Cadi jneza xhudxi binni

Biblia cayabi laanu cadi jneza nga tiidisunu lu intiica cosa. Dede ne ora guidoʼno dxiña yaga cadi jneza guidóʼ xhaatanu ni, purtiʼ zándaca guni nani laanu (Pro. 25:27). Ngaca nga runi vinu binni ne xcaadxi clase nisa dxuʼniʼ ni bidii Jiobá laacaʼ, laabe nabe cadi jneza tiidisunu ora guideʼnu cani. Ora gueʼ xhaataʼ binni ni ne cadi chinanda ca conseju ni zeeda lu Biblia ra cayeeteʼ ximodo gueʼ ni la? maʼ qué ziuu galán ne Jiobá ne zucaani laa guni ni cadi jneza ne dede zándaca guuti ni laa. Ne rihuinni zacá ni lu ca conseju ni rudii Biblia ne ca ejemplu zeeda luni (Pro. 23:29-31).

Nuu binni cadi naquiiñeʼ gueʼ nisa dxuʼniʼ, nin caadxi huiiniʼ purtiʼ zanda guni huarani laa. Ne nuu biaje naquiiñeʼ gucueeza binni laa de gueʼ nisa dxuʼniʼ para cadi gucaa stobi guchee ne purtiʼ nadxii binni ne rusihuinni riene xcaadxi binni (Rom. 14:21).

Jiobá gudxi cani ruzaaquiʼ guʼxhuʼ ne ca levita záticaʼ pa guecaʼ xiixa nisa dxuʼniʼ ora gúnicaʼ xhiiñacaʼ ndaaniʼ tabernáculo que o ndaaniʼ yuʼduʼ que (Lev. 10:8, 9; Eze. 44:21). Zanda guécabe ni sin tiidisúcabe ora cadi cayúnicabe xhiiñacabe (1 Cró. 9:29). Ora maʼ cayúnicabe xhiiñacabe Biblia na: «Cadi naquiiñeʼ gueʼ ca rey ca vinu, ne cadi naquiiñeʼ guiníʼ cani runi xhiiñaʼ gobiernu: “Paraa nuu vinu ni ruxhudxi pue”», pacaa zucaani laacaʼ «gusiaandacaʼ cani nexheʼ gaca ne pur nga maʼ cadi jneza guni juzgarcaʼ binni ni cayacaná» (Pro. 31:4, 5). Ca binnigola stiʼ ca neza binni ridagulisaa naquiiñeʼ gácacaʼ «tobi ni qué rixudxi ne qué ruyubi diidxa», ne ca siervu ministerial laaca naquiiñeʼ guibánicaʼ jneza ne cadi xhúdxicaʼ (1 Tim. 3:3, 8).