Ximodo naquiiñeʼ guibanineluʼ binnilídxiluʼ lu ca últimu dxi riʼ

«Ma huaxiéʼ dxi riaadxa.» (1 COR. 7:29.)

1. 1) Xi cayaca yanna ni cusihuinni maʼ nabáninu lu ca últimu dxi. 2) Xiñee nuunu xizaa pur ni cayaca ndaaniʼ ca familia ca.

BIBLIA caníʼ nabé ziuudinde ca guidxi ca lu ca últimu dxi riʼ ne zaca xu, ziaadxaʼ ni gó binni ne ziuu stale guendahuará (Dan. 8:17, 19; Luc. 21:10, 11). Laaca cuzeeteʼ Biblia guizáʼ zuchaa modo nabani binni yanna. Dede ndaaniʼ ca familia ca ziuu stale guendanagana ni zusihuinni maʼ nabáninu lu ca últimu dxi (2 Tim. 3:1-4). Xiñee riguucani xizaa laanu yaʼ. Purtiʼ guiráʼ ladu cahuinni zacá ni, ne pa qué chuʼnu cuidadu la? zuchaa cani modo riníʼ íquenu, ne maʼ qué zabaninenu xheelanu ne ca xiiñinu casi na Dios. Ximodo nga yaʼ.

2. Ximodo ruuyaʼ stale binni guendaxheelaʼ ne divorcio ca yanna.

² Ca dxi stinu riʼ cadi nagana raca para binni gaca divorciar, ne zacá cayácani ndaaniʼ stale guidxi. Peru, naquiiñeʼ guietenaláʼdxinu maʼ gadxé modo ruuyaʼ Jiobá guendaxheelaʼ ne gadxé modo ruuyabe gaca divorciar binni que modo ruuyaʼ binni cani. Yanna, ximodo nga ruuyaʼ Dios cani yaʼ.

3. Ximodo ruuyaʼ Jiobá ne Jesús xquendaxheelaʼ binni.

³ Jiobá ribeza guni binni casi bidii stiidxaʼ dxi bichaganáʼ. Dxi bichaaga Jiobá Adán ne Eva guníʼ ca diidxaʼ riʼ: «Hombre ca [...] naquiiñeʼ guicanú xheelaʼ, ne naquiiñeʼ gácacabe tobi si». Despué laaca guníʼ Jesús ca diidxaʼ ca, peru laaca guniʼbe xcaadxi riʼ: «Nga runi ni ma bichaaga Dios la? ma cadi indaa binni guidxilayú [...] tutiica gaca divorciar né xheela ne ichaganá stobi, neca qué nuchee xheela la? ma enda rapa jnadxii ngue» (Gén. 2:24; Mat. 19:3-6, 9). Nga runi para Jiobá ne Jesús la? cadi naquiiñeʼ diʼ guibiá ca guendaxheelaʼ ca, guendaguti si nga zanda guchiá ni (1 Cor. 7:39). Yanna, cumu Dios nga gudixhestí guendaxheelaʼ la? cadi galán diʼ guyúbinu gaca divorciarnu pur intiica si guendanagana gápanu. Biblia na nanalaʼdxiʼ Jiobá gaca divorciar binni ora gastiʼ nin ti razón ni cudii Biblia para laani (biindaʼ Malaquías 2:13-16; 3:6).a

Xi naquiiñeʼ gánnanu de guendaxheelaʼ

4. Xiñee raca arrepentir caadxi xpinni Cristu ni richaganáʼ nahuiiniruʼ.

⁴ Ndaaniʼ guidxilayú malu riʼ jma nga cá ique binni chuʼné stobi, nga runi guiráʼ dxi rihuinni lu tele ne lu stale revista cani rucaa binni guni zacá. Laanu, ca xpinni Cristu, qué zanda diʼ guininu qué zuquiinde cani laanu gúninu xiixa ni cadi jneza, jmaruʼ si para ca hombrehuiiniʼ ne para ca dxaapahuiiniʼ ca. Laacani zanda gucaacani ladxidóʼ binni uquiinde laa gatané stobi, neca qué racalaʼdxiʼ. Xi naquiiñeʼ guni cani nahuiiniʼ ca óraca yaʼ. Nuu tu richaganáʼ nahuiiniruʼ, purtiʼ ruzulú zacá zanda gucueeza laa para cadi guchee, peru gapa si dxi maʼ raca arrepentircaʼ. Xiñee yaʼ. Purtiʼ ora nacubi bichaganácabe la? cayechenécabe xheelacabe, peru gapa si dxi rudiicabe cuenta huaxiéʼ rienesaacabe. Nga runi naroʼbaʼ guendanagana ridxagalúcabe.

5. Xi zanda gacané cani maʼ bichaganáʼ para gúnicaʼ ni bidii stiidxacaʼ dxi bichaganacaʼ (biiyaʼ ni cá ñee yaza riʼ).

⁵ Neca guichaganáʼ tuuxa ti xpinni Cristu la? nuu tiru qué ribani diʼ casi bixuiʼlú, ne pur nga rapa guendanagana (1 Cor. 7:28). Ora binni cadi nabani nayecheʼ ne xheelaʼ la? guizáʼ rapa guendanagana. Peru ca xpinni Cristu nánnacaʼ neca naroʼbaʼ ca guendanagana nápacaʼ qué zuyúbicaʼ gaca divorciarcaʼ pa cadi cudii Biblia nin ti razón para gúnicaʼ ni. Cani cayuni stipa para gúnicaʼ ni bidii stiidxacaʼ dxi bichaganacaʼ la? naquiiñeʼ guni respetar ca binni ridagulisaa laacabe, gannaxhii ne gacané laacabe.b

6. Xi naquiiñeʼ ganna cani nahuiiniʼ ni maʼ cá ique guichaganáʼ.

⁶ Yanna xi naquiiñeʼ gánnaluʼ pa nahuiiniluʼ ne maʼ cá íqueluʼ guichaganaluʼ yaʼ. Ante gaca xnóvialuʼ o gaca xnóvioluʼ tuuxa xpinni Cristu la? galán pa cuézaluʼ guiniisiluʼ xcaadxi, ne cuézaluʼ dede ora maʼ riníʼ íqueluʼ casi binni huaniisi ne ora maʼ nannuʼ ximodo ribeza Jiobá guibani cani maʼ bichaganáʼ. Pa guʼnuʼ ca nga la? qué zápapeluʼ guendanagana lu xquendaxheelaluʼ. Lu Biblia cadi cá diʼ pándapeʼ iza naquiiñeʼ gápaluʼ para guichaganaluʼ.c Ni cayábini lii nga cueezaluʼ dede ora maʼ gudiʼdiʼ tiempu ra nabé ruquiinde lii chúʼneluʼ tuuxa (1 Cor. 7:36, NM). Xiñee yaʼ. Purtiʼ ora nahuiiniʼ binni qué riníʼ ique chaahuiʼ xi naquiiñeʼ guni ne pur nga zanda guni xiixa ni uguu laa lu stale guendanagana. Naquiiñeʼ gánnaluʼ para chuʼluʼ galán ne nayecheʼ nga ca conseju ni cudii Jiobá para xquendaxheelaluʼ (biindaʼ Isaías 48:17, 18).

Ni naquiiñeʼ gánnanu pa gápanu xiiñinu

7. Xi ridxaagalú cani nahuiiniʼ ni maʼ bichaganáʼ, ne ximodo riuu xquendaxheelacabe pur nga.

⁷ Caadxi de cani maʼ bichaganáʼ nahuiinirucaʼ mápeca nápacaʼ xiiñicaʼ. Nin caʼruʼ tiidiʼ tiempu biaʼ caquiiñecaʼ para gunibiaʼsaacaʼ ne mápeca nápacaʼ ti baʼduʼ. Cumu caquiiñeʼ baʼduʼ riʼniʼ ca guni tendércabe laa dxi ne gueelaʼ la? jñaabe nisi laabe maʼ cayuuyaʼ ne pur nga nuu tiru ridxiichi xheelabe. Nuu gueelaʼ dede qué zásicabe pur cayápacabe baʼduhuiiniʼ ca, nga laaca zusidxaga laacabe, ne guni nga zadxiinécabe xheelacabe. Ne óraca nga málasi gudiicabe cuenta maʼ qué zanda gúnicabe stale de cani bíʼnicabe ante gápacabe xiiñicabe, casi chizácabe paxaraa o gúnicabe xcaadxi cosa. Yanna, xi naquiiñeʼ gúnicabe ra maʼ bichaa modo nabánicabe yaʼ.

8. Ximodo naquiiñeʼ guʼyaʼ binni ca xiiñiʼ, ne xiñee.

⁸ Cásica gudixhestí Dios guendaxheelaʼ ca la? laaca gudixhestibe gapa binni xiiñiʼ, nga runi naquiiñeʼ gápacabe xiiñicabe jneza. Dxandíʼ nga ora maʼ napa binni xiiñiʼ ruchaa modo nabánicaʼ, peru ca xpinni Cristu la? rápacaʼ xiiñicaʼ jneza. Para laacabe zeeda gaca xiiñicabe casi herencia ni cudii Jiobá laacabe, purtiʼ laapebe nga bizaʼbe binni modo ganda gapa xiiñiʼ (Sal. 127:3). Hombre ca ne gunaa ca rúnicaʼ stipa pur gusiidicaʼ xiiñicaʼ de Jiobá (Efe. 6:1).

9. 1) Xi guiráʼ nga naquiiñeʼ guni binni laga caniisi xiiñiʼ. 2) Xi naquiiñeʼ guni hombre ca ti chuʼ xheelaʼ naguidxi lu Stiidxaʼ Dios.

⁹ Nadipaʼ nga para gusiniisi binni xiiñiʼ, purtiʼ riquiiñecabe stale tiempu ne stipa. Naquiiñeʼ ganna hombre ca qué zucaadiaga chaahuiʼ xheelabe ca guendaridagulisaa ca ora maʼ nuunécabe xiiñicabe racá. Laaca qué zándapeʼ guʼndaʼ gunaa ca Biblia ne guni ca nga zándaca huaxiéʼ tiempu zápabe para guiziidibe jma de Dios. Nga runi hombre ni nanna laaca naquiiñeʼ gapa xiiñiʼ la? racané xheelaʼ. Ne guiluxe si ca guendaridagulisaa ca, ora maʼ nuucabe ralídxicabe la? rábibe xheelabe xcaadxi cosa ni bieeteʼ lúcani ni zándaca qué ñunadiaga ora cayapa baʼduhuiiniʼ ca. Ne nuu tiru zapa hombre ca baʼduhuiiniʼ ca ti ganda gucheeche xheelaʼ diidxaʼ (biindaʼ Filipenses 2:3, 4).

10, 11. 1) Ximodo nga gusiniisicabe xiiñicabe «modo na Señor». 2) Xiñee naquiiñeʼ gábinu cani napa xiiñiʼ jneza cayúnicaʼ xhiiñacaʼ.

¹⁰ Ora maʼ cusiniisi binni xiiñiʼ la? rudii ni gócabe, ni cuáquicabe, ra chúʼcabe ne riné laacabe ra nuu doctor ora gaca huarácabe. Peru laaca nuu xcaadxi cosa ni naquiiñeʼ guni binni. Lu ca dxi malu ra mayaca guiluxe guidxilayú riʼ, naquiiñeʼ guiziidiʼ ca baʼduhuiiniʼ ca chinándacaʼ ca conseju ni zacané laacaʼ gúnicaʼ ni jneza. Naquiiñeʼ gulídxecabe ne gusiniisicabe xiiñicabe «modo na Señor» (Efe. 6:4). Xi riníʼ ca diidxaʼ «modo na Señor» ca yaʼ. Riniʼni gusiidiʼ binni xiiñiʼ guiníʼ ique casi riníʼ ique Jiobá, ne naquiiñeʼ gúnicabe ni dede dxi nahuiiniruʼ ca xiiñicabe hasta ora maʼ gácacaʼ hombrehuiiniʼ o dxaapahuiiniʼ (2 Tim. 3:14, 15).

¹¹ Dxi gudxi Jesús ca xpinni ca diidxaʼ riʼ: «Lachiusiidi irá xixé binni sa nanda naa», nánnanu laaca gúdxibe ni cani napa xiiñiʼ ti gusiidicaʼ xiiñicaʼ sananda Cristu (Mat. 28:19, 20). Ne nagana dxiiñaʼ ca, purtiʼ binni guidxilayú cucaa laacabe gúnicabe gadxé cosa. Nga runi cani maʼ gucané xiiñiʼ chúʼnisa la? naquiiñeʼ gábinu laacaʼ risaca dxiiñaʼ cayúnicaʼ. Laacabe cayúnicabe xhiiñacabe jneza ne pur fe stícabe maʼ biʼniʼ ganárcabe binni guidxilayú (1 Juan 5:4).

Qué richaganácabe o qué rápacabe xiiñicabe para gúnicabe ti dxiiñaʼ risaca

12. Xiñee nuu xpinni Cristu riguixhe ique guiaana sin guichaganáʼ chupa chonna iza.

¹² Cumu «ma huaxiéʼ dxi riaadxa» ne «guidxilayú caduʼya nu riʼ» cuchaa la? Stiidxaʼ Dios cayabi laanu galán guiníʼ íquenu xi guiráʼ zabeendunu pa qué guichagananu (1 Cor. 7:29-31). Nga runi, stale xpinni Cristu maʼ guníʼ íquecaʼ guiaanacaʼ chupa chonna iza sin guichaganacaʼ o cadi liica guichaganacaʼ. Galán gábinu laacabe jneza ni cayúnicabe, purtiʼ nuucabe stúbicabe ne gastiʼ ni «ucueeza laa[cabe]» de gúnicabe xhiiñaʼ Jiobá, ne nga rusihuinni cadi puru para laasicabe cuyúbicabe (biindaʼ 1 Corintios 7:32-35). Nga runi nuu stale xpinni Cristu ni caʼruʼ guichaganáʼ naca precursor o nuucaʼ Betel. Xcaadxi riecaʼ Scuela ra Riziidicabe Gúnicabe Xhiiñaʼ Dios, ne riécabe ni purtiʼ racaláʼdxicabe gacanécabe jma ndaaniʼ xquidxi Jiobá. Despué la? nuu de laacabe maʼ richaganáʼ, ne óraca nga ruuyacabe pabiáʼ riquiiñeʼ guiráʼ ni biziidicabe dxi bíʼnicabe jma lu xhiiñaʼ Jiobá laga guyuucabe stúbicabe.

13. Xiñee nuu caadxi xpinni Cristu ni maʼ bichaganáʼ qué rapa xiiñiʼ.

¹³ Ndaaniʼ stale guidxi maʼ cuchaa modo nuu ca familia ca, purtiʼ stale guendaxheelaʼ riguixhe íquecaʼ cadi gápacaʼ xiiñicaʼ. Xiñee rúnicabe zacá yaʼ. Nuucabe purtiʼ qué gapapécabe bueltu, ne nuu xcaadxi la? purtiʼ racaláʼdxicaʼ gúnicaʼ dxiiñaʼ ra guni ganarcaʼ jma bidxichi. Yanna, ca xpinni Cristu la? rúnicaʼ ni purtiʼ zacá jma zápacaʼ tiempu gúnicaʼ xhiiñaʼ Jiobá. Peru cadi pur nga guininu cadi nabánicabe nayecheʼ casi xcaadxi guendaxheelaʼ. Laacabe qué nádicabe gápacabe xiiñicabe casi xcaadxi guendaxheelaʼ ti ganda gúnicabe xhiiñaʼ Reinu primeru (1 Cor. 7:3-5). Caadxi de laacabe cayuni dxiiñaʼ para Jiobá ne para ca biʼchiʼ ne bizánacaʼ ndaaniʼ yoo Betel o rigánnacaʼ ca binni ridagulisaa o riecaʼ ra raca ca guendaridagulisaa roʼ, ne xcaadxi nácacaʼ precursor o misioneru. Nanna dxíchinu qué zusiaandaʼ Jiobá ni cayúnicabe pur nadxiicabe lá (Heb. 6:10).

«Zaca ni nagana para cani ichaganáʼ»

14, 15. Xi guendanagana zándaca guidxaagalú ca xpinni Cristu laga cusiniisicaʼ xiiñicaʼ.

¹⁴ Apóstol Pablu maca guníʼ «zaca ni nagana para cani ichaganáʼ» (1 Cor. 7:28). Purtiʼ zándaca gaca huarácabe, gaca huará ca xiiñicabe o bixhózecabe ne jñaacabe. O zándaca gápacabe guendanagana laga cusiniisicabe xiiñicabe. Ne casi bizéʼtenu ra bizulú tema riʼ, Biblia maca guníʼ «jma nagana zaca» ca últimu dxi riʼ, purtiʼ dede ne xiiñiʼ binni maʼ qué zuzuubaʼ diidxaʼ (2 Tim. 3:1-3).

¹⁵ Cumu guiranu nga cayuniná ca dxi «jma nagana» ca la? nadipaʼ cayaca para ca xpinni Cristu gusiniisi xiiñiʼ. Nga runi, guiráʼ dxi cucaalú ca xpinni Cristu guiráʼ cosa malu «ni na binni guidxilayú» guni xiiñicabe (Efe. 2:2, 3). Ne cadi guiráʼ diʼ ora nga runi ganárcabe, purtiʼ nuu tiru rusaana xiiñicabe de guni ni na Jiobá. Nanna dxíchinu «[cay]aca ni nagana para cani» cayuni stipa pur gusiniisi xiiñiʼ ndaaniʼ xquidxi Jiobá (Pro. 17:25).

«Nabé naná zaca ni ca dxi que»

16. Xi guendananá guníʼ Jesús ziuu.

¹⁶ Intiica guendanagana gapa binni lu xquendaxheelaʼ ne ora gusiniisi xiiñiʼ la? cadi nanapeʼ zácani, purtiʼ zeeda sti dxi jma naná que laacani. Dxi guníʼ Jesús xi zaca dxi maʼ nuu, ne dxi maʼ guiluxe guidxilayú riʼ la? laaca guniʼbe ca diidxaʼ riʼ: «Nabé naná zaca ni ca dxi que. Qué huayuu dxi gaca ni naná biaʼ qué, dede dxi bizáʼ Dios guidxilayú, ne ma qué ziuu ru dxi aca ni sti tiru» (Mat. 24:3, 21). Despué laaca guníʼ Jesús ziuu jma binni ni zalá lu ca dxi ni jma naná ca. Peru ante gaca nga, ca xpinni Binidxabaʼ zucaalucaʼ ca xpinni Jiobá neca gastiʼ cayúnicaʼ laacabe. Nanna dxíchinu guizáʼ zápanu guendanagana dxi ca, neca nahuiininu o huaniisinu.

17. 1) Xi naquiiñeʼ guni crenu zuni Jiobá pur laanu. 2) Xi naquiiñeʼ gucaa laanu gánnanu ximodo guibaninenu xheelanu ne ca xiiñinu.

¹⁷ Peru cadi pur nga nisi cuʼ xaíquenu xi guizaacanu despué. Cani napa xiiñiʼ naquiiñeʼ guni crecaʼ zapa Jiobá laacaʼ ne zaqueca xiiñicaʼ pa cadi gusaanacaʼ de gúnicaʼ ni nabe (biindaʼ Isaías 26:20, 21; Sof. 2:2, 3; 1 Cor. 7:14). Laga cabézanu gaca nga la? cadi guiaandaʼ laanu nabáninu lu ca dxi ni jma nagana ca. Nga zacané laanu guibaninenu xheelanu ne ca xiiñinu casi modo na Dios ra mayaca guinitilú guidxilayú (2 Ped. 3:10-13). Nga runi guiráʼ xixenu zusisácanu Jiobá ne xquidxi pa guibáninu modo nabe.

[Cani cá ñee yaza]

Xi bizíʼdinu

• Xiñee cadi galán guichaganáʼ ca xpinni Cristu nahuiinirucaʼ.

• Xi guiráʼ caquiiñeʼ guni binni para gusiniisi xiiñiʼ.

• Xiñee nuu caadxi xpinni Cristu qué náʼ guichaganáʼ, ne xcaadxi ni maʼ bichaganáʼ qué náʼ gapa xiiñiʼ.

• Xi guendanagana zándaca gapa cani napa xiiñiʼ.

[Dibuju/foto ni zeeda lu yaza 17]

Xiñee zanda guininu nuu xpiaaniʼ ca xpinni Cristu ora qué richaganacaʼ dxi nahuiinirucaʼ

[Dibuju/foto ni zeeda lu yaza 18]

Hombre ca zanda gacané xheelaʼ ti cadi gusaana de guni xhiiñaʼ Jiobá

[Dibuju/foto ni zeeda lu yaza 19]

Xiñee nuu xpinni Cristu ni maʼ bichaganáʼ qué riná gapa xiiñiʼ