Bidxiña Dios
Tuu nga bixhoze ca bizabi
«BIXHOZE ca hombrehuiiniʼ ni maʼ guti bixhoze [...] nga Dios ni nuu guibáʼ.» (Salmo 68:5.) ¡Ca diidxaʼ ca rusihuínnicani pabiáʼ racalaʼdxiʼ Jiobá gacané binni! Laabe rápabe ne rudiibe ni caquiiñeʼ cani cayacaná, casi ca baʼduhuiiniʼ ni maʼ guti bixhoze o jñaa. Lu Ley ni bidii Jiobá ca israelita que rihuinni pabiáʼ nga rizaaláʼdxibe ca binni riʼ. Guidúʼndanu ni lu libru stiʼ Éxodo 22:22-24, raríʼ nga primé biaje rieeteʼ lu Biblia de «ti hombrehuiiniʼ ni maʼ guti bixhoze».a
Ley que na: «Cadi naquiiñeʼ guninatu [...] ti hombrehuiiniʼ ni maʼ guti bixhoze» (versículo 22). Ne ca diidxaʼ riʼ rudiʼnu cuenta cadi gudxi si Dios ca israelita que zanda guiacaʼ binni, sínuque guniʼbe nápacaʼ xidé gúnicaʼ ni. Ca baʼduhuiiniʼ ni gueeda gati bixhoze la? riaanacaʼ stúbicaʼ ne qué rápacaʼ tu gudii ni iquiiñecaʼ ne gapa laacaʼ. Ngue runi, guníʼ Dios cadi guninácabe tuuxa ni maʼ guti bixhoze, o casi na sti Biblia cadi «uquiichinácabe laa». Guidúʼyanu pabiáʼ nga risaca para Dios gúnicabe ni.
Jiobá guníʼ lu Ley que: «Pa guninaluʼ laabe ne guni nga gucaabe ridxi naa la? dxandipeʼ zucaadiagaʼ laabe» (versículo 23). Lu versículo riʼ guniʼné Dios guidubi guidxi que casi ora ñácacaʼ ti binni si. Zacá bisihuínnibe naquiiñeʼ guni guirácabe ni na mandatu gudíxhebe que. Laaca bisihuinni Ley ca ruuyaʼ Jiobá ne rucaadiaga ora guinabaʼ cani maʼ guti bixhoze que gacanebe laacaʼ, ne nuube listu para gúnibe ni (Salmo 10:14; Proverbios 23:10, 11).
Yanna, xi zuni Dios pa guninácabe ti bizabi ne gucaa ridxi laabe para gacanebe laa yaʼ. Jiobá guníʼ: «Dxandipeʼ zadxiicheniaʼ laatu, ne zuuteʼ laatu ne espada» (versiculo 24). Ti libru na zeeda ca diidxaʼ ni cá lu versículo ca de «caadxi diidxaʼ ni riníʼ binni ora maʼ cadxiichi» ne riniʼni «zaca nandáʼ xiee». Ne cadi ti juez israelita diʼ nga chiguni juzgar ca binni ni guniná ca bizabi ca, sínuque Dios peʼ nga chiguni ni (Deuteronomio 10:17, 18).
Jiobá qué ruchaa diʼ modo laa (Malaquías 3:6). Dede yanna riabe ca bizabi (Santiago 1:27). Nga runi, pa guninanu ti baʼduhuiiniʼ ni maʼ guti bixhoze o gucaʼnu laa guni xiixa cosa malu la? zuchiichinu Jiobá purtiʼ laa nga Bixhózecabe. Binni ni gacalaʼdxiʼ guniná o iquiiñeʼ laacabe para guni xiixa cosa malu, zusabanáʼ Jiobá laacaʼ (Sofonías 2:2). Zuni sentírcabe pabiáʼ «naná zaca para cani cuchee ora gueda guiaba ca lu ná Dios ni nabani» (Hebreos 10:31).
[Cani cá ñee yaza]
a Diidxaʼ riʼ zeedani cuarenta biaje lu Biblia. Nécapeʼ lu diidxaʼ hebreu ra gucuani primé que cuzeeteni de ti hombrehuiiniʼ la? ora gudixhe Dios Ley ni gucuaa Moisés que laaca cuzeeteni de dxaapahuiiniʼ ni maʼ guti bixhoze (Números 27:1-8).