Ni rinabadiidxaʼ cani ruundaʼ

Pa gati ti baʼduhuiiniʼ ante gale, ñee ziásabe de lade gueʼtuʼ la?

Cani qué huayati ti xiiñiʼ ante gale zándaca nagana zaca para laacaʼ gánnacaʼ xi runi sentir ca binni ni gati xiiñicaʼ zacá. Caadxi de laacabe nabé riuubaʼ ladxidoʼcaʼ ora guizaacacaʼ zacá. Casi ti xpinni Cristu ni láʼ Cristina, laabe gudiʼdiʼ xiiñibe gaayuʼ biaje. Ne neca despué gúpabe chupa xiiñibe ne bisiniisibe laacaʼ la? nabé bietenaláʼdxibe dxi guca xiiñibe ca baʼduhuiiniʼ ni qué ñale que. Biaʼ dxi bibánibe gúnnabe panda iza ñapa ca xiiñibe pa nibánicaʼ. Yanna, ñee zanda cueza ca binni ni gati xiiñicaʼ zacá guiasa xiiñicaʼ de lade gueʼtuʼ neca qué ñálecabe la?

Qué gánnadinu pa ziásacabe de lade gueʼtuʼ, purtiʼ Biblia cadi cuzeetepeʼ pa ziasa ca baʼduhuiiniʼ ni guti ante gale. Peru lu Stiidxaʼ Dios zeeda caadxi textu ni zacané laanu gatadxí ladxidoʼno.

Yanna chiguicábinu chupa guendarinabadiidxaʼ. Primé, pora nga ruzulú xquendanabani ti binni para Jiobá: casi gaca xiiñiʼ ti gunaa la? o dxi maʼ guleʼ xiiñibe. Guiropa, ximodo ruuyaʼ Jiobá ti baʼduhuiiniʼ ni caʼruʼ gale: casi ti binni la? o casi célula si ne guidiladi. Zeeda caadxi textu lu Biblia ni zacané laanu guicábinu cani gunabadiidxanu ca.

Lu Ley ni bidii Dios Moisés que na ruzulú xquendanabani ti binni dede ora nuuruʼ ndaaniʼ jñaa ne cadi óraruʼ maʼ gule. Ngue runi, pa tuuxa gapa donda pur gati ti baʼduhuiiniʼ ni caʼruʼ gale la? laaca zati. Ley que na: «Napuʼ xi gudiiluʼ guendanabani pur guendanabani» (Éxo. 21:22, 23).a Nga runi, ti baʼduhuiiniʼ ni nuuruʼ ndaaniʼ jñaa la? maʼ nabánibe ne maʼ nácabe ti binni. Ni maʼ bidúʼndanu ca maʼ gucaneni millón de xpinni Cristu guiénecaʼ cadi jneza diʼ nga gutiidiʼ xiiñicaʼ purtiʼ ti pecadu nabé malu ni para Dios.

Casi maʼ bidúʼyanu ca, ruzulú xquendanabani binni casi gaca xiiñiʼ jñaa laa. Yanna, ñee risácabe para Jiobá la? Ley ni maʼ bizéʼtenu ca na zati binni ni gapa donda pur tiidiʼ xiiñiʼ ti gunaa. Nga rusihuinni nabé risaca xquendanabani baʼduhuiiniʼ ca para Dios. Ne stáleruʼ textu zeeda lu Biblia caníʼ para Jiobá maʼ ti binni nga ti baʼduhuiiniʼ ni nuu ndaaniʼ jñaa neca caʼruʼ gale. Casi rey David gúdxibe Jiobá ca diidxaʼ riʼ: «Gupa chaahuiluʼ naa ndaaniʼ jñaa. [...] Guieluluʼ biiyaʼ naa dxi nácaruaʼ ti embrión, ne lu libru stiluʼ maca cá xi guiráʼ zeeda luni, casi ca dxi gúcacani» (Sal. 139:13-16; Job 31:14, 15).

Jiobá laaca ruuyaʼ ximodo xpiaʼ ti baʼduhuiiniʼ ne xi zanda guni. Casi dxi naca xiiñiʼ Rebeca, xheelaʼ Isaac que, Jacob ne Esaú la? bizulú gudíndecaʼ ndaanibe. Ngue runi, guníʼ Jiobá xi gueeda gaca ne guiropaʼ baʼduhuiiniʼ que, nga rusihuinni biiyaʼ Jiobá xiixa ni zazaaca despué pur modo laacabe (Gén. 25:22, 23; Rom. 9:10-13).

Sti ejemplu ni nápanu nga Juan ni Riguunisa. Tobi de ca Evangeliu ca na: «Casi bina diaga Elisabet stiuxi [María] biniibi dxacha badu huiini que ndaaniʼ, ne bidxá ladxidóʼ Elisabet de Espíritu Santu» (Luc. 1:41). Lu textu ca biquiiñeʼ doctor Lucas ti diidxaʼ griegu ni riquiiñeʼ binni para guiníʼ de ti baʼduhuiiniʼ ni nuuruʼ ndaaniʼ jñaa ne para tobi ni deruʼ gule. Ne ngueca nga diidxaʼ biquiiñebe para guniʼbe de Jesús dxi nexheʼ ndaaniʼ ti currá (Luc. 2:12, 16; 18:15).

Ne cani maʼ bidúʼndanu ca, ñee zanda guininu riníʼ Biblia gadxé nga ti baʼduhuiiniʼ ni nuuruʼ ndaaniʼ jñaa ne gadxé nga tobi ni deruʼ gule la? Ruluíʼ si coʼ. Ne ni guninu ca biáʼsipeʼ ni ne modo rusiene ca científicu ca. Laacabe nácabe runi sentir ti baʼduhuiiniʼ ni caʼruʼ gale. Nga runi, qué ridxagayaadinu nabé rannaxhii baʼduhuiiniʼ ca jñaa ne zaqueca jñaabe neca nuurube ndaaniʼ.

Cadi guiráʼ diʼ baʼduhuiiniʼ rizaa xpeeu ora gale. Guiníʼ íquenu ti gunaa ni gupa ti xiiñiʼ ni caʼruʼ guizaa xpeeu ne gudiʼdiʼ si chupa chonna gubidxa guti baʼduhuiiniʼ que. Ne guiníʼ íquenu sti gunaa ni bizaa xpeeu xiiñiʼ, peru guti ndaaniʼ jñaa chupa chonna gubidxa ante gale. Yanna, ñee jneza nga guiníʼ íquenu primé gunaa ni guninu ca nga ziasa xiiñiʼ de lade gueʼtuʼ purtiʼ si gule xiiñibe la?

Casi maʼ bidúʼyanu ca, Biblia rusiidiʼ ruzulú xquendanabani binni casi gaca xiiñiʼ jñaa laa ne laaca rusiidini laanu risaca para Jiobá ti baʼduhuiiniʼ ni nuuruʼ ndaaniʼ jñaa ne maʼ ti binni laa. Ne cani maʼ guninu ca, zanda gucaacani caadxi xpinni Cristu guiníʼ ique cadi jneza nga guininu qué ziasa ca baʼduhuiiniʼ ni gati ante gale. Ne dede zándaca guníʼ íquecabe zucaa ni laanu maʼ cadi chinándanu ni cusiidiʼ Biblia ra na cadi jneza nga gutiidiʼ xiiñiʼ ti gunaa.

Dxiqué biʼniʼ revista riʼ caadxi guendarinabadiidxaʼ ni ruluíʼ rucaani binni guiníʼ ique qué ziasa diʼ ca baʼduhuiiniʼ ni gati ante gale. Tobi de ca guendarinabadiidxaʼ ni bizeeteʼ ni nga pa zaguu Dios ti embrión ndaaniʼ ti gunaa para guizaa xpeeu ora maʼ guni Dios guidxilayú riʼ ti paraísu. Peru despué de biindaʼ chaahuiʼ Grupu ni Zaniruʼ ca ne guníʼ íquecaʼ de tema ca ne biʼniʼ orarcaʼ la? zanda guiniʼcaʼ nin tobi de cani huanabadiidxanu ca qué zuchaa diʼ ni rusiidiʼ Biblia ra na ziasa binni de lade gueʼtuʼ. Jesús guníʼ: «Gasti ni nagana para Dios» (Mar. 10:27). Ne dxandíʼ ca diidxaʼ ni bidúʼndanu ca pur ni bizaaca Jesús, purtiʼ guluu Dios xquendanabánibe ndaaniʼ ti binnidxaapaʼ, ti cosa ni na binni nagana para gaca.

Yanna, ñee riníʼ nga ziasa ca baʼduhuiiniʼ ni gati ndaaniʼ jñaa de lade gueʼtuʼ la? Racaláʼdxidu guinidu cadi cacabi diʼ Biblia guendarinabadiidxaʼ ca, nga runi qué zanda diʼ guinidu ziásacabe. Cumu tema riʼ zándaca gucaani binni guinabadiidxacaʼ stale cosa la? jma jneza nga cadi guiníʼ íquenu xi zaca o xi qué zaca ne laacabe. Jiobá nga nanna xi guni ne laacabe ne nánnanu nabé nadxiibe binni ne guizáʼ rilaseláʼdxibe laacaʼ (Sal. 86:15). De guidubi ladxidoʼbe racaláʼdxibe cueebe guiráʼ yuubaʼ rapa binni pur guendaguti ne para nga zandísabe cani maʼ guti (Job 14:14, 15). Nanna dxíchinu zúnibe ni jneza. Laabe zabeebe yuubaʼ ni bisaanané guidxilayú stiʼ Binidxabaʼ ca laanu, purtiʼ maʼ gúdxibe Xiiñibe «uchiá xhiiña binidxabaʼ» (1 Juan 3:8).

[Cani cá ñee yaza]

[Dibuju/foto ni zeeda lu yaza 13]

Jiobá zabee guiráʼ yuubaʼ ni bisaanané guidxilayú stiʼ Binidxabaʼ riʼ laanu