Gusihuínninu binni nadóʼ laanu ora gúninu ni gábicabe laanu
«Bisietenalaʼdxi laacabe [...] gaca cabe nadóʼ.» (TITO 3:1, 2.)
1, 2. Xi cayabi Stiidxaʼ Dios laanu gúninu, ne xiñee riquiiñeʼ gúninu zacá.
JIOBÁ, Bixhózenu ni nuu guibáʼ, guizáʼ nadxii laanu, ne gástiruʼ stobi jma nuu xpiaaniʼ que laabe. Nga runi ruyúbinu laabe para gábibe laanu xi naquiiñeʼ gúninu (Sal. 48:14). Discípulo Santiagu guníʼ: «Ni ma bisiene Dios laa la? ma qué lica zucaa ique ni nadxabaʼ, qué zuyubi diidxaʼ, ne qué zucaa lú, sínuque zaca nadóʼ ne ziuu razón [«binni riene», NM]. Ziá binni ne zuni stale enda nachaʼhui de idubi ladxidó, ne cadi para udxiiba binni laa» (Sant. 3:17). Diidxaʼ «nadóʼ» zeeda lu textu ca laaca zanda guininu ni casi tuuxa ni ruzuubaʼ diidxaʼ ne qué ricá tema gaca ni na.
2 Apóstol Pablu guníʼ: «Lagaca nachaʼhui [o «binni riene»] dede izaabi stiidxa tu», o ganna binni zacá laatu (Fili. 4:5)a. Nga runi galán nga gácanu binni riene, o gúninu ni gábicabe laanu. Rusihuínninu zacá laanu ora rúninu ni na Jesucristu, Señor ne Xaíque stiʼ guiráʼ ca xpinni Dios (Efe. 5:23). Ne laaca rusihuínninu zacá laanu ora qué ricanu tema gaca xiixa modo rábinu ora maʼ nuunenu xcaadxi binni.
3, 4. 1) Bizeeteʼ caadxi ejemplu ni rusihuinni xiñee risaca gúninu ni gábicabe laanu. 2) Xi chonna cosa chiguizíʼdinu lu tema riʼ.
3 Guiranu ribeendunu stale cosa galán ora rúninu ni gábicabe laanu ra naquiiñeʼ gúninu ni. Guzéʼtenu ti ejemplu: dxi bihuinni racalaʼdxiʼ caadxi terrorista guniná binni ndaaniʼ guidxi Gran Bretaña la? gudixhe gobiernu stiʼ guidxi que maʼ cadi chiné diʼ binni caadxi cosa ni maca riné ndaaniʼ avión. Xi biʼniʼ ca binni que óraque yaʼ. Bizuubacabe diidxaʼ purtiʼ nánnacabe ngue nga ni nexheʼ gaca para cadi guizaacacabe xiixa. Ora maʼ zigusanu carru ne chindanu ti calle ra ridiʼdiʼ stale carru la? nánnanu naquiiñeʼ guzuhuáʼdxinu para tiidiʼ sti carru ti cadi guizaacanu xiixa ne para cadi guidale carru raqué.
4 Neca nánnanu naquiiñeʼ gúninu zacá la? raca nagana para laanu gúninu ni. Peru guidúʼyanu chonna cosa ni zacané laanu gúninu ni: xi naquiiñeʼ gucaa laanu gúninu ni gábicabe laanu, ximodo naquiiñeʼ guidúʼyanu ca binni ni runi mandar ne pora zanda gúninu ni gábicabe laanu.
Xiñee naquiiñeʼ gúninu ni gábicabe laanu
5. Xi bicaa caadxi esclavu hebreu que guiaanarucaʼ ra nuu xpixuaanacaʼ.
5 Guzéʼtenu ti cosa ni zeeda lu Ley ni gucuaa Moisés ni rusihuinni pabiáʼ risaca nga gúninu ni gábicabe laanu. Ley que na zanda guiree ca binni hebreu que de esclavu dxi gusaacaʼ gadxe iza de cayúnicaʼ dxiiñaʼ o dxi gaca ni rábicabe Jubileu que, ni guedandá primé. Peru, zanda guiaanaruʼ esclavu que pa náʼ (biindaʼ Éxodo 21:5, 6). Xiñee zanda guiaanaruʼ esclavu que yaʼ. Pa guca xpixuaanabe nachaʼhuiʼ ne laabe la? zannaxhiibe laa, nga nga ni zucaa laabe guiaanarube ra nuu para gúnibe xhiiñaʼ.
6. Xi zanda gúninu pa dxandíʼ nadxiinu binni.
6 Zacaca nga laanu, cumu nadxiinu Jiobá la? rucaa ni laanu gudiʼnu xquendanabáninu laabe ne guibáninu para gúninu guiráʼ ni nabe (Rom. 14:7, 8). Apóstol Juan bicaa: «Sicarí nga ganaxhii nu Dios: guni nu ni na. Ne cadi nagana ni na be guni nu» (1 Juan 5:3). Binni ni runi zacá qué ruyubi puru si para laa (1 Cor. 13:4, 5). Ora nadxiinu ca binni ni ridxaaganu la? zucaa nga laanu gúninu xiixa ni gacané para guni sentírcabe galán. Zacá ni, zadúʼyanu primeru xi caquiiñecabe ne qué zuyúbinu puru si para laanu (Fili. 2:2, 3).
7. Xiñee qué rúninu xiixa pa nánnanu ziuu tu qué zuuyaʼ ni jneza ora maʼ canagucheechenu diidxaʼ.
7 Riquiiñeʼ chuʼnu cuidadu ti cadi guninanu binni pur ni guininu o pur ni gúninu (Efe. 4:29). Stale binni de sti guidxi ne ni biniisi gadxé modo que laanu maʼ caziidicaʼ de Dios, pa nadxiinu laacabe la? qué zúninu xiixa ni gucaa laacabe gusaana de guiziidicabe de Jiobá. Ne pur nga stale biaje qué zúninu xiixa ni riuuláʼdxinu. Tuuxa ni naca misionera ne maʼ biaa guidiee o maʼ biaa gucaa ñee media la? qué ricá tema iquiiñeʼ ni ora gudii cuenta huaxiéʼ galán modo ruuyaʼ binni laa ora riquiiñeʼ ni (1 Cor. 10:31-33).
8. Xi qué zúninu pa nadxiinu Dios.
8 Qué rudxíʼbanu laaca laanu purtiʼ nadxiinu Jiobá. Ti biaje, dxi gudindediidxaʼ ca apóstol que purtiʼ racaláʼdxicaʼ gánnacaʼ tu laa jma risaca ládecaʼ la? bizuhuaa Jesús ti hombrehuiiniʼ galahuiʼ de laacaʼ ne gudxi laacabe: «Tutiica acané baʼdu ri pur naa la? casi ñaca cayuni ni naa. Ne tu guni ni naa la? cayuni ni ni biseenda naa. Purti ni jma huaxiéʼ risaca lade tu la? nga nga ni jma risaca» (Luc. 9:48; Mar. 9:36). Zándaca gaca nagana para cada tobi de laanu gácanu casi ti baʼduhuiiniʼ, purtiʼ binni gulené donda laanu ne purtiʼ laaca ruquiinde ladxidoʼno laanu gácanu tuuxa ni risaca. Peru, pa qué gudxíʼbanu laca laanu la? zúninu ni gabi sti binni laanu ne zápanu respetu laacabe (Rom. 12:10).
9. Xi naquiiñeʼ gánnanu primeru ti ganda guzúʼbanu diidxaʼ.
9 Jma nagueenda zuzúʼbanu diidxaʼ pa gudiʼnu cuenta maʼ bisaana Dios lu naʼ caadxi binni para guni mandar. Laanu, ca xpinni Cristu, rinándanu modo maʼ gudixhe Dios naquiiñeʼ gaca mandar binni. Apóstol Pablu bisihuinni zacá ni ora guníʼ: «Racaladxe ganna tu, Cristu nga xaíque sti irá hombre, ne hombre nga xaíque sti gunaa, ne Dios nga xaíque sti Cristu» (1 Cor. 11:3).
10. Xi rusihuínninu ora ruzúʼbanu stiidxaʼ Dios.
10 Ora ruzúʼbanu stiidxaʼ Jiobá, Bixhózenu ni nadxii laanu ca la? rusihuínninu laabe nga runi mandarbe. Laabe nánnabe xi guiráʼ rizaacanu ne zudiibe guiráʼ ni caquiiñenu. Galán cadi guiaandaʼ ndiʼ laanu ora guni tuuxa xiixa cosa ni gusihuinni qué runi respetar laanu o dede gúnipeʼ laanu xiixa purtiʼ cadxiichi. Pablu bicaa: «Laguni biaʼ ganda para cadi chuʼ dinde né tu irutiʼ». Ne para gánnanu ximodo gúninu ni la? bidiibe sti conseju riʼ: «Hermanu ni nadxiee caʼ, cadi uquixe tu ni guni cabe laatu, sínuque lausaana ni lu ná Dios, purti cá ni lu Xquiʼchi be ra na be: Xcuenta nuu ni, ne naa uquixe ni laacabe» (Rom. 12:18, 19).
11. Ximodo rusihuínninu ruzúʼbanu stiidxaʼ Cristu casi xaíque.
11 Laaca naquiiñeʼ gudiʼnu cuenta maʼ bisaana Dios lu naʼ caadxi binni para quíxhecaʼ ximodo gaca xiixa lade ca binni ridagulisaa. Lu primé capítulo stiʼ libru Apocalipsis rihuinni napa Jesucristu caadxi beleguí ndaaniʼ naʼ ladu derechu (Apo. 1:16, 20). Ca beleguí ca nga zeeda gácacaʼ ca binnigola ni nuu lade ca binni ridagulisaa. Ca binnigola riʼ rúnicaʼ guiráʼ ni na Cristu ne rusihuínnicabe nadxiicabe binni cásica biʼniʼ Jesús. Jesús maca guníʼ ziuu ti «mozo ni nuu xpiaaniʼ ne ni runi jneza» ni zudii guiráʼ ni iquiiñeʼ ca xpinni Cristu para guiziidicaʼ de Dios, ne guiranu rinándanu ni rusiidiʼ mozo riʼ (Mat. 24:45-47). Cumu riuuláʼdxinu guidúʼndanu cani rudii mozo riʼ laanu ne rúninu guiráʼ ni rusiidicani la? rusihuínninu ruzúʼbanu stiidxaʼ Cristu casi xaíque. Zacá racanenu chuʼ ca binni ridagulisaa galán ne chuʼcaʼ tobi si (Rom. 14:13, 19).
Ñee naquiiñeʼ gúninu guiráʼ ni gábicabe laanu la?
12. Xiñee qué zanda gúninu guiráʼ ni gabi binni laanu.
12 Peru, cadi guiráʼ diʼ ni gabi binni laanu nga gúninu. Xiñee yaʼ. Purtiʼ pa chuʼ tu gabi laanu gusaananu cani runi crenu o gabi laanu cadi guzúʼbanu stiidxa Dios la? qué zúninu ni nabe. Xi biʼniʼ ca primé xpinni Cristu que ora gudxi ca xaíque stiʼ ca religión que laacabe gusaanacabe de gusiidicabe de Jesús yaʼ. Guizáʼ nadxibalú guca Pedru ne xcaadxi apóstol que para bicábicaʼ laacabe: «Jma naquiiñe uzuʼba du stiidxa Dios que stiidxa binni» (Hech. 4:18-20; 5:28, 29). Ngaca nga ni rúninu yanna: ora gacalaʼdxiʼ ca gobiernu ca gucueezacaʼ laanu de gucheechenu diidxaʼ la? qué rúnidinu ni riníʼcabe, sínuque ruyúbinu xcaadxi modo gucheechenu diidxaʼ sin gudiicabe cuenta. Pa guiníʼcabe maʼ qué zanda gucheechenu diidxaʼ de yoo pur yoo la? ruyúbinu xcaadxi modo guinínenu binni ti zacá gúninu dxiiñaʼ bisaanané Dios laanu. Ne pa maʼ qué nácabe guidagulisaanu casi rúninu yanna la? rúninu ca guendaridagulisaa ca jma nahuiiniʼ ti cadi gudiicabe cuenta (Rom. 13:1; Heb. 10:24, 25).
13. Xi guníʼ Jesús naquiiñeʼ gúninu ora guinabaʼ cani runi mandar ca laanu gúninu xiixa.
13 Lu libana ni bidii Jesús lu dani que la? bisihuinni ziuu ora zúninu ni guiníʼ ti binni ni runi mandar, laabe guniʼbe: «Ne tu gacalaʼdxi tinde né laatu para gaxha xcamixa tu la? lausaana né ca laa xhamarra tu. Ne pa chuʼ tobi de cani runi mandar uguáʼ laatu bultu stiʼ ti kilómetru la? laguáʼ ni chupa kilómetru» (Mat. 5:40, 41).b Pa guiénenu binni ne guiale de ladxidoʼno gacanenu laacabe la? zucaa nga laanu gúninu jma que biaʼ canábacabe laanu gúninu (1 Cor. 13:5; Tito 3:1, 2).
14. Xiñee qué liica zúninu ni riníʼ ca binni ni maʼ bidxiideche Dios.
14 Nécapeʼ jneza nga gúninu ni gábicabe laanu la? qué ziuu dxi gúninu ni riníʼ ca binni ni maʼ bidxiideche Dios. Qué riquiiñeʼ diʼ gucaadiáganu laacabe ti cadi guchaʼnu guiráʼ ni dxandíʼ maʼ bizíʼdinu lu Biblia ne zacá ganda chuʼnu tobi si ne ca binni ridagulisaa. Sicaríʼ guníʼ Pablu de cani cadi dxandíʼ xpinni Cristu: «Qué nudíʼ du lugar ñaca ni na caʼ, nin ti ratu huiiniʼ, purti racalaʼdxi du guiaana né tu ni dxandí evangeliu sti Cristu» (Gál. 2:4, 5). Huaxiéʼ nga ca binni ni maʼ bidxiideche Dios ni racalaʼdxiʼ guchenda laanu, peru pa chuʼ tobi la? qué zazaaláʼdxinu laa, sínuque zúninu ni jneza.
Qué ricá diʼ ca binnigola tema gaca ni nacaʼ
15. Ximodo zanda gusihuinni ca binnigola qué ricacaʼ tema gaca ni nacaʼ ora ridagulisaacaʼ.
15 Tobi de ca cosa ni naquiiñeʼ guni ca binnigola ca nga guiénecaʼ binni. Sicaríʼ bicaa Pablu: «Tuuxa cá ique gaca xaíque sti ca xpinni Cristu la? [...] naquiiñe gaca nadóʼ», o cadi guicá tema gaca ni na (1 Tim. 3:2, 3). Ne jma naquiiñeʼ guni ca binnigola ca zacá ora chiguuyacaʼ xiixa ni caquiiñeʼ ca binni ridagulisaa. Ante quíxhecabe xi gaca la? cada tobi de laacabe zanda guiníʼ ximodo ñuulaʼdxiʼ ñácani, peru cadi caquiiñepeʼ guiníʼ guirácabe ximódopeʼ gácani. Despué de gúʼyacabe ximodo na Biblia jma jneza gaca ni cuzeetecabe ca la? zándaca óraca maʼ zuchaa ti binnigola modo guníʼ gácani. Lugar de guiníʼ ti binnigola cadi jneza ni caníʼ xcaadxi binnigola ne guicá tema gaca xiixa modo racalaʼdxiʼ la? binnigola ni maʼ huaniisi lu Stiidxaʼ Dios ca zuni modo gábicabe laa. Zándaca gadxé gadxé modo guníʼcabe gaca xiixa ora bizulúcabe, peru ni zacané laacabe chúʼcabe tobi si nga guni orárcabe, guiníʼ íquecabe de laani, gusihuínnicabe zándaca cadi galanpeʼ modo guníʼcabe gaca xiixa ne gánnacabe ziuu ora zúnicabe ni gabi stobi laacabe (1 Cor. 1:10; biindaʼ Efesios 4:1-3).
16. Xi naquiiñeʼ guni tuuxa ni naca binnigola lade ca binni ridagulisaa.
16 Tuuxa ni naca binnigola lade ca binni ridagulisaa naquiiñeʼ guni stipa pur chinanda ni na Dios lu guiráʼ ni guni. Naquiiñeʼ gúnibe zacá ora chigánnabe ca binni ridagulisaa para uguube gana laacaʼ, purtiʼ nga nga ni zacané laabe para guiénebe laacaʼ ne gácabe nachaʼhuiʼ ne laacaʼ. Apóstol Pedru guníʼ: «Rinaba laatu, hermanu gola caʼ, lagapa ca xpinni Dios, cani bisaana be lu ná tu. Laguni ni de idubi ladxidóʼ to casi racalaʼdxi Dios, ne cadi purti napa tu xidé guni tu ni, nin pur bidxichi, sínuque laguni ni de idubi ladxidóʼ to» (1 Ped. 5:2).
17. Ximodo rusihuinni ca binni ridagulisaa qué ricacaʼ tema gaca ni nacaʼ.
17 Nabé riecheʼ ca binni ni maʼ huaniisi ni nuu lade ca binni ridagulisaa pur modo racané cani jma nahuiiniʼ laacaʼ ne laacaʼ runi respetarcaʼ laacabe. Yanna, cani nahuiiniʼ ca la? runi respetarcaʼ ca xpinni Cristu ni huaniisi ca purtiʼ laacaʼ maʼ xadxí de cayúnicaʼ ni na Jiobá (1 Tim. 5:1, 2). Ca binnigola ca ruyúbicaʼ hombre ni zanda guni xiixa dxiiñaʼ lade ca binni ridagulisaa ne rusiidicaʼ laacabe ximodo naquiiñeʼ gápacaʼ ca xpinni Dios, ti zacá gacanecaʼ laacabe (2 Tim. 2:1, 2). Guiráʼ ca xpinni Cristu naquiiñeʼ gúnicaʼ ni na conseju bidii Pablu riʼ: «Lauzuuba stiidxa cani nuu de xaíque stitu. Laguni ni gabi ca laatu purti qué rixhacalaʼdxi ca de gapa ca laatu, ti nanna ca Dios iníʼ pa jneza cayuni caʼ. Pa guni tu zacá la? zieche né cabe xhiiña cabe, ne qué zaca ni naná para laacabe, ne jma rusi zanda acané cabe laatu» (Heb. 13:17).
Gudiʼnu lugar gabi ca binnilídxinu laanu xi gúninu
18. Xiñee jneza guni binni ni gábicabe laa ndaaniʼ lidxi.
18 Risaca stale nga gúninu ni gábicabe laanu ndaaniʼ lídxinu (biindaʼ Colosenses 3:18-21). Lu Biblia cá xi naquiiñeʼ guni guiráʼ cani nuu ndaaniʼ ti familia. Hombre ca nga xaíque stiʼ xheelaʼ ne laabe nga jma naquiiñeʼ gusiidibe ca xiiñicabe. Gunaa ca naquiiñeʼ ganna napa xheelaʼ derechu para guni mandar, ne ca xiiñicabe naquiiñeʼ gúnicaʼ stipa para guzuubacaʼ diidxaʼ ti gusiéchecaʼ Señor. Guiráʼ cani nuu ndaaniʼ ti familia zacané para chuʼ binnilidxicaʼ tobi si ne nayecheʼ ora gudiicaʼ lugar gábicabe laacaʼ xi naquiiñeʼ gúnicaʼ. Peru naquiiñeʼ gánnacaʼ pora nga zanda gúnicaʼ ni gábicabe laacaʼ ne pora nga cadi jneza gúnicaʼ ni. Guidúʼyanu caadxi ejemplu zeeda lu Biblia ni rusihuinni xiñee zacá ni.
19, 20. 1) Xi biʼniʼ Elí ne xiñee maʼ gadxé ni de ni biʼniʼ Jiobá. 2) Xi zanda guiziidiʼ ca xaíque stiʼ ca familia ca de ca ejemplu riʼ.
19 Dxi nahuiiniʼ Samuel la? guyuu Elí casi xaíque stiʼ cani ruzaaquiʼ guʼxhuʼ ndaaniʼ guidxi Israel. Peru, Hofní ne Finehás, ca xiiñiʼ Elí que gúcacaʼ «hombre ni qué iquiiñeʼ ne qué ñuni respetarcaʼ Jiobá». Gunna Elí xi guiráʼ cosa biʼniʼ ca xiiñiʼ; guyuunécabe ca gunaa ni biʼniʼ dxiiñaʼ ra yoo guca adorar Jiobá que. Xi biʼniʼ Elí óraque yaʼ. Gúdxibe laacaʼ qué ziuu diʼ tu guni orar pur laacaʼ pa gucheenecaʼ Jiobá, peru nin ti ora qué niguu jnézabe laacaʼ. Ngue runi ca xiiñibe qué nusaana de ñúnicaʼ cosa malu, ne despué guníʼ Jiobá naquiiñeʼ gáticabe. Ora gunna Elí maʼ gúticabe la? laa laaca guti. ¡Guizáʼ feu modo biluxe ca binni ca! Rihuínnica cadi jneza diʼ ngue bidii Elí lugar guni ca xiiñiʼ cosa malu (1 Sam. 2:12-17, 22-25, 34, 35; 4:17, 18).
20 Yanna guidúʼyanu pabiáʼ nga maʼ gadxé modo riniʼné Dios ca ángel, ca xiiñibe ni nuu guibáʼ. Micaya ni riguixhená que gucuaa ti visión ra biiyaʼ ora bidagulisaa Jiobá ne ca ángel stiʼ. Ora dagulisaacabe que gunabadiidxaʼ Jiobá tu laa zanda quite ique Acab, rey malu stiʼ Israel que para guireebe de rey. De raqué bicaadiaga Jiobá ni guníʼ ca ángel que. Ora guníʼ tobi de laacabe laa guni dxiiñaʼ que la? gunabadiidxaʼ Jiobá laabe ximodo cá íquebe gúnibe ni. Guyuulaʼdxiʼ Jiobá modo nabe que, ne bidii lugar gúnibe dxiiñaʼ que (1 Rey. 22:19-23). Xi zanda guiziidiʼ cada tobi de ca xpinni Cristu ni nuu ndaaniʼ ti familia de ni bizaaca riʼ yaʼ. Riziidicabe ziuu ora zúnicabe ni gabi sti binnilídxicabe laacabe. Galán nga gucaadiaga xaíque stiʼ familia ca ximodo ñuulaʼdxiʼ xheelaʼ ne ca xiiñiʼ ñaca xiixa. Peru ora maʼ guníʼcabe ximodo ñuuláʼdxicabe ñaca xiixa la? naquiiñeʼ guni respetárcabe ni quixhe xaíque stícabe gaca, purtiʼ Dios nga bisaana laabe para guni mandarbe.
21. Xi chiguizíʼdinu lu stiʼ tema ca.
21 ¡Bixhózenu ni nuu guibáʼ nabé nadxii laanu ne laa nga Dios ni jma nuu xpiaaniʼ, ne riéchenu stale nga rusietenaláʼdxibe laanu pabiáʼ risaca nga gúninu ni gábicabe laanu! (Sal. 119:99.) Lu sti tema ca zadúʼyanu pabiáʼ nayecheʼ ribani ca binni ni maʼ bichaganáʼ ora riénecaʼ xheelacaʼ ne gánnacaʼ ziuu ora zúnicaʼ xiixa ni gabi xheelacaʼ laacaʼ.
[Cani cá ñee yaza]
a Lu diidxazá la? nagana nga iquiiñeʼ binni ti diidxaʼ si para gusiene xi guiráʼ riníʼ diidxaʼ griegu «binni riene» ca. Sicaríʼ caníʼ ti libru: «Diidxaʼ ca riniʼni naquiiñeʼ gudii binni lugar gabi stobi laa xi zanda guni, neca napa derechu para guni xiixa modo racalaʼdxiʼ, ne laaca rábini laa naquiiñeʼ gaca nachaʼhuiʼ ne binni». Nga runi «binni riene» nga tuuxa ni qué ricá tema gaca xiixa modo racalaʼdxiʼ, qué riníʼ diʼ naquiiñepeʼ gaca guiráʼ cosa modo na ley ne qué rinabaʼ gaca ni na purtiʼ si runi mandar. Laaca riníʼ diidxaʼ ca naquiiñeʼ guzuubaʼ binni stiidxaʼ cani runi mandar.
b Biiyaʼ tema ni láʼ «Xi runi ca xpinni Cristu ora guni mandar gobiernu stiʼ xquídxicaʼ laacaʼ gúnicaʼ xiixa», ni zeeda lu La Atalaya 15 stiʼ febrero 2005, yaza 23-26.
Xi nicábiluʼ
• Xi ribeendunu ora rúninu ni gábicabe laanu.
• Ximodo rusihuinni ca binnigola qué ricacaʼ tema gaca ni nacaʼ.
• Xiñee nabé risaca nga guni binni ni gábicabe laa ndaaniʼ lidxi.
[Dibuju/foto ni zeeda lu yaza 4]
Ca binnigola ca rusihuínnicaʼ nadxiicaʼ binni cásica biʼniʼ Jesús