Qué ziuu dxi gusaana ca binni ni runi ni jneza de gusisácacaʼ Dios
«Qué ziuu dxi gusiaandacabe binni ni runi ni jneza. [...] Qué ziuu dxi gusaanabe de gúnibe jneza.» (SAL. 112:6, 9)
1. 1) Xi ti cosa nabé sicarú cabeza ca binni runi ni jneza nezalú Dios. 2) Xi zándaca guinabadiidxanu.
¡GUIZÁʼ sicarú nga chiguibani guiráʼ ca binni ni runi ni jneza nezalú Dios! Qué ziuu dxi gusaana de guidxagayaacabe pabiáʼ sicarú ca guenda stiʼ Jiobá. Ora jma maʼ zigunibiáʼcabe cani bizáʼ Jiobá la? zucaa nga laacabe gusisácacabe laabe de guidubi ladxidóʼcabe. Lu Salmo 112 cuzeeteʼ pabiáʼ sicarú zabani binni ora gaca cani maʼ guninu ca, purtiʼ dxi ca zaca puru si ni jneza. Peru, ximodo zanda gácanu binni runi ni jneza nezalú Jiobá, ti Dios ni runi ni jneza ne risaca, pa binni ruchee laanu yaʼ. Laanu nanna dxíchinu neca rúninu stipa pur gúninu ni jneza, qué rusaananu de gucheʼnu ne nuu biaje nabé malu ni rúninu (Rom. 3:23; Sant. 3:2).
2. Xi chupa milagru biʼniʼ Jiobá pur nadxii binni.
2 Cumu nadxii Jiobá laanu la? bíʼnibe xiixa para ganda gúʼyabe laanu casi binni ni runi ni jneza. Xii nga bíʼnibe yaʼ. Primé la? bíʼnibe ti milagru para guluube Xiiñibe ndaaniʼ ti binnidxaapaʼ ti ganda gale sin donda (Luc. 1:30-35). Despué, ora biiti ca xhenemigu Jesús laa biʼniʼ Jiobá sti milagru nabé risaca: gundisaʼ laabe lade gueʼtuʼ casi ti espíritu (1 Ped. 3:18).
3. Xiñee de guidubi ladxidóʼ Jiobá bisibani Xiiñiʼ de lade gueʼtuʼ para cheʼ guibáʼ.
3 Jiobá bidii Jesús ti guendanabani ni qué ziuu dxi guinitilú, purtiʼ ante gueedabe lu Guidxilayú riʼ qué gápadibe ni (Heb. 7:15-17, 28). Ne de guidubi ladxidóʼ Jiobá bidii ni Xiiñiʼ, purtiʼ qué nucheené laabe neca gudiʼdiʼ ra jma nagana. Ne zacá bisihuinni Jesús cadi dxandíʼ ni guníʼ Binidxabaʼ ora na zuni binni ni na Dios purtiʼ racalaʼdxiʼ guicaa xiixa ne cadi purtiʼ dxandíʼ nadxiicaʼ Dios (Pro. 27:11).
4. 1) Xi biʼniʼ Jesús pur laanu dxi bibiguetaʼ guibáʼ, ne ximodo biiyaʼ Jiobá ni bíʼnibe que. 2) Ximodo runi sentirluʼ ora guiníʼ íqueluʼ ni biʼniʼ Jiobá ne Jesús pur lii.
4 Ne dxi maʼ nuu Jesús guibáʼ biʼniʼ sti cosa. «[Gu]níʼ né be Dios pur laanu» ne para nga biquiiñebe «rini pe stibe». Ne Bixhózenu ni nuu guibáʼ ca gucuaa ofrenda ni bidii Jesús para «gudixe [...] saca bixá stonda nu». Pur nga zanda «ibani nu casi na Dios ni nabani» ca ne zanda gúninu ni sin chuʼ xiixa ni guchiiñaʼ xquendabiaaninu. Nga nga ti razón jma risaca nápanu para guininu ca diidxaʼ ni ruzuluné Salmo 112 riʼ: «¡Lagusisaca Jah!» (Heb. 9:12-14, 24; 1 Juan 2:2).
5. 1) Xi naquiiñeʼ gúninu para cadi gusaana de gácanu binni runi ni jneza nezalú Dios. 2) Ximodo nexheʼ chaahuiʼ Salmo 111 ne 112.
5 Para cadi gusaana Dios de guʼyaʼ laanu casi binni runi ni jneza la? cadi naquiiñeʼ gusaananu de gápanu fe lu rini bixhii Jesús pur laanu. Cadi naquiiñeʼ gudiʼnu lugar tiidiʼ ti dxi sin gudiʼnu xquíxepeʼ Jiobá pur nadxii laanu stale (Juan 3:16). Laaca naquiiñeʼ guiduʼndaʼ chaahuinu Biblia ne gúninu stipa pur gúninu ni cusiidini laanu. Lu Salmo 112 zeeda stale conseju nabé sicarú para guiráʼ cani racalaʼdxiʼ gapa ti guendabiaaniʼ nayá nezalú Dios. Salmo 111 ne 112 ca ruzulúcani sicaríʼ: «¡Lagusisaca Jah!», o «¡Aleluya!». De racá maʼ zeeda ti poema de veintidós ndaa, cada ndaa ruzuluné tobi de ca veintidós letra stiʼ abecedariu hebreu.a
Tobi de ca cosa ni rucaa laanu chuʼnu nayecheʼ
6. Xi ndaayaʼ ricaa hombre ni cayeeteʼ lu Salmo 112 ca.
6 «Nayecheʼ nga hombre ni ridxibi Jiobá, ni nabé riuulaʼdxiʼ chinanda ca mandamientu stibe. Nadipaʼ zeeda gaca cani za de laabe. Ne cani za de ca binni runi ni jneza zacaacaʼ ndaayaʼ.» (Sal. 112:1, 2.) Lu versículo 1 ca bizeeteʼ hombre ni bicaa salmo ca de ti binni si, peru ra biluxe versículo 2 ca maʼ bizeetebe de stale binni purtiʼ maʼ guniʼbe «ca binni ni runi ni jneza». Ruluíʼ si cuzeeteʼ Salmo 112 ca de ti grupu ra nuu stale binni. Ne nabé risaca para laanu nga gánnanu biquiiñeʼ apóstol Pablu ca diidxaʼ ni cá lu Salmo 112:9 ora guniʼné ca xpinni Cristu de primé siglu que (biindaʼ 2 Corintios 9:8, 9). ¡Jnézapeʼ nga modo cusiene salmo ca ximodo zanda chuʼ ca xpinni Cristu nayecheʼ yanna riʼ!
7. Xiñee naquiiñeʼ guidxíbinu guchéʼnenu Dios, ne ximodo naquiiñeʼ guidúʼyanu ca mandamientu stibe.
7 Casi na Salmo 112:1 que, cani dxandíʼ xpinni Cristu ridxíbicaʼ Jiobá, ne pur nga nabé nayecheʼ nuucaʼ. Cumu ridxíbicabe gucheenécabe Dios la? racané nga laacabe cadi gúnicabe ni runi ca xpinni Binidxabaʼ. Laacabe nabé riuuláʼdxicabe gúʼndacabe Stiidxaʼ Dios ne chinándacabe ca mandamientu stibe, casi gucheechecabe stiidxaʼ Reinu lu guidubi naca Guidxilayú. Laaca rúnicabe stipa pur gacanécabe binni gaca xpinni Cristu ndaaniʼ stale guidxi ne rábicabe binni ni cadi cayuni ni jneza maʼ cadxiña dxi gunitilú Dios guiráʼ cosa malu (Eze. 3:17, 18; Mat. 28:19, 20).
8. 1) Xi ndaayaʼ huacaa ca xpinni Dios ni qué huasaana de guni ni nabe. 2) Xiruʼ ndaayaʼ zacaa cani chiguibani lu Guidxilayú riʼ.
8 Cumu rinanda ca xpinni Dios ca mandamientu stiʼ la? yanna maʼ nácacabe jma de gadxe millón lu guidubi naca Guidxilayú. Ñee cadi dxandíʼ nabé maʼ nadipaʼ cayaca xquidxi Dios la? (Juan 10:16; Apo. 7:9, 14.) ¡Ne zacaarúcabe stale ndaayaʼ ora guni Jiobá cani naguixhe ique! Guiráʼ cani cabeza guibani lu Guidxilayú riʼ zapa Jiobá laacaʼ lu ca dxi «jma nagana» ca, ne zeeda gácacabe «ti guidxilayú cubi» ra maʼ qué ziuu «enda nadxabaʼ». Guiráʼ binni ni guilá lu Armagedón ca «zacaacaʼ ndaayaʼ», ne jmaruʼ si ora guidxaagalúcabe guiráʼ ca binni ni guiasa lade gueʼtuʼ. ¡Guizáʼ sicarú nga ni cabézacabe ca! Ne óraca, guiráʼ cani riuulaʼdxiʼ chinanda ca mandamientu stiʼ Dios la? zácacaʼ binni sin donda ne zareecaʼ de «lu ná enda nayuudxuʼ» (2 Ped. 3:13; Rom. 8:21).
Iquiiñenu ca cosa risaca stinu ne guendabiaaniʼ
9, 10. Xi huayuni cani dxandíʼ xpinni Cristu pur nánnacaʼ de Dios, ne xiñee qué zusaana de gúnicabe ni jneza.
9 «Cosa risaca ne bidxichi nuu ralídxibe; ne qué zusaanabe de gúnibe ni jneza. Maʼ bizaanibe lu gueelacahui casi ti biaaniʼ para cani runi ni jneza. Nacháʼhuibe ne rilaseláʼdxibe ne rúnibe ni jneza.» (Sal. 112:3, 4.) Caadxi de ca xpinni Dios ni guyuu dxiqué gúpacaʼ stale bidxichi. Peru guiráʼ cani chuulaʼdxiʼ Dios ni guni la? zanda gaca ricu nezalube neca huaxiéʼ bidxichi nápacaʼ. Ne stale de cani ruzuubaʼ stiidxaʼ Dios huaxiéʼ nápacaʼ bidxichi, ne zándaca pur nga runi binni menu laacaʼ, cásica bíʼnicabe dxi bibani Jesús (Luc. 4:18; 7:22; Juan 7:49). Nga runi, pa ricu o pobre laanu la? guiranu zanda guizíʼdinu jma de Dios, ne zacá nga casi ñácanu ricu nezalube (Mat. 6:20; 1 Tim. 6:18, 19; biindaʼ Santiago 2:5).
10 Ca xpinni Cristu ni bibí rusiidicaʼ binni guiráʼ ni nánnacaʼ de Dios ne zacaca runi ca xpinni Cristu ni zeeda gaca xcaadxi dendxuʼ ca. Laacabe cuzaanicabe lu guidxilayú cahui stiʼ Binidxabaʼ riʼ «casi ti biaaniʼ para cani runi ni jneza». Ximodo rúnicabe nga yaʼ. Rúnicabe ni ora gábicabe binni pabiáʼ risaca nga gánnacaʼ de Dios ne pabiáʼ nuu xpiaanibe. Guiráʼ ni guni ca xhenemígucabe para gucueeza laacabe de gucheechecabe stiidxaʼ Reinu la? qué zabeendú gastiʼ. Pa ca xpinni Dios qué gusaana de guni ni jneza neca gápacaʼ guendanagana la? naquiiñeʼ ganna dxíchicaʼ zanda guibánicaʼ sin qué chuʼ dxi gáticaʼ.
11, 12. Xi para riquiiñeʼ ca xpinni Dios ca cosa risaca nápacaʼ.
11 Cani bibí ne cani zeeda gaca «jma binni» ni guilá ca nabé maʼ huadiicabe ca cosa risaca nápacabe para gacanécabe binni. Salmo 112:9 na: «Guiráʼ ladu maʼ gudiizibe; maʼ bidiibe ca pobre». Cani dxandíʼ xpinni Dios racanecaʼ ca bíʼchicaʼ ne ca bizáʼnacaʼ ni naca xpinni Cristu, dede ne ca xpesínucaʼ pa caquiiñecaʼ ni. Laaca rudiicabe cani nápacabe ora guizaaca xiixa desgracia. Ne riéchecabe ora gúnicabe nga casi guníʼ Jesús (biindaʼ Hechos 20:35 ne 2 Corintios 9:7).
12 Laaca naquiiñeʼ guiníʼ íquenu pabiáʼ riniti para gaca revista riʼ lu 172 diidxaʼ, stale de cani riníʼ ca diidxaʼ ca binni pobre laacaʼ. Ne cadi guiaandaʼ laanu laaca riree revista riʼ para cani qué riníʼ ne para cani qué ruuyaʼ.
Cani nachaʼhuiʼ ne runi ni jneza
13. Tuu nga cani rusihuinni nachaʼhuiʼ ne rudii, ne ximodo zanda chinándanu ejemplu stícabe.
13 «Galán nga ti hombre nachaʼhuiʼ ne rudii.» (Sal. 112:5.) Nánnanu cadi guiráʼ diʼ ora racané binni xcaadxi purtiʼ nachaʼhuiʼ o pur riá laacabe. Nuu tu rudii para guʼyaʼ si binni ne nuu xcaadxi maʼ caguicheruaacaʼ para gudiicaʼ. Dxandíʼ nga qué riuuláʼdxinu gacané tuuxa ni runi menu laanu o guiníʼ ique caziiñenu laa. Peru, ¡pabiáʼ sicarú nga ora gacané tuuxa laanu de guidubi ladxidóʼ! Ne Jiobá nga cudii laanu ejemplu ca, purtiʼ laabe riéchebe ora gudiibe (1 Tim. 1:11; Sant. 1:5, 17). Jesús laaca biʼniʼ cásipeʼ runi Bixhoze (Mar. 1:40-42). Ne pa racaláʼdxinu guʼyaʼ Dios jneza cayúninu la? nápanu xidé gudiʼnu ne guendanayecheʼ ne de guidubi ladxidoʼno, jmaruʼ si ora gusíʼdinu binni gunibiáʼ Dios.
14. Ximodo zanda gúninu ni jneza lu guiráʼ xixé ni gúninu.
14 «Cani gúnibe, jneza rúnibe cani.» (Sal. 112:5.) Casi maca bieeteʼ lu Stiidxaʼ Dios, rinanda mayordomo ca ley stiʼ Jiobá ora gapa cani bisaanané Xpixuaanaʼ laa (biindaʼ Lucas 12:42-44). Ne zacá rihuínnini lu ca conseju zeeda lu Biblia ni rudii ca binnigola ca ora chuʼ tu guni xiixa cosa malu lade ca binni ridagulisaa. Rihuinni jneza modo runi mozo ni nuu xpiaaniʼ ca dxiiñaʼ ni bisaanané Dios laa pur modo riquiiñecabe Biblia para gudiicabe conseju ca neza binni ridagulisaa, cani nuu ndaaniʼ ca yoo ra riaana ca misioneru, ne cani nuu ndaaniʼ ca Yoo Betel. Ni dxandíʼ nga cadi ca binnigola si nga naquiiñeʼ gúnicaʼ ni jneza, sínuque guiranu naquiiñeʼ gúninu ni lade ca binni ridagulisaa ne lade ca binni ni cadi naca xpinni Cristu, ne laaca zacaca naquiiñeʼ gúninu lu ca negocio stinu (biindaʼ Miqueas 6:8, 11).
Ndaayaʼ ni chiguicaa ca binni nachaʼhuiʼ
15, 16. 1) Ximodo rudxiilú ca binni runi ni jneza ca noticia ni cadi galán cayeeteʼ yanna. 2) Xi naguixhe ique ca xpinni Dios gúnicaʼ.
15 «Purtiʼ qué ziuu dxi gucaabiéquecabe laabe. Qué ziuu dxi gusiaandacabe binni runi ni jneza. Qué zadxíbibe pur ca noticia ni cadi galán. Runi crebe zacané Jiobá laabe. Cadi intiica si zaguu xizaa laabe; qué zadxíbibe, dede ora gúʼyadxibe ca xhenemígube.» (Sal. 112:6-8.) Dede biaʼ dxi huabani binni qué huayuu dxi gunadiaga cosa malu casi yanna riʼ. Gatigá cayunadiáganu de guendaridinde, cayuuticabe binni para guchíbicabe gobiernu, caree xcaadxi guendahuará ne cahuinni ca guendahuará ni guyuu dxiqué, nuu guendapobre, cayaca biidiʼ Guidxilayú riʼ ne careecabe lu binni. Ca binni cayuni ni jneza nezalú Jiobá, laaca runiná cani laacaʼ, peru qué ridxíbicaʼ. «Runi cr[éca]be zacané Jiobá laa[ca]be» ne «cadi intiica si zaguu xizaa» laacabe. Nánnacabe maʼ qué zandaa zareecani, purtiʼ mayaca guedané Dios ti guidxilayú cubi. Ne pa guizaacacabe xiixa desgracia la? jma nánnacabe ximodo gudxiilúcabe cani que xcaadxi binni purtiʼ nánnacabe zacané Jiobá laacabe. Laabe qué rudiibe lugar chuʼ xiixa ni gucaabieque laacaʼ, sínuque racanebe laacaʼ ne rudiibe stipa laacaʼ para gudxiilucaʼ ni (Fili. 4:13).
16 Ca binni runi ni jneza laaca runi huantarcaʼ cani nanalaʼdxiʼ laacaʼ ne rindisaʼ falsu luguiacaʼ, peru qué huayanda gucueezacaʼ laacabe ne qué ziuu dxi gúnicaʼ ni. Lugar de nga la? ca xpinni Dios cadi cusaanacaʼ de gúnicaʼ dxiiñaʼ bisaanané Jiobá laacaʼ: gucheechecaʼ ca diidxaʼ nacubi ne galán stiʼ Reinu ne gacanecaʼ binni ni gucaadiaga para gaca xpinni Cristu. Nanna dxíchinu ora jma maʼ zedadxiña dxi gunitilú Dios ca cosa malu riʼ jma zucaalú binni laanu, ne zacá zácani dede ora guiluxe gucaalú Binidxabaʼ, ni naca Gog de Magog ca, guiráʼ ca xpinni Dios ni nuu lu guidubi naca Guidxilayú. Óraca nga zadúʼyanu modo gunitilú Dios ca xhenemígunu. ¡Pabiáʼ sicarú nga guidúʼyanu ora gusisaca Jiobá lá! (Eze. 38:18, 22, 23.)
Zusisaca Dios laabe
17. Ximodo nga zusisaca Dios cani runi ni jneza.
17 ¡Guizáʼ nayecheʼ ziuʼnu ora guiranu gusisácanu Jiobá dxi maʼ cadi gucaalú Binidxabaʼ laanu ne ca xpinni! Dxandíʼ nga nayecheʼ ziuʼnu purtiʼ zacaanu guendanabani ni qué zaluxe ca pa qué gusaananu de gúninu ni jneza nezalú Dios. Qué zácacabe casi chigaca ca xhenemigu Jiobá, purtiʼ laabe maʼ guniʼbe zasaca ca binni runi ni jneza (Sal. 112:9). Nabé ziecheʼ ca xpinni Jiobá ora gúʼyacaʼ modo gunitilube ca xhenemígube ni cucaalú derechu nápabe para guni mandarbe.
18. Ximodo zaca ni na ca diidxaʼ ni zeeda ra ziluxe Salmo 112.
18 «Binni malu zuuyaʼ ne dxandíʼ zadxiichi. Zuxhidxilaya, ne dxandíʼ zanitilú. Qué zaca ni naguixhe ique ca binni malu.» (Sal. 112:10.) Maʼ cadi candaa diʼ zanitilú guiráʼ cani cucaalú xquidxi Dios. Guiráʼ ni racaláʼdxicabe gúnicabe para gunduuxecabe xquidxi Dios pur nápacabe envidia laacaʼ ne pur nanaláʼdxicabe laacaʼ la? zanitilúcani lu ca dxi jma nagana ca (Mat. 24:21).
19. Xi nanna dxíchinu zuni Jiobá.
19 Ñee zuuyaluʼ ora guni ganar Dios ca xhenemigu la? O pa gátiluʼ pur xiixa guendahuará o pur maʼ nagólaluʼ ante gunitilú Dios ca cosa malu ca, ñee zácaluʼ tobi de ca binni runi ni jneza ni guiasa de lade ca gueʼtuʼ ca la? (Hech. 24:15.) Zacá zaca ni pa qué gusaananu de gápanu fe lu rini bixhii Jesús ne pa chinándanu ejemplu stiʼ Jiobá, casi runi ca binni runi ni jneza ni zeeda gácacaʼ «hombre» ni rieeteʼ lu Salmo 112 ca (biindaʼ Efesios 5:1, 2). Jiobá qué zusiaandaʼ ca xpinni ne guiráʼ ni bíʼnicaʼ jneza. Qué ziuu dxi gusiaandabe laacaʼ ne qué ziuu dxi gusaanabe de gannaxhiibe laacaʼ (Sal. 112:3, 6, 9).
[Cani cá ñee yaza]
a Guiropaʼ salmo ca tobi si modo nexheʼ chaahuiʼ cani ne de ti cosa si caníʼcani. Salmo 111 ca nabé riniʼni de ca guenda stiʼ Jiobá, ne hombre ni ridxibi Dios ni rieeteʼ lu Salmo 112 nga rusihuinni ca guenda ca. Ne rihuinni zacá ni ora guchaaganu Salmo 111:3, 4 ne Salmo 112:3, 4.
Cani naquiiñeʼ guiníʼ íquenu
• Xi razón nápanu para guininu «¡Aleluya!».
• Xi cazaaca ca dxi stinu riʼ ni rusiecheʼ ca xpinni Cristu.
• Ximodo riuulaʼdxiʼ Jiobá gudiʼnu.
[Dibuju/foto ni zeeda lu yaza 25]
Para cadi gusaananu de gácanu binni runi ni jneza nezalú Dios la? naquiiñeʼ gápanu fe lu rini ni bixhii Jesús
[Dibuju/foto ni zeeda lu yaza 26]
Ora gudiʼnu de guidubi ladxidoʼno cayacanenu ora guizaaca xiixa desgracia ne para gaca libru ne revista ti guicaa binni cani