Ni zacané binnilídxiluʼ chuʼ nayecheʼ

Ximodo zanda guni chaahuiluʼ ca guendanagana gápaluʼ ne xheelaluʼ

Hombre ca na: «Dxi bichaganaʼyaʼ Sara, yendézadu ra lidxi bixhozeʼ ne jñaa caadxi dxi. Ti dxi gunabaʼ xnovia bicheʼ naa chisaanaʼ laa ra lidxi ne carru stidu. Yeniáʼ laabe, peru laaca yeniáʼ ti xiiñehuiineʼ. Ora bibiguetaʼ ra lidxeʼ nabé cadxiichi Sara. Gudinde diidxadu nezalú binnilidxeʼ dede gúdxibe naa riuuladxeʼ xcaadxi gunaa. Óraque laaca bidxiicheʼ ne maʼ qué ñuneluaʼ xi guiráʼ gudxeʼ laabe diidxaʼ ni bichiichi laabe jma».

Gunaa ca na: «Gudxeʼ laabe ca diidxaʼ que pur stale cosa. Nuaa xizaa purtiʼ xiiñidu guizáʼ huará, ne ca dxi que qué gápadidu bueltu. Pur ngue nabé bidxiicheniáʼ Fernando ora yesaana xnovia biʼchiʼ ne yené xiiñidu. Ngue runi, cásipeʼ bibiguétabe gudxeʼ laabe guiráʼ ni cayuneʼ sentir. Ne gudinde diidxadu ne nabé bininá saadu laadu. Despué de ngue nabé naná guyuaa».

ORA ridinde cani maʼ bichaganáʼ ca, ñee riníʼ nga maʼ cadi nadxiicabe la? Coʼ, cadi zacá diʼ ni. Purtiʼ guendaxheelaʼ ni bizéʼtenu ca, Fernando ne Sara, guizáʼ nadxiicaʼ. Peru dede ca guendaxheelaʼ ni nuu jma galán riuu biaje rápacaʼ guendanagana.

Peru, xiñee ridíndecabe, ne ximodo zanda gúnicabe para cadi guchiani xquendaxheelacabe yaʼ. Cumu Dios nga gudixhe guichaganáʼ binni la? nabé jneza nga guidúʼndanu Biblia, Stiidxabe, para gánnanu xi naquiiñeʼ gúninu (Génesis 2:21, 22; 2 Timoteo 3:16, 17).

Laganna xiñee nápatu guendanagana

Stale guendaxheelaʼ riuuláʼdxicaʼ guibánicaʼ galán ne gannaxhiisaacaʼ. Peru, Biblia riníʼ ximodo nga binni, laani nani «irá xixé nu bichéʼ nu, ne qué iquiiñe nin tobi de laanu nezalú Dios» (Romanos 3:23). Nga runi, ora chuʼ xiixa guendanagana lu xquendaxheelaʼ binni la? zándaca raca nagana gucueezacaʼ laca laacaʼ. Ne pa tinde diidxacaʼ la? nuu tu zándaca naquiiñeʼ guni stipa pur cadi guni ni maca biaa guni, casi tindené o gaca naduxhuʼ (Romanos 7:21; Efesios 4:31). Peru, xiruʼ ndiʼ rucaa binni gapa guendanagana lu xquendaxheelaʼ yaʼ.

Tobi de ca razón ca nga, purtiʼ gadxé gadxé nga modo riníʼ cani maʼ bichaganáʼ ca xi cayácacaʼ. Casi ti gunaa láʼ Sandra guníʼ sicaríʼ: «Dxi maʼ bichaganaʼyaʼ bidiee cuenta gadxé gadxé nga modo rinidu ni cazaacadu. Naa riuuladxeʼ guiniéʼ ni bizaaca ne xi pur bizaaca xiixa. Peru xheelaʼ la? zuluaʼsiaʼ riuulaʼdxiʼ ganna ni bizaaca si».

Cadi Sandra si nga rizaaca zacá. Lu stale guendaxheelaʼ zándaca tobi de cani maʼ bichaganáʼ riuulaʼdxiʼ guiníʼ dede primé ne últimu ni bizaaca, ne stobi ca qué chuulaʼdxiʼ guiníʼ de laani. Nuu biaje órapeʼ jma racalaʼdxiʼ tobi de laacabe güiʼ diidxaʼ stobi ca qué náʼ diʼ. Ñee zacá rizaaca lu xquendaxheelaluʼ la? Ñee tobi de laatu jma riuulaʼdxiʼ guiníʼ xi guiráʼ bizaaca ne stobi ca coʼ la?

Sti razón nga cumu gadxé nga modo biniisi cada tobi de laacabe la? nga runi gadxé nga modo riníʼcabe ni cayácacabe. Ti hombre láʼ Javier, ni maʼ ziné gaayuʼ iza de bichaganáʼ, guníʼ sicaríʼ: «Ca binnilidxeʼ la? huaxieʼgá rinidu diidxaʼ ne raca nagana para ladu guinidu ni cayuni sentirdu. Ne nga nabé ruchiichini xheelaʼ. Purtiʼ cumu ca binnilídxibe nabé riuuláʼdxicaʼ güicaʼ diidxaʼ la? nga runi, cadi nagana diʼ raca para laabe guiniʼbe xi cayácabe».

Ñee zabeendunu xiixa pa gúninu stipa pur guni chaahuinu ca guendanagana stinu la?

Caadxi binni ni ruuyaʼ ximodo nabani cani maʼ bichaganáʼ, maʼ bidiicaʼ cuenta nuu ti cosa ni racané laacabe guibánicabe nayecheʼ ne nga nga pa nánnacabe guni chaahuicabe ca guendanagana ni rápacabe. Ne cadi purtiʼ si gabi xheelabe laabe guiráʼ ora «Nadxiee lii», nin purtiʼ galán runi sentirbe ora gatanebe xheelabe nin pur nápacabe stale bueltu.

Jesús laaca guníʼ, ora ti hombre ne ti gunaa guichaganáʼ la? cadi binni diʼ nga cucheelaʼ laacabe, sínuque Dios peʼ nga cayúnini (Mateo 19:4-6). Nga runi, ti guendaxheelaʼ nabani galán la? rusisácacaʼ Dios. Peru pa qué gannaxhii hombre xheelaʼ ne qué guni respetar laabe la? qué zucaadiaga diʼ Jiobá oración stibe (1 Pedro 3:7). Ne gunaa ni qué runi respetar xheelaʼ la? Jiobá nga cadi cayuni respetarbe, purtiʼ laa nga gudixhe gaca hombre xaíque stiʼ ti gunaa (1 Corintios 11:3).

Conseju ni zacané lii: bichaa xpiaʼluʼ pa qué zacaneni lii lu xquendaxheelaluʼ

Neca gadxé modo riniʼluʼ ni cazaacaluʼ ne modo biniisiluʼ la? naquiiñeʼ guchaaluʼ xpiaʼluʼ pa nápaluʼ gana chinándaluʼ ca conseju ni zeeda lu Biblia ne guni chaahuiluʼ ca guendanagana ni gápaluʼ lu xquendaxheelaluʼ. Biʼniʼ ca guendarinabadiidxaʼ riʼ laaca lii:

▪ «Ñee rucueezaʼ naa para cadi guquiixeʼ ni biʼniʼ xheelaʼ naa la?» Biblia na: «Ora nadipaʼ ruxhii binni xii la? riree rini, ne ora guchiichiluʼ stobi la? zuchela tindeluʼ laa» (Proverbios 30:33). Xi riníʼ ca diidxaʼ ca yaʼ. Guidúʼyanu ti ejemplu: zándaca chuʼ ti guendanagana de ximodo iquiiñeʼ bueltu nápacabe para guidxela ni guibaniné binnilídxicabe («Cadi naquiiñeʼ diʼ iquiiñenu stale bueltu ni nápanu lu tarjeta de créditu») zándaca pur laani tinde diidxacabe («Yanna, ñee qué zanda uguuluʼ xpiaaniluʼ ora iquiiñeluʼ ni la?»). Dxandíʼ nga pa xheelaluʼ guxhii xiiluʼ nadipaʼ ora tindené lii pur ni qué ñaca jneza la? zándaca gudii gana lii laaca guxhiiluʼ xiibe ora uquíxeluʼ ni laabe. Peru pa gúniluʼ zacá la? jmaruʼ si zarooba guendanagana stitu.

Nga runi, Santiagu peʼ, tobi de ca hombre bicaa Biblia guníʼ sicaríʼ:«Laguuya si laatu pabiáʼ nahuiini ti batee, peru zanda ucaa gui ni ti guiʼxhi roʼ. Ne ludxi nu laca zeda aca casi ti batee» (Santiago 3:5, 6). Ora qué riguubiáʼ binni ni riníʼ la? zándaca ti cosa huiiniʼ si zúnicabe ni ti guendanagana naroʼbaʼ. Ne ora gatigá rapa ti guendaxheela xiixa guendanagana ni zeeda gaca casi ti lugar ra maʼ gunda gui la? nabé nagana para gannaxhiisaacabe.

Lugar de uquíxhenu ni biʼniʼ tuuxa laanu, ñee zanda chinándaluʼ ejemplu stiʼ Jesús la? Biblia na «ora uluu dí cabe laabe, qué niguu dí be laacaʼ» (1 Pedro 2:23). Ti modo jma nagueenda gucueezaluʼ lii de guiniʼluʼ xiixa ni guniná xheelaluʼ nga gucaadiágaluʼ ni caniʼbe ne gábiluʼ laabe gutiidiláʼdxibe donda stiluʼ pur ni guniʼluʼ para bizulú gudíndetu.

XIÑEE QUÉ GÚNILUʼ NDIʼ Sti biaje tinde diidxaluʼ ne xheelaluʼ, guníʼ ique ca diidxaʼ riʼ: «Qué zunitediáʼ gastiʼ pa gucaadiaʼgaʼ ni cuchiiñaʼ xheelaʼ. Ñee biʼneʼ xiixa ni cuchiichi xheelaʼ la? Xi rucueeza naa gabeʼ laabe gutiidiláʼdxibe donda stinneʼ».

▪ «Ñee qué rulabeʼ ni runi sentir xheelaʼ la?» Stiidxaʼ Dios cayabi laanu: «Irá tu: lachuu tobi si [...] laganaxhii saa casi enda biʼchiʼ» (1 Pedro 3:8). Guidúʼyanu chupa razón ni zándaca cucueeza lii chinándaluʼ conseju ni maʼ bizéʼtenu ca. Zándaca ni cayaadxaʼ lii nga gánnaluʼ xi caníʼ ique xheelaluʼ ne xi cayuni sentirbe. Casi pa cadi nuupeluʼ xizaa pur xiixa cosa cásica nuu xheeluʼ la? zándaca gaʼbuʼ laabe: «Zuluaʼsiaʼ lii maʼ caguusiluʼ luni». Nécapeʼ ni racaláʼdxiluʼ nga gacaneluʼ laabe gúʼyabe guendanagana ca modo naquiiñeʼ gúʼyabe ni, tu ndiʼ riuulaʼdxiʼ gábicabe laa zacá yaʼ. Cásica hombre ne zaqueca ca gunaa ni maʼ bichaganáʼ riuuláʼdxicaʼ guni sentircaʼ riene saacaʼ laacaʼ ne runi sentircaʼ ni cayuni sentírcabe.

Yanna, xiñee nuu biaje qué rizaalaʼdxiʼ diʼ binni ni cazaaca xheelaʼ yaʼ. Zándaca nuu tu runi zacá purtiʼ rudxiibaʼ laaca laa. Ti binni rudxiibaʼ laaca laa la? ruluíʼ qué rulabi ni riníʼ xcaadxi binni. Zándaca rúnibe ni ora quíxhebe apodo ni guni menu sti binni o guchaagabe laacaʼ xiixa ni gusituí lucaʼ. Guiníʼ íquesinu ni biʼniʼ ca fariseu ne escriba bibani dxi sti Jesús ni bidxiibacaʼ laca laacaʼ. Pa ti binni guiníʼ cadi jneza caníʼcabe la? maca zitídxicabe laacaʼ diidxaʼ ni guniná o gusituí lucaʼ (Juan 7:45-52). Peru, Jesús bihuinni gadxé laa purtiʼ biene ca binni ni guyé ra nuu ne cani gudxi laabe xi cayácacaʼ (Mateo 20:29-34; Marcos 5:25-34).

Xi rúniluʼ ora rabi xheelaluʼ lii xiixa ni naguu xizaa laa yaʼ. Ñee rusihuinni modo guicábiluʼ laabe ne modo gúniluʼ luluʼ cayéneluʼ laabe la? O nin rulábiluʼ ni cazaaca xheelaluʼ.

XIÑEE QUÉ GÚNILUʼ NDIʼ Lu xcaadxi semana zeeda ca, biiyaʼ chaahuiʼ ximodo riníʼneluʼ xheelaluʼ. Pa qué rulábiluʼ ni riniʼbe o raʼbuʼ laabe xiixa ni gusituí lube la? nagueendaca gudxi laabe gutiiláʼdxibe stóndaluʼ.

▪ «Ñee riníʼ ique runi xheelaʼ ca cosa ca puru para laasi la?» «Ridxibi si Job Dios la? Ñee cadi naguuluʼ ti leʼ ni rapa laabe, ni rapa lídxibe, ne ti leʼ ni rapa guiráʼ stibe la?» (Job 1:9, 10.) Ne ca diidxaʼ riʼ la? Binidxabaʼ guníʼ cadi de guidubi ladxidóʼ Job cayuni ni na Jiobá, purtiʼ laa guca ti hombre ni bizuubaʼ diidxaʼ.

Pa qué gapa cani maʼ bichaganáʼ ca laacaʼ la? zanda guiníʼ íquecaʼ casi guníʼ ique Binidxabaʼ ca. Casi, pa xheelaluʼ guni xiixa pur lii, ñee riníʼ íqueluʼ xi racaláʼdxibe o pa cucaachibe xiixa la? Ora gucheebe, ñee riníʼ íqueluʼ cadi nacháʼhuibe ne riníʼ íquebe puru para laasibe la? Ñee nagueendaca rieteláʼdxiluʼ xcaadxi biaje bicheebe la?

XIÑEE QUÉ GÚNILUʼ NDIʼ Bicaa lu ti guiʼchiʼ guiráʼ xixé cosa galán ni huayuni xheelaluʼ pur lii, ne xi cosa galán bicaa laabe gúnibe ni.

Apóstol Pablu bicaa: «Pa nadxii lu stobi la? [...] qué ziuu neu laa xiana» (1 Corintios 13:4, 5). Ora dxandíʼ nadxiinu tuuxa la? neca nánnanu ruchee, qué zugábanu panda biaje maʼ bicheene laanu. Pablu laaca guníʼ pa nadxiiluʼ binni la? «zuni cre lu laabe» (1 Corintios 13:7). Cadi purtiʼ nadxiinu binni nga guni crenu guiráʼ xixé ni gabi laanu ne cadi maca ca guiníʼ íquenu mal de sti binni, sínuque ti binni ni dxandíʼ nadxii stobi la? zuni cré ni gábibe laa. Biblia racané laanu gannaxhiinu binni ne chuʼnu listu para gutiidiláʼdxinu stóndacaʼ ne guiníʼ íquenu riale de ndaaniʼ ladxidoʼcaʼ gúnicaʼ xiixa ne cadi pur racaláʼdxicaʼ xiixa (Salmo 86:5; Efesios 4:32). Pa ti hombre gannaxhii xheelaʼ casi maʼ guninu ca la? zabaninebe laa nayecheʼ.

NI ZANDA GUINÍʼ ÍQUELUʼ

▪ Paraa bichee guendaxheelaʼ bizéʼtenu ra ruzulú tema riʼ

▪ Xi zanda gacané naa para cadi guneʼ casi bíʼnicabe ca lu xquendaxheelaʼ yaʼ

▪ Xi guiráʼ de cani bieeteʼ raríʼ naquiiñeʼ guneʼ stipa pur guneʼ yaʼ

* Bidxaa lácabe