Ximodo guibánineluʼ xheelaluʼ nayecheʼ
«Ne guendabiaaniʼ nga para cuí ti yoo, ne para guzuhuaa ni dxiichiʼ naquiiñeʼ gánnacabe ximodo gácani.» (PRO. 24:3.)
1. Ximodo bihuinni dxandíʼ nuu xpiaaniʼ Dios dxi bizáʼ primé hombre que.
BIXHÓZENU ni nuu guibáʼ nanna xii nga ni jma galán para laanu. Laabe maca gudíxhebe ximodo guibani binni ndaaniʼ Guidxilayú, ne para gaca ni naguixhe íquebe caquiiñeʼ gapa primé hombre ni bibani ndaaniʼ jardín ni guyuu Edén que ti xheelaʼ. Guendaxheelaʼ riʼ napa xidé gapa xiiñiʼ, purtiʼ zaqué nga para guidale binni ndaaniʼ Guidxilayú riʼ ti gaca ni naguixhe ique Dios (Gén. 1:28; 2:18).
2. Xi gudixhestí Jiobá para guibani binni galán.
2 Jiobá guníʼ: «Chiguneʼ tobi ni gacané laabe, biáʼsipeʼ para laabe». Oraqueruʼ bisisiaasiʼ Dios Adán, primé hombre que, ne gucuaabe ti biní xcustiá para bizaʼbe Eva, ti gunaa ni qué gapa donda casi Adán que. Sicaríʼ guníʼ Adán ora yesaana Jiobá gunaa que ra nuu: «Ndiʼ huaxa naca de dxita stiʼ ca dxita ladeʼ ne beela de beela ladeʼ. Ndiʼ zaree lá Gunaa, purtiʼ de hombre biquiiñecabe para bizáʼcabe laa». Biáʼsipeʼ guyáʼ Eva para gacané Adán. Xiñee yaʼ. Purtiʼ neca guyáʼcabe sin donda ne bizáʼ Dios laacabe casi laa la? cada tobi de laacabe gadxé gadxé ni zanda guni ne gadxé gadxé modo laa. Ndiʼ cusihuinni Jiobá nga gudixhestí guendaxheelaʼ. Qué ñaca diʼ nagana para Adán ne Eva ñuuláʼdxicaʼ modo gudixhe Dios guibánicaʼ ne bidiicabe cuenta zanda gacanesaacabe zaqué (Gén. 1:27; 2:21-23).
3. Xi riníʼ ique stale binni de guendaxheelaʼ, ne xi chiguicábinu.
3 Nabé triste nga modo nabáninu yanna, purtiʼ nuu stale binni ni qué ruzuubaʼ stiidxaʼ guirutiʼ, nga runi nuu stale guendanagana. Peru qué gapa diʼ Dios donda pur cani cayaca riʼ. Stale binni maʼ qué riuulaʼdxiʼ guichaganáʼ casi gudixhe Dios ni, purtiʼ nacaʼ maʼ gudiʼdiʼ tiempu guca nga, ne nacaʼ puru si yuubaʼ ne xiana redaneni. Ne stale de cani richaganáʼ raca divorciarcaʼ. Stale de laacaʼ huaxiéʼ rannaxhiicaʼ xiiñicaʼ. Ne xcaadxi, ora maʼ cadinde xheelaʼ la? riquiiñeʼ ca xiiñiʼ para guni ni racalaʼdxiʼ. Stale de cani maʼ bichaganáʼ qué riuucaʼ nayecheʼ ne qué riuucaʼ tobi si nin ti ratuhuiiniʼ purtiʼ qué rinacaʼ gúnicaʼ ni gabi xheelacaʼ laacaʼ (2 Tim. 3:3). Nabé nagana ca tiempu nabáninu riʼ, yanna, xi zanda guni ca xpinni Cristu ni maʼ bichaganáʼ para guibánirucaʼ nayecheʼ yaʼ. Xiñee naquiiñeʼ guienesaa cani maʼ bichaganáʼ ca ne guzuubacaʼ stiidxaʼ Dios ti cadi guixá xquendaxheelacaʼ yaʼ. Xi zanda guizíʼdinu de ca binni ni maʼ xadxí de bichaganáʼ ne nabánicaʼ nayecheʼ yaʼ.
Gúninu ni na ca ley stiʼ Jiobá
4. 1) Xi conseju bidii Pablu cani cá ique guichaganáʼ. 2) Xi runi ca xpinni Cristu ni ruzuubaʼ diidxaʼ.
4 Apóstol Pablu bidii ti conseju ca viuda ni racalaʼdxiʼ guichaganáʼ sti biaje ora gúdxibe laacaʼ guichaganacaʼ «ti xpinni Señor» (1 Cor. 7:39). Ni guníʼ Pablu riʼ cadi deruʼ binadiaga ca xpinni Cristu ni guyuu lade judaísmu que ni. Lu Ley ni bidii Jiobá Israel que gúdxibe laacaʼ cadi gucheelacaʼ xiiñicaʼ ne ca binni ni nabani ndaaniʼ ca guidxi nuu gaxha de laacabe que, purtiʼ qué runi ca binni que ni na Dios. Jiobá gudxi laacabe xi zazaacacabe pa qué guzuubacabe stiidxaʼ: «Purtiʼ [ni cadi naca israelita ca] zuxhélebe xiiñiluʼ de sananda naa, ne zúnicabe ni na xcaadxi dios; ne xiana stiʼ Jiobá dxandipeʼ ziaba luguiatu, ne nagueendaca zunduuxebe laatu» (Deu. 7:3, 4). Xi cabeza Dios guni ca xpinni yanna yaʼ. Ribézabe guichaganacaʼ «ti xpinni Señor», o ti xpinni Cristu ni maʼ bidii laa Jiobá ne maʼ guyuunisa. Ora runi binni ni na Dios lu cani cuzéʼtenu riʼ la? rusihuinni nuu xpiaaniʼ.
5. Ximodo ruuyaʼ Jiobá ne ca xpinni Cristu ni riníʼ binni ora cachaganáʼ.
5 Nabé nga risaca para Dios ni riníʼ binni ora cachaganáʼ. Guníʼ si Jesús, Xiiñiʼ Dios, de primé guendaxheelaʼ que bizeeteʼ ca diidxaʼ riʼ: «Ni ma bichaaga Dios la? ma cadi indaa binni guidxilayú» (Mat. 19:6). Tobi de ca hombre ni bicaa Salmo bisihuinni pabiáʼ risaca guni binni ni maʼ guníʼ: «Bidii xquíxepeʼ Dios ne zacá bisigaʼdeʼ laa xiixa, ne biʼniʼ ni maʼ guniʼluʼ gúniluʼ para laabe» (Sal. 50:14). Nécapeʼ nayecheʼ nga riuu cani deruʼ bichaganáʼ la? naquiiñeʼ gánnacabe risaca nga ni guníʼcabe dxi bichaganácabe ne riquiiñeʼ gúnicabe stale stipa para gúnicabe ni guníʼcabe (Deu. 23:21).
6. Xi zanda guizíʼdinu de ejemplu stiʼ Jefté.
6 Guiníʼ íquenu de Jefté, hombre ni guca juez ndaaniʼ guidxi Israel lu siglu XII ante de ca dxi stiʼ Jesús. Jefté bidii stiidxaʼ zuni xiixa para Jiobá ora guníʼ: «Pa gacaneluʼ naa guneʼ ganar ca xiiñiʼ Ammón la? ora guibiguetaʼ ralidxeʼ despué de maʼ bineʼ ganar laacabe, zudiéʼ lii primé binni ni guiree ndaaniʼ lidxeʼ para gueeda guidxaagalú naa, zudiéʼ laabe lii Jiobá ne zudiéʼ laabe casi ti ofrenda ni riaʼquiʼ». Xi biʼniʼ Jefté ora bedandá ralidxi ndaaniʼ guidxi Mizpá ne biʼyaʼ zeeda tobi lucha xiiñidxaapaʼ para guidxaagalú laa yaʼ. Ñee maʼ qué ñúnibe ni guniʼbe que la? Coʼ. Laabe guniʼbe: «Maʼ bidiéʼ stiidxaʼ Jiobá, ne qué zanda diʼ cueʼ saʼyaʼ» (Jue. 11:30, 31, 35). Bíʼnibe ni guniʼbe que, neca nánnabe maʼ qué zapa diʼ xiiñidxaapabe que xiiñiʼ ni guiaanané herencia stibe ndaaniʼ guidxi Israel. Dxandíʼ nga gadxé ni guníʼ Jefté guni de ni riníʼ cani richaganáʼ, peru nácabe ti ejemplu para ca xpinni Cristu ni maʼ bichaganáʼ purtiʼ bíʼnibe ni guniʼbe.
Xi riquiiñeʼ guni cani maʼ bichaganáʼ para chuʼcaʼ nayecheʼ
7. Xi naquiiñeʼ guni cani nacubi bichaganáʼ.
7 Stale binni ni maʼ bichaganáʼ riéchecaʼ ora guietenaláʼdxicaʼ tiempu guzacaʼ de novio. ¡Nabé galán guca para laacabe ca ora ziyunibiáʼ chaahuicabe modo laacabe ra zidiʼdiʼ ca dxi que! Ca dxi guyuucabe guiropasícabe que gucaneni para gunnaxhiicabe jma. Peru, ora maʼ bichaganáʼ tuuxa la? napa xidé guchaa modo laa. Ne pa bixhózebe ne jñaabe gudixhe tu guichaganabe la? laaca naquiiñeʼ guchaabe modo laabe. Ti xpinni Cristu guníʼ xi bizaaca dxi nacubi bichaganáʼ: «Ni jma nagana guca para laadu nga guiénedu maʼ cadi stúbidu, sínuque maʼ bichaganadu. Gudiʼdiʼ dxi para gunda biénedu pabiáʼ tiempu nga zanda chúʼnedu ca xhamígudu ne ca binnilídxidu». Sti hombre ni maʼ napa treinta iza de bichaganáʼ nagueendaca bidii cuenta naquiiñeʼ guiene xheelaʼ ne «guiníʼ ique maʼ chúpacaʼ». Dede dxiqué hasta nagasi, ante guiniʼbe ziebe ti lugar ra cayuni invitárcabe laabe o quíxhebe gúnibe xiixa la? rinabadiidxabe xheelabe ne riénebe xi runi sentir. Lu ca cosa ni maʼ bizéʼtenu riʼ galán gúnicabe ni gabi xheelacabe laacabe (Pro. 13:10).
8, 9. 1) Xiñee nabé risaca guiníʼ cani maʼ bichaganáʼ xi nuu ndaaniʼ ladxidoʼcaʼ. 2) Pora nga zuni binni ni gabi xheelaʼ laa, ne xiñee.
8 Nuu tiru richaganáʼ chupa binni de gadxé gadxé guidxi ne gadxé gadxé modo biniisicaʼ. Ora guizaaca ni zacá la? oracapeʼ nga jma naquiiñeʼ guiníʼcabe xi nuu ndaaniʼ ladxidóʼcabe. Cadi guiaandaʼ laanu gadxé gadxé nga modo riníʼ cada binni. Nga runi, para guiéneluʼ xheelaluʼ la? biiyaʼ ximodo riníʼnebe ca binnilídxibe. Stale biaje, ni rusihuinni xi nuu ndaaniʼ ladxidóʼ tuuxa nga, modo riníʼ xiixa, cadi ni riníʼ diʼ. Ne laaca zanda gudiitu cuenta xi cayuni sentir xheelatu neca qué guiníʼ xi cayaca (Pro. 16:24; Col. 4:6). Risaca stale nga guiene binni xheelaʼ para chuʼcaʼ nayecheʼ (biindaʼ Proverbios 24:3).
9 Stale guendaxheelaʼ maʼ bidii cuenta nabé risaca nga gánnacaʼ ziuu ora zúnicaʼ ni gabi xheelacaʼ laacaʼ ora chiguuyacaʼ pa zúnicaʼ xiixa cosa ra yoo o pa zizacaʼ dxi riziiláʼdxicaʼ. Zándaca tobi de laacabe nabé guyuulaʼdxiʼ chichite o guni sti cosa ante guichaganáʼ. Peru yanna maʼ qué zúnibe ni cásica bíʼnibe ni dxiqué (1 Tim. 4:8). Laaca naquiiñeʼ gúʼyabe pabiáʼ tiempu riuube ra nuu ca binnilídxibe. Cani maʼ bichaganáʼ naquiiñeʼ gúnicaʼ stale cosa juntu, casi gúʼndacaʼ Biblia ne xcaadxi cosa (Mat. 6:33).
10. Xi naquiiñeʼ guni bixhoze ne jñaa binni ne ca xiiñiʼ ni maʼ bichaganáʼ para chuʼ guirácabe galán.
10 Ora guichaganáʼ ti hombre o ti gunaa la? rusaanacaʼ bixhózecaʼ ne jñaacaʼ (biindaʼ Génesis 2:24). Peru, riquiiñeruʼ gusisácabe bixhózecabe ne jñaacabe casi na Dios, neca maʼ bichaganácabe. Nga runi zándaca zigánnacabe binnilidxi hombre ca ne binnilidxi gunaa ca. Sicaríʼ guníʼ ti xpinni Cristu ni napa veinticinco iza de bichaganáʼ: «Nuu tiru raca nagana gudii binni guiráʼ ni caquiiñeʼ xheelaʼ ne guni guiráʼ ni riuuláʼdxibe ne zaqueca guni guiráʼ ni racalaʼdxiʼ xfamíliacaʼ ne ca bizánacaʼ o bíʼchicaʼ. Nabé huayacané ni cá lu Génesis 2:24 naa para gannaʼ xi guneʼ. Nannaʼ nuu caadxi cosa ni naquiiñeʼ guneʼ para bixhózedu ne jñaadu ne laaca naquiiñeʼ guzúʼbadu stiidxacabe, peru maʼ bisiidiʼ versículo riʼ naa guuyaʼ xi racalaʼdxiʼ xheelaʼ primeru». Yanna, ca xpinni Cristu ni maʼ bichaganáʼ ca xiiñiʼ la? naquiiñeʼ gánnacaʼ maʼ napa xiiñicaʼ familia stiʼ ne hombre ca nga riguixhe ximodo guibánicabe.
11, 12. Xiñee nabé risaca guʼndaʼ cani maʼ bichaganáʼ juntu ne guni orarcaʼ.
11 Nabé risaca nga guʼndaʼ ca familia ca Biblia gatigá, ne stale familia rusihuinni galán gácani zacá. Peru, zándaca zaca nagana para laacabe quíxhecabe ti dxi gúʼndacabe Biblia ne gúnicabe ni guiráʼ semana. Sicaríʼ guníʼ ti hombre ni maʼ bichaganáʼ: «Pa ñanda nudxiguétadu tiempu ca para nuchaʼdu xiixa la? niguíxhedu ti hora para nidúʼndadu Biblia dede dxi nacubi bichaganadu ne ñúnidu stipa para ninándadu hora ca». Laaca guniʼbe: «Nabé galán runeʼ sentir ora guuyaʼ pabiáʼ nayecheʼ riuu xheelaʼ ora maʼ cadúʼndadu guirópadu ne guiénedu xiixa ni risaca cusiidiʼ Biblia».
12 Laaca nabé risaca guni orar cani maʼ bichaganáʼ juntu (Rom. 12:12). Jma galán ribani ca guendaxheelaʼ ca ora guirópacaʼ runi adorarcaʼ Jiobá (Sant. 4:8). Ti xpinni Cristu guníʼ: «Ora guni tuuxa xiixa ni guchiichi xheelaʼ la? galán guinábaca laabe gutiidiláʼdxibe laa pur ni biʼniʼ ne guzeetecaʼ ni ora guni orarcaʼ, neca ruluíʼ cadi naróʼbapeʼ ni gúcacabe. Zacá nga rusihuinni tuuxa cayuubaʼ ladxidóʼ pur ni biʼniʼ» (Efe. 6:18).
Ziuu ora zuni binni ni gabi xheelaʼ laa
13. Xi conseju bidii Pablu ca binni ni maʼ bichaganáʼ.
13 Ca xpinni Cristu ni maʼ bichaganáʼ qué rúnicaʼ guiráʼ cosa feu ni runi stale binni yanna ora gatanecaʼ xheelacaʼ. Pablu bidii conseju riʼ: «Cada hombre naquiiñe ibani né xheela modo ma nexhe ibani binni ni ma bichaganáʼ, ne zaqueca guni gunaa ne xheelaʼ. Ora ma bichaganá ti gunaa la? ma cadi laa runi mandar cuerpu stiʼ, sínuque xheelaʼ. Zaqueca ora ma bichaganá hombre, ma cadi laa runi mandar cuerpu stiʼ, sínuque xheelaʼ». De racá guniʼbe: «Cadi na tu qué gasi né tu xheela tu. Peru pa iropa tu racalaʼdxi tu usaana tu ni caadxi para ganda ucaa ique tu iníʼ né tu Dios la? zaa laguni ni». Ne bilúxebe conseju que sicaríʼ: «Peru ibigueta guni tu casi zeeda tu, purti nagana guni mandar tu cuerpu stitu xadxí, paxa ora gueda uquiinde binidxaba laatu» (1 Cor. 7:3-5). Ora bizeeteʼ Pablu naquiiñeʼ guni orar cani maʼ bichaganáʼ la? bisihuínnibe xii nga ni jma risaca para ca xpinni Cristu. Peru laaca bisihuínnibe naquiiñeʼ gudii cani maʼ bichaganáʼ ni caquiiñeʼ xheelacaʼ ne gúʼyacaʼ ximodo cayuni sentir xheelacaʼ.
14. Xi conseju zeeda lu Biblia ni naquiiñeʼ chinanda cani maʼ bichaganáʼ ora maʼ gatané xheelacaʼ.
14 Ca hombre ne ca gunaa ni maʼ bichaganáʼ naquiiñeʼ guiniʼcaʼ xipeʼ cayuni sentircaʼ ne gánnacaʼ zápacaʼ guendanagana pa qué chuʼcaʼ cuidadu xheelacaʼ ora gatanecaʼ laacabe (biindaʼ Filipenses 2:3, 4; zanda gúʼndaluʼ Mateo 7:12). Zacá huayácani lu ca guendaxheelaʼ ra tobi si de laacaʼ runi ni na Jiobá. Ne pa gaca xiixa ni guchiichi laacabe la? xpinni Cristu ca zanda gacané tiidiʼ xiana ca pa guni ni jneza, gaca nachaʼhuiʼ ne gusihuinni dxandíʼ rapa gana gacané (biindaʼ 1 Pedro 3:1, 2) Pa nadxiitu Jiobá ne nadxiitu xheelatu la? zacané nga laatu stale lu xquendaxheelatu. Ne pa gúnitu ni racalaʼdxiʼ xheelatu ra zanda gúnitu ni la? laaca zacané nga laatu.
15. Xiñee ribani cani maʼ bichaganáʼ nayecheʼ ora runi respetarsaacaʼ.
15 Nuuruʼ ra naquiiñeʼ gusihuinni hombre ca runi respetar xheelaʼ. Riquiiñeʼ guiénebe xi runi sentir xheelabe, dede lu ca cosa ni jma nahuiiniʼ. Ti xpinni Cristu ni maʼ napa cuarenta y siete iza de bichaganáʼ guníʼ: «Ndiʼ nga tobi de ca cosa ni rácaruʼ nagana para naa guneʼ». Ca gunaa xpinni Cristu ni maʼ bichaganáʼ cayabi Biblia laacaʼ guni respetarcaʼ xheelacaʼ (Efe. 5:33). Pa guiníʼ ti gunaa mal de xheelaʼ o guiníʼ xi qué rúnibe jneza nezalú xcaadxi binni la? qué zanda guininu runi respetarbe xheelabe. Proverbios 14:1 cusietenalaʼdxiʼ laanu: «Ti gunaa ni nuu xpiaaniʼ nga ni rindisaʼ lidxi, peru ti gunaa nahuati la? runitilú ni ne naʼ».
Qué chuʼ dxi gúninu ni na Binidxabaʼ
16. Ximodo zanda chinanda cani maʼ bichaganáʼ conseju ni zeeda lu Efesios 4:26, 27.
16 «Ne pa idxiichi tu la? cadi udii tu lugar guiaazi gubidxa cadxiichi ru tu, sínuque lauyubi tidi ni nagueenda. Pacaa zuchee tu. Cadi udii tu lugar aca xcustu [B]inidxabaʼ.» (Efe. 4:26, 27.) Ora raca ni na conseju riʼ la? racaneni para gaca chaahuiʼ guendanagana ni gapa cani maʼ bichaganáʼ, ne laaca racaneni para cadi chuʼdíndecaʼ. Sicaríʼ guníʼ ti gunaa xpinni Cristu: «Qué rietenaladxediáʼ pa gupaniáʼ xheelaʼ xiixa guendanagana ne qué ninidu de laani, sínuque gunidu de laani dede ora guca chaahuiʼ ni neca gudiʼdiʼ stale hora». Dede dxi nacubi bichaganáʼ ca binni riʼ gudíxhecaʼ zuni chaahuicaʼ intiisi guendanagana gápacaʼ dxi queca. Guniʼruʼ gunaa que xcaadxi diidxaʼ riʼ: «Maca biaanadu zutiidiláʼdxidu stóndadu ne zusiáʼndadu ni. Cada guiráʼ gueelaʼ la? casi ora qué ñácadu gastiʼ». Zacá nga qué rudiicabe «lugar aca xcustu [B]inidxaba».
17. Xi zacané cani maʼ bichaganáʼ neca ruluíʼ huaxiéʼ rienelisaacaʼ.
17 Laga pa guiníʼ ique ti xpinni Cristu cadi jneza biʼniʼ bichaganáʼ xheelaʼ yaʼ. Zándaca zuni sentírcabe ruluíʼ maʼ cadi nadxiidícabe casi nadxii xcaadxi binni ni maʼ bichaganáʼ. Pa zacá caníʼ íqueluʼ la? galán guietenaláʼdxiluʼ ximodo ruuyaʼ Dios guendaxheelaʼ stitu. Pablu bidii conseju riʼ ca xpinni Cristu: «Cadi gapa tu enda xheela casi enda riguite. Cani ma bichaganá la? cadi uchee né xheelaʼ, purti zusaba ná Dios cani rapa jnadxii ne cani riuu né xheela stobi» (Heb. 13:4). Ne cadi guiaandaʼ laanu ca diidxaʼ riʼ: «Ti doo de chonna xcuaa qué zaruuguʼ diʼ nagueenda» (Ecl. 4:12). Pa guiníʼ ique hombre ne gunaa ni maʼ bichaganáʼ gusisácacaʼ lá Dios primeru la? ziuucaʼ gaxha de laabe ne ziuucaʼ tobi si. Guirópacabe naquiiñeʼ gúnicabe stipa para guibánicabe nayecheʼ lu guendaxheelaʼ stícabe, purtiʼ zacá zusisácacabe Jiobá, Dios ni gudixhestí guendaxheelaʼ (1 Ped. 3:11).
18. Xiñee rininu zanda guibani ca guendaxheelaʼ ca nayecheʼ.
18 Zanda guibani ca xpinni Cristu ni maʼ bichaganáʼ nayecheʼ. Peru naquiiñeʼ gúnicabe stipa para gusihuínnicabe ca guenda ni riquiiñeʼ gapa ca xpinni Cristu, tobi de laacani nga: gúnicabe ni racalaʼdxiʼ xheelacabe ora zanda gúnicabe ni. Ndaaniʼ guiráʼ ca neza binni ridagulisaa stiʼ ca testigu stiʼ Jiobá ni nuu lu guidubi naca Guidxilayú la? nuu stale guendaxheelaʼ ni cusihuinni zanda guibani binni nayecheʼ.
Xi nicábiluʼ
• Xiñee rininu zanda guibani ti guendaxheelaʼ nayecheʼ.
• Xi zacané cani maʼ bichaganáʼ para chuʼcaʼ nayecheʼ.
• Gunáʼ nga ca guenda ni riquiiñeʼ gapa cani maʼ bichaganáʼ.
[Dibuju/foto ni zeeda lu yaza 9]
Ante guiníʼ tuuxa ni maʼ bichaganáʼ zie ra cayuni invitárcabe laa o quixhe ique guni xiixa la? galán guinabadiidxaʼ xheelaʼ primeru
[Dibuju/foto ni zeeda lu yaza 10]
Laguni stipa para gaca chaahuiʼ xiixa ni bizaacatu dxi queca ne cadi gudiiluʼ «lugar aca xcustu [B]inidxaba»