Rietenalaʼdxuʼ la?

Ñee biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

• Xiñee nabé risaca para laanu ca xpinni Cristu cadi guchéʼnenu Dios.

Purtiʼ ora gúninu ni rusihuínninu ruzúʼbanu stiidxaʼ Jiobá pur nadxiinu laa ne laaca rusihuínninu laasibe nga nápabe derechu guni mandarbe, zacá nga zusihuínninu rusiguii Binidxabaʼ. Ne laaca risaca para laanu nga cadi guchéʼnenu Jiobá, purtiʼ laabe zuuyabe ca cosa ni gúninu jneza ora guni juzgarbe laanu (15/12, yaza 4-6).

• Gunáʼ nga ca título ni rusihuinni dxiiñaʼ ni zanda guni Jesús si lu cani naguixhe ique Dios guni.

Laacani nga tobi lucha Xiiñiʼ Dios, Diidxaʼ, Amén, Ni biquiiñeʼ Dios para biʼniʼ ti pactu cubi, Xaíque stiʼ cani ruzaaquiʼ guʼxhuʼ ne Ni za de gunaa que (15/12, yaza 15).

• Xi naquiiñeʼ gúninu para chuʼnu jma nayecheʼ ora gucheechenu diidxaʼ.

Ora maʼ cayuʼnu listu para gucheechenu diidxaʼ la? naquiiñeʼ guiníʼ íquenu pabiáʼ zacanenu binni. Laaca risaca nga gucaa íquenu guzulú guidúʼndanenu binni de Biblia. Yanna, pa qué náʼ binni gucaadiaga laanu la? galán guyúbinu xcaadxi modo para ganda guinínenu laacabe de Biblia (15/1, yaza 8-10).

• Ximodo racané cani rusiidiʼ Biblia ca xpinni Cristu para gánnacaʼ ximodo gúʼyacaʼ ca costumbre ni runi binni ora gati tuuxa binnilidxi.

Neca ruunaʼ ca xpinni Cristu ora gati tuuxa binnilidxi la? nánnacabe maʼ qué liica ganna ca gueʼtuʼ ca gastiʼ. Nga runi, neca riníʼ binni mal de ca Testigu la? qué rinándacabe nin ti costumbre ni rusihuinni runi cré binni zanda guniná ca gueʼtuʼ ca binni. Para cadi chuʼ xiixa guendanagana la? nuu tu rucaa lu guiʼchiʼ ximodo racalaʼdxiʼ gucaachicabe laa (15/2, yaza 29-31).

• Ñee naca «libru stiʼ Jasar» ne «libru ra cayeeteʼ de ca guendaridinde stiʼ Jiobá» tobi de ca libru stiʼ Biblia ni biniti la? (Jos. 10:13; Núm. 21:14.)

Coʼ. Zándaca nácacani ca libru ni caníʼ de historia ni bizeeteʼ caadxi hombre ni bicaa Biblia dxiqué. Peru nin tobi de laacani cadi Dios diʼ guníʼ xi guicá lúcani (15/3, yaza 32).