Ximodo racané ca ángel ca binni

«Udiʼdi si irá nga, biiya zeda yete sti ángel de ibáʼ ni nabé risaca [...]. Cucaa be ridxi: Ma biaba Babilonia, ma binitilú guidxi roʼ que.» (APOCALIPSIS 18:1, 2.)

1, 2. Ximodo nánnanu riquiiñeʼ Jiobá ca ángel ca para gúnicaʼ xhiiñabe.

APÓSTOL Juan biiyaʼ caadxi visión ni bisihuinni xi chigaca, ne gúcani dxi yesaanacabe binnigola riʼ lu ti isla ni láʼ Patmos. Lu ca visión que bihuinni nuube lu «dxi stiʼ Señor» ne biiyabe stale cosa galán raqué purtiʼ gucané espíritu santu laabe. «Dxi stiʼ Señor» ca bizuluni lu iza 1914 dxi gurí Jesús de rey ne zaluxe ni ora guizaa ti mil iza de cayuni mandarbe (Revelación 1:10, NM).

² Cadi Jiobá Dios peʼ nga beeda para bidii ca visión ca apóstol Juan, sínuque biquiiñebe tuuxa. Apocalipsis 1:1 na: «Ndi nga ni biluíʼ Dios Jesucristu para uluíʼ ca xpinni xi ma zeda dxiña dxi acaʼ. Biseenda be ti ángel stibe beda uluíʼ ni Juan». Jiobá biquiiñeʼ Jesús, ne Jesús biquiiñeʼ ti ángel para guluíʼ apóstol Juan guiráʼ ni sicarú chigaca lu «dxi stiʼ Señor». Lu visión queca biiyaʼ Juan «zeda yete sti ángel de ibáʼ ni nabé risaca». Xi dxiiñaʼ gucuaa ángel riʼ yaʼ. Lu libru stiʼ Apocalipsis na: «Cucaa be ridxi: Ma biaba Babilonia, ma binitilú guidxi roʼ que» (Apocalipsis 18:1, 2). Dxiiñaʼ risaca gucuaa ángel riʼ nga guiníʼ maʼ biaba Babilonia guidxi roʼ ni zeeda gaca guiráʼ ca religión ni cadi dxandíʼ. Nga rusihuinni riquiiñeʼ Jiobá ca ángel ca para gúnicaʼ tobi de ca dxiiñaʼ risaca stibe. Peru, ante guidúʼyanu xi dxiiñaʼ runi ca ángel ca lu ni maʼ gudixhe ique Dios gaca ne ximodo racanécabe laanu la? guidúʼyanu primeru ximodo guyuu ca ángel ca.

Ximodo guyuu ca ángel ca

3. Xii nga ni cadi jneza riníʼ ique stale binni de ca ángel ca.

³ Yanna riʼ la? millón de binni runi cré ca ángel ca. Peru, stale de ca binni ca qué gánnacaʼ xi dxiiñapeʼ rúnicabe o tu bizáʼ laacabe. Nuu binni ni rié lade xiixa religión riníʼ ique riné Dios binnilidxi ni maʼ guti guibáʼ para chuʼ cueʼbe ne gúnibe laa ti ángel. Peru, ñee nga nga ni rusiidiʼ Stiidxaʼ Dios ora ruzeeteʼ ximodo guyuu ca ángel ca, tu bizáʼ laacabe ne xi dxiiñaʼ rúnicabe la?

4. Ximodo na Stiidxaʼ Dios guyuu ca ángel ca.

⁴ Ángel ni jma nandxóʼ ne ni jma risaca nga Miguel (Judas 9). Ángel ca nga Jesucristu (1 Tesalonicenses 4:16). Maʼ raca millón de iza, dxi gudixhe ique Jiobá guzulú guzáʼ guiráʼ ni nuu la? laabe nga primé ángel ni bizáʼ Dios ni beeda gaca Xiiñiʼ (Apocalipsis 3:14). Gudiʼdiʼ si ti tiempu la? maʼ biquiiñeʼ Jiobá primé Xiiñiʼ riʼ para bizáʼ xcaadxi ángel (Colosenses 1:15-17). De laacabe nga caníʼ Dios casi ca xiiñiʼ ora gunabadiidxabe Job: «Paraa nuuluʼ ora bizayaʼ guidxilayú ca. Gudxi ni naa, pa dxandíʼ nannuʼ. [Gudxi naa] tu guluu guié naaze ni, ora guca ca beleguí ca tobi si para bicaacaʼ ridxi cayéchecaʼ, ne bizulú guiráʼ ca xiiñiʼ Dios bisisácacaʼ laa ne ridxi nadipaʼ yaʼ» (Job 38:4, 6, 7). Nga runi nanna dxíchinu Dios nga bizáʼ ca ángel ca ne guizáʼ maʼ xadxí de nabánicabe que binni.

5. Ximodo nuu ca ángel ca.

⁵ Dios «riulaʼdxi [...] gata chaahui irá cosa» na, 1 Corintios 14:33. Nga runi, Jiobá biʼniʼ ca ángel stiʼ chonna grupu. Lu primé grupu ca nuu ca serafín, laacabe nuucabe gaxha de trono stiʼ Dios, riníʼcabe nandxoʼbe ne racanécabe chuʼ xquídxibe nayá; lu guiropa ca nuu ca querubín, laacaʼ qué rudiicaʼ lugar chuʼ tu gucaalú Jiobá pur modo runi mandar, ne lu guionna ca nuu xcaadxi ángel ni rúnicaʼ xhiiñabe (Salmo 103:20; Isaías 6:1-3; Ezequiel 10:3-5; Daniel 7:10). Yanna, ximodo racané ca ángel ca binni yaʼ (Apocalipsis 5:11).

Xi dxiiñaʼ runi ca ángel ca

6. Xi dxiiñaʼ bidii Jiobá ca querubín ca ndaaniʼ jardín ni guyuu Edén que.

⁶ Primé biaje ruzeeteʼ Biblia de ca ángel ca nga lu Génesis 3:24, racá na: «Guladxi [Jiobá] hombre que, ne neza ra rindani gubidxa stiʼ jardín ni guyuu Edén que bizuhuaabe chupa querubín ne ti espada naze bele ni cudii bieque para gapa neza ra nuu yaga de guendanabani que». Ca querubín que bíʼnicaʼ guiráʼ ni gunda para cadi nibiguetaʼ Adán ne Eva ndaaniʼ jardín ra guca lídxicabe primé que. Nga nga ni biʼniʼ ca querubín ca dxi nacubi bibani binni ndaaniʼ Guidxilayú riʼ. Yanna, xi dxiiñaʼ huayuni ca ángel ca dede dxiqué hasta nagasi yaʼ.

7. Xi riníʼ ca diidxaʼ ángel ca lu diidxaʼ hebreu ne griegu, ne ximodo cusihuínnini gunáʼ nga tobi de ca dxiiñaʼ rúnicabe.

⁷ Biblia ruzeeteʼ de ca ángel ca biaʼ tapa gayuaa biaje. Cásica lu diidxaʼ hebreu ne lu diidxaʼ griegu la? diidxaʼ ángel ca riniʼni «tuuxa ni rizané diidxaʼ». Ne nga nga dxiiñaʼ huayuni ca ángel ca, huaquiiñeʼ Dios laacabe para guiniʼné binni. Casi dxi gudxi Jiobá apóstol Juan xi racalaʼdxiʼ la? biquiiñeʼ ti ángel, casi bidúʼyanu lu guiropaʼ párrafo stiʼ tema riʼ.

8, 9. 1) Ximodo gucané ángel que Manóah ne xheelaʼ. 2) Xi zanda guiziidiʼ cani maʼ napa xiiñiʼ de ni gunabaʼ Manóah ángel que.

⁸ Jiobá laaca riquiiñeʼ ca ángel ca para gacané ne gudii stipa ca xpinni ndaaniʼ Guidxilayú riʼ. Dxi guyuu juez ndaaniʼ guidxi Israel la? Manóah ne xheelaʼ gúpacaʼ gana ñápacaʼ ti xiiñicaʼ, peru xheelabe qué ñanda ñapa xiiñiʼ. Óraque biseendaʼ Jiobá ti ángel para gabi gunaa que ca diidxaʼ riʼ: «¡Biaʼ! zaca xiiñiluʼ ne dxandipeʼ zápaluʼ ti xiiñiluʼ, ne cadi naquiiñeʼ diʼ igá guicha íquebe, purtiʼ zaca baʼduʼ ca nazareu para Dios dede ora gale; ne laabe nga chisanírube para gulabe Israel de lu naʼ ca filisteu» (Jueces 13:1-5).

⁹ Xheelaʼ Manóah que gupa ti baʼduʼ ni biree lá Sansón, hombre riʼ nabé runibiáʼ binni historia stiʼ (Jueces 13:24). Ante gale baʼduʼ que la? gunabaʼ Manóah ángel que guibiguetaʼ sti biaje para gusiidiʼ laabe ximodo gusiniisibe baʼduʼ que. Óraque gunabadiidxaʼ Manóah laabe: «Ximodo chiguibani baʼduʼ ca, ne xi dxiiñaʼ chigúnibe yaʼ». Ángel stiʼ Jiobá que gudxi laabe guiráʼ ni gúnibe, casi maca gúdxini xheelabe (Jueces 13:6-14). Nánnanu nabé gucané ca diidxaʼ guníʼ ángel que Manóah. Yanna riʼ maʼ qué reeda ganna diʼ ca ángel ca binni, peru cani napa xiiñiʼ la? galán gúnicaʼ chinándacaʼ ejemplu stiʼ Manóah. Ximodo yaʼ. Ra guyúbicabe gusiidiʼ Jiobá laacabe modo gusiniisicabe ca xiiñicabe (Efesios 6:4).

10, 11. 1) Xi biʼniʼ Eliseo ora biiyaʼ guiráʼ ca soldadu de Siria que, ne xi biʼniʼ sentir mozo stibe. 2) Xi ribeendunu ora ridúʼndanu historia ca.

¹⁰ Ridúʼyanu ximodo bihuinni gucané ca ángel ca Eliseo ni riguixhená que, dxi guyuube Dotán, tobi de ca guidxi stiʼ Israel. Ti dxi, ora biasa mozo stibe siadoʼroʼ la? biiyaʼ naguu stale soldadu leʼ guidxi que ne laaca canacaacaʼ maniʼ ne carru para guinaazecaʼ Eliseo, purtiʼ biseendaʼ rey stiʼ Siria laacabe. Xi biʼniʼ sentir mozo stibe ora biiyaʼ ngue yaʼ. Bidxibi, ne zándaca dede cayaca diti ora gudxi Eliseo: «¡Señor stinneʼ! Xi gúninu yanna yaʼ». Para laabe la? biluxe ca guidxilayú ora bíʼyabe ngue, peru Eliseo bicabi laabe sicaríʼ: «Cadi guidxíbiluʼ, purtiʼ jma stale nga tu nuuné laanu que cani nuuné laacabe». Tuu nga na Eliseo nuuné laacaʼ yaʼ (2 Reyes 6:11-16).

¹¹ Eliseo nanna nuu guiráʼ ca ángel stiʼ Dios para gacané laabe raqué. Peru mozo stibe que cadi cayuuyaʼ diʼ laacabe, ngue runi biʼniʼ orar Eliseo Dios ne gunábabe laa: «Jiobá, rinabaʼ lii guxhéleluʼ lube ti ganda gúʼyabe». Historia ca na «oraqueca bixheleʼ Jiobá lú mozo que, ne gunda biiyaʼ; ne ¡biaguʼyu! guidubi naca lu ca dani que zeeda jma hombre dxiʼbaʼ maniʼ ne zeeda stale carru de guí para tíndenecaʼ ne guiracaʼ naguucaʼ leʼ Eliseo» (2 Reyes 6:17). Mozo stibe que óraque bidii cuenta nuu stale ángel raqué. Ngaca nga laanu, ora rudiʼnu lugar gusiaaniʼ guiráʼ ni cá lu Biblia xpiaaninu la? zudiʼnu cuenta racané ca ángel ca xquidxi Dios ne rápacaʼ laacabe purtiʼ Jiobá ne Cristu cayabi laacabe gúnicabe ni.

Modo gucané ca ángel ca binni dxi bibani Cristu raríʼ

12. Xi guníʼ ángel que para gucané María.

¹² Guiníʼ íquenu pabiáʼ galán biʼniʼ sentir María ora binadiaga ca diidxaʼ riʼ: «Chi aca xiiñi luʼ ne zapu ti badu huiiniʼ. Cuee lá lu laabe Jesús». Ante gabi ángel Gabriel, ni biseendaʼ Dios que laabe ca diidxaʼ ca la? maca guníʼ: «Cadi idxibi lu, María. Ma uluu Dios ndaaya lii» (Lucas 1:26, 27, 30, 31). Ora gúnnabe maʼ guluu Dios ndaayaʼ laabe la? nabé biéchebe ne biʼniʼ sentirbe zanda gaca ni gudxi ángel que laabe.

13. Ximodo gucané ca ángel ca Jesús.

¹³ Sti ejemplu ra bihuinni laaca racané ca ángel ca nga dxi biluxe Jesús de biʼniʼ huantar guionnaʼ biaje gucalaʼdxiʼ Binidxabaʼ nucaa laabe nucheenebe Dios lu desiertu que. Ra cá historia ca cuzeeteʼ xi guca ora biluxe gudíʼdibe lu ca guendanagana ca, na ni sicaríʼ: «Oraque ru bixale binidxaba que de laabe, para beeda caadxi ángel bidii ni gudó be» (Mateo 4:1-11). Gueelaʼ ante gati Jesús que laaca guca sti cosa zacá gá. Cayuubaʼ ladxidoʼbe, bizuxíbibe ne guníʼnebe Dios sicaríʼ: «Bixhozeʼ, pa racalaʼdxu la? bilá naa de enda naná ni cabeza naa riʼ. Peru cadi gaca ni rabeʼ, sínuque ni na luʼ», ne «oraque bidxiña ti ángel de ibáʼ ra nuu be, bidii stipa laabe» (Lucas 22:42, 43). Yanna, ximodo racané ca ángel ca laanu ca dxi riʼ yaʼ.

Modo racané ca ángel ca yanna riʼ

14. Xi guiráʼ guendanagana maʼ huayuni huantar ca testigu stiʼ Jiobá yanna riʼ, ne xi huabeendúcabe.

¹⁴ Ora ridúʼndanu modo cucheeche ca testigu stiʼ Jiobá diidxaʼ yanna riʼ la? rudiʼnu cuenta dxandíʼ cayacané ca ángel ca laacabe. Casi guidxi Alemania ne neza Europa la? xquidxi Jiobá gunda biʼniʼ huantar guiráʼ modo bininá ca soldadu stiʼ gobiernu nazi que laacaʼ dede ante guzulú guiropa guendaridinde roʼ ni guca lu guidubi naca Guidxilayú riʼ ne dede ora bilúxeni. Guendaridinde riʼ bizuluni 1939 ne bilúxeni 1945. Ndaaniʼ guidxi España, Italia ne Portugal la? jma xadxí biʼniʼ huantárcabe modo bininá ca binni ni biseendaʼ ca xaíque stiʼ ca católicu que laacabe. Guidxi roʼ ni guca Unión Soviética ne ca guidxi ra biʼniʼ mandar ni la? stálepeʼ iza guzanándacabe ca Testigu. Ne cadi guiaandaʼ laanu modo maʼ bininácabe ca Testigu ndaaniʼ stale guidxi stiʼ África.a Ne maca yanna riʼ, nabé huazanándacabe ca xpinni Jiobá ndaaniʼ guidxi Georgia, ne nabé naná modo huayuninácabe laacaʼ. Dxandíʼ, biraruʼ ni maʼ huayuni ne cayuni Binidxabaʼ para gucueeza dxiiñaʼ stiʼ ca testigu stiʼ Jiobá. Peru neca huadíʼdicabe lu guiráʼ nga la? jma cadálecabe, purtiʼ cayapa ca ángel ca laacabe (Salmo 34:7; Daniel 3:28; 6:22).

15, 16. Ximodo cayacané ca ángel guiráʼ ca testigu stiʼ Jiobá lu dxiiñaʼ ni cayúnicaʼ lu guidubi naca Guidxilayú.

¹⁵ Ca testigu stiʼ Jiobá nánnacaʼ naquiiñeʼ gucheechecaʼ ca diidxaʼ nacubi ne galán stiʼ Reinu stiʼ Dios lu guidubi naca Guidxilayú. Laaca nánnacabe naquiiñeʼ gacanécabe binni gaca discípulo stiʼ Cristu ra gusiidicabe cani riuulaʼdxiʼ ganna xipeʼ ndiʼ cusiidiʼ Biblia (Mateo 28:19, 20). Peru nánnacabe qué zanda diʼ gúnicabe dxiiñaʼ ca pa qué gacané ca ángel ca laacabe. Nga runi, nabé rudii ca diidxaʼ ni ca lu Apocalipsis 14:6, 7 stipa laacabe. Racá ridúʼndanu sicaríʼ: «[Naa, apóstol Juan,] biiya sti ángel zipapa galahui ibáʼ, zigüí né binni stiidxa Cristu ni qué ziuu dxi initilú. Zigüí né be ni binni de irá ladu, de irá guidxi, ni riníʼ adxé adxé idioma. Bicaa be ridxi, rabi be laacaʼ: Laidxibi Dios ne lausisaca laa, purti ma bidxiña dxi cuidxi cuenta binni. Lausisaca ni bizáʼ ibáʼ ne guidxilayú ne nisadóʼ ne ra rindani nisa».

¹⁶ Ca diidxaʼ ca rusihuínnicani dxandíʼ cudii ca ángel ca stipa ca testigu stiʼ Jiobá ne zanirucaʼ lu dxiiñaʼ ni cayúnicabe de gucheechecabe stiidxaʼ Reinu. Jiobá riquiiñeʼ ca ángel ca para gacanecaʼ guidxiña guiráʼ binni ni racalaʼdxiʼ guiziidiʼ ra nuu ca Testigu stiʼ, ne laaca racané ca ángel ca Testigu para guidxélacaʼ ca binni ni dxandíʼ rapa gana guiziidiʼ. Nga runi, ca testigu stiʼ Jiobá nabé ridxélacaʼ binni ni nuu triste pur xiixa guendanagana o ni caquiiñeʼ guiziidiʼ de Dios. Cumu stale biaje huayácani zacá la? qué zanda diʼ guininu málasi gúcacani.

Maʼ cadi candaa diʼ chigúnicabe ti dxiiñaʼ nabé risaca

17. Xi gunda biʼniʼ ti ángel si ca soldadu de Asiria que.

¹⁷ Maʼ bidúʼyanu rizané ca ángel ca stiidxaʼ Jiobá ne racanecaʼ guiráʼ ca xpínnibe, peru laaca nuucabe para gúnicabe sti dxiiñaʼ. Dxiqué la? biquiiñeʼ Dios laacabe para bisabanáʼ binni malu. Casi lu siglu VIII ante gueeda Jesús, dxi guluu ca soldadu de Asiria leʼ guidxi Jerusalén la? Jiobá guníʼ xi chiguni: «Dxandipeʼ nga qué zudiéʼ lugar guinitilú guidxi riʼ ne zulaʼyaʼ ni ti gánnacabe tuu nga naa ne pur David xpinneʼ». Sti ndaa historia ca cayabi laanu «biree ti ángel stiʼ Jiobá gueelaʼ que ne biiti ti gayuaa ochenta y cinco mil hombre» ni canaguu leʼ guidxi que. «Ora biasa caadxi binni siadóʼ guieʼruʼ la? biiyacaʼ maʼ guti guirácabe.» (2 Reyes 19:34, 35.) ¡Gastiʼ nga stipa stiʼ stale soldadu para stipa napa ti ángel si!

18, 19. Xi dxiiñaʼ risaca chiguni ca ángel ca maʼ cadi candaa diʼ, ne xi zazaaca óraca.

¹⁸ Maʼ cadi candaa diʼ zaquiiñeʼ Jiobá ca ángel ca para gusabanáʼ ca binni malu. Mayaca «guiete Señor Jesús de ibáʼ ne ca ángel ni jma nandxóʼ stiʼ. Purti ziete lade bele para usaba ná cani qué nicaa stiidxaʼ, ne qué ñunibiáʼ Dios» (2 Tesalonicenses 1:7, 8). ¡Guizáʼ naná nga ni zazaaca binni ora gueeda ca ángel ca! Zanitilú guiráʼ cani qué naʼ gucaadiaga ne guni ni na Reinu stiʼ Dios, ni cusiidiʼ ca Testigu guiráʼ binni lu guidubi naca Guidxilayú. Ca binni si ni guyubi Jiobá, ni guni jneza ne cani gaca nachaʼhuiʼ nga cani zalá «dxi guidxiichi Jiobá» ne qué zácacaʼ gastiʼ (Sofonías 2:3).

¹⁹ Rudiʼnu xquíxepeʼ Jiobá purtiʼ riquiiñeʼ ca ángel nandxóʼ stiʼ para gacané ne gudii stipa ca binni runi adorar laa ndaaniʼ Guidxilayú riʼ. Ne ora guiénenu xi cayuni ca ángel ca lu cani naguixhe ique Dios guni la? riguixhedxini ladxidoʼno, purtiʼ nuu ca ángel ni bicaalucaʼ Jiobá que ne maʼ Binidxabaʼ naca xaíque sticaʼ. Lu sti tema ca zadúʼyanu xi zanda guni tuuxa ni dxandíʼ xpinni Cristu para gucaalú Binidxabaʼ ne ca demonio stiʼ, ti cadi gúnicabe laa gastiʼ.

[Cani cá ñee yaza]

Xi biziidiluʼ

• Ximodo guyuu ca ángel ca.

• Xi dxiiñaʼ biʼniʼ ca ángel ca ante gueeda Jesús.

• Xiná Apocalipsis 14:6, 7 de dxiiñaʼ ni cayuni ca ángel ca yanna riʼ.

• Xi dxiiñaʼ risaca chiguni ca ángel ca maʼ cadi candaa diʼ.

[Dibuju/foto ni zeeda lu yaza 13]

Ti ángel gucané Manóah ne xheelaʼ

[Dibuju/foto ni zeeda lu yaza 15]

«Jma stale nga tu nuuné laanu que cani nuuné laacabe»