʼ gusiróʼbanu guendarannaxhii ne respetu ni nápanu laabe. Ne zanda gúninu ni ra guni estudiarnu Stiidxabe, guiníʼ íquenu ni cadúʼndanu ne cadi gusaana de guni orarnu laabe (Jer. 17:​7, 8; Col 2:​6, 7). Qué rinabaʼ Jehová laanu xiixa ni qué zanda gúninu. Ni racaláʼdxibe nga gúninu ni ná Eclesiastés 12:13: «Bidxibi Dios ni dxandíʼ ne biʼniʼ ni ná guiráʼ ca mandamientu stiʼ, purtiʼ nga nga ni naquiiñeʼ guni guiráʼ binni». Pa guidxíbinu guchéʼnenu Jehová, zanda gudxíʼlunu intiica guendanagana ni gueeda ne qué zusaananu de gúninu ni ná Dios. Ne gastiʼ zuxheleʼ laanu de Jehová. w23.06 19 párr. 17-19

Nánnanu dxandíʼ zuni Dios ni maʼ guníʼ, purtiʼ sicaríʼ ruzulube promesa stibe: «Óraque ná ni zuba lu trono que» (Apoc. 21:5a). Nabé risaca ca diidxaʼ riʼ, purtiʼ chonna biaje guníʼ Jehová de ca visión ni zeeda lu Apocalipsis ne ndiʼ nga ca diidxaʼ ni biquiiñeʼ ora bizulú guniʼbe tobi de ca biaje riʼ. Raríʼ ridúʼyanu Jehová peʼ nga biʼniʼ promesa riʼ, cadi ti ángel ni napa poder ne ninca Jesús. Ruquidxi ndiʼ confianza stinu lu ca diidxaʼ ni zeeda despué, purtiʼ Jehová naca «Dios ni qué rusiguii» (Tito 1:2). Rihuinni dxíchica naquiiñeʼ gápanu stale confianza lu ca diidxaʼ ni cá lu Apocalipsis 21:​5, 6. Guidúʼyanu diidxaʼ «¡Biiyaʼ!». Diidxaʼ griegu ni raca traducir «¡Biiyaʼ!» riete ni stale biaje lu Apocalipsis. ¿Xi zeeda despué yaʼ? Dios guníʼ: «Cayuneʼ guiráʼ cosa nacubi». Neca despué nga chiguni Jehová ca cosa riʼ, nanna dxíchibe zúnibe ca ni, nga runi, caniʼbe casi ora mápeca cayaca ca ni (Is. 46:10). w23.11 3, 4 párr. 7, 8

Bidxiilú apóstol Pablo ca cosa ni maʼ biaa guni. Guidúʼyanu chupa chonna ejemplu. Ora guníʼ Jesús naquiiñeʼ guni sufrir ne gatiʼ para ganda gaca cumplir ca profecía zeeda lu Biblia, gudindené Pedro laabe (Mar. 8:​31-33). Nabé stale biaje gudinde diidxaʼ Pedro ne xcaadxi apóstol que para gánnacaʼ tuu ngue ni jma risaca ládecaʼ (Mar. 9:​33, 34). Gueelaʼ ante gatiʼ Jesús, gudxiʼbaʼ ti guí ique Pedro ne bigá diaga ti hombre (Juan 18:10). Ne laaca gueelaʼ que bidxíbibe ne chonna biaje biʼniʼ negarbe runi biabe xhamígube Jesús (Mar. 14:​66-72). Ne últimu «biinabe dede guyuu yuubaʼ ladxidoʼbe». Nabé naguunduʼ nuu Pedro ca dxi que, peru qué niníʼ ique diʼ Jesús maʼ qué gápabe remediu. Despué de biasa Jesús de lade guetu, bidii laabe ti oportunidad para gusihuínnibe nadxiibe laa. Gunabaʼ Jesús laabe gápabe ca dendxuhuiiniʼ stiʼ (Juan 21:​15-17). Raqué nga gundisaʼ Jesús ladxidóʼ Pedro. Ne pur ngue nuube ndaaniʼ guidxi Jerusalén lu saa Pentecostés ne laabe nga tobi de ca primé ni bibí né espíritu santu. w23.09 22 párr. 6, 7

Gudxi apóstol Pedro xcaadxi xpinni Cristu ni laaca nácacaʼ ancianu: «Lagapa ca dendxuhuiiniʼ stiʼ Dios» (1 Ped. 5:​1-4). Nánnanu guizáʼ nadxii ca ancianu ca hermanu ne racaláʼdxicaʼ gápacaʼ laacabe. Peru nuu biaje zándaca zuni sentir ca ancianu qué zanda guni cumplircaʼ né dxiiñaʼ ni gucuaacaʼ, purtiʼ nuu xhiiñacaʼ o maʼ bidxágacaʼ. Pa nga nga cazaacaluʼ la? ¿xi zanda gúniluʼ yaʼ? Galán gábiluʼ Jehová ximodo cayuni sentirluʼ. Sicaríʼ bicaa Pedro: «Pa nuu tuuxa racané stobi la? guni ni né stipa ni rudii Dios laa» (1 Ped. 4:11). Zándaca nuu de ca hermanu stiluʼ nápacaʼ guendanagana ni qué zanda gaca chaahuiʼ lu guidxilayú riʼ. Peru bietenalaʼdxiʼ jma zanda gacané Jesucristu, «pastor ni jma risaca», laacabe. Ne zanda gúnibe ni yanna ne zaqueca lu guidxilayú cubi ca. Ni racalaʼdxiʼ Jehová nga gannaxhii ca ancianu ca hermanu, gápacaʼ laacabe ne gácacaʼ «ti ejemplu para ca dendxuhuiiniʼ». w23.09 29, 30 párr. 13, 14

Naquiiñeʼ gápanu laanu de modo riníʼ ique ca binni ni qué runi ni ná Dios. Pa chinándanu modo riníʼ ique binni ni qué runi ni ná Dios, zanda gucáʼnanu ca norma stiʼ Jehová (1 Cor. 3:19). «Guendabiaaniʼ stiʼ binni guidxilayú» riʼ rucaani laanu gúninu ni racaláʼdxinu. Guidúʼyanu ni bizaaca caadxi hermanu ni guyuu ndaaniʼ congregación de Pérgamo ne de Tiatira. Bizulú guníʼ íquecabe casi ca binni ni qué runi ni ná Dios, biʼniʼ adorárcabe bidóʼ ne biʼniʼ cometércabe pecadu sexual. Ngue runi bidii Jesús conseju nadipaʼ guiropaʼ congregación riʼ, purtiʼ bidiicaʼ lugar chuʼ ca ni runi cometer pecadu sexual ndaaniʼ congregación (Apoc. 2:​14, 20). Ca dxi stinu riʼ, laaca zanda gucaa binni laanu guiníʼ íquenu modo riníʼ íquecaʼ. Zándaca gabi familia stinu laanu gúninu ni ná ladxidoʼno ne cadi ni ná ca ley stiʼ Jehová. Ne ngaca zándaca guiníʼ ca binni ni runibiaʼnu. Zándaca gábicabe laanu cadi malu gúninu ni riuuláʼdxinu ne maʼ guirutiʼ qué runi guiráʼ ni zeeda lu Biblia. Nuu biaje zanda guiníʼ íquenu cadi nayaʼniʼ ca instrucción ni cudii Jehová laanu o zándaca guiníʼ íquenu gúninu «ni maʼ cadi cá lu Stiidxaʼ Dios» (1 Cor. 4:6). w23.07 16 párr. 10, 11

Caquiiñeʼ María, jñaa Jesús, stipa para guni ni ná Jehová. Zacaxiiñibe neca caʼruʼ guichaganabe. Qué gánnabe gusiniisibe baʼduʼ, peru chigusiniisibe ni chigaca Mesías que. Ne cumu qué huayápabe relación sexual la? ¿ximodo gusiénebe José, hombre ni chiguichaganabe que, nacaxiiñibe yaʼ? (Luc. 1:​26-33). ¿Ximodo gupa María stipayaʼ? Bidiibe lugar gacané xcaadxi laabe. Gunábabe Gabriel gusiene laabe jma de dxiiñaʼ gucuaabe que (Luc. 1:34). Qué nindaa de ngue, biʼniʼ María ti biaje «neza región ra nuu dani» stiʼ Judá. Yegánnabe Elisabet, pariente stibe. Biʼniʼ felicitar Elizabet María, ne pur espíritu stiʼ Dios, guníʼ ti profecía ni guluu gana María ni caníʼ de baʼduhuiiniʼ ni chigapa María que (Luc. 1:​39-45). Sicaríʼ guníʼ María de Jehová: «Maʼ bíʼnibe stale cosa ne poder stibe» (Luc. 1:​46-51). Biquiiñeʼ Jehová Gabriel ne Elisabet para gudii stipa María. w23.10 14, 15 párr. 10-12

Nuu ti grupu de 144.000 xpinni Cristu ni bibí pur espíritu santu ne nuuca nayecheʼ purtiʼ nápacaʼ ti amistad especial né Jehová. Zuninecaʼ Jesús dxiiñaʼ casi sacerdote (Apoc. 14:1). Laga nuurúcabe lu Guidxilayú riʼ, ribí Dios laacabe né espíritu santu stiʼ ne ricaa laacabe casi xiiñiʼ. Nga runi, Santo ni guyuu ndaaniʼ tabernáculo que riniʼni privilegiu naroʼbaʼ ni nápacabe purtiʼ maʼ gucuaa Dios laacabe casi xiiñiʼ (Rom. 8:​15-17). Santísimo ni guyuu ndaaniʼ tabernáculo que riniʼni guibáʼ, ra nuu Jehová. «Cortina» ni biʼniʼ dividir Santo de Santísimo que riniʼni cuerpu ni gupa Jesús dxi guyuu lu Guidxilayú riʼ. Cuerpu stibe que bicueeza ni laabe de ñuube guibáʼ casi Sumo Sacerdote nandxóʼ ndaaniʼ templu espiritual stiʼ Dios. Ra bidii Jesús cuerpu stiʼ casi sacrificiu para gulá binni, bixhélebe ti neza ti ganda guibani ca xpínnibe ni bibí né espíritu santu guibáʼ. Nga runi laaca naquiiñeʼ gusaana ca ungidu cuerpu sticaʼ ti ganda guicacaʼ premiu sticaʼ guibáʼ (Heb. 10:​19, 20; 1 Cor. 15:50). w23.10 28 párr. 13

Ora guníʼ ca hombre de Efraín mal de Gedeón qué nicábibe naduxhuʼ (Juec. 8:​1-3). Qué nidxiichibe, sínuque gúcabe humilde ne bicaadiágabe laacaʼ, né diidxaʼ nadóʼ gundétebe xiana sticaʼ. Zusihuinni ca ancianu nuu xpiaanicaʼ pa chinándacaʼ ejemplu stiʼ Gedeón. Ora guiníʼcabe mal de laacaʼ, galán gucaadiágacaʼ ne guicábicaʼ né diidxaʼ nadóʼ (Sant. 3:13). Zacá zacanécabe chuʼ congregación tobi si. Dxi biʼniʼ ganar Gedeón ca madianita nezalú guidxi que bisisácabe Jehová (Juec. 8:​22, 23). ¿Ximodo zanda chinanda ca ancianu ejemplu stiʼ Gedeón yaʼ? Ra gusisácacabe Jehová ora gúnicabe xiixa (1 Cor. 4:​6, 7). Casi, pa guni felicitárcabe ti ancianu pur modo rusiidiʼ la? zanda guiniʼbe ni bisiidibe ca zeeda ni lu Stiidxaʼ Dios ne guiranu rizíʼdinu gusiidinu jneza purtiʼ rusiidiʼ organización stiʼ Jehová laanu. Nga runi, galán guinabadiidxaʼ ca ancianu pa rusisácacaʼ Jehová ora rusiidicaʼ o rusisácacaʼ laca laacaʼ. w23.06 4 párr. 7, 8

Pa caʼruʼ gudii Jehová laanu ni gunábanu laa, galán guiníʼ íquenu: «¿Ñee biaʼsi ndiʼ ni canabaʼ riʼ la?». Stale biaje riníʼ íquenu maʼ nánnanu xii nga ni jma caquíʼñenu. Peru zándaca ti tiempu si zacané ni canábanu ca laanu. Zándaca cayuni orarnu para guinábanu gaca chaahuiʼ ti guendanagana ni nápanu modo rábinu, peru zándaca nuu sti modo jma galán gaca chaahuiʼ ni. Ne zándaca qué riuulaʼdxiʼ Jehová chupa chonna de ca ni canábanu ca (1 Juan 5:14). Guiníʼ íquenu ti guendaxheelaʼ ni gunabaʼ Jehová guni xiixa para cadi guixeleʼ xiiñicabe de laa. Ruluíʼ galán ni canábacabe ca. Peru ni dxandíʼ la? qué runi obligar Jehová binni guni ni ná, sínuque racaláʼdxibe guiranu, dede né ca xiiñinu, guni adorarnu laabe purtiʼ nga nga ni racaláʼdxinu gúninu (Deut. 10:​12, 13; 30:​19, 20). Yanna, ¿xi zanda guinabaʼ guendaxheelaʼ riʼ Jehová yaʼ? Zanda guinábacabe Jehová gacané laacabe chindá ni cusiidicabe xiiñicabe ndaaniʼ ladxidóʼ ti gannaxhii Jehová ne gaca xhamigu laabe (Prov. 22:6; Efes. 6:4). w23.11 21 párr. 5; 23 párr. 12

Ora quixhedxinu ladxidóʼ xcaadxi, ¿xiñee nácani ti modo risaca gusihuínninu nadxiinu laacabe yaʼ? Ti libru ni caníʼ de Biblia cusiene diidxaʼ griegu ni biquiiñeʼ Pablo para guiníʼ «quixhedxí ladxidóʼ» riniʼni «chuʼnu gaxha de tuuxa para cuʼnu gana laa ora cadiʼdiʼ lu guendanagana». Nga runi, ora quixhedxinu ladxidóʼ tuuxa hermanu ni cayacaná cayacanenu laa cadi guiree de lu neza ni ziné lu guendanabani. Ne cada biaje quixhedxinu ladxidóʼ ti hermanu o ti hermana rusihuínninu nadxiinu laa (2 Cor. 7:​6, 7, 13). ¿Xiñee caquiiñeʼ guianu binni para quixhedxinu ladxidóʼ yaʼ? Ora ti binni riáʼ tuuxa ni cayacaná racalaʼdxiʼ quixhedxí ladxidóʼ binni ca ne guni xiixa para gacané laabe. Nga runi, primé rianu ne despué riguixhedxinu ladxidoʼbe. Ngaca nga rizaaca né Jehová. Bisiene Pablo riáʼ Jehová binni ne nga rucaa laabe quixhedxibe ladxidoʼcaʼ. Guniʼbe naca Jehová «Bixhózenu [ . . . ] ne riá laanu ne riguixhedxí ladxidoʼno» (2 Cor. 1:3). w23.11 9, 10 párr. 8-10

Guiranu ca xpinni Cristu nánnanu zadxaagalunu guendanagana. Guiníʼ íquenu ni gudxi apóstol Pablo ca xpinni Cristu de Tesalónica: «Dxi nuurudu ra nuutu maca gúdxidu laatu zápanu guendanagana, ne yanna maʼ cadídinu lúcani» (1 Tes. 3:4). Ne ra nuu ca xpinni Cristu de Corinto bicaabe: «Racaláʼdxidu gánnatu pabiáʼ gucanadu [ . . . ] zácaxadu ñátidu raqué» (2 Cor. 1:8; 11:​23-27). Dede yanna dxandíʼ ca diidxaʼ riʼ. Laanu ca xpinni Cristu nánnanu zadídinu lu guendanagana (2 Tim. 3:12). Dede dxi bizulú gúpaluʼ fe Jesús ne cayúniluʼ ni ná, zándaca ca xhamíguluʼ o familia stiluʼ huayuninacaʼ lii. ¿Ñee huayápaluʼ guendanagana ra dxiiñaʼ pur nácaluʼ honradu lu guiráʼ cosa la? (Heb. 13:18). ¿Ñee huacaalú Gobiernu lii pur riníʼneluʼ xcaadxi de esperanza ni nápaluʼ la? Intiica si guendanagana cadídinu, Pablo guníʼ naquiiñeʼ chuʼnu nayecheʼ. w23.12 10, 11 párr. 9, 10

Gúparuʼ Jacob stale guendanagana. Chupa de ca xiiñibe —Simeón ne Leví— biʼniʼ biidicaʼ lá Jehová ne lá familia stibe. Ne guti, xheelabe, Raquel ra gule guiropa xiiñiʼ. Ne dxi maʼ huaniisi Jacob gupa xidé guyé Egipto purtiʼ guyuu ti hambre guidxi ra nabeza (Gén. 35:​16-19; 37:28; 45:​9-11, 28). Qué nusaana Jacob de ñapa fe lu ca promesa stiʼ Jehová neca gupa guiráʼ guendanagana ca. Ne bisihuinni Jehová cayuulaʼdxiʼ ni cayúnibe. Guidúʼyanu ximodo. Bidii Jehová Jacob stale cosa. Ne ora bíʼyabe nabániruʼ José bidiibe xquixe peʼ Jehová purtiʼ zácaxabe maʼ guti. Cumu guizáʼ xhamigu Jacob Jehová la? gunda bidxiilú guirá ca guendanagana ni gupa (Gén. 30:43; 32:​9, 10; 46:​28-30). Pa gaca xhamígunu Jehová ne chuʼnu gaxha de laa la? zanda gudxíʼlunu ca guendanagana ni cadi cabézanu. w23.04 15 párr. 6, 7

Lu Salmo 23, guníʼ David nadxii Jehová laa ne rapa laa né stale cariñu. Ne guni David naca Jehová Pastor stiʼ, ne bisiene pabiáʼ xhamigu laabe. Qué nidxibi David purtiʼ nanna cayuni dirigir Jehová laa. Ne siempre biyúbibe gacané Jehová laabe. Nanna David qué zusaana Jehová laa, ne qué zusaana de gannaxhii laabe biaʼ dxi guibánibe. Guidúʼyanu xi bicaa laabe gápabe stale confianza Dios. Biʼniʼ sentir David qué nusaana de ñapa Jehová laa ne siempre bidii laabe ni caquiiñebe. Nánnabe naca Jehová xhamígube ne riuulaʼdxiʼ ni rúnibe. Ngue runi guyuu David seguru zacané Jehová laabe cadi guiaadxaʼ laabe gastiʼ, gápabe ni caquiiñebe intiica si guizaaca. Cumu gupa David confianza nadxii Jehová laa la? gucané ni laabe cadi chuʼbe xizaa, sínuque chuʼbe nayecheʼ (Sal. 16:11). w24.01 29 párr. 12, 13

Despué de biluxe Segunda Guerra Mundial, randa runi predicar ca xpinni Jehová stale lugar sin gucueezacabe laacaʼ. Yanna riʼ, maʼ stale binni runibiáʼ Jehová ne cayaca predicar lu guidubi naca Guidxilayú. Ca dxi riʼ, ruyubi ca hermanu ni nuu lu Grupu ni Zániru gabi Cristu laacaʼ xi gúnicaʼ. Rúnicabe stipa gusihuinni ca instrucción ni rudiicabe laanu modo riníʼ ique Jehová ne Jesús. Ne riquiiñecabe ca superintendente de circuito ne ca ancianu para chindá ca instrucción riʼ ndaaniʼ ca congregación. Nuu ca ancianu ungidu ne zaqueca guiráʼ xixé ca ancianu «ndaaniʼ náʼ [Cristu] ladu derechu» (Apoc. 2:1). Cumu imperfectu laacabe la? nuu biaje rucheecabe, cásica bizaaca Moisés, Josué ne ca apóstol (Núm. 20:12; Jos. 9:​14, 15; Rom. 3:23). Peru nánnanu cayabi Jesús mozo ni nuu xpiaaniʼ ne ca ancianu xi naquiiñeʼ gúnicaʼ ne qué zusaana de gúnibe ni. Nga runi nápanu stale razón para gápanu confianza caquiiñeʼ Jehová ca hermanu riʼ para gabi laanu xi naquiiñeʼ gúninu. w24.02 23, 24 párr. 13, 14

Laanu laaca zanda gusisácanu Jehová ra guininu né stale cariñu de laabe. Ne ra gudiʼnu xquixe peʼ laabe pur guiráʼ ni cayúnibe pur laanu. Ora runi predicarnu, ni racaláʼdxinu nga guiale de ladxidóʼ binni gunibiáʼ Jehová ne gannaxhiicaʼ laabe cásica nadxiinu laabe (Sant. 4:8). Riuuláʼdxinu iquíʼñenu Biblia para gusíʼdinu laacaʼ de ca cualidad galán napa Jehová, casi guendarannaxhii, rúnibe ni jneza, pabiáʼ nuu xpiaanibe ne poder ni nápabe. Sti modo zanda gusisácanu lá Jehová ne gusiéchenu ladxidóʼ nga ra gúninu stipa chinándanu ejemplu stiʼ. Ora rúninu ni, zándaca nuu tu rinabadiidxaʼ xiñee maʼ gadxé laanu de xcaadxi binni (Mat. 5:​14-16). Zándaca ra guidxaaganu laacabe chuʼ ti oportunidad para gusiénenu laacabe xiñee. Nga zucaa ca binni ni nayá ladxidóʼ guiziidicaʼ de Dios. Ora rusisácanu Jehová modo bizéʼtenu riʼ la? rusiéchenu ladxidoʼbe (1 Tim. 2:​3, 4). w24.02 10 párr. 7

Joven, para gácaluʼ ti xpinni Cristu ni maʼ biniisi ndaaniʼ xquidxi Dios, caquiiñeʼ guiziidiluʼ gúniluʼ dxiiñaʼ. Ndiʼ zacané lii guni cumplirluʼ ca privilegiu ni gápaluʼ ndaaniʼ congregación, gápaluʼ ti dxiiñaʼ ni gacané lii gudiiluʼ ni caquiiñeʼ familia stiluʼ, ne zacaneni lii gaca llevarluʼ xcaadxi binni. Ndiʼ nga ti cosa ni zanda gúniluʼ. Biziidiʼ gúʼndaluʼ ne gucaaluʼ jneza. Biblia ná tuuxa ni ruundaʼ Stiidxaʼ Dios guiráʼ dxi ne riníʼ ique ni cayuundaʼ la? riuu nayecheʼ ne riree guiráʼ ni runi jneza (Sal. 1:​1-3). Zacá riziidibe ximodo riníʼ ique Jehová ne nga racané laabe guiníʼ ique chaahuibe ne gácabe ti binni ni riuu razón (Prov. 1:​3, 4). Caquiiñeʼ ca hermanu ne ca hermana chuʼ tu gusiidiʼ ne gudii conseju ni zeeda lu Biblia laacaʼ. Pa nánnaluʼ gúʼndaluʼ ne gucaaluʼ jneza zanda guni prepararluʼ discursu ne comentariu ni chuuláʼdxicabe ne ganda guquídxiluʼ fe stiʼ xcaadxi. Zanda guicaaluʼ nota ni guquidxi fe stiluʼ ne uguu gana xcaadxi hermanu. w23.12 26, 27 párr. 9-11

Ora maʼ cadxíbiluʼ, guníʼ ique xi chiguni Jehová huidxe si ora maʼ qué guinni Binidxabaʼ. Lu asamblea regional ni gúpanu lu iza 2014 que gudiʼdiʼ ti demostración ne luni gudiʼdiʼ ti hermanu ni cayuundané familia stiʼ 2 Timoteo 3:​1-5 peru biindabe ni casi ti profecía de modo zabani binni ndaaniʼ paraísu: «Lu guidxilayú cubi ca ziuu tiempu para guibani binni nayecheʼ, purtiʼ zannaxhiicaʼ binni, zannaxhiicaʼ ca cosa stiʼ Dios, nánnacaʼ ziuu ni qué zanda gúnicaʼ, zácacaʼ humilde, zusisácacaʼ Dios, zuzuubacaʼ stiidxaʼ jñaacaʼ ne stiidxaʼ bixhózecaʼ, zácacaʼ agradecidu ne leal, zápacaʼ cariñu familia sticaʼ, ziuucaʼ de acuerdu, siempre zaniʼcaʼ bien de sti binni, zucueezacaʼ laca laacaʼ, zácacaʼ nadóʼ, zannaxhiicaʼ ni jneza, zapa binni confianza laacaʼ ne ziuucaʼ razón, qué zácacaʼ orgulloso, zannaxhiicaʼ Dios lugar de gúnicaʼ ni riuuláʼdxisicaʼ, zusihuínnicaʼ runi adorarcaʼ Dios pur modo nabánicaʼ, siempre biyubi chuʼluʼ gaxha de ca clase binni riʼ». ¿Ñee maʼ biaʼnu guinínenu familia stinu o ca hermanu de modo chiguibáninu ndaaniʼ guidxilayú cubi ca la? w24.01 6 párr. 13, 14

¡Pabiáʼ galán nga gánnanu «cayechené Jehová xquidxi»! (Sal. 149:4). Peru zándaca chuʼ tu guiree gana ne guiníʼ: «Dxandíʼ nga riechené Jehová guiráʼ ca xpinni, peru ¿cayechenebe naa la?». Stale de ca xpinni Dios ni bibani dxiqué guca nagana para laacaʼ guni crecaʼ pa cayechené Dios laacaʼ (1 Sam. 1:​6-10; Job 29:​2, 4; Sal. 51:11). Biblia ruzeeteʼ zanda gusiéchenu Jehová neca nácanu binni ruchee. Peru ¿xi caquiiñeʼ gúninu yaʼ? Caquiiñeʼ gusihuínninu nápanu fe Jesucristu ne chuʼnísanu (Juan 3:16). Zacá zusihuínninu nezalú binni maʼ guca arrepentirnu de ca pecadu stinu ne racaláʼdxinu gúninu ni riuulaʼdxiʼ Jehová (Hech. 2:38; 3:19). Guizáʼ riecheʼ Jehová ora rúninu ca ni bizéʼtenu ca para gaca xhamígunu laa. Pa gúninu stipa guni cumplirnu voto ni bíninu ra bidiʼnu xquendanabáninu Dios la? ziechenebe laanu ne zaca xhamígube laanu (Sal. 25:14). w24.03 26 párr. 1, 2

Pa guinabaʼ ca autoridad laanu gusaananu de guni predicarnu la? zanda chinándanu ejemplu stiʼ ca discípulo que. Nanna dxíchinu zacané Jehová laanu gúninu xhiiñaʼ. Guinábanu laabe gacanebe laanu gácanu nadxibalú, gácanu binni nuu xpiaaniʼ ne guinábanu laabe gacanebe laanu para gudxíʼlunu ca guendanagana gápanu. Stale de laanu cadxaagalú guendanagana, nuu tu laa huará, canazanándacabe laa o guti tuuxa familia stiʼ. Ne jmaruʼ si nagana nabáninu pur ca pandemia ne ca guerra ca. Nga runi, bixheleʼ ladxidoʼloʼ nezalú Jehová ne gudxi laabe guiráʼ ni cayuni sentirluʼ cásica rúniluʼ ni né ti xhamíguluʼ. Zanda chuʼluʼ seguru zacané Jehová lii (Sal. 37:​3, 5). Ora nápanu guendanagana cadi naquiiñeʼ gusaananu de guni orarnu, purtiʼ zacané ni laanu guni huantarnu (Rom. 12:12). Nanna Jehová guiráʼ ni rizaaca ca xpinni «ne rucaadiágabe ora guinábacaʼ gacanebe laacaʼ» (Sal. 145:​18, 19). w23.05 5, 6 párr. 12-15

Ante guicaanu xiixa decisión risaca, primé naquiiñeʼ guiduʼyaʼ chaahuinu xii nga racalaʼdxiʼ Jehová gúninu, ne oracaruʼ maʼ zanda guicaanu ti decisión (Efes. 5:17). Ora rúninu stipa guyúbinu ca principiu ni zacané laanu guicaanu xiixa decisión, rusihuínninu nuunu gánnanu xi riníʼ ique Jehová de ni racaláʼdxinu gúninu. Pa chinándanu ca principiu ca la? zacaanu decisión jneza. Guizáʼ ñuulaʼdxiʼ Binidxabaʼ ñuuyaʼ cayúninu jma pur guidxilayú riʼ dede maʼ qué ñápanu tiempu para gúninu xhiiñaʼ Dios (1 Juan 5:19). Guizáʼ nagueenda zanda guicá ndaaniʼ ique ti xpinni Cristu gapa bueltu, sáʼ scuela o gapa ti dxiiñaʼ galán que guyubi guni jma lu xhiiñaʼ Jehová. Pa guizaacanu nga, zahuinni maʼ cacá modo riníʼ ique binni guidxilayú laanu. Cadi canídinu malu ca cosa riʼ, peru cadi laadicani nga ni jma naquiiñeʼ guisaca lu xquendanabáninu. w24.03 24 párr. 16, 17