Zaniisinu ndaaniʼ xquidxi Dios pa gacanésaanu
GUIRÁʼ cani nuu ndaaniʼ ti familia galán gacanésaacaʼ para ganda guiniisicaʼ ndaaniʼ xquidxi Dios. Dxi bizáʼ Jiobá primé hombre ne primé gunaa guniʼbe naquiiñeʼ gacanésaacaʼ: Eva naquiiñeʼ gacané Adán (Gén. 2:18). Nga runi lu ti guendaxheelaʼ cásica hombre zaqueca gunaa naquiiñeʼ gacanésaacaʼ (Ecl. 4:9-12). Cani maʼ bichaganáʼ ne ca xiiñicaʼ galán gacanésaacaʼ ti ganda gúnicaʼ dxiiñaʼ ni maʼ bidii Jiobá laacaʼ.
Guni adorarnu Dios ne binnilídxinu
Barry ne Heidi nápacaʼ gaayuʼ xiiñicaʼ ne maʼ huayuuyacaʼ galán gacanésaacaʼ para cadi gusaanacaʼ de gúʼndanecaʼ binnilídxicaʼ Biblia ne guiniisicaʼ lu stiidxaʼ Dios. Barry guníʼ: «Gatigá rudieeʼ ca xiiñidu dxiiñaʼ ni zanda gúnicaʼ ante gúʼndanedu laacaʼ Biblia. Nuu tiru rinabaʼ laacabe gúʼndacabe xiixa tema ni zeeda lu revista ¡Despertad! ne guiníʼcabe xi biindacabe ora maʼ cadúʼndadu. Laaca ribeedu tiempu para guni ensayardu xi guiníʼ cada tobi de ca xiiñidu ora maʼ chigucheechedu diidxaʼ». Heidi laaca guníʼ: «Cada tobi de laadu nápadu ti lista ra nucaʼdu xi guiráʼ naguixhe íquedu ugaandadu ndaaniʼ xquidxi Dios ne gatigá ridúʼyadu cani ora maʼ cadúʼndadu Biblia para gúʼyadu xi guiráʼ maʼ bigaandadu». Guendaxheelaʼ riʼ maʼ biiyacaʼ galán nga cadi gúʼyacaʼ televisión chupa chonna gueelaʼ lu ti semana ti cadi chuʼ xiixa ni guchiiñaʼ binnilídxicaʼ ora maʼ cayuundacaʼ Biblia.
Ca guendaridagulisaa
Mike ne Denise bisiniisicaʼ tapa xiiñicaʼ. Xi guleendú binnilídxicaʼ ra gucanésaacaʼ yaʼ. Mike guníʼ: «Nuu tiru qué rindadu tempranu ca guendaridagulisaa ca neca maʼ gudixhe íquedu ni, peru bidiʼdu cuenta zanda gúnidu ni pa gacanésaadu». Denise guníʼ: «Dxi guca ca xiiñeʼ nahuiiniʼ, bicaʼdu laacabe gúnicabe xiixa dxiiñaʼ. Casi, dxaapahuiiniʼ xiiñidu Kim gucanebe gaca guendaró ne guiá lu mexaʼ». Xiiñibe Michael na: «Cumu gúpadu guendaridagulisaa ralídxidu ca martes huaxhinni la? gupa xidé bisiadu, biʼniʼ aspirardu ne bizuhuaa chaahuidu banguʼ». Matthew, stobi de ca xiiñicabe guníʼ: «Bixhozeʼ ruyubi modo guedandá tempranu de dxiiñaʼ ca gueelaʼ nápadu guendaridagulisaa ne ruuyabe chuʼ guiradu listu». Xi huabeendúcabe yaʼ.
Stale ni zabeendunu pa gacanésaanu
Mike na: «Naa ne Denise bizuludu de precursor lu iza 1987, ne dxiqué nabezaneruʼ xhonna xiiñidu laadu ra yoo. Xiiñidxaapadu ne tobi de ca hombrehuiiniʼ stidu laaca gúcacaʼ precursor ne xhupa de laacabe huayacanecaʼ cuí yoo Betel. Sti ndaayaʼ ni huayapa familia stidu nga huayacané cuarenta binni guiziidiʼ de Jiobá ne chúʼnisacaʼ. Naa ne binnilidxeʼ laaca huayacanedu cuí yoo para gaca adorar Jiobá dede huaseendacabe laadu chigacanedu sti guidxi».
Casi maʼ bidúʼyanu ca, stale nga ni zabeendunu pa gacanésaanu. Ñee caníʼ íqueluʼ sti modo zanda guni binnilídxiluʼ ni la? Pa guiratu gúnitu stipa pur gacanésaatu la? zacaneni laatu guiniisitu lu Stiidxaʼ Dios.
[Dibuju/foto ni zeeda lu yaza 28]
Rizíʼdidu gucheechedu diidxaʼ jma jneza ora runi ensayardu