Cani ruundaʼ revista riʼ racaláʼdxicaʼ gánnacaʼ

Ñee Dios nga rusabanáʼ binni ora gapa guendanagana la?

Ora guidxaagalú binni xiixa guendanagana, zándaca guiníʼ ique Dios nga cusabanáʼ laa. Zándaca ora gaca huará tuuxa, guizaaca xiixa desgracia o málasi gueeda gati ti binnilidxi, guiníʼ ique Dios nga cuseendaʼ ca guendanagana ca para laa. Ñee cadíʼdiluʼ lu xiixa guendanagana zacá la?

Pa zacá ni, ziécheluʼ ora gánnaluʼ qué riuulaʼdxiʼ Dios gacananu, sínuque guibáninu nayecheʼ. Ora bizáʼ Dios Adán ne Eva, guluube laacaʼ ndaaniʼ ti paraísu guizáʼ galán, laani nga «jardín ni guyuu Edén», raqué ñándaca nibánicabe sin ñuucabe xizaa ne qué ñápacabe guendanagana (Génesis 2:15).

Peru Adán ne Eva qué ninacaʼ nuzuubacaʼ stiidxaʼ Jiobá Dios, bidxiidéchecaʼ guiráʼ ni bidiibe laacaʼ. Ni bíʼnicabe que bedaneni stale guendanagana para laacabe ne para guiráʼ xiiñicabe. Xiñee yaʼ. Guzéʼtenu ti ejemplu. Pa ti hombre qué náʼ quixe yoo ra nabezané ca binnilidxi la? guirácabe zacanácabe purtiʼ zareecabe de ndaaniʼ yoo ca. Ngaca nga ni bizaaca dxi bidxiideche Adán ne Eva Dios, dede ne laanu cayuniná ni. Nga runi cayaca stale desgracia yanna (Romanos 5:12). Pur guiráʼ ndiʼ, Job ti hombre ni bizuubaʼ stiidxaʼ Dios dxiqué, guníʼ pa ñaca niguubiáʼcabe ca guendanagana stiʼ lu «ti balanza» la? jma nanaa ñácacani que «ca yuxi ni nuu guriá nisadóʼ» (Job 6: 2, 3).

Laaca rápanu guendanagana ora rúninu xiixa cosa ni cadi jneza. Guzéʼtenu sti ejemplu: guníʼ ique guziʼluʼ ti yoo ni zuba ti lugar ra nabé ruxooñeʼ riesgu guicá guí. Ñee cadi caguuluʼ binnilídxinu ra naxoo pa chibíʼneluʼ laacaʼ raqué la? Ne pa málasi nicá guí raqué, ñee niníʼ íqueluʼ Dios ngue bisabanáʼ lii la? Nga runi, naquiiñeʼ guiníʼ íquenu ante gúninu xiixa, casi na Biblia: «Tuuxa ni nahuati runi cré intiica gábicabe laa, peru ti binni nuu xpiaaniʼ la? riníʼ ique ante guni xiixa» (Proverbios 14:15).

Guiranu nga rápanu guendanagana. Peru Dios na maʼ qué zandaa zabee guiráʼ ni runiná laanu. Ora guidxiña dxi ca maʼ qué zápanu ca guendanagana ca ne qué liica zunadiáganu de laacani. Maʼ qué ziuu binni triste, maʼ qué ziuu yuubaʼ nin guendaguti (Apocalipsis 21:4). Biblia laaca ruzeeteʼ maʼ guirutiʼ tu zuniti lidxi nin cosecha stiʼ pur xiixa guendaridinde stiʼ ca guidxi ca o pur xiixa desgracia, sínuque ziuʼnu nayecheʼ ne guiráʼ ni gúninu (Isaías 65:21-25).

Yanna, laga cabézanu cuee Dios guiráʼ ca desgracia ca, ximodo zanda gudxíʼlunu cani o xi zanda gúninu para cadi guizaacanu cani yaʼ. Biblia cayabi laanu: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ» (Proverbios 3:5). Nga runi, gunabaʼ Jiobá gacané lii ne quixhedxí ladxidoʼloʼ. Ne naquiiñeʼ gúniluʼ ni na ca conseju ni rudiibe laanu lu Stiidxabe. Zacá zanda quixhe íqueluʼ gúniluʼ ni jneza para cadi guninapeʼ ca guendanagana ca lii (Proverbios 22:3).